اماً لهن

بارت العيد

بارت العيد

#أما_لهن

#مريم_السعدي

.
.

هووواء معبأ بفيض الذكريات
كلما فتحت ابواب سيارتي و شممت عطرها وكأنه مخبأ بين طيات خيوط قماش المقاعد

ام انه اختزن اخاديد ذاكرتي
وكأني اكبس على راس العطر كلما هممت بالركوب

عادة سيئه تلك التي ترافقني عندما أُشممر نظرات عيني بمرآتي الى المقاعد الخلفيه باحثاً عنها

الى متى ؟
الا يكفي تارجح روحي بين ايام الامس والماضي
ألانه لايوجد من كان يسمعني غيرك

.. انا هنا قد لبى قلبي لقبك
انا هنا اسمعك وان رحلت هي
انا بعض منك وانت بعضي
دمك دمي وهمك همي

.. قد يتعب قلبك  شكواي كطفل مدلل كثير الشكوى

.. اطل في اعترافك وانا اذن صاغيه
اهمل دموعك ولا تكن في حياء من ما تعانيه امامي

كن امامي
روح شفافه
طفل يشكي
ونفس حزينه
لكن هيهات  ان اسمح  لك بان تزف ضعفك لغير الله و غيري

تقوى بي لن اخذلك يوما

.. ماذا فعلت لكي احصل على ضل ضليل مثلك

.. وماذا فعلت انا لكي اكون معك رفيق روح ونظره عين وابتسامه نتكلم بها بلا صوت ونفهم   بعض من كلام بين انفسنا   باعيننا -----
.
.
.

.. سمعتي ابو السنتافي شكال اليوم
.. اي خيولي ملطلط

.. لج بابا ههههه هاي المصطلحات بس اني اكولها انتي لتتعلميها بله خالي سمعها منح شيكولج ميكولج هاي منيلج بعد

.. يعني اربع وعشرين ساعه نحجي اكيد اتعلم.  لو طفل عمره سنه هم يتعلم

.. هم صدك اكولج. بيش ساعه يمج الساعه بالهول

.. ب11متكولي دتسوي دتطكطك بالمواعين

.. دااغسلهن للج

.. هاي بعدها من البارحه الصبح

.. شسوي مشفتيني شون انثبرت من البارحه اليوم اله كملت ترجمه بس بشرفج شوني

.. لا والله بصراحه غير صدمتني مررعب نعل بليسك حسن

.. مو فدوه لطولي والنبي لزمته من الغولاف للغولاف

.. اي لا عاشت ايدك اخذت فلوسه

.. طببعا داشتغل سفري لو على روح امي الف رحمه على روحج يمه يمكن هالخميس اجيبلكم دجاجتين ذبح وكتف نركبها على روحها

.. ببيتنا
.. كيفكم تجون يمي هسه خالي يبجي يكولي الطريق لشقتك سفره

.. اي صدك سفره
.. ياب منيلي ملاااج واشتري بنص بغداد كلها تحجي بدفاتر بعدين مرتاح هنا كلش يمعوده ابسط شي كهرباء

.. اي والله واحنا هنا كتلنا الحر

.. شفتي لعد نسويها يمي مدام السبت عطله حتى تبانون عدي خميس وجمعه والسبت روحوا

.. خل نشوف كول لبابا خما اني اكوله

.. اي لا اني اكوله بس خاف انتي عدج تدريس
.. لا كتلهم عطله اريد ارتاح شوي
.. يله هذا هو اكولج نوسه

.. ها عيني
.. تسلم عيونج باعي شسم الزاهي ملتكم ذاك اليوم جانت ريحته تخبل من شربت مي بالكلاص جانت عمه توها غاسلته

.. هااا اسمه ---
.. خوش زين عدي تيشرتي الابيض وكع عليه جاي ومديطلع والله اخذته ب25

.. قصره للمكان
.. مراح قصرته
.. زين جيبه من تجي اني احلها

.. كفوووو كفو ببت الخال اللي راح تغسل تيشرتي وبعدين من ينشف تعطره وتكوي

.. هااا بعد مااشتريلك جديد

.. بعد انتي ومروتج واذا نفسه بس اوف وايت اي والله. متقيرين عاشت ايدج ميحتاج تدزي اني من اجي اخذه اكس قياسي

.. حسسن

.. عيووونه

.. اختفي
.. لابشرفج. بس خل اخلص المواعين والنبي متخلص الا بالحجي وياج

.. اشتريلك غساله مواعين
.. منييلي
.. بجه بجه. سكتت سكتت يمعود
.. يعني مااكمل نوح
.. لااا

جر حسره وصوته وكانما تمدد

.. هه اخخخ كملت
.. عاشت ايدك
.. وايدج
بقه ساكت شوي ورجع جر حسره

.. حسون حتنام
.. اي والله نعست

.. روح نام
.. ابقي شوي وروحي
.. اوك

.. دتضوج وحدك مو

.. لا والله بس الهدوء كلش مزعج
.. ليش مبقيت هنا
.. يابه صارلي اربع ايام خالي فرغلي غرفه عيب اخجل من عمه
.. تكيف بيك كلسا مصخرتك
.. تتدلل عمتي .. نوسه؟
.. همم
.. شعجب محبيتي بيوم

.. هاي شنو حسن صدك سالت هالسوال

.. ليش يعني تعرفين كل المريت بي وحاجيلج كلشي ورقه بيضه كدامج ليش متحجيلي

.. مادري مصارت فرصه

.. غرور لو عجب لو شنو
.. لاهاي ولاهاي يمكن ملكيت اليوالمني

.. بس انتي مو صعبه
.. يعني اني سهله رحمه الله والديك
.. لج لا هههه مو قصدي بس اقصد بسيطه. طباعج

.. ماعرف محد دك باب كلبي
.. هم اكو يعني رادو وانتي منطيتي مجال
.. لا
.. ها جامعه صخام كرايب
.. اكذب عليك ؟
.. لا

.. ابد والخطابه اليجون يكونون لو جماعه اخويه. لو جماعه الحجي فمحد شايف جهرتي

.. بس انتي يعني متتعيبين حلوه مقاصره
.. ماعرف
.. خو مضجتي
.. لا عادي بس عدي ايمان كلشي بوكته حلو بعدين بعدني كلهن ٢٣ سنه

.. امم صح يمكن انتي واعيه

.. اي مو بباالي ابد

.. بس الحب حلو نوسه

بقت ساكته
.. الو
.. ها
.. يمكن اني غلط حجيتلج هيج

.. لاعادي متاثرت

.. صببه خرب ببليسج اكولج تذكرت  هاي مرت اخوج  شدعواها هالخشه شصار بتمن يابه

.. هي متشوف مكدرت تعيش ويانا

.. لا والله فدد قندره حشاج شون تسلم عبالك تسلم على شمبازي طاح حضج

.. استغفر الله
.. اي والله شبيج كلش انتقدتها 

.. حسن لتشيل غيبتها معود
.. اي النوبه نشيل ذنوبها فوكاها لا والنوبه البنطرون لابسته حصر عود لابسه فوكاه قميص هذا اخوج شيحس

.. معلينا حسسسن

.. اي هم صدك  شعلينه

.. حسن ماما تصيحني

.. تخابرين بعد

.. خاف تنام

.. اذا دكيتي ومرديت لترجعين تدكين بالقران اطلعلج من التلفون

.. لا ماشي
.. مو متخابرين
.. لاهو ادك اذا مرديت اعوفك.
.. عفيه يله باي
.. هلاو

ايام تمر بنت خالي علاقتي بيها معوضتني حتى عن حياوي تصنيف قشب تنظيف تركيب ولو يمي هي وخالي ومرته  لو  اني يمهم

كم يوم مرت واخذت مسواك لبيتهم وركبنا على روح امي جنت وياهم اسوي الحشوه واكلي الدجاج بالمطبخ الخارجي بالطرمه الوره البيت وارتب بالصينيه واشرب المي لحم واصفط قطع اللحم حياوي وعسل جوي وابنهم وياهم 

اجواء دافيه اللمه الجننه محرومين منها انا ويا  بس رفع عينه بعيني تبسم فهمني بشنو افكر

شايلل ابنه ويعاينلي يبتسم

.. شبيك لك
.. مابيه صاير ام بيت الله يرحمم ايام المخلمه
.. والله مواني مركب تعاي لج نوسه منو ركب
.. اني وامي جاوبت مستغربه

ضحكت عليه متخوصر وباوعت لمرته
.. عسل خانم كومي وي مرت خالي عود انتي خطار يعني

.. لا والله هسه شكد خبيث حسن دابدل لابني واجيكم

.. عوفو للمنغولي مالكم تعال لاك تعال اشو امشي مثل الزلم لتصير مايع يول لك هاي من وراك لان بس بحضنك يصير مايع

يحيى : شسالفه حسن بعده صغير تره

سكتت من طب خالي يبتسم لوجود حياوي وعسل وطب وراه ابنه ومرته ام خشه عبست خلقتي بوجه نوسه خزرتني غضت شفه  ضحكت

والتمينا تغدينا وكملنا والبنات يغسلون المواعين واحنا دنشرب جاي وي ابن خالي وحياوي وخالي

دنسولف عالشغل ودك تلفون خالي

رد
.. الو
.....
.. منو تفضل
.....
.. اي وصلت هله بيك هله بيك ها وومنو طاك رقمي يعني منين تعرفني
......
.. ها ياهلا وسهلا
......
.. اي اي بالبيت
.......
.. ميه هلا بالخطار

وسده باوعلنا عاكد الحاجب و باوع لابنه
.. اكولك حجي غازي مو اللي بيتهم ب___ يم بيتنا القديم
جاوب ابنه

.. اي يابه شجابه عليك شذكره بيك
.. والله مادري شو كال جايك خطار موجودين كتله هلا بيك

حسن ...
الحاسه السادسه اشتغلت عدي من عصرني كلبي ماعرف ليش

ضل خالي مستغرب للعصر راح حياوي واني تحججت بانه مابيه ارجع للمجمع وبقيت عدهم ابات

للمغرب الباب اندكت خالي جان يصلي وابنه ديغسل السياره بالطرمه لان ماعده طرمه ببيته
طلعت وابنه ورايه طلع

شفت رجال يطلع بكد خالي ويا شباب اثنين وجههم بشوش ابتسم ابن خالي ورحب بيهم وفوتهم للاستقبال
وصاح على خالي اني ضليت كاعد شعدي مادري بس كل الاعرفه خالي فتح بيبان گلبه قبل بيته الي واني دخلت من اوسع باب

طب خالي مرحب
۔۔ ياهلااا ومرحبااا زارتنا البركه والله وين هالسنين

وهم بدورهم ردوا وكذا  وعرفوا اخبار كل واحد وين صار خالي حجه عن ابنه

۔۔ والله ابني توضف الحمد لله وتزوج هم من نفس الوضيفه والحمد لله اخذ بيت هنا قريب عليه

وانت
وجاوب الخطار الحاج غازي مثل مسماه خالي واني بالوجوه اباوع

كال
.. ابني الجبير فتح صيدليه بشهادته والحمد لله الصغير هم تخرج وهسه واكف بيها وي اخو

.. والولد منو

اشر عليه تبسمت وخالي حجه ولزم عضدي
.. هذه وحيد اختي الله يرحمها شكد ماابني عزيز يشهد الله هو اعز سبع ومعدل

.. سلمك الله خالي
جاوبت ونصيت

وبده الحجي اللي حسيت بي عصر كلبي قبل لينطقوا

.. والله حجي احنا جايين اليوم عالمحروسه بنتك لان بنت اختي وياها بالمدرسه وتعرفها وكالت خالو متلكون مثلهم  واني رديت عليها تعرفين بيهم جار العمر

خالي تغيرت ملامحه وراسا عاينلي اني مدري شون صارت ملامحي اللي هو نصه راسه سكت شوي وجر حسره

ابن خالي رد عن ابوه
.. نتشرف يابه النا الشرف

وسال خالي اني هنا مدري ليش حسيت حفقد اخر شخص ارتاحله

خالي سال
.. يعني انت تشتغل بصيدليه اخوك
رد الولد بصوت ناعم هو صوته ناعم مو خشن

.. اي عمي ووفاتح باب من بيت اهلي مشتمل وعدي سياره بالجديد اخذتها الحمد لله

نصه راسه خالو

وبقوا يحجون والاب كال
.. اسال اهل بيتك ورد خبر رقمنا عدك صار ياريت متطول علينا

خالي سكت وودعناهم للباب وراحوا
السكوت ساد  اني ترخصت ورحت لبيت يحيى ابات خالو حتى مجلب بيه لان يمكن رادو يحجون كلام خاص

اي خاص
هو فعلا خاص
لابد يكون شي خاص عدهم

صح اني دهن ودبس صح اعرف كللل اسرارها التضوج منه التحبه كلشي كلشي اعرف
حتى____
حتى من تتمرض كل شهر واخابرها صوتها متغير
وخلكها هلكدوته اعرف شبيهة افتهم والله افتهمها

واضل اداهر بيها
وج شبيج
يبووو الهرمونات
يمعوده فكي فكي
هاي شكو هاااا شو بله اليوم شكد بالشهر اي هاهي

وتصيح

حسسسسن بالقران حضربك بلوك
مينطيج كلبج والله
لا ينطيني
هسه شننو تردين تتعاركين
هو اني لو انت كمت تخربط

عمي تردين تتعاركين داطلعلج غير سالفه هاي سالفه تافهه متسوه عركه

روح حسن
ولج شبيج والله من تتعاركين ترتاحين ليش ماعرفج

اهوووو
ها نبدي يله بسم الله اكولج بله زحمه شكد اطلبج.

وتعيط
هاااا انت موكتلي واصل وعزمتك مرتين

شوكت هاي ماتذكر هههه
عزه بعينك حسسن لك انت كتلي بعد ماوصيك على شي

الله علكت علكت عللي

والله ما لو تتوسل تذبها الشغله ذب عليه ماااخذهااا لو تموت

هههههههاي هو منو حيجيبلج شي بعد عوبه هو مقدريج وجايبيلج گفر بالجذب مشديتي بفونج

سكتت وزفرت
هااا ههه متحجين

جرت خسره كالت
اخاف يتوصخ حرامات ضامته

ابتسمت وسكتت
شوي وكلت
فدوه االج يمعوده

زين شون توافق تتزوج وبعد ممنوع نتعارك ونتشاقه وارجع لوحدتي
زين ماريد ارجع شلوون اكره صوت عقلي اكرهههه

لاهسه ترفض
هي اصلا ياهو اليتقدم الها ترفضه
هي متريد تتزوج

تعبت افكاري تعبببت حدما طفيت السياره
لكيت روحي بالمجمع بشقتي اهوو نسيت وجيت هنا النوبه وحدي اقلها هناك حياوي ابنه اتونس وياهم شون سالفه

صدقا خفت اخسرها
خفت حتى اتصل بيها
بس هي اتصلت

ب١٢ مثل كل يوم نضل نسولف فد لل٢ احجيلها شصار بيومي وتحجيلي عالمدرسه والدوام  اطبخ واضمه بالثلاجه واروح انام وهي هم تنام

اختي صديقتي طلعت بوكت حيل احتاجيتها بي وحافضنا على علاقتنا زعل عركات بس فتره ونرجع

شون بعد ميصير احجي وياها جوز اذا قبلت   ماكو رجاال يسمح لزوجته تحجي وي غيره استحاله.

دكت باوعت لاسمها

نوسه ويمها سمايل مطلع لسانه يعيب اني هيج مسجلها

رديت واضح التعب على صوتي

.. الو ها حسن وين انت
.. ها نوسه بشقتي

.. ها رجعت موكلت ابات
.. مادري شو رجعت اي شونج
.. الحمد لله شفت اليوم حياوي وعسل
.. امم
.. شفتها شون تعدل بنطرونه من جوه خطيه حبيبتي شكد تحبه

.. امم
.. شبيك شو كآبه تريد تنام

جريت حسره

.. لابعد
.. اكو شي صار من رجعت
.. لا
.. حسن شبيك اهووووو
.. شنو رايج بالولد نوسه

.. ياولد منو
.. الولد الي تقدملج تره اعرف
.. منو تقدم وين
.. نوسه تكذبين عليه لو تشاقين لو شكو ماكو
.. لا والله شكو ماكو مادري وداعت ابويه
.. امم محجه وياج خالي
.. لا

.. ممم جوز باجر يحجي
.. منو احجيلي تره كلشي مصار حجي

جريت حسره
.. ولد متقدم الج بيت جوارينكم بذاك بيتكم القديم

سكتتتت وكاالت صوت ناصي
.. عرفتهم بنتهم ويايه بالدوام
.. اها همه
.. يعني الخطار الجوي على بابا
.. اي همه عليج

بقت ساكته
.. ها نوسه ؟
.. ها؟
.. توافقين؟
سكتت وكالت صوت ناصي

.. انت شتكول
.. واني شعليه انتي ام الاآنه
.. هااا اوك ماشي
.. شنو
.. اني حروح
.. وين لتكولين لخالي اني كتلج
.. لا لتخاف مافتح موضوع حدما هو يفتحه
.. اي عفيه
.. ديله باي

.. حت...حتتوافقين
.. وانت شعليك اني ام الآنه

سكتت حسيت بسمرتني كالت
.. باي وسدته

نوسه واعرفها من تغنتب واني بيش غلطت
كلش زين تدري بيه كلبي مشلوع ومو بخاطري زواج ومعتبرها صديقتي واختي

تركتها براحتها

ثاني يوم متصلت بس شنو ثكل اليوم احسه جبل كلسا انسى و اريد اروح اخابرها اسالها عن شغله

فراغ صاير بلحيتي منطقه مدوره كلتلها ذيج المره كالت خلي ثوم

نسيت وردت اخابرها واكولها خلصت اسبوع اخلي بعد ومن طلعت اسمها تذكرت ذبيت الجهاز مردت اشوش عليها قرارها

لليل اني بس افتر بالمنطقه النوبه عطله جانت لليل صعدت دطبيت كبل انام كنك تلفوني وصلت رساله

منها

.. وينك اليوم

مصدكت رسلت راسا دكيت
رد خالي

.. الو ها خالي
.. ها يابه حسن شونك

.. الحمد لله خابرت نوسه دااسالها عالقميص قصرته لا

جر نفس كلي هذا يابه محضرته
.. اي عاشت اديها ماشي خالي

.. حسن ابني انت جنت موجود من جوي بيت حجي غازي

.. بلي خالي
.. فانت يعني شنو رايك

سكتت حاير ورديت

.. والله خالي ماعرفهم اني انت تعرفهم اكيد جوارينكم

كال
.. هاا هيج
سكتت
كال
.. هذا هو ابني روح الله وياك

.. فيماللا خال
سديته اباوع لوجهي بالمرايه انطعن احمر مكدرت ابقى بعد خابرت ابو يحيى رد راسا

.. ها حسون
.. انور انت بالبيت
.. اي يابه تجي
.. خاف اسوي ازعاج
.. دكوم لاااك صاير مثقف بعد كلبي تعال داسوي كهوه
.. لا مطول فد ساعه واوصل
.. ها تمام وهاي الدله طفيناها
.. عاشت اديك

رحتله وكعدنه بالحديقه  اجيبها منا الطها منا كلي

.. حسسن شبييك شو دتعبر هوا
.. هه ابو النور مادري شكولك
.. دقيقه خل اودي هذا جوه خبلني عينك راسك تعال زيد
شاله وداه جوه شوي ورجع كعد وباوعلي

كال
.. احجي اسمعك محتاج فلوس
.. لا ههه طلعت الملعونه حاجتها اصغر هم

.. اي والله شفت

نصيت راسي وحجيت
.. مادري شو دااحس روحي وحدي
.. ليش يابه متخارب وي بيت خالك

سكتت منصي وعبست وجهي
.. لاا موهيج
.. لعد شنو احجيلي تريد نمشيلك على مره

ونت باب الصاله رفع راسه ابو النور كال
حسن حسن هنا

جاوبت عمه
.. ياهلا والله
وطلعت كعدت يمنه شوي واحنا ساكتين شوي وكال انور

.. للومه ماعدكم فد موظفه حليوه لحسون

جاوبت تضحك
.. معود شحالهن ناخذله وحده مثله يستاهل حسن هسه لو عدي اربع بنات اخ جان طيناك وحده
حسن : ههههه تمونين ام زيد

.. فدوه لعينك بس تاشر اني وابو يحيى نمشي بيها كلنا تزوجنا بقيت بس انت

هزيت راسي متبسم وباوعت لانور ورجعت نصيت

سالتني ام زيد

.. بيت خالك شونهم الحجي شونه
.. بخير الحمد لله بخير
.. الله يجعلهم نوسه شونها

مدري شفز بيه من كالت اسمها هاي شون حتتزوج بله  هزين راسي وابتسمت كذب

.. نوسه جاييها ناس حنخلص منها

اثنينهم نهضو جسمهم بعد ماكانو مرتجين عالتجه مال كرسي برهاوه صاحو

.. لاااا وقبلت واحد وره اللخ كالوها

.. هاي هههههه هاي شبيكم معودين

.. ولك حسن تضيعها من اديك

وانور كملها
.. حسن بس هي تفهم عليك وتعرفلك
غمضت ونصيت مبتسم والله صح تعرفلي

مرديت سكتوا شوي وام زيد كالت
.. اني اترخص ماما اخذ راحتك

بس طبت انور كال
.. شنو خالك منطاك فهمني

.. لا والله اصلا اني مفاتح موضوع اني معتبرها اختي
.. ههههه اختك امم كتلي اي شكو منهة تتزوج هي وتخلف وانت ابقى وحدك عود تبقى اختك

.. بس تصدك هذا الراح ياخذها حيحبها حب على فطاره كلبها يمكن حتى من البيت ميطلع يباوع على حلكها وينفذ

نار وحركتني حجايتين حجاها اني احس راسي قبط غضب بقيت اعاين للكع واتخيل هي تصير لغيري نفس نار لينا رجعت وجت بيه

وكفت
كلي
.. ها وين
.. رايح
.. يمعود ساعه١١
.. فيماللا انور
.. حسنن لتضيع عمرك يابه اصحه قبل ليفوت الاوان
بقيت اباوعله
ابتسم وهز راسه

.. الدتمر بي مريت بي قبلك واحمد الله مضيعت فرصتي ... واشر وراه

بيت واولاد ومره بت حموله ويايه حلوه ومره لتضيعها من اديك
نصيت راسي وطلعت

رجعت لشقتي خابرتها مردت لو اعصابي انهارت

رجعت خابرت
مره
مرتين
عشره
والتالي الجهاز انقفل

وافقت اكيد وافقت
ششكول اني شكولها اريد

يصخام وجهي تعرف كل العانيته وتدري بحب لينا والي عانيته شون اخذها شووون

شون يعني وبعدين يعني لازم اقترب منها يبو على راسك حسن واني اشوفها  زعطوطه مافد يوم شفتها مره

بس مااتحمل تضيع مني بقبت وحدي منمت للصبح واتخيلها زوجتي لو اتخيلها تجي هنا وكعت بحيره وصعب صعب اعرف شريد بس هي تعرفني
ورجعت دكيت مغلق
لل١٢ دك تلفوني خالي

خفت ارد ويكولي معزوم بمهرها اتخبل
مره مرتين تالي رديت عيب

.. الو

والجاوبني هي

.. ها حسن
.. وينج انتييي ويينج ادك متردين

.. هذا المطي ابن اخويه جب المي على تلفوني تاجه وكف تدك وميشتغل اريد ارد ماكدر تالي طفيته

جريت نفس براحه وكعدت.
.. شبيك عصبي
.. لا هيج
.. شنو صاير شي
.. هيييج كتلج لتلحين
.. اوك
.. اكولج شقررتي
سكتت وهمست

.. دقيقه خل افوت للغرفه
.. اوك
طبت وسمعت قفل الباب والصبر خللص

كعدت وجرت نفس

كالت
.. حسن شنو انت بالنسبه الي بس ابن خال

.. شتشوفين انتي
.. اني شايفتك صديق وقريب حيل
.. اممم
.. اقرب حتى من اخويه
.. اممم. طلعي بالزبده
.. حايره حسن كالتها وبجت

.. ليش تبجين
.. ممادري ماعرفه مستغربه اابويه خبصني امي اكلت راسي حيفوتج القطار حيدوسج القطار وخوش نصيب

بقبت ساكت

.. مادري شسوي انصحني انت تعرفني

جريت حسره
.. حسن انت صريح ويايه احجي حباب
.. شتردين اكولج
.. اني بس اريد اعرف يعني اني خوفي عادي لوفعلا دااتعقد

.. من شنو خايفه
.. من العالم خاف يطلع مو خوش ادمي

.. بس هيج
.. وو ماعرفه حسن اني صعبه مو بسرعه اخذ مستغربه حيل ووماريد اترك هاي حياتي

.. بس
.. مادري مادري كالتها عصبيه وبجت
.. شنو المتردين تتركي نوسه

سكتت وتبجي بخنيك
كلت بصوت ناصي

.. نوسه
.. همم
.. وافقتي

.. بابا نطه الموافقه 
.. ششوشوكت
.. قبل ساعه ووحيجون الخميس حتتتى يشوفني

.. وانتي شنو قبلتي
.. ككلي بابا بس كعدي احجي ويا وشوفي
.. ليش بلله
.. مادري لح هواي حسن وعصبب واخويه هم رزل سكتت

.. رفضي وفضيها
.. كتله كلي طيني سبب وو
.. زين كوليله .... سكتت مااعرف شحجي
.. شكوله
.. مادري شكولج
.. زين حودي التلفون لبابا
.. اوك

راحت لثاني يوم دوام عدنا اشتغل وبالي يمها
لاول مره من تركت لينا لليوم انساها
كملت شغلي بسرعه وعدم تركيز وعفت الباقي لان كمت اخربط ركبت السياره وطلعت بس اريد اصفي ذهني

انت شتريد
اجتي باحسن وكت باضعف وكت جنت بي
سندتني
اخت
وصديقه
ورفيقه هم

وهسه حتروح ؟!!
وكت اني وحدي
لا ابو النور بعد يمي صار عده حياة وبيت

ولا حياوي هم حبيبي كون اسره
انت وحدك حسن شنو المفروض اسوي

معرض عن الزواج اوك ماشي لشوكت ليمتى
وكفت السياره بفرع حتى ماعرف اني وين

بقيت صافن
وهل هي الشخص الاريد اكمل حياتي وياه

فكره الزواج خالقه عدي رعب غريب
خاف ماارضيها
خاف ماكفيها
خاف اگلب عليها وره فتره
خاف هاي الصداقه تصير عداوه
لا لااني ممستعد ابد مدااحس روحي جاهز
بنيه جاي نصيبها الله وياها خل تتزوج

اني ممتخيلها كزوجه ابد
حددت قراري ورجعت للشقه  اليوم موعد زيارتهم
تضاهرت كدام روحي بانه اني بافضل حال والوحده والاستقلال شي يخبل

تسوكت من السوك وترست البيت حتى كرزات جبس جيس جبير جبت وشغلت فلم هاي حياتي شبيه مو عايش

وصل الفلم للنص
واني كضيتها اشيل التلفون خاف دكت عليه وارد اذبه خايبه امالي

الفلم مفتهمت منه شي 
ولاحسيت بطعم الدا اكله شنو
فتره وتعدي اتعلم وحدي مثل متعلمت عليها قابل شنو محد مات وره احد الله يسعدها

دكت ب٧ العصر وكتها توها كاعده من النوم

.. هلاو حسون
.. لج هلا وينج اليوم
.. اسكت اربع شعب امتحانات ملخوني

.. ههه بالعافيه ايي وشصار عالعريس
.. عزه ذكرتني  خل اسأل امي .. يوووم يمه
.. هاا يمه
.. شنو بطلوا ميجون ..  بلكن الله
.. لا يمه هسه ساعه ويجون بدلي يمه

.. ها حسن
.. ها ههه متخلصين
.. الضاهر هيج
.. يله بدلي وكعدي يم الولد شوفي جوز شسمه يعني تشوفي مناسب

بقت ساكته
.. ها صفنتي
.. يعني حسن  هذا رايك
.. اي والله شبيج ليش مستغربه
.. اريد كلشي يخلص الله ورسوله وكل أولياءه  ومن يمه يصير الرفض هيج اوزع واهليه

.. الله هالكثر
.. واكثر روح نرفزتنييي
.. روحي ههه باي وينج
.. هااا
.. باعي عود خابري طيني الموجز
.. مستمتع حسن
.. اي ليش لا وج حتعرسين

كالت بخنكه
.. باي وسدته

هيج احسن
هيج افضل اريح احسنلي واحسنلها
غير اركد غير ارتاح الوب الوب مكدرت رجعت دكيتلها مردت
لو نار ووجت بيه
معقوله كاعده يمه
لا هسه متفوت هاي حقنه

نار نار صرت لل٩ خمسين مره دكيت مترد لل٩ بليل دكيت ردت

.. ها حسن
.. وينج بت الحلال
جرت حسره وسكتت

.. ها شبيج
.. حسن روح فدوه
.. تعاي سولفيلي
سمعت صوتها تغير نبرتها بيها عبره

.. ممصار شي
.. جوي ... كلتها ارجف والله

.. اي جوي
.. ووشنو طبيتي

سكتت وتحسرت
.. اي

ردت وبجت
بقيت خانس گلبي احس انقببببض

ونبرتي تغيرت
.. شكو
وتر بالاوتار الصوتيه رجف ومكدرت اسيطر

.. حجيتي وياه

جاوبت
.. اي
.. امم وبعد
كالت

.. حسن
وبجت
.. شبيج تبجين احجي
.. هاهي خلص

بلعت ريك
.. اوك عالخير
مردت
.. كافي بجي ولج مو صغيره انتي

سكتت واني كلي غيره ليش داعذب روحي مدادري

.. اي ووشلبستي من طبيتي

جاوبت ببديهيه

.. فستاني الفستقي الشتريته وياك

.. ياهو هذا ابو ال٧٠
.. اي
.. ههه هاي مقابله وطابه باحلى شي عدج واكثر شي يلوكلج لو قابله شتلبسين

.. شنو؟
.. هيج سلامتج
.. شنو قصدك يعني اتبرج للولد
.. والله شتكولين انتي
.. حسن شبيك اني نوسه
.. اي وعجببج عاد لااا. عطت محسيت بروحي
.. ولد عادي شاب اعتيادي
.. ممم ووهو شكال عليج
.. مادري
.. اكيد عجبتي والا ليش مصرف نظر
.. ماعرف
.. اي شوكت يخابرج لعد
.. ليش ديخابر
.. غير حتى يتعرف هاي
.. لا شكرا ماريد
.. ليش عود هو اني ابن عمتج وسوالف وضحك ليل نهار عادي شبيج

.. يعني شايفني كلش سهله عدي احجي وي غريب
.. اي عادي مثل متحاجيني تحاجي

.. ها هيج اممم شوف حسن اني لوما بابا بوكت وكعتك دخلك بنصنا وكللنا هذا ابني ومن يومها اني صار عدي ابن عمه وصرت وياك عون على همك وتعبك وبلسم لجرحك انت اقرب شخص الي اقرب حتى من اهلي اذا سويت كبه شلتلك خطيه ميحب مال بره اذا طيبه اخلي بابا يخابرك متنزل اللكمه والله

اي شي عدك متكدرله اني وياك عليه ملابسك وياك اتسوكها وارهم  وانت هم اني لو ماواثقه بيك طلعه مااطلع وياك

بابا لو ماواثق بيك لباب البيت ميخليك توكف
بس الضاهر احنا غلطنا

جرت حسره نشفت الدم بعروكي كالت بعبره اذتني والله اذتني

.. حسن ههاي ااخر مكالمه بيننا اذيتني ككلش جنت انسان اعز حتى من نفسي
وكضيت وياك احلى ايام
حللني واوهبني اترخص
همست تبجي
باي حسن وودير بالك عروحك فدوه

مكدرت انطق بعد سدته شمرت الجهاز احس نار بعيوني واذني رديت لزمت التلفون اراسلها اعتذر
لكيت روحي محضور من كلشي

فرغ عقلي من كلشي غيرها ساعه هيج صافن واتذكر جريت التلفون اكلب كل صور اللي بالتلفون صورها ويايه بيت اهلها وي خالي دنسوي جاي دنركب دنشتري هدوم
دتنضف شقتي ويايه وخالي يشرب جاي

حسيت روحي بوضع
انهيار بس مكتوم
نفسي متبين لنفسي
بابا انت بلاها تضييييع اعتررف

ب١١ ونص هيج دك تلفوني خالي كمزت عبالي هي واحلف وي روحي اعتذر منها واردها لحياتي

رديت

.. الو
.. الوها يابه حسن خومانايم
.. هله هله خال للا والله كاعد
.. زين ابني ااني دااتصل بيك اعزمك على مشيه نوسه باجر ووانت هم اخوها فاريدك ويايه

بلعت ريك وغمضت انتبهت على كلبي يرفس مو ينبض

.. الوو
.. ها خال ااي عالخير قرايه فاتحه يعني
.. اي وعقد يجيبون شيخ وياهم
.. ها
.. اي يله ابني تصبح على خير
.. هلو خالي

سده واباوع لروحي بالكع شوكت كعدت مادري فتت للغرفه تمددت واحس حيطان شقتي ضاقت

وحدك من جديد
وعتابها اليذبح باخر مكالمه
ضيعت كل تعبها ويايه
صبرها عليه

ارزل واتعارك بذيج الايام السوده وهي تتوسل
بس اخذ فيتاميناتك

لج بابا ماااريد
لخاطر بابا مو حيتخبل عليك
مابيه شي عسايه بالموت
اسم الله عليك فدوه لتحجي هيج

اعض اصبعي واتفركس
امدايييه امدايه خليتها تكعد كبال الولددد ويتامل كل جزء بيها يابه استعرت نار غديت مي ب٥  الفجر صارت وكفت صليت كملت وباوعت عالتلفون جانت تكعدني للصلاه

صدك وابجي
صدك واحس روحي خذلتها من تركتها
لمحتلي لمحلي خالي واني اذبه ثول

صدك وعيوني تجري ندم لابعد وكت ماضيعها موكيفهم هي صارت جزء من كل يوممي من همي وضحكتي وتعبي وراحتي

ب٧ بدلت وكبل لبيت خالي نايم اكعده كاعد اكوله نوسه اريدها ماضيعها لا اني غلطت وهسه اصحح غلطي

وصلت بيتهم خالي جان توه طابك ووراه سياره للكراسي ينزلوها ب٥٠ كرسي

باوع لسيارتي مستغرب طببوا الكراسي وراحت البيكب

والتفت عليه
اشرلي خايف
.. هايابه شبيك من الصبح اكو شي بيك شي

جاوبت كبل

.. خالي لتنطيها اني اريدها
وجهه ارتاح ونصه همس

.. ميصير ابني عالم ناطيهم حجايه وزلمهم وهاي انت تعرف ليش مكلت من اول

.. مووو غبي خالي وماافتهم خالي حلها من يمك اموت ببابكم والله من تطلع ماعدي  گلب بعد والله وانت تعرف كلش زين

دمعت عينه وخله ايده على جتفي ويهز راسه برضا

۔۔ فكرت زين
۔۔ خالي هسه يله فكرت عقلي وكف فدوه الغيها

احجي واتوسل بي واحس مراح يقبل عقده صارت عدي من القبلها الاريده ميصير الي

جرني وكعدني على واحد من الكراسي وبقه يحجي واني اعصابي ترجف

.. بابا وهاي حياه خاف بعديت تندم

.. خالي اندم اذا خليتها تروح من ايدي انت مو تكول انت ابني شون تخليني اسكت شو تخليني ماكولك اريدها

.. ابني اني جيت كتلك كالها وغمض همس
هسه ماكو مشكله خل اسال البنيه هي اصلا ماكانت قابله بس لحينا عليها

.. اسالها هسه خال اريد ارتااح
.. بابا بالدوام شبييك
.. خاف يجون خالي
.. بابا ب٤ موعدنه اهدا

سكتت واعض بشفتي مرت خالي حجالها مكلتلي شي كالت البي خير يقدمه الله

لل١١ الضهر حتى دوامي مرحتله خابرت اخذت اجازه والوب بحديقتهم تالي مكدرت

اخذت السياره ورحت للمدرسه لدوامها
الحارس بالباب كتله صيحها

شوي و جتني
وجهه مخطوف

بلعت ريك واني وره السياج بره المدرسه

.. حسن ؟ شبيك شكو بابا بي شي

.. لا نوسه امشي اخذي زمنيه
.. وين شكو عليك الله
.. ماكو شييي اهووو اخذي زمنيه جيبي جنطتج وتعاي

هزت راسها ونفذت وعيونها تحاوط ملامحي
طلعت بالسياره وهي ويايه

.. شبيج تباعيلي هيج مخبل شكو
.. حسن شبيك منايم وجهك تعبان
.. اي طبعااا اذا حضرتك حاضرتني
.. خربطت بالحجي
كالتها وكتفت ايدها وارتجت تباوع على صفحه الشباك

.. محجيت بعد شوي وفزت
.. وين رايحين متكولي

هنا حديقه اريد احاجيييج
.. ليش تصيح
.. تعبان نوسه
.. اني هم تعباااانه
صيحت وتتعارك صوتها من تتعارك يوصوص
طبكت ونزلنا كعدنه بالحديقه اريد افتح الموضوع مادري شلون

وهي مدلغمه دايره وجهه تالي تذكرت الصور
فتحت فوني وطلعت الصور

.. باعي هاي تتذكرين شوكت

من البومه تحولت لابتسامه كالت
.. اي ههه بعيد ميلاد ابن يحيى
.. امم وهاي
.. هاي بللله ها هاي من رحنا زرنه المكبره
.. صح زين وهاي وين

باوعت بعيني تبتسم
.. بغرفتك دننزل البرده نغسلها

ابتسمت عاينت بعينها
اول مره اعاين بعينها ضبط بغير صوره وهي منزلت عينها حدما حست نظرتي تغيرت حتى ابتسامتها غابت

التفتت وكامت نفضت تنورتها ومشت كم خطوه وباوعتلي
.. شكو جايبني هنا
جريت نفس
.. تعاي كعدي حتى اكولج
رجعت كعدت بس مباوعتلي

.. نوسه
.. همم
.. باعيلي شوي
التفتت خلت عينها بعيني بجديه ثواني وارتخت ملامحها دمعت من نظرتي وهمست

.. انت شتريد كالتها وبجت وتعاين بوجهي
شتريد جايبني مو متريدني
غمضت عيني

مو تكولي كعدي وي الولد واحجي وياه جوز تتفاهمون شنو التغير

.. الغلطه الغلطتها طول حياتي قبل لانام راح اسب روحي من اتذكرها
بلعت ريك مستغربه ييعني شنو

.. وين باوع من كعد وياج
.. وين شنو
.. البارحههه
.. كعد عالقنفه
.. بصفج
.. لاصخام بالقنفه الكدامي
.. يعني فصلج فصال
.. حسن شتريد كالتها ودمعت مره لخ

.. الولد عجبج
بقت تعاين بعيني
.. احجي عادي
.. انت هم عدك غيره

كالتها تتهم

.. اني داسالج
.. واني هم دااسال
.. اي عدي كلتها ونصيت العب بالحشيش

عدي وخلتني مانام من البارحه وبس يطلع الضوه اجي لخالي كبل اكولها انهي كلشيي

كلتها ورفعت راسي

كتله بنتك اريدها
اباوعلها فكت حلكها وعينها دمعت

مستخيل اضيعج من اديه نوسه

ترست ملامحها العبره وغطت وجهه تضم شهكتها

اني اسف
اني خايف جنت والله

احجي وتهز براسها موافقه
.. اعرف اعرف بيك والله
.. لعد ليش عفتيني واجهيني باللي داغشم روحي عنه مثل كل مره

.. هالمره تختلف ردتك انت تختار
.. انتي تعرفيني تعرفيني كلش زين
.. اعرفك بس هم جان لازم انت تختار

.. اني تعبت هالاسبوع صراع وي نفسي نوسه.

ابتسمت ونصت

.. بس تعلمت شغله عرفت اني تعلقت بيج تعلق طفل بامه

.. مو هالحد

.. واكثر والله تعودت عليج وعلى خبالاتج وانتي الوحيده العرفتي قفلي

نصت راسها

.. اعرف شتفكرين مشكلتي وياج كتاب مفتوح والمصيبه تدرين شحسيت وشكد تعذبت بس والله والله محد غيرج داواني

ابتسمت ونصت
.. شون ابدي وياج من جديد
شون اتصرف وياج كزوج وزوجه واني مافد يوم شفتج هيج

ابتسمت منصيه

.. خليها للوكت خليها للايام مثل مااجه اليوم اللي تخلي عينك بعيني بي وتحس باحساس اني داشوفه بنظراتك
يجي يوم تشوفني كلشي بحياتك

.. ان شاء الله
.. خو مزعلانه بعدج امانة الله
.. لا ابد نسيت كلشي
.. اعزمج على ريوك ميت جوع
.. خاف بابا يروح للمدرسه يرجعني خطيه وميلكاني
.. اخابره اني
.. اوك

خابرته لخالي كدامها
.. ها خالو
وباوعتلها
.. خالي نوسه ويايه حنتغده سوه ونرجع
.....
.. اوك ماشي عاشت ايدك واعذرني خال خليتك بموقف

سديته منه وكمنا تغدينا ورجعنا للبيت لاخالو الديعرف شون يفتح موضوع لا اني الداعرف رجعت منهم لبيت انور وحجيتله وكام بوسني وخابر يحيى وخبص نفسه

لليل رجعنا رحنا بيت خالي اخذت ام زيد ومرت يحيى وعمي اخو ابويه

وطلبناها عمي خطيه تكفل بالمهر والذهب اني لام كم فلس واتفقنا عالخميس مهر ومشيه

طلعت منهم لشقتي وخابرتها

.. الو
.. ها عيني
.. هلوو كله عيني
.. اني من اول اكولج عيني لج
.. مادري شو هسه حسيت بيها
.. ممم زين ست نوسه باجر تروحون للسوك تتسوكون
.. اي انت متجي
.. طبعا اجي
.. اوك
.. شتشترون شكد احضر

.. مادري امي كالت فستان بسيط ومناشف وملابس نوم ماعرف شنو
.. شنو شنو
.. شكو
.. ملابس نووم عزه ولج وتلبسيهن الي
.. عزه بعينك حسن روووح
.. وج ههههه تعاي عزه ممتخيلج
.. لك لتتخيل ولك حرام
.. ليش عودين
.. مو ميصير
.. ليش مو مرتي حصيرين
.. الخميس عود
.. ها الخميس يصير موحرام
.. اي اسكت كافي

.. هههه وج صدك عود
.. دكافي ياحسن شجاك
.. وج اشوف ركبتج خليتيها حسره بكلبي الكلاده الشتريتيها اكولج اشوفها عليج تكوليلي ميصير لو تشوفيالي فوك الحجاب
.. اي غير حرام

.. لا اكولج صدك
.. شكو
.. هاي وجهج هيج ابيض ركبتج شونها
.. صخام الصخمني حسن باي
.. هههههه باي باي

سدته بوجهي

كطعنا مهر حفله بسيطه اهليتنا
اختي ( ام يحيى ) جتي واخذت ابن يحيى  استغلت عدم وجوده وي النسوان
عسل استغربت منها تحجي وياها ببديهيه وهي تحضن بي وتبوس

ام زيد ( للومه )  اللي ولا باوعتلها فخامه كاعده ولا مهتمه

واني ودعت اخر ذكرى من لينا بأول هلهوله من اهلنا تعلن ارتباطي بيها

اشكر كلمن تأثر بقصتي
شي آمنت بي
مو كلشي نريده نحصله

رغم هوووواي قاري كتب عن الطاقه الذاتيه والاريده احصله عن طريق طاقتي

بس تضل ارادة ربي الاقوى

يمكن كان مرتاحيت وياها لو صايره القسمه.
يمكن مكان شفتها مثل مداشوف نوستي
الي ولامره سألتني
( حسن تحبني )

ولا اني الكلتها
مره من بين حديثا اليومي كالت

.. حيكون احلى يوم بحياتي يوم التنطقها بصدق وهذا اليوم راح احتفل بي سنويا

وهي لافد مره كلتلي احبك
عزه نفسها طغت لكن تحس بيها من تصرفاتها خوفها علي وعيونها البريئه الخجوله من تتأملني

اشكر الله الردني لاهلي
واشكر الله عليها
قصة حسن  الي بقت معلقه من غير نهايه
اليوم انتهت وبدت بداية جديدة

زواجي بالعيد الكبير
ادعولي الله يتمملي على خير

شكرا لكل من قرا واعتبر
مريم السعدي

.....

اما باقي أبطال الرواية ( اما لهن ) الكل بخير الحمد لله حياتهم ماشية مثل كل الناس والحياة ألوان مو كلها لون وردي

البعض منهم يفضل عدم ذكر حياته بعد نهاية القصة وأحد الأسباب هي التعليقات السلبية تأثر بنفسيتهم وهذا شي طبيعي ماكو انسان ميتأثر حتى وان كان واثق كل الثقه من نفسه

دائما تسألون عن أبطال باقي الروايات
البعض منهم مازلت اتواصل بشكل بسيط بين فترة وفتره ماعدا أبطال قصة بقايا حواء للاسف انقطعت كل اخبارهم وماعندي اي تواصل معهم ياريت يرجعون يتواصلون ويايه احب اسمع اخبارهم

اخبار أبطال قصة على قيد الموت ( جيلان )
يؤسفني انقل اكم خبر وفاة ابن فاروق بأزمة كورونا (ابنه الصغير )
وكذلك إياد فقد احد بناته
ياسر وريناد بخير صار عدهم ٣ اولاد ومستقرين خارج العراق

أبطال قصة منطقة ١٣ ان شاء الله الأحداث الجديده بالجزء الثاني يمكن يطول لان الأحداث مستمرة انتظر تكمل وابدي اكتبها ان شاء الله تعالى

أبطال قصة عسل الانتقام الكل بخير ومحتاجين دعائكم لسند و آصف بالذريه الصالحه

أبطال قصة النوك الحمر بخير الحمد لله و لاجديد بحياتهم

و ان شاء الله قريبا اذا سمحولي باقي الابطال انزل اخبارهم

تحياتي لكم

مريم السعدي

.
.
.