#بنات_حجي_عمران
#الفصول_الاربعة
#للكاتب _ محمد_ ابو جود
#البارت_الثاني_عشر
لا تنطي روحَك تره مو كل بَشر آني
" بآچر أذا زًعِلَك مآ راح تلگاني "
ما تلگة مثلي يهدلَك الحيّل ..
نعسان بس يسهرلك الليل !
يعتذر منك وأنت غَلطان
و من اليغثَك دوم زَعلان
بالمُختَصر : لا تحِب لا يأذونَك
خايف تثق بـ بشر ما يفهَم عيونَك
بس خلي أعله بآلَك، بآچر تعيّش
ومَحد يسألَك بآيعه بـ بيّش
ويآهو اليگلَك ليش مآ ليّش ..
بس البجنحَك هذا يآ ريّش ؟!
خلي أعله بآلك تُبقى طَيري
ومَحد يعَوضَك عَني غيّري .
سمر : ضلينا بالطريق و جبنة اكل و قمر مسوية كليجة و ضلينا بين ناكل و نسولف و نضحك تقريباً 4 ساعات دخلنا الناصرية و ضلينا نسئل لحد ما وصلنا منطقة الشيخ فيصل ابو اركان
وصلنا للمنطقة و هم سئلنا على بيتهم دلونة عليه وصلنا كانت منطقة كلش حلوة و خضار و ريحة الماي ع الثيل و طين المزارع تارس المكان كلش طيبة
كانت بيت الشيخ جبير حيل و بصفة 3 بيوت عاديات صغار طبكنة السيارة و نزلنا
شفنا مجموعة مال ولد شباب واكفين
قمر : حجت بصوت ناصي كالت خرب باعي الولد اشكد حلوين
اماني : ولج عيب استحي
سمر : ترى ما كالت شي جذب شوفيهم اشكد حلوين
قمر : باعي ابو الدشداشة السودا
سمر : لا ولج ابو التراكسود الرصاصي احلى .. اكلج اماني عادي اسلم ع الولد و اباوسهم
اماني : ولجن امشن عيب دا يباعون علينا
سمر : اتمشينا ع الشباب الواكفين و همة ما قصرو اكلونا اكل بعيونهم
اماني : السلام عليكم
الشباب : و عليكم السلام
اماني : هذا بيت الشيخ فيصل
اركان : اي نعم هذا بيت الشيخ فيصل و اني اركان ابن الشيخ
لبنى : خوية فدوة لطولك رايدين الشيخ بموضوع كلش مهم و على الله و ع الشيخ
اركان : اي حياجن و الجايات بي تاخذنة و ترحن
اماني : رحم الله والديك
سمر : رحنة ويا اركان ابن الشيخ و دخلنا للبيت الجبير دخل هوا كدامنا و احنة دخلنا تلكنة النسوان سلمنا عليهن و كعدنا
اركان : هسة شوي و يجي الشيخ فيصل بس هسة هوا بالمضيف يما ناس
اماني : ماشي خويه رحم الله والديك ما قصرت
سمر : بس فدوة مو يتأخر لان جايات من بغداد و ما نكدر نتأخر
اركان : ان شاء الله هسة جاي ما يتأخر لا تخافن
سمر : طلع اركان و احنة كاعدات و ام اركان عرفتنة عليها و على بناتها و الموجودات اجت بنية جابت ماي رادت تقدم بس اماني كلتلها
اماني : لا عيني لا ناكل و لا نشرب اذا ما الشيخ ينطينا الي جاين عليه
ام اركان : يا يمة الي جايين بي تاخذو محد اجة لبيت الشيخ و طلع زعلان اشربن الماي و كلشي جايات عليه ترحن بيه
اماني : ادري بيكم اهل طيب و كرم و خير و ناس اجاويد بس مع ذلك ما نشرب الماي اذا ما يجي الشيخ
ام اركان : هسة يمة ادز مرة ثانية عليها و اخلي يستعجل
سمر : كامت ام اركان تشوفلها واحد يصيح للشيخ و اني اتقربت من اماني و حجيت بصوت ناصي
سمر : صدك جذب جان خليتينا نشرب الماي
اماني : لج غبية الشيوخ و خاصة اهل الجنوب لمن ما تقبلين تاكلين و لا تشربين ابيتهم معناها كمشتيهم من ايدهم التوجعهم و بهل طريقة ينطوج الي تردينة و حتى لو كان صعب و يجوز يطلع الشيخ هوا حارم ام وسيم من وسيم
سمر : والله و طلعتي داهية .. دخلت ام اركان كالت هذا اجة الشيخ .
دخل الشيخ و ابنة اركان و الولد الي لابس دشداشة سودا الي قمر كالت عليه حلو سلم الشيخ علينا و كعد
شيخ فيصل : هاي شنو سمعت خطارنا ما راضي يشرب حتى الماي
اماني : شيخ اني الادري لمن ما ناكل و لا نشرب ابيتك معناها كمشناك من ايدك التوجعك و اني اليوم صدك اريد اكمش ايدك التوجع
شيخ فيصل : ههههه اهلا بيك اهلاً و سهلا بوية اشربن الماي و كلشي نحجي
سمر : لا شيخ خلي نحجي الي نريدة و بعدين نشرب و حتى ناكل بس ها كون ناخذ الي نريدة
شيخ فيصل : احجي بوية و تاخذونة وعد مني ولو كان يكلفني روحي
اماني : يسلمك الله و يحفظلك اولاد و يطول عمرك
سمر : بهل اثناء دخلت مرة عمرها تقريباً بداية الاربعين
ام وسيم : السلام عليكم
الكل : و عليكم السلام
الشيخ فيصل : هلا بيج ام وسيم تفضلي حياج
لبنى : بس سمعت اسم ام وسيم شهكت و كمت بسرعة و صحت بصوت عالي
لبنى : ام وسيمم
سمر : من كامت لبنى كلها استغربت و صفنت عليها اني بسرعة كرصت ايدها و كلتلها اشششش لبنى اكعدي ... كعدت لبنى
اماني : الحمدلله من اجت ام وسيم لان احنة موضوعنا يخصها
ام وسيم : يخصني انة خير شصاير
اماني : كل خير ان شاء الله احجيلهم سمر
سمر : شيخ اول مرة خلي احجيلك سالفة
شيخ فيصل : اي بوية اسمعج
سمر : اني سمر ابوية شيخ عشيرة ***** اسمة حجي عمران النداف
شيخ فيصل : لا اله الا الله انتي بنت حجي عمران الي انقتل
سمر : اي شيخ اني بنتة
شيخ فيصل : و النعم منج و من ابوج انسان خير من قبل لا يصير شيخ و هوا الة افضال علينا الف رحمة و نور عليه
سمر : المهم شيخ اني طالبة مرحلة اولى طب اسنان و هاي صديقتي قمر و هاي لبنى هم طالبات اسنان و هاي دكتورتنا اماني
شيخ عدنا بالجامعة ولد ما نريد نذكر اسمة يضحك ع البنات بحجة الحب و العلاقات و يضحك عليهن يسحب صورهن و يضل يهدد بيهن و يسحب فلوس منهن لهنا تمام
الشيخ فيصل : للأسف هيج يسوي زحمة محسوب ع الزلم
سمر : لكن اني اعذرة هذا الولد لان اتربة في بيئة غلط من جان عمرة سنة امة و ابو انفصلو و بيبيتة ربتة لحد ما صار عمرة خمس سنوات ماتت بيبيتة ضل بالشوارع و صار مو خوش ولد لان لا ام لا اب لا عمام لا خوال يعني بين قوسين ربتة الشوارع فصار ما هوا عليه الان برأيك الصوج بالولد لو بالاهل الي ضيعو الولد
الشيخ فيصل : اشهد بالله الصوج بالاهل الي تعوف ضناها بوية اذا تردن اني مستعد احسب للولد هذا راتب شهرية اشكد ما يريد من الالف للعشر ملايين بس خلي يعوف سالفة الضحك على عرض و شرف الناس
سمر : تسلم شيخ ربي يبارك بيك و يزيدك من خيرة المطلوب منك مو فلوس المطلوب منك تساعد هل ولد ينجمع ويا امه حتى من يشوف عندا عائلة و اهل يترك هل طريق الغلط
شيخ فيصل : اها خوش بوية و اني مستعد اجيب امه لو بأخر الدنيا
سمر : ام الولد قريب حيل عليك ... الشيخ باوع لولدة و باوع للنسوان الكاعدة و رجع باوعلي و كال
الشيخ فيصل : احلفج بالله احجي و جني عرفت قصدج منو
سمر : باوعت على ام وسيم و كلتلة صار الوقت ام وسيم تنجمع بابنها وسيم و تلم ابنها قبل لا يضيع اكثر ... بس كملت كلامي كامت ام وسيم و حجت بصوت عالي
ام وسيم : يمةةةة وسييييمممم و سيممم عايش ابني عايشششش و طاحت للكاع تخربطت
كلها التمت عليها و الشيخ صاح ع البنات جابن مي و يرشون عليها بالكوة كعدت اول ما كعدت باوعتلي و كالت
ام وسيم : بروح ابوج و تراب كبرة ابني وسيم عايش
سمر : الله يخليج خالة كومي شدي حيلج و احجيلي الي تعرفينة انتي حتى اني احجيلج الاعرفة
كومو ام وسيم كعدوها ع التخم بصف الشيخ و بدات تسولف
ام وسيم : من جبت وسيم من صار عمره سنة اكتشفت ابو وسيم واحد خاين و عندا شقة يجيب اشكال و انواع من البنات بنات الليل
تخبلت بوقتها و تعاركت ويا و لميت ملابسي و رجعت لاهلي و عفت وسيم عند ابو ورة فترة وصلني بلاغ المحكمة ابو وسيم طلكني ردت اخذ وسيم لكن ابو وسيم ما قبل و حاربني لحد ما مرة رحت لبيتهم لكيتهم شايلين والله العظيم سنة كاملة بالكوة انام و هاي ام اركان شاهدة اكعد من الفجر انة و اخوي ابو اركان و نسئل و ندور بلكت نوصل وين راحو لحد ما ناس دلوني عليهم رحت جان بوقتها عمر وسيم سنتين دكيت الباب طلعتلي حبوبة وسيم
ام وسيم : اريد ابني وينة بس خلوني اشوفة حرام عليكم
حبوبة وسيم : انتي شبيج تخبلتي يا وسيم يا دنيا
ام وسيم : شنو يا وسيم وسيم ابني وينة
حبوبة وسيم : اذا تردين تعاي فتشي البيت اذا تلكينا اخذيه
ام وسيم : ليش وينه
حبوبة وسيم : من اطلكتي ورة طلاكج بشهرين اتمرض كلش وسيم و حرنة بي من دكتور لدكتور محد عرف علته لحد ما مات
ام وسيم : تخبلت بوقتها لطمت ملخت نفسي صرخت بجيت و بالكوة كمشني ابو اركان و الله شاهد نمت بالمستشفى شهر ونص بالكوة اتحرك و هاي اني و هاي قصتي كل الي اعرفة وسيم مات و حبوبة وسيم هم ماتت
اماني : حسبنا الله و نعم الوكيل يا عيني ام وسيم ترى وسيم عايش و هسة هوا ولد شاب الف صلات ع النبي عليه شاب مشورب و ويا البنات مرحلة اول طب اسنان
سمر : ضلت ام وسيم تبجي بحركة گلب و كامت كعدت يمنا كالت فدوة ما عدجن صورة لوسيم
لبنى : اني عندي صورتة هاي
طلعت لبنى صورت وسيم بالموبايل و انطتها لام وسيم
و ام وسيم خطية تبوس بالصورة و تبجي
ام وسيم : يمة فدوة ابني شحلاتك باوع خوية باع ابني يخبل
سمر : أشرت على لبنى و كلت خالة ام وسيم ترى هاي حبيبت وسيم يعني هاي جنتج المستقبلية
ام وسيم باوعت على لبنى حضنتها و تصيح والله الا ازفج بيدي لوسيم
ام وسيم : يلة كومو نروح هسة لوسيم
الشيخ فيصل : هههه انطي مجال يصير الغدا و نغدي خطارنا و نروح اني وياج و البنات
اماني : لا تسلم شيخ عسا ربي يعمر دياركم بس ما نكدر نتأخر ياريت هسة نروح
سمر : الشيخ مصر نتغدا و احنة اصرينة نروح لبغداد و فهمنا موضوعنا انو اهلنا عبالهم احنة بكربلاء عاد اقتنع و طلعنا لبغداد و لحكونا الشيخ و ام وسيم بسيارة الشيخ
ساعة 3 الظهر وصلنا للعمار الي يسكن بيها وسيم صعدنا كلنا للشقة مالتة دكينا الباب و خلينا ام وسيم توكف بالباب كلنا ع الاطلاق متوترين حيل فتح الباب وسيم صفن علينا و ضل صافن بوجه ام وسيم
الشيخ فيصل : السلام عليكم
وسيم ما رد السلام و ضل صافن بوجه امة ما اعرف اذا عرفها لو لا او يمكن گلبة حن لان عيونة دمعت تقدم خطوة كالة بهمس يمة و وكعت دمعت و حضن امة حيل و ضل يبجي و ام وسيم يبجي
اكثر من عشر دقايق متحاضنين و يبجون و حتى اني و اماني و لبنى و قمر نبجي وياهم يعني صدك كان مؤثر موقفهم دخلنا جوة بعد ما سلم ع الشيخ و كل شوية وسيم و امة يتحاضنون
سمر : اشلون عرفتها امك و انت من صغير ما شايفها
وسيم : عندي صورة الها و هي بنية شابة و دائما جنت انام و انوم الصورة بصفي
لبنى : هاي جبنالك امك اتمنى انك تغير من حياتك لان اني و امك ما عدنا غيرك
سمر : وسيم يباوع للبنى و مبتسم و حجينالة كلشي صار و امة فهمتة موقفها و اشلون عبالها ميت و ضل وسيم خطية يتشكر من عدنا و يحضن بامة و يبجي
سمر : ولكم كافي كافي عيوني ورمت من وراكم و يلة كوم وسيم جيبلنا غدا ترى ميتات جوع
وسيم : والله تدللون احلى غدا يخدم عيونكم
سمر : راح وسيم يجيب اكل من برة و احنة كمنة نصلي اقل الساعة و اجة وسيم جايب كباب و دجاج و صمون و كعدنا ناكل و ام وسيم كلش فرحانة و كاعدة بين وسيم و لبنى و كل شوية تسوي لكمة للبنى لو لوسيم و وسيم يبوس بيدها
نسيت كل التعب من شفت فرحت وسيم و ام وسيم
كملنا اكل و سوينا جاي و اني و لبني و اماني و قمر طلعنا نرجع لبيوتنا و وسيم و امة و الشيخ طلعو للناصرية وسيم يتعرف على خوالة و هم يبقى يومين و يجيب غراض امة و يجي
دكتورة اماني وصلت لبنى انوب قمر و انوب وصلتني
وصلت للبيت ساعة 5 فتحتلي الباب ورد سلمت عليها و دخلت لكيت سحر و عايدة و جوري و جعفر و بيبي لبابة بس الوجوه مكلوبة
سمر : خير ان شاء الله شبيكم صاير شي
عايدة : لمن راحت سمر للناصرية و احنة عبالنا لكربلاء بنفس اليوم عمي حازم و صبري راحو لديالى اكو فاتحة و عمة فردوس و خالة منيرة راحو لام ماجد مريضة راحن يشوفنهة و نور و ورد و سحر راحن للسوك و بقينا اني و جعفر و جوري و بيبي لبابة بالبيت اندكت الباب راحت جوري فتحتها طلعت رحمة من شفتها طلعت للحوش و كلتلها
عايدة : ها خير شرايدة عندج خراب جديد
رحمة : باعو لا واصلة يمكم و لا كرباكم خلي اختج سحر تبتعد عن زوجي اشرفلها
عايدة : عيني سحر لا محتاج القندرة مالتج ذو الفقار و ولا واصلتلة كفي بلاج احسن ما تشوفين شي ما يعجبج
جوري : اكلج شو انتي ابيتنا و تهددين و صوتج عالي امشي ولي روح لزوجج الله ياخذج و ياخذة
رحمة : خلي سحر تبتعد من ذو الفقار احسن ما يصير شي اندمكم عليه
جوري : لاااااا انتي تردين واحد يربيج من جديد تعاي ... جريتها من حجابها و هي كمشتني من شعري و تكافشنة
عايدة : جنت كلش متحملة على رحمة و اتمنى اكتلها و هاي العركة اجتني ركضت على رحمة و جريتها من الجبة و ركعتها بالكاع و هجمنا اني و جوري و هي تخرمش بينا و احنة توليناها راشديات و صريخ تارس الشارع طبن خالة منيرة و عمة فردوس يركضن و نزل جعفر ركض بالكوة وخرونة من عدها
عمة فردوس : شبيجن انجلبتن
جوري : بعدج ما شايفة شي ... ركضت على رحمة و ركعتها دفرتين على بطنها و صحت هذا النغل يموت اشرفلة من تكونين انتي امة و ابو النكس المطي مالتج
عايدة : صح كتلنا رحمة بس ابد ما كنت اتمنى ينضر الجنين من جوري ضربتها فوراً ضلت تنزف خالة منيرة و عمة فردوس ركضوا عليها
فردوس : ولك جعفر اركض وكف تكسي الطفل اضنة مات
عايدة : طلع جعفر يركض جاب تكسي بسرعة و خالة و عمة شالن رحمة و طلعن بيها للمستشفى و جعفر وياها ضلينا صافنات ع الباب اني و جوري ما اخفيكم خفت حيل والله
دخلن نور و سحر و ورد كالن شبيجن واكفات هنا
سحر : من دخلت للبيت و شفت منظر عايدة و جوري عرفت اكو مصيبة شفت دم ع الكاع لطمت على خدي و كلتلهن
سحر : هاي شنو الدم
نور : يمة اسم الله شنو هل دم
حجية لبابة : تعالن جوري و عايدة بسرعة
عايدة : دخلنا ويا بيبي عبالي راح تحجي ترزل تغلط شو هاي كعدت و كالت تعالن اكعدن يمي
كعدنا يمها بوستنا و كالت اروح فدوة لهاي الايد الطكت هاي فحمة
جوري : هههههه بيبي اسمها رحمة
حجية لبابة : اتخسى تكون رحمة و غير فحمة ما تكون
سحر : شنو الموضوع شبيها رحمة
جوري : حجيتلهن كلشي شو هذني تخبلن علينا
سحر : صدك جذب شبيجن مخبلات شنو هل تصرف السز هل تصرفات مال بنات الشوارع مو بنات بيوت متربيات
نور : عتبي عليج انتي عايدة انتي يا الصيدلانية الجبيرة الرزنة الثكيلة ما اعتب على جوري عبنها مراهقة انتي شبيج
ورد : ترى لو صار شي للجنين و حق ربجن تشتكي عليجن و تذبجن سجن ليش هل تصرف الارعن
حجية لبابة : خايبات انجبن و انطمن العيارات الخايبات امداجن و روح ابوي لو ما سكتن من عايدة و جوري اكوم افصخ عظامجن بهل عكازة
نور : اني كايمة اروح للمستشفى خلي اخابر جعفر وين اخذهن ... خابرت جعفر كالي ع المستشفى رحتلهم لكيت
جعفر و عمة فردوس و خالة منيرة و عمتي ام ذو الفقار و ذو الفقار و كلها وجوهة مكلوبة
نور : السلام عليكم
ام ذو الفقار : لا هلا بيج عسا ربي يطيح حظجن يا برابيك يا كح*** يا بنات الكلب
نور : غلطج كلة اسكت عنه لانج عصبية بس و روح بابا لو جبتي طارية ابوية ما تلومين الا نفسج
ام ذو الفقار : هوا لو عرف يربيجن جان ما حجيت عليه
نور : حيل استفزتني بكلامها تقربت عليها و لويت ايدها و حجيت و اني صاكة على اسناني كلتلها للمرة الثانية احذرج لو حجيتي على ابويا ما تلومين الا نفسج افتهمتي
اجو جعفر و خالة منيرة جروني منها
نور : شصار على رحمة
خالة منيرة : مات الطفل
نور : كلش انقهرت لان مهما كانت العلاقة الخربانة بيناتنة يبقى الطفل بريء من كلشي باوعت لذو الفقار كلتلة
نور : ما اعرف اشلون اعتذر عن الي صار و اشلون اواسيك بخسارتك بس اي شي تريدة اني جاهزة الة حتى اعوضك عن خسارتك اعترف بغلط بعايدة و جوري والله لو كنت موجودة ما جنت سمحت بهل شي يصير
ذو الفقار : هاهية كلشي ما اريد منكم اصلاً اني ما معترف لا بطفل و لا برحمة
نور : رحت على جهة و خابرت سحر كلتلها
سحر : من خابرتني نور و كلتلي حيل ضجت و تعصبت و خاصة حسيت نور انذلت و هي تعتذر من ذو الفقار ما كدرت احجي لان عايدة و جوري كاعدات يم بيبي لبابة
حجية لبابة : ها شتكول اخيتج
سحر : بيبي مات الطفل والله حرام
حجية لبابة : الله يرحمة و يعوضهم عود
عايدة : والله حيل اتندمت لان تعاركت وياها و هي حامل و خطية راح ابنها
بس الظاهر غلطنا اني و جوري اني راح ادفعة وحدي و الثمن غالي حيل راح ياخذ مني هواي و ما كنت محسبة حساب لهذا الشي
نور : للمغرب يلة طلعوا رحمة
رحمة : لا تضنين هل موضوع اعبرة لخواتج و الا ادفعهن الثمن غالي و هسة بوجهي رايحة اشتكي عليهن
ذو الفقار كمش ايد رحمة حيل و صك على اسنانة و كاللها
ذو الفقار : لج احترمي نفسج احسن ما اذبحج هنااااا
رحمة : بس بسببهن ابنة مات
ذو الفقار : رحمة انتي تزحلكتي و الطفل وكع نقطة راس سطر يلة منتظرجن بالسيارة
نور : ذو الفقار راح بسرعة طلع و رحمة التفتت علية و كالتلي
رحمة : بسيطة ما راح اشتكي بس الا اندمجن بسيطة وحدة وحدة جايتجن
جعفر : احترمي نفسج و ولي منا
ام ذو الفقار : احترم نفسك امداك صاير عربانة عند بنات بهية
جعفر : تنجبين و تسكتين لو اخلي الاطباء هسة يحتارون بيج
نور : كافي جعفر امشي ... طلعنا من المستشفى رجعنا للبيت بس ولا كدرنا نحجي ويا عايدة و جوري لان بيبي تتعارك ويا الي يحجي وياهن رجع عمو حازم و كلنالنة كلشي و هم ما كدر يحجي وياهن بسبب بيبي
حجية لبابة : انة كلتلهن يكتلنها شني تالي عمري تريد بناتك يعصلي كلمة
عمي حازم : يمة مو هيج يضربن المرة يوكعن طفلها حرام حراااام
عايدة : عمو هي دخلت علينا مجلوبة مدري شبيها
جوري : اي والله بابا و مو اني الاسكت على وحدة ابيتي و تهدد بية
نور : والله شسوي بيجن رحمة حيل وياجن
سحر : شنو سمر شو لا تعليق
سمر : شحجي تعبانة اريد اصعد انام
خالة منيرة : بيج شي يمة
سمر : لا خالة بس درب الناصرية يتعب ... بالغلط كلت الناصرية من كلت الناصرية كلهم حجو مستغربين
الكل : الناصرية ؟؟؟
سمر : ههههه يا ناصرية باع اني قصدي كربلاء و النجف و الحل و تعرفون طريق و زيارة و هوسة و خاصة كربلاء زيارة قوية اليوم اروح انام نعست
صعدت ركض خرب اشلون جفصت كدامهم ثاني يوم ما داومت ما بية حيل جريتها نومة للظهر من كعدت لكيت لبنى متصلة علية للعصو و رجعت اتصلت عليها
لبنى : عندي خبر يجنن
سمر : خير ان شاء الله احجي
لبنى : وسيم البارحة بليل خابرني و راد رقم امي دزيتة الة و ام وسيم خابرت امي و اخذت موعد منها حتى تجي يشوفني النسوان و اذا قبلو انوب عود يجون الزلم و اني هم كعدت ويا امي و ضليت امدح بوسيم ساعة و نص ههههه سويتة ملاك من الجنة
سمر : الله يتمملكم على خير
لبنى : الله عليج بالخطبة كون موجودات
سمر : عوزها ما نجي غير اجي و اني اشيل الخطبة شيل بلكت وحدة عدها ولد حلو و تاخذني الة
لبنى : هههههه ان شاء الله
سمر : اوووع اسم الله ... سديتة من لبنى و كملت شغلي و مرت الايام و الحمدلله لبنى و وسيم انخطبو بس أجلو العرس ما يردون هسة بس حالياً عقدو سيد حتى تطلع ويا على راحتهة و الحمدلله كدرنا نساعد وسيم و تغير 360 درجة
و دائما يتشكر من عدنا مرت الايام و الاسابيع و الاشهر ماكو شي جديد بحياتنا و اليوم واكفات نحظر نفسنا لعرس ورد بعدنا ما ذابات الاسود و اني و سحر و نور و جوري جبنا فساتين محجبات لون اسود و كلش حلوات طلعنا
ويا اليوم يمر سنة و 3 اشهر على وفاة اهلي
سمر : واكفات كدام المرايا و مخبوصات و نعدل بنفسنا محتارة كل شويا اكول يمكن طالعة مو حلوة و جوري تكلي ديلة عاد والله حلوة بس امشي خلي ننزل
كملت و نزلنا اني و جوري الكل فرحان و يضحك شوية و اجن نور و خالة منيرة جابن ورد من الصالون دخلت مثل الاميرات بالبدلة البيضة كلها ضلت تهلهل بس دخلت و الكل فرحان
اي اي اليوم عرس ورد مرن سنة و 3 اشهر على موت اهلي و القصاص اخذنا مربع و بيت منهل خرجو من بكارة ابيهم
جنت واكفة و اباوع بالوجوه وجه وجه لكل وجه حكاية و خفايا ما يعلمها بس الله لكن كل سر ما يموت الا يصير معلن امام الكل واكفة و اباوع
خالة منيرة و فرحتها و بيبي لبابة و ام ماجد يصلن ع النبي و يقرن معوذات لان فعلاً ورد طالعة تجنن الله يسعدها يا رب
حجية لبابة : ان شاء الله عيونة تطفى الما يصلي على النبي
الكل : اللهم صل على محمد و ال محمد
حجية لبابة : صلن بعد على محمد
جوري : يااا حبوبة صدك جذب شني اول وحدة تتزوج
سمر : حيل جنة فرحانات شوية و اجو اهل الولد اخذو ورد خوش ولد و معدل و شاغول و وحيد اهلة
عمو حازم سلم ورد للولد و كان حيل حزين عمو حازم لان حيل يحب بناتة
عمو حازم : هاي اسلمك وردة بيتي و نبض كلبي و نفسي هاي بنيتي و روحي من الدنيا أمانة الله و محمد رسول الله تخليها بعينك و ما تقصر وياها
فؤاد (زوج ورد ) : الله شاهد عمي اخليها بعيوني و بگلبي
ام فؤاد : خوية ابو جعفر بنتك بنتنا ماكو داعي توصي حريص
عمو حازم : روحي بنتي ربي يحفظكم و ينور دربكم و يرزقكم المال و البنون
ورد حضنت عمو حازم و ضلت تبجي بالكوة سكتها و صعدوها بالسيارة و طلعنا زفيناهم لبيت الولد لليل رجعنة كلنا بس خالة منيرة بقت يم ورد
رجعنا مخنوكات للبيت كلش لان ورد مكانهة فارغ بس شنسوي هاي حال البنات لابد يجي يوم و يتزوجن و يشوفن حياتهن
من وصلنا للبيت شفت عمو حازم عيونة مبين جان يبجي حيل حنين على بناتة
عايدة : من خلصت دورت السنة مال بابا فرات رجع فتح الموضوع وياي و يريد يجي يخطبني
دكتور فرات : ترى ما يصير هيج احسج دا تضحكين علية هاي دورت السنة و خلصت اريدج ابيتي ليش ما جاي تفهميني
عايدة : فرات والله فاهمتك بس اني ما مستعدة بعدني والله
دكتور فرات : زين خلي اخطبج حتى تطلع نطب ناخذ راحتنا اتعرف على اهلج تتعرفين على اهلي
عايدة : زين انتظر خلي زواج بنت عمي يخلص و هم تعدي فترة على دورت السنة
دكتور فرات : أمنت بالله هم موافق أمري لله
عايدة : ورة الدوام من رجعت للبيت تغدينا و كملنا و صعدت حجيت ويا سمر
عايدة : فدوة سمر تعاي وياي باجر للجامعة
سمر : شكو شعندج متعاركة احجي هسة نروح احجي منو متعارك وياج والله انعل والدي احجي ولج منو كتلج
عايدة : استغفر الله خلي احجي شبيج انهديتي علية
سمر : ههههه احجي شكو
عايدة : اني مو حجيتلج على فرات اريد باجر تجين تتعرفين عليه
سمر : شسوي اتعرف عليه
عايدة : انتي من تشوفين الواحد اذا ترتاحيلة معناها زين و اذا ما ارتاحيتيلة معناها مو زين و اريدج تشوفين فرات زين لو لا
سمر : و انتي ان شاء الله ماخذتني فارة تجارب
عايدة : حباب عليج الله
سمر : اوكي اجي بس باعي بصراحة اني كلش مرتاحة لفرات و احسج راح ترتاحين ويا و تنسعدين لان مبين فرات خوشي وليد
عايدة : عابتلح وليد شنو كولي ولد كولي شاب
سمر : ان شاء الله افكر
عايدة : المهم تجين باجر مو
سمر : اي اي بس تاخذيني تغديني على حسابج
عايدة : همج على بطنج خوش اخذج
سمر : و غصباً عليج
سمر : ثاني يوم رحت ويا عايدة للجامعة مالتها تعرفت ع الدكتور فرات خوش ولد مبين اسلوبة حلو و راقي
فرات : يلة تعالن نتغدا برة
عايدة : لا لا ماكو داعي نريد نروح
سمر : تردين ترحين روحي الله وياج اني جوعانة
فرات : هههه يلة عايدة لا تسدينها بوجه اختج تريد تاكل
عايدة : يلة تمام خلي نروح
سمر : صعدنا ويا فرات رحنة لمطعم كعدنا ع الطاولة اجة النادل جابلنا المنيو قائمة الاكل كلبت بي ما عجبني اكلاتهم ما تشبع باوعت للنادل و كلتلة
سمر : ما عدكم تشريب دجاج تمن و مرك يابسة بامية
النادل : لا والله ست اكلاتنا اوربية بس
سمر : انهجم بيت اوربا وين اكو احلى من التشريب و يمه راس بصل و طرشي و خبز حار و نكعد كون بالكاع
فرات : ههههه اي والله ماكو احلى منها
عايدة : حيل فرحت لمن سمر ارتاحت لفرات و منطلقين يسولفون و يضحكون
سمر : المهم اني جيبلي كص دجاج و فنكر ... طلبنا اكل و راح
عايدة : طبعاً عندك اختي سمر تاكل و ما تسمن و هي 24 ساعة بس تاكل هههه
سمر : و عندك هاي اختي عايدة و اختي سحر حاطات عينهن علية و على اكلي
فرات : اصلاً ما اعتقد اكو وحدة بيحن بجمال و حلاوة عايدة
عايدة : كلش خجلت من كلام فرات بس اااااخ من سمر ما تسكت لازم تفشلني
سمر : هسة انت دا تتغازل بيها لو تستهين بجمالي
فرات : ههههه عايدة
عايدة : نعم
فرات : احبج
عايدة : ضليت ساكتة و مدنكة حسيت نفسي راح اطب جوة الميز
سمر : لازم هسة اني اكوم و اخليكم على راحتكم لو شنو
فرات : يعني المفروض ههههههههه
سمر : اتغدينا و كملنا و طلعنا وصلنا فرات لراس الشارع اتشكرنة من عندا و نزلنا
عايدة : ها سمر شنو رأيج بي
سمر : والله مبين خوش ولد خلي ورة عرس ورد يجي يخطبج
عايدة : جنت حيل فرحانة لكن فرحتي ما استمرت للأسف
بعد عرس ورد من رجعنا بليل بدت تظهر علية
اعراض غريبة.....
~~~~~~~~مشهد من البارت القادم~~~~~~~
سحر : اني و خالة و نور دا نحظر بالعشا و جانت خالة منيرة دا تگلي باذنجان و الدهن حار واكفة خالة منيرة يم الطاوة و سمعنا عياط عايدة خالة فزت و انكلب الدهن الحار على رجلها بس ما اهتمت صعدنا ركض لعايدة
يتبع...
رأيكم بالبارت و توقعاتكم للقادم و اشلون راح تكون حياة بنات حجي عمران النداف و شنو مصيرهن الي راح يواجهنة ♥
احبكم
اتمنى ما تنسون النجمة و التعليقات و بتفاعلكم الحلو تصعد القصة ♥️🙏
تحياتي
#للكاتب _ محمد_ ابو جود
للتواصل انستا author_abu_joud
للتواصل فيس بوك Mohammed Fadhel
لا تنسون اضافة قصة صفية عدكم و اريد منكم تصعدونها بالتعليقات ع الاعلان القصة موجودة بحسابي