بقلمي(هدى الموسوي ) الاميره الموسويه👑
ما احلل لاي شخص ياخذ كتاباتي وينشرهم (ذمه)
اسيد .. دااحجي وياها .. وجان تبجي!!
بقت صافنه بوجهي بنظره غريبه احس عيونها بيها سؤال ديدور جواب بعيوني ، ملامحها جامده ودموعها تجري ع خدها بغزاره !!
بقيت اباوع بوجها رغم اني كل يوم اشوفها هنا وشايفها من قبل هواي وعن قرب هم .. بس هذي اول مره اركز بشكلها لهدرجه .. بحيث حسيت نفسي اول مره اشوفها !!
اول مره انتبه لو عيونها اصفر وبيهم خط اخضر ، لونين يصفنون!!
تفاصيلها الناعمه خلت عيوني تسرح بغير عالم .. شفايفها المليانه دوختني .. انسطرت مااعرف اشصارلي !!
وگلبي .. گلبي الغبي رجع يرجف بقوه !
بهذي اللحظه اجت ابالي افكار ثانيه ..خلتني اكره نفسي لدرجه صار عندي شعور بالغثيان
شفتها اشلون مستسلمه بين اديه ورايحه بغير عالم .. وهذا الشي قرفني منها اكثر!
شي بعقلي يصرخ .. كلهن نفس الشي .. كلهن رخيصات ... كلهن !!
هنا تغير كلشي وقررت احرك روحها واذلها مثل ما داخلي ديحترك بسببهن ، يمكن هي ما الها ذنب .. بس ذنبها انو هي مثل ...!
فكرة انو بسهوله كدرت اخليها تخضع الي خلتني انظر الها بـ استحقار .. بكل مكر رفعت ايدي ومسحت الدمعه الي نزلت ع شفتها ...."
اول مخليت ايدي ع وجها حسيت جسمها كله اتشنج .. حتى رجفتها اختفت .. صح اني انسحرت بيها ورحت لغير عالم ، بس من خليت ايدي عليها مو حباً ولكن لغايه ثانيه!
خليت ايدي عليها وماكو اي رد فعل لا رفضت ولا اعترضت ع الي سويته !!
هه حلوو الظاهر الخانم متعوده ع هيج شي .. ميزعجها لمسات الاخرين!
و قررت انفذ المرحله الثانيه من خطتي !
ايدي ع وجها ، عيوني ع شفايفها .. وبديت اقربها مني .... ماكو اي رد فعل منها ..رغم كنت داللعب بيها مو اكثر وقرفان منها مو انجذاب ، بس كلبي بقى يرجف اقوى كلما اتقرب منها اكثر .. متراجعت كملت لعبتي الى ان وصلت يم شفتها وردت ابوسها ....... هنا .......!
داليا .. خلا ايده ع خدي وبعدين نزلها ع شفتي ... احس المكان الي خلا ايده عليه صار نار ومشتعله!
كل ذره بجسمي احسها دتحترك مااعرف لويش ، شديصير !؟
محسيت بأي شي ثاني .. لا المكان الي احنا بي ، لا ممكن يدخل احد ويشوفنها بهالوضع ، لا قربه مني الفضيع!!
محسيت غير بلمساته ونظرة عيونه الي دتفترس وجهي ، جسمي خاني من اول لمسه استسلم له!
صرت مثل الطينه الي يشكلها مثل ميريد ، يتحكم بيها بكل سهوله .. حسب رغبته وبأرادتي!
بقيت صافنه بعيونه الي اخذتني لغير عالم .. بس لما حست بي ديريد يبوسني!!!!!!!
هنا جسمي كوله انتفض ، احساس غريب خلاني اكره قربه مني ... مااعرف لويش حست هشكل!!
فجأه وكالعاده دفعته عني ورفعت ايدي بدون شعور ردت اضربه راشدي (كف)!!!
قبل لتوصل ايدي لخده لزمها بقوه وعصرها ... احس روحي دتنعصر من الالم!!
ايدي الي احتركت قبل كم دقيقه كانت بين ايده ديهشم كل عضم بيها ..!
بلا شعور مني صحت اآآآه..!
اتوقعت يترك ايدي لما يشوفني اشون دا أتوجع بحيث عيوني دمعت من كد الالم!
رغم هذي حالتي بقى لازمني ويضغط ع ايدي بقوه!!
اسيد .. لما دفعتني كان المفروض انزعج واكرها اكثر .. بس ماادري ليش دكات كلبي بدت تنتظم !
حسيت شي بداخلي كان دينازع ديصارع بس لما بعدتني عنها هدأ..!!
انصدمت بيها اشلون قبل كم ثانيه كانت مستسلمه كلياً الي حتى مترمش!
وبلحظه يتغير كل وضعها و لا ع بالك نفس المخلوقه!!
ضحكه بنص گلبي احسها تريد تنفجر غصب عني من شفتها اشون رفعت ايدها وتريد تضربني، (اتخيلو انتو قزمه ومعصبه) ؟!
من كل عقلها هاي براشدي واحد هسه اخليها تفقد ذاكرتها وتريد تضربني؟!
هههه زين ليش هالعصبيه المفاجأه مو هي الي ذابت بين لمساتي ، مو هي الي صفنت بوجهي ، هسه معصبه مني ليش؟!
بقيت ملامحي جامده وبصوت حاد جداً كلتلها ..
_الظاهر نسيتي نفسج انتي!!
داليا .. اني الي نسيت نفسك لو انت .. اشون تتجرأ وتلمسني ؟!!
اسيد .. اتجرأ وألمسج؟!!
هه قبل دقيقه ما كان هذا شعورج لما استسلمتي اللمساتي!!
الظاهر عجبج الشعور!!
داليا .. بغضب رادت تنفجر بي ، انت واحد حقــ ...
قاطعهم دخول الحجيه و ساره .. داليا كتمت غضبها وسكتت مكدرت تحجي شي!
الحجيه .. ها بنتي بشري اشلون صارت ايدج بعدها توجعج اخليهم ياخذوج للمستشفى ؟!
اسيد .. ميحتاج مستشفى خليتيلها مرهم وهذي حبايه مسكن الآام تشربها وللعصر تصير زينه.
الحجيه .. هاا يمه اسيد ليش متاخذها للمستشفى ايدها مستويه البنيه اخاف مو زين انلفها.
راد يحجي اسيد .. بس الحيه الصفراء سبقته ..
ساره .. بنبرة خبث والعلج بحلكها .. هاي اشبيج خاله شدعوه سويتيها قصه ترى هي كولها كاسه تشريب مو فد عظمه ، وبعدين هذا اسيد دكتور وديكولج مبيها شي قابل ميفتهم !!
الحجيه .. لا يمه مو ميفتهم بس الكاسه حاره والمكروده ايدها انصلخت ، كلت اخاف تلتهب ايدها ..
قبل لتحجي ساره داليا كامت ..
داليا .. لتخافين حجيه مبيها شي ايدي وشكراً دكتور .. حروح اني من رخصتكم.
راحت داليا .. بس اسيد صاح وراها بصوت حاد ..
اسيد .. انتظري ... هذي الحبايه مسكن اخذيها بعد متتغدين .
داليا .. انداريت بخطوات هادئه و رحت دااخذ الحبوب من ايده .. اول ما وصلت يمه شمر الشريط ع الميز !!
احقر من هيج ماكووو شمر الشريط حتى يذلني وكدام هاي الحيه!!
احس دوخه صارت براسي من الفشله وجسمي كام يرجف من الغضب بس محجيت شي لان الحجيه واكفه وعيب منها والا كان شلت الشريط وشمرته بوجهه الكلب هذا واخلي الحيه الصفره تتفرج عليه والي يصير خلي يصر.
بس الحجيه وكفت بعيني مردت احرجها وهي محترمتني .. بأيد ترجف غضب وقهر شلت الحبوب وطلعت من الغرفه بسرعه .. بس نظرات الافعى السامه احسها تريد تاكلني والابتسامه تارسه وجها المسموم ترس!
طلعت بسرعه كمت مااشوف شي كدامي بوجهي لغرفتي دموعي كامت تصب اشلون ذلني كدام هاي الحشره!
دخلت غرفتي سديت الباب وارتكيت عليه .. مسحت ادموعي بس عيني تصب مسكتت !
بعد نوبه بكاء طويله على حظي الي جابني يم هذا الي ما عنده ذرة ضمير كعدت بالكاع وبجيت مااعرف لويش ديصرف وياي هشكل؟!
ساعه يصير لين ويحاول ينشف دموعي وساعه يصير حقير ويذلني كدام هاي الحيه!!
زين اني بس اريد افهم شي واحد .. ساره لويش هالكد تكرهني؟!!
شنو الي سويته الها حتى تضوج مني ومتطيقني لهدرجه ؟!
ولويش من تشوفني يم اسيد لو تشوفه يحجي وياي تعصب ويبين عليها الانزعاج؟!!
معقوله اكو شي بينها وبين اسيد و ع بالها عندي علاقه ويا؟!!
لااا لا مستحيل ، هو صح حقير وگلبه مثل الحجر بس مبين ما عنده هاي السوالف .. يسوي علاقه ويا زوجة اخو؟!!!
لا داليا اشبيج اتخبلتي شنو هالافكار؟!
اي ولويش مستحيل؟!
نظرات ساره وكرها الي ما اجت من عدم اكيد انَه بالموضوع ولازم اعرفها شنو!
بس اشلون اعرف اذا هذا الحقنه ميخليني اطلع وهو موجود بالبيت!
وهاي الحيه متجي هواي الا بالعزايم؟!
اوووووف هسه اني شعليه بيهم طبهم مرض هي ويا خليني بحالي عايزه مشاكل وبلاوي انوب اروح احقق بسوالف تعبانه ، احسن حل اتجنبه هو وياها لان اثنينم نفس الطينه والحقاره.
داافكر واحس بطني كامت تقرقر من الجوع ، وايدي نار تسعر بيها ، باوعت ع الساعه الدنيا العصر صايره .. يبووو صارلي ساعتين بالغرفه اشكد عيب هسه الحجيه اتكول مصدكت كلتلها روحي شردت ، خلي اكوم اشوفها خاف محتاجه شي ، واكيد هاي الحيه راحت.
كمت فتحت الباب ع كيف وطلعت حتى ميحس بيه الحقنه لو يشوفني .. طلعت من الغرفه البيت هدوء الظاهر رايحين الحمدلله يا رب .. طلعت من غرفتي بسرعه رحت للمطبخ لكيت ام عادل دتحضر بالاكل الباقي ولابسه عبايتها اتريد اتروح!!
ام عادل .. ها داليا اشلون صارت ايدج بعدها توجعج!
داليا .. اي والله ام عادل كولش دتأذيني مااعرف شأسويلها.
ام عادل .. يا ويلي عليج الحرك يموت ، زين دكتور اسيد مو انطاج مسكن ما اخذتي!
داليا .. هاا .. اييي .. بس كالي لازم تاخذي بعد الاكل واني بصراحا بطني دتصوصي من الجوع مماكله شي من الصبح.
ام عادل .. ياا شوفي اشلون نسيت هذا غداج جاهز بالفرن بس تحمي وتاكلي ردت اصعدلج غده بس الحجيه كالت خاف نايمه عوفيها ، واذا تردين اني احمي الح هسه اخاف متكدرين.
داليا .. مشكوره ام عادل متقصرين اني اسوي لفه اكلها واروح اشوف الحجيه خاف محتاجه شي.
ام عادل .. لا الحجيه مو هنا راحت ويا ابنها كرار تبقى يومين وتجي.
داليا .. شنوووو .. وين .. اشون .. اشوكت راحت .. زين لويش مكالتلي .. واني وين ابقى؟!!
ام عادل .. اسم الله يمه اشبيج انهديتي بيه بالاسئله ، المره راحت يومين يم ابنها لان صارله فتره يلح عليها تروح يمهم متقبل ، فاليوم كاللها ما اروح الا تجين وياي .. اضطرت تروح ، وانتي مكالتلج لان ع بالها نايمه وشتسوين ترحين وياها وهاي ايدج المحتركه حتى متكدرين تسوين لروحج اكل انوب تساعدين مره كبيره بالعمر !
ارتاحي كم يوم على ما تجي الحجيه بلكي تطيب ايدج حتى تكدرين اتداريها.
داليا .. زين اني وين اروح؟!!
ام عادل .. شنو وين اروح غير هنا؟!
داليا .. اشوووو .. اشون .. ابقى .. هنا .. وحدي .. ويا..!
ام عادل .. يا ولج هو دكتور اسيد بحالج بحال النسون متشوفين الحجيه عافتج ويا .. تدري بي يتخبل من النسوان يعني لتخافين من هاي الناحيه ، بس انتي ما عليج بي ولا تحجين ويا ترى هذا ميعرف لا كبير ولا صغير حاولي تتجنبي ومن يريد منج شي سوي وانتي ساكته لان ادري بيج اللسانج متبري منج.
داليا .. بس...
ام عادل .. لا بس ولا شب اني تأخرت وجهالي وحده بالبيت خلي اروح احسنلي ومثل ما كلتلج معليج بالدكتور.
راحت ام عادل واني بقيت مثل الضايعه اتمنيت الزم عبايتها واروح وياها ، بقيت اني والوحش وحدنا .. دخيلك يا رب اوكف وياي.
سويتلي لفه بسرعه حتى الاكل محميته وهو وبارد اكلت لا يجي ويشوفني .. شربت الحبايه ورحت الغرفتي بسرعه .. اول ما طلعت من المطبخ شفته كدامي مبدل وكاشخ الظاهر يريد يطلع !!
طالع يسوووودن شنو هالهيبه والحسن الي شايله اوف!
بسرعه درت وجهي ومشيت لغرفتي .. قبل لا اوصل صوته وكفني!!
اسيد .. بصوت جامد .. اشلون صارت ايدج!!
داليا .. واني دايره وجهي .. زينه.
اسيد .. اني شكايلج!!
داليا .. اتذكرت كلامه من احجي وياج باوعيلي وجاوبي ، ردت التفت واجاوبه بس اتذكرت الي سوا بيه كدام ساروو!!
بقيت دايره وجهي عنه وبصوت حاد كولتله ..
_ما اعتقد الجواب يتطلب اباوع لحضرتك ولا تقرا بوجهي فماكو داعي ادير وجهي حتى احجي.
اسيد .. هاي متخاف ولا تجوز من اسوالفها .. اعرف اتريد تعصبني بهذا الاسلوب بس هسه مفارغلها لازم اطلع وما عندي وقت الها ، سكتت بس كلامها حيل زعجني .. بصوت جامد كلتلها .. اني طالع واذا صار شي احجي ويا الحرس بره هم يتصلون بيه.
عفتها وطلعت... رحت لصديقي دكتور علي نازل مجاز كلتله خلي نطلع نتونس ، طبعاً اني ما الي خلك طلعه وايام الاجازه يا دوب اخلصهن نوم لان مشبعان نوم بالدوام ، بس كلتله نطلع لان محد بالبيت بس اني وهاي الصلفه واخاف اشوفها لو تحجيلها حجايه مثل الي حجته من طلعت وابتلي بيها لذلك خابرت علي واتفقت ويا نطلع!
و مناك قررت اروح لبيت اخويه كرار اشوف امي بلكي الله يهديها و ترجع وياي مااريد ابقى ويا هاي وحدنا بالبيت.
اتواعدنا اني وعلي ورحتله .. سلام وكلام وافترينا اشويه .. بعدين سألني عن سلمى وداليا....!
طبعاً هو ميعرف داليا تشتغل عدنا .. فمن كلتله انصدم!!
علي .. شنووو هاي اشوكت صار الحجي ، وليش مكلتلي؟!!
اسيد .. والله يا خوي اني هم مثلك اتفاجأت من شفتها عدنا بالبيت بعدين فهمت الموضوع من امي وسويت مشكله شكبرها حتى اطردها بس امي مقبلت تطردها وحتى اتخربطت!
علي .. زين و سلمى .. اقصد .. يعني .. وين راحت!
اسيد .. ما اعرف علمي علمك!
علي .. لازم اشوفها واحجي وياها اريد اعرف سلمى وين؟!
اسيد .. اشوفك هواي مهتم بـألي اسمها سلمى شنو قصتك علي؟!!
علي .. اسيد من الاخير البنيه اني حبيتها اول ما شفتها ، وكنت ناوي اتقدملها على سنة الله ورسوله اول ميتحسن وضعها بس الظروف الي صارت غيرت كلشي.
اسيد .. هههه تتقدملها؟!!
من كل عقلك انت تتزوج وحده مثل هاي؟!
لك بابا هاي كانت عايشه بميتم يعني لا اصل ولا فصل اشلون تتزوجها ، وغير هذا هي من دين وانت من دين ثاني منو يكول توافق تتزوج من غير دينها ، وفرضنا فرضاً وافقت وردت تتقدملها اهلك اشلون راح تقنعهم؟!
شتكللهم اريد اتزوج وحده اتعرفت عليها عن طريق انفجار صار بالميتم الي عايشه بي وحبيتها ولازم اتزوجها؟!!
علي .. اسيد هاي عود انت صديقي المقرب ومثل اخويه هيج تحجي ، بس مو صوجك صوجي اني الي احجي لواحد مثلك هو انت وينك وين المشاعر وتفهمني اكوم اروح احسنلي.
اسيد .. لك بابا اكعد وين مولي .. اني مدااستهزء بيك وبمشاعرك الخايسه بس دااحجيلك واقع حال حتى اذا لكيتها للبنيه و وافقت تتزوجك اهلك مستحيل يرضون تتزوجها خصوصاً امك انت بنفسك كلتلي تريد تزوجك على ذوقها ..!
علي .. ماعرف اسيد مااعرف كل الي اعرفه انو اني احبها والله العظيم من يوم الي وصلتها للدير لليوم متروح من بالي وكل اشويه افكر اروح اخطفها وتزوجها .
اسيد .. ههههههه لك والله صدك ضحكتني ، هاي عود انت ضابط وحماة الوطن طاح حظك اذا صدك اتسويها ..
علي .. هو حظي طايح بعد شيطيح منه.
اسيد .. زين لويش متروح تسأل عليها اتشوفها وين ما وين اخاف تلكها متزوجه يحظي.
علي .. لك لتخبلني شتتزوج مصارلها شهر من عفتها ، بس المشكله اخاف صارلها شي لان داليا مستحيل تعوفها وحدها.
اسيد .. اذا اتريد اخلي امي تسألها الك وتشوف شصاير ياها.
علي .. اي والله بعد اخوك تسويلي فضل.
اسيد .. ماشي تتدل ، وهسه يلا كوم خلي انروح بعد ورايه امر على امي اخذها من بيت كرار.
علي .. اوك يلا كوم ومو تنساني .
اسيد .. كلنالك ماشي لتلح عاد.
كامو اثنينهم علي راح البيتهم واسيد راح ع امه بقى اشويه يم بيت اخوو وحاول يقنع امه ترجع ويا للبيت لان ميكدر يبقى وحده بالبيت ويا داليا .. بس امه مقبلت كالتله اخوك يزعل عليه هسه يكول ساعه ورحتي!
اضطر اسيد يرجع للبيت بدون امه
اول ما دخل لبييت شاف الكهرباء مطفيه!!
سأل الحرس كالوله المولد عاطل وديصلحون بي .. اييي هي هاي العايزه هسه كملت.
عافهم و دخل للبيت لكى اظلم هندس فتح اللايت مالت الموبايل وراح لغرفته!
وهو ديصعد الدرج جان ينصدم بشي ناعم و وكع بحظنه!!!!
للحكايه بقيه ❤️
رأيكم بالبارت وتوقعاتكم للاحداث القادمه 🤗 طولتلكم البارت تعويض عن البارحه
واعرف الاحداث بطيئه بس البارتات القادمه حتشوفون هواي تطور بالاحداث ، اتمنى تصوتون لكل البارتات ، صوتو حتى تصعد القصه و انزل الـبارت 12 بسرعه