“သွားတော့” ရှို့ဟုန်လေ က သူမ၏ လက်ကို ဝှေ့ရမ်းလိုက်သည်။ သူနှင့် ဆက်လက် စကားပြောချင်စိတ်မရှိတော့သည်မှာ ထင်ရှားနေသည်။
အမိန့်တစ်ခု ရရှိလိုက်သကဲ့သို့ ကုယွဲ့ယီ ခံစားလိုက်ရကာ အလောတကြီး ထွက်သွားတော့သည်။
ရှို့ဟုန်လေ က သူမ၏ လက်ထဲတွင် ပင်လယ်ခရုခွံကို ဆုပ်ကိုင်ထားကာ သူမ၏ မျက်နှာတွင် အပြုံးတစ်ခု ပြန်ပေါ်လာသည်။
ယခုအကြိမ်တွင် သူမ၏ အကြံအစည်များ ပျက်စီးခဲ့ရခြင်းမှာ ချန်ရွှမ်း ၏ အမှားကြောင့်ဖြစ်သည်။ သို့သော်လည်း ကိစ္စများ ဆက်လက်အဆင်ပြေနေပါက ထိုသူသည် သူမ၏ စိတ်ဝင်စားမှု နှင့် ထိုက်တန်သည်မှာ သေချာသည်။
...
“ဟပ်ချိုး..” ချူအိမ်တော်သို့ ဇူအန် ပြန်ရောက်ရောက်ချင်း အေးစိမ့်မှုတစ်ခုဖြတ်သန်းသွားသည်ကို ခံစားလိုက်ရကာ သူ့ကို ကျယ်လောင်စွာ နှာချေစေခဲ့သည်။
သန့်ရှင်းသော အဝတ်အစားတစ်စုံလဲပြီးနောက် ချူချူယန် ၏ အဆောင်ဘက်သို့ အလျှင်အမြန်သွားလိုက်သည်။
ငါ ဝင်ဖို့ လမ်းကြောင်းတစ်ခုချန်ထားဖို့ကို သူသတိရပါ့မလားမသိဘူး။ ဇူအန် ကောင်းကင်သို့ တစ်ချက် အမြန်ကြည့်လိုက်သည်။ ခေါင်းပေါ်တွင် လမင်းကြီး ဝိုင်းစက်သာယာနေသည်ကို မြင်လိုက်ရသည်။ အချိန်မှာ အလွန်နောက်ကျနေပြီဖြစ်သည်။
ချူချူယန်၏ ခြံဝန်းထဲသို့ တိတ်တိတ်လေး ဝင်သွားလိုက်သည်။ ယခင်အဖြစ်အပျက်ဖြစ်စဉ်ကတည်းက အစောင့်အကြပ်အရေအတွက်ကို တိုးမြှင့်ရန် ချင်ဝမ်ယွီ ကိုယ်တိုင် အမိန့်ပေးခဲ့သည်။
ဤနေရာရှိ လုံခြုံရေးမှာ အမှန်တကယ် တင်းကြပ်လှသည်။ သို့သော် ဇူအန်တွင် အဆင့်မြှင့်ထားသော နေကြာပန်းသိုင်း ရှိနေသည်။ အစောင့်များ၏ မြင်ကွင်းကို မရှောင်လွှဲနိုင်သောအခါတွင်လည်း မဟာလေပြင်းကို အသုံးပြနိုင်သေးသည်။ ဤအရာများက သူ့ကို ပြဿနာတစ်စုံတစ်ရာမရှိစေဘဲ ဝင်ရောက်နိုင်စေခဲ့သည်။
ဇူအန် အလွန်ပင် စိတ်မကျေမနပ်ဖြစ်နေသည်။ ဒါက ဘယ်လိုမျိုးလဲ။ ကိုယ့်မိန်းမ အခန်းကို ဘာဖြစ်လို့ သူခိုးတစ်ယောက်လိုမျိုး ပြုမူသွားလာနေရတာလဲ။
ချိန်းဆိုထားသော ပြတင်းပေါက်အရှေ့သို့ ရောက်သောအခါ အခန်းထဲတွင် အလင်းရောင်များ ငြှိမ်းသက်ထားပြီးသားဖြစ်နေသည်ကို သတိထားမိလိုက်သည်။
ငါ့ မိန်းမ က တကယ်ကို ကြောက်တတ်တာပဲ။ မီးဆက်ထွန်းထားရင် သူများတွေ သံသယဝင်မှာကို စိုးရိမ်နေသေးတယ်။
ပတ်ဝန်းကျင်တွင် မည်သူမှမရှိနေသည်ကို သေချာအောင်ကြည့်လိုက်သည်။ ထို့နောက် သူ၏ လက်ကို ပြတင်းပေါက် အပေါ်သို့ တင်ကာ အသာအယာတွန်းလိုက်သည်။
