Minsan, may mga punto sa buhay natin na gustong-gusto na nating sumuko. Yung tipong kutsilyo na lang o baril ang tanging sagot para sa problema natin. Oo, maraming tao ang mas malalala pa ang problema, pero iba’t-iba rin ang kapasidad ng tao kaya nagagawa nilang kitilin na lamang ang sarili nilang buhay.
Pero hindi si Lorenzo. Sa totoo lamang ay sirang-sira ang buhay nya. Nalugi ang natatanging business ng pamilya nya, ang LAV Printing Press, at nabaon sa utang. Dahil dito ay nagpatiwakal ang kanyang ama, at sadyang nabaliw ang kanyang ina. Siya na lamang ang natitira sa bahay nilang malapit na niyang ipagbili sa kakulangan ng pera, ngunit hindi niya magawa dahil ito ay pag-aari na rin ng bangko at papalapit na ang araw na sadyang papalayasin na siya dito. To make things worse, iniwan rin siya ng mga kaibigan niya na ang tanging habol lamang sa kanya ay ang kabaitan at ang pera niya. Ganoon rin ang minamahal niya. At dito magsisimula ang lahat, sa huli niyang sandali dito sa mundong ito, bilang isang taong nagngangalang Lorenzo Alcantara Valderama...
