ဘဝမှာ တစ်ကြိမ်တစ်ခါမှ အချစ်မခံခဲ့ရရင်လည်း အကောင်းသား။ အခုတော့ မစို့မပို့မေတ္တာလေးကို ငယ်ငယ်က ပိုင်ဆိုင်ဖူးခဲ့တော့ လူက အရသာသိပြီး လိုချင်နေမိရော။ မသိရင် နို့စို့နေရင်း နို့ပျောက်သွားတဲ့ ကလေးလို ဘယ်သူ့ကို အမေခေါ်ရမှန်းမသိ။ အခုလည်း သူစိမ်းတစ်ယောက်က နွေးနွေးထွေးထွေး ဆက်ဆံပေးလိုက်တာနဲ့ တစ်သက်လုံး တည်မြဲမယ်လို့ ထင်လိုက်မိသွားပုံ။
အသိဝင်စမ်းပါ အံ့မဟော်ရာ... သူလည်း လူတွေထဲက လူတစ်ယောက်ပါပဲ။
မင်းက လူတွေကို စိတ်ပျက်မယ် ဒါမှမဟုတ်ရင် မင်းကို လူတွေက စိတ်ပျက်မယ်။ ကြုံဖူးနေကျကို ဘာဆန်းလို့လဲ။ မင်း ကြုံဖူးနေကျပါပဲ...။
အတွေးတွေနှင့်အတူ ကုတင်ပေါ်တွင် ပက်လက်လှဲနေရင်း ခန္ဓာကိုယ်ကို တစ်ဖက်သို့ စောင်းလိုက်စဉ် နံရံပေါ်မှ ပြက္ခဒိန်ဆီသို့ မျက်လုံးက အကြည့်ရောက်သွားသည်။
ဒီနေ့ ဇွန်လ နှစ်ဆယ့်ငါးရက်နေ့...
အိပ်နေရာမှ ချက်ချင်းထကာ နံရံပေါ်ရှိ ပြက္ခဒိန်ကို ဒေါသတကြီး စုတ်ဖြဲပစ်လိုက်သည်။
ရောက်လာတော့မယ်...
သူ သိပ်မုန်းတဲ့ နေ့ သို့မဟုတ် သူ သိပ်ကြောက်တဲ့ နေ့။°°°°°°°
"မောင်... အံ့မဟော်ကို စာသင်ပေးနေတယ်ဆို၊ ကျူးဖြင့် မောင် စာပြပေးတာ တစ်ခါမှလည်း မတွေ့မိပါ့လား"
"ဒီလိုပါပဲ ကိစ္စလေးတွေ ရှိလို့ ခဏရပ်ထားတာ၊ ခုရက်ထဲ အံ့မဟော်အခြေအနေ ဘယ်လိုရှိလဲ ကျူး"
"ကျူး အိမ်ကို ပြန်ရောက်တဲ့ သုံးရက်အတွင်း အဲ့ကောင်လေးနဲ့ ငါးမိနစ်ပြည့်အောင် မျက်နှာချင်းမဆိုင်ဖူးဘူး၊ တစ်ခါတစ်လေ အိမ်မှာ သူရှိတာတောင် မေ့တဲ့အထိပဲ"
ကျူးစကားအရဆို ဒီကောင်လေး အိမ်မှာမနေဘဲ တစ်နေကုန် အပြင်ထွက်နေတာပဲ ဖြစ်ရမည်။ သူမရှိတော့ ပိုလွတ်လပ်ပြီး စာလည်း လုပ်မည်မထင်။ စာမလုပ်တာက အရေးမကြီး... တော်ကြာ အပေါင်းအသင်းတွေနဲ့ ပြန်ချိတ်မိပြီး ဆေးတွေဘာတွေ ပြန်သုံးရင် ဒုက္ခရောက်မည်။ ပြတ်သွားတာက သိပ်မကြာသေးတော့ အချိန်မရွေးပြန်သုံးနိုင်သည်။
အပိုင်း၂၅
Začít od začátku