part8
"مقتبسة"
اريام ✨
كملنا حوسه وحطينا العشا
مرام:بالك تلبسي وشاح عاراسك
انا:وعلاش
مرام:قصدي ولاد عمك شنو ولا عاجبك الجو
انا:ولاد عمي يعرفوني من لما جابتني امي مش جديده عليهم ومانلبسش في وشاح قدامهم مش عاجبك خودي راجلك وعشيه بروحه
مرام:قليلة ادب عارفه شن في دماغك
خش فؤاد:مديلي مشروب
مرام:حاضر حبيبي
فؤاد:شن رجلك توا
انا:احسن من امس الحمد لله
فؤاد:كويس سلامتك ردي بالك علي روحك
انا ضحكت:حاضر وطلعت
مرام:شني حنيتلها
فؤاد:بنت عمي اكيد مش رح نتجاهلها
مرام:مش باين
فؤاد شدها من ايدها بقوة:امشي مشيتك خيرلك مش ناسيلك انك دفيتيها امس
مرام:اه مادفيتش حد تكذب عليك هيا ره
فؤاد:ومن قالك هيا قالتلي
مرام:مالا من بيقولك ماكانش معانا حد
فؤاد:اني حذرتك مزال حسابنا وطلع
__________________________
نور ✨
روحنا من محضر نوسه مع ياسر رقدت باسم وبلقيس مزال فايقة وعبدو ماروحش
بلقيس:مامي وين بابا
انا:نعرفش تو شويه ويجي
بلقيس:به
انا:هي نوضي ارقدي
بلقيس:حاضر
قعدت نستنا للساعه 1 ونتصل مايردش كيف لبست عبايتي بننزل نكلم خوته انفتح الباب وخش
عبدو:وين عالخير
انا:حبيبي وين كنت شغلتني كنت نازله نكلم واحد من الولاد
عبدو:اهو جيت كنت مع الشباب ساهر ماركزتش للساعه
انا:اها بهي مش مشكله
قربت منه بنحضنه شميت ريحه غريبه في لبسه
عبدو:عرقان حبيبي ندوش ونجي
انا:نحطلك عشا
عبدو:متعشي
انا:تمام
خش يدوش وانا قعمزت افكاري رفعتني لبعيد وماقدرتش نتفائل خير ابدا واللي زاد خوفني انه احساسي عمره ماخاب
عبدو باسني:وين سارحه غزالتي
انا:شي نفكر في نوسه
نقز من عالصالون وقعمز جنبي:علاش خيرها الطشه
انا:غير صغيره قعدا ومش عارفه تتفاهم مع راجلها واهله او لا
عبدو:تمشي امورها ان شالله مستاحشك عافكرة
انا:حتا اني حبيبي
عبدو:ماشفتكش بالقفطان بكري
انا:صورت بيه
عبدو:ترا نشوفهم وحوليهم عاللاب ماتخليش صور في هاتفك
انا:حاضر
عبدو:هي نوضي 😘
_________________________________
نسيبة ✨
فضت الدنيا وقعدو العيله بس
خش صقر وقعمز جنبي:تعبتي
نسيبة:شويه غير الذهب ثقيل وانا نحباش
شد ايدي باسها:حبيه لاني نبيك ديما تلبسي الغالي
نسيبه:عيب امك والبنات
صقر:ماحد ليه عندي شي مرتي
خولة:ربي يدوم وليدي
صقر:ان شالله
اريام:وين مشيتي للمزين
نسيبه:الوردة البيضاء
عايشه:اخييي مش حلو ومكياجه قديم هلبا ورخيص هه شكله صقرنا بيبخل من اولها
سكتت ومانبيش نرد احتراما لعميمه والبنات
صقر:ياريت يامرت عمي تخليك بعيدة علينا وماتدخليش في شي مايخصكش وتحافظي عالحدود
عايشه:شن قصدك انا برانيه ولا كيف
صقر:افهمي كيف ماتحبي بس نبهتك مرتي ماتجيش جيهتها واعتبريها اول واخر مره نحذرك
خولة:ماصار شي ياودي خلونا مبسوطين
عايشه لملمت بواقي كرامتها وطلعت روحت
سادين:ماثقل دمها احسن مادرتلها صقري
نسيبه:خيرها معاي من يوم العشا لما روحت انت ديرلي في لقطات اخي
صقر:دوريهاش بنيتي
سادين:لا هكا مش حانتفاهمو انا بنيتك
ضحك:انتم الزوز بنياتي غير كل وحدا في مكان هيا حلالي وانتي وخيتي
سادين:تمام ❤️
صقر:هي نروحو
نسيله:اوك
خولة:خود معاك عشاكم مرتك ماكلتش
خش رامي:اوووو كنتنا
صقر:جي البارد
رامي:مفروض ناخدها انا عافكرة غير الوقت اعوج
صقر:ضم فمك وحول من وجهي هي
رامي:اعصابك يابرو خلاص حدفتها من القائمة مدام خديتها
صقر 😒
رامي:نسلم عليها بس
صقر:مافيش داعي خير من بعيد وتمت
رامي:خيرات مرت خونا انستينا
نسيبه:اهلين رامي الله يأنسك
صقر:هي مشينا ليلتكم سعيدة ياعيلة
_____________________________________
فتح الباب وخش تفكيره متسلط عليها حط البضاعه في المطبخ وقعمز في الصاله يتفكر في كل تفاصيلها جسمها طولها لبسها البسيط حجابها اللي مش مرتب،شعراتها اللي تسللو من تحت الوشاح، ملامحها الحادة صوتها،ردودها اللي زي السم، تنهد بقوة وقال "يااارب شن صاير في قلبي وعقلي"
رجع لارض الواقع لما قعمزت جنبه تبكي
عايشه:حمادي
محمد:ها ياهمي خيرك تبكي
عايشه:حوش خوك علاش يكرهوني شن درت انا 😢
محمد:منو من خوتي
عايشه:نور الدين
محمد:ايااااه 😑خيرهم
عايشه:توا كنت في المحضر وهزبوني حتا من صقر قالي خليك بعيد برانيه انتي ومرته الفرخه هدي
محمد:امتا لحقتي تعرفيها انتي الجديدة باش تتعاركي معاها
عايشه:هيا اللي بدت
محمد:به حصل خير معليشي المهم خوخه تعامل فيك كويس
عايشه: ماتبيش تمشي تاخدلي حقي ولا شنو
محمد:تي فكيني من دوتك عيوش كان نمشي تطلع القصه ماهناش منها
عايشه وقفت وعلت صوتها:شن قصدك نكذب يعني
تلفتلها:صوتك ركزيله ماعنديش دماغ ليك
عايشه:المعنى?
محمد:اختفى من وجهي هالساعه خليني رايق لو ننقلب انتي زابطه شن بيصير
خافت منه:بهي ومشت
محمد بصوت عالي:ديريلنا سمام ناكلوه واحد متزوج عالابيض
_____________________________________
صباحا 🌞
في حوش نورالدين ✨
خولة:وتيتي الفطور
سادين:ايه خلاص كملت
خش رامي:صباحك ورد ياسمحه
سادين:صباحو هي قعمز
رامي:هاك حطيهم غادي شفتهم في المحل عجبوني
سادين مدت يدها بدون ماتركز وبسرعه ماانتشر حب في ايدها وبدت تعطس:ياحمار عارفني نتحسس منها
رامي:حي وربي نسيتك
سادين بدي نفسها يضيق:حسيبك ربي
خوله:خيركم
رامي:جبت فراوله والله نسيتها بكل
خوله:ياحليلي هدي عمله ديرها اختك تموت وتعيش منها
سادين معاش قدرت تتنفس طلعت للجنان تاخد في هوا بقوة
معتصم فايت بيطلع شافها:صباح ال..خيرك دوسة
سادين تحكي بصعوبه:رامي جاب فراوله
معتصم:شني كيف جابها شن ناسيك الحمار
سادين:قال ناسي 😫
معتصم:بهي اهدي شويه وين البخاخ متعك
سادين:فوق في داري
معتصم:تو نجيبه قعمزي هنا وحاولي تتنفسي
دارت بخاخ الحساسيه لكن مافيش تحسن ابدا
خوله:كلم فؤاد ياوليدي خلي نرفعوها للمستشفى معاش ترتاح توا الا باليبرا واابخار
معتصم:تو نرفعها انا ياعمتي غير لبسيها عبايه اهو بنقرب السيارة
وبعد ربع ساعه كانت في العيادة وركبولها اكسجين مع دواها
خوله:نحس في ركابي من الخلعه
معتصم:ارتاحي نخش نشوفها شن حالها توا
خش لقاها تتفرج عالسقف وبياخدها النوم
قعمز جنبها:احسن؟
هزت راسها
معتصم قرب منها:نعستي
سادين:بنرقد
معتصم:ارقدي ياروحي ارتاحي
شدت ايده:شكرا
معتصم باسلها ايدها:حياتي فداك انا نحبك يافرخه امتا بتكبري باش نخطفك منهم وتبدي حلالي استنيتك هلبا يادوسه هلبا وقلبي متعبه بعدك
شافلها لقاها راقده باسها وطلع
خوله:شن صار
معتصم:خداها النوم مزال ماتمش الدوا
بعد وقت كملت دوا وروحو بيها
معتصم في باله انها ماسمعتش شي من اعترافه ومستمر في التمثيل
اما سادين فاكانت مقتنعه انها تتوهم بس ومعتصم ماحكا شي. حبه كان بالنسبه ليها مستحيل يصير
بيقعدو مستمرين بوضعهم هدا ولا يصير شي يخلي حد منهم يعترف بحبه..!
________________________________
نمشو لمكان اول مره نحكو عليه
فاق من النوم مالقاهاش جنبه خش دوش ولبس بدلته المعلقه طلع شافها تلعب في بنتها
ياسر::صباح الخير
ايلان:بابي
قامها يبوس فيها:صباح الورد حبيبة بابي فايقه بكري اليوم
ايلان:نوم مشي
ياسر:اممم وفطورنا
ايلان:جهزنا انا وماما
ياسر:حلو هي اجري لمكانك
قرب منها باسها عاخدها:صباحي هالجمال اللي نتعب معاه
كوثر:صباحو هي تعالا افطر قريب وقت
وقفها:زعلانه!
كوثر:هئ
ياسر:نموت فيها هئ منك 😍😍زودتها معاك امس اسف حبيبي
نزلو دموعها وماردتش عليه
لف ايديه عليها وحضنها بقوة:حقك عليا واللي تبيه نديرهولك انا بس كنت تعبان من الخدمة والضغط وانتي شديتي في ال مشيه
كوثر:اول مره تمد يدك عليا
ياسر:ياريتها انقطعت قبل مانضرب حبيبتي
كوثر:بعيد الشر عليك
ياسر:به سامحيني ووعد اخر الاسبوع نرفعك لاهلك وتباتي عندهم انتي ولونة
كوثر:بجديات
ابتسم:وراسك ياروحي غير ارضي علينا بس نتحملش زعلك 😘😘
______________________________________
صقر ✨
ثاني مره نفتح عيوني ونرتاح هلبا للملاك اللي راقد بين ايديا طلعت بدون مانفيقها جهزت الفطور،وقفت في البلكونه ندخن لين حضنتني
نسيبه:صباحو صقري
لفيت عليها:صباح الورد بنوتة صقر 💜
نسيبه:امتا فقت
صقر:جو نص ساعه
نسيبه:به تعالا نديرلك تفطر
صقر:جهزته بكري قعمزي كولي بس
قعمزنا نفطرو حسيتها ماتاكلش وبالسيف فاتحه عيونها:خيرك نوسه
نسيبه:تعبانه شويه شكله من دوشه وارهاق العرس
مديت ايدي لراسها:عندك حرارة ترا تعالي
شفتلها حلقها ولوز بداية التهاب اكيد من البحر امس دوشنا وطلعنا طول
حطت راسها عاكتفي:بنرقد
انا:من الحرارة بس خشي ارقدي نمشي نجيبلك دوا
نسيبه:لالا اقعد معاي نبيش دوا
انا:باش تتحسني
نشيبه:صقر
قمتها ورفعتها للدار:عيون صقر
نسيبه:خلييك
انا:مش معطل بنيتي دقايق ونكون عندك خليك هنا تمام
غيرت عالسريع وطلعت لقيت امي دور في الجنان
خولة:خيرك طالع تجري
انا:نوسه مريضه ماشي بنجيبلها دوا
خوله:خيرها اللطف امس كانت باهيه
مشيت يدي في لحيتي:مه رفعتها للبحر الصبح وبعدها طلعت طول للمزين شكلها خدت بردة
خوله:عمله بهي برا نمشيلها ولا راقده
انا:رقدت انا مش معطل
خوله:بهي
________________________________________
عند العشاق 😍
نادين:هيااااا فيق عاد تعبتني
معتز:انتي اطلعي من الدار وفوتيني بنرقد
نازين:الساعه 1 وامك قالت تعالو تغدو عندي
معتز:انزلي انتي وحوليلي غداي
قعمزت جنبه عالسرير:لا والله شن مشكلتك انت مع حوشكم
معتز حول المخدة من عاراسه:مش تشوفي في الشيطان هاديكا قعدا عندنا
نادين:وبه شن انت نفسك رهيفه ماتتحملش تشوفها 🤨
معتز:مش هكي
نادين:مالا شنو تقدر تنزل وتتجاهلها تجاهل تام خوتك كلهم متجمعين اليوم تقعد غير انت مهناش
معتز:فوتوني عادي جدا قوليلهم راقد تعبان
نادين:نكذبش انا هيا نوض وشدت ايده
معتز تعصب ودفها بقوة:قتلك مش نازل باش تفهمي انتي
جت ايدها عاحافه الدولاب وجعتها:ااخ 😓
معتز:حبيبي شن وجعك اسف
دنادين:تمام براحتك حول بننزل
معتز:خليك نشوف ايدك
نادين:مافيا شي بعد
طلعت وخلاته مهموم ودماغه يفكر لو حبيبته عرفت علاش يتهرب من النزول لحوشهم شن بدير وهل ممكن تنهي زواجهم او بتعطيه فرصه؟
شن داس معتز زعما 🤷♀️
__________________________________
اريام ✨
كنت مقعمزة في مكتبي ونشتغل طق الباب وخشت
سكرتيرة:عندك ضيف
انا:منو!!
سكرتيرة:مانعرفش الحق ممكن عميل جديد
انا:بهي خمسه دقايق ودخليه
رتبت شكلي وانفتح الباب خش شاب طول بعرض اناقته ملفته للانتباه ماقدرتش نقرا اي شي من معالم وجهه مستفز 😑
احمد:صباح الخير استاذة اريام مسعود ولا
استفزني اسلوبه المترفع والواثق فوق اللزوم:صباح الورد اي تفضل كيف نقدر نساعدك
احمد:تطلبيلي فنجان قهوة ساده ودردشي معاي شويه
انا:نعم 😶جاي تتقهوا عندنا
احمد:لا الحق جاي نشوف في البنت اللي اختارتها اختي باش تكون زوجتي مستقبليا
صدمة اخرى:اللي هيا منو ؟
احمد:حضرتك
قعدت نشوفله نستنا فيه يقولي نبصر ولا مقلب لكن نظرته جديه فوق اللزوم:بس انا مانعرفكش واختك من تكون
احمد:اختي موظفه معاك في المصرف سندس اكيد تعرفيها
انا:ايه
احمد:عجبتيها تحكي عليك ادب واخلاق،تعامل،واسلوب مخلي الكل يحبوك،وجمال لاحظته من اول ماانفتح الباب وتمناتك لخوها
انا:بس ماعنديش علم بيه الكلام هدا
احمد:عارف حبيت نجي ونتأكد بنفسي ولو اقتنعت بيك نحكيلك
انا:بالله وماعنديش راي!
احمد:لا طبعا حقك الرفض او القبول بس واثق عريس زيني ماينرفضش وفرصه ماتتكررش مرتين في الحياة
طيرهالي وفات حدوده:فرصه للي رابطين حياتهم بالزواج وميتين عليه اما بالنسبه ليا ولا تحرك فيا ساكن وتفضل لو سمحت عندي شغل واعتبر موضوعك منتهي من قبل مايبدا
ابتسم بهدوء وبرضو مافهمتش شن يقصد:فرصه سعيدة يااريام ربي يعاونك وطلع
اوووف شن هالمصيبة وترني حيوانه سندس والله لما نوريها 😡😡
_________________________________
اما عند نور اللي فاقت مريضه وغابت عالشغل
تتكلم عالهاتف:مش محتاجه والله
عبدو:كيف مش محتاج قتلك نطلع نرفعك تعايني بلا تسكير راس
نور:عارفه روحي مش حاطول معاي اكثر من يوم
عبدو:بهي ياستي انا مانبيهاش حتا يوم واحد اهو جايك وتي روحك
سمعت الجرس يرن
نور:لحظه حبيبي الباب
عبدو:ماتسكريش خلي الخط مفتوح هي بري افتحي
فتحت الباب شافت وحدا واقفه وواضح انها مش ناويه خير
نور:تفظلي اختي
نهال:مش اخت حد هدا حوش عبدالحكيم ولا
نور بدي قلبها ينبض بقوة:اي مزبوط
نهال:وحضرتك مرته
نور:مرته
ضحكت نهال دفتها وخشت للحوش تتفرج:عندك علم يا حلوة اني............🙂
نور ضغطت عالهاتف بقوة وتحجرو دموع في عيونها
اما عبدو اللي كان يسمع في اللي صار كله وقلبه يغلي من اللي جاي واللي حايصير ........يتبع
______________________________________
#شكرا_لخذلانكِ ✨
