ကျွမ်းကျင်စားဖိုမှူးစနစ် အပိုင်း(၄၆)
ယွမ်ကျိုးက ယိုကို ဂရုတစိုက်ခပ်ထည့်နေစဉ် ထူးဆန်းသော တစ်စုံတစ်ရာ သဘောပေါက်သွားသည်။ စက္ကန့်ပိုင်းခန့်ကြာအောင် မတ်တတ်ရပ်ကာ တွေးတောပြီးနောက် သူ့ယူဆချက်ကို စမ်းသပ်ကြည့်ရန် နောက်မှ ကြိုးစားမည်ဟု ဆုံးဖြတ်ခဲ့သည်။ ဘလူးဘယ်ရီယို ပန်းကန်ပြားနှင့် အလယ်အလတ်အရွယ်အစားရှိသော ခေါက်ဆွဲစွပ်ပြုတ်ကို ဗန်းပေါ်တင်လိုက်သည်။
"မင်း မှာထားတဲ့ ခေါက်ဆွဲပြုတ်ရပြီ" ယွမ်ကျိုးက ဝူဟိုင်းဘေးနားက အမျိုးသားကို ပေးလိုက်သည်။ နောက်တစ်ပွဲကို ဝူဟိုင်းဆီ သယ်လာသည်။
"မင်းမှာထားတဲ့ အထူးပွဲ၁၃နဲ့ခေါက်ဆွဲပြုတ်ပါ"
"ဒါက ဘလူးဘယ်ရီယိုမလား" ခေါက်ဆွဲပြုတ်ကို အရင်ရသော အမျိုးသားက ကြားဝင်ပြောဆိုသည်။
"ဟုတ်တယ်၊ ငါလဲ ဒီလိုပဲ ထင်တယ်" ဝူဟိုင်းက ယွမ်ကျိုးကို သံသယမျက်ဝန်းဖြင့် ကြည့်လိုက်သည်။ သို့သော်ငြားလည်း ယွမ်ကျိုးက ဂရုမစိုက်သော အမူအရာဖြင့် ဗန်းကို မူလနေရာသို့ ပြန်ထားကာ ထမင်းကြော်သွားကြော်သည်။
"ငါလည်း ဘလူးဘယ်ရီယို လို့ထင်တယ်။ သူဌေးယွမ် ကျွန်တော် ခန့်မှန်းတာ မှန်လား" ယွမ်ကျိုးက ပြန်မဖြေ၍ ၎င်းအမျိုးသားက ထပ်မေးသည်။
"ဟုတ်တယ်။ ခင်ဗျားတို့ ထင်သလိုပဲ" ဤတစ်ကြိမ်တွင် ယွမ်ကျိုးက လေးနက်သေချာသော အဖြေကို ပေးလိုက်သည်။ ၎င်းအမျိုးသားက ဝူဟိုင်းကို ဂုဏ်ယူဝင့်ကြွားစွာ ကြည့်လိုက်သည်။ သို့သော်လည်း ဝူဟိုင်းက သူ့အကြည့်ကို မသိကျိုးကျွံပြုကာ စားစရာရှိတာကို ဆက်စားသည်။ ပွင့်ပွင့်လင်းလင်း ပြောရမည်ဆိုလျှင် ယခု မှာထားသော ဟင်းပွဲများကို ဝူဟိုင်း မနှစ်သက်ပေ။ သူက အစားဂျီးများသူ ဖြစ်ပြီး သူ့ကြိုက်က တခြားသူများနှင့် မတူညီပေ။ သာဓက အနေဖြင့် ပြောရသော် သူက ဂျုံကို အခြေပြုထားသောဟင်းလျာများကို နှစ်သက်သည်။ ထို့ကြောင့်လည်း ရှောင်လုံပေါင်းဖက်ထုပ်အကြောင်းကို
မကြာခဏ မေးမြန်းမိသည်။ ယခုရရှိသော ဟင်းပွဲအသစ်သည် သာမန်ရိုးရှင်းသော ခေါက်ဆွဲပြုတ်ဖြစ်သည့်တိုင် ဂျုံအခြေပြုထား၍ သူ သေချာပေါက် ဝယ်စားကြည့်မည်။ ဝူဟိုင်းမှာ အလွန်ပြင်းထန်သောအစာအိမ်ရောဂါရှိသော်လည်း ပူစပ်စပ်အစားအသောက်များကို ရွေးချယ်စားသောက်လေ့ရှိသည်။ သူ့အမြင်တွင် ငရုတ်သီးအရောင်မပါသောခေါက်ဆွဲပြုတ်က ဂျုံ၊မုန့်ညှက်များနှင့်ပြည့်နေသော စွပ်ပြုတ်တစ်ပွဲထက် မပိုချေ။
ထို့အပြင် သူက စွပ်ပြုတ်အရည်ကို အရင်ဆုံး သောက်လေ့ရှိသည်။ ထို့နောက် ခွက်ကို မ,လိုက်ပြီး တစ်ငုံသောက်ကြည့်လိုက်သည်။ စွပ်ပြုတ်အရည်က အရသာပေါ့သော်လည်း ဂျုံ၏မွှေးကြိုင်သော ရနံ့ပြင်းပြင်းနှင့် သဘာဝနှမ်းဆီ၏မွှေးရနံ့ ရသည်။ ချိုမြသောအရသာနှင့် နှမ်းဆီမွှေး၏ရနံ့ ရောယှက်ထားသော စွပ်ပြုတ်အရည်က သူ့လည်ပင်းထဲ စီးဆင်းသွားသောအခါ သူ့စိတ် ချက်ချင်း လန်းဆန်းသွားသည်။
ယွမ်ကျိုး၏စားသောက်ဆိုင်မှ အစားအသောက်များကို စားပြီးသွားတိုင်း ပင်ပန်းနွမ်းနယ်မှုများ ပျောက်ကွယ်သွားပြီး နှစ်နှစ်ခြိုက်ခြိုက်အိပ်မောကျကာ နိုးလာသူကဲ့သို့ လန်းဆန်းနေသည်။ အစပိုင်းတွင် ယွမ်ကျိုး၏ဟင်းချက်လက်ရာကြောင့် သူ့ရုပ်ရော၊စိတ်ရော ကျေနပ်တင်းတိမ်သည်ဟု ထင်ခဲ့မိသည်။ သို့သော်လည်း
သူ့စိတ်ကို လန်းဆန်းတက်ကြွစေခြင်းက အမှန်တရားဖြစ်သည်။ သူက တူကိုကောက်ယူလိုက်ပြီး ခေါက်ဆွဲများကို ညှပ်ယူလိုက်သည်။ တူများက အညိုရင့်ရောင်ရှိပြီး ခေါက်ဆွဲသားက ပုံမှန်အဖြူရောင်ခေါက်ဆွဲသားနဲ့ ခြားနားစွာ အဝါရောင်သန်းနေသည်။ စွပ်ပြုတ်ပူပူနွေးနွေးမှ ထွက်လာသော အပူငွေ့များသည် ဝူဟိုင်းကို ခေါက်ဆွဲသားနှင့် ပတ်သက်သော အသေးစိတ်အချက်အလက်ကို လေ့လာခွင့်မပေးဘဲ စားသုံးရန် သွေးဆောင်နေသည်ဟု ထင်ရသည်။ တစ်ချက် ကိုက်ရုံဖြင့် ခေါက်ဆွဲသားက အလွယ်တကူ ကြွေမွသွားသည်။ ခေါက်ဆွဲတစ်မျှင်ချင်းစီသည် ဆန့်ကြုံ့နိုင်သော သတ္တိရှိပြီး ဝါးရ လွယ်ကူသည်။ ထို့ကြောင့်လည်း အလွယ်တကူ မျိုချနိုင်သည်။ ယွမ်ကျိုးက ဂျုံနယ်သော ပညာရပ်တွင် တစ်ဖက်ကမ်းခတ်ကျွမ်းကျင်သောကြောင့် ခေါက်ဆွဲသားသည် နူးညံ့ကာ စားသုံးသူ ဖောက်သည်များကို အငမ်းမရ စားမိအောင် အလွယ်တကူ ဆွဲဆောင်နိုင်သည်။
သာမန်အရသာဖြစ်သော်လည်း အစာစားချင်စိတ်ကို လှုံ့ဆော်ပေးသည်။ ဝူဟိုင်းနှင့် သူ့ဘေးနားက အမျိုးသားသည် ဝူအန်းလုတို့အဖွဲ့၏အကြည့်ကို လျစ်လျူရှုပြီး အသံမြည်သည်အထိ ပလုတ်ပလောင်းစားနေသည်။ မားဝေလည်း သွားရည်ယိုလာသည်။
"ခေါက်ဆွဲပြုတ်က ဒီလောက်တောင် အရသာရှိတာလား။ သူတို့ စားနေပုံကြည့်ရတာ အရမ်းပျော်နေပုံပဲ"
"ကြက်ဥထမင်းကြော်တောင် ဒီလောက်အရသာရှိတာ။ ခေါက်ဆွဲပြုတ်က အရသာရှိတာ ဆန်းသလား။ အဲ့ဒီနှစ်ယောက်ကို ကြည့်စမ်းပါဦး။
သူတို့ခေါင်းက ခေါက်ဆွဲပြုတ်ပန်းကန်ထဲ ဝင်တော့မယ်" ရှောင်လျှိုက သားရည်ယိုလျက် ပြောသည်။ တခြားသူများက ပျော်ရွှင်စွာ စားသောက်နေခြင်းကို မြင်တွေ့ရသောအခါ ဝိုင်းကြည့်နေသူများက သွားရည်ယိုခြင်း ဖြစ်နေရသည်။
သူတို့အဖွဲ့က ဝူဟိုင်းတို့နှစ်ယောက်ကို တွန်းဖယ်ပြီး ခေါက်ဆွဲပြုတ်ကို လုစားချင်သောစိတ်ဖြစ်လာသည်။
"သူဌေး၊ ကြက်ဥထမင်းကြော် မရသေးဘူးလား" ဝူအန်းလုက သူ့လုပ်ဖော်ကိုင်ဖက်များ၏ သောကရောက်နေသော အမူအရာကို သတိပြုမိ၍ ယွမ်ကျိုးကို အလောတကြီး တိုက်တွန်းသည်။
"ခဏပဲစောင့်ပေးပါ။ ခဏနေရင် ရပါမယ်" ယွမ်ကျိုးက ကြက်ဥထမင်းကြော်(၆)ပွဲကို ဗန်း၂ဗန်းပေါ် မျှထည့်လိုက်ပြီး ဖောက်သည်များဆီ ပို့ပေးသည်။ ဝူအန်းလုက ကြက်ဥထမင်းကြော်ပန်းကန်ကို ကိုင်ဆောင်ကာ အတွေးထဲ နစ်မြောသွားသည်။
"ဒီနေရာမျိုးမှာ ငါ့လို မန်နေဂျာမျိုးက လက်အောက်ငယ်သားတွေကို ကျွေးတာက ငါ့အပေါ် လေးစားမှုကို လျော့နည်းစေတယ်"
ယွမ်ကျိုးက စားပွဲခုံ၏တခြားတစ်ဖက်မှာ ဆရာကျကျ မတ်တတ်ရပ်နေပြီး သူ့ဟင်းပွဲများကို အားရပါးရ စားသောက်နေသော ဖောက်သည်များကို ငေးစိုက်ကြည့်နေသည်။ ယွမ်ကျိုးအတွက် ကြက်ဥထမင်းကြော်ပြင်ဆင်ခြင်းက ၃မိနစ်ခန့်သာ ကြာသည်။ သို့သော်လည်း စားသုံးသူများသည် အနည်းဆုံးနာရီဝက်ခန့်ကြာအောင် စားသုံးလေ့ရှိသည်။ ဟင်းပွဲများကို မအေးခင် စားလျှင် ပို၍အရသာရှိသည်။ နောက်ဆုံးကျန်သော ထမင်းစေ့ကို အပြီးသတ်စားပြီးနောက် ဝူအန်းလုက သူ့လက်အောက်ငယ်သားများနှင့်အတူတူ ကုမ္ပဏီသို့ ပြန်သွားသည်။
"သူဌေးရေ ဒီနေရာကို နောက်မှ ပြန်လာတော့မယ်" ရှောင်လျှိုက ဝူအန်းလုဘေးနားက လျှောက်ကာ စကားပြောသည်။
"ဟုတ်တယ်။ ဒီနေရာက တကယ့်ကို ဆိုင်ကောင်းပဲ" မားဝေက စကားဖြတ်ပြောသည်။ တခြားသူသုံးယောက်က သဘောတူလက်ခံဟန်ဖြင့် ခေါင်းညိတ်သည်။
"မင်းတို့ရဲ့အတွေးက ဘယ်လိုရှိလဲတော့ ငါ မသိဘူး။ ငါတို့တွေ ဒီဆိုင်မှာ တစ်လတစ်ခါ လာစားသင့်တယ်" ဝူအန်းလုက သူ့ရဲ့ထင်မြင်ယူဆချက်ကို ထုတ်ပြောသည်။ လက်အောက်ငယ်သား(၅)ယောက်က လေးကန်စွာ သက်ပြင်းချလိုက်သည်။
ဤစားသောက်ဆိုင်က ထိပ်တန်းဟင်းလျာများကို ရောင်းချသည့်အပြင် ထိပ်တန်းဈေးနှုန်းသတ်မှတ်ထားဟည်။ ထို့အပြင် သူတို့၏ လစဉ်ဝင်ငွေက ယွမ်၁သောင်းထက် လျော့နည်းသည်။ တစ်ခါ၊နှစ်ခါသွားစားခြင်းက ပြဿနာမရှိသော်လည်း အဲ့ဒီထက်ကျော်လျှင် မတတ်နိုင်ချေ။ ယခုတော့ သူတို့၏သူဌေးက တစ်လတစ်ခါ ဝယ်ကျွေးမည်ဟု ပြောလာ၍ ဝမ်းမြောက်မိသည်။
ခဏကြာပြီးနောက် အလုပ်သွားရန် လိုအပ်သော ဖောက်သည်များက ထွက်သွားကြသည်။ ဝူဟိုင်းတစ်ယောက်တည်းသာ ကျန်ခဲ့ပြီး ဘလူးဘယ်ရီယိုနှင့် ကြက်ဥထမင်းကြော်မှာသည်။ မတူညီသော ဟင်းလျာများကို ထူးဆန်းစွာ ပေါင်းစပ်ခြင်းသည် ယွမ်ကျိုးကိုပင် အံ့အားသင့်စေသည်။
ဝူဟိုင်းထွက်သွားပြီးနောက် ယွမ်ကျိုးက စားသောက်ဆိုင်တံခါးကို ပိတ်လိုက်သည်။ ထို့နောက် သူ တစ်ရေးမအိပ်ခင် သူ့လက်ပ်တော့ထဲမှ ဖဲဂိမ်းကိုဆော့ရန် အပေါ်ထပ်သို့ တက်သွားသည်။ မျှော်မှန်းထားသည့်အတိုင်း ယွမ်ကျိုးက တစ်ပွဲမှ မနိုင်ခဲ့ချေ။ အနိုင်ရလိုသော စိတ်ဆန္ဒဖြင့် ညနေ ၄နာရီခွဲအထိ ဂိမ်းဆော့ခဲ့သည်။
ထို့နောက် ဂိမ်းကို အဆုံးသတ်လိုက်ပြီး စားသောက်ဆိုင်ဖွင့်ရန် အောက်ထပ်သို့ ဆင်းသွားသည်။ ယွမ်ကျိုးက ညဖက်မှ ဆက်ဆော့ရန် ဆုံးဖြတ်လိုက်သည်။ လက်ပ်တော့အသစ်၏ နည်းပညာများကို နားမလည်၍ သူ အကြိမ်ကြိမ် ရှုံးနိမ့်သည်ဟု သူ ခံယူထားသည်။ သူ့IQက နိမ့်ကျနေ၍ မဟုတ်ချေ။ သူ့ယခင် လက်ပ်တော့အဟောင်းကို အသုံးပြုလျှင်
အနိုင်ရနိုင်ချေရှိသည်။ ယွမ်ကျိုးက သူ့ရဲ့IQကို အတော်အတန် ယုံကြည်မှုရှိသည်။ မည်သို့ပင်ဆိုစေကာမူ
စနစ်မှပေးအပ်သော ကျွမ်းကျင်မှုတိုင်းကို အလွယ်တကူလေ့လာနိုင်ပြီး တစ်ဖက်ကမ်းခတ် ကျွမ်းကျင်လာသောကြောင့် ဖြစ်သည်။
စားသောက်ဆိုင်တံခါးကို ဖွင့်ဖွင့်ချင်း မုတ်ဆိတ်မွှေးနှင့်ဝူဟိုင်း၏မျက်နှာကို အရင်ဆုံး မတွေ့ရဘဲ ယခုရက်ပိုင်းအတွင်း မမြင်တွေ့ရသော ယင်ယာ၏မျက်နှာကို မြင်တွေ့ရသည်။ မီးခိုးရောင်ဝန်ထမ်းဝတ်စုံကို ဝတ်ဆင်ထားသော ယင်ယာက ဆိုင်တံခါးပိတ်ဝမှာ ကြော့ရှင်းစွာ မတ်တတ်ရပ်နေသည်။ သူမ၏နဖူးပေါ်မှ ချွေးစီးချွေးပေါက်များကို ကြည့်ရုံဖြင့် ဤဆိုင်သို့ ရောက်ရန် ပြေးလာမှန်း ယွမ်ကျိုး နားလည်လိုက်သည်။
"သူဌေးယွမ်၊ ရှင်က အမြဲနောက်ကျမှ ဆိုင်ဖွင့်တယ်။ တခြားဆိုင်တွေဆို တစ်နေ့ခင်းလုံး ဆိုင်ဖွင့်တယ်။ ရှင်က နေ့လည်ခင်းတောင် ဆိုင်ပိတ်ထားသေးတယ်"
ယင်ယာက ယွမ်ကျိုးကို ခပ်တန်းတန်းကြည့်လိုက်ပြီး သူ့နောက်မှလိုက်ကာ ဆိုင်ထဲဝင်သည်။
"ယင်မိန်းကလေး၊ ဆိုင်ကိုမလာတာကြာပြီနော်။ ဒီနေ့ ဘာစားချင်လဲ" ယွမ်ကျိုးက သူမနဲ့ရင်းနှီးပြီးသား ဖြစ်သည်။ ၎င်းမိန်းကလေးက လှပပြီး စိတ်သဘောထားကောင်းမွန်သည်။ ထို့အပြင် သူမက ချစ်စဖွယ်ကောင်းသော အကျင့်စရိုက်ရှိသောကြောင့် သာမန်ထက် ပိုပိုသာသာ ဧည့်ဝတ်ပျူငှာမိသည်။
"ဟုတ်တယ်၊ ဒီဆိုင်ကို မလာတာ ကြာပြီလို့ ကျွန်မလည်း ခံစားမိတယ်။ ဒီနေ့မှ နိုင်ငံခြားက ပြန်လာတာ။ အလုပ်ကိစ္စနဲ့ နိုင်ငံခြားထွက်သွားရတာ" ယင်ယာက နံရံပေါ်မှ မီနူးကို ခေါင်းလှည့်ကြည့်ကာ ပေါ့ပေါ့ပါးပါး ပြန်ဖြေသည်။
"သူဌေးယွမ်၊ ခေါက်ဆွဲစွပ်ပြုတ်အချိုနဲ့ အထူးပွဲ ..."
ဝူဟိုင်းက စားသောက်ဆိုင်ထဲသို့ ခြေလှမ်းခပ်ကျဲကျဲဖြင့် ဝင်ရောက်လာပြီး တခြားသူများထက်ဦးအောင် အော်ဒါတင်လိုက်သည်။
"ဟင်းပွဲတွေ အများကြီးပါလား။ ကျွန်မလည်း ခေါက်ဆွဲစွပ်ပြုတ်စားမယ်။ ဒါနဲ့ အထူးပွဲတွေက ဘာတွေလဲ" ယင်ယာ မေးမြန်းသည်။
အပိုင်း(၄၆)
ပြီးပါပြီ။
Gp1 =၁၀၀၀ကျပ်
Gp2= 2000ကျပ်
Kpay 09969332009(chothinmar)
Wavepay 09784327525(chothinmar)