#اسمعني_صوتك
بقلم روزايه
٧_______٨
# ﺍﻟﺒﺎﺭﺕ ﺍﻟﺴﺎﺑﻊ ...
# ﺍﺳﻤﻌﻨﻲ ﺻﻮﺗﻚ
# ﻟﻠﻜﺎﺗﺒﻪ ﺭﻭﺯﺍﻳﻪ ...
ﺃﻋﺬﺭﻭﻧﻲ ﻳﻌﺎﻟﻢ ﺁﻧﺔ ﻣﻮ ﻋﺮﻳﺎﻥ
ﻭﺃﻧﻔﻀﻬﻦ ﻧﻔﺾ ﻭﺃﻧﻬﺾ ﻭﻻ ﭼﻨﻲ
ﺁﻧﺔ ﺃﻟﺘﻤﻦ ﻋﻠﻴﺔ ﻣﺸﺘﺘﺎﺕ ﺍﻟﺒﺎﻝ
ﺧﺬﻥ ﺛﻠﺜﻴﻦ ﺣﻴﻠﻲ ﻭﺣﻴﻞ ﺭَﻛَﻨﻲ
....
ﻣﺴﻚ .....
ﻣﺎﺣﺴﻴﺖ ﻋﻠﻰ ﻧﻔﺴﻲ ﻏﻴﺮ ﻣﺸﻤﻮﺭﻩ ﺑﺎﻟﻜﺎﻉ ﻭﻣﻼﺑﺴﻲ ﻛﻠﻬﻪ ﺗﺮﺍﺏ ﻭﺑﺲ ﺍﻟﺘﺮﺍﺏ ﻋﻠﻰ ﺭﺍﺳﻲ ﻣﺎﺿﺮﺑﺘﻨﻲ ﺣﻴﻞ ﺑﺲ ﻋﻮﺭﺗﻨﻲ ﺑﺮﺟﻠﻲ ﺍﺟﻪ ﺍﻟﺮﺟﺎﻝ ﻳﺮﻛﺾ ﻋﻠﻴﻪ ﻭﻳﺼﻴﺢ ﺳﻼﻣﺎﺕ ﻋﻤﻲ ....
ﺭﻓﻌﺖ ﺭﺍﺳﻲ ﺷﻔﺖ ﺍﻟﺴﻴﺎﺭﻩ ﺳﻮﺩﻩ ﻣﻀﻠﻠﻪ ﻋﺮﻓﺘﻬﻪ ﻣﻦ ﺣﻤﺎﻳﻪ ﺍﺑﻮ ﺳﻬﻰ ﻛﻮﻩ ﺣﺮﻛﺖ ﺭﺟﻠﻲ ﻭﻋﺪﻟﺖ ﻣﻼﺑﺴﻲ ﺳﺎﻋﺪﻧﻲ ﺍﺑﻮ ﺍﻟﻤﺤﻞ ﻭﻫﻮ ﻳﺴﺐ ﻭﻳﺤﺠﻲ ﻋﻠﻴﻬﻢ ﺧﻄﻴﻪ ﺍﻧﻄﺎﻧﻲ ﺍﻟﺮﻗﻢ ﻣﺎﻝ ﺍﻟﺴﻴﺎﺭﻩ ﺑﺴﺮﻋﻪ ﺣﻔﻈﻪ ﻻﻥ ﻛﻠﺸﻲ ﺻﺎﺭ ﻛﺪﺍﻣﻪ ...
ﺗﺸﻜﺮﺕ ﻣﻨﻪ ﻭﻣﺸﻴﺖ ﻣﺜﻞ ﻣﺎﻳﻜﻮﻟﻮﻥ ﺣﺪﺓ ﺻﻮﺍﺏ ﺍﻣﺸﻲ ﺑﺼﻌﻮﺑﻪ ﺑﺲ ﺍﻻﻟﻢ ﻗﻠﻴﻞ ﻣﺎﻋﺒﺎﻟﻲ ﻣﻜﺴﻮﺭﻩ ﺭﺟﻠﻲ ﻛﻠﺖ ﻳﺠﻮﺯ ﺑﺲ ﺍﻟﺘﻮﺕ ....
ﺑﻴﻦ ﻣﺎ ﻭﺻﻠﺖ ﻟﻠﺒﻴﺖ ﺑﺎﻟﻒ ﺣﻴﻞ ﻭﻛﻌﺖ ﺑﺎﻟﺤﺪﻳﻘﻪ ﻛﻤﺖ ﺍﻣﻮﺕ ﻣﻦ ﺍﻻﻟﻢ ﺍﺣﺲ ﻧﺎﺭ ﻭﺍﺷﺘﻌﻠﺖ ﺑﺮﺟﻠﻲ ﻭﻣﻼﺑﺲ ﻛﻠﻬﻪ ﺗﺮﺍﺏ ﺻﺪﻙ ﺑﺠﻴﺖ ﻭﺑﺤﺮﻗﻪ ﻟﻴﺶ ﻫﻴﺞ ﺣﻈﻲ ﻣﻦ ﺩﻭﻥ ﺍﻟﺒﻨﺎﺕ .....
ﺭﻓﻌﺖ ﺭﺍﺳﻲ ﻟﺴﻤﺎ ﻭﺩﻣﻮﻋﻲ ﺗﺠﺮﻱ ﻓﺪﻭﺍﺗﻚ ﺭﺑﻲ ﻛﻞ ﻫﺬﺍ ﻭﺻﺎﺑﺮﻩ ﻭﺍﻛﻮﻝ ﺍﻟﺤﻤﺪﻟﻠﻪ ﺧﻠﻴﻨﻲ ﺍﺷﻮﻑ ﺧﻴﻂ ﺳﻌﺎﺩﻩ ﻭﻟﻮ ﻣﺮﻩ ﻭﺣﺪﻩ ﺑﺤﻴﺎﺗﻲ ...
ﺍﺟﺖ ﻣﻨﺎﻝ ﺷﺎﻓﺘﻨﻲ ﻛﺎﻋﺪﻩ ﺑﻠﺤﺪﻳﻘﻪ ﻭﺍﺑﺠﻲ ﻣﺎ ﺍﻛﺪﺭ ﺍﺣﺮﻙ ﺭﺟﻠﻲ ﺍﺑﺪ ﺍﺧﺬﻭﻧﻲ ﻟﻠﻤﺴﺘﺸﻔﻰ ﺳﻮﻭﻟﻲ ﺍﺷﻌﻪ ﻃﻠﻌﺖ ﻣﻜﺴﻮﺭﻩ ﺟﺒﺮﺗﻬﻪ ﻭﺭﺟﻌﺖ ﻟﻠﺒﻴﺖ ﻭﺍﻧﻲ ﺍﻓﻜﺮ ﺑﻬﺎﻱ ﺍﻟﺤﻘﻴﺮﻩ ﺷﻤﺴﻮﻳﺘﻠﻬﻪ ﺣﺘﻪ ﺍﺩﺯ ﺍﺟﻼﺏ ﺍﺑﻮﻫﻪ ﻳﺴﻮﻭﻥ ﻫﻴﺞ ﺑﻴﻪ ....
ﺟﺎﺳﻢ ﺭﺟﻊ ﻋﻠﻴﻪ ﻏﻠﻂ ﻭﻓﺸﺎﺭ ﻣﻨﻮ ﺳﻮﻩ ﻫﻴﺞ ﻭﺷﻠﻮﻥ ﻣﺎﺗﻌﺮﻓﻲ ﺣﺘﻪ ﻳﺎﺧﺬ ﺷﻜﻢ ﻓﻠﺲ ﺑﺮﺍﺱ ﻣﺴﻚ ﻳﺪﻭﺭ ﻓﺼﻮﻝ ﻭﺍﻧﻲ ﺍﺷﻜﺮ ﺭﺑﻲ ﻣﺎﻛﺘﻠﻮﻧﻲ ﺑﻤﻜﺎﻧﻲ ﻟﻮ ﻳﺨﻄﻔﻮﻧﻲ ..
ﺑﻴﻮﻣﻬﻪ ﻟﻠﺼﺒﺢ ﻣﺎﻧﻤﺖ ﻣﻦ ﺍﻻﻟﻢ ﻋﺒﺎﻟﻚ ﻣﺨﻠﻴﻬﻪ ﺑﺘﻨﻮﺭ ﻭﻳﻠﻬﺐ ﺍﻟﺴﻌﻴﺮ ﻳﻮﺻﻞ ﻟﻜﻠﺒﻲ ﻭﻣﻨﺎ ﻋﻨﺪﻱ ﺍﻣﺘﺤﺎﻥ ﻭﺍﻟﺠﻮ ﺣﺎﺭ ﺻﺪﻙ ﻭﺿﻌﻲ ﻛﺴﻴﻒ ...
ﻛﻌﺪﺕ ﺑﺠﻴﺖ ﻋﻠﻰ ﺣﻀﻲ ﺍﻟﻤﺸﺎﻛﻞ ﻃﺎﻳﺮﻩ ﻭﺭﺍﻱ ﻣﺎ ﺍﺧﻠﺺ ﻣﻨﻬﻪ ﻳﻮﻣﻴﻪ ﺍﻭﻛﻊ ﺑﻮﺣﺪﻩ ﺍﻛﺒﺮ ﻓﻜﺮﺕ ﺍﺭﻭﺡ ﺍﺷﺘﻜﻲ ﻋﻠﻴﻬﻢ ﻭﺳﺎﻋﻪ ﺍﻛﻮﻝ ﺍﻭﺻﻞ ﺧﺒﺮ ﻟﺒﻴﺖ ﺟﺪﻫﻪ ﻃﻜﺖ ﺭﻭﺣﻲ ﻣﻦ ﺍﻟﺘﻔﻜﻴﺮ ....
ﺛﺎﻧﻲ ﻳﻮﻡ ﺿﻐﻄﺖ ﻛﻮﻩ ﻋﻠﻰ ﻧﻔﺴﻲ ﻭﺭﺣﺖ ﻟﻼﻣﺘﺤﺎﻥ ﺍﻛﻮ ﻭﺣﺪﻩ ﻭﻳﺎﻳﻪ ﺑﻠﺨﻂ ﺳﺎﻋﺪﺗﻨﻲ ﺑﺎﻟﻤﺸﻲ ﻻﻥ ﻋﻜﺎﺯﺍﺕ ﻣﺎﻋﻨﺪﻱ ....
ﺧﻄﻴﻪ ﺍﻟﺒﻨﺎﺕ ﺍﺧﺬﻧﻲ ﻟﻠﻘﺎﻋﻪ ﻭﻫﻦ ﺍﺻﻼ ﻣﻦ ﻏﻴﺮ ﻗﺴﻢ ﻣﺴﺘﻨﺪﻩ ﻋﻠﻰ ﺍﺛﻨﻴﻦ ﻭﺣﺪﻩ ﻣﻨﺎ ﻭﺣﺪﻩ ﻣﻨﺎ ﺑﺲ ﺍﺧﻠﺺ ﺍﻣﺘﺤﺎﻥ ﺍﻃﻠﻊ ﻻﻥ ﻣﺎ ﺍﺭﻳﺪ ﺍﺿﻞ ﺩﻭﺭ ﺛﺎﻧﻲ ﺍﺭﻳﺪ ﺍﺣﺎﻓﻆ ﻋﻠﻰ ﺍﻟﺘﺴﻠﺴﻞ ﻣﺎﻟﺘﻲ ....
ﺩﺧﻠﺖ ﻭﺍﻟﻄﻼﺏ ﺻﺎﻓﻨﻪ ﻋﻠﻴﻪ ﺷﻠﻮﻥ ﺷﻜﻮﻝ ﺯﻓﺮﻩ ﺑﺎﻟﺠﺬﺏ ﻣﺎ ﻭﺍﺣﺪ ﻛﺎﻝ ﺍﻟﺤﻤﺪﻟﻠﻪ ﻉ ﺳﻼﻣﺘﺞ ﺩﺍﻗﺘﻬﻢ ﻣﺴﻚ ﻻﻥ ﻛﻞ ﺳﻨﻪ ﺍﻻﻭﻟﻰ ....
ﻛﻌﺪﺕ ﻋﻠﻰ ﺍﻟﻤﺼﻄﺒﻪ ﻭﺍﺑﺎﻭﻉ ﺑﺎﻟﻮﺟﻮﻩ ﺑﻠﻜﻲ ﺍﺷﻮﻑ ﺻﺪﻳﻘﺎﺗﻲ ﺍﺟﺖ ﻋﻴﻨﻲ ﺑﻌﻴﻦ ﺑﻴﺴﺎﻥ ...
ﺍﻭﻝ ﻣﺎﺷﺎﻓﺘﻨﻲ ﺍﺟﺘﻲ ﺗﺮﻛﺾ ﻣﺎ ﺍﻋﺮﻑ ﻫﺎﻱ ﺍﻟﺒﻨﻴﻪ ﻟﻴﺶ ﺍﺣﺒﻬﻪ ﺭﻏﻢ ﺻﺎﺭﻟﻲ ﺷﻜﺪ ﺍﺩﺍﻭﻡ ﺑﺲ ﻣﺎﻋﻨﺪﻱ ﺻﺪﻳﻘﻪ ﻣﻘﺮﺑﻪ ﺍﻟﻜﻞ ﺍﺻﺪﻗﺎﺋﻲ ﺍﻻ ﻫﻲ ﺍﺳﻮﻟﻔﻠﻬﻪ ﻛﻮﻟﺸﻲ ﺑﺪﻭﻥ ﺗﺮﺩﺩ .....
ﺑﻴﺴﺎﻥ ... ﻣﺴﻚ ﺷﺼﺎﻳﺮ ﺳﻼﻣﺘﺞ ﺍﻟﺒﺎﺭﺣﻪ ﻣﺎﺑﻴﺞ ﺷﻲ ...
ﻣﺴﻚ ... ﻣﻦ ﻧﺰﻟﺘﻮﻧﻲ ﺍﺟﺖ ﺳﻴﺎﺭﻩ ﺿﺮﺑﺘﻨﻲ
... ﺷﻨﻮ ﻫﺎﻱ ﻳﻮﻣﻴﻪ ﻭﺍﻛﻌﻪ ﺑﻤﺸﻜﻠﻪ ﻳﺎﻗﻠﺒﻲ
ﻳﺴﻠﻢ ﻗﻠﺒﺞ ﺍﻟﻔﺎﻫﻲ ﻛﻮﻣﻲ ﺍﺧﺬﻳﻨﻲ ﻟﻠﻘﺎﻋﻪ ﺍﺳﺘﺤﻲ ﺍﻣﺸﻲ ﻛﺪﺍﻡ ﺍﻟﻄﻼﺏ ....
ﺍﺧﺬﺗﻨﻲ ﺑﻴﺴﺎﻥ ﻭﺍﻧﻲ ﺍﻣﺸﻲ ﺷﻔﺖ ﺍﻟﺸﻤﺎﺗﻪ ﺑﻌﻴﻦ ﺳﻬﻰ ﻭﻛﺄﻧﻮ ﺗﻨﻄﻴﻨﻲ ﺍﺷﺎﺭﻩ ﻋﻮﺩ ﺍﻧﻲ ﺍﻟﻲ ﺳﻮﻳﺖ ﻫﻴﺞ ﺍﺗﺠﺎﻫﻠﺘﻬﻪ ﻻﻥ ﻣﺎﻋﻨﺪﻱ ﻗﻮﻩ ﺍﻛﻮﻣﻠﻬﻪ ﻭﺍﺗﻌﺎﺭﻙ ﻭﺍﻧﻲ ﺣﺎﻟﻴﺎ ﺑﺪﻓﻌﻪ ﻭﺣﺪﻩ ﺍﻭﻛﻊ ﺑﺎﻟﻜﺎﻉ .....
ﻛﻤﻠﺖ ﺍﻣﺘﺤﺎﻥ ﻭﻃﻠﻌﺖ ﺍﻧﺘﻈﺮ ﺑﻴﺴﺎﻥ ﺷﻔﺖ ﺳﻬﻰ ﺍﺟﺖ ﺑﺎﺗﺠﺎﻫﻲ ﺻﺪﻓﻪ ﺟﻨﺖ ﻛﺎﻋﺪﻩ ﻭﺣﺪﻱ ﺍﻟﻘﺎﻋﺎﺕ ﺑﻌﺪﻫﻪ ﻣﺎﻃﺎﻟﻌﻪ ﻭﺍﻟﻤﻤﺮ ﻓﺎﺭﻍ ﺗﻘﺮﺑﺖ ﻋﻠﻴﻪ ﺑﺪﺕ ﺗﺤﺠﻲ ﻭﺗﻬﺪﺩ ....
ﺳﻬﻰ ... ﺷﻔﺘﻲ ﺳﺖ ﻣﺴﻚ ﻛﻠﺖ ﻻﺗﻨﻄﺨﻴﻦ ﺑﻴﻪ ﺗﺮﻯ ﺍﺩﻣﺮﺝ ﻫﺎﻱ ﻛﺮﺻﻪ ﺍﺫﻥ ﺻﻐﻴﺮﻩ ﺍﻟﻤﺮﻩ ﺍﻟﺜﺎﻧﻴﻪ ﺍﺧﻠﻴﺞ ﻣﻌﻮﻗﻪ ﻭﺑﺎﻟﻤﻨﺎﺳﺒﻪ ﺭﺩﺕ ﺍﺧﻠﻴﺞ ﻃﻮﻝ ﻋﻤﺮﺝ ﺗﻌﺎﻧﻴﻦ ﺑﺲ ﺧﻄﻴﻪ ﺧﺎﻑ ﻳﺬﺑﺤﺞ ﺟﺎﺳﻢ ....
ﻣﺴﻚ ... ﺳﻬﻰ ﺍﻟﺬﺑﺎﻧﻪ ﺗﺮﻭﺣﻴﻦ ﻣﻨﺎ ﻻ ﺍﻛﺴﺮ ﻫﺎﻱ ﺍﻟﺼﺒﻪ ﻣﺎﻝ ﺭﺟﻠﻲ ﻋﻠﻰ ﺭﺍﺳﺞ ﻭﺭﺍﺱ ﺍﺑﻮﺝ ...
... ﻭﺍﻟﻠﻪ ﺍﺫﺍ ﻣﺎﺩﻓﻌﺘﺞ ﺍﻟﺜﻤﻦ ﻏﺎﻟﻲ ﻭﻣﺎ ﺍﺧﻠﻴﻠﺞ ﻋﻴﻦ ﺗﺤﺠﻲ ﻣﺎ ﺍﻛﻮﻥ ﺳﻬﻰ ﺍﻧﺘﻲ ﺟﺒﺘﻴﻬﻪ ﻟﻨﻔﺴﺞ ﺷﻠﻮﻥ ﺗﻨﻄﺨﻴﻦ ﺑﻴﻪ ....
.... ﺍﻣﺸﻲ ﻭﻟﺞ ﻻﺗﺨﻮﻓﻴﻨﻲ ﺑﺤﻤﺎﻳﻪ ﺍﺑﻮﺝ ﻭﻋﺒﺎﻟﺞ ﺧﻔﺖ ﻣﻦ ﺳﻮﻳﺘﻲ ﻫﻴﺞ ﻭﺍﻟﻠﻪ ﻟﻮ ﻣﺎﺭﺟﻠﻲ ﺟﺎﻥ ﻫﺴﻪ ﻣﺴﺤﺖ ﺑﻴﺞ ﺍﻟﻜﺎﻉ ....
... ﺍﻧﺸﻮﻑ ﻳﺎﻣﺴﻚ ﺍﻧﻲ ﻟﻮ ﺍﻧﺘﻲ ﻭﻫﺬﺍ ﺧﺸﻤﺞ ﺍﻻ ﺍﻛﺴﺮﻩ ﺍﻋﻠﻤﺞ ﻣﻨﻮ ﺳﻬﻰ ﻋﻮﺩ ﻫﺬﻳﺞ ﺍﻟﺴﺎﻋﻪ ﺗﻌﺎﻟﻲ ﺍﺗﻮﺳﻠﻲ ﺍﺩﻭﺭﻳﻦ ﺳﺘﺮ .. ...
... ﺍﻋﻠﻰ ﻣﺎﺑﺨﻴﻠﺞ ﺍﺭﻛﺒﻲ ﺍﻣﺸﻲ ﻭﻟﻲ ﻣﻦ ﻭﺟﻬﻲ ﺍﻡ ﺍﻟﺴﺘﺮ ﺑﻼﻭﻝ ﺍﺳﺘﺮﻱ ﺭﻭﺣﺞ ﻳﻠﻪ ﻭﻟﻮ ﻣﺎﻋﻠﻴﺞ ﻋﺘﺐ ﻣﺪﺍﻣﺞ ﻋﺎﻳﺸﻪ ﺑﻠﺤﺮﺍﻡ ....
ﻋﺎﻓﺘﻨﻲ ﻭﺭﺍﺣﺖ ﺑﺲ ﻣﺎ ﺍﻧﻜﺮ ﺧﻔﺖ ﻣﻦ ﺗﻬﺪﻳﺪﻫﻪ ﻭﻓﻜﺮﺕ ﺍﺭﻭﺡ ﺍﻧﻄﻲ ﺭﻗﻢ ﺍﻟﺴﻴﺎﺭﻩ ﻭﺍﺑﻠﻎ ﻋﻨﻬﻪ ﺑﺲ ﺩﺏ ﺍﻟﺨﻮﻑ ﺑﺪﺍﺧﻠﻲ ﺧﺎﻑ ﻳﺨﻄﻔﻮﻧﻲ ﻟﻮ ﻳﺴﻮﻭﻟﻲ ﺷﻲ ﻻﻥ ﻫﺬﻭﻟﻪ ﻋﺪﻫﻢ ﻋﺎﺩﻱ .....
ﺿﻠﻴﺖ ﻛﺎﻋﺪﻩ ﻭﺍﻓﻜﺮ ﺷﻠﻮﻥ ﺍﺫﺍ ﺗﻌﺮﺿﻮﻟﻲ ﻣﺮﻩ ﺛﺎﻧﻴﻪ ﻭﻣﺎﻋﻨﺪﻱ ﺿﻬﺮ ﺍﺣﺘﻤﻲ ﺑﻲ ﻧﺒﻬﻨﻲ ﺻﻮﺕ ﻏﺼﻮﻥ ...
ﻏﺼﻮﻥ .. ﻣﺴﻮﻛﻪ ﺳﻼﻣﺎﺕ ﺑﺎﻻﻣﺘﺤﺎﻥ ﻭﺷﻔﺘﺠﻦ ﻣﺎﻛﺪﺭﺕ ﺍﺣﺎﺟﻴﺞ ﻻﻥ ﺍﺟﻴﺖ ﻣﺘﺄﺧﺮﻩ ﻻ ﺩﻛﻮﻟﻴﻦ ﺟﺎﺳﻢ ﺳﻮﻩ ﻫﻴﺞ ...
ﻣﺴﻚ ... ﻻ ﺳﻴﺎﺭﻩ ﻣﻀﻠﻠﻪ ﺿﺮﺑﺘﻨﻲ ﻭﺭﺍﺣﺖ ﺑﺲ ﺍﻋﺘﻘﺪ ﻣﻦ ﺣﻤﺎﻳﻪ ﺍﺑﻮ ﺳﻬﻰ ...
... ﻋﺰﺍﺍﺍ ﻭﺍﻟﻠﻪ ﻋﺮﻓﺘﻬﻪ ﻣﺎﺭﺍﺡ ﺗﻔﻮﺗﻬﻪ ﺍﻟﺞ ...
... ﻟﻴﺶ .
... ﻣﻦ ﺟﺎﻱ ﻋﻤﻬﻪ ﻫﻨﺎ ﺭﺍﺟﻊ ﻣﻄﻴﺢ ﺣﻀﻬﻪ ﺣﺘﻪ ﺭﺍﻳﺪ ﻳﺒﻄﻠﻬﻪ ﻭﻣﺘﻌﺎﺭﻙ ﻭﻳﻪ ﺍﺑﻮﻫﻪ ﻭﺍﻟﺤﺠﻴﻪ ﻣﻄﺮﺩﻩ ﺍﺑﻮ ﺳﻬﻰ ﻛﺎﻳﻠﺘﻠﻪ ﺑﺲ ﺍﻟﻤﺴﺒﻪ ﻣﺤﺼﻠﻴﻦ ﻣﻦ ﻋﻨﺪﻙ ﺍﻧﺖ ﻭﺑﻨﺘﻚ ﺍﻧﻮﺑﻪ ﺭﺣﺘﻮﺍ ﻋﻠﻰ ﺍﻟﻔﻘﻴﺮ ....
... ﺷﻨﻮ ﻣﻦ ﻋﺎﺋﻠﻪ ﻣﺎﻋﺪﻫﻢ ﻣﺨﺎﻓﻪ ﺍﻟﻠﻪ ﻭﺣﺘﻪ ﻋﻤﻬﻪ ﻛﺎﻝ ﺑﻌﺪ ﻣﺎﺗﺘﻌﺮﺿﻠﺞ ﻭﻳﻨﻪ ﻫﺴﻪ ﻳﺪﺭﻱ ﺑﺤﻤﺎﻳﻪ ﺍﺧﻮﻭﻭ ﻫﻴﺞ ﺳﻮﻭ ﺑﻴﻪ ...
... ﻭﺍﻟﻠﻪ ﻟﻮ ﻣﻨﺞ ﺍﻭﺻﻞ ﺧﺒﺮ ﺍﻟﻪ ﻭﺍﺧﻠﻲ ﻳﻮﻛﻔﻬﻪ ﻋﻨﺪ ﺣﺪﻫﻪ ﻻﻥ ﺧﻄﺮﻩ ﺳﻬﻰ ...
... ﻳﻤﻌﻮﺩﻩ ﻛﻮﻟﺸﻲ ﻣﻴﺴﻮﻱ ﻧﻔﺲ ﺍﻟﺸﻲ ﺗﺎﺧﺬﻟﻬﻪ ﺷﻬﺮ ﺳﺎﻛﺘﻪ ﻭﺗﺮﺟﻊ ﺍﻛﻮﻟﺞ ﻣﺎﺷﻔﺘﻲ ﺑﻴﺴﺎﻥ ﺷﻮ ﺗﺄﺧﺮﺕ ....
... ﺍﻱ ﻃﻠﻌﺖ ﻫﺴﻪ ﺷﻔﺘﻬﻪ ﺗﺤﺠﻲ ﻭﻳﻪ ﺍﻟﺒﻨﺎﺕ ﺭﺍﺡ ﺍﺻﻴﺤﻬﻪ ﺍﻟﺞ ﻻﺗﺘﺤﺮﻛﻴﻦ ...
ﻣﺴﻚ ... ﺍﺑﺎﻭﻉ ﻋﻠﻰ ﺭﺟﻠﻲ ﺷﺼﺎﻳﺮ ﺑﻴﻬﻪ ﻭﺷﻠﻮﻥ ﺍﺗﺤﺮﻙ ﺑﻠﺒﻴﺖ ﻣﻨﻮ ﺑﺤﺎﻟﻲ ﻭﻓﻮﻛﺎﻫﻪ ﺍﻣﺘﺤﺎﻧﺎﺕ ﺍﻟﻚ ﺑﻴﻬﻪ ﺍﺭﺍﺩﻩ ﺭﺑﻲ ﺷﻔﺖ ﺑﻴﺴﺎﻥ ﺍﺟﺘﻲ ﻭﻣﺒﻴﻨﻪ ﺿﺎﻳﺠﻪ
ﺑﻴﺴﺎﻥ ... ﻫﺎ ﻣﺴﻚ ﻃﺎﻟﻌﻪ ﻣﻦ ﻭﻗﺖ ...
ﻣﺴﻚ ... ﺍﻱ ﺳﻬﻠﻪ ﺍﻻﺳﺌﻠﻪ ﺍﻛﻮﻝ ﺷﺒﻴﺞ ﻣﻌﺒﺴﻪ ...
ﺑﻴﺴﺎﻥ ... ﻣﺴﻚ ﻗﺮﺏ ﺯﻭﺍﺟﻲ ﻭﻣﺎ ﺍﻋﺮﻑ ﺍﻟﻤﺤﺮﻭﺱ ﻣﻨﻮ ﻭﺷﻠﻮﻧﻮ ....
ﻣﺴﻚ .... ﺣﻴﻞ ﻭﻳﺎﺝ ﺻﺎﺭﻟﺞ ﺷﻬﺮﻳﻦ ﻣﺨﻄﻮﺑﻪ ﻭﺳﺎﻛﺘﻪ ﻣﺎ ﺣﺎﺟﻴﺘﻲ ﺍﺑﻮﺝ ﺷﻮﻓﻲ ﺍﻟﻤﻦ ﺍﻧﻄﺎﺝ ﺷﻜﻮ ﺳﺎﻛﺘﻪ ﻋﻦ ﻧﻔﺴﺞ ﻟﻮ ﺍﻻ ﺍﻟﻔﺎﺱ ﻳﻮﻛﻊ ﺑﺎﻟﺮﺍﺱ ﻳﻠﻪ ﺗﺤﺠﻴﻦ ....
... ﻭﺍﻟﺮﺏ ﺣﺠﻴﺖ ﻳﻜﻮﻝ ﺍﻧﻲ ﺷﺎﻳﻔﻪ ﺧﻮﺵ ﻭﻟﺪ ﻭﺭﺍﺡ ﻳﺴﻌﺪﺝ ﻭﺣﺘﻪ ﻣﺮﻳﻢ ﻧﻔﺲ ﺍﻟﻜﻼﻡ ﻭﻣﻦ ﺍﺳﺄﻝ ﺍﻣﻪ ﺩﻛﻮﻝ ﻋﻨﺪﻩ ﺷﻐﻞ ﺗﺪﺭﻳﻦ ﺍﺣﺴﻪ ﻣﺠﺒﻮﺭ ﻋﻠﻴﻪ ....
... ﻻ ﺣﺒﻴﺒﻪ ﻣﺎﻋﺪﻧﻪ ﺭﺟﺎﻝ ﻳﻨﺠﺒﺮ ﻫﻨﺎ ﻛﻮﻟﻲ ﺑﻲ ﺷﻲ ﻭﺿﺎﻣﻲ ﻋﻨﺞ ﻭﻟﻜﻮﺝ ﻋﻠﻰ ﻛﺪ ﺍﻳﺪﻫﻢ ﻭﻛﺮﺑﺴﻮﺍ ﺑﺮﺍﺳﺞ ....
... ﻻﺗﺨﻮﻓﻴﻨﻲ ﻣﺴﻚ ﺭﺍﺡ ﺍﻧﻌﻄﻞ ﻭﺣﺘﻪ ﺗﻠﻴﻔﻮﻥ ﻣﺎﻋﻨﺪﻱ ﺍﺗﻮﺍﺻﻞ ﻭﻳﺎﺝ ﺷﻠﻮﻥ ....
... ﻭﻋﻠﻰ ﺍﺳﺎﺱ ﺍﻧﻲ ﻋﻨﺪﻱ ﺗﻠﻴﻔﻮﻥ ﻭﺩﺍﻋﺘﺞ ﺍﻟﻌﻄﻠﻪ ﺍﺗﻌﺲ ﻣﺎﺗﻜﻮﻥ ﺑﺎﻟﻨﺴﺒﻪ ﺍﻟﻲ ﺍﺧﻠﺼﻬﻪ ﻫﺪ ﻭﺍﻧﻲ ﺍﻫﺪ ﻭﻳﻪ ﺟﺎﺳﻢ ﻭﻣﻨﺎﻝ ....
... ﻳﻌﻨﻲ ﻣﺘﺤﻀﺮﻳﻦ ﻋﺮﺳﻲ ...
... ﺍﻟﻠﻪ ﻋﻠﻴﺞ ﺑﻴﺴﺎﻥ ﻫﻮ ﺍﻧﻲ ﻓﺪ ﻳﻮﻡ ﻃﻠﻌﺖ ﻟﻤﺤﻞ ﻭﺍﺷﺘﺮﻳﺖ ﻟﻨﻔﺴﻲ ﻟﻮ ﻃﻠﻌﺖ ﻟﺤﻔﻠﻪ ﺣﺪﻱ ﻟﻠﻜﻠﻴﻪ ﻭﺍﺭﺟﻊ ﺍﻛﻴﺪ ﺗﻌﺬﺭﻳﻨﻲ ﻣﻮﻭﻭ ...
... ﻃﺒﻌﺎ ﺍﻋﺬﺭﺝ ﺑﺲ ﺍﺭﻳﺪﺝ ﻳﻤﻲ ﻗﻨﻌﻲ ﻣﻨﺎﻝ ....
... ﺍﻱ ﻣﻴﺨﺎﻟﻒ ﺍﻗﻨﻌﻬﻪ ﻭﻟﻮ ﻣﺎﺗﻘﻨﻊ ﺑﺲ ﻧﺤﺎﻭﻝ ﻭﻳﺎﻫﻪ ﻫﺴﻪ ﻛﻮﻣﻲ ﺍﺣﺲ ﺍﻻﻟﻢ ﻣﻮﺗﻨﻲ ﺳﺎﻋﺪﻳﻨﻲ ﺍﻣﺸﻲ ﻣﺎ ﺍﻛﺪﺭ ﻭﺣﺪﻱ ....
ﻣﺴﻚ .. ﺍﻣﺸﻲ ﺑﺨﻄﻮﺍﺕ ﺑﻄﻴﺌﻪ ﻭﻣﺴﺘﻨﺪﻩ ﻋﻠﻰ ﺑﻴﺴﺎﻥ ﻭﺍﻟﺮﺍﻳﺢ ﻭﺍﻟﺠﺎﻱ ﻳﺒﺎﻭﻋﻠﻲ ﻣﺎﺷﺎﻳﻔﻴﻦ ﻭﺣﺪﻩ ﻣﻜﺴﻮﺭﻩ ﻻ ﻭﻓﻮﻛﺎﻫﻪ ﻻﺑﺴﻪ ﺗﻚ ﺣﺬﺍﺀ ﻻﻥ ﻣﺎﺗﻔﻮﺕ ﺭﺟﻠﻲ ﻣﻦ ﺍﻟﺘﺠﺒﺮ ﺷﻜﺒﺮﻫﻪ ﺻﺎﻳﺮﻩ ﺑﺲ ﺍﺻﺒﻌﻲ ﺍﻟﺠﺒﻴﺮ ﻃﺎﻟﻊ ﺻﺪﻙ ﻳﻀﺤﻚ ﻣﺎﺩ ﺭﺍﺳﻪ ﺷﻜﻮ ﺍﺣﺴﻪ ﻳﺸﺘﻢ ﻫﻮﻩ ....
ﻭﺻﻠﻨﻪ ﺑﺮﺍ ﺍﻟﺠﺎﻣﻌﻪ ﺍﻧﺪﻭﺭ ﻋﻠﻰ ﺍﻟﺨﻂ ﻭﻳﻨﻪ ﻭﺍﻛﻔﻴﻦ ﺍﻧﺪﻙ ﺳﻮﺍﻟﻒ ﻭﻫﻲ ﺗﺴﻮﻟﻔﻠﻪ ﻋﻠﻰ ﺧﻄﻴﺒﻬﻪ ﺍﻟﻤﺠﻬﻮﻝ ﻣﺎﺣﺴﻴﺖ ﻏﻴﺮ ﺿﺮﺑﻪ ﺑﻴﺴﺎﻥ ﺑﺨﺎﺻﺮﺗﻲ ....
ﻣﺴﻚ ... ﺷﺒﻴﺞ ﻭﻟﺞ ﺯﺭﻓﺘﻲ ﺧﺎﺻﺮﺗﻲ ....
ﺑﻴﺴﺎﻥ ... ﺷﻮﻓﻲ ﻣﻨﻮ ﻛﺪﺍﻣﻨﻪ ﻭﺟﺎﻱ ﻋﻠﻴﻨﻪ ...
ﻣﺴﻚ ... ﺍﻧﺘﺒﻬﺖ ﺣﻀﺮﻩ ﺍﻟﻌﻘﻴﺪ ﺯﻳﺪ ﻋﻠﻰ ﻛﻮﻟﺖ ﺍﻟﻌﻤﻴﺪ ﺑﺎﻭﻋﺖ ﻋﻠﻰ ﻧﻔﺴﻲ ﺷﻌﺪﻝ ﻫﻮ ﺍﻧﻲ ﻣﻦ ﻓﻮﻙ ﻟﻴﺠﻮﻩ ﺻﺎﻳﺮﻩ ﻓﻠﻢ ﻫﻨﺪﻱ ﺣﺘﻪ ﺷﺎﻟﻲ ﻣﺨﺮﺑﻂ ﻭﺍﻟﺮﺟﻞ ﻣﺎﺗﺴﻮﻟﻒ ....
ﻣﺒﻴﻦ ﺟﺎﻱ ﻋﻠﻰ ﺍﻟﺠﺎﻣﻌﻪ ﻻﻥ ﻭﺻﻞ ﻟﻠﺒﺎﺏ ﺑﺲ ﻭﺍﺣﺪ ﻣﻦ ﺍﻟﺤﻤﺎﻳﻪ ﺍﻟﻲ ﻭﻳﺎ ﻣﺎ ﺍﺩﺭﻱ ﺷﻬﻤﺲ ﺑﺎﺫﻧﻪ ﻣﻦ ﺷﺎﻓﻨﻪ ﺧﻼ ﻳﻐﻴﺮ ﻃﺮﻳﻘﻪ ﻭﺍﺟﻪ ﺑﺎﺗﺠﺎﻫﻨﻪ ﺻﺪﻙ ﻫﻨﺎ ﺍﺭﺗﺒﻜﺖ ﻭﻋﺒﺎﻟﻚ ﻣﻮﻋﺪ ﻏﺮﺍﻣﻲ ﻟﻮ ﺭﺟﻠﻲ ﺗﺴﺎﻋﺪ ﺍﻻ ﺍﺭﻛﺾ ﺑﺲ ﺧﺎﻧﺖ ﺑﻴﻪ ﺭﺟﻠﻲ ....
ﻛﻠﻤﺎ ﻳﻘﺘﺮﺏ ﻛﻠﺒﻲ ﻳﺪﻙ ﺳﺮﻳﻊ ﻭﻫﺎﻱ ﺑﻴﺴﺎﻥ ﺍﻟﻔﺎﻫﻲ ﻻﻧﻔﻊ ﻭﻻﺩﻓﻊ ﺍﻛﻠﻬﻪ ﺧﻠﻲ ﻧﻤﺸﻲ ﺩﻛﻮﻝ ﺧﻠﻲ ﻧﺸﻮﻓﻪ ﺷﻴﺮﻳﺪ ﺗﻘﺮﺏ ﻋﻠﻴﻨﻪ ﻭﻛﺎﻝ ....
ﺯﻳﺪ ... ﺍﻟﺴﻼﻡ ﻋﻠﻴﻜﻢ
... ﻭﻋﻠﻴﻜﻢ ﺍﻟﺴﻼﻡ
... ﺧﻴﺮ ﺍﻥ ﺷﺎﺀ ﺍﻟﻠﻪ ﺳﻼﻣﺎﺕ ﺷﺒﻴﻬﻪ ﺭﺟﻠﺞ ....
... ﺷﺒﻴﻬﻪ ﻏﻴﺮ ﻣﻜﺴﻮﺭﻩ ﺍﻟﻠﻪ ﻳﺴﻠﻤﻚ ....
... ﻣﺎﻋﻨﺪﺝ ﻏﻴﺮ ﺍﻟﻌﺎﻓﻴﻪ ﺳﻬﻰ ﺷﻠﻮﻧﻬﻪ ﻭﻳﺎﺝ ...
... ﻭﺍﻟﻠﻪ ﺑﻨﺺ ﺍﻟﺨﻴﺮ ﻭﻳﻪ ﺳﻬﻰ ﻛﺪﺍﻣﻚ ﺭﺟﻠﻲ ﻣﻜﺴﻮﺭﻩ ﺑﻔﻀﻠﻬﻪ ...
... ﻟﻴﺶ ﻫﻲ ﺷﻨﻮ ﻋﻼﻗﺘﻬﻪ ﺑﺮﺟﻠﺞ
ﺣﻀﺮﻩ ﺍﻟﻌﻘﻴﺪ ﺳﻬﻰ ﻣﺎﺟﺎﺯﺕ ﻣﻦ ﻋﻨﺪﻱ ﻭﻫﺪﺩﺗﻨﻲ ﺑﻴﻮﻣﻬﻪ ﻭﻣﻦ ﺭﺟﻌﺖ ﺳﻴﺎﺭﻩ ﻣﻀﻠﻠﻪ ﻣﺜﻞ ﺳﻴﺎﺭﺍﺕ ﺍﺑﻮﻫﻪ ﺿﺮﺑﺘﻨﻲ ﻭﺭﺍﺣﺖ ﻭﺍﻧﻲ ﺳﺠﻠﺖ ﺭﻗﻤﻬﻪ ﻳﺎﺭﻳﺖ ﺗﻜﻮﻥ ﻋﻨﺪ ﻭﻋﺪﻙ ﻭﺗﺎﺧﺬ ﺣﻘﻲ ﻻﻥ ﻣﻠﻴﺖ ﻣﻦ ﺑﻨﺖ ﺍﺧﻮﻙ ﻭﺣﺪﻩ ﻣﺮﻳﻀﻪ ﻭﺗﺮﻛﺾ ﻭﺭﺍﻱ ...
... ﺑﻄﻠﻲ ﻫﺎﻻﺳﻠﻮﺏ ﺍﻟﺘﻬﺠﻤﻲ ﻣﻦ ﺗﺤﺠﻴﻦ ﺍﻧﻄﻴﻨﻲ ﺭﻗﻢ ﺍﻟﺴﻴﺎﺭﻩ ﺍﺫﺍ ﻋﻨﺪﺝ ....
.... ﺍﻱ ﻋﻨﺪﻱ ...
... ﺍﻧﻲ ﻣﺮﻳﺖ ﻋﻠﻰ ﺍﻟﺠﺎﻣﻌﻪ ﻻﻥ ﺍﻟﻌﻤﻴﺪ ﺧﺎﺑﺮﻧﻲ ﻭﻛﺎﻝ ﺍﻟﻤﻮﺿﻮﻉ ﻣﺘﻌﻠﻖ ﺑﺴﻬﻰ ﻣﻦ ﺍﻃﻠﻊ ﺍﺷﻮﻑ ﺍﻟﺮﻗﻢ ﻭﻣﺎﻋﻨﺪﺝ ﻏﻴﺮ ﺍﻟﻌﺎﻓﻴﻪ ....
... ﺍﻟﻠﻪ ﻳﻌﺎﻓﻴﻚ ....
ﻋﺎﻓﻨﻪ ﻭﺭﺍﺡ ﺍﻟﺘﻔﺘﺖ ﻋﻠﻰ ﺑﻴﺴﺎﻥ ﺑﻠﻪ ﺍﻟﻠﻪ ﻋﻠﻴﺞ ﺷﻜﺪ ﺣﻘﻨﻪ ﻫﺬﺍ ﺣﺘﻪ ﺿﺤﻜﻪ ﻣﺎﻳﻀﺤﻚ ﻭﻓﻮﻛﺎﻫﻪ ﺭﺯﻟﻨﻲ ﺷﺘﻬﺠﻤﺖ ﺍﻧﻲ ﺻﺢ ﺍﺣﺠﻲ ﺑﻌﺼﺒﻴﻪ ﺑﺲ ﻣﺎﺍﺗﺠﺎﻭﺯﺕ ﻋﺎﺑﺖ ﺷﻠﻮﻥ ﺷﻜﻮﻝ ...
ﺑﻴﺴﺎﻥ ... ﻳﻤﻌﻮﺩﻩ ﺷﺨﺼﻴﺘﻪ ﺣﻠﻮﻩ ﺷﻮﻓﻲ ﺷﻠﻮﻥ ﺭﺯﻥ ﺣﺘﻪ ﺍﻟﺒﻨﺎﺕ ﻳﺒﺎﻭﻋﻠﻪ ..
ﻣﺴﻚ ... ﺑﻴﺴﻮﻭﻭ ﺗﺮﻯ ﺍﺟﺮﺝ ﻣﻦ ﺷﻌﺮﺍﺗﺞ ﻻﺗﺘﻐﺰﻟﻴﻦ ﺑﻲ ﻛﺪﺍﻣﻲ ﻭﻭﻳﻨﻬﻢ ﺍﻟﺒﻨﺎﺕ ﻫﺪﻳﻨﻲ ﻋﻠﻴﻬﻦ ...
... ﻫﻬﻬﻪ ﻣﻮﻛﻠﺘﻲ ﻧﺴﻴﺘﻪ ﻳﺎﻣﺴﻚ ﺷﻜﺪ ﻗﻮﻳﻪ ﻭﻣﺎﺗﺨﺎﻓﻴﻦ ﺑﺲ ﻭﻛﻌﺘﻲ ﺑﺤﺐ ﺍﻟﻌﻘﻴﺪ ...
... ﻭﻟﻲ ﻭﻟﺞ ﻗﺎﺑﻞ ﺍﺣﺒﻪ ﺍﻧﻲ ﻭﻧﺴﻴﺘﻪ ﻫﻮ ﺑﺲ ﻋﺠﺒﻨﻲ ﻭﺑﻌﺪﻳﻦ ﻃﻠﻊ ﻣﺘﺰﻭﺝ ﻭﺷﻮﻓﻲ ﺣﺘﻪ ﺷﻌﺮﻩ ﻣﺸﻴﺐ ﻳﻌﻨﻲ ﺟﺒﻴﺮ ﺑﺎﻟﻌﻤﺮ ...
ﺍﻣﺸﻲ ﻧﺼﻌﺪ ﺑﺎﻟﺨﻂ ﺍﻟﻄﻼﺏ ﺍﻧﺘﺒﻬﻮﺍ ﻋﻠﻴﻨﻪ ﻣﺎﺑﻴﻨﻪ ﺣﻴﻞ ﺣﺠﺎﻳﻪ ﻃﺎﻳﺮﻩ ....
ﺻﻌﺪﺕ ﺑﺎﻟﺨﻂ ﻭﺩﻛﺎﺕ ﻛﻠﺒﻲ ﺗﻘﺮﺍ ﺍﻟﻒ ﻛﻠﺴﺎﻉ ﺍﻛﻮﻝ ﻟﻨﻔﺴﻲ ﻭﻟﺞ ﻣﺴﻚ ﻣﺘﺰﻭﺝ ﻣﺘﺰﻭﺝ ﺩﻳﺮﺑﺎﻟﺞ ﺗﻔﻜﺮﻳﻦ ﺑﻲ ﻭﺳﺎﻋﻪ ﺍﻛﻮﻝ ﺷﺎﻳﺐ ﻭﺳﺎﻋﻪ ﻣﻐﺮﻭﺭ ﺑﺲ ﺍﺭﻳﺪ ﺍﺑﻌﺪﻩ ﻋﻦ ﺑﺎﻟﻲ .....
ﺑﺲ ﻭﺍﻟﻠﻪ ﺷﺨﺼﻴﻪ ﺷﻜﺪ ﺷﺎﻳﻔﻪ ﺿﺒﺎﻁ ﺍﻛﻮ ﺣﻠﻮﻳﻦ ﻭﻋﻮﺩ ﺷﺨﺼﻴﺎﺕ ﺧﺎﺻﻪ ﺑﺎﻣﻦ ﺍﻟﺠﺎﻣﻌﻪ ﺑﺲ ﻟﻴﺶ ﻫﺬﺍ ﺍﺣﺴﻪ ﻳﺨﺘﻠﻒ ﺍﺣﺲ ﺷﺨﺼﻴﺘﻪ ﺣﻠﻮﻩ ﻭﺭﺟﺎﻝ ﺑﻤﻌﻨﻰ ﺍﻟﻜﻠﻤﻪ ....
ﺭﺟﻌﺖ ﻟﻠﺒﻴﺖ ﺗﻠﻜﺘﻨﻲ ﻣﻨﺎﻝ ﻭﻛﺎﻟﻌﺎﺩﻩ ﻧﻔﺲ ﺍﻻﺳﺘﻄﻮﺍﻧﻪ ﻭﺍﺗﻌﺎﺭﻙ ﻭﺗﺮﺟﻊ ﻋﻠﻴﻪ ﺗﻀﺮﺑﻨﻲ ﻭﺍﺿﺮﺑﻬﻪ ﻣﺎﻋﺪﻧﻪ ﺣﻞ ﻭﺳﻂ ﺍﻧﻲ ﻭﻳﺎﻫﻪ ﻟﻮ ﺍﻛﺘﻠﻬﻪ ﻟﻮﺗﻜﺘﻠﻨﻲ ....
ﺛﺎﻧﻲ ﻳﻮﻡ ﺩﺍﻭﻣﺖ ﺑﺎﻟﻘﺎﻋﻪ ﺍﻻﻣﺘﺤﺎﻧﻴﻪ ﻭﺷﻔﺖ ﻏﺼﻮﻥ ﺗﺄﺷﺮﻟﻲ ﺑﻌﻴﻮﻧﻬﻪ ﻋﻮﺩ ﺍﻧﺘﺒﻬﻲ ﻋﻠﻰ ﺳﻬﻰ ﺍﻧﺘﺒﻬﺖ ﻋﻠﻴﻬﻪ ﻛﺮﺳﻴﻬﻪ ﻓﺎﺭﻍ ﻣﺎﻣﻮﺟﻮﺩﻩ ﻣﺎﺭﺩﺕ ﺍﺷﻐﻞ ﺑﺎﻟﻲ ﻗﺒﻞ ﺍﻻﻣﺘﺤﺎﻥ ﺧﺎﻑ ﺍﺧﺮﺑﻂ ....
ﺍﻣﺘﺤﻨﺖ ﻭﻃﻠﻌﺖ ﺍﺗﺮﻗﺐ ﻏﺼﻮﻥ ﺍﻡ ﺍﻟﻌﻠﻮﻡ ﺍﻛﻴﺪ ﻋﺪﻫﻪ ﺍﺧﺒﺎﺭ ﺟﺪﻳﺪﻩ ﻭﻟﻴﺶ ﺳﻬﻰ ﻏﺎﻳﺒﻪ ﻭﻋﺪﻫﻪ ﺍﻣﺘﺤﺎﻥ ﻧﻬﺎﺋﻲ ....
ﺷﻮﻳﻪ ﻭﺍﺟﺘﻲ ﺗﻤﺸﻲ ﺳﺮﻳﻊ ﺣﺘﻪ ﻣﺎﻛﺎﻟﺖ ﺷﻠﻮﻧﺞ ﺑﺴﺮﻋﻪ ﻓﺎﺗﺖ ﺑﺎﻟﻤﻮﺿﻮﻉ ...
ﻏﺼﻮﻥ ... ﻟﺞ ﺳﻬﻰ ﻣﺎﻛﻮ ﺷﻔﺘﻴﻬﻪ ﺻﺪﻳﻘﺘﻬﻪ ﺩﻛﻮﻝ ﺑﻄﻠﺖ ﻭﺍﻟﺴﻨﻪ ﺍﻟﺠﺎﻳﻪ ﺗﻨﻘﻞ ...
ﻣﺴﻚ .. ﺧﻠﺼﺖ ﺍﻻﻣﺘﺤﺎﻧﺎﺕ ﻟﻴﺶ ﺑﻄﻠﺖ ﻣﺎﻣﻌﻘﻮﻟﻪ ...
... ﺳﻤﻌﺖ ﺻﺪﻳﻘﺎﺗﻬﻪ ﻳﻜﻮﻟﻦ ﻋﻤﻬﻪ ﻣﺒﻄﻠﻬﻪ ﻭﺍﻟﺴﻨﻪ ﺍﻟﺠﺎﻳﻪ ﻳﻨﻘﻠﻮﻫﻪ ﻟﺠﺎﻣﻌﻪ ﺑﺎﺑﻞ ﻻﻥ ﺍﻟﻌﻤﻴﺪ ﺩﺍﺯ ﻋﻠﻰ ﻋﻤﻬﻪ ﻭﺍﻛﻮ ﻣﺸﻜﻠﻪ ﻣﺤﺪ ﻳﻌﺮﻓﻬﻪ ...
... ﻳﻌﻨﻲ ﻣﻮﺍﻧﻲ ﺍﻟﺴﺒﺐ
... ﻻ ﻣﻮ ﺍﻧﺘﻲ ﻫﺴﻪ ﺍﻓﺘﻬﻢ ﺍﻟﺴﺎﻟﻔﻪ ﻭﺍﺟﻴﺞ ﻫﺎﻱ ﺻﺪﻳﻘﺘﻬﻪ ﺍﻡ ﺑﻄﻦ ﺑﺲ ﺍﺷﺘﺮﻳﻠﻬﻪ ﻟﻔﻪ ﺗﺤﺠﻲ ﺍﻻﻭﻝ ﻭﺍﻟﺘﺎﻟﻲ
ﻫﻤﺰﻳﻦ ﺧﻠﺼﺖ ﻣﻨﻬﻪ ﻋﺴﻤﺎ ﻳﻨﻘﻠﻮﻫﻪ ﻟﺠﻬﻨﻢ ﺍﻟﺤﻤﺮﻩ ﺍﻟﻤﻬﻢ ﻣﺎ ﺍﺷﻮﻓﻬﻪ ....
... ﺍﻛﻮﻝ ﺷﻮﻛﺖ ﺗﺘﺰﻭﺝ ﺑﻴﺴﺎﻥ .....
... ﺑﺎﻟﻌﻄﻠﻪ ﺑﻌﺪ ﺷﻜﻢ ﻳﻮﻡ ...
... ﺍﻛﻮﻟﺞ ﺧﻠﻲ ﻧﺘﻔﻖ ﻭﻧﻤﺮ ﻋﻠﻴﺞ ﻭﺍﻧﺮﻭﺣﻠﻬﻪ ﺑﺎﻟﻌﺮﺱ ﺧﻄﻴﻪ ﺑﻴﺴﺎﻥ ﺣﺒﺎﺑﻪ ﻭﻣﺎﻋﺪﻫﻪ ﺍﺣﺪ ﺣﺘﻪ ﺗﻔﺮﺡ ...
... ﺍﻱ ﻛﻠﺖ ﻟﻤﻨﺎﻝ ﺑﻼﻭﻝ ﻣﺎﻗﺒﻠﺖ ﺑﺲ ﻛﺘﻠﻬﻪ ﺍﻟﺒﻨﺎﺕ ﻳﺮﻳﺪﻥ ﻳﺸﻮﻓﻨﺞ ﻭﻛﺎﻟﻦ ﺍﻻﺗﺠﻴﺒﻴﻦ ﻣﻨﺎﻝ ﺍﻟﻲ ﻣﺎﺕ ﻋﻠﻴﻬﻪ ﺍﺑﻮﺝ ﻳﻠﻪ ﺍﺗﺰﻭﺟﻬﻪ ﻭﻫﻲ ﻣﺎﺻﺪﻛﺖ ﻧﻔﺴﻬﻪ ﺑﺴﺮﻋﻪ ﻟﺒﺴﺖ ﻋﺒﺎﺗﻬﻪ ﻭﺷﺤﺎﻃﺘﻬﻪ ﻭﺭﻛﻀﺖ ﻻﻡ ﺳﺎﺭﻩ ﺍﻟﺤﻔﺎﻓﻪ ....
.... ﻫﻬﻬﻬﻪ ﺷﻌﻨﺪﺝ ﺳﻮﺍﻟﻒ ﻳﺎﻣﺴﻚ
ﺑﻴﺴﺎﻥ ...
ﺍﻻﻓﻜﺎﺭ ﻣﺮﺍﻭﺩﺗﻨﻲ ﻟﻴﻠﻲ ﻣﺎ ﺍﻧﺎﻣﻪ ﻭﺍﻧﻲ ﺍﻓﻜﺮ ﺑﻤﺼﻴﺮﻱ ﻻﻭﻝ ﻣﺮﻩ ﺍﺷﻮﻑ ﻭﺣﺪﻩ ﻣﺎﺗﻌﺮﻑ ﺷﻲ ﻋﻦ ﺧﻄﻴﺒﻬﻪ ﺑﺲ ﺍﺳﻤﻪ ﻣﺮﺍﺩ ﺣﺘﻪ ﻋﻤﺮﻩ ﻣﺎ ﺍﻋﺮﻓﻪ ﻣﻠﻴﺖ ﻣﻦ ﻛﺪﻣﺎ ﺍﺣﺠﻲ ﻭﻳﻪ ﺑﺎﺑﺎ ﻭﻳﻜﻮﻝ ﻣﺎﻣﻮﺟﻮﺩ ﻋﻨﺪﻩ ﺷﻐﻞ ﺍﻋﺮﻑ ﻳﻜﺬﺑﻮﻥ ﻋﻠﻴﻪ ﺣﺘﻪ ﻭﺻﻠﺖ ﺑﻴﻪ ﺍﺭﻳﺪ ﺍﺑﻄﻞ ﻭﻛﻠﺖ ﻟﺒﺎﺑﺎ ﻭﺻﺎﺭ ﻋﺼﺒﻲ ﻋﻠﻴﻪ .....
ﺍﺷﻮﻑ ﺍﻣﻪ ﺷﻜﺪ ﻓﺮﺣﺎﻧﻪ ﺑﻴﻪ ﻭﺷﻜﺪ ﺗﺸﺘﺮﻱ ﻫﺪﺍﻳﺎ ﺑﺲ ﻫﻮ ﻭﻳﻨﻪ ﻣﻦ ﻛﻞ ﻫﺬﺍ ﻣﺎﻋﻨﺪﻩ ﻓﻀﻮﻝ ﻳﺸﻮﻑ ﺧﻄﻴﺒﺘﻪ ....
ﺍﺧﺮ ﺍﻣﺘﺤﺎﻥ ﻋﺰﻣﺖ ﺍﻟﺒﻨﺎﺕ ﻋﻠﻰ ﺍﻟﻌﺮﺱ ﺍﺩﺭﻱ ﻣﺎﺭﺍﺡ ﻳﺠﻦ ﺑﺲ ﻟﻌﻞ ﻭﻋﺴﻰ ﺣﻀﻨﺖ ﻣﺴﻚ ﻭﺍﺑﺠﻲ ﺑﻌﺪ ﻣﺎ ﺍﺷﻮﻓﻬﻪ ﺑﺎﻟﻌﻄﻠﻪ ﻭﻻﺗﻠﻴﻔﻮﻥ ﻭﺍﺗﻮﺍﺻﻞ ﻭﻳﺎﻫﻪ ...
ﺧﻠﺼﺖ ﺍﻻﻣﺘﺤﺎﻧﺎﺕ ﺛﺎﻧﻲ ﻳﻮﻡ ﺑﻠﻴﻞ ﺍﺟﻮ ﺍﻫﻠﻪ ﺍﺗﻔﻘﻮﺍ ﻋﻠﻰ ﺍﻟﻌﺮﺱ ﺍﻟﻲ ﺻﺪﻣﻨﻲ ﻣﺎﻛﻮ ﺣﻔﻠﻪ ﻋﺮﺱ ﻭﻣﺎﻛﻮ ﻫﻮﺳﻪ ﻭﻻ ﺍﻟﻲ ﺣﻖ ﺍﺣﺘﻔﻞ ﺣﺎﻟﻲ ﺣﺎﻝ ﺍﻟﺒﻨﺎﺕ ﺑﻔﺮﺣﻪ ﻋﻤﺮﻱ ....
ﺑﻠﺤﻈﺘﻬﻪ ﺍﻋﺘﺮﺿﺖ ﻭﻛﺪﺍﻣﻬﻢ ﺑﺲ ﺑﺎﺑﺎ ﺳﻜﺘﻨﻲ ﺣﺴﻴﺖ ﺑﻜﺴﺮﻩ ﺷﻜﺒﺮﻫﻪ ﻭﺍﻧﻲ ﺍﺷﻮﻑ ﻧﻔﺴﻲ ﺟﺎﻱ ﺍﻧﺒﺎﻉ ﻣﻮ ﺍﺗﺰﻭﺝ ....
ﻣﻦ ﺷﺎﻓﺘﻨﻲ ﺍﻣﻪ ﻫﻴﺞ ﻛﺎﻟﺖ ﺳﻮﻱ ﺍﻧﺘﻲ ﻫﻲ ﺣﻨﻪ ﻫﻲ ﺯﻓﻪ ﺑﻨﻔﺲ ﺍﻟﻴﻮﻡ ﻭﺍﺣﺘﻔﻠﻲ ﻭﻳﻪ ﺻﺪﻳﻘﺎﺗﺞ ﺑﺲ ﺍﺣﻨﻪ ﻣﺎﺍﻧﺴﻮﻱ ﻻﻥ ﻋﻤﺘﻪ ﻗﺒﻞ ﻓﺘﺮﻩ ﺗﻮﻓﺖ ﺑﺲ ﺍﻧﺴﻮﻱ ﻏﺪﻩ ﺑﺴﻴﻂ ﻭﺍﻟﻌﺼﺮ ﻧﺰﻓﻜﻢ ﻟﻠﺒﻴﺖ ...
ﺣﻴﻞ ﺍﻧﻘﻬﺮﺕ ﻭﻣﺎﻛﺪﺭﺕ ﺍﺿﻞ ﻛﺎﻋﺪﻩ ﻳﻤﻬﻢ ﺑﺴﺮﻋﻪ ﻛﻤﺖ ﺑﺲ ﺍﻣﻪ ﻣﺎ ﺍﻋﺮﻑ ﻟﻴﺶ ﻫﻠﻜﺪ ﺣﺎﺑﺘﻨﻲ ﺍﺟﺖ ﻭﺭﺍﻳﻪ ﻟﻜﺘﻨﻲ ﻛﺎﻋﺪﻩ ﺍﺑﺠﻲ ﺑﻮﺳﺘﻨﻲ ﻭﺗﻬﺪﻱ ﺑﻴﻪ ...
ﺍﻡ ﺍﻳﻬﺎﺏ ... ﻣﺎﻋﺎﺵ ﺍﻟﻲ ﻳﺒﺠﻴﺞ ﺍﺣﺴﺒﻴﻨﻲ ﺍﻣﺞ ﺍﻋﺮﻑ ﻭﺿﻌﺞ ﻭﻳﻪ ﻣﺮﺕ ﺍﺑﻮﺝ ﻭﻫﺬﺍ ﻃﻠﺒﻬﻪ ﻛﺎﻟﺖ ﻣﺎﻧﺴﻮﻱ ﺣﻨﻪ ﺍﻧﻲ ﺍﺭﻳﺪﺝ ﺗﻔﺮﺣﻴﻦ ﻭﺍﻓﺮﺡ ﺑﻴﺞ ﻭﺍﺟﻴﺐ ﺍﺧﻮﺍﺗﻲ ....
ﺑﺲ ﻫﻲ ﻛﺎﻟﺖ ﻣﺎﻋﺪﻧﻪ ﻣﻜﺎﻥ ﻭﻣﺎ ﺍﻧﺴﻮﻱ ﺣﻔﻠﻪ ﺷﻮﻓﻲ ﺑﻴﺴﺎﻥ ﻻﺗﺤﺠﻴﻦ ﻭﻳﺎﻫﻪ ﺑﺲ ﻫﺎﻟﻴﻮﻣﻴﻦ ﻳﻤﻬﻪ ﻻﺗﺼﻴﺮ ﻣﺸﻜﻠﻪ ﺑﺎﺟﺮ ﺍﺟﻲ ﻋﻠﻴﺞ ﺍﻟﺼﺒﺢ ﻭﺍﺧﺬﺝ ﺍﺧﺘﺎﺭﻱ ﺑﺪﻟﻪ ﻭﺻﺎﻟﻮﻥ ﻭﺳﻮﻱ ﺍﻟﻲ ﻳﻌﺠﺒﺞ ﺍﻧﻲ ﻫﺴﻪ ﺍﻛﻮﻝ ﻻﺑﻮﺝ ﺍﺭﻳﺪ ﺍﺟﻴﺐ ﺍﺧﻮﺍﺗﻲ ....
... ﺷﻜﺮﺍ ﺧﺎﻟﻪ ...
... ﻳﻤﻪ ﻓﺪﻭﻩ ﻫﺎﻟﺨﺪﻭﺩ ﺍﺩﺭﻱ ﻣﻦ ﺭﺍﺡ ﻳﺸﻮﻓﺞ ﻣﺮﺍﺩ ﺷﻴﺴﻮﻱ ...
... ﺍﻧﻲ ﻣﺎﺷﺎﻳﻔﺘﻪ ﻫﻮﺑﻲ ﺷﻲ ...
... ﻻﻣﺎﺑﻲ ﺷﻲ ﻣﺮﺍﺩ ﻳﺎﻣﺮﺍﺩ ﺍﺣﻠﻰ ﻭﺍﺣﺪ ﺑﻴﻬﻢ ﻫﺴﻪ ﺗﺠﻴﻦ ﻭﺗﺸﻮﻓﻲ ﻣﺎﺗﺒﺸﻌﻴﻦ ﻣﻨﻪ ...
... ﺍﺑﺘﺴﻤﺖ ﻋﻠﻰ ﻛﻼﻣﻬﻪ ﻟﻌﺪ ﺍﺫﺍ ﻣﺎﺑﻲ ﺷﻲ ﻭﺣﻠﻮ ﻟﻴﺶ ﻣﺎ ﺍﺟﻪ ﻭﻟﻴﺶ ﻣﺎﻗﺎﺑﻞ ﺑﺎﻟﺰﻭﺍﺝ ....
ﺛﺎﻧﻲ ﻳﻮﻡ ﺍﻣﻪ ﺍﺧﺬﺗﻨﻲ ﻭﻃﻠﻌﺖ ﺑﺲ ﺍﻧﻲ ﻭﻳﺎﻫﻪ ﺍﺧﺘﺎﺭﻳﺖ ﺑﺪﻟﻪ ﻣﻨﻔﻮﺷﻪ ﻣﻦ ﺟﻮﻩ ﻭﻣﻦ ﻓﻮﻙ ﺑﻴﻬﻪ ﻭﺭﺩ ﻧﺎﻋﻢ ﻧﺎﺯﻝ ﻋﻠﻰ ﺍﻟﻜﺘﻒ ﺍﺧﺘﺎﺭﻳﺖ ﻣﻜﻴﺎﺝ ﺑﺴﻴﻂ ﺑﺲ ﻛﻞ ﻫﺬﺍ ﻭﺍﻧﻲ ﺍﺣﺲ ﻛﻠﺒﻲ ﻣﺨﻨﻮﻙ ...
ﺍﺟﻪ ﻳﻮﻡ ﺍﻟﻌﺮﺱ ﻭﺭﺣﺖ ﻟﻠﺼﺎﻟﻮﻥ ﻣﻜﻴﺎﺝ ﺧﻔﻴﻒ ﺣﻴﻞ ﻭﺗﺴﺮﻳﺤﻪ ﺑﺴﻴﻄﻪ ﻭﺷﻌﺮﻱ ﻫﻮ ﺍﺷﻜﺮ ﻣﺎﻳﺤﺘﺎﺝ ﺻﺒﻎ ﺭﺟﻌﺖ ﻭﻳﻪ ﻣﺮﻳﻢ ﺍﻭﻝ ﻣﺎﺷﺎﻓﻨﻲ ﺑﺎﺑﺎ ﺣﻀﻨﻲ ﻭﻛﺎﻡ ﻳﺒﺠﻲ ﺍﻧﻲ ﺍﺭﻳﺪ ﺣﺠﻪ ﺣﺘﻪ ﺍﺑﺠﻲ ....
ﺍﻧﻔﺠﺮﺕ ﻭﻋﺒﺎﻟﻚ ﺻﺎﺭ ﺳﻨﻪ ﻣﺎﺑﺎﺟﻴﻪ ﻳﺴﻜﺘﻮﻥ ﺑﻴﻪ ﻋﻠﻤﻮﺩ ﻣﺎﻳﺨﺮﺏ ﺍﻟﻤﻜﻴﺎﺝ ﻭﺍﻧﻲ ﺑﻮﺭﻱ ﻭﺍﻧﻔﺘﺢ ....
ﻛﻌﺪﺕ ﺑﺎﻻﺳﺘﻘﺒﺎﻝ ﻗﻠﻴﻠﻪ ﺍﻟﻨﺴﻮﺍﻥ ﺑﺲ ﺍﻟﺠﻴﺮﺍﻥ ﻣﺎﻋﺪﻧﻪ ﺍﺣﺪ ﺍﻧﻌﺮﻓﻪ ﻭﺍﻧﻌﺰﻣﻪ ....
ﻛﺎﻋﺪﻩ ﻭﺍﺗﺮﻗﺐ ﺷﻮﻛﺖ ﻳﺠﻲ ﻭﺍﺷﻮﻓﻪ ﺍﻟﻔﻀﻮﻝ ﺍﻟﻲ ﻋﻨﺪﻱ ﻣﻮﻃﺒﻴﻌﻲ ﺍﺗﺠﺎﻫﻪ ﺳﻤﻌﺖ ﺻﻮﺕ ﻫﻼﻫﻞ ﺑﺮﺍ ﻭﻫﻮﺳﺎﺕ ....
ﺑﻴﺴﺎﻥ ﻳﺎﺟﻜﻮﻟﻴﺘﻪ ﺣﺎﻣﺾ ﺣﻠﻮ ﺍﺑﺎﻛﻴﺘﻪ ...
ﺿﺤﻜﺖ ﻋﻠﻰ ﻫﺎﻱ ﺍﻟﻬﻮﺳﻪ ﺍﻭﻝ ﻣﺮﻩ ﺍﺳﻤﻌﻬﻪ ﺍﻟﻲ ﻓﺎﺟﺄﻧﻲ ﺻﻮﺕ ﺍﻟﻬﻼﻫﻞ ﻣﻮ ﻣﻦ ﺍﻫﻞ ﺍﻟﻌﺮﻳﺲ ﻣﺴﻚ ﻭﻏﺼﻮﻥ ﻭﺍﻟﺒﻨﺎﺕ ﺍﻟﺒﻘﻴﻪ .....
ﺑﺪﻭﻥ ﺷﻌﻮﺭ ﺑﺴﺮﻋﻪ ﺗﻠﻜﻴﺖ ﻣﺴﻚ ﻭﺍﺣﻀﻦ ﺑﻴﻬﻪ ﻫﺎﻱ ﺍﻟﻔﺮﺣﻪ ﺍﻟﻮﺣﻴﺪﻩ ﺍﻟﻲ ﺑﻌﺮﺳﻲ ....
ﺭﻛﺼﻦ ﺍﻟﺒﻨﺎﺕ ﻭﻫﻮﺳﺎﺕ ﺳﻮﻥ ﺟﻮ ﻗﺒﻞ ﺷﻮﻳﻪ ﻛﺄﺑﻪ ﺟﺎﻥ ﻛﻌﺪﺕ ﺑﺼﻔﻲ ﻣﺴﻚ ﺍﻧﺘﺒﻬﺖ ﻋﻠﻴﻬﻪ ﺷﻜﺪ ﺣﻠﻮﻩ ...
ﺭﻏﻢ ﺑﺴﺎﻃﺘﻬﻪ ﺑﺲ ﺟﻤﻴﻠﻪ ﻻﺑﺴﻪ ﻓﺴﺘﺎﻥ ﻃﻮﻳﻞ ﻣﺮﺗﺐ ﻭﻣﺨﻠﻴﻪ ﻛﺤﻞ ﻭﻣﺴﻜﺎﺭﻩ ﻋﻴﻮﻧﻬﻪ ﻓﺪ ﺷﻲ ﻃﺎﻟﻌﻪ ﻭﻻﻓﻪ ﺍﻟﺸﺎﻝ ﻣﺮﺗﺐ .....
ﻣﺴﻚ ... ﺻﺪﻱ ﻳﻤﻴﻦ ﻻ ﻳﺴﺎﺭ ﺍﻟﻲ ﻛﺪﺍﻣﺞ ﻣﻨﺎﻝ ...
.... ﻫﻬﻬﻪ ﺷﻠﻮﻥ ﺟﺒﺘﻴﻬﻪ ...
... ﺟﺒﺘﻬﻪ ﺑﺮﺷﻮﻩ ﻭﺍﻟﻄﺮﻳﻖ ﻛﻠﻪ ﺍﻣﺪﺡ ﺑﻴﻬﻪ ﻛﺪﺍﻡ ﺍﻟﺒﻨﺎﺕ ﻭﻫﻲ ﻣﻨﻔﻮﺧﻪ ﻛﻮﻣﻲ ﻭﻟﺞ ﺧﻠﻲ ﻧﺎﺧﺬﺝ ﻟﻠﻐﺮﻓﻪ ﻧﺴﻮﻟﻒ ﻭﻳﺎﺝ ﺍﻟﻨﺴﻮﺍﻥ ﺭﺍﺡ ﻳﺨﻄﺒﻨﻲ ...
.... ﻛﻤﺖ ﻭﻳﻪ ﺍﻟﺒﻨﺎﺕ ﺷﻘﻪ ﻭﺿﺤﻚ ﻭﺳﻮﺍﻟﻔﻬﻦ ﺗﺨﺠﻞ ﻛﻠﺴﺎﻉ ﺍﺿﻢ ﻭﺟﻬﻲ ﺑﺄﻳﺪﻱ ﻭﻫﻦ ﻳﻀﺤﻜﻦ ....
ﻣﺎ ﺍﺩﺭﻱ ﺷﻠﻮﻥ ﺍﺟﺖ ﺳﻬﻰ ﻋﻠﻰ ﺑﺎﻟﻲ ﻭﺳﺎﻟﺖ ﻋﻠﻴﻬﻪ ...
ﻣﺴﻚ ... ﺍﻟﻠﻪ ﻋﻠﻴﺞ ﻭﻳﻨﺞ ﻭﻭﻳﻦ ﺳﻬﻰ ﻫﺴﻪ
ﻏﺼﻮﻥ ... ﺧﻠﺼﻨﻪ ﻣﻦ ﺳﻬﻰ ﻋﻤﻬﻪ ﺑﻄﻠﻬﻪ ...
... ﻟﻴﺶ .
... ﻃﻠﻌﺖ ﻣﻬﺪﺩﻩ ﺑﻨﻴﻪ ﻣﻦ ﻏﻴﺮ ﻗﺴﻢ ﺑﺼﻮﺭﻫﻪ ﻣﺘﻔﻘﻪ ﻭﻳﻪ ﺣﻤﺎﻳﻪ ﺍﺑﻮﻫﻪ ﻻﻥ ﺗﻜﺮﻩ ﺍﻟﺒﻨﻴﻪ ﺟﺎﻳﻪ ﻟﻠﻌﻤﻴﺪ ﻣﺴﻮﻟﻔﺘﻠﻪ ﻭﺩﺍﺯ ﻋﻠﻰ ﻋﻤﻬﻪ ﻭﺑﻄﻠﻬﻪ ...
... ﺍﻱ ﺧﻠﺼﻨﻪ ﻣﻨﻬﻪ ﺑﻌﺪﻧﻪ ﺍﻧﺴﻮﻟﻒ ﺳﻤﻌﻨﻪ ﺻﻮﺕ ﺍﻟﺠﻬﺎﻝ ﻳﺼﻴﺤﻮﻥ ﺍﺟﻪ ﺍﻟﻌﺮﻳﺲ ﺍﺟﺖ ﺍﻟﺰﻓﻪ ...
# ﺍﻟﺒﺎﺭﺕ ﺍﻟﺜﺎﻣﻦ ..
# ﺍﺳﻤﻌﻨﻲ ﺻﻮﺗﻚ
# ﻟﻠﻜﺎﺗﺒﻪ ﺭﻭﺯﺍﻳﻪ ...
ﺍﺿﻴﻊ ﺍﻭﻳﻪ ﺍﻟﺤﭽﻲ ﺍﻟﮕﻠﻨﺎﻩ !
ﻭﺍﺭﺩ ﺍﺗﻠﻤﺲ ﺍﮔﻠﻴﺒﻲ ﻭﺍﺷﻮﻓﻚ ﺑﻲ
ﻭﺍﺻﻴﺢ ﺍﺣﺎﺍﻩ ،
....
ﺑﻴﺴﺎﻥ ....
ﻣﻦ ﻛﺎﻟﻮﺍ ﺍﺟﺖ ﺍﻟﺰﻓﻪ ﺑﺴﺮﻋﻪ ﻟﺰﻣﺖ ﺍﻳﺪ ﻣﺴﻚ ﺍﻧﺘﺎﺑﻨﻲ ﺷﻌﻮﺭ ﻻﻳﻮﺻﻒ ﺍﺭﻳﺪ ﺍﺿﻞ ﺑﺎﻟﻐﺮﻓﻪ ﻣﺎ ﺍﻃﻠﻊ ﺍﺟﺖ ﻣﺮﻳﻢ ﺑﺴﺮﻋﻪ ﻛﻮﻣﻮﻧﻲ ﺑﺲ ﺭﺟﻠﻴﻪ ﺗﻤﺸﻲ ﻭﻳﻦ ﻣﺎﻳﺎﺧﺬﻭﻧﻲ ﺗﺮﻭﺡ ﻭﻳﺎﻫﻢ ﻣﺎﺭﻛﺰﺕ ﺯﻳﻦ ﺑﺲ ﻟﻤﺤﺖ ﺍﻣﻪ ....
ﻗﻠﻴﻼﺕ ﺍﻟﺠﺎﻳﺎﺕ ﺣﻴﻞ ﺑﺴﺮﻋﻪ ﻫﻲ ﺻﻔﻜﻪ ﻫﻲ ﻫﻠﻬﻮﻟﻪ ﻟﺒﺴﻨﻲ ﻛﻮﻣﻪ ﺷﻐﻼﺕ ﺍﺧﺘﻨﻜﺖ ﻣﺎﻃﺎﻟﻊ ﺍﻱ ﺷﻲ ﻣﻦ ﻋﻨﺪﻱ ﻭﺑﻌﺪﻧﻲ ﺍﺗﺴﺄﻝ ﻭﻳﻨﻪ ﺍﻟﻌﺮﻳﺲ ﻫﻢ ﺍﻣﻪ ﺍﻟﻲ ﺭﺍﺡ ﺗﺼﻌﺪ ﻭﻳﺎﻱ ﺑﺎﻟﺰﻓﻪ ﻟﻮ ﺍﻣﻪ ﻫﻮ ﺍﻟﻌﺮﻳﺲ ....
ﺑﺲ ﺍﻻﺻﻮﺍﺕ ﺍﺳﻤﻌﻬﻪ ﻏﻄﻨﻲ ﺑﺒﺮﻛﻊ ﻛﻮﻩ ﺍﺷﻮﻑ ﻣﻨﻪ ﻭﺑﻌﺪ ﻓﺪﺷﻲ ﻓﻮﻛﺎ ﻣﻦ ﺍﻟﻬﻮﺳﺎﺕ ﻭﺍﻟﻬﻼﻫﻞ ﻋﺮﻓﺘﻪ ﺩﺧﻞ ....
ﺣﺴﻴﺖ ﻋﻠﻰ ﻭﻛﻔﺘﻪ ﺑﺼﻔﻲ ﺑﺲ ﺍﺭﻳﺪ ﺍﺭﻓﻊ ﺭﺍﺳﻲ ﻣﺎ ﺍﻛﺪﺭ ﻳﺎﺩﻭﺏ ﺭﻓﻌﺘﻪ ﺷﻮﻳﻪ ﻣﺎﺭﻛﺰﺕ ﺯﻳﻦ ﺑﺸﻜﻠﻪ ﻻﻥ ﻃﻮﻳﻞ ﺍﻃﻮﻝ ﻣﻨﻲ ﺑﻬﻮﺍﻳﻪ ...
ﺑﺲ ﺭﻛﺰﺕ ﻋﻠﻰ ﺍﻳﺪﻩ ﻣﻦ ﻟﺰﻡ ﺍﻳﺪﻱ ﻭﻃﻠﻌﻨﻪ ﻻﺑﺲ ﺳﺎﻋﻪ ﻭﻭﺍﻟﻘﺎﻁ ﺍﺳﻮﺩ ﻭﺍﻟﻘﻤﻴﺺ ﺍﺑﻴﺾ ﺷﻔﺖ ﺑﺲ ﺍﻟﻲ ﻃﺎﻟﻊ ﻣﻦ ﺍﻟﺴﺘﺮﻩ .....
ﺣﺘﻪ ﻣﺎﺷﻔﺖ ﺑﺎﺑﺎ ﻭﻻﺭﻛﺰﺕ ﺯﻳﻦ ﺟﻨﺖ ﺣﻴﻞ ﻣﺮﺗﺒﻜﻪ ﻭﻫﻮ ﺍﺻﻼ ﻣﺎﻭﻛﻒ ﻣﺜﻞ ﺍﻟﻌﺮﺳﺎﻥ ﺑﺴﺮﻋﻪ ﺻﻌﺪﻧﻲ ﺑﺎﻟﺴﻴﺎﺭﻩ ﻭﻫﻮ ﺑﺼﻔﻲ ....
ﺍﺭﻳﺪ ﺍﺭﻓﻊ ﺭﺍﺳﻲ ﺷﻮﻳﻪ ﺑﺲ ﺍﺭﻳﺪ ﺍﺷﻮﻓﻪ ﻣﺴﺘﺤﻴﻪ ﺣﻴﻞ ﻏﻴﺮ ﻫﻮ ﻳﺮﻓﻊ ﺭﺍﺳﻲ ﻳﺤﺎﺟﻴﻨﻲ ﻛﻠﺸﻲ ﻣﺎﻛﻮ ﻻ ﺍﺣﻢ ﻭﻻﺩﺳﺘﻮﺭ ... ..
ﺑﺲ ﺍﺑﺎﻭﻉ ﻋﻠﻰ ﻧﺺ ﺟﺴﻤﻪ ﻣﺒﻴﻦ ﻃﺒﻴﻌﻲ ﺍﺻﻼ ﻣﺮﺗﺐ ﻭﻧﺎﺯﻙ ﻭﺟﺴﻤﻪ ﺭﺷﻴﻖ ﺑﺲ ﻟﻴﺶ ﻣﺎﻳﺨﻠﻴﻨﻲ ﺍﺷﻮﻓﻪ ﻭﻟﻴﺶ ﻣﺎﻳﺮﻳﺪ ﻳﺸﻮﻓﻨﻲ ﺟﺎﻧﺖ ﻫﺎﻱ ﺍﻻﺳﺌﻠﻪ ﺍﻟﻲ ﺍﺩﻭﺭ ﺑﺮﺍﺳﻲ ...
ﺍﻟﺰﻓﻪ ﻋﺒﺎﺭﻩ ﻋﻦ 3 ﺳﻴﺎﺭﺍﺕ ﻓﻘﻂ ﻭﺻﺪﻙ ﺣﺰﻧﺎﻧﻴﻦ ﻻﻥ ﻻﺑﺴﻴﻦ ﺍﺳﻮﺩ ﻻﻥ ﻋﻤﺘﻬﻢ ﺻﺎﺭ ﺷﻬﺮﻳﻦ ﻣﻦ ﻣﻴﺘﻪ ....
ﻭﺻﻠﻨﻪ ﻟﺒﻴﺘﻬﻢ ﺑﺎﻭﻋﺖ ﻣﻦ ﺍﻟﺠﺎﻣﻪ ﺑﻴﺖ ﺟﺒﻴﺮ ﺣﻴﻞ ﻭﺑﻨﺎﺀ ﺟﺪﻳﺪ ﻧﺰﻟﻮﻧﻲ ﺑﺎﻟﺒﺎﺏ ﻫﺴﺘﻮﻧﻲ ﺍﺭﻳﺪ ﺍﻓﻮﺕ ﻭﺍﺣﺪ ﻛﺎﻡ ﻳﻀﺮﺏ ﻃﻠﻘﺎﺕ ﻓﻮﻙ ﺭﺍﺳﻲ ...
ﻣﻨﺎ ﺑﻴﻪ ﺧﻮﻓﻪ ﻣﻦ ﺍﻻﺣﺪﺍﺙ ﺍﻟﺼﺎﺭﺕ ﺑﺴﺮﻋﻪ ﻟﺰﻣﺖ ﺍﻳﺪﻩ ﻣﺜﻞ ﻣﻦ ﺍﺧﺘﻞ ﻭﺭﺍ ﺑﺎﺑﺎ ﻣﻦ ﺍﺳﻤﻊ ﺍﻟﻀﺮﺏ ﺣﺴﻴﺖ ﻋﻠﻰ ﺍﻳﺪﻩ ﻟﺰﻣﺖ ﺍﻳﺪﻱ ﺟﺎﻧﺖ ﺣﻴﻞ ﺣﺎﺭﻩ ﻋﺒﺎﻟﻚ ﺑﺘﻨﻮﺭ ....
ﺗﻠﻜﻨﻲ ﺍﻟﻨﺴﻮﺍﻥ ﻭﺩﺧﻠﻨﻲ ﻟﻠﺒﻴﺖ ﻭﻫﻮ ﻣﺎ ﺍﺩﺭﻱ ﻭﻳﻨﻪ ﺿﻞ ﺑﺮﺍ ﻛﻌﺪﺕ ﺑﻼﺳﺘﻘﺒﺎﻝ ﻭﺍﻟﺪﻣﻌﻪ ﺑﻄﺮﻑ ﺭﻣﺸﻲ ...
ﻭﺣﻴﺪﻩ ﻏﺮﻳﺒﻪ ﻻ ﺍﻡ ﻻ ﺍﺧﺖ ﺍﺣﺲ ﻧﻔﺴﻲ ﺟﺎﻳﻪ ﻣﻦ ﺍﻟﻘﻤﺮ ﻛﻠﻬﻪ ﻛﻌﺪﺕ ﻛﺒﺎﻟﻲ ﺻﻐﺎﺭ ﻭﻛﺒﺎﺭ ﻭﻳﺒﺎﻭﻋﻦ ﻋﻠﻴﻪ ﺻﺎﻓﻨﺎﺕ ﺑﻮﺟﻬﻲ ﻭﺍﺳﻤﻊ ﺍﻟﻠﻪ ﺷﻜﺪ ﺣﻠﻮﻩ ﻭﺍﻟﻠﻪ ﻳﺴﺘﺎﻫﻞ ﻣﺮﺍﺩ ....
ﻭﺍﻛﻮ ﺷﻜﻢ ﻭﺣﺪﻩ ﻭﺍﻛﻔﺎﺕ ﻋﻠﻰ ﺟﻬﻪ ﻭﻣﺎﻋﺎﺟﺒﻬﻦ ﺍﻟﻮﺿﻊ ﻭﻳﺴﻮﻥ ﺣﺮﻛﺎﺕ ﺑﺤﻠﻮﻛﻬﻦ ....
ﺍﻟﺠﻬﺎﻝ ﺍﻟﻜﺎﻋﺪﻩ ﺟﻮﺍﻳﻪ ﻛﻮﻣﻪ ﻻﺯﻣﻴﻦ ﺍﻟﺠﻜﻮﻟﻴﺖ ﻭﻳﺘﻠﻤﺴﻮﻥ ﺑﺎﻟﺒﺪﻟﻪ ....
ﺷﻮﻳﻪ ﻭﺑﺪﺕ ﺗﻨﺴﺤﺐ ﺍﻟﻨﺎﺱ ﻣﺎﺿﻞ ﺍﺣﺪ ﺑﺲ ﻫﻢ ﺍﻫﻞ ﺍﻟﺒﻴﺖ ﺍﺟﺘﻲ ﺍﻣﻪ ﻋﻠﻴﻪ ﻛﻮﻣﺘﻨﻲ ﻭﺍﻟﻔﺮﺣﻪ ﺑﻌﻴﻮﻧﻬﻪ ...
ﺍﻡ ﺍﻳﻬﺎﺏ ... ﻛﻮﻣﻲ ﺣﺒﻴﺒﻪ ﺍﺻﻌﺪﻱ ﻟﻐﺮﻓﺘﺞ ﺍﺭﺗﺎﺣﻲ ﺍﻛﻴﺪ ﺗﻌﺒﺎﻧﻪ ﺑﻌﺪ ﻣﺎﻛﻮ ﺍﺣﺪ
... ﺧﺎﻟﻪ ﺗﻌﺎﻟﻲ ﻭﻳﺎﻳﻪ ﺣﺒﺎﺑﻪ ..
ﻳﺎﺑﻨﻴﺘﻲ ﻻﺗﺨﺎﻓﻴﻦ ﻫﺴﻪ ﺍﺻﻴﺤﻠﺞ ﺻﺒﺎ ﺍﻡ ﺍﻟﻠﺴﺎﻥ ﺗﻜﻌﺪ ﻳﻤﺞ ﺑﻴﻦ ﻣﺎﻳﺠﻲ ﻣﺮﺍﺩ ﻻﻥ ﻳﻤﻪ ﺍﺻﺪﻗﺎﺀﻩ ﻭﺗﻌﺮﻓﻴﻦ ﻟﻤﻪ ﺍﻟﺸﺒﺎﺏ ﻣﺎﺗﺨﻠﺺ ....
... ﺻﻌﺪﺕ ﻭﻳﺎﻫﻦ ﺻﺒﺎ ﺑﻌﻤﺮﻱ ﻭﻣﺒﻴﻨﻪ ﺣﺒﺎﺑﻪ ﺟﺎﻧﺖ ﺍﻟﻐﺮﻓﻪ ﺣﻠﻮﻩ ﻣﺮﺗﺒﻪ ﺟﺪﻳﺪﻩ ﻣﺎﻝ ﻋﺮﺍﻳﺲ ﻭﻫﺎﺩﺋﻪ ﻭﺑﻴﻬﻪ ﻋﻄﺮﻩ ﻣﺎﻟﻲ ﺍﻟﻐﺮﻓﻪ ﺍﺣﺴﻪ ﻫﺎﺩﺉ ﺣﻴﻞ ....
ﻛﻌﺪﺕ ﻋﻠﻰ ﺍﻟﺠﺮﺑﺎﻳﻪ ﻭﺍﻧﻲ ﺍﺗﻤﻌﻦ ﺑﻴﻬﻪ ﻭﺍﻧﺘﻀﺮﻩ ﺑﻜﻞ ﻟﺤﻈﻪ ﻳﻄﻠﻊ ﻛﺪﺍﻣﻲ .....
ﻋﺎﻓﺘﻨﻲ ﺍﻣﻪ ﻭﻧﺰﻟﺖ ﺑﻌﺪﻣﺎ ﺩﻟﺘﻨﻲ ﺑﻤﻜﺎﻥ ﺍﻟﻐﺮﺍﺽ ﺣﺴﻴﺖ ﺑﺎﻟﻴﺘﻢ ﺣﺴﻴﺖ ﺑﻤﺮﺍﺭﻩ ﺧﻨﻜﺘﻨﻲ ﻭﻳﻦ ﺍﻧﻲ ﻭﻭﻳﻦ ﺍﻫﻠﻲ ﻣﻨﻮ ﺍﻟﻲ ﺗﺰﻭﺝ ﺑﻬﺎﻱ ﺍﻟﻄﺮﻳﻘﻪ ﻣﻨﻮ ﻣﺜﻠﻲ ....
ﻛﻠﻤﺎ ﺍﺳﻤﻊ ﺣﺮﻛﻪ ﺑﺮﺍ ﺍﻛﻮﻝ ﺭﺍﺡ ﻳﺠﻲ ﻭﻣﺎﻛﻮ ﺍﺣﺪ ﻭﻳﻨﻪ ﻟﻴﺶ ﻣﺨﺘﻔﻲ ﻳﺎﺗﺮﻯ ﺷﻠﻮﻧﻪ ﻭﺷﻠﻮﻥ ﺷﻜﻠﻪ ﻭﺷﻜﺪ ﻋﻤﺮﻩ ﻟﻴﺶ ﻣﺎﺟﺎﻱ ﺍﺷﻮﻓﻪ .....
ﺑﻌﺪﻧﻲ ﻛﺎﻋﺪﻩ ﺍﻧﻔﺘﺢ ﺍﻟﺒﺎﺏ ﻓﺰﻳﺖ ﻭﻭﻛﻔﺖ ﻋﻠﻰ ﺣﻴﻠﻲ ﻋﺒﺎﻟﻲ ﻫﻮ ﻃﻠﻌﺖ ﺻﺒﺎ ﺍﺧﺘﻪ ...
ﺻﺒﺎ ... ﺍﻋﺬﺭﻳﻨﻲ ﻓﺰﺯﺗﺞ ﺑﺲ ﺍﺟﻴﺖ ﻳﻤﺞ ﺣﺘﻪ ﻣﺘﻀﻮﺟﻴﻦ ...
ﺑﻴﺴﺎﻥ ... ﺍﺭﻳﺪ ﺍﻧﺰﻉ ﺍﻟﺒﺪﻟﻪ ﻓﺪﻭﻩ ﻣﺘﻀﺎﻳﻘﻪ ﻣﻨﻬﻪ ﺳﺎﻋﺪﻳﻨﻲ ...
ﺻﺒﺎ ... ﻣﺎﺗﻨﺘﻈﺮﻳﻦ ﻣﺮﺍﺩ ﻳﺠﻲ ﺣﺘﻪ ﻳﺸﻮﻓﺞ ﺑﻴﻬﻪ ...
... ﻫﻮ ﻭﻳﻨﻪ ﺻﺎﺭ ﺷﻜﺪ ﻣﺨﻄﻮﺑﻴﻦ ﻣﺎﺷﻔﺘﻪ ﻭﻻﺳﻤﻌﺖ ﻛﻠﻤﻪ ﻣﻦ ﻋﻨﺪﻩ ﻭﻫﺴﻪ ﻧﻔﺲ ﺍﻟﺸﻲ ﻛﻮﻟﺸﻲ ﻣﺎﺷﻔﺖ ﻣﻨﻪ ...
... ﻣﺎﺷﻲ ﻋﻠﻰ ﺭﺍﺣﺘﺞ ﺗﻌﺎﻟﻲ ﺍﺳﺎﻋﺪﺝ ﻭﻛﺪﺍﻣﺞ ﺍﻟﻜﻨﺘﻮﺭ ﺍﻱ ﺷﻲ ﻳﻌﺠﺒﺞ ﺍﻟﺒﺴﻲ ﺍﻧﻲ ﺭﺍﺡ ﺍﻧﺘﻈﺮﺝ ﺑﺮﺍ ﻣﻦ ﺗﻜﻤﻠﻴﻦ ﺻﻴﺤﻲ ﻋﻠﻴﻪ ....
.... ﻛﻤﺖ ﺑﻤﻠﻞ ﺍﺧﺘﺎﺭﻳﺖ ﺩﺷﺪﺍﺷﻪ ﺭﺑﻊ ﺭﺩﻥ ﻭﻗﺼﻴﺮﻩ ﺟﻮﻩ ﺍﻟﺮﻛﺒﻪ ﻟﻮﻧﻬﻪ ﻭﺭﺩﻱ ﻟﺒﺴﺘﻬﻪ ﻭﻓﺘﺤﺖ ﺷﻌﺮﻱ ﻣﻮ ﻫﻮﺳﻪ ﻫﻮ ﻻﻥ ﻣﺎﺳﻮﻳﺖ ﺗﺴﺮﻳﺤﻪ ﻣﺠﺮﺩ ﺗﺮﺗﻴﺐ ....
ﺻﺤﺖ ﻋﻠﻰ ﺻﺒﺎ ﺍﺟﺖ ﻛﻌﺪﺕ ﻳﻤﻲ ﺍﺳﺘﺤﻲ ﻛﻠﺴﺎﻉ ﺍﺳﺄﻟﻬﻪ ﻋﻦ ﺍﻟﻤﺤﺮﻭﺱ ﺑﺲ ﻫﻲ ﺿﻠﺖ ﺗﺤﺠﻴﻠﻲ ...
ﺻﺒﺎ ... ﺷﻮﻓﻲ ﺑﻴﺴﺎﻥ ﺍﻭﻝ ﻣﺮﻩ ﺍﻟﺘﻘﻲ ﺑﻴﺞ ﻭﻣﺎﻣﺎ ﺷﻜﺪ ﺣﺠﺖ ﻋﻨﺞ ﻭﻛﺎﻟﺖ ﺣﺒﺎﺑﻪ ﻭﻃﻴﺒﻪ ﺍﻋﺘﺒﺮﻳﻨﻲ ﺍﺧﺘﺞ ﻫﻨﺎ ﺍﻱ ﺷﻲ ﺗﺤﺘﺎﺟﻲ ﺗﻌﺎﻟﻲ ﻋﻠﻴﻪ ...
ﺍﻧﻲ ﺍﻻﺧﺖ ﺍﻟﻮﺣﻴﺪﻩ ﺍﻟﻬﻢ ﺍﻗﺮﺏ ﻭﺍﺣﺪ ﺍﻟﻲ ﻫﻮ ﻣﺮﺍﺩ ﻣﺎﺭﺍﺡ ﺍﺣﺠﻴﻠﺞ ﻋﻨﻪ ﻭﺍﻣﺪﺣﻠﺞ ﺑﻲ ﺑﺲ ﻫﺴﻪ ﺑﻤﺮﻭﺭ ﺍﻻﻳﺎﻡ ﺗﺸﻮﻓﻴﻦ ﺷﻨﻮ ﻣﻦ ﺍﻧﺴﺎﻥ ....
.... ﺗﺴﻠﻤﻴﻦ ﺻﺪﻙ ﻟﻴﺶ ﻣﺎﺟﻨﺘﻲ ﺗﺠﻴﻦ ﻭﻳﻪ ﺍﻣﺞ ﺣﺘﻪ ﺍﺷﻮﻓﺞ ...
... ﻭﺍﻟﻠﻪ ﻳﺎﺑﻴﺴﺎﻥ ﺍﻟﺼﺮﺍﺣﻪ ﺷﻜﺪ ﺭﺩﺕ ﺍﺟﻲ ﺑﺲ ﻣﺮﺍﺩ ﻣﺎﻗﺒﻞ ...
... ﺻﺒﺎ ﺍﺣﺠﻲ ﺍﻟﺼﺮﺍﺣﻪ ﻣﺮﺍﺩ ﻣﺎﻗﺎﺑﻞ ﻣﻮﻭ ﻭﺍﻧﺘﻮ ﺧﻄﺒﺘﻮﺍ ﺑﺪﻭﻥ ﻋﻠﻤﻪ ....
... ﻫﺴﻪ ﺍﻧﺘﻲ ﻋﺮﻭﺱ ﻣﻴﺼﻴﺮ ﻧﺤﺠﻲ ﺑﻬﻴﺞ ﺍﺷﻴﺎﺀ ﺗﻀﻮﺝ ﻫﺴﻪ ﺗﻔﺘﻬﻤﻴﻦ ﻣﻦ ﻣﺮﺍﺩ ...
... ﻫﻮ ﻭﻳﻨﻪ ﻣﺎﺷﻔﺘﻪ ﻟﺤﺪ ﺍﻻﻥ ...
... ﻫﺴﻪ ﻳﺠﻲ ﺑﻌﺪﻫﻢ ﺍﺻﺪﻗﺎﺀﻩ ﺑﺮﺍ ...
... ﻣﺮﺕ ﺍﻳﻬﺎﺏ ﻣﺎﺷﻔﺘﻬﻪ ﻣﺎ ﺍﻋﺮﻓﻬﻪ ...
... ﺑﻴﺴﺎﻥ ﺍﻟﺴﻮﺍﻟﻒ ﻫﻮﺍﻳﻪ ﻣﻦ ﺗﺮﺗﺎﺣﻴﻦ ﺍﻛﻌﺪ ﻭﺍﺣﺠﻴﻠﺞ ﺗﻔﺎﺻﻴﻠﻨﻪ ﻫﺴﻪ ﻛﻮﻣﻲ ﺍﻛﻠﻲ ﺷﻲ ﻻﺗﻀﻠﻴﻦ ﺟﻮﻋﺎﻧﻪ ﻣﺎﻣﺎ ﻣﺎﺗﻜﺪﺭ ﺗﺼﻌﺪ ﻛﻠﺴﺎﻉ ﺭﺟﻠﻴﻬﻪ ﺗﻮﺟﻌﻬﻪ ﻭﻛﻠﺴﺎﻉ ﻭﻛﺎﻟﺖ ﺧﻠﻲ ﺗﺎﻛﻞ ...
... ﻻ ﻣﺎ ﺍﺷﺘﻬﻲ ﺷﻲ ﺗﻌﺒﺎﻧﻪ ﺭﺍﺡ ﺍﻣﺪﺩ ﺷﻮﻳﻪ ...
... ﻣﺎﺷﻲ ﻋﻠﻰ ﺭﺍﺣﺘﺞ ﺍﻧﻲ ﺭﺍﺡ ﺍﻧﺰﻝ ﻭﺍﺫﺍ ﺟﻌﺘﻲ ﻣﺨﻠﻴﻦ ﺍﻛﻞ ﺑﺎﻟﺜﻼﺟﻪ ﻳﻤﺞ ﻭﺍﻛﻠﻲ ﺍﻟﺒﻴﺖ ﺑﻴﺘﺞ ﻣﻮ ﺗﺴﺘﺤﻴﻦ .....
... ﻧﺰﻟﺖ ﺻﺒﺎ ﻭﺿﻠﻴﺖ ﻭﺣﺪﻱ ﺍﻓﺘﺮ ﺑﺎﻟﻐﺮﻓﻪ ﺷﻜﺒﺮﻫﻪ ﺑﺲ ﻣﺎﻣﺮﺗﺎﺣﻪ ﺑﻴﻬﻪ ﻓﺘﺤﺖ ﺍﻟﻜﻨﺘﻮﺭ ﻣﺎﻟﺘﻪ ﻣﻼﺑﺴﻪ ﻣﺮﺗﺒﻪ ﻭﻛﻠﻬﻦ ﺍﻟﻮﺍﻧﻬﻦ ﻓﺎﺗﺤﻪ ﺍﻟﻈﺎﻫﺮ ﻣﺎﻳﺤﺐ ﺍﻟﻐﺎﻣﻖ ﻭﻣﺮﺗﺒﺎﺕ ﺑﺎﻧﺘﻈﺎﻡ ...
ﺟﺮﻳﺖ ﺍﻟﻤﺠﺮ ﻣﺎﻟﺖ ﺍﻟﻤﻴﺰ ﻛﻮﻣﻪ ﺳﺎﻋﺎﺕ ﻋﻨﺪﻩ ﻭﻛﻠﻬﻪ ﻣﺮﺗﺒﻪ ﻭﺍﻟﻌﻄﻮﺭ ﻋﻠﻰ ﺍﻟﻤﻴﺰ ﻭﻛﻠﻬﻦ ﻟﻮﻧﻬﻦ ﺍﺳﻮﺩ ﻣﺎ ﺍﺩﺭﻱ ﺻﺪﻓﻪ ﻟﻮ ﻫﻮ ﻫﻴﺞ ﺷﺨﺼﻴﺘﻪ ....
ﺩﻭﺭﺕ ﻋﻠﻰ ﺻﻮﺭﻩ ﻭﺣﺪﻩ ﺍﻟﻪ ﻣﺎﻛﻮ ﻛﻠﺖ ﺍﻛﻴﺪ ﻋﻨﺪﻩ ﻣﺎﻣﻌﻘﻮﻟﻪ ﻣﺎﻣﺨﻠﻲ ﺻﻮﺭﻩ ﻟﻔﺖ ﺍﻧﺘﺒﺎﻫﻲ ﺍﻛﻮ ﺳﺒﻮﺭﻩ ﺻﻐﻴﺮﻩ ﺑﺤﺠﻢ ﺍﻟﻴﺪ ﻣﻮﺟﻮﺩﻩ ﻳﻢ ﺍﻟﺠﺮﺑﺎﻳﻪ ﻭﺑﺼﻔﺤﺘﻬﻪ ﻗﻠﻢ ....
ﺍﺧﺬﺗﻬﻪ ﺍﻛﻠﺐ ﺑﻴﻬﻪ ﻭﻳﻦ ﺍﺭﻳﺪ ﺍﻭﺻﻞ ﻣﺎ ﺍﺩﺭﻱ ﺑﻴﻬﻪ ﺯﺭ ﺻﻐﻴﺮ ﻣﻦ ﺍﻛﺘﺐ ﺑﻴﻬﻪ ﺍﺩﻭﺳﻪ ﻭﻳﻨﻤﺴﺢ ﺯﻳﻦ ﺷﻴﺴﻮﻱ ﺑﻴﻬﻪ ﻣﺨﻠﻴﻬﻪ ﻫﻨﺎﺍ ...
ﺗﻌﺒﺖ ﻣﻦ ﺍﻟﺘﻔﻜﻴﺮ ﻭﻫﻮ ﻣﺎﺑﻴﻦ ﻭﺍﻟﺒﻴﺖ ﺻﺎﺭ ﻫﺪﻭﺀ ﺍﻟﻈﺎﻫﺮ ﺍﻧﻲ ﺍﻧﺘﻈﺮ ﻋﻠﻰ ﺍﻟﻔﺎﺭﻍ ﻣﺪﺩﺕ ﻋﻠﻰ ﺍﻟﺠﺮﺑﺎﻳﻪ ﺟﺎﻥ ﺍﻟﻤﻜﻴﻒ ﻣﻔﺘﻮﺡ ﻭﺑﺎﺭﺩﻩ ﺟﺮﻳﺖ ﺍﻟﻔﺮﺷﻪ ﻭﺗﻐﻄﻴﺖ ﺑﻴﻬﻪ ....
ﻋﺮﻭﺱ ﺍﻭﻝ ﻳﻮﻡ ﻭﺣﺪﻫﻪ ﻧﺎﻳﻤﻪ ﻭﺍﺑﻴﺖ ﺍﻭﻝ ﻣﺮﻩ ﺗﺪﺧﻠﻪ ﻭﻣﺎﺗﻌﺮﻑ ﺷﻲ ﻋﻨﻬﻢ ﻣﺎ ﺍﻛﻮﻝ ﺷﻲ ﺑﺲ ﺍﻟﺮﺏ ﻳﺤﻤﻴﻨﻲ ...
ﻻﻥ ﺍﻧﻲ ﺍﻧﺴﺎﻧﻪ ﻣﺴﺎﻟﻤﻪ ﻣﺎ ﺍﺣﺐ ﺍﺫﻱ ﻭﺍﺣﺪ ﻭﻻ ﺍﺣﻘﺪ ﺩﺍﺧﻠﻲ ﻧﻈﻴﻒ ﻣﺎﻳﻮﻡ ﻓﻜﺮﺕ ﺑﺎﻟﺸﺮ ﺑﺲ ﻣﺎ ﺍﺩﺭﻱ ﻟﻴﺶ ﺣﻴﺎﺗﻲ ﻣﺎﺟﺎﻱ ﺗﺼﻔﻰ ....
ﻣﺎ ﺍﻋﺮﻑ ﺑﻴﻦ ﺍﻟﻨﺎﻳﻤﻪ ﻭﺑﻴﻦ ﺍﻟﻜﺎﻋﺪﻩ ﺷﻔﺖ ﻭﺍﺣﺪ ﻭﺍﻛﻒ ﻳﻢ ﺍﻟﻜﻨﺘﻮﺭ ﻭﺟﺎﻱ ﻳﺎﺧﺬ ﻣﻼﺑﺲ ﺍﻟﺘﻌﺐ ﻣﺴﻴﻄﺮ ﻋﻠﻴﻪ ﺍﻓﺘﺢ ﻭﺍﻏﻤﺾ ﺑﻌﻴﻮﻧﻲ ﻋﺒﺎﻟﻚ ﻣﻠﺰﻭﻛﺎﺕ ﺑﺼﻤﺒﻎ ﺍﻻﻣﻴﺮ ...
ﺍﻧﺘﺒﻬﺖ ﻋﻠﻲ ﻣﻨﻄﻴﻨﻲ ﻇﻬﺮﻩ ﺍﺧﺬ ﺍﻟﻤﻼﺑﺲ ﻭﻃﻠﻊ ﺣﺘﻪ ﻣﺎ ﺍﻧﺪﺍﺭ ﻋﻠﻴﻪ ﺍﻋﺘﻘﺪ ﻣﺎﻳﺪﺭﻱ ﺑﻴﻪ ﻛﺎﻋﺪﻩ ...
ﻛﻌﺪﺕ ﻋﻠﻰ ﺣﻴﻠﻲ ﺍﻧﺘﺒﻬﺖ ﻋﻠﻰ ﺍﻟﺴﺎﻋﻪ ﺏ 8 ﻛﻤﺖ ﻣﻦ ﻣﻜﺎﻧﻲ ﻟﻤﻴﺖ ﺷﻌﺮﻱ ﻭﻟﺒﺴﺖ ﺩﺷﺪﺍﺷﻪ ﻃﻮﻳﻠﻪ ﻭﻃﻠﻌﺖ ﺍﺭﻳﺪ ﺍﺭﻭﺡ ﻟﻠﺤﻤﺎﻡ ﻻﻥ ﻛﺎﻟﺖ ﺻﺒﺎ ﺍﻟﻔﻮﻙ ﺑﺲ ﺍﻟﺞ ﺍﺧﺬﻱ ﺭﺍﺣﺘﺞ ﺍﺧﻮﺗﻬﻪ ﺟﻮﻩ ....
ﺍﻭﻝ ﻣﺎﻓﺘﺤﺖ ﺍﻟﺒﺎﺏ ﺻﺎﺭ ﺑﻮﺟﻬﻲ ﻭﺍﺣﺪ ﻃﺎﻟﻊ ﻣﻦ ﺍﻟﻐﺮﻓﻪ ﺍﻟﺜﺎﻧﻴﻪ ﻣﺒﺪﻝ ﻭﻳﺮﻳﺪ ﻳﻨﺰﻝ ﺿﻞ ﻳﺒﺎﻭﻋﻠﻲ ﺑﺪﻭﻥ ﻣﺎﻳﺤﺠﻲ ﻋﻴﻨﻪ ﺍﺗﺠﻮﻟﺖ ﻋﻠﻰ ﻛﻞ ﺗﻔﺎﺻﻴﻠﻲ ﺑﻌﺪﻳﻦ ﺩﻧﻚ ﻭﻧﺰﻝ ...
ﺿﻠﻴﺖ ﺍﺳﺄﻝ ﻣﻨﻮ ﻫﺬﺍ ﺧﺎﻑ ﺍﺧﻮ ﻭﺍﻧﻲ ﻭﺍﻛﻔﻪ ﻫﻴﺞ ﻭﻫﻢ ﻣﺎﻋﺪﻫﻢ ﻭﺣﺪﻩ ﺑﺪﻭﻥ ﺣﺠﺎﺏ ﻭﻛﺎﻟﺖ ﺍﻣﻪ ﻣﻠﺘﺰﻣﻴﻦ ...
ﺟﺎﻥ ﺣﻠﻮ ﻭﺍﻟﻌﻴﻮﻥ ﺑﻴﻬﻦ ﻟﻮﻥ ﻭﻃﻮﻳﻞ ﻭﺍﻟﺠﺴﻢ ﺭﻳﺎﺿﻲ ﺍﻟﺮﺏ ﻳﺨﻠﻲ ...
ﺭﺣﺖ ﻏﺴﻠﺖ ﻭﺭﺟﻌﺖ ﻟﻠﻐﺮﻓﻪ ﺑﺲ ﻓﺘﺤﺖ ﺍﻟﺒﺎﺏ ﻓﺰﻳﺖ ﻭﻫﻠﻴﺖ ﺍﻳﺪﻱ ﻋﻠﻰ ﺻﺪﺭﻱ ﻧﻔﺲ ﺍﻟﺸﺨﺺ ﺍﻟﻲ ﺗﻠﻜﺎﻧﻲ ﺑﺮﺍ ﻣﻮﺟﻮﺩ ﺑﺎﻟﻐﺮﻓﻪ ﻭﺍﻛﻒ ﻳﻠﺒﺲ ﺑﺴﺎﻋﺘﻪ ....
ﺿﻠﻴﺖ ﻭﺍﻛﻔﻪ ﺑﻤﻜﺎﻧﻲ ﻭﻣﺘﺼﻨﻤﻪ ﻣﺎ ﺍﺗﺤﺮﻙ ﺧﻄﻮﻩ ﺑﻴﻨﻲ ﻭﺑﻴﻦ ﻧﻔﺴﻲ ﻣﻌﻘﻮﻟﻪ ﻫﻮ ﻣﺮﺍﺩ ﻳﺎﺭﺏ ﻣﻌﻘﻮﻟﻪ ﻫﺬﺍ ﻛﻞ ﻫﺬﺍ ﺍﻟﺠﻤﺎﻝ ﻭﺍﻧﻲ ﺍﻛﻮﻝ ﺑﻲ ﺷﻲ ....
ﺿﻠﺖ ﻋﻴﻨﻲ ﺑﻌﻴﻨﻪ ﻫﻮ ﺍﺑﺪ ﻣﺎﻧﺰﻝ ﻋﻴﻨﻪ ﺍﺗﻘﺪﻡ ﺑﺎﺗﺠﺎﻫﻲ ﻭﺑﻴﺪﻩ ﻫﺎﻱ ﺍﻟﺴﺒﻮﺭﻩ ﺍﻟﺼﻐﻴﺮﻩ ﺍﻟﻲ ﺷﻔﺘﻬﻪ ﺍﻟﺒﺎﺭﺣﻪ ....
ﺻﺎﺭ ﻛﺪﺍﻣﻲ ﻭﻣﺪﻧﻚ ﻳﻜﺘﺐ ﻣﺎ ﺍﻋﺮﻑ ﺷﻨﻮ ﻭﺍﻧﻲ ﻣﺮﻛﺰﻩ ﻋﻠﻲ ﺍﻧﻄﺎﻧﻲ ﺍﻟﺴﺒﻮﺭﻩ ﺗﻔﺎﺟﺄﺕ ﺑﺎﻟﻲ ﻛﺎﺗﺒﻪ ﺑﺤﻴﺚ ﻓﺘﺤﺖ ﻋﻴﻮﻧﻲ ﻋﻠﻰ ﻛﺒﺮﻫﻦ ﻭﺍﻟﺼﺪﻣﻪ ﺍﺧﺬﺗﻨﻲ
ﻛﺎﺗﺐ ﺍﻧﻲ ﺍﺧﺮﺱ .....
ﻧﺰﻟﺖ ﻋﻴﻨﻲ ﻣﻦ ﻋﻨﺪﻩ ﻭﺧﻔﻴﺖ ﺍﻟﺼﺪﻣﻪ ﻣﺎﻟﺘﻲ ﻣﺎ ﺍﻋﺮﻑ ﺷﻨﻮ ﺍﺟﺎﻭﺑﻪ ﺑﺲ ﺍﻧﻘﻬﺮﺕ ﺣﻴﻞ ﺣﺴﻴﺖ ﻭﺍﺣﺪ ﺿﺮﺑﻨﻲ ﺑﻜﻠﺒﻲ ﺑﺲ ﺭﺩﻳﺖ ﻋﻠﻲ ﺑﺎﺑﺘﺴﺎﻣﻪ ﺍﻧﺮﺳﻤﺖ ﻋﻠﻰ ﻭﺟﻬﻲ ....
ﺭﺟﻊ ﻛﺘﺒﻠﻲ ... ﺍﺣﺠﻲ ﺍﺳﻤﻊ ﺍﻧﻲ ....
ﺭﺟﻊ ﺍﻟﺪﻡ ﺑﻮﺟﻬﻲ ﻭﺣﺠﻴﺖ ﺑﻠﻬﻔﻪ ﻳﻌﻨﻲ ﺑﺲ ﻣﺎﻳﺤﺠﻲ ﺑﺲ ﻳﺴﻤﻊ ﻛﺘﻠﻪ ﺍﻧﻲ ﺑﻴﺴﺎﻥ ....
... ﺿﺤﻚ ﻭﻛﺘﺐ ﺍﻫﻼ ﻭﺳﻬﻼ ﻭﻋﺎﻓﻨﻲ ﻭﻃﻠﻊ ﻳﺎﺭﺑﻲ ﺑﺲ ﺷﻨﻮ ﻣﻦ ﺿﺤﻜﻪ ﺗﺨﺒﻞ ﻭﺷﻠﻮﻥ ﻫﺎﺩﺉ ﻭﺷﺨﺼﻴﺘﻪ ﺣﻠﻮﻩ ....
ﻣﺎ ﺍﻋﺮﻑ ﻟﻴﺶ ﺍﻟﻀﺤﻜﻪ ﻣﺎﻓﺎﺭﻛﺘﻨﻲ ﺳﺎﻋﻪ ﺍﻧﻘﻬﺮ ﺑﺲ ﻣﻦ ﺍﺗﺬﻛﺮ ﺷﻜﻠﻪ ﻭﺿﺤﻜﺘﻪ ﺍﺑﺘﺴﻢ ﻭﺣﺪﻱ ....
ﺍﺳﺘﺤﻲ ﺍﻧﺰﻝ ﻭﺣﺪﻱ ﺿﻠﻴﺖ ﻛﺎﻋﺪﻩ ﻋﻠﻰ ﺍﻟﺠﺮﺑﺎﻳﻪ ﻭﺭﺍ ﺷﻮﻳﻪ ﺍﻧﺪﻙ ﺍﻟﺒﺎﺏ ﺟﺎﻧﺖ ﺍﻣﻪ ﺍﻡ ﺍﻳﻬﺎﺏ ...
ﺍﻡ ﺍﻳﻬﺎﺏ ... ﺻﺒﺎﺡ ﺍﻟﺨﻴﺮ ﻋﺮﻭﺳﺘﻨﻪ ...
ﺑﻴﺴﺎﻥ ... ﺻﺒﺎﺡ ﺍﻟﻨﻮﺭ ﺧﺎﻟﻪ ...
... ﻳﻠﻪ ﺑﺪﻟﻲ ﻭﺗﻤﻜﻴﺠﻲ ﻭﺍﻧﺰﻟﻲ ﺭﺍﺡ ﻳﺠﻮﻥ ﻛﺮﺍﻳﺒﻨﻪ ﻳﺒﺎﺭﻛﻮﻥ ...
... ﻣﺎﺷﻲ ﺑﺲ ﺍﺭﻳﺪ ﺻﺒﺎ ﺗﺠﻲ ﻳﻤﻲ ..
... ﻫﺴﻪ ﺍﺩﺯﻫﻪ ﺍﻟﺞ ﺑﺲ ﻫﺎ ﺑﻴﺴﺎﻥ ﻳﻤﻪ ﺍﺫﺍ ﺳﺄﻟﻮﺝ ﻛﻮﻟﻲ ﻛﻠﺸﻲ ﺗﻢ ﺗﺮﻯ ﻓﻀﻮﻟﻴﺎﺕ ﻭﻫﻦ ﻭﻣﺮﺍﺩ ﻣﻮ ﺍﺻﻄﻼﺡ ....
... ﻣﺎﺷﻲ ﺧﺎﻟﻪ ... ﻣﻦ ﻧﺰﻟﺖ ﺿﺤﻜﺖ ﺑﺪﺍﺧﻠﻲ ﺍﻛﻮﻝ ﺗﻢ ﻭﺍﻧﻲ ﻫﺴﻪ ﻳﻠﻪ ﺷﻔﺘﻪ ﺑﻌﺪﻳﻦ ﺍﻧﺘﺒﻬﺖ ﻋﻠﻰ ﻧﻔﺴﻲ ﻋﺰﺍﺍ ﺑﻌﻴﻨﺞ ﺑﻴﺴﺎﻥ ﺍﺳﺘﺤﻲ ﺷﻮﻳﻪ ﺷﺒﻴﺞ ﺫﺍﺑﺤﻪ ﻧﻔﺴﺞ ...
ﺍﺟﺘﻲ ﺻﺒﺎ ﻭﺳﻮﺗﻠﻲ ﺷﻌﺮﻱ ﺧﻠﻴﺖ ﻣﻜﻴﺎﺝ ﺧﻔﻴﻒ ﻭﻟﺒﺴﺖ ﻓﺴﺘﺎﻥ ﻣﺜﻞ ﺍﻟﻘﻔﻄﺎﻥ ﺍﻟﻤﻐﺮﺑﻲ ﻟﻮﻧﻪ ﺗﺮﻛﻮﺍﺯﻱ ....
ﺻﺒﺎ ... ﻣﺎﺷﺎﺀ ﺍﻟﻠﻪ ﺷﻨﻮ ﻫﺎﻟﺠﻤﺎﻝ ﻟﺞ ﺑﻴﺴﺎﻥ ﺍﻟﻴﻮﻡ ﺍﺗﺠﻠﻄﻴﻬﻢ ..
.. ﻫﻢ ﻣﻨﻮ ...
... ﻛﺮﺍﻳﺒﻨﻪ ﻏﻴﺮ ﻟﻚ ﺷﻨﻮ ﻫﺎﻱ ﻣﺮﺍﺩ ﺍﻟﻠﻪ ﻳﺤﺒﻚ ﻭﺩﺍﺯﻟﻚ ﺣﻮﺭﻳﻪ ﻣﻦ ﺍﻟﺠﻨﻪ ...
... ﺧﺠﻠﺘﻴﻨﻲ ﻳﻤﻌﻮﺩﻩ ﺷﻜﻠﻲ ﻋﺎﺩﻱ ....
... ﺍﺳﻜﺘﻲ ﺍﻟﻜﻞ ﻛﺎﻝ ﻻﻣﻲ ﻭﻳﻦ ﻟﻜﻴﺘﻮﻫﻪ ﺟﻨﻬﻪ ﻛﻤﺮ ﻭﺍﻣﻲ ﺗﻤﺸﻲ ﻭﺗﻘﺮﻩ ﺍﻟﻤﻌﻮﺫﺍﺕ ...
... ﻋﻔﻴﻪ ﻻﺗﻌﻮﻓﻴﻨﻲ ﻭﺣﺪﻱ ﺿﻠﻲ ﻳﻤﻲ ...
... ﻻ ﻣﺎ ﺍﻋﻮﻓﺞ ﻳﻠﻪ ﺍﻣﺸﻲ ...
.... ﻛﻞ ﺧﻄﻮﻩ ﺍﻣﺸﻴﻬﻪ ﻛﻠﺒﻲ ﻳﻄﻔﺮ ﻗﺒﻠﻲ ﻛﻮﻟﺶ ﻣﺘﻮﺗﺮﻩ ﻻﻭﻝ ﻣﺮﻩ ﺭﺍﺡ ﺍﺧﺘﻠﻂ ﺑﻴﻬﻢ ﺻﺒﺎ ﻭﺍﻣﻬﻪ ﺣﺒﺎﺑﺎﺕ ﺍﻟﺒﺎﻗﻴﺎﺕ ﺍﻟﻠﻪ ﺍﻋﻠﻢ ....
ﻧﺰﻟﺖ ﻋﻠﻰ ﺍﻟﺪﺭﺝ ﻣﺎﺭﻓﻌﺖ ﺭﺍﺳﻲ ﺧﺎﻑ ﺍﻭﻛﻊ ﺑﺲ ﺍﺷﻮﻑ ﻛﺪﺍﻣﻲ ﻧﺴﻮﺍﻥ ﻛﺎﻋﺪﻩ ﻭﺑﻨﺎﺕ ﺷﺎﺑﺎﺕ ....
ﻣﻦ ﺷﺎﻓﻨﻲ ﻭﺣﺪﻩ ﻣﻨﻬﻦ ﻛﺎﻡ ﺗﺼﻠﻲ ﻋﻠﻰ ﺍﻟﻨﺒﻲ ﺑﻮﺳﺘﻬﻦ ﻭﺑﺎﺭﻛﻠﻲ ﻭﻛﻌﺪﺕ ﻛﻠﻤﺎ ﺍﺭﻓﻊ ﺭﺍﺳﻲ ﺍﺷﻮﻓﻬﻦ ﻳﺒﺎﻭﻋﻠﻲ ...
ﺑﺲ ﺍﻛﻮ ﻭﺣﺪﻩ ﻧﻬﺎﺋﻴﺎ ﻣﺎ ﺍﺳﺘﻠﻄﻔﺘﻬﻪ ﺗﺒﺎﻭﻉ ﺑﺤﻘﺪ ﻣﺎﻋﺮﻓﺘﻬﻪ ﻣﻨﻮ ...
ﻭﺣﺪﻩ ﻣﻨﻬﻦ ﺣﺠﺖ ﺟﺒﻴﺮﻩ ﻭﺳﻤﻴﻨﻪ ﻭﺳﻤﺮﻩ ﺷﻜﻠﻬﻪ ﻳﺨﻮﻑ ...
... ﻋﻴﻨﻲ ﺑﻴﺴﺎﻥ ﺗﻘﺮﺑﻠﺞ ﻣﺮﺍﺩ ...
... ﻫﻲ ﻛﺎﻟﺖ ﻫﻴﺞ ﻭﺍﻧﻲ ﻛﺎﻧﻤﺎ ﻭﺍﺣﺪ ﺟﺎﺏ ﻋﻠﻴﻪ ﺳﻄﻞ ﻣﻲ ﻭﺭﺷﻪ ﻓﺪ ﺍﺭﺗﺒﻜﺖ ﺣﻴﻞ ﻣﺎ ﺍﻋﺮﻑ ﺷﺤﺠﻲ ﻓﻮﻛﺎﻫﻪ ﻛﻠﻬﻪ ﻛﺎﻋﺪﻩ ﺷﻨﻮ ﻫﺬﻭﻟﻪ ﻣﺎﻋﺪﻫﻢ ﺧﺼﻮﺻﻴﻪ ...
ﺍﻡ ﺍﻳﻬﺎﺏ ... ﺍﻱ ﻋﻴﻨﻲ ﺍﻡ ﻓﺮﺍﺱ ﻟﻴﺶ ﻣﺎﻳﺘﻘﺮﺑﻠﻬﻪ ﻧﺎﻗﺺ ﺍﻳﺪ ﻧﺎﻗﺺ ﺭﺟﻞ ...
ﺍﻡ ﻓﺮﺍﺱ ... ﺟﺎ ﻣﻦ ﻛﻮﻥ ﺍﻧﺘﻲ ﺍﺳﻤﺞ ﺑﻴﺴﺎﻥ ﺍﻧﻲ ﺳﺄﻟﺖ ﺍﻟﻌﺮﻭﺱ ﺧﺎﻳﺒﻪ ﻣﻮﺍﻧﺘﻲ
ﻫﻴﺞ ﺍﺳﺌﻠﻪ ﻣﺘﻨﺴﺄﻝ ﻛﺪﺍﻡ ﺍﻟﻜﻞ ﻭﺍﺫﺍ ﺗﺮﻳﺪﻳﻦ ﺍﻟﺠﻮﺍﺏ ﺍﺳﺄﻟﻲ ﻣﺮﺍﺩ ﻫﻮ ﺧﻮﺵ ﻳﺠﺎﻭﺑﺞ ....
ﺗﻌﺎﻟﻲ ﺻﺒﺎﻭﻱ ﻳﻤﻪ ﺍﺧﺬﻱ ﻣﺮﺕ ﺍﺧﻮﺝ ﺳﻮﻳﻠﻬﻪ ﺭﻳﻮﻙ ﻣﺎﺗﺮﻳﻜﺖ ..
ﺑﻴﺴﺎﻥ ... ﻣﺎﺍﻋﺮﻑ ﺷﺒﻴﻬﻢ ﺑﺲ ﺍﻟﻤﻬﻢ ﻛﻤﺖ ﻣﻦ ﻳﻤﻬﻦ ﻳﺨﻮﻓﻦ ﺭﺣﺖ ﻟﻠﻤﻄﺒﺦ ﻟﻜﻴﺖ ﻭﺣﺪﻩ ﻭﺍﻛﻔﻪ ﺗﻐﺴﻞ ﻻﺑﻨﻬﻪ ﺑﺎﻟﺴﻨﻚ ﺍﻟﺘﻔﺘﺖ ﻋﻠﻴﻪ ﻭﺩﺍﺭﺕ ﻭﺟﻬﻪ ﺣﺘﻪ ﻣﺎﺭﺣﺒﺖ ﺑﻴﻪ ....
ﺟﺮﺗﻠﻲ ﻛﺮﺳﻲ ﺻﺒﺎ ﻭﻛﺎﻟﺖ ﺍﻛﻌﺪﻱ ﻧﺘﺮﻳﻚ ﺍﻧﻲ ﻭﻳﺎﺝ ﺍﻧﻲ ﻫﻢ ﻣﺎﺗﺮﻳﻜﺖ ...
ﺍﺷﻮ ﻫﺎﻱ ﺍﻟﻮﺍﻛﻔﻪ ﺟﺮﺕ ﺍﺑﻨﻬﻪ ﺣﻴﻞ ﻭﻃﻠﻌﺖ ﻭﺗﻨﺎﻓﺦ ﻫﺎﻱ ﺷﺒﻴﻬﻪ ...
ﺍﻟﺘﻔﺘﺖ ﻋﻠﻰ ﺻﺒﺎ ﻛﺘﻠﻬﻪ ﻣﻨﻮ ﻫﺎﻱ ...
ﺻﺒﺎ ... ﻫﺎﻱ ﺣﻴﻪ ﺍﻟﺒﻴﺖ ﻣﺮﺕ ﺍﻳﻬﺎﺏ ﺍﺳﻤﻬﻪ ﺩﻣﻮﻉ ...
... ﺍﻛﻮﻝ ﺻﺒﺎ ﺍﻧﻲ ﺣﻴﻞ ﻣﻘﻬﻮﺭﻩ ...
... ﻟﻴﺶ ﺣﺒﻴﺒﻪ ...
.. ﻟﻴﺶ ﻣﺎﻛﻠﺘﻮﺍ ﻣﺮﺍﺩ ﺍﺧﺮﺱ ﻟﻴﺶ ﺿﻤﻴﺘﻮﺍ ﻋﻠﻴﻪ ....
... ﺑﻴﺴﺎﻥ ﺗﻌﺎﻟﻲ ﻧﺘﺮﻳﻚ ﻭﻧﺼﻌﺪ ﻓﻮﻙ ﻧﺤﺠﻲ ...
.... ﺗﺮﻳﻜﺖ ﻋﻠﻰ ﺍﻟﺴﺮﻳﻊ ﺑﺲ ﺍﺭﻳﺪ ﺍﻋﺮﻑ ﻟﻴﺶ ﻣﺮﺍﺩ ﻫﻴﺞ ﻭﻟﻴﺶ ﻣﺎﻛﺎﻟﻮﺍ ﻭﺷﻨﻮ ﺳﺮ ﻛﺮﺍﻳﺒﻬﻢ ﻣﺒﻴﻦ ﺑﻴﻨﻬﻢ ﻋﺪﺍﻭﻩ ...
ﻛﻤﻠﺖ ﺭﻳﻮﻙ ﻭﺻﻌﺪﺕ ﺍﻧﻲ ﻭﺻﺒﺎ ...
ﺻﺒﺎ ... ﺗﻌﺎﻟﻲ ﺍﺣﺠﻴﻠﺞ ﺑﺲ ﺍﻧﻄﻴﻨﻲ ﻭﻋﺪ ﺍﻟﻤﻮﺿﻮﻉ ﻳﻀﻞ ﺳﺮ
... ﻭﻋﺪ ﺑﺲ ﺍﺣﺠﻲ ...
... ﻣﺮﺍﺩ ﺣﺎﻟﻴﺎ ﻋﻤﺮﻩ 33 ﺳﻨﻪ ﻣﻦ ﻧﺠﺢ ﻣﻦ ﺍﻟﺴﺎﺩﺱ ﺭﺍﺡ ﻛﻠﻴﻪ ﺿﺒﺎﻁ ﺍﻟﻮﺣﻴﺪ ﻣﻦ ﺍﺧﻮﺗﻲ ﻃﺒﻌﻪ ﻳﺨﺘﻠﻒ ﻫﺎﺩﺉ ﻭﻣﺎﻳﺤﺐ ﺍﻟﻐﻠﻂ ....
ﻛﻤﻞ ﻛﻠﻴﻪ ﺍﻟﻈﺒﺎﻁ ﻭﻃﻠﻊ ﺩﻭﺍﻣﻪ ﺑﻼﺳﺘﺨﺒﺎﺭﺍﺕ ﺑﺒﻐﺪﺍﺩ ﻭﻋﺎﺩﻱ ﻣﺮﺍﺩ ﻳﺮﻭﺡ ﻭﻳﺮﺟﻊ ﻭﻛﻞ ﺍﺳﺒﻮﻉ ﻳﺠﻲ ﻳﻮﻣﻴﻦ ....
ﺟﺎﻥ ﻳﺤﺐ ﺑﻨﺖ ﺧﺎﻟﺘﻲ ﺍﻟﻲ ﻫﻲ ﺍﺧﺖ ﺩﻣﻮﻉ ﻣﺮﺕ ﺍﻳﻬﺎﺏ ﻭﺑﻴﻨﻬﻢ ﻋﻼﻗﻪ ﻭﺍﺻﻼ ﺍﻟﻜﻞ ﻳﺪﺭﻱ ﺑﻴﻬﻢ ﻭﻭﺍﺻﻠﻪ ﻟﻠﺨﻄﻮﺑﻪ ﺑﺲ ﻻﻥ ﺗﺪﺭﺱ ﻣﺎﻗﺒﻞ ﺍﺑﻮﻫﻪ ﻳﺰﻭﺟﻬﻪ ﻛﺎﻝ ﺍﻻ ﺗﻜﻤﻞ ....
ﺍﻟﻤﻬﻢ ﻣﺮﺍﺩ ﻣﻦ ﺛﺒﺖ ﺩﻭﺍﻣﻪ ﻗﺪﻡ ﻛﻠﻴﻪ ﺍﺩﺍﺭﻩ ﻭﺍﻗﺘﺼﺎﺩ ﻭﺍﺧﺬ ﺗﻔﺮﻳﻎ ﻳﻮﻣﻴﻦ ﺑﻼﺳﺒﻮﻉ ﻭﻛﺎﻡ ﻳﺪﺭﺱ ﻭﻫﻮ ﺿﺎﺑﻂ ﻋﻨﺪﻩ ﻃﻤﻮﺡ ﻣﻮﻃﺒﻴﻌﻲ ...
ﻫﺬﺍ ﺍﻟﺤﺠﻲ ﻫﻮ ﻭﺻﺪﻳﻘﻪ ﻧﻔﺲ ﺍﻟﺘﻔﻜﻴﺮ ﺑﺤﻴﺚ ﻫﻢ ﻣﻦ ﺍﻭﻝ ﺍﺑﺘﺪﺍﺋﻲ ﺳﻮﻩ ﻭﺩﺧﻠﻮﺍ ﻧﻔﺲ ﺍﻟﻜﻠﻴﻪ ﻭﺻﺎﺭﻭﺍ ﺿﺒﺎﻁ ﺍﺛﻨﻴﻨﻬﻢ ﻳﻌﻨﻲ ﻋﻼﻗﺘﻬﻢ ﺍﺧﻮﺍﻥ ﻣﻮ ﺍﺻﺪﻗﺎﺀ ....
ﻣﺮﺍﺩ ﻛﻮﻥ ﻧﻔﺴﻪ ﺧﻴﺮ ﻣﻦ ﺍﻟﻠﻪ ﺑﺲ ﻛﻞ ﻫﺬﺍ ﻣﻨﺘﻈﺮ ﺍﻣﺎﻝ ﺍﺧﺖ ﺩﻣﻮﻉ ﺗﻜﻤﻞ ﺩﺭﺍﺳﻪ ....
ﻟﺤﺪﻣﺎ ﻛﺎﻝ ﺍﻻ ﺍﺧﻄﺒﻬﻪ ﻭﻋﻮﺩ ﺍﻧﺘﻈﺮﻫﻪ ﺷﻨﻮ ﺍﻧﻲ ﻫﻴﺞ ﺿﺎﻝ ﺍﻟﻤﻬﻢ ﺧﻄﺒﻮﻫﻪ ﺍﻟﻪ ﻭﺗﻤﺖ ﺍﻟﺨﻄﺒﻪ ﺣﺴﺐ ﺍﻻﺻﻮﻝ ....
ﻭﺍﻣﺎﻝ ﻟﻴﻞ ﻧﻬﺎﺭ ﻳﻤﻨﻪ ﻭﺻﻠﺖ ﺑﻴﻬﻪ ﺣﺘﻪ ﺗﻨﺎﻡ ﺑﻐﺮﻓﺘﻪ ﻟﺤﺪﻣﺎﻳﺠﻲ ....
ﻣﺎ ﺍﻃﻮﻝ ﻋﻠﻴﺞ ﻃﻠﻊ ﻧﻘﻞ ﻣﺮﺍﺩ ﻭﺻﺪﻳﻘﻪ ﻋﻠﻲ ﺑﻐﻴﺮ ﻣﺤﺎﻓﻈﻪ ﻭﻣﺮﺍﺕ ﻧﻀﺤﻚ ﺍﻧﻜﻮﻝ ﻋﺒﺎﻟﻚ ﻳﺪﺭﻭﻥ ﺍﺻﺪﻗﺎﺀ ﻣﺎ ﻳﺘﻔﺎﺭﻛﻮﻥ ﻟﺤﻈﻪ ﻭﺣﺪﻩ ....
ﻣﻦ ﺍﻧﻘﻞ ﻣﺮﺍﺩ ﻣﺎﻛﺎﻡ ﻳﺠﻲ ﻫﻮﺍﻱ ﻳﻜﻮﻝ ﻃﺮﻳﻖ ﻭﺗﻌﺐ ﻳﻀﻠﻮﻥ ﻓﺘﺮﻩ ﻳﻠﻪ ﻭﻫﺬﺍ ﺍﻟﺤﺠﻲ ﺟﺎﻥ ﺍﻟﻮﺿﻊ ﻣﻮﺷﻲ ﺏ 2006 ...
ﻟﻴﺶ ﻣﺎﻳﻮﻡ ﻣﻨﻬﻦ ﺍﻧﺪﻙ ﻋﻠﻰ ﻣﺮﺍﺩ ﻣﺎﻳﺠﺎﻭﺏ ﺩﺧﻠﻨﻪ ﺍﻧﺬﺍﺭ ﻭﻣﺎﺧﻠﻴﻨﻪ ﻭﺍﺣﺪ ﻣﺎﺧﺎﺑﺮﻧﺎ ﻭﻣﺎﻛﻮ ﻣﺤﺪ ﻳﻌﺮﻑ ....
ﺿﻠﻴﻨﻪ ﻳﻮﻣﻴﻦ ﻋﻠﻰ ﻫﺬﺍ ﺍﻟﺤﺎﻝ ﻟﺤﺪﻣﺎ ﺍﺟﺎﻧﻪ ﺍﺗﺼﺎﻝ ﻣﻦ ﺍﻟﻤﺴﺘﺸﻔﻰ ﻛﺎﻟﻮﺍ ﻣﺮﺍﺩ ﺻﺎﺭ 3 ﺍﻳﺎﻡ ﻫﻨﺎ ....
ﺭﻛﻀﻮﺍ ﺍﺧﻮﺗﻲ ﻭﻋﻤﺎﻣﻲ ﻛﻠﻬﻪ ﺗﺤﺐ ﻣﺮﺍﺩ ﻭﺍﻟﻪ ﻛﻠﻤﺘﻪ ﺑﺎﻟﺒﻴﺖ ....
ﻧﺨﺎﺑﺮﻫﻢ ﻳﻜﻮﻟﻮﻥ ﺯﻳﻦ ﻟﺤﺪﻣﺎ ﻃﻠﻌﻮﺍ ﻭﺍﺟﻮﺍ ﺍﻧﺼﺪﻣﻨﻪ ﻣﻦ ﺷﻔﻨﻪ ﻣﺮﺍﺩ ﺍﻟﻨﻘﻴﺐ ﺍﻟﻬﻴﺒﻪ ﺍﻟﻲ ﺍﺫﺍ ﺻﺎﺡ ﺻﻮﺕ ﻭﺍﺣﺪ ﺍﻛﺒﺮ ﻭﺍﺣﺪ ﻣﺎﻳﺠﺎﺩﻟﻪ ﺻﺎﻳﺮ ﺍﺧﺮﺱ ....
ﺩﻛﺖ ﻭﻟﻄﻤﺖ ﺍﻣﻲ ﻭﺑﻮﺍﺟﻲ ﻭﺳﺎﻋﻪ ﻧﻜﻮﻝ ﺍﻟﺤﻤﺪﻟﻠﻪ ﺳﺎﻟﻢ ....
ﺍﻧﺮﻳﺪ ﻧﻌﺮﻑ ﺷﻨﻮ ﺣﺎﺩﺙ ﻟﻮﺷﻨﻮ ﻟﻴﺶ ﻫﻴﺞ ﺻﺎﺭ ﻭﻫﻮ ﺣﺘﻪ ﺟﺴﻤﻪ ﻣﺎﺑﻲ ﺍﺛﺎﺭ ﺣﺎﺩﺙ ....
ﻭﺭﺍ ﻳﻮﻣﻴﻦ ﻣﻦ ﺟﻴﻪ ﻣﺮﺍﺩ ﺟﺎﺑﻮ ﺻﺪﻳﻘﻪ ﻋﻠﻲ ﻣﻜﺘﻮﻝ ﻭﺻﺎﺭﺕ ﺍﻟﻤﺼﻴﺒﻪ ﻣﺼﻴﺒﺘﻴﻦ ﺍﻟﻜﻞ ﺗﺄﺛﺮ ﻣﺪﺭﻱ ﻧﺒﺠﻲ ﻋﻠﻰ ﻋﻠﻲ ﻣﺪﺭﻱ ﻋﻠﻰ ﻣﺮﺍﺩ ....
ﻭﺭﺍ ﻓﺘﺮﻩ ﻣﻦ ﺷﻮﻳﻪ ﻫﺪﺀﺕ ﻧﻔﺴﻴﺘﻪ ﻛﺘﺒﻠﻨﻪ ﺑﺄﻥ ﻋﻠﻲ ﻣﺘﻌﺎﺭﻙ ﻭﻳﺎ ﺟﻤﺎﻋﻪ ﻻﻥ ﻣﻮﻗﻔﻴﻬﻢ ﻭﺍﻟﻈﺎﻫﺮ ﻫﺬﻭﻟﻪ ﻋﺼﺎﺑﻪ ....
ﻭﻣﻦ ﺭﺍﺟﻌﻴﻦ ﻣﺘﻠﻜﻴﻬﻢ ﺑﺎﻟﻄﺮﻳﻖ ﺫﺍﺑﺤﻴﻦ ﻋﻠﻲ ﻭﻋﻠﻰ ﺍﺛﺮﻫﻪ ﻣﺮﺍﺩ ﻓﻘﺪ ﺍﻟﻨﻄﻖ ﺑﺲ ﻳﺴﻤﻊ ﻃﺒﻴﻌﻲ ....
ﻭﺭﺍﻫﻪ ﺑﻔﺘﺮﻩ ﺍﻟﻤﺤﺮﻭﺳﻪ ﺍﻣﺎﻝ ﻛﺎﻣﺖ ﺗﺴﻤﻌﻪ ﺣﺠﻲ ﻫﻲ ﻭﺍﺍﺧﺘﻬﻪ ﻭﺍﻣﻬﻪ ﻟﺤﺪﻣﺎ ﻋﺎﻓﺘﻪ ﻛﺎﻟﺖ ﻣﺎ ﺍﺗﺰﻭﺝ ﺍﺧﺮﺱ ...
ﻣﺮﺍﺩ ﺗﺮﻙ ﺍﻟﺪﻭﺍﻡ ﻭﻛﻌﺪ ﺑﺎﻟﺒﻴﺖ ﺍﺟﺘﻪ ﺍﻳﺎﻡ ﻣﺎ ﺍﺩﺭﻱ ﺷﻠﻮﻥ ﺗﺤﻤﻠﻬﻪ ﻣﺮﺍﺩ ﺍﻟﻜﺎ ﻣﺨﻠﻲ ﺍﻟﻐﺮﻓﻪ ﺭﻣﺎﺩ ﻣﻜﺴﺮ ﻛﻠﺸﻲ ﻫﺎﻱ ﻏﺮﻓﺘﻪ ﺑﺎﻟﺸﻬﺮ ﻣﺮﺗﻴﻦ ﻧﻐﻴﺮ ﻏﺮﺍﺿﻬﻪ ﻻﻥ ﻳﻜﺴﺮﻫﻦ ....
ﺑﺎﺑﺎ ﻃﺮﺩ ﺍﻣﺎﻝ ﻣﻦ ﺍﻟﺒﻴﺖ ﻻﻥ ﻛﻠﻤﺎ ﻳﺸﻮﻓﻬﻪ ﻳﻨﻬﺎﺭ ﻭﺷﻜﺪ ﺭﺩﻧﻪ ﻧﺰﻭﺟﻪ ﻭﺑﻨﺖ ﻋﻤﻲ ﺗﻤﻮﺕ ﻋﻠﻲ ﻛﺎﻟﺖ ﻗﺎﺑﻠﻪ ﺑﻜﻠﺸﻲ ﺑﺲ ﺭﻓﺾ ﺍﻟﺰﻭﺍﺝ ﻧﻬﺎﺋﻲ ...
ﻟﺤﺪﻣﺎ ﺑﺎﺑﺎ ﻭﻣﺎﻣﺎ ﻣﺘﻔﻘﻴﻦ ﻭﺧﺎﻃﺒﻴﻨﺞ ﻭﺍﺣﻨﻪ ﻣﺎﻧﺪﺭﻱ ﻣﻦ ﺳﻤﻊ ﻣﺮﺍﺩ ﻗﺒﻞ ﺍﻟﻌﻘﺪ ﺗﺨﺒﻞ ﺭﺟﻊ ﻧﻔﺲ ﺍﻻﻭﻝ ﻳﺮﻳﺪ ﻳﺤﺠﻲ ﺑﺲ ﻣﺎﻳﻜﺪﺭ ﻭﻻ ﻳﻜﻌﺪ ﺳﺎﻋﻪ ﻳﻜﺘﺐ ...
ﻫﺪ ﻋﻠﻰ ﺍﺑﻮﻱ ﻻﻭﻝ ﻣﺮﻩ ﻟﺰﻡ ﺍﺑﻮﻱ ﻣﻦ ﺭﻛﺒﺘﻪ ﻭﻛﻮﻩ ﻭﻛﻔﻨﻪ ﺑﻄﺮﻳﻘﻪ ﺣﺲ ﻧﻔﺴﻪ ﻣﺬﻟﻮﻝ ﺷﻠﻮﻥ ﻳﺨﻄﺒﻮﻥ ﺑﺪﻭﻥ ﻋﻠﻤﻪ ﻭﺷﻠﻮﻥ ﻣﺎﻳﻜﻮﻟﻮﻥ ﻟﻠﺒﻨﻴﻪ ﺍﻧﻲ ﺍﺧﺮﺱ ....
ﻛﻮﻩ ﻫﺪﻳﻨﺎ ﻭﺑﺎﺑﺎ ﺭﻏﻢ ﻭﺿﻌﻪ ﻭﺗﻬﺠﻢ ﻣﺮﺍﺩ ﻣﺎﻋﺎﻓﻪ ﻳﻜﻮﻝ ﻟﻮﻳﺤﺠﻲ ﺟﺎﻥ ﺭﺩﻳﺖ ﻋﻠﻲ ﺑﺲ ﺧﻠﻲ ﻳﻄﻠﻊ ﻏﻀﺒﻪ ....
ﺍﻣﺎﻝ ﻣﻦ ﺳﻤﻌﺖ ﺭﺍﺡ ﻳﺘﺰﻭﺝ ﺍﺟﻮ ﻋﻠﻴﻨﻪ ﻭﻛﺎﻟﻮﺍ ﺑﺪﻭﻥ ﻣﻬﺮ ﺍﺧﺬﻭﻫﻪ ﺑﺲ ﻫﻮ ﻣﺎﻗﺒﻞ ....
ﻟﺬﻟﻚ ﻳﺎﺑﻴﺴﺎﻥ ﻣﺎﺷﻔﺘﻲ ﻣﺮﺍﺩ ﻛﻞ ﻓﺘﺮﻩ ﺍﻟﺨﻄﻮﺑﻪ ﻻﻥ ﻣﺎﺟﺎﻥ ﻗﺎﺑﻞ ﻭﻟﺤﺪﺍﻻﻥ ﻣﺎﻗﺎﺑﻞ ﻭﻳﻨﺎﻡ ﺑﻐﻴﺮ ﻏﺮﻓﻪ ...
ﺑﻴﺴﺎﻥ ... ﻫﻲ ﺗﺤﺠﻲ ﻭﺍﻧﻲ ﺗﺄﺛﺮﺕ ﺣﻴﻞ ﻧﺰﻟﺖ ﺩﻣﻮﻋﻲ ﻋﻠﻰ ﺧﺪﻱ ﻣﻦ ﺍﻟﻌﺰ ﻟﻠﺬﻝ ﺍﻟﺮﺏ ﻳﻌﻴﻨﻪ ....
ﺑﻌﺪﻧﻪ ﺍﻧﺴﻮﻟﻒ ﻓﺰﻳﻨﻪ ﻋﻠﻰ ﻓﺘﺤﻪ ﺍﻟﺒﺎﺏ ﻫﻮ ﻣﺮﺍﺩ ﺑﻌﻴﻮﻧﻪ ﺣﺠﻲ ﺟﺎﻥ ﻣﺮﻛﺰ ﻋﻠﻴﻪ ﻭﺻﺎﻓﻦ ﺑﻌﻴﻨﻲ ...
ﺻﺒﺎ ﺑﺴﺮﻋﻪ ﻋﺎﻓﺘﻨﻪ ﻭﻃﻠﻌﺖ ﻭﻫﻮ ﺗﻘﺮﺏ ﻋﻠﻴﻪ .....
ﻳﺘﺒﺒﺒﺒﻊ