Uljhe Dor

28. Talakh Nahi Hoga

  "Aunty ji, kal jo bhi hua, sab ek bohot badi misunderstanding hai. Jo bhi hua, nahi hona chahiye tha aur main apne bacchon ke kiye par sharminda hoon. Lekin maine teeno ko achhe sanskaar diye hain. Taki Sreeja ke kaale saye ka asar unpar na pade, maine bohot mehnat kiya hai unpar. Kal jo hua, wo ham mein se koi nahi chaahta tha, lekin wo ho gaya. Maan ek ladki hai, pehle to uska apne hone wale devar se shaadi ho gayi. Log aise hi baatein karenge, agar uska talakh ho jayega to kahan jayegi wo? Kaun karega usse shaadi?"

  Shadi ke din ke karname ki wajah se Maya ka bharosa Randhawa pariwaar se uth gaya hai. Apni beti ke kaale kartooton ko hamare beton ke sir thopna chaahte hain lekin main aisa hone nahi dungi. Sonia Bhabhi Maan ke pyaar mein andhi hain, lekin main koi Gandhari nahi hoon. Mere aankhon mein patta nahi bandha hai.

  "Ronit ji, ham modern soceity mein rehte hain. Aaj kal divorce utna uncommon nahi hai. Aur phir, jab shaadi ka siyyapa bahar sab ke saamne jayega to dono pariwaar ki badnaami hogi. Is liye main kehti hoon ki dono ko, in fact chaaron ko annulment le leni chahiye. Uske baad wapas is din ko mud kar koi nahi dekhega."

  "Maya ji, aap bhi jaante hain dono bacchon ke shadi ki khabar pure India ka most talked topic tha. Is baat ko chhupa nahi sakte hain. Aur kal dono pariwaar ke taraf se kitne saare log bhi aaye the. Abhi tak to khabar phail gayi hogi shaadi ki. Agar divorce hoga to badnaami aur jyada hogi. Aur ham jitne odern society mein reh le, lekin ladkiyan abhi bhi vulnerable hain. Shaadi ke baad itni jaldi divorce hoga to yeh meri Maan ka society mein image ke liye theek nahi hoga. Beti ka baap hoon, uski shaadi ki chinta hi to sabse badi chinta hoti hai ek beti ke baap ke liye."

  "Maan aur Anshuman ki shaadi sabhi mayene mein nahi hui hai. Na haldi lagi na mehendi. Lekin agni ke saamne dono ne saat (7) phere liya hai, Anshuman ne Maan ki maang mein sindoor bhara hai, to shaadi to hui hai aur ise koi thukra nahi sakta hai. Raat bhar is baare mein sochne ke baad maine yeh faisla liya hai ki pure ek saal dono jode shaadi nibhane ki koshish karenge. Agar ek saal dono jode ke beech halat sambhalne lagenge to ham isi din agle saal pure riti- rivaaz ke saath dobara unki shaadi karwayenge. Agar halat nahi sulajhte hain to talakh ke alawa koi chara nahi bachega hamare paas."

  "Mummy ji," Maya kehti hai, "Is experiment ke wajah se dono beton ke life ka ek pura saal barbaad ho jayega. Aur Radhika, us bechari ko kaisa lagega jab use is baare mein pata chalega?"

  "Maya, jode upar se ban kar aate hain. Ham insaanon ko sirf unhe nibhana hota hai. Upar wale ne yahi likha tha Kunal aur Anshuman ke kismat mein, to unki marzi ko ek mauka ham de sakte hain. Mehrotra pariwaar mein kabhi talakh nahi hua hai, main bas us parampara ko nibhane ki koshish kar rahi hoon. Shaadi koi khel nahi hai, jab chaha kar liya, jab chaha tod diya."

  "Lekin Mummy ji, ham mehmaon ko kya kahenge, achanak Anshuman ki shaadi kyun ho gayi, aur wo bhi Kunal ki mangetar ke saath?" Sonia puchhti hai.

  "Sonia, samaj se yeh baat chhupayi nahi ja sakti hai. Jo hua hai wo sabko kabhi na kabhi dikhega. Dono jodon ko samajh mein ailan kar ke apna izzat ham phir bhi rakh sakte hain. Agar koi aur yeh baat sab ke saamne khol dega to aur badnaami hogi. Waise bhi, ek- do mahine baad koi yaad bhi nahi rakhega."

  "Aunty ji, in sab ke beech bechare Adhij aur Aarohi phas gaye hain. Ek dusre se itna pyaar karte hain lekin unki shaadi nahi ho payi. Adhij to kal raat se pareshaan hai, usne kuchh khaya nahi hai, so bhi nahi paya hai."

  "Baat to sahi hai, Ronit ji. Aarohi bhi kal se ro rahi hai."

  "Hamein dobara unki shaadi tay karni chaahiye. Adhij ko Germany ke liye nikalne mein abhi do hafte hain. Tab tak sab ho sakta hai. Ek chhoti, private wedding."

  "Aarohi hamare ghar ki iklauti beti hai, uski shaadi chhupa ke choron ki tarah nahi karenge," Maya kehti hai.

  "Adhij ko jaane ke ek mahine baad India wapas aana hai, to jab dono wapas aayenge tab unke liye bada sa reception kar sakte hain."