Lamar Alzankna

السادس😒✌

وحدة من المتابعات الحلوات Aengl30   ان شاء الله اكدر بنصائحي افيدج

من نزلت نبذة عن حياتي سألت على السادس وكالت انو هيه عدها حلم تدخل مجال الرياضة وكلتلها ان شاء الله انزل بارت بس ع السادس بس جنت مشغولة بالايام الفاتت هسه عندي مجال كلت احجيلكم عنه للي عندة اي سؤال عنه او استفسار

اني مو طالبة متفوقة دراسيا بس ابد ما راسبة ولامكملة بأي سنة يعني كل سنة معدلي بين السبعينات والثمانينت المهم من دخلت للسادس واجهتني بعض العقبات والمشاكل المحيطة بيه وظروف وضغط الناس  ماقريت بشكل قوي لان اصلا جنت مقررة ادخل رياضة والرياضة متحتاج معدل قوي عطله المراجعة ماقريت بيها ولا راجعت وهاي اكبر غلطة جنت مطمئنة اني قارية الكتب باليومي لذلك ماراجعت الا باخر عشرة ايام قبل الامتحان ومالحكت لذلك معدلي جان قليل طلعت بالدور الاول معدل ٦١ وجنت مؤجلة درسين بالدور الثاني نزلت معدلي بعد اكثر وصار ٦٠  وهالشي تندمت عليه هسه من رحت للاختبارت وشفت اعداد المتقدمين خفت انو ما انقبل بيها ويضيع حلمي واني ما اشوف نفسي غير بالرياضة

يعني بالمختصر رحلتي بالسادس ماجانت ميمونة وناجحة بس الحمد لله نجحت وطلعت الكلية الي اريدها

نصائحي لطلاب السادس اعتبروها من اختكم

اول شي ابتعدي عن ال📱  لان هوة اصلا رأس البلة ويلهي الواحد عن دراستة هيه سنة زمان الغي الموبايل من حياتج وتتونسين وراها طول عمرج السادس سنة وحدة متتعوض وحرامات نعيدة من ورا مادة لو مادتين

ثانيآ التأجيل لتخلو ببالكم ابد لان يهبط الواهس ومتضوكون طعم فرحة النجاح وبالدور الثاني الاسئلة يصعبوها ويتشددون بالتصحيح لذلك لتخليها ببالج  واذا تكولين علمود اشوف معدلي ف أجلي الاسلامية اسهل مادة تكدرين تمتحنيها بالدور الثاني وانتي ضامنة النجاح

ثالثا والاهم كلام الناس وضغطهم لتخليهم يأثرون عليج ويكولولج صعب وماشبه من الامور السادس حاله من حال باقي المراحل كتب ودفاتر وامتحانات ميجيبون اسئلة من خارج الكتاب كله موجود بالكتاب

رابعآ فترة المراجعة اهم شي ضبطيها صح وقسميها وحطي الجدول كتاب سهل وورا صعب وورا سهل وورا صعب حتى يرتاح دماغكم

خامسآ محاضرات قبل الامتحان بيوم لو يومين ابد ما انصح بيها  اني كضيت الانكليزي من الرابع ابتدائي للسادس اعدادي مافديوم نزلت درجتي من ال٨٥  بس قبل الامتحان مال سادس بيومين رحت محاضرتين وتخربطت كل معلوماتي وضيعت وقتي عالفارغ لو جنت كاعدة وحدي ودارستة ورقة وقلم جان راح يكون افضل المادة الوحيدة الي بجيت بيها هيه الانكليزي لان طلعلي بي ٥٨ شبعت بجي بيومها وحتى قررت اعيد السنة بس الحمد لله عبرت

قبل لتدخلين الامتحان بساعة لتفتحين الكتاب وتراجعين ابد لان تخربطين وابتعدي عن الطالبات وصديقاتج لان راح يضلن يخوفن بيج ويوترنج بالزايد
اني من الخوف والتوتر تخربطت بالامتحانات عندي بطولات ويا فقدان الوعي والتخربط😁✌

النصائح نفسهن دانصح اختي بيهن ويشهد عليه ربي انتو خواتي👭

مثل ماذكرت فوك اني مو طالبة متفوقة حتى انصحكم من نفسي بس بالنسبة الي الامور الي تندمت عليهن ماريدكم تمرون بيهن لذلك ذكرتهن ويبقى الموضوع يمكم

اي احد عندة نصائح ع السادس خلي يذكرها بالتعليقات وتعم الفائدة

اي احد عندة سؤال ع السادس خلي يسأل بالتعليقات واني اجاوبكم وتدللون

بالتوفيق لكل طالب

سادس اعدادي❤

ثالث متوسط💜

سادس ابتدائي💚

ولكل طلاب المراحل غير المنتهية🌹

ان شاء الله النجاح والموفقية وتطلعون المعدل العالي وتدخلون الكلية الي ببالكم

كل طالب سادس خلي يكتب الحلم الي بداخلة  والمعدل الي يريد يطلعة والكلية الي يريدها بالتعليقات وسنة الجاية مثل هيج وكت نرجع ل هنا ونشوفكم محققين احلامكم ان شاء الله❤💜💚

حطو بين عيونكم حلم وهدف لان الانسان بدون هدف يضيع

اذا تحبون احجي عن الرياضة هم تدللون بس كولولي بالتعليقات ❤
سلامي للجميع وبالتوفيق

الكاتبة: Lamar Alzankna

❤❤❤❤❤❤❤❤❤❤❤❤❤❤❤❤❤احبكم❤❤❤❤❤❤❤❤❤❤❤❤❤❤❤❤❤