المخلص "باللهجة العراقية "

البارت السابع عشر

المخلص..
البارت السابع عشر..
بقلمي رسل..
rasolaa7

انستا Rasolaa7

انتَ العزيز الما يجي
بَعدك عزيز..

-وصلنا البيت هو ما نزل التفت عليه.. دقايق جيبي
غراضج وتعالي كلمه ما اسمع بسرعه ام لسان لا تاخرينا ورانا طريق بالعجل..

-هزيت راسي ب اي يمكن هاي ال اي اسرع قرار اتخذته بحياتي بدون نقاش بس ما اندم عليه انا ما عندي احد اروح يمه الي مني وبيه اتخلوا عني وشردت من ضيمي والدنيا عصفت بيه واستكثرت عليه الراحة حاليا ما عندي غيره وهو اكثر شخص روحي تامن اله..

-ما عندي اي حل ثاني لان هنا بعد مستحيل ابقى على الموقف الحقير الي نخليت بي بسبب واحد شهواني
لا روحي الي تكدر تتحمل شوفتهم كل يوم ولا نسوانهم راح يسكتون بعد الي صار والروح مو حمل هموم بعد
ولا راح اخلص من كلامهم الجارح..

-جمعت غراضنا اني وعلاوي وسويت ممه يشربها بالطريق وعمه نبع يمي.. عمه لا تحجين شيء شيكول
ابو تراب كولي اي والله يا عمه ما يسد حلوكهم عنج غيره ابن اخوي واعرفه معدل ولو صرتي بسده تامنين..

-شلت علاوي ووكفت بست راسها وايدها.. صار اصلا
وين اروح ما عندي غيركم والله عمه ما ارتاحيت الا بيتج ولو اشكرج طول عمري ما اوفي حقج بس بعد الي
صار ما اكدر ابقى هنا ثكلت عليج وحتى يمكن صارت الج مشاكل ويا عيالج بسببي بس والله عمه مو بيدي..

-لا تحجين هيج هو ناقص غيره والله يا عمه انه الي
تعلمت عليج وعلى عليوي شلون افاركم..

-تشكرت منها وهي خطيه حتى بجي بجت ورانا باستني وشمت علاوي وطلعت وهي عينها ورانا واني
الدمعه تفتر بعيني مقهوره على حالي اي شخص اتعلق
بي جبرتني الحياة اتركه وهو بمكان واني بالثاني شوكت ارتاح ما ادري..

-صعدت ويا وهو جان يحجي بالتليفون التفتت عليه من بعدما كمل مكالمه.. وين هالمره؟!..

-هو حجه بلكنه جديه وبعيدا عن الشقه.. زمرد من واحد
يروح يخطب وحده لمنو يروح ويطلبها يعني حسب الاصول والي متعارف عليه؟!..

-من اهلها وعمامها..

-حلو حجاها ووكف السياره يعني تعرفين ام السان زين اني اليوم جاي عليج خطابه وبما انو انتي كل الي ذكرتيهم بنظري لا تصفنين اهلج ماكو اذاً ماكو واحد اخطب منه غيرج وما نريد نتفشل من وحده ام لسان ها شنو ردج؟!..

-تنهدت وعرفت تلميحاته التردد والخجل الي بيه اول مره هيج اخجل ومنه بالذات.. شلون خطبه هاي بلا..

-ام السان شو صفنتي جم مره كايلج الصفنه لابو صابر مو الج..

-ما كدرت ارد غير بس بدموعي والدموع صارت شهكات حتى علاوي شلته وانطيته اله انقهرت على حالي كلش ليش هيج حالي من دون العالم ليش العالم تستخطيني ليش من دونهم حتى بيت يلمني اني وابني ما عندي هو كلامه مفروض افرح بي اكو شخص راح اصير مسؤوله منه وراح يحميني من لسان هالعالم بس ليش كلبي محروك ليش كلما يسوي وياي زين احس روحي طفله يتيمه ويمسحون على راسها ويستعطفونها..

-بعد تفكير طويل مسحت دموعي وبصوت مبحوح
ومتعوب.. ليش خطبتني جاوبني وبساعتها راح تسمع
الرد؟!..

-هو ابتسم.. حتى اخليكم قريبين مني حتى يرتاح بالي
الي مشغول بيكم طول الوكت انتي عبالج مقهور عليج وكلما حجيت كلمه وكلتي لان مقهور عليه ومعتبرتها شفقه لا بابا اني رايدج بيمن احلف بعد
رايدج بس خليج قريبه مني والله ما رايد شيء بعد..

-رده ريح كلبي هواي وهزيت راسي ب اي هو صفن عليه وضحك هاي شنو هسه نعتبرها موافقه؟!..

-اي اصلا وين اروح اكثر شخص اثق بي هو انت..

-السيارة تمشي بينا وعقلي مزدحم بالافكار ما حجيت شيء بعد هو اعصابه رخت من بعدما جان معصب جنت بين فتره وفتره التفت عليه اريد اتاكد من كلامه وكل ما عيني تصد عليه جنت اشوف لمعه فرح ولهفه
بعيونه وهالشيء يخليني مرتاحه..

-نروح نعقد حتى تجين وياي للبيت؟!..

-رفعت راسي عليه وحتى الممه مالت علاوي وكعت من ايدي حجيت بخجل.. ما ادري بكيفك..

-من حجيت هيج هو ما رد بعد استمر يسوق وصلنا لكراج ذب السيارة ونزلنا شوارع ضيقه مليانه ناس ومحلات اغلبها محلات حلويات وحجابات اشترالي جادر صلاة وجواريب.. البسيهم ما يقبلون تدخلين للامام بهاي رجليج الي تجيب التايهه..

-كعدت على الرصيف وهو واكف سد الي لبست الجواريب ولبست الجادر ومشيت ويا وصلنا للتفتيش
خفت ادخل وحدي هو شرح الي من اطلع اشوفه وحدد المكان ودخلنا العالم هواي واني حاضنه علاوي وامشي
كملت تفتيش وطلعت وفعلا جان منتظرني..

-خلي نزور الامام وراها نعقد ابرك النا حجاها واخذ
علاوي مني خلي عندي انطيني مميته روحي زوري
واطلعي هنا تلكيني حتى اذا ما شفتيني لا تخافين ابقي
بمكانج يلا فوتي كبالي..

-مشيت شوي والتفتت ديربالك على علاوي..

-بعيني علاوي حجاها ودنك باسه..

-دخلت ازور ما جنت اندل منين دخلت ويا النسوان جانت اكو مره عجوز من سالتها هي اخذتني هي وبنتها
تعالي يمه تعالي اني ازورج..

-رحت وياهن وصار الامام كبالي خفت اتقدم جان ازدحام جانت الاصوات تقهر وغصب عنك تدمع عينك
الي تصيح.. احلفك بستر زينب لا تردني دكيت بابك
والي جانت تدعي لابنها والي تبجي وحجيها مو مفهوم
بس صافنه عليهم ودموعي تنزل كعدت بعتبه الباب الي
جانت شايله مثل الريشه ما قبلت لان طريق رفعت راسي الها.. الله يخليج والله اول مره اجي لهنا تعبت ما اكدر بعد بس خليني اكعد هنا..

-ليش انتي منين؟!..

-من الموصل حجيتها وبجيت من كلبي احس كل شيء
غريب عني حتى زمرد نفسها مو زمرد القديمه بين
زحمه كل هاي الناس اني وحدي..

-عافتني واني ما كدرت هذا حدي بقيت بمكاني دعيت
هواي من جنت اشوف النسوان شلون يبجن ابجي وياهم عبالك اريدلي حجه حتى افرغ همي الي ضاك صدري
بي واي هم جانت همومي هم اتعس من هم من الشوارع للسجون للتعذيب للاغ.... للولاده لبهذلتي لوحدتي..

-النسوان يباوعون عليه بقهر ويزورون ويروحون الي
تكول الله يبرد كلبج والي تكول ينطيج مرادج والي تدعي واني بغير عالم حتى الوقت ما ادري بي..

-مسحت دموعي وطلعت احس راسي مصدع وتعبانه
كون اغفى بس واكعد والكه الي مر كله حلم..

-جان هو شايل علاوي وواكف بنفس المكان ابتسمت واني اتقرب عليهم اكبر نعمه من الله الي هم شلون
اثنين بوجودهم مرتاحه اني..

-زيارة مقبولة..

-صفنت عليه شنو اجاوب الله يتقبلك قبل لا اجفص بيها
هو ضحك.. ها ام لسان ما تعرفين تردين مو؟!..

-اي والله..

-جعتي؟!..

-لا معدتي توجعني..

-شبيج ولج حتى وجهج اصفر..

-ما ادري معدتي حركتني..

-مد ايده عدل حجابي ومشيت ويا وهو كل شوي يباوع بوجهي بقلق كعدنا بمطعم ما كدرت اكل بس عصير شربت وطلعنا نعقد..

-السيد يحجي ويردد واني احس روحي اختنكت من كل
الجهات تحيطني الوحده بحيث اخاف منين ما التفت ما اشوف احد قريب الي لا اهل لا بيت خالي حتى اخت
واخ ما جان عندي وحدي والدنيا تكفخ بيه..

-عقدنا وطلعنا وجان العقد بصعوبه لان السيد هواي ضل يسأل بالبداية جان ما مصدكنه بس ابو تراب حجه ويا وحتى باجه وهويته شوفها اله يلا عقد النا..

-طلعت واني شعوري غريب بداخلي صراع بين الفرح والخوف فرحانه لان صار اكو من الي يحميني والوذ بسده وخايفه من ردة فعل امه بحيث حتى ما سألته عنها..

-ورجعنا للبيت الوقت جان متاخر وهلكنا تعب وكفت كبال بابهم وكلبي نقبض واني اتذكر كلماتها
لام تراب شلون راح ادخل وشلون راح تكون حياتي
يتقبلوني بينهم لو ابقى غريبه بنظرهم..

-صفن ابو صابر حجاها ودفعني خفيف يلا فوتي مريتي..

-ابتسمت ودخلت للبيت علاوي شايله ابو تراب واني وراه امشي بثكل احس رجليه كوه تعيني امشي ما عندي طاقه تتحمل اسمع بعد كلام وتعب الدنيا كله بيه..

-ودخلت هالبيت مرة ثانية بس بطريقه تختلف جان ابو تراب هالمرة زوجي مو مخلصي نظرات امه وخواته
تدل على عدم تقبلي بينهم ونظراتي جانت مره عليه
ومره عليهم موقف احرجني منهم والحيره الي بيها اني بس الله يعلم بيها واني منتظره القادم..

-يمه ما ترحبين بجنتج شلون يبقون بالباب دشيلي علاوي وشوفي هالوجه الحلو حجاها وقرب علاوي الها بلحضه انهاريت وركضت عليه من شفتها دفعت ايده.. وخر هالنغل مني..

-عيني انترست دموع عضيت شفتي بقوه مو وكت بجي
اخذته لحضني من ايده وبقهر باوعت عليها.. حرام عليج طفل شنو شذنبه هيج تحجين عليه انت ام وتعرفين
الكلمه على الابن شلون تاذي ترى الطفل ما يكدر يدافع
عن نفسه ويحجي بس حوبته الله ياخذها..

-هي عصبت والتفتت على ابنها.. هي هاي الي جايبها
وفرحان النوب تسمع لسانها الي اطول من لشتها لو هم
نعميت شبيه واشيل لو اربي طفل الانجاس..

-خاله هذا ابني مو ابنهم الله يخليج لا تحجين هيج هذا
اني الي اربي لا تحجين هيج عليه كافي علينا الظلم هناك لا تصيرون انتم هم ضدنا..

-هو جان وجهه محتقن.. يمه شنو حجينه شنو اتفقنا
شغير كلامج..

-لا حجينا ولاشيء ابن الي ما يتسمون ما اريده بيتي..

-خوش يمه خوش..

-امشي وياي اخذ ايدي يسحل بيه واني وراه مثل الورقه الاخيرة بفصل الخريف الي اقل هويه تجيبها منا وتوديها منا هيج حالي..

-طلعنا من بيتهم وبصف الباب جان باب صغير فتحه وجان اكو درج صعدنا للطابق الثاني دخلت وعيني تتجول بالمكان مليان تراب جربايه قديمه بي والبيت
جان مهجور..

-جان قبل لاختي والنسيب والله وفقهم واشتروا بيت هسه صار بيتج والي يغثج بكلمه ذاك الباب واطردي
والباقي عليه..

-جان يحجي واني اعصر بطني معدتي توجعني حيل
وتعبانه كعدت بتعب ما اندل الحمام ولا اكدر اصبر تقيات وهو ايده على ضهري يمسح.. شبيج اسم الله..

-وهو شايل علاوي نزل بخطوات سريعه روحي طلعت ومعدتي اشتعلت نار رجع وبيده بطل مي فتحه
ويصبلي غسلت وجهي ومددت اعصر بمعدتي والمها
يزيد هو صاح.. من القهر والحمس طبعا لج كافي ارحمي روحج احتركت معدتج..

-اريد ارد عليه هو مو يكول ام لسان بس حتى الساني
اختفى صوتي مبحوح وعيني على علاوي يبجي وهو
يهز بي اشرتله على الممه اخذها وكعد يشربه واني معدتي ماذيتني..

-اباوع للبيت وصخ ويحتاج شغل واني تعبانه بس رغم
التعب فرحانه معقوله صار عندي بيت راضيه بي صغير حتى لو جان غرفه بس المهم يلمني اني وابني
المهم اكو باب اسده واكعد..

-كمت غسلت بردانه واحس جسمي يرجف رجعت مددت ما اكدر احرك روحي وهو فوك راسي.. كومي اخذج لا تخربين عليه..

-ما اريد بس خلي انام بردانه بس غطيني..

-نوم علاوي بصفي ونزل وره شوي رجع وبيده فرش
وبطانيه وبطانيه صغيره فرش النا غطاني ونوم علاوي
وهو نام بالجهه الثانيه وعلاوي بنصنا..

-شبيج صافنه؟!..

-اشتاقيت لعمه نبع يوميه ما انام اذا ما تعلمني على شيء لو دعاء لو تحجيلي سالفه..

-كل الي يعرفها يحبها الا ولدها الكواويد عايفينها..

-هم وين يم ابوهم يعني؟!..

-لا وين ابوهم شبع مي ورد الله يرحمه..

-صار قريب عليه وايده وره شعري وعيونه عليه دفعت ايده ورجعت وره..

-هو انتبهه لنفسه دار وجهه ونام..

-الصبح كعدت ما شفته وعلاوي كاعد كمت سويتله ممه شربها ورجع نام واني كمت للبيت الي مليان تراب وكراتين فتحت باب السطح وطلعت كل الاشياء الزايده وحتى الوصخ احتاجيت ماسحه وسطل بس صعبه انزل غسلت ايدي ورجعت يم  علاوي دقايق ودخل المخلص.. ها شلون صرتي؟!..

-الحمد لله احسن..

-جان جايب ريوك وحتى جاي قوري كعدت كباله ناكل وهو عينه عليه..

-فرحان بيج ولج ام لسان سبحان الله شلون الدنيا صغيره شكد دورت عليج بكل واجب اكول راح اشوفها
ما دريت الله ضامج الي..

-اني بكل يوم اقرا الدعاء الي علمتني عليه ما مر موقف ما لهجت بي هالدعاء واسمك شكد تمنيت تخلصني منهم مرات اعتب عليك مرات انقهر وعبالي متت من بعدما شفتك بدمك بس الحمدلله الفضل لربي ومن بعده الك على نعمه هذا البيت وهالسكف الي ساترنا..

-صفن عليه وذب الخبزه من ايده.. شكد عينج شبعانه
وشكد الدنيا متعبتج شنو انتي لج تصفنين الواحد جنج
لغز محد حاله..

-ام لسان اني حجيتها وهو ضحك اي بهاي ما جذبتي..

-اكلك من تطلع جيبلنا ماسحه وسطل حباب التراب يخنك..

-خوش..

-كملنا ريوك وهو طلع وعلاوي كعد غسلتله جوه البوري خطيه خلي يرتاح طلعتله من جنطته ملابس خليتله بوطره ( بودره) جابتها اله عمه نبع شنو هالريحه حبيبي الحلو راح الوصخ ابوس خشمك اني يروح امك..

-صفنت عليه حبيبي منشنش على الحليب الجديد وصاير شحلاتك ولك ابو الوصخ صاير شحلاتك ولك شنو هالجمال شنو هالخدود ضحكت من اجاني صوته..

-اي عفيه ليزر بالمكان من ثول لهالحلك صل على
النبي..

-هلا بعمه نبع نمبر تو ترى ابني ابني ما احسده..

-هاج هاي الغراض راح اطلع اني مو الكاج بالشارع
هذا الباب سدي وراي..

-دكيت رجلي بالكاع بقهر.. طفله وكل شوي وكلت الكاج بالشارع..

-اتقرب عليه واني خنست.. وين اكو طفله هالكد
تغري ربي..

-دفعته روح لا تصير سرسري على كولت عمه نبع..

-طلع وهو يضحك واني ما صدكت شفت مي وسطل اول ما بلشت بالغرفة جان جايب زاهي هم ريحته تخبل لونه بنفسجي والثاني اصفر جلفت الغرفه وسحلت الجربايه ام نفر طلعتها ما اريدها عود من يجي يطلعها بالسطح..

-نشفت الغرفة شويه خليت علاوي ورجعت للصاله والحمام جلفتهن جلف ما مصدكه عندي بيت والله بحيث المكان ارجع عليه اكثر من مره لما هلكت طبيت سبحت
وطلعت البيت مابي لا اثاث ولا فراش بس حلو ومرتب
تعبت بي بشكل كم ساعه يلا خلصت تنضيف..

-اعزلني واصيرن جني وينها ام السان شهالنظافه يابه
حجاها واني طلعت على مصدر صوته اتقرب حضني
واني جسمي رجف عرك جسمي اختنكت ما احب هالمواقف لان ترجعني لذيج الساعه الي هدمت روحي دفعته هو همس باذني.. خليها ابالج حتى تتعودين عليه اني احب الحضن اطلع اطب هيج كون مثل هالحضنه..

-دفعته وابتعدت عنه اخذت المسواك للمطبخ جان متسوك كل شيء جنت ارتب بي واجه على عبالي اخويه شكد عشنا طفوله قاسيه الفاكهه جنه نتحسر عليها اكثر شيء ناكل عنب لان رخيص وخالو يجيب النا هواي واكو ايام بتنا بدون اكل اللحم يمكن بكل طفولتنا مرتين ضكنا خالي مو بخيل بس حالتنا جانت تعبانه يا دوب يدرب اكل يشبع بطونا..

-غسلت التفاحة واكلت وقريت الفاتحة لاخويه ودعيت للمخلص خو هالمخلص بيبيته ما تدعيله بكدي..

-تنهدت شكد انقهر عليه اشكد اشتاقله بس هو خلص من هالدنيا بعد تعب الله يحب اخويه وخلاه يرتاح..

-شبيها التفاحة منو رايح الها وتواسين بيها؟!..

-ابتسمت وتكول ام لسان هسه منو ابو لسان حتى التفاحة ما سلمت منك..

-مد ايده مسح دموعي كافي دموع علاوي يتعقد اذا شافج تبجين خلي احجيلج شيء يمكن انتي ما ملاحظته
بيج ويمكن ما تعرفين بروحج..

-زمرد من اليوم الي عرفتج بي بزنازينهم القذره بالغرفه الي جمعتنا ايام لما كل واحد صار بطريق ورجعنا التقينا ماكو ولا شفت مرة بهيج قوة هذا عقلي
فريتي شهالكلب والقوة الي شايلتها تدرين اتعجب من
اشوفج تبجين بعلي اقوى مره شفتها بحياتي انتي..

-شلون نضل بلا فراش شوف البيت فارغ..

-عض شفته كون هسه عضه لهالركبه هاي الا اعلمج
شلون يتفننون..

-شو انت ما استحي اني وين احجي وانت وين هو باوعلي صفح.. تعلمت منج ام الفراش البيت فارغ مو..

لارا..

-وره كم يوم واني  روحي مفرفحه  ابد ما متعلمه على جفى علي لليل ندك الباب وكالعادة  لا جاوبت ولا التفتت حسيت احد تقرب مني وخلى ايده على شعري رفعت راسي ودمعتي نزلت واحس روحي مصخنه
وتعبانه الي صار اثر على نفسيتي بشكل الي صار
حسيني شكد اني رخصت نفسي ونزلت راس اخويه
امام صديقه شنو موقفه واخته تراسل صديقه مهما كانت
نيه جعفر بس اني كسرت كلب علي بهذا الفعل..

-كافي بجي ليش كل هالدموع منو كالج اني زعلان منج اكو واحد يزعل من روحه بس ضجت من شفت الرسائل وهسه اتصرفي بعقل وسولفي كل شيء لارا انتي مو صغيره وهيج تسوين..

-مسحت دموعي وبديت اشهك واحجي حجيت كل شيء ال علي من البداية لنهاية السالفة كلها ما ضميت عليه
اي شيء ما اريده يضوج مني ولا ياخذ نظره عني..

-هو تنهد.. هاي عود انتي الطبيبة والفاهمة هيج تسوين ولج زين عوفينا احنا بلا انتي ما فكرتي بسمعتج وخصوصاً الجيران ما شاء الله ما يضمون سالفة يريدج هالكلب يجي يحجي ويانا مو بهيج طريقه لارا هالسوالف ترخص البنيه لو شكدما جانت غاليه احنا شباب ونعرف هالسوالف اغلبها ضحك وونسه..

-والله ما اعيدها بعد وهاي حتى مسحت كل شيء..

-كومي وياي وغسلي شوفي وجهج شصاير يخوفون بي الجهال يلا عاد كومي جوعان ما تعشيت منتظرج
وباعي اي واحد يسألج لا تسولفين هذا هو سدي الموضوع وهذا الطايح الحظ خلي عليه..

-طلعنه للصالة ونورا جابتلنه عشه باوعت على امي الي رجعتلها الابتسامة هي هاي امي ابد ما علمتنه لا نزعل من بعض ولا نشيل بكلوبنه بعدها كرار دخل وهو يباوع علينه هز ايده..

-الحمد لله ولج قشمرج بعشه وراضيتي بلا هاي لو اني هم تسوين هيچ..

علي.. وانت تقارن روحك بيه..

نورا.. التفت عليه كرار هذا رجلج فد واحد ملعب..

علي.. ها خير ابو جود حبيبي انت اصلا اني ما أقارن روحي بيك بس سد حلكك..

لارا.. عيني على اخواني ولمتهم وضحكهم والله مااريد شيء من الله غير بس يحفظهم الي هم وامي الي علمتنا على التفاهم وواحدنا يسمع من الثاني علمتنا محد يشيل
بكلبه على اخوه علمتنا الاخو حزام ظهر وما ينفعك غير اخوك..

-ثاتي يوم رجعت لدوامي جعفر بعد ما شفته ابد ولا حتى اخواني بالبيت يحجون بسيرته صح ضجت لان تعلمت احجي ويا بس ابد ما اعيدها بعد الا زعل علي
ما يهون عليه..

-الجمعة العصر اندك الباب وطلع علي يشوف منو دقيقه ورجع.. شيلوا الهوسه هاي خطار بالباب..

-دخلهم للاستقبال واني ونورا نباوع من وره البرده مال مطبخ ابتسمت وشردت بحب واني اشوف كل هاي الناس الي جايبهم جعفر التفتت على نورا.. شفتي؟!..

-ولج طلع صدك يحبج..

-عفتها ورجعت اباوع عليه علي يرحب بيهم وكرار ويا
وعيني على جعفر عبالك هندي صاك هو جعفر اسمر على كولته مستوي زايد مفحم وعيونه كبار وبيهن لمعه معانيه زينه يعني من الاخير عراقي اجلح املح حليو..

-دخلوا هم واني شردت للغرفه شو استحيت ما نزلت
الا بعدما صاحوني وجان كرار الي يريد موافقتي كوه كتله بكيفكم وعلي يرفع بحاجبه بكيفنه يعني..

-ضحك كرار ورجعوا يم الزلم الي ما قبلوا يطلعون اذا
ما يسمعون الموافقه..

-وبهيج انطيت موافقتي لتتغير حياتي
وافقت على رجال بنيت امالي بي
امل كاي انثى
رجل يكملني واكمله يعوضني حنان الاب وبالمقابل
اغمره بحنيتي حنيه انثى وجدت فارسها..

نورا..

-يوم عن يوم بديت ارتاح هنا حتى علي الي جنت بالبداية اخجل منه هسه تعلمت على وجوده وصار غيابه من يروح للدوام يضوجني لان مكانه موحش
بالبيت وحتى بالغرفه من اروح انام..

-كل ليله جنت ابجي واني اتذكر كل الي مر عليه ومن جهه غياب اهلي الي وجع كلبي كل يوم يزيد عليهم بس باخر فترة حتى نومي اختلف بعدما يسهر علي وياي الى ان اتعب وانام رغم احس بي ينعس رغم تعب دوامه بس جان يردد.. لا تفكرين هواي احجي وياي
لما تغفين..

-جان هو يسال واني اجاوب عن دوامي عن حياتي
قبل وحتى عن المستشفى الي جنت اشتغل بيها حجيتله..

-واجه على بالي موقف قبل كم يوم فزيت اشهك من الحلم عبالك مو حلم عبالك قبل ثواني جنت بحضنها
ليش شكعدت ليش اصرخ وحتى شعري كطعته هو
فز واجه وخر ايدي شكو شبيج شصار؟!..

-بجيت.. هسه جنت يمهم هسه جنت بحضنها ليش
عافتني ليش اخذتهم كلهم واني لا مو بتها اني ليش عافتني..

-اش حلم والله حلم كام فتح الضوا ورجع يمي مسح
دموعي وصفن على عيوني.. هاي كل واحد يبجي هيج
يصير حلو..

-منين حلوه هسه خشمي صار شكبره ابتسمت من بين
دموعي..

-رجعت للواقع بقهر وينك انت تعلمنا على وجودك وتغيب يارب لا تفجعني بعلي ما عندي كلب الي يتحمل
بعد صدمات..

-جان البيت بحالة انذار بسبب علي ثلاث اسابيع وهو ماكو جانت دنيا العصر اباوع على كرار خطية صار روتينه من يرجع من الدوام يروح يدور ويسأل عن علي ما خله لا مستشفيات ولا مكان ما سأل بي ويحجي النا عن جرحى وشهداء الحشد الي يجيبوهم للمستشفيات يكسرون الكلب كلهم شباب بعمر الورد الي يستشهد بلحضتها والي تنبتر ايده لو رجله والي تنطفي عينه
مثلما انطفت حياتنا بغياب علي..

-اجت ليلى انطته مي وهو شربه جنت اتمنى اساله عن علي بس حالته تشرح الوضع عبالك كبر خمسين سنه
بهالكم اسبوع..

كرار.. اني رايح ادعوله..

-هو طلع واحنا رجعنا ندعي ايامنا صارت فارغة اصعب شيء تنتظر خبر عن غائب والله موت بطيء لان تفكيرك بكل لحظة يبدي يصورلك سيناريوهات مرعبه او حزينة  وتبقى بحاله قلق..

-عفتهم بالصالة وطلعت للحديقة اول ما طلعت ضغطت على شفتي بقوه محاولة انو ما تنزل دمعتي من شفت مكانه خالي هذا اكثر مكان يرتاح بي هالمرجوحة والحديقه ما يفاركهم..

-رفعت راسي للسماء واني ادعي من ربي انو ما يخلي البيت من وجوده والله أضيع بدونه
اصلاً حياتي شنو معناها اذا علي مو بيها صحيح اني لليوم ما عبرتله عن مشاعري بس احساسي غير واني اشوفه احسه وطن الي من بعد الغربة وامان بوقت الي فقدت الامان والله من اشوفه يبتسم ابتسم تلقائيا وإذا حزين احس بالكآبة تغلغلت الأعماق روحي..

-وعيت من صفنتي على صوت الآذان هو يحجي واني ادعي ويا كلماته الي تشرح القلب بعدها دخلت ومديت سجادتي واني ادعي الحجية جانت منتهيه وكل شوي وكالت احمد ادعي لأبنك
مو يكولون الميت يعلم بشنو يصير بأهل بيته يلا ادعي لعلي حبيبك ماكو خبر عنه
خطية كسرت كلبي تحجي وتدعي وعبالك الحجي الله يرحمه كبالها بس محد يلومها الضنا غالي اغلى من الروح كعدت يمها واني اهدي بيها بهذه الليلة وبعد ما اتصل كرار وكال راح اشوف موقع بي المصابين من الحشد محد بينا غفت عينة وكل شوي نتصل بكرار بس هو ميجاوب وهالشيء شعل النار بكلوبنا القلقه..

يتبع....

لا تنسون التصويت وتعليقاتكم الحلوه حبايبي
وهاي بارت طويل فجروا بتفاعلكم..

شلون شفتوا بارت اليوم؟!..

القفله🥹🥺..

اللهم صل على محمد وال محمد❤️