حسن ياود قوم ، حسسن
- ااااااخ في شنو يا منتصر مالك
- قوم الساعة 4جات موش قلت يصحوك
-خلاص قمت
اخدت لي نفس طويل واتمغيت في سريري ودخلت يدي تحت المخدة ، بقيت بتحسس في تلفوني
مسكتو وفتحت الشاشة
الساعة 4:14 ص
كان في اشعار رسالة من جهة اتصال
" المنصفة أرسل إليك رسالة .. معرفة المذيد "
روان 💜
كنت مسجل إسمها بالمنصفة لانها أنصفت قلبي بعد تعب
فتحت الرسالة وكان محتواها
" اللهم يامن قذفت حبه بقلبي ، أستودعك قلبي الذي يهواه ، اللهم أعنه ووفقه وكن له خير نصير
صباح الخير قوم خلاص كفاك نوم
ما تنسي راجع الشيت القلت الدكتور وصاكم بيهو
وما تجهد نفسك وافطر قبل تخش الامتحان وقبل الإمتحان بي ساعة امشي اقعد براك بعيد من جوطة الدفعة وراجع الشيتات وقبل تخش اللجنة اقرأ الدعاء دا
اللهم اني استودعك ماحفظت من علم فأتني إياه حين حوجتي ..
خلي بالك من نفسك وبعد تطلع من اللجنة طمني
بحبك 💜 "
طبعاً دي رسالة كفيلة كانت اني اقوم واتوضي واصلي لي ركعتين شكر لربنا علي النعمة الانعم علي بيها
روان كانت بتحسسني انها امي واختي وصحبتي
كانت بتحاول تكون كل شئ وما تخليني فاقد شئ
لما كنت بسألها انتي لي بتعامليني كداا
انا ما جميل للدرجة وعادي وعارفاني كمان ما استاهل دا كلوا
كان ردها واحد دايماً
- إنت حبيبي عارف يعني شنو ، يعني أنا ملزمة أكون أختك وحبيبتك وامك وصحبتك ورفيقتك
ما سمعت الحوت بقول شنو
حومي في خاطر حبيبك كوني في زحمة ظروفو
انا عاوزة اعوضك يا حسن عن كل شئ انت عشتوا عاوزة انسيك ماضيك💜
كنت بضحك بس لما تقول لي كداا وبخجل زي الشافع 😅
وهي تقول لي حلاتوا البخجل
عارف ياحسن انا بحبك كدا لي
-لي!
عشان رغم طولك وحجمك ودقنك والبشوفك يقول ضابط في الجيش الا انو جواك طفل لسة
طفل صغير عاوز امو وعاوز اختو وابوهو
وانت طفلي انا
- طيب انتي عارفة انا بحبك لي !
-لي ياحسن ، اكيد عشان حلوة وشعري طوال 😌
-هههههه اي سمحة واي شئ بس انا بحبك عشان ماعندي شئ تاني
ماف حل غير أحبك واتعلق بيك ، حبك ياروان ما حاجة عندي فيها يد ، كنت زي الغرقان ولقيتك طوق نجاة واتمسكت بيك 💜
فضلت اتزكر زكرياتي مع روان لحدي م نسيت الإمتحان الفضل ليهو اقل من 9 ساعات داااا
قمت طوالي استحميت وجيت قعدت في نص السرير وبقيت براجع في الشيتات
الشباب برضو كانوا ممتحنين بس كانت ايامنا مختلفة انا واحمد جدولنا واحد
منتصر وعبد الله سوا
اليوم البنكون ممتحنين فيهو انا واحمد بكون اوف عند منتصر وعبدالله
اتزكرت احمد وكان نايم ، مشيت صحيتوا وقلت ليهو
- قوم راجع النايم ليها شنو
وفعلا قام واستحم وجا قعد في سريرو واي واحد فينا كان مركز مع شيتاتو ومنتصر وعبد الله كانوا نايمين
بعد شوية كدا الصلاة جات
قمنا وصحينا الشباب وصلينا الصبح ...
انا بعد الصلاة ما قريت تاني
احمد عمل الشاي شربناهو وكالعادة في ايام الامتحانات كنا بنمشي الجامعة بدري ونتجخنن في اي حتة ونقراا لحدي ما الامتحان زمنوا يجي
طلعنا انا واحمد واتحركنا علي الجامعة
وصلت الجامعة واتجخننا تحت شجرة كبيرة كداا
واي واحد مسك شيتاتوا وبقينا نحفر
لحد ما الساعة جات 11 قلت ليهو خلاص الصلاة يوم القيامة م بتنفع نمشي نفطر ونخش الامتحان
فطرنا وبعدها افترقنا هو مشي علي لجنتو وانا علي لجنتي
في الطريق علي اللجنة طلعت تلفوني واتصلت علي روان
ردت علي
-الوو
حبيب القسي كيفك
- المنصفة ،انا تمام بعد صوتك
- اها جاهز بابطل !!
-والله م عارف نشوف جواا في الامتحان
المهم انا حبيت اتصل عليك واسمع صوتك داا ويكون اخر شئ اسمعوا قبل أدخل الامتحان
انتي عارفة انو صوتك بطمني
وانا صراحة خايف المادة دي صعبة
- هي ياود بطل حركات البنات دي شنو صعبة وما صعبة
والله ياحسن بتحسسني انك البت وانا الولد ، زهجان وخايف 😂
خليت لي انا شنو بقيت تتحداني في حاجات البنات دي
هههه بهظر معاك م تخاف انا جمبك وانت قريت واجتهدت وربنا اكيد حينصفك
- ما هو انصفني خلاص واهداني إنتي😊
-ياود بطل انت عندك امتحان ركز في قرايتك 😅
حتعدي زي غيرها ان شاء الله انت ما تنسي الدعاء
تمام وبعد تطلع طمني عليك طيب 💜
- طيب لي بعدين
-تعال هنا ماش وين انت حتنسي ولا شنو ولا الامتحان اكل عقلك
حسن ود بشير اخير ليك انعدل 😌😅
-ههههه معليش نسيت م تزعلي ياستي
" بحبك يا روان يابت قلبي "
- اااااخ ياقلبي اي كدا صحصح معاي لازم كل يوم تأدي القسم داا سامع وكدي تاني تنساهو
يلا لي بعدين
بحبك 💜
😴😴😴😴😴😴😴😴😴
بعد المكالمة دي قلبي راق شديد ومشيت علي الإمتحان بقلب أسد ، رغم اني بتزكر طول السنين دي كل ما اكون خاشي امتحان او حتي تست ساي بكون خايف ، بشوف مرات الشباب الواحد امو ترسل ليهو دعوة كاربة كدة او يتصل عليهو والدو يطمن عليهو ويشوف كيف امتحن
وانا المسكين ممحن 😅
ما حقد مني عليهم لا سمح الله بس كان نفسي اجرب الإحساس دا زيهم لكن نقول شنو الله غالب
بس يمكن روان شوية حسستني بالاحساس داا ، ماشوية كتير والله😅
خشيت الإمتحان ومن حظي الفقري كنت قاعد قدام اول زول ، قعدت ووزعوا ليما دفاتر الحل وورقة الأسئلة
قلبت في الاسئلة وبديت أحل ، الإمتحان ما صعب او بالأصح كل القريتو جاا
وسبحان الله انا من امتحنت الشهادة زمان اي امتحان ادخلوا حتي لو قرايتي ما علي قدر كداا كان بتجي فيهو الحاجات القريتها كلها 💜
الغريبة المرة دي في سؤال غلبني 😅
اهااا العمل شنووو
طوالي ولا كضبت اتزكرت كلام الشيخ ..
عقدت يدي وبقيت اصلي علي الرسول شوية واسبح شوية
لحدي ما فضل للزمن قريب نص ساعة طق التزكرت الحل
كتبتوا وطلعت من الامتحان
شلت تلفوني فتحتوا لقيت أحمد ضارب لي 10 مرات ومنتصر 7 مرات وعبد الله كمان 😥
ياربي في شنو !!
رجعت لي منتصر ، من اول جرس رد علي
-يابشر وين انت !! دا شنو اصلو ولادة
وينك ؟
- انا يادوب طالع من اللجنة اجيكم وين ؟
-تعال الجبنة نحن هناك
قفلت منو واتحركت عليهم في الجبنة ، وفعلاً اتحركت من هندسات علي آداب
متجه علي الجبنة حقتنا قصاد قاعة عبد الله الطيب ، وانا في الطريق كان علي يميني في شلة بتاعت بنات ، وواضح انهم بنات الحزب الشيوعي وديل طبعاً متحررات فكرياً وبالتالي جسدياً
دا من وجهة نظري 😊
وانا ماشي بي جمبهم حصلت حاجة غريبة شديد ، سمعت واحدة منهم قالت :
" أحي ياقلبي النقدو سوسيو "
ما ركزت شديد معاهم وقلت يمكن بتونسوا مع بعض
بعد اتقدمت منهم خطوة لقدام
سمعت صوت مايع كداا وبنده علي ....
- يا حسووون
انا جواي طبعاً انشرطت بالضحك بس عملت فيها عادي
شنو حسون دي 😅
المهم اتلفت وقبلت عليهم ولقيتها ليك واقفة في النص بين صحباتها وبيني ، بيني وبينها مسافة أمتار وبين اصحابها مترين بالكتير
عاينت ليها في وشها عرفتها طوالي 😅
" عُلا فرنسي "
زي ما بلقبوها في الجامعة ، طالبة في اداب لغة فرنسية ومن كوادر الحزب الشيوعي
او يمكن صحباتها هم الكدااا م عارف
المهم قلت ليها :
- نعم انتي معاي أنا !!
- اي معاك هو في حسون غيرك هنا
- لكن انا اسمي حسن ، ما حسون
حسون دي جبتيها من وين
- طيب م دام حسن اتلفت لي !!
وكانت حركاتها كلها ملانة إغراء وأنوثة مفتعلة وانا جني وجن البت البتفتعل الأنوثة دي 🤦🏾
بتكون حاجة في قمة الوهمنة والسخافة
طبعا سكتتني اي معاها حق الوقفني شنو 😅
قلت ليها :
- اسف اني وقفت عن إذنك وإبتسمت ليها إبتسامة خفيفة وقبلت منها
جات وراي ولفتتني ..
- طيب ثواني القلم دا وقع منك ومدت لي قلم
فقدت جيبي لقيت قلمي معاي والغريبة القلم الشايلاهو نفس نوع القلم البستخدموا انا
ماركة معينة اسمها شنايدر قلم ألماني
قلت ليها
- لالا ما وقع مني شوفي وقع من منو
- طيب خلاص ما وقع إعتبرو هدية مني ليك ، ممكن تقبلها
بقيت بعاين ليها مسافة .. وقلت ليها
- دقيقة انتي بتعرفيني من وين ودي شنو الدخلة الدخلتي لي بيها دي ؟؟
- بعرفك يا حسن ، منو ما بعرف حسن ود مدنية نااار علي علم أكتر ولد مهزب ومحترم في الجامعة وماعندو شي للبنات وبرضو الود المكسر نص بنات الجامعة دي
الود الخدارو نار صاحب أجمل تكشيرة ، اهااا تحب اوريك زيادة انت منو !!
- بعد القلتي دا كلوو لسة م بتعرفيني ولو بتعرفيني م بتدخلي الدخلة دي عن ازنك
اتقدمت خطوتين وجات وراي تاني وقالت لي
-طيب اسمع عاوزة اقول ليك شنو ..
عاين صراحة انت في الجامعة دي كلهاا معروف ماف بت بتقدر تسألك بخافو منك وبخافو تحرجهم زي ما احرجتني هسي بس عليك الله اقبل الهدية دي وما تحرجني قدام الناس
وفعلاً لما ركزت حوليني لقيت الجامعة كلها واقفة بتتفرج فينا بنات علي أولاد 😅
في اللحظة ديك جاني اتصال ، شفت المتصل كانت روان
طوالي اختصرت عُلا وفي االحظة دي اتطريت اخدت منها القلم واستأذنت منها ...
رديت علي روان
- المُنصفة .. ازيك
-حبيب القسي إمتحنت كيف ولي ما رجعت لي بعد طلعت طوالي قلقت عليك
- والله يابت قلبي دي طلعتي من اللجنة وسبقتيني بس معليش تاني طلعتي كدا اول شئ بتصل عليك
- م مشكلة انا بس قلقت قلت يمكن جا صعب او في حاجة المهم طمني كان كيف ؟
- ظريف شديد واشتغلت حلو الحمد لله
- الحمد لله طمنتني ياخ ، ان شاء الله دايماً موفق
انت تتبارك ما تتشارك يا حسن ياود بشير وتتعلي ما تدلي انت يا يمة تبقي غابة والناس حطابة بركة شيخي محمد احمد وبركة الشيخ ود النيل
ببركة الضريح وكلام الله الفصيح قول آمين هااا
- هههههههههههه آمييين يارب
اتعلمتي دعاء الحبوبات دا من وين 😅؟
- انت ماعارف انا ربتني حبوبتي وحبوبتي علمتني ادعي للزول وادعي عليهو 😂
اوعك بس تلعب بي ديلك جاي ولا جاي والله ادعي عليك لامن الله يسختك كديس
- لالا الله لا جاب لعب بعدين انا ما فيني حيل العب المهم . هسي انا متحرك علي الشباب ديل برجع بعدين كدا وبتصل ليك احكي ليك يومي حصل فيهو شنو
- والله لو م ممتحن وتعبان بتكون كان خليتك هسي تديني التقرير
حسن ود بشير بعدين منتظراك وتديني تقرير كامل
وعلي فكرة دي ما خنقة ولا عدم ثقة لكن دا اهتمام زايد 🌚
انا اتشقيت بالضحك 😂
- انتي حتصيعي علي دي خنقة لكن انا بحبها فيك شديد بس ، قال اهتمام زايد قال
المهم يلا لي بعدين وخلي بالك من نفسك
قفلت منها وانا بضحك ، لقيت الشباب قاعدين بشربوا في جبنة ، سلمت عليهم وسألت احمد امتحن كيف ؟
قال امتحن زفت والامتحان كتم معاهو
وانتو يا دبايب الجابكم شنو موش الليلة اوف
منتصر قال لي في شيتات جينا نصورها
وبعدين الليلة الخميس يعني بكرة اجازة
ونحن السبت اخر مادة وما صعبة وانت عندك يومين اجازة
- لقيت منكم مكالمات كتيرة ... خير
احمد رد وقال لي :
- كنا عاوزين نطلع شارع النيل نغير جوا وقلنا نشوفك وانت مالك اتأخرت كدااا
- لالا بس وقفت شوية مع دفعتي واتناقشنا في الامتحان طيب شارع النيل ما نخليهو بعدين
هسي نمشي الداخلية نرتاح والمساء نطلع الخرطوم نتعشي ومنها نمشي شارع النيل رايكم شنو
وافقوا بالإجماع
وبقينا نتونس ونحكي ....
لاحظت لحاجة غريبة ، البت الإسمها عُلا دي كانت بتمشي وتجي بي جمبنا كتير
تمشي وتجي وعينها ما شالتها من عيني
عملت رايح منها وم إهتميت
عُلا كانت صاروخ آداب زي م بقولو ، بت سمحة شديد وشخصيتها قوية ومعروفة بلسانها الطويل
مبكية نص الجامعة برضوو
واي ولد كان بتمني يعرفها ، م اكذب عليكم هي سمحة لكن بالنسبة لي انا السماحة كلها كانت عند روان
وغير كداا من حركتها ديك قرشت ملحتها وشميتهااا
أحمد ركز معاها وقال :
انتو ياجماعة صاروخ اداب دا داير ينفجر ولا شنوو 😂
مالها تتحاوم زي الجدادة الكايسة الحَبْ
قلت ليهم اعملوا رايحين منها .. ولا أقول ليكم ارح بعد داا الداخلية والساعة كانت داخلة علي 4
وفعلاً طلعنا كلنا ومشينا الداخلية
أول ما دخلنا يادوب حسينا بالفتر والتعب رقدنا في السراير زي الجنايز 😅
انا بعد رقدت طلعت علبتي وولعت سجارة ، اخدت نفسين منها واتزكرت روان كان اتكلمت معاي في موضوع السجاير واني وعدتها أبطلوا
طفيتها طوالي ووقمت عملت لي جبنة وشربتهااا لانو كنت مصدع
في اللحظة دي جاني اتصال من رقم غريب
حاولت اعصر مخي اذا بعرفو م عرفتو
فتحت الخط
- الو منو معاي ... !!
.
.
.
يُتبع
#أبوبكر_علي