ANG DAHILAN NG KANYANG PAGSILANG
Spoken Word Poetry
Sinulat ni Randy Bataanon
Hindi ako isang magaling na makata
at hindi rin ako mahusay gumawa ng tula
Ngunit meron akong nakilala
na dahilan ng kislap ng aking mga mata,
nagpatibok ng aking puso at nagbigay ng saya
Sa telebisyon ay hindi natin siya nakita,
hindi siya isang sikat na artista,
hind rin isang tanyag na manganganta
Hindi Siya sumulat ng aklat, o nag bida sa pelikula
Ngunit siyay kilalang kilala saan ka man magpunta
Laganap sa buong sangkatauhan
ang ebidensya at epekto ng kanyang Pagsilang.
Siya ang laman ng mga awitan,
sentro ng mga pag-aaral para sa kaalaman
Laganap ang kanyang impluwensya,
minamahal o kinapopootan man siya,
Hindi man natin alam ang eksaktong petsa,
ngunit ang mundo ay nagdiriwang sa kaarawan niya.
Tatlumput tatlong taon sa mundo ay nanirahan.
Tatlong taong nangaral sa sambayanan
Labing dalwang ordinaryong tao ang tinuruan.
Upang magpatuloy ng kanyang sinimulan
Higit nang dalwang libong taon ang nakalipas
Ngunit ang kanyang aral ay hindi kumupas
Ito ang katibayan na siya ang simula ng lahat
at sa kanya rin magwawakas
Libo libong taon bago pa sya isilang at mahayag,
binabangit na sya ng mga propeta at mga pantas
Siya daw ang hari na magpapalaya ng mga bihag,
at sa mga api at mahirap ay magliligtas
Siya daw ang anak ng Diyos na kataastaasan,
Ang Prinsipe ng kapayapaan,
Sa langit ang kanyang kaharian
Ngunit bakit nga niya iniwan ang karangyaan,
nabuhay na isang pangkaraniwan,
ano nga kaya ang tunay na dahilan?
Dahilan? Minuminuto ay iniisip ko
ang dahilan ng kanyang pagparito
Pumunta ba siya dito
upang ako ay bigyan ng regalo?
Iahon tayo sa gulo?
O kayay sagipin sa kumukulong Impiyerno?
Kung regalo ang dahilan,
ano ang aking nagawa para akoy parangalan?
Hindi bat kasalanan pa nga ang dahilan
kung bakit kailangan ko nang katubusan?
Katubusan? Ito daw ang layunin ng kanyang pagdating.
Kailangan daw na akoy tubusin
Dahil sa sariling lakas ay di kakayanin
Pagkaka sangla na kahit anuman ang gawin,
lumuha ng dugo, lumuhod at magdasal ng taimtim,
lahat ng ito ay kulang parin
Pinilit kong umahon ngunit hindi sapat ang lakas,
Katulad ng isang tupang ligaw
na hindi alam ang tamang landas
Iniwan nya ang langit upang hanapin tayo at iligtas.
Buhay niya ang kapalit sa atin na hindi karapat dapat
Ipinalit? Oo dahil ang Anak ng Diyos ay naging anak ng tao
Upang maging anak ng Diyos ang katulad mo
Ipinalit, dahil sya na taga langit ay naging taga lupa
upang ang taga lupa, sa langit tawaging pinagpala
Ipinalit, dahil ako ang nagkasala at nagkulang!
Ako ang syang dapat parusahan!
Ngunit si Kristo ang ipinako sa Krus
Hindi ko kayang arukin ang pag-ibig ng Diyos.
Ano ba ang layunin sa pagpapala niyang lubos lubos
Sa Kanya ko rin natuklasan ang hulugan ng buhay.
Sa kanya ang buhay kong nagkaron ng saysay
Tinangap niya ako at pinatawad
kahit napakaraming ulit na hindi ako naging tapat
Ang buhay koy kanyang binago
At binigyan direksyon sa magulong mundo
Ang karumihan koy nilinis ng kanyang dugo
Sa kanya ko lang naramdaman na akoy naging buo
Oh kay sarap palang matuklasan
ang tunay na dahilan ng kanyang pagsilang
Mas masaya pa sa mga material tulad kayamaman,
bagong damit sapatos, sasakyan o bagong kasintahan
Dahil dito ay ipinasya ko nang mabuhay at mamatay
para lamang kanya ang aking buhay
Lalo pa at nalaman ko na sa kanya lang may forever,
Sya ang aking masasandalan matibay pa sa pader
Kulang ang mga titik at mga tula
Ang kagalakan ko ay sadyang hindi maikakaila
Ang awit ng mga ibon, halimuyak ng mga bulaklak,
Ang sariwang hamog na sa umagay kumikislap
Ang daluyong ng mga alon, ang sinag ng araw,
ang busilak na ulap sa bukang liwayway na kumikinang
Ang bukal ng batis na sariwa, ang mga halamang luntian
Nagsasabing tayo ang dahilan ng kanyang pagsilang
