المخلص "باللهجة العراقية "

البارت التاسع والعشرون

المخلص..
البارت التاسع والعشرون..
بقلمي رسل..
rasolaa7

انستا Rasolaa7

انتَ العزيز
الما يجي بَعدك عزيز..

-واشوفها كاعده بصف الطباخ وخايفه ومصدومة وبس الدموع تصب اول ما شافتني ركضت عليه وهي ترمي نفسها بحضني حاوطتها  بين ايديه وجسمها الي صار سعفه وبس صوت شهكاتها الي شكن كلبي ينسمع منها..

-اش ماكو شيء هاي راح الصوت تنفسي كليبي شو بس خلي اشوف وجهج الكلب راح يوكف نعلعلا شرفكم..

-حضنته بقوه وجسمي يرجف لحظة وحده كفيله تعيد عليك مأساة متناسيها ومصبر نفسك عليها كلها دقايق الي اشتعل الجو بيها بالرمي ورجعت لذاك اليوم بدخولهم للمستشفى وبهذلتنا بذاك اليوم الي غير مسار كل حياتي ذاك اليوم الي غمضت عيني وفتحته لكيت روحي بنص ناس لا ذمه ولا ضمير وما يحيطهم غير السواد والدم..

-بلحضه الي سمعت الرمي تخيلي هذا هو انتهيت ودخلوا علينا من جديد ادور بعيوني واغمض وافتح ومنتظره دخولهم جسمي صار سعفه وهبت عليها الريح وماكو احد يمي يعني شنو هم راح ارجع لذاك الظلام وهم راح اغترب مره ثانيه هالصوت المنو وشنو مصدر هالطلقات..

-قرفصت خاتله يم الطباخ واردد اللهم مسني الظر وانت ارحم الراحمين يارب ما اريد اعيش نفس الشعور
ما اريد ارجع النفس المكان وادور بنفس الدائرة ونفس الوجع..

-من هدات الاصوات وشفت علي بعيني وكانو
سجين واطلقوا سراحة ظمئان وارتوى هيج حالي يتفسر
بهاي اللحظات..

-ركضت لحضنه واني اضم بروحي بي يحجي وياي يهدي بيه واني بس حاضنته اريد جسمي يوكف عن الرجف ريكي يبس وعيوني محجرها صار ياذيني من
البجي شنو من موقف حقير رجعني لايام جاهدت حتى
انساهم..

-شهكت واسحب بالنفس.. شنو هالرمي منو هذا الي يرمي منو؟!..

-وهو ايده تمسح على طول ظهري ويهدي بيه ماكو شيء راحوا ماكو شيء شوفي هاي كلنا يمج لا تخافين ماكو شيء..

-تنهدت براحة شوي من شفتهم والله قبل لحظات تخيلي انو هذا هو رجعوا علينا وراح يكتلونا ويرجعون ياخذوني سبيه..

-سندني علي ورجعني للغرفة وكلهم وراي الحجية تسال شبيج وكرار صعد ياخذ سلاحه ويطلع ليلى الي حاضنه ابنها بيت بلحظة نكلب كلاب..

-البيت صار كله كزاز لان رميهم جان على الشبابيك والباب الخارجي كعدت وهو يفرك بيدي والحجية قرت على المي ونطتني اشرب منه وحسب كلامها لان نهبطتي..

-اندك الباب وعلي كام يشوف منو والحجية ما قبلت
تقدم يمها وهو يحجي وياها بهدوء.. ماكو شيء بعد روحي اطلع اشوف منو لا تخافين هاي اكيد الجيران يسألون علينا..

-طمنتها وطلعت للباب وتبعني كرار ومثل ما توقعت جانوا الجيران وجعفر وعمه يتسألون ويتطمنون عنه
ابو عمار ما قبل نبقى بالبيت.. يابه امشوا وياي اذا ما تخافون على ارواحكم خافوا على هالبنيات..

-مشكور ما تقصر حجينا..

-تقدمت على جعفر الي هو وعكازته وخطيه طالع على الصوت وجانت بالباب ورا لارا كسرت كلبي ببجيها دخلت ويا بوستها وطمنتها محد بينا صار عليه شيء وهي تباوع لايدي..

-وهذا الدم شنو علي وكف كلبي والله منو ذول شيردون من عدنا..

-زعاطيط الا ما ينعرف مبتغاهم..

-جيب امي والبنات هنا فدوه علي والله كلبي اشتعل عليكم فدوه لا تخلون بالي يمكم..

-الله كريم هسه فوتي منا زلم لج والله ماكو شيء عفتهن
بالبيت وكل شيء ماكو قبل لا اطلع وكفت على صوتها
اخذني وياك بس اشوفهن بعيني واطمن كلبي وتباوع على جعفر..

-رفعت حاجبي وهاي شنو تدورين موافقة هالساقط بوجودي امشي لبسي شيء وتعالي..

-بلا زحمه هالساقط يكولون رجلها ويمكن تاخذ موافقته يلا تطلع هيج شيء حجاها جعفر مستهزئ وضحك علي.. انجب لك اجه تالي وكت ويريد يمشي كلامه عليه..

-ضحكت عليهم وطبيت لبست صايه وطلعت ويا علي
الشارع مليان زلم وعلي محاوطني بيده دخلت للبيت وركض على امي من شفتها وشفت البنات بخير يلا
ارتاحيت بس نورا خطيه جان وجهه اصفر وكوه تحجي من الهبطه..

نورا.. لارا تطمنت ورجعت وشكد توسلوا بالولد يجون يمهم بس هالليلة بس هم رفضوا وتشكرو منهم كرار كال نبات بفندق ومن الصبح نطلع للبصرة اخليكم هناك ونرجع نشوف حل لهاي المشكلة..

-بقوا بالساعتين برا يم الجيران الي كلها طلعت تتسأل وتحمدوا على سلامتنا من رجع اباوع لايده كلها دم وشك جان قريب على الجف رحت جبت معقم وكطن واجيت اخذت ايده الي شكله غاسلها وبعدها بيها دم..

-عقمتها وهو صافن عليه لفيتها اله وبعده على صفنته شمضيع بوجهي؟!..

-تنهد وحجه دفعه وحده.. الف شكر الك يارب لو صاير عليج شيء عود يفيدني العشه هسه اني حجاها وحضني
ولا هو ولا اني مصدكين لهاي اللحظة لان كميه الرصاص والصوت الرهيب خلاني اتشاهد وكلت هذا هو راح اموت بمكاني..

-كمنا حضرنا نفسنا وخالة ما قبلت وحسب كلامها البيت ما ينعاف وشنو تالي وكت نروح فندق كوه قنعوها كرار وعلي الي جانوا خايفين علينا يلا كامت ويانا اخذنا المستمسكات وكم قطعة ملابس وقفلنه الباب وطلعنه البيت حالته تقهر مليان اثار رصاص والجام كله تكسر وخاله منا مقهورة وتتحسب على الي قلق عيشتنا بهاي الليلة..

-وصلنا لاقرب فندق وذبيت نفسي تعبت وقلق هاليوم هد حيلي ما عدا رجفه جسمي الي رجعتني النفس الرجفه الي بالمستشفى واجا على بالي ابو عيون البدوي الي حذرني ونفسه الي طلعنا اني وعلي منهم يا ترى وين صفى بيكم الوكت انت والجندي الي شفته هناك  والبنات وزمرد اخ يا زمرد شهكتها والي جرالها بقى جرح بكلبي لليوم..

-دخل علي الي جان برا يم كرار حايرين بسالفه الرمي وخاله كوه نامت كلبها يم ولدها ولارا الي كل شوي تتصل تطمن..

-عرفتوهم منو؟!..

-هز راسه بـ لا وسحبني لحضنه نامي ولا تفكرين ورانا طلعه من الفجر والباقي الله كريم..

-غفيت وفزيت بنص الليل واشوفه كاعد وصافن للصبح ما غمضت عينه وهالشيء دخل الرعب الكلبي اكيد صاير شيء ومصيبة جديدة..

-من الفجر طلعنا البيت خالهم الي تخبل من سمع بالي صار وما قبل الولد يرجعون الا ينعرف الموضوع شنو اصله ومنو هالجهة..

-العصريه دز عليه علي وطلعت ويا.. وين رايحين؟!..

-هنا بيت صاحبي نودي الامانه ونرجع..

-وصلنا المنطقة شبه ترابيه بيوتها قديمه وتعبانه اشبه
ببيوت التجاوز ودخلنا من بين الافرع وكف السيارة
ونزلنا مشينه شوي وكف كبال باب جان معلكين عليه
لافته وبيها صورة شاب ما يتجاوز عمره الخمسة وعشرين عام اسمر وابتسامته ابتسامه شهيد صورته جانت بالزي العكسري للح..شد الشعبي وبيده سلاحه
مكتوب بعباره البعض يشوفها نصر والقريب يشوفها
الم وفراق ووجع قلب رغم الفخر الشهيد جهاد حسين
ال.. تاريخ الاستشهاد 1/10 ..

-رفعت راسي عليه من سمعت تنهيدته المليانه قهر.. هذا صديقك مو؟!..

-جانت العبره خانكته وهو صافن على الصورة بس هز راسه شبعت قهر وعبالك اني عايزه حتى اضوك قهر جديد دكينا الباب وطلعت مره كلمه داكها الوكت قليله
بحقها الوجه اسمر متعوب وشيلتها الي ضامه بيها نص وجهه وملامحها تثبت هويتها هوية المراة العراقيه المتعوبة الي فاكده عزيزها.. هلا يمه..

-شلونها ام البطل شلونها ام صاحبي حجاها علي وباس راسها وهي حضنته وشبعت بجي حرفيا الموقف جان موجع بشكل دموعك تنزل غصب عنك..

-المن جاي يا يمه وصويحبك ماهو بالدار عمت عيني عليك جهاد يمه صحبانك متعنين ليك يا بعد روحي يا يمه شردن عليهم كوم اتلكه صحبانك يا نظر عيني..

-تنهد علي يمه جايب وياي امانه الحجي بالبيت..

-اي يمه بس اسويلك مجال انتظر راحت وشوي ورجعت دخلتنا للبيت دخل هو يم الحجي الي جان على كرسي متحرك واني رحت وراها بالغرفة استقبلوني بنات اثنين شابات وبيتهم يخنك الكل القهر وغياب جهاد ماثر عليهم وكعدت الحجيه تنعي تكسر الكلب والي فهمته هو المعيل الوحيد الهم البنات وحده صيدله وحده
تربيه وهذا بتشجع اخوهن الهن..

-التفتت عليها وهي تبجي.. جان حارم روحه ومخلصها شغل ماكو شغله ما فات بيها واشترالنا هالبيت وخله خواته كليات وتالي ما فرحنا بي ولا هو الي تهنى بشبابه حجتها ونزلت دموع البنات ودموعي الي متاسفة على حال شباب هالبلد من الفقر الد..اعش..

-سلمهم علي الامانه والي جانت قران صغير ورساله
مكتوبه بخط ابنهم حرز وفلوس داز لاهله الي استغربوا
منهن لان ما جان هو عنده راتب بس هو اصر عليهم
كالهم لا تحملوني ذنب هالوصية وهذا رقمي ما احلفكم
غير بغلاته بس اتصال واحد تلكوني يمكم ولو جنت بدوامي هذا رقم خالي الي راح يوصلكم كل شهر راتب
بهذا السعر وهالشيء مو منا هذا من جهاد..

-سلمنا وطلعنا والحجية دموعها ما وكفت وهي تدعي العلي طلعنا منهم وعيني ترجع بنظرها على البيت التعبان متاسفة على حال عوائل الي ضحوا بدمهم ورسموا النا طريق النجاة..

-رجعنا للبيت وجان خالهم وكرار والولد منتظرين
علي ومن وجوهم ماكو شيء يبشر بخير تقدم علي منهم
ودخلني جوه وقبل لا ادخل سمعت كرار يكله.. مات
بالسجن واهله محملينا الذنب والشر متربع براسهم..

زمرد..

-يومين مرت من التحاق ابو تراب الي اتصل علينا مره وحده بعدها نغلق جهازه البيت مو حلو بدونه بس الي مصبر عليه وحدتي عمه نبع الي لو شكد ما ادعي الها
قليل بحقها هالانسانه الطيبه..

-اليوم جان عندي موعد يم الدكتورة اخذتني عمه نبع
الي خليت علاوي عندها بالبداية كالت خلي نمر على زينب نخلي عندها بس اني ما قبلت مو قلة حرص من زينب بس ما اريد اسمع كلام من امها واختها وهم ما اريد اتعبها ابني يريد واحد يركض وراه وهي توها فرحت بحملها مو خلك هالشيء..

-دخلت وكالعادة بالبداية جان بينا حوار عادي الى ان توصلني النقطه تخليني بدون شعور احجي الي بداخلي
ومحور كلامنا اليوم جان عن سجونهم وعن الي تعرضنا اله بحيث من كدما الموضوع يوجع الكلب جنت احجي الها وهي تبجي وياي على الظلم الي شفناه
على ايدهم..

-مسحت دمعتها وتنهدت كملي وبعدين شصار..

-طلعوها من الغرفة سحل على طول الممر ودمها بطولها جانت صغيره بشكل تدمع العين اله شعرها متناثر على خدها واطرافه بيها دم جمدت بمكاني واني
اباوع عليها من شكلها وجسمها الي صاير اصفر صفحة من بطنها طالعه ومبينه منتهيه ما بين رجليها
نزف هواي وجسمها هزيل..

-من وعيت على نفسي صرخت بشكل هستيري من منظرها دخلت وهي تقاوم بيهم طلعت جثه ليش شنو ذنبها حسيت ايد اتخلت على حلكي وهو يهمس اش ولا كلمه راح تصخمين روحج لج بلا صوت راح اكسر راسج الجندي الي قريب علينا جانت عيونه صوبنا وصاح المخلص وهو يضحك وداخله ينزف..

-بطل ويهتف بتشجيع للقذر سحبني وهو يحجي وياهم
دفعني للغرفة وصاح بصوت مليان قهر على حالتنا وحاله البنت..

-لج انتي شنو غضب روحج ما تردينها شلون ويا لسانج مو والله راح تخليني اكص السانج هذا وارتاح..

-قرفصت ومنظرها ما يروح من بالي بجيت بخنكه
وروحي ذايبه.. الله لا يوفقكم لك بنت بلدك هاي ما هزتك غيرتك عليها ما كدرت تخلصها منهم لك طفله
شنو ذنبها اخ ياربي اغص بشهكتي ودموعي تصب من تصير كبال عيني بدمها..

-سد الباب وكعد بمستواي.. مربط بيجن وحك علي مربط يعني عبالج ما جاي نموت الف موته واحنا نشوف الانجاس وعمايلهم لج زمرد احنا بشغل ومخطط اله اقل غلطه يمكن واحدنا يجر اثنين تلاثه ويا بس السانج كصي وخليني اشوف شغلي لا تخليني مشغول بيج..

-وشنو شغلكم وفائدته وهي راحت مظلومه ودمها بطولها روح عليهم اكتلهم روح ذب..حهم مثلما ذب..حونا ودمرونا..

-وهي هيج سهله اروح عليهم انتي وغيرج منو يخلصهم الشغل الي مربط بي منو يسوي اسكتي ام لسان واكرمينا بسكوتج الخاطر الحمزة..

-سندت راسي على رجليه وسكتت وهو طلع بيومها تاخر يلا رجع ومن رجع جان يتلفت وحتى ضوا ما شعل جان يضوي بجداحة من تقرب فتحت عيوني مصدومه من شفت الشماغ مليان دم حتى ايده وجان
لاف شيء بي.. كمت على حيلي شنو هذا؟!..

-همس بصوت ناصي.. اش ولا صوت راح للحمام ورجع مغسل وحتى الشماغ ماكو ولا كانو صار شيء
ما عرفت شنو الي سواه بس هو كل فترة يرجع بهيج
حاله خصوصا بالفترة الاخيره قبل لا نطلع من هالمكان..

-ابتسمت بفخر هي.. هم زوج حضرتج وهم كل ابطالنا
فخر النا الي نزرع بنصهم وخاطر اعظم مخاطره والي
دمه سال على تراب الوطن والي على الساتر وكلبه ملهوف على اهله والحبيبه والي توه شاب وشاف روحه بين الحرب هذول رفعة راسنا..

-تنهدت واني اتذكر حالهم الي تحجي عنهم اغلب الي راحوا على ايد التنظيم غادروا هالدنيا براس مرفوع وما دنكوا راسهم لعدو.. شفتهم بعيني عذبوهم وما نزلوا راس الهم..

-الله يرحمهم حجتها وسكتت شوي وبعدها كملت.. شنو الي تخاف منه زمرد؟!.. لا تحجين هسه فكري زين بسؤالي وبعدها اريد الجواب..

-رديت بدون تفكير اخاف على ابني اخاف يوكف كلبي
اخاف افقد عقلي وهو شنو مصيره ومنو اله..

-جيد لنفرض وكعتي مرة ثانية بيدهم لنفرض رجعتي
لذيج الزنازين شنو راح يكون رد زمرد ويعني معقولة ما تخافين من هالشيء..

-لا تحجين هيج لا تحجين صحت بصوت راجف ومجرد فكرة انو اتخيل الوضع ما تحملتها ما اتحمل هيج موضوع حساس لدرجة ترجف اعظاء الجسم منه..

-هو هذا خوفج الاعظم هي هاي النقطة الي واكفه زمرد بيها على نفس الموقف ونفس الالم انتي بعدج هناك زمرد بعدج بطيات ذيج الايام وحوادثها طلعي المكتوم طلعي الي شفتي احجيلي مره ومرتين وعشره احجي بدون تردد خلي داخلج يتعود خلي عقلج يتقبل الي صار ونحاول نتجاوز لو جزء صغير منه..

-واذا اكلج اكو بنات بعدهم زمرد اكو بنات يعيشون نفس الواقع الاليم بكل يوم واليومنا هذا اسيرات قيودهم واحكامهم البعيدة عن الدين والانسانية بعدهن هناك
وانتي حاليا ما تفرقين عنهن بالتفكير جسدج يمي بس عقلج وفكرج هناك يمهن..

-اضغطي على جروحج بالمواجهه واجهي ذاتج وتقبلي الي صار مثلما تقبلتي هالطفل مو صعب هالشيء بس
عودي عقلج انو يتعود على الي صار وانتي جنتي ضحيه مو بيدج لا تظلمين نفسج اكثر بقوقعتج حول
نفس الحدث..

-فهمتي كلامي والي ردت اوصله الج لو اوضح اكثر؟!..

-فهمت دكتوره حجيتها وسكتت وجانت هاي نهاية
الجلسة الي لاول مره اطلع منها واني اريد افضفض بعد
طلعت منها واني بتفكير وتحدي جديد ويا نفسي وعلى
كولتها دوسي على جرحج زمرد قاومي زمرد طريق
صعب متعب بس ثمرته راحة الج ان شاء الله تاملت
خير بكلامها..

-رجعنا منها بتكسي اني وعمه نبع الي تباوع من الجامه على البنات الي جان لبسهم بناطير والي مطلعات نص شعرهم وتعض باصبعها جا شبي الحجاب طاير نصه العباية وين؟!..

-السايق ضحك ورد عليها.. خاله هذا النص بعده ما دخل الاسلام اصبري عليهن الظاهر الحجيه مو منا..

-يا يمه الحجاب والحشمة ستر للمرة بس العتب مو عليهن العتب على الزلم الي تطلع كبالهم هيج وقابلين
ما اريد احجي وتاخذ نظره عني همجيه بس يمه الدنيا
نكلبت كلاب جا هذا حجاب ونص الشعر طالع لو لبسها
الي يصيح لعيون الشباب يعاينون عليهن..

-انه لون عندي بنيه ما اطلعها هيج والعيون عليها يايمه والله اذيتها بهذا اللبس النفوس المريضه تفترسهن وساعتها ما يفيد ندم بس الحجي ضايع ويا هالاجيال..

-التفتت على الجامه واسمع الها كلامها هواي بي توعيه
بس الي يشوفه بتفكيرها عبالهم متشدده تنهدت لو شايفه
البنات الي افترسوهن هناك يا عمه جان شسويتي وانتي
كم شابه عيون الشباب على ضيق لبسهم احترك كلبج
عليهن..

-وصلنا للبيت وعمه رادت تدخل بس من سمعت بصوت شذى الي تصيح على ابنها اشرتلي فوك مو بنت حنضل ما ينجرع حتى بيت اخوي اكرهه من وراها..

-ابتسمت فعلا ما تنجرع صعدنا نومت علاوي بمكانه
جان غافي بحضن عمه نبع شغلت قران بالموبايل وقللت الصوت وخليته بعيد عن راسه بس يوصل اله صوت وعمه جانت تراقبني..

-طفي يمه دخيل القران لا الطفل يكعد..

-لا عمه ابوه علمه على هالشيء ما يكعد هو دائما يشغله يكلي خلي يتعلم راحته بالقران وهم نومته تصير مريحه وحتى يصير ذكي..

-بعد عمتك الله يحفظك لمريتك وابنك..

-طلعت وياها بالصاله وهي تحجي على شذى كعدت
يمها ومتردده اسأل احس مو من حقي بس الفضول الي بيه شلون بي..

-عمه هي شذى اخت ابو تراب وزينب من غير ام لو شنو مرات احسها مو بتهم من تتهجم عليهم..

-عضت اصبعها دليل على الندم.. اخ كل منه اخوي الله يغفرله مو عندك مره معدله وخلفه ترفع الراس ركضت وره هالشكول على شنو..

-زين هي ليش ما تحب احد حتى اخوانها تضيك خلكهم؟!..

-مو على امها يرادلها روحه للقاضي بعد هاي البنيه
على امها راضعه سم وخبث منها..

-هسه غير نفهم منو امها عمه مو شلعتي كلبي حجيتها
وهي ضحكت ما ينلام بيج من يكول ام لسان جايتج بالحجي انطيني صبر..

-اخوي جان ضابط بذاك الزمن وبفتره اشتغل بمنطقه
بعيده بغير محافظتنا شهر ورجع علينا وذيج الشابه ويا
الاحمر والاصفر والتنورة للسيقان منو هاي وجان يرد بحيل صدر.. مرتي..

-وجا ومرتك يخوي مو حرام تكسر بختها ما خفت عليها تركتها حامل وترجع عليها بضره وتعرف الضرة مرة؟!..

-ما عليهن شيء كل وحده بمكان شنو اول واحد ياخذ
اثنين..

-وهيج اخوي جابها البيته وكل وحده بغرفه وحبلت وره شهرين بشذى الي فرق سنه عن زينب وابو تراب اكبر منهن وزينب الصغيره شذى عمرها صار اربع سنوات
وجابت احمد واخوي طاير بيها صارت هي الاولى والاخيره وكلمتها المسموعة واخوي طوع امرها ما قصر على مرته وولده بس يميل الها اكثر والمشاكل
زادت لما البيت صار الها وهالحجي ابو تراب ياكل
بروحه جان طالب مدرسه وما بيده شيء..

-لما شبوا خلفته البيت صار الها وام ابو تراب اخذي
ابنج وبنتج وطلعي من البيت زعل بينهم سنين اخوي يدز ناس يريد وهي قفلت عندي ولد ما محتاجه رجال
بعد..

-زين عمه هو البيت المنو بالاصل؟!..

-لاخوي بس هي حيه والتفت عليه وطردت حتى عياله
سنين وخير ابوهم بس للحية وولدها..

-كافي تعبت كومي سويلنه لكمه هي جنها واني فتحت عيوني بوسعها عمه تحجين صدك اني وين وانتي وين
بس كملي واني اسويلج اكل فدوه كملي..

-مددت وهي تضحك.. كومي لا اخابر على ابو تراب
واكله ام السان مجموعتنا وحايره بالسوالف..

-كمت سويت اكل وهي تضحك عليه لان اصريت عليها ما تنام اريد اعرف البقيه وتالي غفت وتركتني
اني وفضولي..

لارا..

-يوم عن يوم الحمد لله بدا جعفر يتعافى بس رجله جانت تاذي خصوصا اول ايام جان يون منها واني ويا اسهر
حتى المسكنات ما تفيده بعد وعمو يكله جسمك تعود عليهن تحمل يابه..

-الي راد يسلبه ما نعرف منو رغم عمو زاد بحرصه
على الولد لان الي صار زرع خوف بداخله وكانو الدنيا صارت غابه والطمع عمى عيون الناس بحيث الكتل صار مباح وعادي عندهم علمود كم فلس..

-هو جان نايم واني اتامل بملامحه السمره وطرف حاجبه الي مطبور بسبب الحادث كلما يرتفع النفس اتنهد مرتاحه واشكر الله رجعه النا كلها تهون الجروح
الكسر الا الروح ما تهون..

-دك المنبهه وطفرت حضرت كلاص حليب وعلاجه
رجعت يمه وطرف شعري امشي على وجهه.. جعفوري حب حب الهندي الصاك اكعد كافي عاد والله مليت وحدي..

-فتح عينه منزعج.. انه نفر ما يفهم عربي خلي يرجع ينام رحمه للميت مال انت روح منا..

-هو حجه بهيج لهجه واني انتهيت من الضحك بحيث حسيت روحي تافهه من شفته صافن عليه مبتسم.. خرب يومك صرت صدك هندي صاك..

-كلما تكولين هيج احس روحي لابس سروال اعرض من الباس جدي مفلح والشعر ملطشه دهن كومي منا
حتى ما تعرفين تشبهين..

-دكوم اشرب هالحليب ومن بعده العلاج عفيه بالسبع
يلا يا امي خلصنا ما بقى شيء جنت احجي ويا بأسلوب
الاقناع ونسيت حالي عبالي بالمستشفى وكدامي مريض واني وحركاتي..

-فهه على وجهي.. هاي هيج تحجين ويا المرضى؟!..

-رفعت شعري بغرور.. لعد شلون الدكتورة لارا بعد
الاقناع عندي وبس تطب بسنون كامله تطلع ولا سن
والحمد لله بعد ماكو الم ولا تسوس..

-اشتعل ابوي وعشيرتي حضرت الدكتورة الي كلبي رهيف كبالها دوام بعد ماكو..

-تقربت عليه.. شنو عيني شنو طلكني جعفر هسه تطلكني والسهر والسادس الي ما ينجرع وتجي تكلي بطلي والله اخلي اخوتي يهدون عليك..

-شكد يحبج كلبي حجاها بهدوء بعثر دكات كلبي واخرس لساني الي جان بثوره ويلعلع باندفاع..

-سحبني عليه وخله راسي على كلبه اش خليني مرتاح
هيج ما اريد شيء بعد..

-ثاني يوم اجا ابوه الي بهاي الايام صار قريب منه هواي وجعفر ما كسر كلبه جان يستقبله لان لاول مره يلتمس قلق وخوف بعيون ابوه عليه..

-جان يجي محمل بالفواكه وحتى يجيبله اكل بس خاله ام عمار راسا تشيله وتذبه بالزبل ومن اكلها حرام
تكلي حرام لو رجلج يتمرض منه حرام من ينهجم بيتي
اني هالرجال ومرته ما طايقتهم..

-وصرت اخذ طريقتها اذبه اول ما يجيبه حتى بدون ما احجي شيء الجعفر..

-بدلت ونزلت اليوم دوام عندي خلصت اجازتي وبالي يم جعفر دخلت للاستقبال جان كاعد يكلب بالتلفون بسته
يلا رايحه علاجك لا تنساه واذا تحبني ما تخلي شيء بحلكك غير بس من طبخ خاله..

-باوعلي بشك.. شبيج انتي وين تردين توصلين منين جايبه هالسالفه ولاطشتلي بيها..

-شبيك هسه قابل شحجيت بس خاله اني موصيتها
تسويلك اكل صحي والاكل الي يجيبه عمر مليان دهن
مو زين عليك شدعوه ضجت فوك ما خايفه عليك..

-تعالي ام السان وراج شيء بس كل شيء حلو بوكته
يا حلوه كلبي ما تبطلين وتكعدين يمي..

-تاخرت حبيبي سحبني عليه والا اخذ بوسته يلا اطلق سراحي..

-داومت وبالي يمه لما رجعت يلا ارتاحيت جان هو نايم بدلت وساعدت خاله شوي لان كالت راح يجي ابوه اليوم من صدك ضجت ما ادري ليش كلبي ينقبض من
اشوفه ومن اسمع صوته..

-بالليل وره العشه جانوا عمو ابو عمار وعمار طالعين
وجعفر وابوه بالاستقبال عمو طلب جاي طلعت سويته
ومن رجعت الباب جان مفتوح شوي ما اعرف شلون سيطرت على الصينية وما وكعت واني اسمعه يحجي
بلكنه غادره ومليانه خبث..

-هسه شخبصتني بمرتك ما عليك مدللة وما عليها شيء
انت بس طاوعني واخذها ولا من احد شاف ولا من درى والبنيه حليوه وصغيره يبوي وعود لا تقصر قابل انت اول واحد ياخذله اثنين هي فترة وعود سوي الي تريده....

يتبع....

لا تنسون التصويت وتعليقاتكم الحلوه حبايبي..

رجاءا تفاعلكم ميسوي واهس يعني من تقرون دوسوا على النجمه وكم تعليق من كل وحده شنو راح تخسرون
تفاعلكم محلو والله واني اخجل بكل مره اكول تفاعلوا
ترى تعليقاتكم تسويلي واهس اكتب اسرع لهذا اريد
اشوف تفاعل حلو وقوي..

اللهم صل على محمد وال محمد❤️