رحمة عاطف

بارت6

البارت السادس

رواية...رحمة عاطف
نورا ناصر..نور سمو العراق
💔💔💔💔💔💔💔

نحن نشتهي الموت هربا من طعنات الحياة

...............................

رحمة بعد ايام كنت واكفة كبال الشباك بالغرفة مالة المستشفى الي بيها اني ، دخلت عليه سفانة ووياها الدكتور عاطف ...

تقربوا مني ...
اجت سفانة حضنتني وباستني شكد افرح من اشوفها بس فرحتي تبقى بداخلي اتمنى ابتسم بس ما اكدر ..

سفانة ؛ يلله رحمة امشي نروح ..
جاوبتها بارتباك وخايفة ؛ وين ووين تودوني ما اريد ارجع لهذاك المكان عفية ..

تقرب مني الدكتور كال ؛ رحمة لتخافين محد يكدر يأذيج بعد راح ناخذج للجملة العصبية انتِ محتاجة فحوصات..

جاوبته وعيونه بعيوني ؛ بس ما اريد ارجع للمستشفى ..

_ بس نخلص تحاليل وتتعافين اخذج لمكان احسن ..

ظليت اعصر باصابعي وجاوبته ؛ بس اهلي مايردوني وين اروح ؟

_ لا تشيلين هم الايام الجايه راح تكون احلى بالنسبة الج وعد مني ماشي ..

هزيت راسي بقبول....
يردون يطلعوني اشرت الهم على دفتر الرسم الي قضيت الايام الماضية كلها ارسم بي ..

راح عاطف واخذه ظل يقلب بصفحاته ورفع راسه باوعلي وكال هذا حصتي تسمحيلي اخذه واجيب الج غيره وهم تمليه رسمات رسمج كلش حلو.....

كنت مترددة بالقبول سكتت محتارة فكرت خايفة يتعرف على اسراري من خلال رسماتي ..

قطع افكاري صوته وهو يكول ؛ يلله عاد لاتصيرين بخيلة ...

خجلت ، دنكت وهزيت راسي بقبول ..

كال ؛ حبابة رحمة
وضحك ..

اخذوني وطلعنا من المشفى ودوني لمستشفى الجملة العصبية واخذولي تحاليل ومفراس كلها طلعت سليمة وانو اني مابيه شي ..

ضجت حييل شنو مابيه شئ ليش اني مابيه شئ حرامات كون مرض مميت اي شئ بس اني سليمه لا محبيتها...

جان الدكتور شوويه منطيني الامان وهادئ هووايه يضحك ومرات يكعد يسولف هووايه وياي ارتاح الكلامه...

لكن تصدمني الحقيقه وانضرب بقسوه اضل اكره حييل...

من يكعد ويايه عبالك يحجي ويه طفله كله يكول حبابه احن من بابا عليه...

بس جنت حيل حذره ما اوكع بفخه واكول لا اكثر كلام وياه لان هو دكتور نفساني واكيد يعرف حالتي

جنت اخاف افصح اله عن شعوري لكن اخاف احجي ويكول الاهلي ويقتلوني اخاف حيل...

جان يكول انتي مو مجنونه انتي حبابه...

اصرخ بوجهه واكوله مجنونه اني مجنونه وانت دكتور فاشل

لان لو مو فاشل جان اكتشفت اني مجنونه...

يرجع يصدمني ويكول...لا مو مجنونه لان ماكوو مجنون يقبل يكولون عليه مجنون

جان مراقب كل تحركاتي ودائما يكولي طلعي أصابعج من حلكج هاي حاله من التوتر لازم اقضي عليها...

جنت اضج المستشفئ بالصراخ من اشوف مجنونه تتقرب مني والممرضات عبالهن اجتني الحاله يزرقوني ابر مهدئه

عكسه هو ماينطيني ابره بس وقت الضروره ويكعد يهدئ بيه ويحجي وياي مثل طفل فاقد امه

وقبل فتره كسر كل الابر الي يضربوها الي وكلهم اي وحده تنطي ابره لرحمة حسابها عسير...

بس للاسف اني اديه انترست بقع ابر قديمه وجديده..

من هو موجود احس بالامان من يروح احس بخوف مو طبيعي رغم هو رجل واني عندي فوبيا من الرجال لكن هو غير...

وارجع واكول لا كلهم نفس الشئ حقراء...

طلع للبيت خلص دوامه واني ركضت الغرفتي سديتها وكعدت ...

جابو مساعدات ملابس ونعالات تكرمون وحجابات

كلهن شمرتهن مااريد البس منهم غير بالطوو ماما ما البس هو يحميني وستر اليه...

حضنت نفسي بالبالطوو وبجيت هسه الي بعمري ديدرسون وعايشين حياتهم لكن اني للاسف مكسوره وحضل مكسوره....

ولازم اعيش بدهاليز المستشفى....

.............................

باليل جنت بغرفتي...

فتحت موبايلي شفت رساله من الماسنجر اني جنت خاذفته رجعت فعلته...

فتحت الرساله لكيتها من حسن كاتب...اهلا وسهلا لا اني مو ممثل الاي قاعه بس خير محتاجه شئ

ابتسمت كتبت...اممم لا شكرا بس جنت اريد اخذ اخر محاضره وكالو عند ممثل الشعبه اني اعتذر فعلا

كتب...لا ماكو داعي...بس بلا زحمه انتي تعرفيني

كتبت...اهااا بصراحه لا مااعرفك بس همه بالقاعه انطوني حسابك وكالو راسلي ينطيج المحاضره

شويه واجاني الرد كاتب...انتي شسمج

جاوبته...ياسمين

رد...عاشت الاسامي اني اسمي حسن انتي بأي قسم

جاوبته...اجهزه طبيه بالبنايه الثانيه من جامعتكم

كال..اهلا وسهلا اتشرف

ضحكت كتبت...الي الشرف

ضلينه نسولف شووويه

كال...انتي حلووه

كتبت...اممم بصراحه اجنن يعني مو مبالغه بس بالجامعه هووايه اعترفولي واكثرهم فايخيين اخر واحد جان هماتين مسائي لابس قاط رباط اصفر يجنن وشكد نازك لازم جفيه برتقاليه...

ضحك كال...اوووف نازك مبين اي ليش مقبلتي

كتبت...اممم مااعرف رغم هو مبين زين وبيتهم بالشعب

كال...اليوم صار انفجار بالشعب بس لا مات المعجب

ضحكت وكتبت...يبووو جرحي كبير الطم علئ الرباط علئ الجفيه...فدووه مو تاخذ عليه نظره ودكول تجسح معجبين فدوه

رد بضحكه طوويله....ههههههههاي دخلي انهزم لا  تجسحيني....

كتبت...انتظر يمعود ونبي مااجسحك ...بصراحه اني حبيتك اشوف اسلوبك حلووو انت هيج ويه الكل...

رد...طبعا ويه الكل حتى اهلي يكولون هنيالنه عليك

ضحكت...الله يحفظك الهم يالله تصبح على خير إريد انام

جوابني...وانتي من اهل الخير

ضليت اضحك عليه والله اله انصب عليك ولعب بيك لعب رجعت اقره بالمحادثه...

مرة خمس دقايق واجت رساله منه كاتب...بلا زحمه اكدر اشوفج باجر بالجامعه...

كتبت..لا باجر اني اووف ان شاء لله غير مره

رد...ان شاء لله يالله مع السلامه...سوسة

ضحكت صار يدلع كتبت...مع السلامه اخوويه

بعد مارد عليه...

ضليت اتصفح تسالت اني ليش هيج سويت شنو الغايه اضحك علئ حسن يدزلي رصيد هههه

خليت وطلعت من الغرفه ويه ممشيت وانصدمت بي جان طالع من الحمام ولاف المنشفه علئ خصره...

من شفته انصدمت دفعته بسرعه واني اتذمر...عابت عابت متستحي مو عندك غرفه بالحمام ماسبحت بيها

هو باوعلي بحده كال...انكطع المي وبعدين شعندج كاعده لهسه ما تنامين جنج فزاعة خضره..

جريت نفس..انت شعندك كاعد روح نام باجر وراك صبحيه ويه تباوك

رفع حاجب كال..شمدريج بتبارك شنو تتنصتين عليه

ضحكت وهزيت ايدي..علئ شنوو امداني ترئ اخر همي انت يالله تصبح على تباوك

ضحك بااستهزاء كال..علئ الاقل حلووه وعندها مستقبل مو مثلج لا مستقبل لا شكل باجر عكبه تطلعين تقاعد وتصيرين جده...ولاده

تركته ورحت والله اذا مضحكت عليك وفلستك ما اطلع سفانا...

درت وجهي شفته دخل لغرفته رحت يم بيبي كعدت واني اتذكر محادثتنه واضحك...

........................

عاطف .. فتت للبيت وبيدي دفتر الرسم الي كان عند رحمة ، اخذته وصعدت فوك لغرفتي ..

مددت ع السرير وصرت اتأمل الرسومات رسمة ، رسمة ..
كلها رسومات مؤلمة وتبين معاناة بنية وحدة بس ، ايقنت انها رحمة مو غيرها ...

حسيت بالجوع ، خليت كراس الرسم ع الميز وكمت غيرت ملابسي ورحت للحمام غسلت ايديه ونزلت جوة ...

توجهت اريد اروح للمطبخ ، شفت امي وعمتي وداد كاعدات بالهول ، فتت سلمت عليهم وكعدت يمهم ..

_ شبيكم اشو عيونكم حمر ومبينين باجيين هواية وتعبانيين ؟

بيبي مجاوبتني خنكتها العبرة وظلت تبجي ..

جاوبتني عمتي ؛ حبيبي عاطف اليوم رحنه للمقبرة ذكرى سنوية عمتك ام رحمة سودة عليه يصادف اليوم واحنا متعودين كل سنة هيج يوم نروح نزورها وتعرف بعد لازم نبجي منكدر نلزم نفسنا ..

_ الله يرحمها ، اني جنت باوكرانيا من سمعت بيها ماتت ، اله صدك هيه شلون توفت ..

جاوبتني ؛ بعد عيني جانت بيها حالة نفسية واخذت زرنيخ وتسممت وماتت والله ياعاطف اني خايف على بنتها لاتسوي سوايتها وتقتل نفسها احنه هواي مقصرين ويا رحمة بس غير ابوها الكلب ونسوانه وكفن النه عظمة بالزردوم ومنعونا منها سودة عليه ..

عاطف ؛ ها بنتها سولفتلي عنها بيبي ....

_ اي رحمة سودة عليه هم حالتها حالة ومو صاحية مدري شبيها ..

رحمة رحمة !! هم اسمها رحمة !!

_ عمه اكو عندي مريضة بالمشفى اسمها رحمة بنية ناعمة ملامحها ناعمة واسم ابوها نجم اي نجم هيج شي ..

بيبي بصدمة : يا خاف هاي نفسها رحمة بنت عمتك بعد روحي اني رحت لبيتهم وكالت شمروها بمستشفى المجانيين ..
وكامت بيبي فتحت مجر بالبوفية وطلعت صورة وانطتها الي باوعتلها نفس ملامح رحمة بس هنا عمرها عشرة او ٩ سنوات ..

كتلها اي بيبي نفسها رحمة وانطيتها اسمها الكامل ..
انصدمت رحمة نفسها بنت عمتي بس اني كضيت اغلب وقتي ادرس بالخارج ومااعرف ابوها لذلك ماعرفته ولا عرفتها ..

كملت كلامي ويا عمتي ؛ لتخافين رحمة مابيها شي وسويت الها فحوصات طلعت كلها سليمة بس الي اريده منج تجين للمستشفى اشوفج فد اختبار زغير ..

_ اي اجي هسه اروح وياك اذا تريد ..
تحجي وتمسح دموعها ..

ضحكت لا وين تجين عمه اني هسه خلص دوامي وانتِ تعبانة خليها غير يوم اني انطيج خبر ..

تقربت مني بيبي وكالت ؛ يمه عاطف شلونها رحمة خو ما مثل امها وتنتحر ..

مكتلها على محاولة انتحارها حتى ما اشغل بالها ..
_ لا بيبي رحمة تختلف عن امها اكيد وان شاءالله بس تخلص علاجها اجيبها هنا يمنه ..

فرحت بيبي وملامحها استبشرت بالخير وظلت تمسح دموعها يبعد عيني صدك والله ؟ اخليها ببطن عيني وماخليها تروح لابوها ..

_ ابوها فد واحد ناقص غيرة هو الي شمرها ..

_ اي ماخذ اله بنية بكد بنته ومخليها تتحكم بي ..

بيبي ؛ كون ازين شواربه واخليهن بيده ..

والله اله اروح اهد عليهم والعن سلفه سلفاهم جاسميه ام السحوره تشمر رحمة بالمستشفئ عار علئ النسوان...الله لا يوفقها...

صدك شويه وبيبي لبست جواريبها وراحت هداده علئ بيت ابوها بس اني رفضت روحتها...

لان اذا راحت راح تفتح علينه ابواب الها اول ما الها تالي...

ناخذها ونطلعها وتعيش بنصنه وابوها يروح بستين داهيه...

ضلت بيبي تلطم وتدك علئ رحمه ومتخبله شلون داخله مستشفئ وكل شويه وكالت لو ما انت موجود شحال بنت بنتي...

صعدت لغرفتي اتصلت نيكول غلقته...

وضليت افكر وافكر...

كعدت علئ الحاسبه طلبت تقارير رحمه درستهن دراسه كليه...

جمعت كل تصرفاتها ايقنت ان وصلت لحالتها هو ادعاء الجنون...

اي رحمه مو مجنونه لكن تدعي الجنون وضامه سر وسر عميق .كبير...

اتصلت علئ عمتي وطلبت منها تصعد فوك شوويه وصعدت ضليت اسولف الها عن حالتها هي استغربت كلتلها هذا سر بينه رحمة مو جنونه تدعي الجنون

كالت...شلوون؟

جاوبتها...لان لو كانت مجنونه ما خافت من المريضات ولا فرقت بين الشرف اني كطبيب راح اختبرها بوجودج وشوفي الي راح يصير

اتفقت اني وياها علئ يوم راح ابين بي الها ان رحمه مو مجنونه...

وره يومين طلبت منهم يخلوها هل يومين بس لحتئ اكتشف شنو يدور ببالها...

ضليت اداوم وكل يوم اشوفها واتاملها وابتسم الدنيا صغيره ...مريضتي طلعت من لحمي ودمي...

وقررت اسوي الاحتبار...

.......................

كنت واكفه بعصبيه امام باب الغرفه واني رافضه الدخوول للغرفه لكن المسؤؤؤله جبرتني ادخل للغرفه

سحبتني بقووه وعاطت بصوت عالي...لج رحمه يامجنونه الدكتور طالبج ادخلي بسرعه

صحت بوجهه بعصبيه واني  عاقده حواجبي....ماادخل

المسؤؤله...ولج مسودنه ادخلي والله لو ما الدكتور موصي بيج اله اعرف شلووون اربيج يالخبله

كعدت علئ الارض واني اتربع ومعانده...والله ولا ادخل وانتي مخبله مو اني

سحبتني المسؤؤله بعنف وطيرتني من مكاني واخذتني الغرفة الدكتور بقووه واني اضرب بيها

فتحت الباب المسؤؤله ودفعتني بقووه داخل الغرفه ماتماسكت وتعثرت بخطواتي وكعت علئ الارض لكن وكفت بسرعه

الدكتور بعصبيه...فضيله لييييش هيج تدفعينها

مسؤؤلة القسم...دكتور خبلتني متقبل تجي

الدكتور رجع ضهره علئ الكرسي وبجمود...اطلعي بره

طلعت المسؤؤله وهي تسد الباب حيييل

جانت نضراته مثبته علئ الباب لكن انتقل بنظره عليه

اتمعن بنظراته عليه وهو يقيمني....

كنت لابسه بالطوو طوويل اسوود صاير املح من التراب وبجامه برتقاليه محكوك قماشه وبدي ابيض بي ورده صفره بالنص صايره جربه من الغسل ولابسه شال سمائي بي ورد وردي ونعال بنفسجي

شكلي يدل علئ زي المهرج بالوانها

وكف كدامي وما اعرف شنو  الناوي عليه

جان طووويل بالنسبه اليه ما اوصل الصدره رغم بعد المسافه بينه

تمعن بملامح وجههي الشاحب

جانت عيوني  مائله للخضار وهلات قووويه تحت عيوني وبياض وجهي مثل مصاصي الدماء شحووب قوووي بوجهي الصغير وشفايفهي متشققه ونظراتي احسها ميته  وحزينه

ركز بنظره عليه واني ايضا ثبتت نظراتي عليه وكأن واحد يتحدئ الثاني

همس الها...انزعي حجابج

فتحته بهدوء وهي اباوع اله بتحدي ونزعت الشال وشمرته كدام  رجليه

ابتسم ابتسامه جانبيه وهو يباوع عليه

شعري اشقر ولادي مثل الولد وقصير حيييل تنهدت من اتذكرت من قصوا شعري وشلون جنيت وضجيت المستشفئ بصراخي وماسكتت اله لمن انطوني ابره مهدئ

كانت مسافه بينه وبيني

تقرب خطوتين وهو ينزع سترته علئ النص

بلعت ريقي وتقربت خطوتين واني انزع البالطو علئ النص ضل معلق باذراعي

ابتسم وتقرب خطوه وهو ينزع الستره ويشمرها علئ الارض

رجفت منه لكن كملت تقربت خطوه وطلعت اديه من البالطوو وشمرته علئ الارض

رفع حاجب وهو ناوي يكمل البدايه فتح اول زرين من قميصه الابيض الانيق

باوعتله وفتحت اول زرين من تشيرتي الابيض الاجرب

صار قريب مني كووولش وهو يفتح ازرار قميصه

تنفست بخووف وضل صدري يصعد وينزل ورجعت خطووات كبيره مبتعده عننننه

ركضت علئ المكتب واني اصرررخ واعيط ومخلت شئ علئ المكتب ماضربته بي التفتت وراي واني ادور علئ شئ  اشمره عليه شمرت الختم والاوراق وسماعه الجهاز وموبايله واني اصرخ.....

تقرررب مني بسرعه وثبت ادي بيد وحده وحط ضهري علئ المكتب وايده الثانيه سد بيها حلكه وايده غطت نص وجهي

همس بااذاني وانب مرعوووبه...هدئ ماكوو شئ

فتحت عيوني مرعوبه ودموعي غرگت ايده وجانت صرخاتي مكتومه جوه ايده خايفه يلمسي خايفه يعتدي عليها اموت ولا يصير هيييج

همس الها مره ثانيه...اششش هدي هدي لاتخافين هذا مجرد اختبار وداعتج مجرد اختبار

حس بيه هدئت حررني من قيوده شويه شويه ابتعدت عنه وجهي صار احمممممر من كتم الحرقه داخل صدري وشرايين رقبتي احسها برزت من عصبيتي

اما هو ابتسم بثقه وزر ازرار قميصه ولبس جاكيته ولبسها البالطوو ابتعد عنها وهو يحط اديه بجيوبه وبهدوء تام....انتي ليش تدعييين الجنون؟

فتحت عيوني مصدومه من كلامه وهجمت عليه مثل القطه المفترسه وهي اضرب بي واخرمش بي واعييييط....اني مجنووووونه اني مجنووووونه

حس جرحت ايده لزمني بقووه وهو يلوي ايدي وره ضهري وقربني منه قرب شفايفه عند اذني وهمس ببرود....التفرق بين الشرف مو مجنونه رحمه يامضلومه ليش دافعتي عن شرفج اثبتي عدم جنونج يامجنونه

ضليت اصرررخ بعصبيه واضرب بي وارجع للوراء...مجنوووونه يااااااربي اني مجنووونه والله مجنونه

لزمني من خصري بحنيه وهو يثبتنب ويحجي ويايه بحنيه...انتي مو مجنونه انتي واقعيه اكثر محتاجه للحب والعطف والحنان انتي مو متصنعه انتي طفله

شافني ماهدئت من ثورتي وصوتي يجيب التايه دك جرس الانذار واجت الممرضه بسرعه حظرت اله الابره المهدئه وانطته اله

كعد علئ القنفه وثبتني بذراعه بين ذراعه وصدره تحت انضار الممرضه

لزمتني اله الممرضه واني اصرخ واعيط وارفس برجليه

اما هو رفع الابره وهو يحدد السيسي لزم ايدي النحيفه وسرفن كم البالطو مسح وريدي بلقطن وجس نبض الوريد وزرقه الابرره واني صررررررخت من الوجع

مرت دقائق مو طويله هدئت من ثورتي وعنفواني وفقدت وعي ورحت الغير عالم يمكن ارحم من عالمي

..........

باوعت علئ ايدها مليانه بقع ابر مهدئه قديمه وجديده بنفسجي وازرق واحمر

بعدها طلعت خالتها من الغرفه الداخليه التابعه للمكتب وهي تبكي علئ حال بنت اختها صح مثل مافهتها....هي تدعي الجنون بس ليش

همست...شفتي هي تدعي الجنون وضامه سر ولو ما كانت تدعي هذا الشئ ما فرقت بين الشرف..

تقربت منها وجرت نفس عميق كعدت مقابيلها ومسحت علئ شعرها القصير وباستها وهي تبجي بحرگه همست...الله يرحم امج شحالها من عذبوج

ضلت تبوس بيها وتعاتب اهلها ...

وصيت امها وديعة اختها المرحومه لمحد حفضها...

بعدها باوعتلي وضربتني علئ صدري ضحكت ولزمت ايدها كالت...ولك شلون هيج تسوي ببنت اختي والله والله لو ما شويه جان اجيت ودكلت المقص ببطنك

ضحكت كلتلها...متوحشه مثل بنت اختج..

ضحكت ومسحت دموعها كالت...عاطف ننقلها للبيت

كلتلها...لا مو هسه ان شاء لله اكتب الها خروج وتقرير صحي واطلعها...

ضلت كاعده يمها وتمسح بوجهها صار وقت انتهاء دوامي ورحمة لحد الان نايمه...

نقلتها لغرفتها ووصيت سفانا عليها وطلعنه اني وعمتي. وصلنه للبيت استقبلتنه بيبي كالت...هاا وين رحمه...

ضحكت وبستها براسها...سحبتها للاستقبال لكيتهم كلهم كاعدين وعارفين بالموضوع...

جان حميد ينفخ ومعاجبه الوضع...

وبيبي كل شويه وتسأل عن رحمه كلتلها خلال هل يومين اني اجيبها...

وكف حميد بعصبيه كال...ايي انوب لم علينه المخابيل والمتسولين والله والله اذا هاي البنيه داست باب بيتنه اله احرك البيت ما الها مكان بينه

نهاية البارت..يتبع

كونوا انتم كونوا بخير...احبكم

نورا ناصر...نور سمو العراق😘