#البارت التاسع
رواية..رحمة عاطف
نورا ناصر ..نور سمو العراق
💔💔💔💔💔💔
السعادة هي أن يكون لدى الإنسان الحد الأدنى من أي شيء، و الحد الأقصى من القناعة و أن لا يكون لديه الطمع
العبد حر إذا قنع والحر عبد إذا طمع.
..................................
فتحت حلكي مصدومه من حميد كال اتزوجها صخام الصخمك ان شاء لله شتتزوج منها بنيه مريضه وكل وقتها تصفن لو تاكل بااضافرها...
سمعته رجع كال...حتى لو اتزوجها اني فتره وتزوج عليها اكلهم هي بنت عمتي وماردت تنهان اكثر من اهل اهانه واحنه محرمين عليها لازم اتزوجها...
وبعد فتره اتزوج عليها بحكم اني رجال والي متطلباتي وهي جامده ومجنونه...
امي ردت عليه بمكر...راح تكبر بعين بيبتك صدكني يا حميد وراح تكسر عين عاطف لراح خطب كافره واجه...
رغم الكل ما رضه بيها بس هو عاند واخذها وهسه انت من تاخذ رحمه بيبيتك راح تخليك علئ راسها والورث يصير الك وتضل تحبك...
حميد ..وهو هذا الي راح يصير...
ام حميد...عفيه عليك بطل...
غفران...
عفتهم ورحت واني اغلي من العصبيه استغفر لله كل همهم الفلوس وشلون يرضون بيبي...
كعدت علئ التخم واجت امي دخلت كالت...هااا ولج كومي يمصخمه عدلي نفسج اسبحي بدل هل البجامه الابستها لعندها ابن عم مثل عاطف تاكبلني وتكعد كومي اسبحي وكعدي يمه بلكي يتزوجج ويطلك الكافره
ضحكت كلتلها..اكولج ماما هو حتئ ما يكلي صباح الخير انوب تردينه بتزوجني
-اي مو عوووبه حقه مايتفل بوجهج مو انوب يكلج صباح الخير اذا نهارك كله رافعه شعرج كبايه جنها كبة شكريه اذا اني امج اخترع اباوع بوجهج طولج متر
تعصبت حيييل بعدني صغيره مااريد اتزوج خليت وطلعت رحت لغرفة بيبي لكيت بس رحمه دترسم ضحكت
كعدت يمها هي باوعتلي وسدت الدفتر بسرعه
ضحكت كلتلها خلي اشوفه هي ضمته لصدرها مقبلت انقهرت من تصرفها بس عذرتها خطيه مريضه
رجعت فرفشت الجو كلتلها...ارسميني
باوعت عليه وصغرت عيونها وضلت مركزه بوجههي واني بيه الضحكه
كلتلها...هاا دكولين صعب رسمها موو...لا هي قرده لا هي شمبانزي...لا هي غوريلا هههه
ضحكت بنعومة وفتحت دفتر الرسم ضلت تباوع عليه وترسم واني ساعه اسوي روحي حوله وساعه اطلع لساني واحط اديه علئ اذاني اسوي روحي قرد...
وهي تضحك اول مره اشوفها تضحك ضليت اسوي حركات بوجهي وهي ترسم وتضحك...
خلصت وانطتني الرسمه تفاجئت باوعتلها بغضب وضربتها علئ كتفها حييل ..لا يا زماله شنوو هل قرده الراسمتها هاي اني ملكة جمال بني قريضه هيج تسوين بيه يا عووبه
ضلت تضحك بصوت عالي واني اضحك وياها..
شويه ودخل حميد هي من شافته انرعبت وكعدت عاقله ولزمت القلم حييل واني باوعتله بتذمر..
شفت عيونه تراقب رحمه بنشوة وخبث وراسم ابتسامه خثيثه علئ شفايفه وحنيه مصطنعه...شلونج رحوومه ان شاء لله مرتاحه عدنه كوليلي اذا اكو احد مضايقج او ماذيج اعتبريني صديقج واحجي الي كوولشي...
رفعت حاجب مقبلت بكلامه والله يعرف يستدرجها شلون نذاله من حميد
طبعا رحمه حيل تخاف من حميد يطردها لذالك جانت ردت فعلها صدمه باوعتله بعيون ترمش ممصدكه كلامه...
رجع يباوعلها بحنيه وكلها..بالله هلدفتر الحلو شراسمه بي
هي مدته اله بخووف..وهو ضل يباوع بي ويبتسم كلها...حبيبي رسمج يجنن
لويت شفايفي بجزع..خررب يومك شلون راح يورطها...
وبعدها طلع من الغرفه...
وهي تبعته بنظراتها..لزمتها من ايدها كلتلها...رحمه عندي سؤال...
باوعت عليه بتساؤل ومحجت
جريت نفس كلتلها...انت اذا اجوج خطابه تتزوجين
فزت مرعوووبه وترجف بعصبية....لااااا لااا اطلعي بررره متستحيين بررره يالله اطللللعي...
جانت كوه متحكمه بااعصابها وترجف ومتوتره وجهها صار احمر واعصابها برزت
انصدمت من حالتها جنت متوقعه تخجل تستحي مو تتعصب
هذا الي يصير ويايه من يجوني خطابه استحي واخجل او اتصنع الخجل...
لزمتها اريد اهديها سحبتني حييل وطلعتني وقفلت ا
طلعت واني افرك بايدي وضايجه ثول شبيها هاي لو كايلتلها لعريس حميد شسوت...
اندك الباب وطلعت فتحته جانت الممرضه سفانا احنه عدنه معرفه شخصيه بيها
وهي مرات تجي لرحمه عاطف ابن عمو طلب منها تكون قريبه عليها وتشغل المحقق كونان
عود هو ليش ما شغلني؟ صح اني اثول من عم كونان بس مي خالف الأقربون اولئ بالمعروف..
سلمت عليها وهي راحت دخلت الرحمه
...
سفانا رحت الرحمه لان عاطف طلعني من المستشفئ اجي ازورها. وانطاني طريقه اتواصل ويه رحمه بيها بما حسن مموجود ماكوو حسيب
رحت الرحمه دكيت الباب وفتحته ضحكت واني اباوع عليها...سبرايز
ضحكت بهدوء و وكفت اجت ملهوفه عليه حضنتها وهي حضنتني باستني...
كعدنه نسولف واني اضحك ضليت اباوع الرسماتها حلوه ومتفائله شوويه...
سولفت الها عن حسن ابن عمي وكلتلها نصبت عليه شوفتها الرسائل ضلت تضحك كالت...لج خطيه لا تلعبين عليه
جاوبتها...يولي يستاهل شكوو يجاوب ويحب لا انوب شبسرعه حبني شهل كلاوات ههههه
شويه واجت منه رساله كاتب..ياسمين اريد اسمع صوتج حتئ لو بصمه...
ضحكت اني يعرف صوتي ويميزه باوعت الرحمه كلتلها ...رحمه باعي حفتح بصمه وانتي كوولي الوو شلونك بيبي...
ردت عليه..شنو بيبي طفل
ابتسمت...اي طفل بكد جدي ههههههه...
فتحت بصمه وقربته منها هي كالت...الوو شلونك بيبي...
ضحكت وقفلته...
كالت..هذا الطفل ابن منوو اخووج
طكيتها بضحكه...لو ابني جان انتحرت لو مو ابني ابن عمي...
جاوبت...انتي مربيته
باوعتلها بهدوء وفشله...اي اني مربيته وتربيته سز
رجعت ترسم بتفائل وامل
باوعت لرسمها كلتلها...مرتاحه؟
ابتسمت وكالت...اي حتئ حميد صار زين وياي اكيد مرتاحه...وبيبي تحبني وعاطف هماتين كلهم حبابين وميغلطون عليه ويكولون مخبله
تاسفت علئ حالها وحضنتها...لا انتي مو مخبله انتي عاقله فدوه الكلبج انتي احسن من هووايه ناس منافقه...
دمعت عينها وهمست...بس اني رخيصه وقذره
انصدمت من كلامها ودونتها بعقلي ..اني رخيصة وقذره ليش هيج تحجي عن نفسها ...
شنوو الصار...
شكد حاولت اسحب منخا كلام واستدرجها بس كانت حذره حيييل...
ما حبيت ازعلها واضوجها خليت وضليت احجي الها عن حسن وان هي رسلت لبصمه...اله
هي زعلت وضلت تحجي وكالت والله اكول لعاطف عليج...
كلتلها بخوف...جذب مرسلتها اصلا مسجلت حذفت المحادثه وشوفتها...
لذالك هي سكتت...
رجع حسن اتصل ما فتحت خط شكد سافل اكيد عجبه صوت رحمه يريد يغرد ويصير رومانسي...
ترخصت منها وطلعت اخذت سياره ورجعت للبيت بسرعه صعدت الغرفتي
كتبت رساله حسن عفيه مااكدر افتح خط ماما وبابا موجودين ومااكدر اعتذر
بسرعه رد برساله ...لج صوت زقزقه عصافير عبالك نغمة رنين مو صوت ادفع حالي ومالي علئ صوتج اذا صوتج هيج شكلج شلوون؟
حسيت بغيره من كلامها هو فعلا صوت رحمه حلو وينعوص...بس مو هيج بالغ هووايه بالوصف...
قفلت الموبايل وشمرته وتنهدت سمعت رنة الموبايل فتحته
لكيته كاتب ...ياسمين اريد صوره الج و وعد مني وثقي بيه ابببد ما اغدرج اشوفها واحذفها...
انصدمت هذا منين اجيبله صووره كتبت...لا اعتذر مااكدر..
كتب..ليش متثقين بيه...
رديت...لا مو هييج بس مو حلوه بحقي ارسل صورتي وفعلا اني ماعندي ثقه اني اصلا مااعرفك..
هو كتب..اهاا شكرا
كتبت...حسن لا تزعل ان شاء لله نداوم وتشوفني...
ما جاوب كتبت..حسن وين رحت ..يااا حسن وينك
مجاوب....
جريت نفس شلون تعلمت عليه واذا شاف صورتي يذبحني...
شسوي..ارسله صورة رحمه...
بس ماعندي صورتها...بس اروح الها اخذ الها صوره وارسله اله واحذفها...
احسن حل......
واحلفه يحذفها ومن يجي من البصره اخذ موبايله وافتشه واشوف اذا بعدها موجوده....
..............................
جنت كاعدة على السرير وبيبي ماكو يمي ، اخذت الكراس واقلام التلوين بصفي ع الدولاب وخليتهم على رجلية واسترسلت بالرسم وحسيت نفسي بغير عالم عالم بس الوان ومناظر طبيعية حلوة واشجار شاهقة وخضرة واني بينها وعايشة حياة حلوة كلها امل كلها تفاؤل ...
واني على هذا الحال حسيت ع الباب انفتح ، رفعت راسي اباوع عبالي بيبي ، بس مشفتها شفت عاطف
باوعت اله بصدمة ورمشت عدة رمشات ..
ابتسم واتقرب مني ، كعد ع السرير ..
كال ؛ شبيج اخترعتي ترة مؤدب حيل والله واعرف الاصول دكيت الباب بس انتِ مارديتي ، خليت الادب على صفحة وفتحت الباب وفتت بيها شي هاي ؟
هزيت راسي برفض ومخنزرة عيوني ...
سحب الدفتر مني ظليت متمسكة بي ..
باوعلي والابتسامة مرسومة على وجهه
همس ؛ تسمحيلي ؟
رخيت ايديه ووهو سحب الدفتر مني وصار يطالع الرسمة الي رسمتها ..
عيونه ع الرسمة وحجه ؛ كلش حلو داحسج متغيرة حتى برسماتج اليوم الرسمة غير شكل اكو تفاؤل بيها شي حلو هالشي يثبت انو انتِ مرتاحة هنا ، صحيح ؟ لو اني غلطان ؟
جاوبته واني اعصر بيديه مرة ومرة احطهم بحلكي ..
كتله امي احب بيبي وهيه هم تحبني ومداريتني ومتأذيني ..
كال ؛ احنا كلنا هنا نحبج ..
بدون ارادة مني رفعت راسي وباوعتله غصت بنظرات عيونه ، شفته يباوعلي بتخدر ، ثواني وتهرب من نظراتي حسيت بمشاعر اكتسحت قلبي بقوة عجزت عن مواجهتها
اشبه نفسي بسفينة شراعية وهاجمتها الامواج العاتية ....
كال وكانه يخفي توتره ؛ اليوم نطلع شنو رأيج ؟
كتله ؛ اني اني اريد بيبي ...
_ واضح انو بعدج ممطمنة من ناحيتي .
هز راسه وكمل كلامه ؛ ولايهمج هيه بيبي هم متتركج ولا اني اخليها تتركج ، من اول موصيها عليج وكتلها انو تخليج مثل ظلها ومتفاركج ابد ..
هزيت راسي ودنكت والامان غزى روحي وكياني ..
كال ؛ يلله حضري نفسج ، امم اني اختارلج ملابس شنو رأيج ؟
راح وفتح الكنتور ظل يقلب بالملابس طلعلي بنطرون جينز وبدي ابيض مرسوم عليه لعابة ، خلاهم على السرير وكال يلله بدلي وراح طلع ..
باوعت للملابس الي اختارهم والرسمة الي ع البدي عبالك مالة اطفال يربي شبي هذا عباله اني طفلة خرب حظي اي والله ، اخذتهم ولبستهم ولبست فوكاهم البالطو ..
دخلت سبحت وطلعت بدلت بسرعه ومشطت شعري هو قصير حيل...
لبست حجابي وحذاء وطلعت لكيت بيبي منتظره هي وعاطف..
ابتسمت وبيبي حضنتني وباستني وعاطف باوه عليه وغير نظرته وبعدها رجع باوعلي بلهفه وضل صافن واني كذالك باوعت عليه بس نزلت عيوني بسرعه خجلانه...
كال...يالله امشوو
ما اشوف اله غفران طلعت لابسه ملابس كالت..اروح وياكم
ضحك عاطف كلها...امشي سنفوره
ركبنه اني وياها وره وهو وبيبي ليكدام جانت غفران تسولف بهمه واني ساكته صافنه عليها ...
استعذت بالله من الشيطان الرجيم الحسد يأكل الحسنات كما تأكل النار الحطب...
مااريد احسدها علئ ضحكتها خطييه...
رجعت باوعت للشارع شافت واحد حلوو صاعد بجارجر كالت...اوووف ابو الجارجر سمط جدي اوه قصدي الجارجر
عاطف صاح بيها كلها...هيي شبيج حتئ هناك باوكرانيا مشفت مثلج..
ضحكت كالت..قصدي الجارجر والله..
همست باذاني ...رحمه شنو رايج با ابو الجارجر
باوعتلها ببتسامه كلتلها...مو حلوو
كالت..ولي ذوقج معفن غيير حلغووم...
وصلنه للمول نزلنه جان شئ غريب عليه متفاجئه وفرحانه بنفس الوقت ...
جنت اباوع لعاطف الانظار عليه والبنات حلوات يرمقنه بنظراته ضجت حييل...
مو حبا بي بس هو خاطب شكو يباوعن عليه مو صحيح..؟
شتريت ملابس وشالات وجانت الشغله الوحيده المحلوه بالطلعه هي الدرج الكهربائي بحيث اني ساعه واكفه وهم يشجعون بيه...
وغفران تصعد من هذا الدرج وتنزل من الثاني واني لسه يشجعون بيه...
المهم كمزت وكوه صعدت ومن درنه ننزل خفت وحتاريت قفزت حيل بيبي تضحك وغفران طايحه بالكاع من الضحك واني مخنزره وعاطف يكلهم ..لا رحمه بطله رحمه سباعيه...
رحنه للكافيتريا...
كلتلهم اني اروح اطلب الكم شنو تردون
عاطف ضحك كال..شتاكلين ناكل
استحيت منه ورفعت المنيو ...حجيب فنكر وبيتزا
اجت غفران باوعت ويايه كالت..جيبيلي من هاي عرائس دجاج اريد اشوف شكلها شلون مثل العروس لو دجاجه محمره...
بيبي كلتله...غفران اكعدي لا اخلي عاطف يشمرج بمستشفئ المجانين...
عاطف ضحك كال..اي والله ينراد اشمرها هناك هل مخبله هاي...
ضحكت وخليت ورحت طلبت الطلب وهذا الي جان كاعد علئ الحاسبه يكص وصل كال..انتي شسمج
كتله..رحمه
ضحك...عمرج 15 ....16 موو؟
جاوبته...17
كال..ماكوو فرق عرفتج صغيره من حجمج ...اشر علئ بيبي كال...امج؟
جريت نفس...لا بيبي
ضل يسأل علئ عاطف باوعت لعاطف شفته يباوع عليه وخله وكف من مكانه واجه يمي حط ايده علئ جتفي واني عبالك تكهربتك كووه صبرت نفسي..
باوع لصاحب المطعم بحده وكله..اخرتنه يمعود
ابو المطعم ضحك كله...مرتك؟
اني انصدمت فتحت عيوني متوتره ومرعوبه وعاطف ضحك كله...ميخصك....
اخذنه الطلب ورجعنه كعدنه جنت اكل بشراهه وخجل وما حطيت عيني بعين عاف ولا بعين اي واحد...
بس جنت حاسه بنظراته عليه كلبي يدك سرريع تمنيت اختفي والمايونيز دمر ملابسي من كثر ما متوتره وبيبي تمسح بي...
خلصنه وطلعنه ...
اخذت اغراضي وغفران شايله اغراضها وطلعنه ركبنه بالسياره...
وصلنه للبيت ودخلنه شفت حميد كاعد بالاستقبال من شافني وكف وضحك كال..هلا برحمة البيت
ابتسمت بوجهه وهمست..شكرا
كال..مشتريه ملابس بالعافيه ليش مكلتي الي جان اخذتج لاحلئ مول واشتريت الج
عاطف كلها...ما سويتها شنو تذكرت
ضحك..ان شاء الله اخذها الاحلئ مول شعدنه غير رحومه..
الكل استغرب منه...
واني عفتهم ورحت الغرفتي فرحانه وارتب بالملابس دعيت العاطف من كلب ولسان لان كدر يغير من مودي ويجبر بخاطري...
بدلت وغسلت ونمت بحصن بيبي وبيبي تمسح علئ شعري وتسولف عليه وتسولف شلون راحت للحج ومواقف صارت وياها كدرت تضحكني وتسعدني...
.........................
عاطف ...
بعد يوم حلوو ومشرق كدرت اسعد رحمه شوويه واشوف ضحكتها...
دخلت للحمام وسبحت فتحت موبايلي شفت نيكول كاتبه...متئ تاتي ان لم تاتي ساتزوج واحرق قلبك
ضحكت بصوت عالي علئ كلامها وكتبت...قريبا ان شاء لله....
شوويه وأجاني اتصال من رقم غريب...
فتحته كان صوت انثوي رقيق...كالت...الووو
جاوبت بهدوء...الوو تفضلي
ردت بمياعه...دكتور عاطف
استغربت ...اي عاطف تفضلي عندج شئ...منو انتي
كالت...اني حضئ زوجة ابوو رحمة الفاشل عرفتو موو
انصدمت كلتلها..اي اعرفه محتاجه شئ
همست بصوت اقرب للخدر..عندي مشكله ومحتاجه الك.....
نهاية البارت...يتبع
كونوا انتم كونوا بخير...انحبكم💔
نورا ناصر...نور سمو العراق...😘
لا تنسو التصويت والمشاركه بكم نكتمل...