ANG CHOOSY KONG MAHAL

Mahal ang sabi mo, hindi ako gwapo

Kaya ako’y dagling tumungo kay Belo

Ang kutya mo pa nga, ako’y sintunado

Kaya’t si Cayabyab, kinuhang maestro

Irog ang wika mo, ako’y di matangkad

Kaya’t nagtatalon, Cherifer nilaklak

Ang iyo pang puna, maitim ang balat

Kaya Glutathione, ininom kong lahat

Sinta ang sabi mo, ulo ko’y mapurol

Kaya si Kuya Kim, ginawa kong tutor

Iyo ring nabanggit, sakin ay nabo-bore

Kahit di marunong, i brought “heat on the floor”

Giliw ang bulong mo, ako ay tahimik

Kaya nagsisigaw, nag-amok sa gimik

Naaasar ka rin sa sobra kong bait

Kaya ang panty mo’y pino kong ginupit

Bakit ganun mahal, hindi pa sabihin?

Bakit paasa pa kung ayaw sa akin?

Lagi bang ganito, lahat babaguhin

Makuha ka lamang, lahat ay gagawin?

Kay lupit mo naman sa puso kong aba

Lahat ay ‘binigay, ako ay iniba

Sa kapintasan mo’y pikit aking mata

Putok mo’y tiniis, pagkat mahal kita!

__________________________~~*~~__________________________

Salamat sa panahong iniukol mo sa aking pahina - ito ang nagbibigay dahilan sa akin upang patuloy na sumulat at magbahagi. Sana'y mabasa mo rin ang iba ko pang mga tula at kwento at makalikha ako ng ngiti/luha sa 'yong mukha. Hindi ko sasayangin ang panahon mo. Lubos kong ikaliligaya kung makapag-iiwan ka ng iyong rekomendasyon, puna o anumang reaksyon patungkol sa aking akda.

Nagmamahal,

Sami Bathan de Ramos