الخازوق الأسود

الخــزق الـسـابـعـة عـشـر

گام من يمي واخذ أخواني الصغار وطلع برة وانا بس ابجي، غسلت وجهة مرتين وهم ماكو فايدة بحيث بعد استسلمت، كلما اذكر شنو كلتلة اخاف ويجيني توتر وضيق بصدري.

طلعتلة وانا دموعي عشرة وعيوني منتفخات من كثر البجي، وهو جان واگف وحاط أيدة بجيوبة وبس انتبه علية وباوع انا اجاني شعور الرفض.

وگفت گدامة منزلة راسي وهو تقرب علية وكمش أيدي واحذني للغرفة مالتهم الي بالحديقة وسد الباب، وبقة كامش أيدي وبـ الايد الثانية مسح دموعي.
-كافي بجي هَرم انا ضعيف گدام دموعج.

سحبني وحضني لصدرة حيل وانا بعدني ابجي.
بقة هيج حاضني ويمسح على راسي ويردد بأذني.
-اليوم الوحيد الي انا اعوفج بيه هو اليوم الي تطلع بيه روحي، لا تتصورين بكلمتين منج راح انهي كل شي بيناتنة هَرم.

نفيت براسي وابتعدت عنه: لا مُعقب انا وياك مو لبعض، كل شي ديصير اشارة من رب العالمين أنو احنة مو لبعض افهمني !!!!

نفة براسة وعقد حاجبة: هذا اختبار من رب العالمين يشوفنة نگدر نصبر على كل الي دنمر بيه او لا، بس انتِ هَرم متوقعت حبج الي هيج ضعيف لدرجة تتخلين بيهة عني، انا داحارب علمودج من اليوم الي حليتي بعيوني وانتِ بكل عين صلفة تجين تحطين الحلقة بأيدي ؟؟

تقرب علية بحيث صار وجهة قريب على وجهي كلش وراد يحجي بس انا قاطعتة راساً.
-مُعقب انا ماگدر..

قاطعني بقبلة عميقة، اخذني بأيديه ثنينهة لصدرة وحضني حضن يوضحلي بيه شگد هو متمسك بية، رجفت وانا بحضنة ودموعي مستمرة تنزل.

ابتعد عني بعد ما حس بية اختنگت ومسح دموعي وهو يباوع علية، جان الانزعاج والغضب كلش واضحات على ملامحة وميريد يبين يمي بس جان كلش واضح عليه من الحواجب النازلة للعيون.

اخذ نفس ومسح عيونة وهو يستغفر يحاول يتحكم بغضبة يمي، عض اصبعة وضرب رجلة.
-انا شلون هسة اقنعهة !!

مسح وجهة وكمل: روحي هَرم للبيت بعدين نحجي.

نزلت راسي بدون كلام وطلعت برة وصار جرح بوجهي، وگف بمكانة وهو يباوع علية مستغرب.
-ليش تبجين ؟

مسحت عيوني ونفيت براسي: ماكو شي.

جرح: لا صاير شي !! هَرم..

انفتح الباب وراية وطلع مُعقب وراساً كل: تعالي جرح جوة.

عفتهم انا ودخلت للبيت وصعدت فوگ لغرفتي، تمددت بفراشي وكملت بجيتي لحد ما هدئت يلا غفيت، جنت تعبانة كلش وراسي احسة جبل.