حياتنا عباره عن قصه
قصه انت بتعيشها
يا اما بتكتب فيها قد ايه انت كنت قاعد مش بتعمل حاجه و بتحكي عن وقتك الفاضي
او بتحكي انك بقيت بتعزف كويس على الجيتار
بس...
انت قادر انك تكتب تاريخك الغير مألوف
قادر تكون نفسك و قادر انك تعيش
بس ف المقابل !
طبعا هتقولي مقابل ايه
بص/ي هوا مش مقابل اوي بس زي الشرط كده
انك تسامح نفسك قبل البشر و تدرك أن كفايه عليها كده
دور على الناس الي موجوده و متنكرش وجودهم لمجرد اكتئاب
ممكن يكون في ناس جنبك و ديما سندينك و انت مش شايفهم
عايزينك تحب نفسك قبل غيرك
مش مهم انت قد ايه عشت مواقف مئساويه
ايه !؟..... مصدوم في الناس !؟
طب و اي يعني ما احنا اتعودنا
اكتب قصتك الي بتحلم بيها و رضاك عن ذاتك و تقبلك لنفسك و ثقتك أن انت جواك القوه المهوله الي روحك مازالت على قيد الحياة بيها لحد دلوقتي و عديت كل المراحل دي
!لا و ايه.. انت جاي تكتئب دلوقتي
اكتب قصتك لاول و اخر مره لانه كتاب واحد و حياه واحده محدش بيعيش قصتين
اختيارك للكتاب ده هيكون عن الندم ولا عن المستحيل أو عن الموت أو عن فراغك .....
في حجات كتير ممكن تكتبها
!عارف انك محتار ..... بس اقولك الحل
....(اكتب الكتاب الي انت هتبقى عايز تقرأه )
ساعتها بس كل الناس تنحني لواحد نجح فإنه يخلي كتابه في دولاب الملوك
ده مش شويه كلام فلسفي ولا درس تنميه بشريه
ده كلام من القلب عشان تقدر تصدقه و نصيحه من اخ قبل واحد متعرفوش بتقرا كلامه
و الامثله كتير
واحد مازال بيضحك رغم كل ظروفه و الكل ساند عليه و مفيش فرصه أنه يزعل أو يقع و بيقاوم علشان ميخذلش أهله ولا أمه
و واحد بيعيش حياته و بيدور على نفسه و يعيش اجمل ايام حياته مع صحابه و رغم مشاكله النفسيه و وحدته
و واحد مش عارف يقرر مصيره يخش انهي فرع ف الثانوي
و واحد مش عارف يدخل ثانوي ولا يمشي ورا حلمه و مش عارف يرضي أهله
كل الناس دي لسه عايشه و كلهم ناجحين ف حياتهم و عايشين مبسوطين لمجرد أنهم متقبلين ده و نفسهم و حبين وجودهم كده
حبين وجودهم ابطال في قصتهم
....كلهم لسه بيكتبو إنجازاتهم .....وانت لسه بتكتب في انعزالك و وحدتك
اي رايك
حابب انك تقوم ولا تفضل في القاع
قاوم نفسك انت مش ضعيف ولا صغير
انا مؤمن بقدراتك انت البطل الي مستنياه قصتك و الشخصيات الي فيها
قوم يا بطل و انت تقدر
كتابك ملكك و اقلب الصفحه
خليها من قصه انهزام لنجاح
الوقت لسه ف ايدك و الصفح كتير
اقلب الصفحه و قلمك هوا أفعالك و كلامك هوا قلبك
...متباقش ناجح
خليك خارج عن المألوف
