فــاطمة الـزهراء ..🤍
حـــمامة الشـــهم..🕊️
حــب وعــذاب.....🤍
ريـــِحانٍــة 🌿
ffaa22_
عشرتي وياك
صارت كلهة حسرات
مثل حسره الشاعر بالقصيده
الشاعر يكتب البيت الي يأذيه
والجمهور يصفك ويكله عيده.
_________________________________
نطيت الصبح على صوت عياط شهم وسيارات الشرطه طفرت من الفراش لبست شال والخوف تملك كل جسمي فتحت الباب والعياط من برة باوعت من الدرج شهم يعيط ويفشر ويكفر
ايدي كامت ترجف والشرطه الي وياه يحجون ويا محمد حسيت رجلي صارن خيوط مادري ليش تخيلت جاين علي
شفت نجمة صعدت وجها اصفر بسرعه ركضت عليها وهمست _ شكوو نجمة شصاير
بلعت ريك وكالت بتعلثم _
_ غ غيد شردت باكت الدليل الي عند شهم وانهزمت
ارتخت ادي وبلعت ريك ارمش ما مصدگه
_ ش شلون مستحيل مو جان الباب مقفول
نجمة _ اشش صوتج م مادري طالعه وبايكه الفلاش وحبيبها هو طلع من عصابة مكتل الحماية الي بالباب ومنهزمين
خليت ايدي على حلكه بخوف _ م مكتليين ؟
نجمة _ اي اخخ راسي حمامهه خايفهه
كالت هيج وكامت تبجي كاعده بالكاع استوعبت وسط الصدمه ولزمتها _
بيران _ اسم الله شبيج يعمري من شنو خايفه
نجمة _ شفتهم كدامي مكتلين ودم و وروحي كامت تلعب
حضنتها بسرعه وكومتها وياي لغرفتها كعدتها على الجرباية واني شاردة وگلبي يدك ادير بعيوني واكول هسه شهم يجي يقتحم الغرفة ويطيح حضي
بيران _ نجمةة بس فهميني يعني شهم ما حس من اخذو منه الفلاش ما حس احد طب غرفته
نجمة _ لا شهم ما حاس شهم نومه خفيف بس شارب منوم
قمطت ام العافية سالتها _ و وهسه شراح يسوون
نجمة _ مو صعبه على شهم اصلا بحركتها هاي راح تسهل الشهم القبض على ذاك المجرم بس غيد ما اعرف شتريد الله ينتقم منها
بيران _ ن نجمة اذا ورطتنا وياها ش شراح يصير
باوعتلي بسرعه بصدمه _ ش شنو قصدج احنه شعلينه لا تضلين تخرطين
بيران _ ها لا يعني قصدي خاف تورطنا
نجمة _ اشش ماكو هيج شي
بيران _ ليث وين
نجمة _ نايم بغرفتج ما شفتي ؟
بيران _ لا والله نطيت خايفه
نجمة _ روحي شوفي طلعو خلي نروح نسوي ريوگ
هزيت راسي وطلعت ويا طلعتي صعد شهم يسب ويتهدد باوعلي بسرعه بحدة وجان اجمد بمكاني ضل يخزر واني متجمدة حجه بنتره _
_ ويين ؟
الساني نعقد كمت مادري شحجي اخر شي كوة طلعتها _ ا اشوف اذا ر روحتو ن نجمةه داخت اريد اسويلها ريوك
ضل يباوعلي مضيك عيونه بعصبيه ويتنفس حيل كال _ اي راحوو
ومشه بسرعه لغرفته وهو يخابر مدري منو يكله الكاكم كلكم مجتمعين _
تنفست براحه ونزلت احضر الريوك شوية ونزل لابس ملابس الدوام وهم يخابر وخر الموبايل عن اذنه وكال بحدة _ الباب اقفلي وراي ولا تفتحن لاحدد موو
بيران _ اي اي
مسحت ادي وركضت ورا هو طلع قفلت الباب زين وكلت _ يارب طلعني منها ياربيي وين حطيتني وويامن ورطتني
خليت الريوگ بصينيه وصعدت فوك طبيت لكيت نجمة تباوع من الشباك كلت احاول اخلي نبرة صوتي عادية _
_ تعالي تريگي
فزت بسرعه تباوعلي وهزت راسها جتي كعدت بعدني ما كاعدة سمعت بجي ليث
_ ليث كعد راح اروح اجيبة
هزت راسها كمت رحت جبت ليث والف فكرة سودة براسي كعدنه وتريكنا بس شلون ريوك ضل بحطته محد اكل بس وكلت ليث وشلته نجمة كبل راحت نامت خطيه خايفه
واني بالكوة علي سويت البيت وكعدت انتضر
شهم................
راح يصير اليل وراسي داخ بس اريد اعرف غيد ويامن متعاونه شنو من عصابه هاي بحثت عنهم عدهم اعمال مو قانونية وملاهي بكل محافضه باي محافضه بمناطق جايفه وطايح حضه يخطفون البنات يتاجرون بيهن والاطفال اسغفرالله ربي يبيعون اعضاهم باسواق سودة عبر الانترنيت بس المشكله الوحيدة انو اي مكان يروحوله ينمحي اثرهم اي عالم الكاهم بمكان شغلهم ما يعرفون غير اسمه رسول حتى عائلته محد يعرفها ولا ماضيه كلشي ماكو
وانا غلطي شلوون اخذ منومم شلوون بس مامن مامن مخلي حماية اربع زلم كتلهم هيج شباب وكبار ينكتلون هيج واسكت البارحه شربت منوم لسبب واحد ماريد ارجع واشوف غيد لان ادري بس اشوفها اكتلها خلاص وانا اريد انتقم ماريدها تموت ببساطه
والي محيرني شلوون طلعت من الغرفه وطبت غرفتي وباكت شلون بس هاي الي اريد افهمها
محمد _ اي نعم ..ماشي ماشي خلي عينك على السيارة
طفاه وباوعلي بسرعه ..
محمد _ كريم يكول شايف سيارتين سود تتجه ل**** بشارع**** يكول شاك بيهم همه لان كلش حذرين
( اي منطقه او مكان ما راح اذكره )
شهم _ اتصل علي بسرعه ولا تخلي يشك بينه نراقبه خلي يتصرف اعتيادي بسرعهه .. كاضمم حضر السيارت بسرعه
طلعت وخليت محمد يخابر مشيت والشرطه وراي كلت بحدة
_ كل الاسلاح جاهز مو
_ نعم سيدي
صعدت بالصدر ووياي شرطي هم يسوق ورة انترست همين شغلت الاسلكي _
_ كريم كريم تسمعني
كريم _ نعم سيدي وياك
شهم _ مثل ما وصيتك لا تبينلهم ولا تضيعهم
كريم _ أمرك سيدي
شهم _ عفيه عليك يله
طفيت منه واتواصل مع كل السيطرات اليوم ينلزمون ينلزمون ....
.
.
.
.
.
.
.
بيران.......
هاذا اليوم الثاني ولا اكو خبر عن شهم ولا عن القضية انلزمت لا محد يدري نجمة وضعها متخربط كاطعه الاكل وبس تبجي مكتأبة او مصدومه من الي شافته وحالي مو احسن من حالها وضع البيت متوتر ميار رجعت ماكو جديد ولا مهتمه للموضوع النهار كله بغرفتها ومرات يم بيت عم شهم مادري وين
كاعده مخليه ليث بحضني واهز بي اباوع للشباك شاردة باقيلي حبه واتخبل من التفكير والخوف فزيت من رن موبايلي شفتها بتول جاوبت بتعب _ ها بتول
وكف الدم بشرايني من سمعتها تبجي وتشهك
بتول _ بيراان بعد ما اتحملل
بيران _ شكو شكوو بتول شبيج تبجين يمعودة
بتول _ سرمد وابوي وامي جوي للبيت اليوم وكلبوه كلاب يريدوني ارجع واعوف عمتي وحدها وهددتي ابوي اذا ما رجعت وياهم ي ياخذوني غصب ويودوني لبيت خاله سلمه وتدرين انتي ويين بيتها بتلايف الدنية بيراان
بيران _ شهل مضرطه موو تبرو منج مو عافوج بعد شيردون
بتول _ يريدونج تزوجين سرمد تخبل عليج
بيران _ خوش نعال والله سرمد متخبل علي ابو الوصخ خلي يروح ينضف خياساته يله يجي علي
بتول تبجي وتحجي _ بيران عمتي تخربطت وهسه نايمه
بيران _ هااا وهسه شبيها كلبها كام يوجع اووف
بتول _ لا ضغطها هبط كلبها ما بي شي
حجيت بتعب حايرة
بيران _ هسه شسوي بتول شصاير هنا اتلكها منج من بيت شهم
بتول _ ليش شبي
بيران _ ماكو شي وهسه شراح نسوي
بتول _ مادري بيران شروج عل حبل طلعولج سوالف ما تخطر لا عل بال ولا عل خاطر
بيران _ شطلعو مثلا يعني شمسوية
بتول_ كلها متعجبه من دفاع شهم الج وعرفو هو الي تشتغلين عنده و ويكولون
بيران _ اي كملي شيمضرطون باله
بتول _ عبالهم عندج علاقه بي و وذاك اليوم شايفينج من القرية طببي للبيت وابوي هجم البيت علي يكلي شنو ضاله يم هاي يعني كام يفشر ماكدر احجي مخليه البيت مثل الملهى وهسه يريد يجبرني ما وخرو مني اهل القرية بالكوة بيراان والله لو بيدهم يطلكوني ويزوجوني حتى لشايب لسكير بس ميكدرون لان بافل ما طلكني وميكدرون يطلكوني منه هيج حتى لو لازم تمر سنوات يله
بيران _ لازم اجي
بتول _ مادري مادري بيران اذا تجين يزوجونج سرمد
بيران _ خيولون باي بتول ديربالج على امي يمكن باجر اجي
بتول _ يمعودة اكلج بس يريدون يلكفوج جاوية على كلوبهم من مشتكيه على سرمد وكلها ضاحكه علي من شهم يسحل بي ولو اخوي بس يستاهل
بيران _ اخخ بتول راسي وعلي داخ روحي طافرة ولعبانه هسه اذا اجي الزم سرمد واشكه ثنين
بتول _ بس على كيفج لا تحمين
بيران _ باي باي
طفت الموبايل روحي باهته شسوي منين اتكاها صرت حايرة مدري اخاف من موضوع غيد مدري من سرمد العار يا الاسلام شكد اكرهه شكد روحي تلعب منه
مر اليوم وصار الصبح وماكو اي جديد لا خبر من شهم ولا احد طاب علينه رجعت خابرتني بتول ونفس الموضوع اهلها ما مخلين نهارهم نهار ولا ليلهم ليل وحزمت امري وقررت اروح حتى لو ميضى شهم شسوي
اتصلت علي كوة وما رد علي رحت بس جبت جنطتي الزغيرة وحضرت ليث اخذه وياي وشيريد يصير خلي يصير متصله على ساجر وهسه راح يجي
ونجمة كتلها راح اخذ ليث ولا اهتمت اصلا مكضيه يومها بالغرفه نايمه مادري شمالها
وميار ما جانت بالبيت كالعادة ودعت نجمة وطلعت لان ساجر بالباب
صعدت وسالني على ليث وكتله ما عنده احد استفسرت كلشي منه سرمد يريد يلوفها ويصير لوتي ويزوجني
ساجر _ بيران لا تخافين والله لو على گص ركبتي ما اخلي يطخج
بيران _ لا تخاف ساجر ما اخليهم يطخوني هسه مستشرفين براسي والله يالله
كملنه الطريق وجان طويل وليث ساعه يكعد اوكله يضل يحوس ويرجع ينام وضلينه نسولف اني وساجر لحد ما العصر طبك يم بيتنه نزلت بيدي ليث وجان عمي وسرمد وكرايب ابوي واكفين يسولفون
اول ما انتبهو علي باوعتلهم باستهزاء واكفه بيدي ليث شافني سرمد جي علي معصب
بسرعه ساجر وكف بيناتنه ويوخر بي
سرمد _ ساجررر لا تخلينييي امدد ايديي علييك ابتعدد منهاا
ساجر _ صدك ؟ عليك الله شو مدها خلي اكسرها شلون سوالك الضابط انا وحد
باوعله بعصبيه وكبت بينهم وكلها تحجز واني واكفه عساس قوية واني كلبي يدك حييل جتي يمامة وزينه سحبني منهم لي جوة البيت وليث فحط تندمت شعندي جايبته هسه لو متأذي شهم يخليني عايشة
طبينه للبيت واول شي شفته امي منومه بتول على رجلها وبتول تبجي اول ما شافتني جتي علي تركض حضنتني قوة عفت ليث راح لامي
امي تبجي ودك على ركبها رحت عليها وحجيت بهدوء
_ ماما لا تبجين فدوة ما اخليهم يسوون شي
بتول بجت حيل _ بيراان اكلج محضريلي عريس يريدون يطلگوني
بيران _ هه شلون يطلگونج باله هو بافل وشارد
بتول _ يريدون يخلونه متوفي يعني اصير ارمله
كامت امي دك وتلطم وتصيح يريدون يموتون وليدي والله يايمه هو وليدج عار
زينة _ تره والله مصخوها يعني شلون باله حتى شهاده وفاه ماكو ولا احد كايل ميت
بلعت ريك اصلا من يكولون ميت ينعصر گلبي مادري ليش رغم كل الي سواه ماكدر انطي بي
بتول تبجي وتحجي _ابوي يسويها والله عنده واسطات يسويها وج بيران اني ليش ما طلكت لعد وج يزوجوني لشايب اصلا كبل لا اخذ بافل كل ما يتقدملي شايب لو رجال جبير بالعمر يكلي ابوي وافقي وعوفي بافل بس ضليت مصره وهسه يريد يستفاد براسي
توني دا احجي طب سرمد بعصبيه يعيط وره عمي وساجر تقدم علي ولزم شعري من ورة حجابي واني متوجعه بس اباوعله بحقد '
سرمد _ لج**** تروحين **** ويا ضابطط موو فختيي شفتيي زنكييل وجج سودتي وجهنا اله اذبحج بيدي واغسل عارج
ساجر والبنات كوة وخرنه عني باوعتله بعصبيه وتفلت علي وعطت _
بيران _ نضفف عاررك بالول حيووان همجيي ويين جان هاذل حجيك من رحتت اشتغلل
عمي _اششش ولا كلمة ترحيين تجيبيي وطببي بيتج نصل الييل وجج ويين احنه مستهتره مالج رداد
بيران _ ههه والله ضحكتني يعني اكثر شي ينفرزني هسه هو انكم مستشرفين هسه يله لعد من شفتونه اني وبتول ندور على الربع دواره مرت علينا ايام متنه من الجوع ولا فد مرة احد جي وكال خطيه لو امي الي جانت تصارع الموت مااجان بيدي شي ادري بيكم والله ادري انهزمتو خاف تدفعون فلوس العمليع وهسه من امي سوت العمليه وخلصت يله جايين تدورون مني شرف
عاط سرمد_ سديي حلكج بنت **** لجج بس خلي الزمجج عوفنييي
عمي حجه ياشر على بعصبيه _
_ تنجبين وماريد اسمع صوتج ذاك الكواد نعرف شلون نتصرف ويا وانتي تاخذين ابن عمج وتسكتين بلا ما ننفضح
صرخت باعلى صوتي _
بيران _ شنووو هيا بكييفك شنو اخذ سرمدد جبرر هيا ماريدهه ولا اريدككم اطلعوو من حياتي اطلعوو وشنوو باليني بالوه ما عنديي شيي ويا شهم اصلا شهم رجال محترم ولو ما هوه ما جان امي عاشت والله الغريب احسن من القريب
سرمد _ ايي شووف بعدد عوزة بس يجي هناا كواد ويسوي البيت ****
بيران _ وسمم لا تفشرر كلب
تقرب علي بعصبيه ولزم فكي يعيط ويهدد _
سرمد _ تحلميين تحلميين تصيرين الغيري بيران تحلميين
حجيت بصعوبه _ خوش نعال
صار البيت هوسه عرك وعياط وبجي اخر شي عمي لزم سرمد وكال _ عبالكم هاي هيه خلصت بس خلي تروح العالم من الباب وشوفو
دفعهم ساجر يطلع بيهم ويعيط وتجافتو بالباب وكوة خلصوهم
سد الباب بقوة والتفت _
ساجر _ **** نعال جاهل جاي يتمرجل هنا
كعدت بالكاع وخليت ادي على وجهي كل جسمي يرجف
ساجر _ كومي يمامة جيبيلها مي
جتني امي تحضن بيه وتبوس _
اولغا _ عيون امج لا تردين عليهم صيري قوية وعلي ما انطيج لو يموتون كدامي
بيران _ يمة انتي ما شفتيهم يريدون يسيطرون علينه بكيفهم كالو نسوان وحدهم ليش ما نخليهن جوة ادينه وعلي وعلي وحق الحسين الشهيد اروح اشتكي عليهم وهل مرة لو مو بتول ما اسحب الدعوة
بتول تبجي كاعدة كالت _
_ يربيي شسوي والله تعبوني يعني اله اروح الهم يله يعفونج وبس اروح يزوجوني
ساجر _ باله خلي نفرض طلكوج تزوير بالمحكمه بس تضلين زوجه بافل شرعا امام الله ولازم اله يطلكج
بتول _ همه عدهم حرام
انتبهت على ليث كاعد يباوع خايف تنهدت وكلت _ ليوثي ماما تعال حبيبي
كام بسرعه وجلب بيه _ ماما احاف
ضحكت علي عود يكول اخاف بست خدودة.
_ لا تخاف يعمري جاي نلعب عرك مو كل مرة تلعب انته وشهم هيج
هز راسه وكال _ بي عمو هادا ايط الينا ( شبي هاذا عمو يعيط علينا )
ساجر كرص خده وكال _ خيولي اكتله اذا عيط
ضحك الساجر وسكت جتي يمامه نطتني مي وباوعت على ليث _ اووي يروحي شكدد كيوت تعال خلي ابوسك
كام وراح عليها طبيعيه ليث كلش هادئ و مؤدب رغم عمره الزغير بس ابد ميسوي وكاحه او يتلهوك كدام احد وهاي الخيله تخبلت ضلت تبوس وتعضض
ساجر _ كافييي علش تلطلطتي كافي
يمامة _ انته شعليك اريد ابوسه حلو البوس بي
غمها وكام _ عمتي هسه تنتضر يله احنه نروح
يمامة _ بعدنه كاعدين
بيران _ هههه والله صدك بعدكم
خزرها ساجر دائما اذا تضل هيج تحشش يضل يخزر ويكول ميصير تصير خفيفه
كامت وبوست ليث _ باجر اجي نلعب اني وياك
هز راسه _ نعب اي توبه ( نلعب بالطبوبة )
كامت ويا حجه ساجر _ باجر نشوف حل لهاي السالفه منضل هيج وانتي لا تضلين تبجبجين بطوط
ضحكت مسح على راسه من فوك وراح _
انتبهت على يمامة دنكت جوة ضايجة ادري بسها تغار على ساجر مني بس هيا متحجي لان تدري بيه ما احب ساجر وما افكر بي غير مثل اخوي _
راحت زينه هم وياهم يوصلها للبيت ورحت كعدت على الفراش يمي ليث ميحلني راسي راح ينفجر وعلي ضغط كلش جبير هيا وحده من ثنين لو اضحي وازوج سرمد لو بتول تضحي وتتزوج الشايب
ضلينا نسولف وندور حل المشكله ما عدنه احد حسيت بهاي الحضه اني كلش ضعيفه وعاجزة ومحتاجه احد يسندني يحل المشكله ويعيني افكر واحاول ادور حل ماكو ليث غفى بحضني كمت شلته وحجيت بتعب .
_ راح اروح انام راسي راح ينفجر
اولغا _ روحي يبعد امج روحي الله لا ينطيهم وانشالله تطلع حوبتج بيهم
هزيت راسي وصعدت فوك لغرفتي نومت ليث وغطيته زين لان غرفتي باردة شوية رفعت موبايلي ومحد متصل لا شهم ولا نجمة ارتاحيت شوية لان عبالي شهم راح يعصب لان ماخذه ليث
اتصلت على نجمة مرة مرتين ما ردت عفتها لان هيا خطيه كلش تعبانه ونفسيتها متدمرة
رحت على الواتساب شفت اخر اتصال لشهم قبل ثلاثة ايام رحت على الفيس وعلى الخاص محد مراسل او فاتح مشيت شوية وجان تصير عيني على حساب بافل ضليت اباوعله ساكته وما حسيت اله ودموعي نزلن حاسه بخيبه جبيرة لو هو ما رايح جان ما صار هاذا كله مادري شصار بيه كمت ارجف اريد احجي
فتحت البصمة وحجيت بغصه
_ تعال بافل عليك الله والله العضيم تعبت وحدي تعال احميني تعال دافعلي اني وحيدة هسه بافل متخاف على اختك ولك سرمد يريد يزوجني غصب عني
دزيتهت وردت فتحت البصمة وحجيت ابجي _
_ شلوون كلبك انطاك تعوفني شلوون تعوفنا ولك راح نصير مجبحه مو وصيه ابوي احنه ولك والله بعد ما تحمل بعد ماكدر امثل اني قوية والله تعبت والله الله لا ينطيك اكرهك اكرهك
هاي اول مرة اراسله من اختفى لحد الان وما فاتح من زمان اصلا البصمات ما راحله شمرت الموبايل ونمت على بطني ابجي بقوة شسوي هسه سرمد وعمي ميعوفوني اله ياخذوني ادري بيهم يحركون گلبي بتول حتى اوافق كل حل ما براسي فكرت اطلب المساعدة من شهم بس هو شيسويلي يعني هاي مشكله عائلية ميكول شعدها مدخلتني بيها
وهم هاي سالفه غيد خفت منها لا تورطني ونوب تطلعي مصبية جديدة فوك مصايبي غيد مدري منين طلعتلي صفح والله اذا متورطني ما يطلع اسمي بيران
رحت خليت ليث بحضني ونمت دموعي بخدي مادري شوكت انام فرحانه
بس ارجع واكول الله كريم تحملي يا بيران خلي نشوف شكد تتحملين
بتول...................
طبيت لغرفتي ابجي كلها راحت نامت بس اني ضليت الوب بافل ادري بيها حقير وحقر وياي بس خليني على ذمته ولا اروح لغيره نفسي ما متقبلته عاد ضاله ولا ازوج اول ما طبيت شفت صوره بافل گبالي على الحايط
باوعتلها بقهر وعصبيه وحسيت بحقد كبير تجاه بافل دمر حياتي ودمرني وخسرني اهلي ونفسيتي وكلشي بيه بس لان حبيته بس لان شفت بي مستقبلي بنيت ويا عالمي الخاص
رحت على الصورة بعصبيه واخذتها وشمرتها بالكاع تكسر الجام مالها انهاريت ابجي واعض بيدي قوي بية صرخة بس ماكدر اطلعها خلي اطلع حرگة كلبي بيدي
انهاريت كمت ما اكدر اتحكم باعصابي بعصبيه كمت ورحت على الكنتور صار كدامي جهازي مال العرس الي ما فاتحته اخذته ونثرته بالكاع المكياج كسرته شكو شي بالغرفه كسرته كمت اسمع دكات على الباب وصوت بيران وعمتي
كعدت بالكاع ابجي اني بتول الهادئة هسه كمت ما اسيطر على روحي شسوي بيران شكد تحمل اكيد راح ترضى بسرمد وتضحي علمودي ادري بيها تريد ترد معروفي بس مستحيل لا اكدر اتزوج ولا اكدر اعوف بيران تتزوج
صارت عيوني على الكزاز الشيطان لعب بعقلي هاي هيه خلصت اذا نهيت على حياتي كلشي راح يتصلح اصلا على شنو عايشة اشوف موتي احسن من عيشتي كضيت عمري بنص الحزن والقهر من زغيرة وعيت على انو اني مشوهة وبنص ضيم اهلي الي ميهتمون الحزني او فرحتي عائله عدها بس لازم اتزوج واروح واخذت بافل الي انهى قصتنا قبل لا تبدي وهسه مخيرة بيني وبين بيران اذا متت هسه راح يعوفون بيران مو بعد اني متت
رحت على الكزاز متجاهله الصرخات مال بيران والباب الي راح ينهجم
لزمت الكزازة بيدي وبلعت ريك اني جبانه ادري بس كافي تعبت وجع شوية وينتهي كلشي
قربتها على وريدي وغمضت عيوني استغفرالله يا ربي سامحني هاذا اكبر حرام وما جنت مفكرة اسوي من قبل بس يا ربي اعذرني شخطتها حيل على وريدي وكزيت سنوني حيل من الوجع باوعت على ايدي كامت تنفض دم نفض شوية شوية كام نضري يقل نفسي صار ضيق نمت بالكاع وصار كدام عيوني صورة بافل ابتسمت بوجع وكلت على كيف _
_ دمرتني
وبعد ما حسيت على اي شي ......
شهم....................
غيد انلزمت محجوزة لي هسه ما محقق وياها مشغول بقضية كوادها طلعت معقدة اكثر من ما اتصور صحيح تعقبناها ونلزمت هيا وكم واحد من العصابة بس هو راس الخيط ماكو كوادها اختفى مادري شوكت يلحك وينهزم
كعدت بتعب امسح بالدم الي على ايدي كدامي خمسه منهم من البارحه ما خليت تعذيب يعتب علي ولي حد هسه مصريين ميعرفون شي
شهم _ ها وهسه هم متعرفون
_ اءء س سيدي سيدي كافي الله ينطيك راح امووت
محمد _ تموت بكبر تره لا عبالك تعاند متحجي ومانعوفك لو تموت هنا لو تحجون
حجى واحد اخر _
_ موو جاي نكوول ما ندريي ميحجونه شيي مجرد نفذ اوامر وهاي هيه
شهم _ همم صدك زين من اشتغلت ونفذت اوامر ما فكرت بالي راح يصيرلك
_ جنت محتاج واشغلت يعني شسوي بيش اعيش اطفالي
ضحكت بقوة وضربت على الطاولة _
_ عندكك اطفال على بختك ليش ما كتلي لعد من البارحه متعبني
شفت الخوف بوجهه حجه _
_ اطفالي لا تدخلهم بشغلك الله يفوقك عوفني بحالي مو جاي اكلك مادري بي مادري وين راح هو كلفنه ناخذ غيد ونوديها لبيت الحجي
محمد _ اكلك شهومي شتكول نروح نجيب اطفاله يجوز يفيدونه لو المرية
شهم _ لا شنسوي بالطفال جيب المراة نعرف شلون نتصرف وياها بكيفنا
عاط بقوة وكال _ ***** مو جايي اك***** مادريي
كمت علي ودفتره على حلكه خليت سنونه وكعن بالكاع كام يكح دم
شهم _ ادبسزز **** الضاهر ميفيد وياك الحجي محمد شوف شغلك وياهم ما بين اروح ل****اشوفها شنو احوالها
محمد _ غالي والطلب رخيص
طلعت من الغرفة وبس كبت العياط منها محمد ما راح يقصر وياهم ادري بس اريد اشوف غيد
رحت شفت للمكتب اتصلت على الي كلفتهم بامر رسول الكواد ولي هسه ماكو اثر غمضت عيوني بتعب صارلي 3 ايام ما شايف النوم
رحت للحمام غسلت ايدي وجهي وطلعت كبل للغرفة الي موجودة بيها غيد اول ما قربت للباب طلعت الضابط سمر اخذتي تحية هزيت راسي وكلت _
_ ما توصلتي الشي ؟
_ اعتذر سيدي مصرة على انو ما تعرف شي عن شغله
هزيت راسي _ خوش روحي هسه انتي انا راح اروحلها
_ آمرك سيدي
طبيت جوة الغرفة ضلمه بيها ضوة خفيف شفت غيد كاعده بالكاع وتبجي وترجف وتشهك تقربت منها وعلى شفتي ابتسامه استهزاء ثنيت كدامها رفعت راسها الي وشهكت بخوف ورجعت ليوره
_ ش شش شهم شهم عوفني اترجاك
_ جؤ جؤ جؤ شنو هاذا وجهج صاير خريطه اكثر من ما سويته قبل اذوج ؟
هزت راسها تبجي _
_ سامحنيي شهم سامحني فدوة والله ندمانه على الي سويته اغفرلي فدوة
_ ششش ما جايج دا نحجي على ذنبج جاي اكلج شي واحد ..رسول ويين ؟
بلعت ريك تنفي_ م مادري مادري والله مادري
ضربتها على حلگها بقوة وكلت _
_ ما مليتيي من حلفاان الله جذبب ؟ لج **** ا**** امج **** بنت ****
بجت حيل ولزمت رجلي توسل _
_ مادري مادري والله ما مجذبة صدكني لا تسوي بيه هيج شهم لخاطر العشناه على الاقل
رفعت حاجبي ولزمت ايدها _ الخاطر العشناه؟
هزت راسها تباوعلي نضرات ترجي وتوسل _
_ اي اي والله نادمه والله سامحني بس هاي المره ج
هزيت راسي مبتسم وهيا من كل عقلها عبالها اقتنعت طبكت اصابعها ورجعتهن ليوره فتحت عيونها وصرخت بقوة مرجعه راسها بوجع
_ العشناه جانت فتره قذرة ما تستحق الذكر حته لج **** يا گواد تضحكين بي بهاذا كلامج سمعيني عدلل
صرخت تحاول تخلص ايدها سمعت طكه عضامها وما حليت ايدها _
_ اخر مرة احجي وياج مثل الاوادم وانتي اختاري لو تشوفين شي ما تتخيلين نفسج بي ابد وانتي افهميها لو ترحين تكعدين مثل الحبابه على الگرسي وتحجيلي كلشي من البداية لان هو كوادج ملزوم ملزوم همم اتفقنا
هزت راسها تبجي وتلوه من ايدها دفعت ايدها وكمت ببرود كعدت على الكرسي ضلت تبجي شوية وتنكت بيدها اخر شي كامت كوة تمشي كعدت كبالي مغمضه عيونها بألم
_ غردي حبيبي
_ ش شحجي
_ مثلا شنو شغل رسولج ويامن يتعامل
بجت تحجي وترجف
_ والله والله ما مجذبة بس ادري بي عنده ملاهي و ويتاجر بالبنات والله بعد مادري شنو يشتغل اصلا اصلا ميحجيلي شي اني سمعته صدفه يحجي بالتلفون وفهمت انو هو يتاجر بالبنات
_ مم يعني المفروض انا هسه اصدك وهاي هيه تنسد السالفه
_ والله ...
_ ششش خلينه نتجاوز هاذا الجزء وخليني اسألج اسأله بسيطه وتجاوبيني بصراحه لان انتي تعرفين اذا جذبتي شيصير مو حبيبي
هزت راسها ...
_ شلون طلعتي من البيت
ضلت ساكته تدير بعيونها وتفرك بيدها
نترت _ احجيي ؟
_ ها ساعدني احد
_ منو ؟
_ ما راح تصدكني
_ اكلي خرة واحجي
_ بيران
حواجبي نرفعن باوعت عليها مضيگ عيوني ما مصدك مستحيل حمامة هيج تسوي بيه مستحيل هيا اكثر وحدة تعرف شسوت غيد بحالي ومستحيل بعد ما حجيتلها عن كل ماضيي تغدرني ضحكت مستهزء_
_ جذبة جديدة مثل جذبة الگلادة
_ بيران تحبك
_ شنو
_ هيا تحبك بس تدري بيك تحبني اني واذا بقيت يمك عبالها راح ترجعلي
بللت شفتي اباوعلها مستهزء كل حجيها خرط بخرط بس اريدها تحجي دا اعرف وين توصل
_ اي كملي
_ من رجعتو للبيت ضليت ادك بالباب وهيا جتني مادري منين جابت المفتاح بس فتحتلي الباب
_ غيد تدرين اذا تجذبين شسويلك اسوي ****** وحق الله التحلفي
_ ما مجذبة مو مو تريدني احجي زين اذا مجذبة منو فتحلي الباب انته الوحيد العندك المفتاح
سكتت وكامت اعصابي تغلي شوية شوية صار حجيها يقنع وانا ماريد اقتنع لا ماريد انخذل ماريد اعيش ويناعاد الي كاعد اعيشه هسه _
غيد _ طبتلي وضليت اتوسل بيها وهيا كالتلي اساعدج بشرط ترحين وبعد ما تشوفيني وجهج هيا تريدك وتريد ليث وتريد بيتك تريد تصير مرتك والله
حجيت ببرود اضغط على القلم الي بيدي _
_ كملي
_ اصلا هيا من الاول مخليه عينها عليك خلت ليث يتعلق بيها حتى تربط نفسها بيتك ومن شافتنا صارت بيناتنا مشاكل هسه كامت تريد تصير بمكاني
_ كلامج كله كلاوات تدرين
_ كوة قنعتها وهيا طبت غرفتك وباكتلي الفلاش وانهزمت لكيت جماعه رسول بالباب ونهزمت لان من طلعت خابرت بتلفونها على رسول اذا ما مصدكتي اسألها هيا الي فتحتلي الباب صدكني وشوف تلفونها
كمت ببرود وحجيت اشمر القلم عليها _
_ غيد انا تعبت من ضربج وسويت الي علي وبردت گلبي لان انتي لا بيت ولا فلس ولا شغل ولا حياة راح تكضين عمرج بالسجن امج بعد متشوفيها باختصار انتي خسرتي غيد
_ شهم شهم فدوة
_ ششش راح يشوفون شغلهم وياج بعد مالي علاقة
طلعت عيوني صايره بكصتي معقولة هاي حمامة الي ما اشوف بوجها غير ليث البريئ تطلع كل هاي الخباثة براسها معقوله هاي الي آمنت بيها هاي الي اعتبرتها وردة بيضة بحياتي السودة حمامة ام عيون التلمع شايله كل هاي الخباثة ما ردت اصدك غيد بس كل حجيها منطقي شلون انفتح الباب وبيدي انا المفتاح تدري بيه شارب منوم وباكت الفلاش تدري بغيد شكد آذتني وبساطه هربتها علمود مصلحتها
كل شي تجاهلته بس كلت لمحمد راح اروح للبيت شوية وطلعت عيوني عمن كل الافكار السودة جت بالي هل يمكن اني ملعون ملعون بسوء الحض مستحيل كل مرة احس بروحي ثقيت بشر يندمني بس هو صوجي انا غشيم اغشم روحي واكول هل مره كلشي راح يتغير كل كلامها ونضراتها ودموعها تمثيل جانت مصلحه ما تفرق عن غيد شي هم تدور فلوس
طبكت يم البيت ونزلت معصب فتحت الباب الرئيسي وطبيت دكيت باب الصاله بقوة مرة مرتين سمعت صوت نجمة تصيح جاية
فتحتلي الباب ما انتبهت عليها طبيت بعصبيه
وصحت _ حمامهههه
نجمة _ ط طالعه راحت
التفتت عليها معصب وكلت _ ويين راحتت
نجمة _ لبييت اهلها و واخذت ليث وياها
فتحت عيوني بصدمه ورحت على نجمة معصب لزمت ذراعها _ شلووون تخلينهاا تاخذهه
_ مادري والله ليث ما قبل تروح واخذته
غمضت عيوني وهزيت راسي اتنفس _ امجج وين
_ نايمه
_ اقفلي الباب ولا تفتحي لاحد غيري
_ م ماشيي
بيران............
صافنه على بتول نايمه بغرفتها هسه توها رجعنها من المستشفى بتول سوتها وانتحرت بتول المؤمنه الي تخاف الله ما تحملت وانتحرت ضحيتي وضحية بافل هيا بتول دموعي ما توكف مخليه راسي على رجليه وهنه ينزلن
كلشي صار بلحضة من جنت توني غافيه سمعت صوت تكسير طلعت بسرعه وسمعت بتول تعيط وتكسر شكد دكيت بالباب وحاولت اكسره ماكو امي صعدت وياي تدك وبتول فاقدة ما نسمع بس تكسير وبجي وعياط
بسرعه اتصلت على ساجر يجي يكسر الباب
قبل لا يوصل ساجر صار هدوء وهل هدوء سوه عاصفه بگلبي دريت بيها سوت شي بروحها لا اغمى عليها جي ساجر وكسر الباب واحنه نبجي ومن دخلنا انصدمت صدمه عمري من شفت بتول نايمه وايدها مغرگة الفرشة دم
اخذناها للمستشفى اني وساجرولحكونا بيت عمي مادري منو كاللهم سووها مناحه يهددون ويعيطون ويفشرون وكله عليه عبالك اني الماخذة بتول
عجزت ما جان بيدي شي اريد انزلها واكول اقبل بسرمد بس اني اشوف وجهه تلعب نفسي واكول شلون اكضي عمري ويا
وسط تفكيري انفتح الباب بقوة فزيت وشفت سرمد كدامي يباوعلي بعصبيه كمت خازرته وكلت _
_ شبييك مو نايمة الابنية
جي علي وعت ايدي _
_ تعالي احجيي وياج
_وخر عني سرمد
خزرني وسحبني وره سكتت لان ادري بيها راح يكوم يصرخ ومالي خلك تكعد بتول
سديت الباب وتجتفت اباوعله بحقد وبرود
سرمد _ نضل هيج لو شنو ؟
_ اي نضل احسن بعد
_ اكلي خرة جاي احجي وياج مثل الاوادم لج عيني ابوي ما راح يعوف بتول اله يزوجها وخاصة بعد هاذا الموقف راح يصير حجي ومشاكل واكدر اقنع ابوي يعوف بتول وتهدئ الامور بس وافقي نتزوج وكلشي ماريد منج
_ ماريد ازوجك اكرهك تلعب نفسي منك
غمض عيونه بعصبيه وكال يهف باديه بوجهي _
_ موو كافيي شترديين شترديين تعبتيتي لج جاي اكلج عمري كله انطيج ياه
دفعته عني وكلت بقرف
_ الضاهر انته مغشم نفسك وناسي شنو مسوي وياي وليش تلعب نفسي منك واكرهك
كال بترجي _
_ وانا احبج جاي اكلج اعوضج ادري السويته غلط وكرهتج بيه بس والله من حبي الج
_ جنت زغيرة
_ عماني الحب
_ الله يعمي عيونك انشالله وينتقم منك اسمعني زين اني من سابع المستحيلات اقبل بيك افتهمت
جي علي ولزم فكي بقوة وحجه بحده _
_ حجيت وياج بهدوء وحاولت ما اخلي السالفه تكبر بس لاا ليشش ست بيراان تحب المشاكل موو بس والله والله ما اخليج لذاك شهم مادري شسمه لو تموتين
_ اوووي دوخر يا شهم هو اني ماريدك شهم شعلي
هز راسه وكال _
_ باجر نجيج مشاية تحضري
_ اجرك بزيج هسه
_ نجبي
_ نجب انته ابو الوصخ الاملح
_ عادي عود من تصيرين زوجتي اعلمج منو الاجلح
_ خابب درووح هو انته اصلا منو دخلك بعد لا تطب يلهه
_ ههه زعطوطة ما ارد عليج بتول تجي تعيش يمنه هيا وعمتي ما أمن اخليهن وحدهن
_ امشي ماما امشي الضاهر انته كتل شهم اثر عليك
اني كلت هيج صفكني رلشدي قوي حيل خلاني انركع بالحايط لزمت خدي بوجع لان دخت جي علي ولزم شعري من وره الشال _
_ السانج گصري لا اكصه الج بنت الكلب
دفعت ايده وتفلت علي _
_ انته ابن الكلب انعل ابوك لابو الجابك حيوان كلب حقير نذل خسيس
حك خشمه وضحك _
_ خلي اروح احسن
_ روحه بلا ردة وعلي ابو الحسن اذا بعد مديت ايدك علي اكسرها
_ صدك
_ وسم واطلعع برهه يلهه
خله ادي بجيوبه وراح يصوفر كمت اتنفس بقوة وحركه شفايفي كامن يرجفن ما تحملت وبجيت اكثر شي اكرهه بهاذا العالم انضرب ما متعلمه احد يضربني وبهاي الشهور طاح حضي
نمت بمكاني وضليت ابجي متدمرة حرفيأ هاذا صدك يسويها ويجيبون مشية زين اني شسوي يالله ياربي ساعدتي طلعني منها ياربي
يمامة............
كاعدة اني وزينه نلف كبة تمن ونحجي عن بيران وعن سرمد كلش مقهورات عليها وعلى الي ديصير بيها انقهر عليها واحس بيها بهاي الحضة لان اني يتيمه مثلها ماعندي اب رغم ساجر ممقصر بس مكان الاب يختلف
زينة _ لج عيني هاذا علي ابن خالتي يكطع يجنن ذاك اليوم من شفته ما كدرت اشيل عيوني عنه
يمامة _ صدك هذاك علاوي ابو الشربت
زينة _ يا شربت اكلج كايم يموت بس بحالي هوة باوع علي مرة وحده بعد ما عبرني طبعأ عايف بنات عمه الرشيقات لو شايفتهن طول وخصر بس اني دبة
يمامة _ شيسالفه والله مبالغه تره انتي مو سمينه بس شوية متروسه
زينة _ ما عاجبني جسمي مرات اكول حلو يلوكله الفساتين ومرات اكول يلعب النفس المشكله لو شكد اريد اضعف يغريني الاكل
يمامة _ اي والله هو وين اكو احسن من الاكل
اثناء حجينه سمعت هورن بابنه باوعت عليها وكلت _ منو هاذا
زينة _ شمدريني
يمامة _ يمكن هاذا هورن حسام
زينة _ ها يمعودة لا تطلعين ساجر يسويج سالفه
يمامة _ قابل شعندي ويا بس اسلم علي
مسحت اديا وطلعت وصدك شفته بسيارته واكف ابتسمتله ولوحت بيدي اله وهو هم ابتسملي حسام رجال كلش زين مادري ليش ساجر يكرهه من واني زغيرة يجي علي ما يوم غثني بكلمه ادري بي رايدني زواج بس اني معتبرته صديق بس
رحت للسيارة وكلت _ ها حسام
حسام _ هلو مومه شلونج اخبارج
يمامة _ والله بخير انته شلونك خالو شلونه عمتي البنات
حسام _ بخير يسلمون عليج
يمامة _ جذب محد مسلم مو
حسام _ هههه تسليك
ضحكت فتح الباب وكال _
_ اصعدي ليش واكفه خلي احجي وياج ماشالله حضرت جناب ساجر مانعني من طبه البيت
ابتسمت وصعدت بصفه يباوعلي بطريقة توتر عيونه ميشيلهن عن عيوني من احجي ضلينا نسولف ونحجي اخر شي مد جسمه وطلع علاكتين من الكشن الوره
يمامة _ حسااام مو كتلك لا تجيب شي ليش تكلف نفسكك ؟
حسام _ والله ماكدر يعني صار شهر ما شايفج ماكدر اجي بيدي يله حبشكلات
ضحكت واخذتهن وكلت _ بعد لا تجيب شي
حسام _ انشالله يمامه
_ هممم
_ ما تحنين علي عاد
بلعت ريك ساكته
_ احبج انا يمامة والله بس تكولين اي باجر يصير العرس
_ اسفة حسام والله ما اشوفك غير مثل اخوي
_ هيج تموتيني يمامة
توني دا اجواب انفتح الباب من جهتي وانجريت بقوة عطت فازه شفته ساجر يباوعلي بعصبيه وحده قمطت ام العافية وخنست
كال بحدة _ شعندجج
_ ه ها بس سلمت
حسام _ هيووو عوفها شكو لازمها هييج
عاف ايدي وراح على حسام لازم قميصة ويصيح _
ساجر _ انااا شكمم مره كلتت يمامةة ابتعدد عنهاا هااا
حسام _ اي مو هيا بكيفك شنو انته ماخذ الدور زياده تره يمامة امانه عندك ومو اكثر يمامة الي وراح تصير مرتي هم
ساجر هجم علي ضربات ودفعات وحسام هم يضرب ضليت ارجف وابجي جوي عالم وخروهم همزين امي مو هنا يم بيت زينه بس زينه واكفه تباوع من باب بيتنه بخوف
كوة وخروهم وحسام صعد بعصبيه وراح بلعت ريك واخذت العلاليك وطبيت جوة بسرعه قبل لا يستلمني
رحت گبل لغرفتي حته زينه عفتها كعدت على فراشي اعضعض باضافري خمس دقائق مرن وزينه فتحت الباب وكالت بهمس _
_ راحح ارووح كمتت اخاف
_ ويين عايفتني راحح ياكلنيي
_ لعد خلي اروح قبل لا ياكلني هم
ما ردت علي عافتني وراحت ضليت الوب نوب هاذا ماكو الصمت الي بالبيت يكتل رغم ساجر ما بعمره مد ايده علي بس اخاف منه حيل واصلا ليش خايفة ما مسوية شي غلط حاولت اخدع نفسي واسكت
عطت فازه من انفتح الباب طفرت باخير الغرفة ومخليه ادي دفاع
_ عليك الحسين لا تكتلني
_ اناا شكاييل من قبلل ؟
_ والله هو اجه
_ كلتت شكاييل من قبل
_ م ماطلع عع على حسامم
_ وانتي شسويتي ؟
_ طلعت
_ وبعد
_ سولفت
_ ايي
_ وصعدت ويا بالسيارة وجايبلي غراض
_ وبعد بس **** وياخذج عروس موو
_ عييب شنوو هاذا الحجيي
_ وسم الهاري تعالي
_ ما والله تكتلني
_ ما تجين مو موو
عطت بخوف من جي علي ركضت لغير اتجاه ومخليه مخده احمي نفسي بيها
_ ساجرر عليك الله وعلي احبك اني
_ حبتج حيه تعالي اكلج
_ ماااااا
_ وسم فوكها تعييط
رحت على الباب دا اطلع شهكت من لزمني من ذراعاتي من وره مثبتني على الباب صار وراي تجمدت من قربة الي حتى ادي رخن بلعت ريك ونفسي صار عالي كمت احس بانفاسه على خدي
_ ساجرر
همس _
_ لازم تشلعين گلبي شسويلج هسه تحلفت بيج بس انتي هسه بين ادي وكلشي ماكدر اسوي
_ اسفة
دارني اله صار صمت بيناتنه اباوع علي ودكلت گلبي فاضحاتني وخر شعري المتخربط من الرگض حتى الحجاب واكع _
_ لا تطلعين علي بعد
_ مو ...
_ اششش بعد لا تطلعين
هزيت راسي مسطورة قربة وانفاسه واصابعه الي على خدي يخلني انسى كلشي واحجي بدون لا ادري
_ عفيه بنيتي
كال هيج وطبع بوسه على خدي تجمدت بمكاني وعيوني كامن ميرمشن الصراحه جنت متوقعه كتله مو بوسه ابتعد عني واني اباوعله بخجل ابتسامتي ما سيطرت عليها بس هوه شلون الي استوعب وخر بسرعه
ومسح وجهه وحجه بتوتر _
_ اسف بعد ما تنعاد
وخرني عن الباب وطلع مادري افرح احزن بس ما جاي انسه البوسه ضليت مبتسمه رغم الي حجاه خرب كل فرحتي
بيران..........
انطيت مي البتول الي توها كعدت بصفي امي كاعده من ذيج جهتها اني ساكته مصدومه بفعلتها وهيا تباوع علي نتضرات ترجي
كلت بهدوء _
_ هاذا العلاج اشربي قبل الاكل رايحه انام
كمت وجان تلزم ايدي باوعت عليها عيونها مغركات دموع
_ بتول _ اسفة
_ على شنو
_ مادريي
اولغا _ ميصيح هيج امي انتي العاقله والله ما توقعت تسوين هيج
بتول كالت بغصه _
_ عمه والله احتاريت وما عرفت شسوي
نترت بيها بعصبيه _
بيران _ ومن حتاريتي كلتي خلي اروح اموت روحي خلي انهي بيران بالزايد هو اني شباقيلي بهاي الدنيهه كولي هيا بس انتي واميي
بتول _ بيران..
بيران _ شش ماريد اسمع شي هسه والله تعبت كلش بتول كلش
كلت هيج وطلعت عايفتها ويا امي ادري بامي راح ترزلها وتعلمها بس اني هسه بس ابقى يمها اجرحها وماريد ادوس وياها بالكلام بتول هيا متاذية
دخلت غرفتي وطفيت الضوة هل فتره بس اريد اكضيها نوم اهرب من واقعي رحت يم ليث ونمت يمه ما دريت بشي بعد
مادري شكد نمت بس حسيت على صوت موبايلي فتحت عيوني وكمت بسرعه شفت الموبايل هاذا شهم فركت عيوني حتى اصحصح وجاوبت
_ ها شهم
_ اطلعي بره
_ ها
_ اطلعي جيبيلي ليث
وطفاه ضليت دقايق صافنه عبالي حلم بعدين نطيت ولبست شالي وطلعت بسرعه
نزلت على كيف وفتحت الباب وطلعت بالطارمه طارمتنا حايطها ناصي شفته واكف يم السياره يدخن
طلعت وكلت _ شهم
التفت علي يباوعلي بخزره احس بنضراته يريد ياكلني بس لا عرف بلعت ريك وتقدمت
_ ها ش شلونك
_ ليث وين
_ نايم
_ منو سمحلج تاخذينه اخذتي اذن مني ؟
_ اتصلت عليك وماريدت وليث ضل يبجي واخذته
_ اسمعي لج مو مصدقه نفسك منو انتي حته تتصرفين بليث بكيفج ؟.
_ شهم شبيك
_ نجبيييي لا تكوليين اسمي بالسانجج القذر يا جذبة يا ***** هو انتي شنو ومكبر راسج
عيوني دمعن وجهي معقوح باستغراب وخوف
_ شهم شبيك ليش هيج تحجي وياي
_ اشش تبريراتج الجذب ماريد اسمعها ولا اريد اضيع وقتي ويا وحدة مثلج مادري جم وجه عدها كدامي بريئة وراي ماشالله صايرة جاسوسة وتساعدين وتهربين
_ ا انته عبالك اني طلعت غيد
_ وتدرين هم بعد على شنو متعب نفسي
_ والله ما مطلعتها اني والله
_ انتي رحتيلها ذاك اليوم
سكتت اباوعله ودموعي تنزل
شهم _ كلت رحتيلهااااا طبيتييي عليهااا
بيران _ اي طبيت بس....
شهم _ هاي هيه وصلت وصلت وداعت عيونج الخدعني
بيران _ بس اسمعني
شهم _ روحيي جيبيي ليث
حاولت احجي ويا ما بسمعني ولا يباوع الوجهي يدخن برود واني ابرر وهوه ولا يمه حتى ولا عصب ولا صرخ مجرد يباوع لي كدام يدخن
_ اذا خلصتي لغوة روحي جيبي ليث لان راح طك عندي
_ اييش ما تسمحليي ابرر موقفي
_ لان لا انتي ولا موقفج تهموني منو انتي اصلا مجرد خدامه ليش اهتم الرايج واذا غدرتي او لا انتي ولا شي حبيبي
رحت يمه وكلت بنتره _
_ مالييي شغلل بغييد هاي تجذببب والقرأن ما مهزمتها
استفزني برودة ميرد علي رحد عتيت ايده الي يشرب بيها جكاير وكلت _ باوعع علي
باوع علي بنضرة تخوف وجان يلزم ذراعي ويعتني اله وبيده الثانية لزم فكي بقوة _
_ اييدج اكسرها خووش
_ اخخ وخر وجعتني
ضحك مستهزء وكال _
_ اذا عفتج بهاي السهوله ما راح يبرد گلبي بصراحه
كال هيج وجان يلزك الجكارة على صدري لابسه دشداشة وصايره دلعه شوية ما منتبه طالع صدري من الشال صرخت بوجع اريد ادفع ايده ماكو الابتسامه والنضره الي على عيونه ترعب تذكرت كلام غيد وصحت اكثر
وخر عني ودفعته روحي شايغه كعدت بالكاع ابجي وكازه على سنوني
شهم _ هيج احسن شوية روحي جيبي ليث وبعد ديري بالج تشوفيني وجهج القذر
بيران _ كسرر بيدك انشالله حقير نذل
ضحك لعب السانه على شفته ورد عض شفته وجي علي رفعني من الكاع
_ تريدين ؟
_ شرييد وخرر
_ ما دمج هلكد حابتني ومهزمه غيد خلي نستغل هاذا الوضع
همس باذني شي خلاني اقرف منه ومن الساعه الي كلت بيها خوش رجال باوعت علي بحقد وكلت
_ الله يلعب نفسك انشالله يا قذر
_ ههه ليش لا تخافين تصيرين خاصه
وخرت عنه وكلت بتهديد
_ احترم نفسك يا قذر اشرف منك اني
_ كلشش
خزرته ابجي وروحي لعبانه كلهم نفس الشي ما يفرقون رحت جوة ابجي وارجف والجوة الي بصدري تاخذ بروحي رحت شفتها صايرة حمرة ومنفوخه مسحت دموعي وحضرت اغراض ليث ربي ربي اخذ عمري وخلصني من هاذا العذاب
شلته على كيف ونزلت جوة طلعت بيدي ليث لافته بالبطانيه باوع علي واخذ نفس من الجكارة وذبها ودعس عليها جي اخذه مني وكال
_ ها ما نجحت الخطه
ضليت ساكته اباوع بخيبة وقهر
شهم _ مقهورة عيني ***** لا تخافين تلكين غيري
_ حرام عليك
_ والله كل ما اشوف وجهج اضحك عليج شلون عقلتيها احب وحده مثلج انا شهم احب خدامه رخيصة يوميه بيت وبنص الزلم
نعصر گلبي من كلامه ادري بي يقهر بيه لان يدري هاذا اكثر شي اكره الواحد يعير بيه
بيران _ شغلي شسويله ارجع
شهم _ لو ادفعلج اضعافهم بمقابل بعد ما تشوفيني وجهج اقبل روحي بابا روحي مخليلي وحدة **** بيتي لج اكثر شي اتخبل منه هو الرخص والخباثه شلوون عقلتي احبج
_ تره اني ما احبك منين جبت هاذا الحجي على شنوو احبكك كافيي
_ ضحك مستهزء وصعد بالسيارة وشخطها حييل وراح
طبيت جوة مصدومه ولعبانه نفسي من حجيه صعدت اتصلت على نجمة مترد شلوون شلون صرت بنصهم غيد هاي جزاتها شسويتلها لان ما قبلت اساعدها
تذكرت شصار بذاك اليوم ورجعت ذاكرتي
قبل اربع ايام ........
فتحت الجرار على كيف وشفت اقلام وفلاشه هم اخذتها وتوني دا اكوم باوعت على شهم نايم وعاگد حواجبة رغم هو اسمر بس وجهه مسمر زيادة جوة عيونه هالات وايده ترجف بلعت ريك وكلت
_ اسفه شهم
رجعت الفلاشة وحجيت
_ اسفة لان فكرت اخذلك كلها تغلط وانته مستحيل تسوي هيج شهم
طلعت ورحت على غيد فتحت الباب وكلت بسرعه
_ اعتذر غيد ماكدر اسوي هيج اعتذر
وسديته حتى قبل لا ترد قفلت الباب ورجعت المفتاح يم الباب ونمت گلبي يدك حييل وارجف من الخوف شهم وثق بيه وحجالي عذابة شلون ازيد وجعه واسوي هيج بي رغم حجي غيد الي يشيب الراس ما صدكت
عودة..
ضليت ابجي واتذكر النضره الي يباوعلي بيها نضرة كلها قرف كانه قرف مني نضرته وحجيه كلها استهزاء ابد ما جان يباوعلي هيج بس هو عافني بحالي حتى بعد لا يريد مني ارجع ولا ارجع فلوس شبيه موتت نفسي من البجي راهمه على ليث وعلى نجمة شلون راح افاركهم
دريت بهاي وراء والله من طبيت الغرفه غيد دريت بنفسي تورطت وحاولت اصلح كلشي بس هاي هيه بعد تورطت مصدومه من حقارة غيد شلون حجت كدامي ذاك الحجي وكدام شهم حجي غيره قلبت علي لان ما ساعدتها الله لا يوفقج
.
.
.
.
اسابيع مر مادري شلون مر كله حزن اكتأب الجو بيتنه متكهرب امي النهار كله تبجي بتول كاضيتها بغرفتها واني سرمد طلع حتى روحي طبيت بحاله اكتأب سيئة بس افكار مادري على شنو انقهر على روحي على بتول على امي على بافل على شهم على حياتي كلها التمت شهم بعد ما اتصل ولا اني اتصلت ولا نجمة حجيه مطبوع بالي ما افتهم شي واهاني آذاني قهرني
حتى الاكل كطعته بذيج الفتره اكل جم لكمه بس دا اضل بحيلي
موضوع غيد كلش حز بخاطري اني من النوع الي اختنك من انضلم ومحد يصدكني ماريد احد يلومني ضلم او بسوء فهم دعيت يعرفون الحقيقه وتنحل
الباب اندك غمضت عيوني بتعب وكمت فتحت الباب شفت سرمد وعمي وعمتي واكفين بالباب ضليت صافنه عليهم وجان يكول عمي
_ نضلل واكفيين لو شنوو
بيران _ تفضلو
كلتها ببرود وجان يطبون سلمو على اني وبتول هم نزلت حالتها تعبانه جانو ابد ما مرحب بيهم اصلا ادري على شنو جايين
ضلو يلغون ويلغون اني ساكته ببرود اباوع على سرمد الفرحان يحجون عن موضوع بتول وعن سرمد اخر شي كالت عمتي
_ عيني احنه جايين من الباب نطلب ايد بنتكم بيران الابنه سرمد وانشالله ما تردونا
امي ضلت تصفن وبتول تباوع علي بقلق واني بس ساكته اباوعلهم باستهزاء
عمي _ شني السالفه نضل ساكتين احجو شي تره اذا انطيتونا بيران والله اعتبرها مثل بنتي وحتى بتول اعوفها بعد ما اضغط عليها
سرمد _ عمه والله بنتج اخليها بعيوني بس اقبلو
بيران _ اني متزوجة
يتبع......
________________________________
حـــمامة الشـــهم..🕊️
حــب وعــذاب.....🤍
ريـــِحانٍــة 🌿
ffaa22_
:مو تعودني عَليك
وتمشي مِني ،
خَل اگلك كلشي عَني
أنا طيب ما أنام
مّن أسمَع حچاية
تغثني ،