“Thou shalt not assume.” Kung may 10 commandments din sana ang pag-ibig, malamang kasama na sa utos ang ‘wag maging assuming. Minsan kasi, hindi naman talaga paasa ang taong nagugustuhan mo, madalas ay assuming ka lang talaga.
Ewan ko ba kung bakit ang hilig-hilig nating mag-assume, partikular na ang mga kababaihan. Nag-“Hi!” lang sa’yo ang isang lalaki, iniisip mo, type ka niya agad. Nagkatinginan lang kayo, feeling mo may something na. Nagtanong lang siya sa’yo kung kumain ka na ba, pakiramdam mo, super concerned siya sa kalusugan mo. Nakasabay mo lang siya pauwi, iniisip mo na agad na liligawan ka niya. Sinabihan ka lang niya ng ingat, feeling mo mahal ka na. Porke ba nag-text siya ng wala lang, miss ka na agad?
Hay buhay nga naman, oo! Hilig talaga nating magbigay ng kulay sa mga bagay-bagay. Eh paano kung para sa kanya kaya lang siya nag-hi sa’yo ay dahil nakasalubong ka lang sa daan? Paano kung katabi mo pala ang tinitignan niya? Paano kung gusto ka lang niyang paalisin sa mesa dahil siya naman ang kakain? Paano kung parehas lang kayo ng terminal kaya nakisabay siya? Paano kung alam lang niya talagang tanga ka kaya sinabihan ka niyang mag-ingat? Eh, paano kung wala talaga siyang maisip kaya ganu’n lang ang reply niya? Ang layo sa iniisip mo ‘di ba? Ang colorful talaga. Kulang na lang maging dictionary ka sa kabibigay mo ng meaning sa lahat ng kilos ni kuya o kahit ng ibang tao.
Kaya nga sa totoo lang, may ilang mga lalaki o babae na hirap na hirap kumilos. Kaunting galaw lang, ang dami ng kahulugan agad ang naiisip ng mga nagkakagusto sa kanila. Tandaan na iba-iba tayo ng pananaw sa mga bagay-bagay. Maaaring ang sweet para sa’yo ay normal lang para sa kanya. Gayundin na, ayaw nilang mawala ang friendship. Pero sa totoo lang, hindi rin ako naniniwala sa pangalawa kong tinuran na ayaw mawala ng friendship.
Aminin mo man o hindi, lahat tayo ay assuming. Hindi ka naman talaga masasaktan kung hindi ka nag-assume in the first place. Naaalala ko tuloy ‘yung crush ko nu’ng high school na itatago na lang natin sa pangalang Tom. Actually, ‘yun talaga ang codename ko sa kanya dati kasi noong mga panahong ‘yun, eh, hawig siya ni Tom Felton na gumanap na Draco Malfoy sa Harry Potter films. ‘Yun nga, sa pagkakatanda ko, lagi kaming nagkakasalubungan ng tingin, lagi niya akong inaasar at tuwing may quiz, lagi rin siyang nagtatanong ng sagot. Dumating din sa time na nagkatabi kami sa upuan at tuwing vacant, lagi kaming naglalaro ng tic-tac-toe. Lagi rin kaming nagkukwentuhan at madalas niyang dinadala ang mga gamit ko kapag pinakikisuyo ko. Tandang-tanda ko, lagi kong sinusulat sa calendar ng cellphone ko ang mga kilig-moments ko okay Tom. Nag-assume ako na the feeling is mutual kahit na hindi naman kami magka-text.
Hanggang sa dumating ‘yung Senior year namin, nalaman kong hindi pala ako ang type niya kundi isa sa mga kaibigan ko.
Ay Shocks, laslas na, dre! ‘Yan tayo, eh! Kaya marami ang nabo-brokenhearted dahil sa pagiging assuming. Kung hindi ako nag-assume na may gusto siya sa akin, sa palagay ninyo kaya hindi ako masasaktan nang malaman kong kaibigan ko pala ang gusto niya?
Oo, mahirap pigilan ang pagiging assuming dahil mahirap naman ang maging manhid. Pero para hindi ka masaktan o para maiwasan mo ang pagiging assumero o assumera, heto ang ilang suhestiyon na makatutulong sa’yo:
1. Dugtungan game. Hindi ito laro, seryosohin mo pero masayang gawin. Simple lang naman, lahat ng bibitiwan niyang sweet messages o words ay dudugtungan mo lamang ng ‘as a friend o dahil kaibigan mo ako.’ Halimbawa, sinabi niya na, “Ang bait mo talaga, ikaw na!” Dugtungan mo ng, “Siyempre, dahil kaibigan mo ako.” Kapag sinabi niyang, “gusto kita,” dugtungan mo, “as a friend.” ‘Yun lang, halimbawang ito pa lang kausap mo, eh, pa-fall at binigyan ka ng banat, tandaan na hindi ito applicable sa mga ‘yun. Baka mamaya nagtanong siya ng, “kutsara ka ba?” tapos ang sagot mo, “dahil kaibigan mo ako” o kaya naman “crayons ka ba?” at ang sagot mo ay “as a friend.” Ha-ha-ha!
2. Mag-aral. Naku, kung estudyante ka, ‘di ba dapat ang focus mo ay nasa pag-aaral? Oo, naman masarap pumasok sa iskul kapag may kalukadidang pero minsan, nakasisira ito sa pag-aaral. Okey sana kung inspirasyon mo lang si ate o si kuya pero kung nagagawa na niyang kainin ang oras mo na dapat ay laan sa pag-aaral mo, babagsak ka sa dalawang bagay: sa asignatura at sa sahig.
3. Huwag gawing BFF ang ka-opposite sex kung hindi mo kaya. Naniniwala naman ako na maaaring maging mag-bespren ang lalaki at babae dahil sa totoo lang, marami akong kaibigang lalaki kesa sa mga babae. Mas masarap kasi sila kasama. Anyway, by the way, highway, kung alam mong hindi mo kayang kontrolin ang ma-fall at mag-assume sa ka-opposite sex mo, please lang, huwag ka nang mag-try. Sama ka na lang dun sa alam mong hindi mahuhulog sa’yo at ganu’n ka rin.
4. Mag-assume. Oo nga, sinabi ngang ‘wag mag-assume pero kung mag-a-assume ka rin lang, eh, i-assume mo na ‘yung kabaligtaran. Kung nakita mong nakatingin siya sa iyong direksiyon, imbes na isipin mong may crush siya sa’yo, isipin mong type niya ang katabi mo. Eh, paano pala kung wala kang katabi? Isipin mo na lang banlag siya. Hahaha!
5. Maging lohikal. Subukan mong titigan ang mga bagay-bagay sa pananaw ng iba. Hingang-malalim at mag-isip muna. Kung halimbawang lagi mo siyang kasama sa paggagala, hindi naman ibig sabihin nito ay gusto ka niya. Madalas, hindi lang talaga siya maka-hindi sa’yo para hindi ka ma-disappoint. ‘Yun na ‘yun!
6. Magtanong. Sa lahat ng mga payo, ito talaga ang pinakauna mong dapat gawin. Walang masama sa pagtatanong at walang namamatay sa pagtatanong. Kung mahina ang iyong loob na tanungin siya kung ano ka ba para sa kanya, hindi ka na makaaalis d’yan sa sitwasyon mo. Oo, masakit ang ma-reject pero mas masakit kung maririnig mo pa ang rejection galing sa iba. Kaya ano pa ang hinihintay mo, ang paglapit ng buwan sa araw? Tanong na, bilis! Bottomline: Thou shalt not assume. Makiramdam ka kung ano ba talaga ang turing niya o sino ka sa buhay niya. Kung hindi mo kaya makiramdam, magtanong ka. Oo, may mga lalaki o babaeng nagpaparamdam talaga na gusto ka nila pero mas marami sa kanila ang ipinanganak na best actor o actress kahit na ang mukha nila ay wanted. In short, ‘yun iba, ugali lang nila ‘yun. Sabi nga, “just being nice.”
O, akala mo may susunod pa? ‘Wag kang assuming. Hehehe!
