مشهد من الرواية
# جمانة
كل شي غريب عليه هنا
حياتهم اكلهم. شربهم. كل شي
حتى النفس هنا يختلف..وغير عن نفس اهلي..
........
دخلت للمطبخ..
قبل لا اتريك
كلت اكمل شغلي لان تاخرت اليوم
كعدت ب ٩ من النوم..
لان سحب ماكو كل شويه اكوم ابلل هدومي وانام ع الكاشي
منمت زين
جوعانه..
للازم انتظر عمتي تطلع وتفتح قفل المجمدة
والثلاجة
اطلع شي اتريك بي
شفت عمتي. ساجدة.. منكعه تمن..
بس هواية..
هي قبل لا تسبح كالت لفي كبه
زين اني شلف هسة بس هل التمن..
اخذت بصل ووكفت ع السنك اكشر بي واباوع
ع الكراج الشمس قوية... وتصكع بالحوش
شلون الدجاجات.. يدورن اكل بالحديقة..
حتى الدجاج ميت جوع..
..
كملت.. البصل..
اندارين اسمع عمتي تشحط بنعالها وفاتت للمطبخ انداريت عليها
لافه الخاولي
واجتي كعدت ع الكرويته الي خلاتها ع الحايط..
عمتي / هاا جمانه سويتي الحشو
جمانه / اي عمة هسة راح اثرم بصل..بس اريد اتريك
/ هسة شبيج مستعجله.. ع الريوك..
سوي الحشو وتريكي..
عصرت الخاولي ع شعرها..
واجت تقربت يمي
تباوع ع السنك وتباوع عليه..
بعيونها الجاحضة فتحتها اكثر
/ عزة بعينج هاي شمسوية بالبصل..
ودفعت ايدي وخري وخري
جرت من ايدي السجينه
/ اكو واحد هيج يكشر البصل مطيرته كله..
شهل التبذير زين لحكت عليج..
وتخزر بيه..
/ اتعلمي صيري مراه مدبرة دلال امج خلص..
/ بس عمة..
/ اسكتي اسكتي.. يلا عروس ومشيتها الج..
شالت الكشور كلها.. وبدات تقشرها من عبالك تنظف صدف سمج ع كيف وكالت
/ ثرمي يلا... وهاي كيلوين تمن وجبت لحم مصلحة
كيلو.. وسويته خمس شكف..
اخذي شكفه.. وسويها كبه للعشا..
بقيت صافنه عليها..
شلون يعني اقل الربع ويا كيلوين تمن
/ عمة مو قليل اللحم..
اندارت عليه وهي تغسل اديها
/ لا اسم الله شقليل بس سمي وهي تصير بركه
جبتلج ٤ باكات كرفس وثرمي بتيته و بصل ما وصيج هم طيري البتيته هيج ع كيف كشريها
ترة مدنبوك الفلوس
تسوين لو اجي اساعدج
جنج يامرت اياد راح تشلعين قلبي..
/ لا عمة ادللي بس امي جانت
تسوي مثلا كيلو تمن نص كيلو لحم وليه وياه
هزت اديها
/ امج برمكية وشعدها بطرك روحها وانتي..
باديها مشط اسود نص السنون الي بي واكعه
اخذته وطلعت بالكراج
شرت الخاولي..
وكعدت ع بلوكه خاليها بسد الحايط
وبدأت تمشط شعرها
صاحت
/ جمانه.. كشور البتيته وعضود الكرفس ثرميهن الدجاج
مكرودات جوعانات
ميشبعن الصبح انطيتهن بثل مال جاي..
مجلوعات...
يلا همي هسة رجلج وعمج جاين..
......
اين انا..
هذا ليس مكاني
وهذه ليست حياتي
وكأنما سرقت من كل احلامي ..
الى غابة مظلمه طريقها سراب
كل ما أشعر بأنني سوف أقترب أبتعد ....
ترقبوها قريبا
بإذن الله
سوزان خيري المندلاوي
شهرزاد
♥️
ملاحظة / اختاريت جمانه بدل السبيل لان مترهم قصة بعد قصه منقوله من رجل وبيها تشابهه بالاحداث
