أحبتي الكرام
تحية طيبة:
"أسف كلمة أهديــها لكـل قارئ أنتظرَ تكملة ماتبقى من الروايـــة بحـدود مايقارب شهر وَ نصف
و َ يعود هذا التـأخير لعدم التواصـل الكافي مع أبطال الروايــة كما يعلم الجمــيع بأنها حقيقية،
ممتـن لكـل التعليقــات والرسائـل الحلوة منكم
ها أنا أمامكم عُدت وعادت معي بطلة روايتي
ميادة ومـاتبقى من شخصيات أخرى، بأحداث
جديدة ومشوقة •
محبتي الكبيــرة للجمـيع
عزيزي القارئ فضلاً وليس امراً أضغط تصويت
لنشـر المزيد من احداث الروايــة •
فستان أحمر
تحسين لقمان
ضرَبت وَجهي وگتله : شنو شنو شبيهه اختي
اباوعله نزل راسه على الميز
وَگال : للأسف ضابط الاستخبارات يگول لحد الان أي أثر ماكو لهيماء
فركت وجهي حيل وَ حكيت خشمي بسرعة
نزلت دمعتي گتله: حنظل اختي منغوليه تعرف شنو منغوليه يعني كلشي متكدر تعرف
شنو صاير بحالهه حارگين وجهه ويجدون بيهه حنظل اختي اريدهه فدوة
أباوعله شال ايدة اليمنى وَ قربهه بأتجاهي جر ايدي ولزمهه حط عينه بعيني وگال: خليهه ببالج حنظل مو زلمة اذا مايحط اختج بحضنج
لاتخافين اني وحجي ناصح وابوج كاعدين نسوي كل مانگدر عليه
عقجت حواجبي لأن مستغربه من تصرف حنظل لازم ايدي ويحجي وياية كأنما شي عادي جريت أيدي وحنحنت بصوتي مسحت دمعتي وكتله: حنظل سبعة اشهر ترة والله والله مضلومة
فرك وجهه وسحب نفس ذبه بالهوى
وگال : كل الي اريده منج تبقين هادئه اني بره وكاعد اسوي كلشي في سبيل اطلعج منا ,
وكلما تختنكين اتذكري سالفة رفيق المخبل الي صار بي مو شويه
وها ليش اروح بعيد اني الي يمج الصار بيه
مو شويه •
ابتسمت بوجه رغم الموقف الاگشر الجامعنه كتله : سلملي على رفيق كله خلي يدعيلي
ابتسم بوجهي راد يحجي بس رأساً انفتحت الباب مال السجن ودخلت الشرطيه: يلا عيوني كدامي كافي
وليمة هي لو شنو •
باوعتلهه وكعت دمعتي رجعت باوعت لحنظل ابتسمت بوجه والدمعه على خدي گمت من يمه
ورحت للباب وين ما واكفه الشرطيه , باوعت عليه وكتله : انتظرك تبشرني برجعة اخيتي
درت وجهي ورحت لخارج الغرفه امشي كدام الشرطيه وهي ورايه تترقب اي حركه تصدر
من عندي, أمشي بممرات السجن على ضحكات هوايه بس جنت على يقين تام ان كل ضحكة
تنضحك هنا وراهه غصة جبيرة .
حياة جديدة تفاصيل جديدة معقولة اني راح اكضي سبعة اشهر هنا شنو ذنبي ما أعرف
القانون مايعرف شي اسمه مضلومة •
والبشر مايعرف شي اسمه مضلومه •
بعد وين اودي وجهي وَ ألمن اكعد اعتب وَ ويامن ابجي كلشي ماعرف غير فقط أنُ سبعة
اشهر لازم اتحملهه بحلاوتهه وبُمرورته •
وصلت للسجن فتحتلي الباب ودخلت لگيت ياسمين تتمركص وَ أم فاروق تغني وَ أربع نسوان لازمات صواني يدگن
ام فاروق:ولك لاله ولك لاله ولك لاله
أيد بأيد يمشي وغيري يبراله
وياسمين تسوي حركة السجاجين وتضرب بطنهه وتصيح : ولك لاله ولك لاله
وام فاروق : ولا عينه استحت من شافهن گباله
ماحس اله ثريه گامت وگابلت ياسمين بنص السجن وتهز واثنينهن يرددن : ولك لاله ولك لاله
دخلت بنصهن مره جبيره ام حمزه شايلة الشيلة وتفر بيهه ليفوك علساس شعرهه ووياهن تهز
وتصيح : ولك لاله ولك لاله ولك لاله
ام فاروق : اها وعيني حاط أيد بأيد يمشي
وغيري يبراله هجع هجع يلا روح
وصارت الصفكه حماسيه والدك مال النسوان على الصواني مستمر بكل قوه . دخلت بنصهن ورحت
كعدت على جربايتي ماعرف افرح احزن معقوله ذني متونسات رغم الصار وياهن
اجتي ياسمين كدامي جرتني من أيدي وكالتلي هي وتهز ركبه: يلا يلا ويايه خلي ننسى يمعودة
عتيت ايدي بسرعة وكتلهه لا لافدوه مابيه خليني بضيمي وقهري يياسمين
اباوعلهه عقجت حواجبهه وگالت : شبيج مياده شنو صاير وياج وشنو راد حنظل
نزلت دمعتي بسرعة
حطت ايدهه على جتفي اباوع لأيدهه الثانيه تفتح بالشال الشادته على خصرهه
كعدتني على الجربايه علكيفهه وگالت : كلشي بالتفاهم فهميني شنو صاير
حضنتهه وكتله : ياسمين اختي اختي يياسمين
وخرتني عنهه وضربت وجهه
وصاحت : عزه يالمعزايه شبيهه لج اختج .
مسحت دمعتي وكتلهه : ما أعرف ما أعرف كل الادري بي مختفيه ومحد يعرف وين راحت
ضاعت اخباره ياسمين ضاعت •
شهگت شهگه عاليه وعلى اثرهه اجتي ام فاروق صاحت : اكطعن اكطعن حبيبات هاي شنو شبيج
يمه الغاليه، تبجين شبيج عيناي مياده
عيوني متروسه دموع باوعتله وكتلهه:
ام فاروق شگلج ماتكليلي منين منين احجي
حطت ايدهه على وجهه والخوف مبين عليهه تقربت مني حطت ايدهه على جتفي فركتلياه شويه
وكالت : اهدي اهدي عيوني
ام حمزه عيوني كلاص مي
ام فاروق : ارجعي ارجعي شويه ليوره تمددي عيوني
يلا ام حمزه فلك صابج كلاص مي
لو كلاص حليب فضيني عاد •
باوعت على النسوان الي بالسجن كلهن يباوعن عليه بس نظرات الشفقه ضاهره عليهن
حطيت ايدي على وجهي وبجيت بكل قوتي شنو راح اسوي مابيدي مابيدي غير بس
ادعي لله واصيح بأسمه •
كمت على حيلي وَ فتحت زيجي من الصدر وصحت بعالي الصوت يا غفور ياكريم
وياك احجي اخيتي اخيتي اخيتي امانه يمك منغوليه ياناس ياعالم منغوليه اخيتي
ثريه اجتي ركض عليه حضنتي وَ حطت راسي على جتفهه وكالت : مياده اهدي عيوني اهدي
كلنه وياج واختج والله وداعت اختي
ميصيرله شي وداعت اختي
وخرتهه عن حضني وصحت بيهه : محد محد يحس بيه ولكم تعبت ارحموني
انتي شحاطه على كلبج ها ها شحاطه اختج وراح ترجعلج بخير وصحه وعافيه
اما اني شنو شنو ذنبي ولكم اني اختي منغوليه لاصحه ولاعافيه ولاهم يحزنون راحت مني
ياناس اخذتهه مني وحده ساقطه متخاف الله ولكم حارگه وجهه شنو راح تسوي بيها بعد
وكعت بالكاع واني دموعي تنزل على وجناتي وحلكي فاتحته ينزل عليه رشح خشمي
ومي حلكي يوكع من الجوانب وكعت ويايه ام فاروق للكاع وجرتني لحضنهه وصاحت: وينك يفاتح خيبر تفرجهه على هل بنت
نظرتك نظرتك ياعلي •
حطيت راسي بحضني واني ابجي ماعندي بعد اي شي أنفتحت باب السجن دخلت الشرطية و
صاحت: هاي منو الي تلعلع بصوتهه
جنهه ديج هراتي •
دخلت بنص السجن وام فاروق وخرتني عنهه وكامت كالت : ماكو عيوني
متوهمات خاف من غير سجن
باوعت عليه ورجعت باوعت على ام فاروق : وام فاروق عيني قصدج اذاني بيها چعج وماسمع زين.
دفعت ام فاروق وتقربت مني جرتني من ايدي
وكالت : كومي حبيبة
وياية لمديرة القطاع نسوان لو شواذي وحده تكمز وحده تصيح ماما وحدتجن
شكبرهه صحصحن
باوعلتهه واني الخوف ماخذ وجهي : مادري والله اختي ماخذه حيلي بالغلط طلع صوتي
ضربت على جتفي وكالت : شوفي ماماتي اختي وَ بابي و مامي ذوله كلهم تنسيهم هنا
وتصيرين حالج حال البقيه الي هنا
يلا كدامي بسرعة •
ياسمين :شبيج انتي شنو هي گوه
بالغلط. وَ طلع صوتها
باوعت عليهه وكالت : عيني وانتي عليمن تنترين تلصمين حلگج وتنزرعين بجربايتج
لا أحولج على ام حسين واخليهه
تربيج من جدَ وجديد .
گمت على حيلي وباوعت لياسمين : هاهيَ اي اي جايه .
تقربت عليهه واني امسح بدموعي باوعت عليه ورجعت باوعت على النسوان الي لازمات الصواني
صاحت بعلو صوتهه :فهمني سجينات لو غجريات شنو هاي الصواني
باوعت على الباب وصاحت : ام كوثر ام كوثر لحگيلي لحگيلي بالمسطرة
خلي اشوف شغلي وياهن •
اجتي وحده من السجينات ماعرف اسمهه وجهه مشوه جزئياً : عيني أنعام فوك الضيم الي شايفته
بدنيانه تجين علينه •
شتردين من عدنه لخاطر ربج تركينه وحيري حسبي فليساتج •
ندارت عليه طلعتني من جتفي لبره الغرفة
كالت
: مصارلج هواي من جايتنه وطلعتي عيونهن علية
بللت شفايفي رجعت طبگت الباب بسرعة
ودفعتني كدامه بمعنى امشي
مشيت بالگوه اروح منا واجي منا من كثر ماتعبانه ومنتهيه ورايه السجينات اسمعهن يصيحن ويلعنن
بأنعام ,اكول بكلبي اي يادنيا مشيتي بية هواي مو كافي عاد . صارت كدامنة باب جبيرة
ويمها مكتب صغير كاعدة علية بنية هم لابسة زي الشرطة ماحسيت اله على أنعام لزمتني من أيدي
حيل واني اكلهه : علكيفج يمعوده هسه اني شمسويه
تلم حلگه ليكدام واطلع صوت مال وشوشة
گالت: ولاكلمه بنات الفگر متعلمات على البجي والضيم مابيجن لا حظ ولا خير ولابركه
مياده : الخير والبركه عفتهه الج .
تره اني مو عبده عندج •
جرتني ومشت بيه ليكدام بالممرات امشي واباوع على البوب مال السجن جم سالفة ودمعة بكل واحد الله اعلم .
وصلنة الباب الجبيرة گالت أنعام: حييهم عيوني
جاوبتها البنية: هلا والله،
فتحت السجل مالته و گالت: شسمج عيوني
جاوبتها، ميادة اسمي ميادة ثائر
گالت: توكلي عيوني أنعام
سلمت عليها انعام واخذتني من ايدي عبرنه الباب
دخلتني لغرفه فارغه
كالت : انتظري هنا بين ماتجيج ام ياسين
دارت وجهه وراحت عني ضليت واكفه بمكاني واني اباوع على الغرفه ، صغيره وبيهه ريحه
غريبه ماعرفت اميزهه صح •
باوعت على صبغ الحايط واكع ومشخط
اكو ميز لون جوزي بزاوية الغرفة مرتب احلى ترتيب ووره الكرسي الحايط عبارة عن اطارات
مال صور اضاهر صورهه واكو مجموعه معلگه بيها اوراق استغربت ليش هيج الاوراق حاطيهه باطارات ومعلكيهه بالحايط
تقربت على الكرسي واني اتلفت منا منا بلعت ريگي جريته وكعدت بسرعة ارتجيت على الميز
وحطيت ايدي جوه حنجي واني افكر شنو راح يصير بيه ومنو هاي ام ياسين جايه يمهه
اني وكاعده افكر رأساً دخلت مره جبيره بالعمر كلش وشوية سمينة كالت : شنو هاي منو
شجابج هنا ماما ام كوثر
ام كوثر هاي السجينه شنو عدهه هنا
منو طلعج ماما
كمت على حيلي بسرعه بلعت ريكي وكتلهه : ها شسمه انعام اي انعام جابتني هنا لان
رأساً قاطعتني : وجابتج هنا شنو تبيعين خضره اني شلون بأنعام زين عاد
شمسويه من مكسوره يمه •
كتلهه : مامسويه شي بس صوتي صار عالي بالسجن كل هاي السالفه .
اباوعلهه حطت ايدهه على بطنهه وكالت : لا عيني مامسويه شي أصلاً عيب جابتج لهنا لان السجن
مال الخلفوج ولازم تصيحين •
وتعيطين براحتج
حركت شفايفي اريد اكلهه افهمه السالفه اكثر بسرعة حطت ايدهه على شفايفه بمعنى انلصمي .
تقربت بأتجاهي دفعتني عن طريقهه وكعدت على الميز شالت شلون الراديو
صاحت بي : حول قطاع ستة مديرة القطاع
ناديني شرطي انعام بسرعه حول .
بلعت ريكي واني اشوفهه شلون كاعده بكل هيبه وفخر ومادري شنو تلعب بالاوراق مالتهه
و أطلع أصوات بحلگه مال وحدة ضايجة هي وتكلب بيهن اندكت الباب من ورايه التفتت لكيتهه انعام بسرعة صاحت : نعم نعم سيدي صحتني
اني تفاجأت ياسيدي رجعت باوعت على ام ياسين ورجعت باوعت على انعام كلت بكلبي هاي شبيهه تكلهه هيج ,
كالت : بلي تفضلي شنو هاي السجينه بمكتبي اكو مبرر لوجوده
انعام : بلي نتيجة الصراخ في السجن ادى الامر لفوضه كبيره عند السجينات والتعليمات الموجهه
النه من مركز واحد •
مامسموح لأي سجينه
قاطعتهه وكلتلهه : يارقم ملفهه وَ أي أسم
انعام : ملف اربعه قطاع ستة
ام ياسين :تكدرين ترجعين لموقعج
شكرا للجهود المبذوله شرطي أنعام
اباوع لانعام اخذتلهه تحيه مثل ماجنه نسوي تحية للعلم من يرفرف كل خميس بأصطفاف
الميتم . فززتني ام ياسين كالت : كعدي على الكرسي
كعدت على الكرسي بسرعه واني اطكطك بأصابعي اباوعلهه رأساً كامت ضليت اترقبهه بعيوني
راحت بأتجاه كوميدي من حديد متروس ملفات لون اصفر واخضر وحتى احمر اكو
وكومة اوراق ماعرف شنو الموضوع •
اباوعلهه ضلت ادور بينهن الى ان جرت ملف لونه اصفر قرت المكتوب عليه .
مياده ثائر سجينه بالقطاع السادس هلا والله •
. جابت الملف ورجعت كعدت على الميز فتحته وگلبت الورقه الاولى
متواجده بمكان مشبوه هلا هلا
البيت بي حبوب واسلحه ومفجرات هلا والله هلا
گلبت ورقتين ورجعت كالت
وملزومه بالجرم المشهود بحفله مغنيه بالحبوب وبطالة الويسكي والله عيوني سباعيه
كلبت اخر ورقه ودكت على صدرهه وكالت : حكم سبع اشهر والله القاضي اكيد واسطه ليش اجذب
عليج اني لو بمكانه اخليج تعفنين نسوان وكت ولج ماتستحين على نفسج بهذا عمرج هيج
تفكرين وهيج تسوين لج ثقي بالله بكدج اني واكعد ويه طكت البريك اغسل حوش عمي واكعد
ولد عمي اشطفهم وانظفهم واسبحهم واكعد اخبز الخبز الحار واكعد بعيال البيت واذا جان شي
ناقص جنات مرت عمي ادك عليه دك للصبح وكدام عمي رغم هذا كعدت سكتت لا يمه كافحة
وشردت وقريت ووتعبت على روحي الى أن صرت موظفه ينحلف براسي بس بالصدك
وهسه اني ام فاقده شهيد واحد •
عمره راح من وكت يم ربه تلكي
وعندي بنيه اصغر منج بسنه وحده
تكليلي مجبوره واشتغلت هذا الشغل ولج يمه ياجبر ياجبر فهميني ياجبر يجبرج تعرين جسمج
لليسوه والمايسوه لج والله والله ميشتروج براس بصل يابس ذولة الحيوانات الي تمتعيهم يوميه
تكليلي اهلي تخلو عني وانجبرت لعد اني الصار بيه طيح حيلي كله انزعلج حجابي وتشوفين
شعري وشوفي الشيب شلون اكله وغزه بي غزو ماسويت مثلج وصرت اشتغل بالملاهي وبهاي لعبان نفس
تدرين ليش لان اني اعرف بنفسي انسانه والانسان دائما يماما تطلعله مطبات ينضرب بيهن
عادي خلي يتحمل يجي يوم ويتغلب عليهن خلي يصبر بس بس ها كلشي ولا ينجرف للخطأ
وخاصةً يماما البنيه كلشي ولاتروح للخطأ
انتي ببلد شرقي كل همهم الشرف
مايفتهمون شي اسمه
مجبوره واحتاجيت شغل ومدري شنو •
ماكدر اكلج غير هلحجي بس للأسف اشوفج هيج بنات يضيعن نص عمرهن بالسجن وهنه المفروض
بهيج عمر يقرن كتب ، يتعلمن الصنعه المنزليه
من الام والاب
شلت ايدي و مسحت دموعي الي ماوكفن ابد رجعت كالت :ليش تبجين عادي اني هم
جنت مثلج واكثر واكثر انلعب بحالي لعب جنت اروح من هاي ألايد لهاي ألايد بس خنت ربج بعت
شرفي لا لا ماسويت هاي السواية
الي هي ماعرف ماعرف استغفر الله ياربي
تدرين انتي وجماعتج جم ام فقدت ابنهه بسببكم اني وحده من الامهات الي فقدت ابنهه
بالتفجيرات شنو ذنبنه خسرنه ولدنه
يعني نخسر ولدنه وضنانه في سبيل انتي
وجماعتج تعيشون تاكلون لكمه لج والله •
وحگ كل قطرة دم من ابني لو بمكان القاضي جان حكمت عليج حكم يوميه اقطع من جسمج
جزء وارميج للجلاب السود •
مسحت دموعي وكتلهه : مجبوره والله مجبوره اذا انتي راح منج ابن اني فتحت عيني لا سند
ولاهم يحزنون كل وكتي بالميتم من الصغر وكبرت ووعيت للدنيا طلعت من عنده
دخلت هذا البيت لو ادري بي قابل ابقى بس حكم القوي على الضعيف كارثة كارثه شنو ذنبي فهميني
ضربت الميز بكل قوه وصاحت : على حجيج كل الي بالميتم طلعوهم لهاي البيوت ولهاي الكوفيات
وصاروا مثلج ويمكن ألابشع منج ومن اعمالج .
بس گولي اني طايحة حظ وسويت هاي السوايه وراضيه بهذا الطريق
شايفه وعايفه من امثالج اشكال واصناف خلي اسكت احسلي . انعام انعام
رجعت نظراتهه على الميز گلبت آخر ورقه من الملف جرت ورقه وكتبت
عقاب سجن انفرادي •
رفعت راسهه وكالت : ذكريني بأسمج
بلعت ريكي : مياده مياده ثائر
رجعت كتبت ووقعت كتابته مو كلش مفهمومه بس بالگوه فهمت ان عقوبه سجن انفرادي ماعرف
شنو تقصد شويه ودخلت انعام اخذتلهه تحيه وكالتله : سجن انفرادي تحويل
على قطاع اثنين بسرعه •
انعام : حاضر حاضر بس سيدي
ام ياسين : بلا بس من شوكت شغلنه بي بس ,
شرطي أنعام نفذ الاوامر وخلص
گمت على حيلي وجهي تغيرت تعابيره للخوف والقلق : فدوه فدوه وين ماخذتني
والله معليه مالي ذنب فدوه
اخذت الملف الثاني وبدت تكلب بي رفعت ايدهه وسوت حركه بمعنى بره , رجعت كتلهه : بروح ابنج لاتسويلي شي مالي ذنب
مو بس اني صيحت •
انعام لزمتني من جتف ايدي تريد تسحلني واني مجلبه بالميز مال ام ياسين واصيح واتوسل بيهه
: والله والله التوبه اكعد واسكت
بس لا تسويلي شي
بس خلاص جان جوابهه بالرفض القاطع وعدم الرحمه ماعرف اعاتبه
لو اعاتب الوكت الدار
مدايري والتف عليه لفات الحياية •
اخذتني انعام من الغرفه ومشينه بالممرات اباوعلهه تمشي بكل ثقه وشموخ اما اني تعبانه
ومرهقه ماعرف جم باب عبرنه وكل ما نعبر باب توكف انعام يم مكتب صغير هم يمه بنيه
تسجل اسمي و توقع على الورقه وتاخذني الى ان وصلنه لغرفه فتحته ودفعتني
كالت : تونسي ويه الحيطان لمدة اسبوع
سجن انفرادي •
سدت الباب بوجهي وراحت , وكعت بالكاع ودموعي تنزل بكثرة ماعرف شسوي
معقولة كل البنات الي بعمري صار
وياهن الصار ويايه .
اباوع لحيطان الغرفة لالون ولا معنى
اباوع للغرفة صفنه بس شهكاتي
بيهه تتعالى وتنخفض •
رحت كعدت على الجربايه ومددت عليهه حطيت راسي على مخده وصارت نومتي على ظهري
حسيت شي أنزاح مني •
شي وكع من جسمي على المخده معقوله هذا التعب اي اي التعب الي مرمرني ,
گلبت وجهي للجهه اليمنى لگيت ميز بي جرارات استغربت شنو هذا الميز وليش هيج محطوط وشنو بي
كمت على حيلي وفتحت الجرار الاول طلعتلي صفطة دفاتر جريت الاول وفتحته
طلعتلي الورقه الاولى مكتوب عليهه نوارس •
عقجت حواجبي وكلت بگلبي منو هاي نوارس گلبت الورقه الثانيه وبديت اقره رايحه لمحكمة
الاعدام بهذا اليوم القاضي راح ينطق قرار حكمي بالاعدام يعني نوارس من بعد ماينغلق هلدفتر
ماعادت موجودة بالحياة . اليوم عرفت ذنبي شنو
ذنبي ضليت يم ناس ماترحم كل همهم الفلوس
لبسوني الحزام وعلموني على الريمونت شلون بضغطه وحدة مني يروح كل ما داير مدايري ,
طلعت صعدت بالسياره واني افكر معقوله اني نوارس ام الگلب الابيض تكتل روحها
مشت بية السيارة الى ان وصلت للموقع مالتنه جامع حسيني صاح بعلو صوته سامي قشطة:
أدخلين للجامع بحجة تشربين مي بارد من البراد وتحسبين للعشرة واضغطين على الريمونت
اريدج سباعيه واريدج انتي وتشربين مي تذكرين شلون صارو عليج اهلج وشلون ابن خالج اعتدى
عليج اريدج تغمضين عينج وترجعين لكل ايامج السوده ولازم تعرفين نوارس ان هذا اليوم هو
يومج لازم كلنه نموت علمود نراضي أبونة زامل
بوكتها مسحت دمعتي واني بس اهز براسي رجع
گال: من تموتين راح تحسين بطعم الراحة راح تشوفين نفسج بقصور أبونة زامل وتعيشين هناك
بخير وعافيه , وكولي لأبونة زامل ثارك ناخذه ناخذه مفهوم لو لا
دار وجه عليه وكال : كاعد اكلج مفهموم لو لا
حركت شفايفي واني ماعرف شگول كتله : اي اي اي
قرب ايده اليمنى ومسح راسي وكال : لا تبجين ليبارك بيج أبونة
زامل وجنوده توكلي عليه •
يلا بالسباعية
ابتسمت بوجه والخوف مبين عليه ماعرف شنو اسوي نزلت من السيارة واني متردده بين ماصيح
للعالم شردوا لو فعلاً اكتل روحي وَ اكتلهم
ولتحترك الدنيا •
بوكتها اذكرت كلام ام محمد معلمتنه بالمدرسة الاسلامية : ما لازم البشر يعيش لازم الكل تتألم
لازم الكل تموت ويطشر دمهه لازم كل الامهات ينفجع گلبهه بأبنهه فاهمات
واحنه نهز بروسنه بنعم من خوفنا منهه , دگ هورن سامي قشطة معناهه تحركي وفعلاً تحركت
بخطوات علكيفي واني اباوع منا ومنا لگيت كومه اطفال كدامي طالعين كدام بيوتهم
هذا الي يلعب توكي وهذا يلعب محلق
اسمع ولد من ورايه يصيح : خاله خاله تشترين نفاخ
التفتت اله شفته شايل صندوك صغير مال ببسي فارغ ومحطوط بنصه نفاخ گال : خمسه بربع
خاله اشتري مني يتيم ومعيش امي
على الجامد والنفاخ
نزلت دمعتي بسرعة وشهگت شهگة عاليه مادري شنو كلي بسرعة درت وجهي ورحت بأتجاه
المسجد . وصلتله لكيت اطفال بالحديقة الخارجيه للمسجد واكف عليهم رجال يعلمهم
شلون يقرون قرآن •
دورت على البراد مالكيته دخلت بسرعة واني اتلفت يمنى ويسرى لگيت البراد كدامي
رحتله واني اباوع بطرف عيني وصلتله جريت الكلاص وترسته مي
شلته وقربته يم حلگي كاعده اشرب واجتي عيني مباشرةً بداخل المسجد رجال جبير وبصفه
ابنه صغير يعلمه شلون يصلي وشلون يدعي
الي شفته هزني هز
شنو ذنبه هذا الطفل يخسر الدنيا بسببي •
ايدي كامت ترجف وماعرف شنو سبب رجفته وكع الكلاص كاعده انزل
اجيب الكلاص اجاني رجال جبير
كال : ها ها اسم الله بنتي خوما بيج شي
باوعتله وعيوني تبجي , اباوع لعيونه واضح عليه الخوف والقلق رجع كرر سؤاله :
بنتي المسجد مال
زلم قاعة النساء ماتنفتح اليوم شنو
شبيج بويه شنو هاي الدموع
بويه صاير وياج شي اوديج للبيت للمرة .
جاوبته واني خايفه : قنبلة قنبلة
رجع ليوره بسرعه وصاح : شنو شنو
بويه شبيج ياقنبلة
صحت بي : شايله قنبله ماتسمع عدل روح روح ,
لاله اله الله محمد
انفتح القفل مال الباب سديت الدفتر ورجعته لمكانه مسحت دمعتي ووكفت على حيلي
صدري يصعد وينزل من الخوف والرعب من هاي البنيه الي كاتبة كلشي بالدفتر اريد اعرف
شنو صار وياهه بعد
دخلت بنيه وسطانيه گالت : عيني انتي مياده
كتلهه : اي شكو
كالت : وشكاكه بعينج اي والله كدامي المحامي
الشفية جاي عليج عشتو يحطلوج
محامي والله يالله •
مشت ومشيت وراهه واني مستغربه يامحامي هذا معقوله نفسه الي بالمحكمة ومشى الامور
اذا هو شيريد مني جايني هسه •
مشينه مسافه شويه بعيده الى ان وصلنه للممر مال السجن مالتي الجنت بي
وگفت يم غرفة
ويمهه بنيه كاعده على مكتب صغير
كالت : تعاي بصمي هنا ووقعي
استغربت شنو ليش هيج عود
تقربت بصمت مثل ماعلمتني هي وَوقعت بالحقل المطلوب مني اوقع بي ,
فتحت الباب وكالت دخلي المحامي وياج
دخلت للغرفه واني خايفة باوعت ليكدام لگيت ولد شاب اصلع جسمة معضل صاحب شخصية
قويه تقاسيم وجهه رجوليه كلش .
گال : ميادة اني المحامي مالتج ضياء ماعدنة وكت هواي تعاي كعدي بسرعة
بلعت ريگي وتقربت بأتجاه الميز كعدت عليه وكتله : بس منو حطك وشكو بعد
هو انحكمت سبعة اشهر •
فتح الملف الكدامه وگال : لزموا ثائر بعد ما ابوج الله يسلمة رفع قضية ضدة وَ أنفتحت قضية ثانيه
تزوير جنسية والجنسية جنسيتج •
بلعت ريگي وكمت على حيلي : شكاعد تكول انت شنو تزوير جنسيه
كام على حيله وگال : ليش ماتعرفين انُ ثائر مو ابوج الحقيقي والجنسيه مزورهه هو ووالدتج
رجعت ليوره دموعي اخذن موقفهن رأساً نزلن اذكرت كل كلام امي: الي بالجنسيه مو ابوج
دفعت فلوس يابَ فلوس علمود تسجلين بأسمه
المحامي يحجي وياية ويحاول يهديني واني بغير عالم منفصلة رحت بسرعة ركض على الباب
فتحته وكتلهه للبنيه : فدوه فدوه
اريد الحمام اخذيني للحمام
كامت على حيلهه وهي قلقانة كالت : شبيج ماما المحامي مالتج هذا جاي على قضيتج
هزيت راسي ورجعت شعري ليوره مسحت دموعي بطارف دشداشتي :فدوه فدوه اريد حمام مستعجلة
المحامي گال من وراية : بلا زحمه اخذيه وَ رجعيه لأن جلسة كلش مهمه ولازم
أنهي العمل اليوم •
باوعتله وباوعتلي صاحت للبنيه الواكفه ليكدام اجتي عليه وفهمته السالفه اخذتني للحمام واني
بس اريد انعزل اريد اصيح
بعلو صوتي اريد ارتاح لأن تعبت بعد
وصلنه للحمام بعد ماعبرنه مسافات بعيدة
گالت : هذا القطاع غير قطاعنة
بسرعه دخلي وطلعي
اشرتلي بيدهه على باب الحمام ودخلت
صار كدامي سنك جبير وبي حنفيات مال مي هواي وبصفة التواليت واحد بصف الثاني
تقربت بأتجاهه
اريد اغسل اريد اذب مي على روحي
عبرت التواليت الاول وصارت كدامي
بنيه حلگه ووجهه كله دم
تقربت منهه واني مفزوعة من الخوف
بسرعة انفتحت باب التواليت وطلعت بنية
صاحت : عزه عزه شنو هاي منو انتي
بنات بنات فدوه فدوه لحگولي
اباوعلهه واني خايفة رأساً دخلت البنية الشرطية رفعت سلاحهه وباوعت عليه
وعلى البنيه بالكاع شهگت شهگة عالية
وصاحت : ايدج ايدج ليفوك بدون نفس بسرعة
البنيه الثانيه صاحت : هيَ هيَ كتلتها
اني اني شفتهه
بنات وينجن لحگن بيداء ماتت
هاي البنيه كتلتها •
يتبع ....
لاتنسوا التصويت والتعليق •
أحبتي نظام التنزيل بين يوم و يوم
وَ الوقت المحدد هو السـاعة
التاســعة ليلاً
نلتقي في بــارت جديد
للمتابعة في الانستكرام: tahsin_luqman
دمتم سالميــن
تحسين لقمان