مساءكم خيروعافية احبتي القراء
البعض ديشتكي من بطيء الاحداث
ويكولون اكو بعض التفاصيل مو مهمة بالسرد
بس احب انوه على شغلة
اني مستحيل اكتب اي تفاصيل مالهة لزمة
حتى لو جانت بسيطة
كل كلمة اكتبها بالبارت الهة دور بحياة الابطال
والقاريء الحاذق راح يلاحظ ترابط احداث ومواقف
القصة بالتسلسل
احب اوجه كلامي الى من يشتكي من بطيء سير. احداث القصة
واكول لا تتوقعون مني ان ابخس بحق قصتي
واسرع بالاحداث
واختصر قصتي بثلاث بارتات
مستحيل اضيع تعبي واهمش القصة شلون مجان
واغير خط سير سرد القصة علمودكم
اني عندي متابعين جدا ممنونة الهم مستحيل اخذلهم
وهذا حقهم علية لذلك احب اكول
اهلا بكم بقراءة قصتي ان كنت تملك كلمة جميلة فقلها
فان لم يكن لديك كلام فاصمت ودع غيرك يقرء
🌹🌹🌹🌹🌹🌹🌹🌹🌹🌹🌹🌹
#اساور_الفضة_ج٢
#نهى_الحسون
هدى
يمة اني قريت رسالة هالة واني كلبي اجة يوكف
من الغيض ما اعرف شصار بية
جنت اسمع من يردون يشبهون واحد
بقمة غضبه يكولون عليه صار نار
اني هسة جربت هذا الشعور احس الحرارة كامت تطلع من راسي
والله ايدية كامت ترجف وانخبصت اريد بس الحك
عدلت شلون ما جان
حتى ما اعرف شلون كملت نفسي
ونزلت طلقة اريد ادخل عليهم مستحيل اسمحلهم
يستغفلوني حتى لو اني اكلت تبن
ووافقت بالبداية بالوضع بس مو معناها
كلش يسووها بلا ملح
على الاقل جان فكر بخالة وسوة حساب الخطار وخواته
مشيت بسرعة للاستقبال
من ورة القهر صرت كلشي ما اشوف
لكيت الباب شوية مردود
لكيت رهف واكفة وقاسم كدامها
وجان اسمع صوت زمخة قاسم برهف بصوت رج الاستقبال
.. ااااااانا شنو كلت شنو حضرتج تستغفليني لو شنووو
جنت هادة بكل سرعتي وبكل قوة
عزززة هو اني سمعت صوت قاسم اليرعد
وجان كبل الزم ابريك وشطحت يم الباب
وحطيت ايدي على حلكي وكتمت صوتي وصرت اباوع لرهف الي تتوسل بقاسم
الي جنت اني متخيلته مو مثل الي هسة كاعد اشوفه
كمت من على الكاع حاولت ما الفت انتباهم
كعد عقلي يعيد برمجة حساباته ويقرر ردة الفعل المناسبة لهيج موقف
ما اخذ مني القرار غير بس جزء من الثانية
ولكيت روحي ماخذة وضعية الاصغاء
لازم اعرف بالاول شنو سبب غضب قاسم وبجي رهف
رهف تتوسل.. قاسم عفية يعني والله محتاجة هاي السفرة
وهو اني قابل ويامن راح اسافر
وية ابن خالتي وخواته ويانا
انت ليش تصعب علية الامور
قاسم .. رهف البارحة انتي سألتيني واني جاوبتج
وكلت لا يعني لا انسي اخليج تسافرين تتونسين بتركيا وية هذا ابن خالتج الخيخة وخواته المايصات
لا ونوب لوحدكم
يعني اهلج بكل عقلهم مصدكين هذا رجال
ومسلميه مسؤلية اربع بنات يسفروهم وياه
انعل ابو هيج ونسة الي مسؤول عنها حلل
.. قاسم اني مو فهمتك وكلتلك بابا بس يخلص شغله
راح يسافر هو وماما ورانا
.. اي واني جاوبتج وكلتلج انتظري امج وابوج
وسافري وياهم شمعنا الا وية هذولي
لو هي حبكت تموتين عالدبك لازم يعني تسمميني
ما يوم كلتلج شي وبردتي كلبي وكلتي صار
اذا ما تحطين كلبي بيدي وتخليني اعصب ما ترتاحين
.. اي بس منا علما بابا وماما يسافرون يكونون
بيت خالتي فارين نص تركيا
ولاتنسى ترة بابا وماما مسافرين علمود العلاج
يعني ما راح الحك اشم هوى واتونس
وهي حلاتها السفرة تكون شبابيةً
.. رهف انا هذا العندي وانتي اختاري لو انا لو السفرة
باوعت عليه وكامت تبجي
وحجت بصوت مبحوح من اثر البجي
.. قاسم يعني تعرف كلش زين
اني داخلة كلية طب وطول السنة اني دك دراسة
وحتى ما الحك ارفع راسي من الكتاب
والمواد كلها يحتاجلها تركيز وتعب وحالة نفسية
منا على ما خلصت هاي السنة واجتي العطلة
احس بروحي حيل اختنكت
وهاي السفرة اجتي بوقتها المناسب
.. انا ممعترض على فكرة السفر
انا معترض على الناس الي راح تسافرين وياهم
.. قاسم انت ليش اناني وكلشي تريده لازم اسويه
ليش متراعي ظروفي وتتنازل شوية
يعني دا اشوف دائما اني الطرف المتنازل بهذا الحب
.. بالله بشنو حضرتج ضحيتي
فهميني اتحديتي امج وزعلتيها
لو وكفتي بوجه ابوج وحاربتي الكل علمودي
وبقيتي تنتظرين متحملة اربع سنين ولا وبعد وراية
فوكاهم ثلاث سنين لحد ما تخلصين دراستج
وتاخذين شهادتج وبعدين ورة كل هذا يلة اكدر اتزوجج
بالله متكليلي شنو السويتي انتي علمودي
جان قاسم ديحجي معاناته بس عكس الادوار
وخلة رهف بمكانه حتى تحس بي
جاوبته رهف بعبية
.. ترة مو بس انت واني هم مثلك دا اعاني ومقدرة
تضحيتك وصبرك علية
بس اني بالمقابل هم ضحيت
يكفي انت اتزوجت وحدة ثانية واني بقيت وياك
يكفي اعرف امك وخواتك ما يطيقوني ومتحملة وساكتة عليهم
هو مجرد موافقتي بالزواج منك تعتبر اكبر تنازل وتضحية اقدمها لاجل حبنا
انتبهت لقاسم عقد حواجبه وضيك عيونه
وسألها بصوت هامس هاديء هاي الحركة صرت اعرفها
.. شلون يعني موافقتج عالزواج مني تعتبر اكبر تنازل
عزة بعيني ما دام صار الصوت هاديء
معناها قاسم وصل للحافة بصبره عليها وراح ينفجر
كون هي ذكية وتعرف لاطباعه وتتلاحك لروحها وتنفذ بجلدها
جاوبته وهي معصبة وكالت
.. يعني كلش كافي اني دكتورة ومدرت بال لهذا الشي ووافقت اتزوجك الك
هذا يثبت اني شكد احب.........
رفع راسه وعيونه مفتوحات على وسعهن وخزرها
وقاطعها بصوت يلسع من الغضب
.. اااااااااااش ولا كلمة اسمع منج
الانسان يبين معدنه بساعة الغضب
يكوم يتصرف على حقيقته بدون تصنع ولا تزلف
وانتي طلعتي على حقيقتج
يعني حضرتج تتصورين ان انتي صاحبة فضل
وتنازلتي من مقامج العالي ووافقتي على
قاسم المتخلف الي مو من مستواج
كلج خير وبركة والله وطلعتي اصيلة بنت اصول
من وافقتي علية لازم هسة انا اكون ممنون لحضرتج
حجاها بغيض
.. لحظة قاسم اني مجنت اقصد هيج.....
.. وعنج لا قصدتي الحليم تكفيه الاشارة
ومع الاسف انا وياج انتي بالذات جنت اعمى واتغافلت عن الاشارت
والتلميحات الي جانت توصل لاذني واسمعها واجذب روحي
تدرين ليش اجذب روحي وما اصدك اذني
لان جنت متصور انتي تختلفين عنهم
انتي شي نادر طير خارج السرب
اني من الاول اعرف بعمامي وواحد منهم ابوج
كلهم يباوعولي اني وخواتي وامي بالعين الصغيرة
وجنت ماخذ عهد على نفسي الما يريدني ما اشتريه بنعال.
الا انتي اول ما رجعت من الخارج ووكعت عيني عليج
وكلبي اتعلك بيج وببرائة وجهج كلت هاي مستحيل تكون مثلهم
اصلا صرت اتصارع وية كبريائي
واكول مستحيل اتنازل واحط ايدي بأيد الرجال
الي اخذ وسلب كل حقوقنا وضلمنا اني وخواتي وامي
بس حبج عماني وخلاني اتغاضى عن هواية امور
ونسيت انتي زرعهم ومن طينتهم واكيد تكونين
نفس حقارتهم ولؤمهم
بس تدرين شنو هفوة السانج صحتني على شي جنت اني هم ممنتبه عليه
خلي اكلج اياها خاف ياخذج الغرور لابعد الحدود
انا اتوقع ثلثين تمسكي بالزواج منج
جانت مسألة عناد وتحدي واصرار
من الله ردت اكسر خشم ابوج بيج
ما انكر الثلث الباقي كان حب غبي
رهف كانت تبجي منهارة
رفعت راسها ومدت ايدها تريد تلزمه و تتوسل لقاسم يسمعها
.. عفية قاسم لتحجي هيج اني احبك واموت بدونك والله
نتر ايدها بعيد عنه مثل الالتماس الكهربائي
.. هذا حجي ماكول خيره
شوفي رهف من هاي اللحظة انسي شي اسمه قاسم بحياتج
روحي جربي حظج وية واحد من مستواج
من نفس المستنقع البارد المريض الي اجيتي منه
اتوجه للباب يريد يطلع واني كبل رحت ركضت اريد اختل قبل لا يشوفني ويعرف بية جنت اتسمع
رحت اركض مثل الدجاجة التايهة
اريد اختفي من كدامه ما اريده يشوفني احوم بهذا المكان
كبل تثبت علية التهمة. ضاكت بية الواسعة وهذا البيت العظيم صار صغير بعيني
وما اشوف روحي الا واني خاتلة جوة الدرج
كرفصت روحي شلون ما جان
طلع من باب الاستقبال وسده وراه
وسمعت نقاله دك. ورد عالمتصل
وظل يفتر بالصالة ويحجي وية الطرف الاخر
جان يحجي بغضب عرفت هذا المكرود المتصل عليه هسة بهاي اللحظة امه داعية عليه
صرت اسمع اصوات الجهال يركضون بالبيت
عبالك عندهم مارثون سباق الثيران
ما شاء الله هنة اخواته اربعة
وكل وحدة عندها جهال عقال ملائكة
فكالبين البيت ومسوين هوسة ماكو مثلها
خرب حظي من وصلو لحد هسة ما كعدولهم دقيقة
يمة شكد وكحين
انتبهت لقاسم بعده يحوم بالصالة ويسولف
يلعن ابو المكالمة ادري شنو لطشت بهذا المكان
يعني الشبكة متتحصل الا بهذا المكان هسة غير يروح
حتى اطلع
سد النقال وجان تجيه اخته فاطمة ووكفته تحجي وياه
بموضوع مهم
يالله هاك استلم اشتغلت رحمة الله
بالله اني هسة شلون اطلع من كدامهم والله اصير فلم
جنت مشغولة اريد اطلع نفسي من هذا المأزق
وما حسيت الا على زين اجة يركض عالسريع
وختل جوة الدرج منطيني ظهره يراقب الطريق
وصاح
يالله حلاااااااااااال
جان ممنتبه علية لان حضرته من زود الوكاحة
ملتهي اباوع عليه كل شوية يمد راسه يباوع ويرجع يختل.
دار وجهه وجان يشوفني وراه كمز من مكانه مخترع
زين .. يمة عبالي جني
عمة حتى عمة هذا شعرفه بلقبي لا يكون خاله
كايله علية عوجت حلكي بغيض
.. جني بعينك يا وكح
زين جان يباوع علية بتعجب وكأن شايفله شي غريب
.. اكول خالة انتي شنو تسوين هنا خاتلة
صفنت بوجهه وضحكت
.. خالة حبيت العب وياكم لعبة غميضة
وجان اسمع اصوات الجهال تصيح احترك
احترك
هاي جانت كلمة السر الي يطلقونها اذا لكو واحد من
المجموعة
وبعدها سمعت صاحوا حيااااااا على الجميع حي على الجميع
عبالك كامو يأذنون من كد الصياح الله يلعن بليسهم
بس سمعت واحد لاخ كللهم لا اوكفو بعد زين
اجوي للصالة جان واكف بيها قاسم وفاطمة
وسألوه
خالو ما شفت زين
سمعت قاسم الي جان مندمج يحجي وية اخته
قطع كلامه وجاوبهم
.. يمكن شفته راح هناك لصفحة الدرج
التفت علية زين وكال يالله خالة كومي
خلي نطلع ونصيح حي على الجميع قبل لا يصيدونا
بس مع الاسف ما لحك يكمل كلامه ما نحس الا الجهال
كلهم التمو على حظي البازة
ونوب زاد صياحهم من شافوني اني شخصياً خاتلة جوة الدرج
ما نحس الا اجاهم صوت عاط بيهم
قاسم .. بسسسسس انتوا شنو سالفتكم ما تركدون شوية
جان يحجي ويقترب منهم
هاي بنت منى كالت
.. خالو مو بس احنا نلعب حتى خالة هدى
عاااااا اعمل نفسك ميت
جمدت من الموقف وما اتحركت
انتبهت عليه حنى ظهره بوضعية الركوع
ودنك وباوع مصدر الهوسة منو
وجان توكع عيونه علية واني بس شفته
صحت بصوت اضيع الفشلة
.. دييييييييييييي
اباوع عليه ضحك على شكلي مامصدك
.. هادي لاتكول جنت تلعب وياهم لعبة غميضة
صفنت بوجهه شوف هي وحدة من الثنين لو اتنازل
عن سمعتي الهداوية لو يكتشف اني سمعت كلشي
وما عندي غير اتنازل عن السمعة
جليت صوتي. وكلت
.. اي شكو بيها شفت غوحي (روحي) ضايجة كلت. العب وياهم
شوية. اغيغ (اغير) جو
مد ايده الي حتى اطلع من جوة الدرج
لزمت ايده وطلعت واني انفض بملابسي واعدل بشعري
اقترب مني وهمس
كال سبحان الخلقج
رفعت عيوني وكلبي كام يركص على هاي الكلمتين
عااااا
وكمل كلامه .. سبحان الخلقج اشوف كل مواصفات
الفارة تنطبق عليج
شهكت من الم القصف بحيث صرت امسح بكصتي
برطمت واني حاصرتني البجية
.. تغة ميصيغ (ترة ميصير) كل شوية مطلعلي لقب
ساعة جني ساعة فاغة (فارة) ساعة ذبانة
ترة حس بية انت دتجغح (دتجرح) الانثى الي بداخلي
ابتسم حاصرته الضحكة
.. لا وبعد نسيتي تشبيه البزونة
خصوصاً من تكعدين تغوغوين
رفعت راسي .. على فكغة (فكرة) كل لقب تطلقه علية
انت الك نصه
.. شلون يعني
.. يعني اذا اني بزونة فانت عتوي
واذا اني جنية فانت جني
..واذا اني فاغة (فارة)...
وكمل كلامه .. واذا انتي فتحتي حلكج بعد
راح تنسحلين
حجاها على نفس الوزن واللحن
جنا نحجي اني وقاسم بكلام عادي بس بنفس الوكت جنا
فاصلين عن الي حولنا
انتبهنا عالجهال يكولون لزين
يالله زين امشي خلي نلعب
وزين واكف بمكانه يباوع علينا. ما يقبل يتزحزح
من مكانه
اسمعه يكول .. اوكفوا انتظروا بس خلي اشوف
خالوا شلون راح يسحل هدى
اني شهكت وحطيت ايدي على حلكي
.. خاب شوف هذا الفصمة عاش اللحظة
رفعت راسي وهمستله حتى ليسمع الفصعون الي يمنا
.. شوف كلامك غاح (راح) ينعكس
على تصغفات (تصرفات) جهال اختك بالمستقبل لان انت ما شاء الله قدوتهم
باوع علية بنظرة غريبة وكأنما كلامي جديد على
سمعه
.. ولك زين امشي منا لا اجي اسحلك
راح زين يركض وانتبهت لباب الاستقبال انفتح
وطلعت رهف. والعيون مورمة واني سويت نفسي ممنتبهة عليها
بس جان تركيزي كله منصب على
قاسم الي معاني وجهه اتغيرت من الاسترخاء
الى الغضب المجروح
عرفت قاسم ديعاني بس ما يريد يعترف
وبعدها اجتي هالة تصيح تدور علية
بس شافتني من بعيد نست قاسم واجتي تركض
.. لج عوبة وين ختلتي صارلي. ساعة ادور عليج
قاسم .. الله ياخذج يا هالة
لا تكولين انتي الثانية هم جنتي تلعبين الغميضة
هالة بغباء ممفتهمة اي شي
.. هههههه ليش هو اني شوكت بطلت غميضة
حتى ابدي العبها
اشو اني كضيت عمري كله اختل من ورة نبع الحنان
وتهديدها
دخل هشام وصاح لقاسم .. الولد يردونك بالباب
وكال .. يالله جاي .. جاي
باوع علية وبعدها دار وجهه وراح
جنا اني وهالة دنراقب مشية قاسم وهشام
واول مطلعوا
التفتت علية هالة وكالت
.. لج عوبة وين جنتي خاتلة صارلي ساعة ادور عليج
اريد اعرف شصار ماكو انتي فص ملح. واختفى
.. اولا جنت خاتلة جوة الدغج (الدرج)
وثانياً عندي الج خبغ (خبر) اذا سمعتيه غاح ( راح) تنجلطين
.. كولي الله عليج شنو هذا الخبر
بخصوص منو
.. بخصوص كهف
هالة بألحاح
.. شنو .. شنو كولي
فتحت حلكي حتى احجي وجان
تجينا ام قاسم
.. ياصلوات على النبي الحبابات هنا واكفات واني
ادور عليهم
هالة بتصنيف.. يمة لاتكولين انتي همين دتلعبين الغميضة وتدورين علينا
ام قاسم.. اكلج تجين تساعديني بالمطبخ
لا اسويج غميضة يالله تحركي ترة بيت عمج كامل راح يوصلون
بيت عمهم كامل يصيرون نفسهم عيال منى
هالة.. شمعنا اني تحجين علية هسة هاي مو هدى
اشو ما حجيتي وياها
ام قاسم ببتسامة .. احاجيج يا بنتي اسمعج يا جنتي
يعني الكل مشمول يالله اتحركوا
دارت وحجهة ودخلت للمطبخ
واني وهالة وحدة تباوع للثانية
.. ها عوبة حغكتي (حركتي) فلمي يم خالة يالله اغتاحيتي (ارتاحيتي
مشيت من كدامها وجان اسمع صوت
شهكة هالة
.. لج عزة بعينج يا هدى
التفتت عليها .. ها هالة بطلي سوالفج ادغي (ادري) بيج
تصنفين علية
.. لج عوبة بالاول دنكي باوعي شنو لا بسة برجليج
وبعدين كعدي احجي
دنكت اباوع وجان اشوف روحي لابسة حذائي تك وتك
وكل واحد لون شكل
هالة.. يا هدى بس لا صار عندج عمة الوان
جاوبتها واني اتذكر حركة كلبي من قريت الرسالة
.. لج عوبة هاي من كد القهغ (القهر) والغيض انعميت
وما كمت اشوف اي شي كدامي
مو زين ومني طلعت عالحذاء فسهلة
بعدها بدلت الحذاء
ورحت اعاون خالة ام قاسم بالمطبخ
شكل الجماعة وصلوا وخالة لزمتهم عالعشا
الي عرفته عمامهم جايين علمود سالفة العركة الي صارت بين قاسم وعمه كاظم
بلشت احضر السفرة وية البنات
اباوع لبنات عمهم كامل عيناً نفس طينة رهف هادئات
وثقيلات حتى مجاملة ميعرفن
الجمود الي عندهن
يرفع حموضة المعدة ابد مينهضمون
وطول ما اني اتحرك وهنة عيونهم علية
زوجة عمهم محمد ام رهف بحجة الشقة ضحكت كالت
.. حبيبتي هاي شنو انتي شكد قصيرة
خطية قاسم شلون مدبرها وياج
شهكت من سؤالها الوقح درت وجهي عليها وضحكت
.. ههههههه والله يا خالة ذكغني (ذكرني) كلامج بحبيبي قسومي
يكول من كد ما ادنك غاسي راسي) حتى اوصلج واحصل بوسة منج
احتمال يصيغ (يصي) عندي انزلاق بالفقغات (بالفقرات) العنقية
ام قاسم بقصد .. اي خالة حقه الي يريد الحلو يصبر على مره
وانتي ما شاء الله حلوة وربي ابني عليج
هالة واكفة يمي .. شكل امي راح تكعد تشعر
لكزتها بكوعي .. اششش خليها احسن دشوفيهم شلون عيونهن نطت من مكانها
غاح (راح) يموتن من الغيض
زوجة عمهم كامل كالت.. الله يهدي سرهم ويفرحج بأطفالهم.
ام قاسم.. الللهم امين ربي يسمع منج
كالتها بقوة
البنات كلهم اتجمعوا وكعدوا بالهول
اباوع لرهف صافنة بغير عالم ضايعة
والله حقها الي صار مو شوية واحييها ان هي بقت صامدة لحد هسة وضلت متماسكة
دخلت للمطبخ وسألت
.. اكول خالة وين نفرش السفرة
سرور جانت بالمطبخ الحار دتكلي الكبب
وام قاسم وهالة ومنى بالمطبخ الحار واني ايد للبيت
وايد وياهم لان الجهال الله يحفظم مبقى مكان ما هوسوه
وفاطمة وكوثر وهديل يم البنات بالهول
ام قاسم.. حبيبتي فرشي بالهول لان ميز الطعام ميكفي
.. صاغ خالة (صار)
اخذت النايلون السفري
ورحت للهول افرش كوثر بس شافتني حطت ابنها عالقنفة واجتي تساعدني
وفاطمة ماخذة دور خالة وكاعدة وية نسوان عمامها
اما البقية حتى ما اتحركوا ولا كالو خلي نكوم ندخل للمطبخ ننقل الصحون
اما ست هديل دخيل الله شكد لوكية لازكة ببنات عمها
احس بيها تريد تنضم لسربهم وهمة حاطيها بنصهم
يضحكون عليها والغبية مكيفة على ذلك
دنكت افرش السفرة وجان شعري ينزل صفح شهكت وحدة من بنات عمهم وكالت
.. هذا شعرج شنو حقيقي لو تركيب
جاوبتها .. لا حبيبتي هذا شعغي. مو تغكيب (شعري مو تركيب )
خليت التغكيب(التركيب) لاهله اني مااحتاج
فاطمة حجت وية بنت عمها
.. كولي ماشاء الله وصلي عالنبي
رجعت باوعتلي وكالت
فاطمة .. هدى يمكن سمعت صوت امي تصيحج
رحت بالمطبخ واجتي وراية فاطمة وكالت بغيض
..روحي لمي شعرج ولبسي شال بسرعة
رحت حسويت مثل مكالت بدون نقاش ورجعت
وبلشنا نصب العشا
واني وهالة ومنى اتعاونة ننقل الصحون
حطينا الصحون عالسفرة
وجان وحدة من بناتهم كالت
.. هاي شنو كبة وكباب اني ما احب هذا الاكل
منى نزلت الصحون وكالت
.. حبيبتي هذا الموجود
وراحت وعافتها واني بقيت اوزع الصحون عالسفرة
دخلت خالة ام قاسم وبيدها الخبز
والبنات حجوا وية ام قاسم
.. خالة احنة منحب ناكل كبة وكباب وصي على دليفري جانوا يحجون بدلع
والامهات عبالك الموضوع مو يمهم ولا وحدة بيهم خزرت بنتها وكلتلها عيب احنة خطار
ام قاسم كالت.. ليش خالة هاي نعمة الله واكل نظيف
احسن من الاكل الجاهز المانعرف مصدره منين
مسوينه من لحم كلاب مدري لحم حمير
والله عذروني خالة ماكدر اوصيلكم لان ما عدنا واحد يروح يجيبلكم اكل جهاز
هديل كاعدة بين بنات عمها وكالت
.. لا ماما خلي العم حسنين هو يروح يشتري
ام قاسم خزرت هديل وحجت من بين اسنانها
.. العم حسنين مو هنا طالع
وجان تجي هالة وشايلة بدها الصحون
ولحكت على الجملة الاخيرة ودخلت بالموضوع بدون متفتهم اي شي
.. لا يمة العم حسنين موجود هسه شف.....
ما لحكت تكمل كلامها
كبل قطعت كلامها وكمزت من مكانها
وعفست وجها تباوع لامها وهي تحك بزندها
وبدلت اقوالها
.. هاااااا اي صدك اتذكرت خطية العم حسنين
باجر مات الله يرحمه جان خوش رجال
ههههه الله يلعن بليسج هالة شلون دارتها
وهديل انخطف لونها وضربته عالصامت
وبنات عمهم هم وياها ضاربينه عالصامت
دخلت للمطبخ ولكيت الولد ناقلين الاكل كله للاستقبال
ومخلصين كلشي وديتعشون
خالة صاحت لسرور
ام قاسم.. يوم سرور يالله تعاي اتعشي وسوي لفات لجهالج
كافي انكسر ظهرج عالطبخ
دخلنا كلنا ولكيت الكل كاعدين عالسفرة
بس كم وحدة من بنات عمهم مكاعدة ميحبون هذا الاكل
عشتوا
اجيت اكعد وجان ام قاسم كالت
..بنات منو بيكم حطت قوري الجاي عالطباخ
حتى من يخلصون الرياجيل العشا يكون جاهز؟؟؟
اني والبنات صرنا وحدة تباوع بوجه الثانية بتسائل
اجتي منى تكوم من السفرة وكالت
.. نسينا هسة اني اكوم اسوي
كمت قبلها وكلتلها
.. لا تكومين ابقي كاعدة بمكانج اني غايحة (رايحة)
انتبهت لنظرات ام قاسم جانت كلها فخر ابتسمت
.. عفية ببنيتي
رحت للمطبخ ولكيت الجهال منتشرون بكل مكان
احس بيهم مثل القرود شي صاعد عالمجمدة
وشي متعلك عالكاونتر وشي فاتح الثلاجة وشي كاعد
فوك ميز الطعام وبس يدردمون
وشي شايل لفته ويفتر وياكل
بس دخلت كمزو بس من شافوني
رجعوا كملوا تسمع بنت منى تكول يمة كمزت عبالي
خالة هالة جان شلعت اذاناتنا
ابتسمت على كلامها وكملت طريقي ودخلت للمطبخ الحار
ولكيت زين لازم جداحة بيده يريد
يشغل الطباخ ولازم بيده الثانية
لعبة بارود العاب نارية
كمت عطت بي واخذت الجداحة واللعبة اخذتها من عنده وطلعته من المطبخ
وهو برطم شفايفه وطلع من المطبخ وهو يكول
.. عااااادي اخذيها عندي بعد وحدة ثانية
.. الله يلعن بليسه هذا الولد لو ابني جان علكته بالبنكة
غسلت القوري وترسته ماي واني ادردم
وحطيته عالطباخ وبديت اشغل بالجداحة
.. شنو هالوكاحة العندهم الله يساعد كوث.......
وجان تكب النار بوجهي وبالمطبخ وحوطتني
واختفت واني من الخرعة صرخت بصوت عالي
رجلية صاروا خيوط من الهبطة وكعدت بالكاع
واذاني انصمت اسمع بيها صوت طووووووط
وما احس الا وقاسم والولد فوك راسي وام قاسم والبنات
كلهم جانوا مصدومين
اباوع لقاسم الخوف بعيونه ركع يمي بالكاع
ورفع راسي وكعد يحرك بشفايفه
بس بدون صوت
لو يمكن اني من زود الهبطة صرت ما اسمع
حسيت على رشة ماي اجتي على وجهي
وايد ناعمة تمسح على وجهي
باوعت شفتها ام قاسم
هذا الحجي كله صار واني اشم ريحة شياط
شعواط
يعني حالة كلش غريبة اشتعل المطبخ وكب بالنار وانطفى بلحظات شلون وليش صار هيج ما اعرف
حسيت بقاسم كومني من مكاني
وكال خلي اوديها للمستشفى
اسمع ام قاسم .. قل اعوذ برب الفلق
وتصلي عالنبي
وكالت لقاسم خلي نصعدها فوك بالاول خلي تبدل ملابسها
لمني قاسم لصدره بذراعه وسندني عليه والبنات هالة ومنى وكوثر صاروا يبعدون بالجهال وبنات عمهم الي سادين الباب
دخلوني للغرفة
فاطمة كالت لامها
.. يمة هاي عين الماسمت بأسم الله
هاي بنت عمي محمد الصغيرة كابلت شعرها وكعدت
قاسم.. بالعجل بدلولها ملابسها خلي اخذها للمستشفى
حجيت وهاي اول مرة يطلع صوتي
بهمس.. لا ما يحتاج اني ما متأذية
كوثر دخلت للغرفة وكالت
..هذولي الجهال جانوا يلعبون بغازالطباخ
هي حجت واني اتذكرت
زيوني ابنها من جان يلعب بالطباخ وفاتح الغاز وكعد يحجي وياي
وبين ما خذت الجداحة من عنده والالعاب
وطلع وبعدها غسلت القوري ونتبهت للغاز جان مفتوح طفيته
ورجعت اترس القوري ماي
وبعدها من شغلت الجداحة اشتعل جو المطبخ بالنار
كلما اتذكر الموقف يوكف شعر راسي وريحة الشياط
ما فارقتني
ما حسيت الا وام قاسم وفاطمة
اشو رفعوا ثوبي ونزعوني ملابسي وخلوني بطرك الثوب التحتي القصير واصل لحد الفخذ يادوب مغطي سيقاني
نسيت الهبطة والتهيت بالموقف الي اني بيه
صدري وجسمي كله كدام عيون قاسم
وام قاسم وفاطمة خطية ملتهيات
يتفحصون بصدري وزنودي
فاطمة .. اكول يمة صدرها كلش احمر
ام قاسم .. لا ماما هاي
هي من الله هيج مو من ورة الحرك
هي كلها بصوب وقاسم الي كاعد يتفحص بعيونه
والبنات كل شوية وحدة تدخل تتطمن علية وتطلع اباوع لقاسم عيونه صارت حمر
فاطمة لزمت زندي وسألتني ماخذة دور الدكتورة
.. زين هنا يأذيج لو هم حمرة من الله
فاجئنا قاسم من حجة وياها وكال
.. اي دكااااافي مو حركتي عشيرتنا
كل شوية متلمستها بمكان وتسأليها عبالك لعابة عندج
وانتي كومي لبسيلج شي على جسمج
مابقى واحد ما شاف جسمج
جان يحجي وهو راص على اسنانه
فاطمة حجت وياه .. يابة على كيفك ما اكلناها
للبنية هسة انت ليش معصب غير انجيكها خاف بيها شي
سألتني اكلج خالة خو ما يأذيج
حجيت بصوت تعبان
.. اني كلشي مايأذيني هي كبت النار لحظة وانطفت يعني ما لحكت افتهم شنو السالفة
فاطمة راحت للكنتور وسألتني وين ملابسج بأي خانة
اني كمت من مكاني ورحت وراها وجلية
وحدة. تدحك بالثانية
وما اعرف الحرار الي بوجهي وجسمي من ورة نظرات
قاسم لو من ورة الحرك ضاعت علية السالفة
شلت الشال من راسي
فجاءة وجان اسمع صوت قاسم المصدوم
باوعت عليه جانت عيونه متسعة وكال بصوت مبهوت
.. حجية هاي شنو شبي شعرها
جان يحجي ويقترب علية
عزة بعيني شنو شبي شعري
لميت شعري كله وحطيته صفح وصرت اكلب بي مثل المجنونة
اباوع لشعري مابي شي
وقاسم عيونه على مقدمة شعري
مديت ايدي اتحسس مقدمة شعري حسيته خشنه
برطمت شفايفي وعيوني غركت بالدموع
انقهرت على شعري
اقترب مني ولزم خصل شعري وكال
.. لتبجين فدوة الج مابي شي شوية محروك من كدام
رفعت راسي اباوع عليه واتلمست شعري
وهمست بحزن .. موبيدي احبه
دنك راسه وهمس .. منو
الدموع بعدها معلكة وتلمع بعيوني
.. شعغي (شعري ) ما يهون علية يصيغ (يصير) بي شي
.. الحمدلله بمقدمة شعرج شوية ولا كل شعرج
ونزل عيونه لصدري وزنودي
كدر بكلمات قليلة يلهيني عن شعري
وينسيني وضعي
انتبهت لحالنا كلما نحجي اني وقاسم سوية
ننسى نفسنا ونفصل عن الناس الحولنا
فاطمة.. هسة ياعيني فضوها
راح تبقون واكفين لشوكت
قابل مرتك راح تطير
عندك الليل بطوله عود اكعد اتمعن بمرتك
للصبح خاف بيها حرك
رفع راسه مثل الي جان بحلم وفز من النوم
وانتبه لوضعه وياي وابتعد حتى يسويلي مجال اعبر
واروح البس ملابسي
لبست واقتربت من المرايا حتى اباوع لشعري
عززة هاي شنو رموشي مشعوطات وحواجبي
منى دخلت علية وكالت تعالي نزلي زوجي
دكتور اختصاص جلدية كال خلي تنزل اشوف
وضعها شنو تحتاج
اباوع لقاسم عيونه نطت ورص اسنانه
ام قاسم .. اي والله ياريت هاي شلون فاتتني
نزلت وقاسم كل شوية يدردم عدلي شالج
شعرج نصه طالع
باوعت عليه.. بعد ياشعغ (ياشعر) اشو عطب منو يباوع عليه
خزرني وبلعت الساني وعدلت الحجاب واني ساكتة
اباوع بيت عمامهم طالعين وباقين بس البنات وجهالهم
كعدت عالقنفة يم قاسم وهشام طلع وبعدين
دخل رجال غريب وسلم ومنى حجت وياه
شفته واتذكرته هذا نفسه الدكتور
الي عالج حرك مريم اختي
الي جابته مروة اي صدك هي كالت مرة من المرات اني اعرف زوج منى
سلم على خالتي وعلى قاسم والبنات وسلم علية
شكله. ما عرفني ميتذكر
منى جابت كرسي وخلته. كدامي كعد كدامي وكال اقتربي خلي اشوف
باوع بتركيز على بشرة جلدي الخاصة بوجهي
وركبتي
ورجع للخلف اتكا على ظهر الكرسي وكال
.. لتخافين حرق طفيف راح يكسب الوجه بس لتخافين مراح يترك اثر
طلع قلم من جيب قميصه وصاح لمنى كللها ورقة
جابت ورقة ودفتر وكعد يكتب
حجة وية قاسم وكله .. راح اكتبلها مرهم تكدر تستخدمه على وجها اما اذا تحس بالم بغيرمناطق من جسمها فراح اكتبلها مرهم ثاني خاص للجسم
وسلم الوصفة لقاسم
بعدها خالتي كالت
.. خالة هدى روحي صعدي ارتاحي بغرفتج
وجهج صار اصفر
صعدت فوك بغرفتي.
طلعتلي دشداشة ميدي صيفية
ودخلت للحمام لبستها وغسلت وجهي
طلعت من الحمام وسمعت صوت نقالي
اخذته من الميز لكيت المتصل شيماء
.. الو هلا شومة حبيبتي
جنت احجي بصوت يرجف بي بجي
.. هلا هدوشتي شلونج وربي مشتاقتلج
شنو شبي صوتج
.. مبي شي بس هسه طلعت من الحمام
.. اكول هدهد باجر مو تنسين مروة عازمتنا اني وياج والبنات عفية تعالوا من وكت
.. ان شاء الله بس اسأل قاسم اذا وافق اجي
.. ان شاء الله يالله حبيبتي ما اعطلج خاف تردين تنامين
هدهد احبج ديري بالج على نفسج
هاي الكلمة اتعلمت عليها دائما تكولها شيماء قبل لا تنهي اتصالها وية اي وحدة بينا
.. ان شاء الله وانتي هم ديغي (ديري) بالج على نفسج
نهيت الاتصال
ورحت وكفت كدام المرايا
وخنكتني دموعي لميت شعري على جنب اباوع عليه
الحمدلله والشكر مااحترك كله بس محروك من كدام
واني ابد محاطه يوم بي مكص حتى كذله ممسوية
اباوع عليه ونزلت دموعي
ودخل قاسم وبيده علاكة الدوة
باوع علية وسد الباب وراه
مسحت دموعي ورجعت لزمت المشط حتى امشطه
اقترب علية ولزمني من طرف وجهي ورفعه
وكال.. المن هاي الدموع تنزل هادي ما عرفتك
ضعيف وتهزك هيج امور
سحبت نفس واني بعدني اناشغ
.. لا اني مو علمود شعغي (شعري) بجيت
بس دموعي نزلت من اتذكغت (تذكرت) حب امي لشعغي (لشعري)
احس بي ذكغى (ذكرى) من امي
الكلمة الاخيرة انهارت دموعي وصرت ابجي بلا وعي
ما اعرف رهبة الموقف الصار مدري صوت شيماء الحنين
مدري شعري كلها اتجمعت علية
حسيت على قاسم لمني بين ايديه
وحوطني مثل طوق النجاة
وحط راسي على صدر وهمس بصوت حنين
وكال .. اششششششش كافي لتبجين
سحب نفس عميق وصار يمسح بكف ايديه
على ظهري يواسيني
اما اني فأول ما حطيت راسي واستراح على صدره
مديت ايدي حطيتها على خصره
رحت بغير عالم وسنحت
عقلي نسى كلشي والتهة يحلل بريحة عطره
وصوت دكات كلبه جوة اذني لهم ايقاع
هاديء وسمعي طرب عاللحن عبالك صوت
ام دتلولي لابنها هيج حالي صار من الراحة
وغمضت عيوني وسنحت
سمعت صوته يحمحم وكال
.. الو هادي شنو نمت
فزيت على صوته الخشن
ورفعت راسي وانخبصت.
.. احم ها لا
شفت بعيونه دفو ولمحة حزن غير معلن عنه
للحظة كدرت المس حزنه على الصار بي
اليوم خذلانه وجرحه
على ايد الانسانة الي حبها كلبه
جلى صوته وكال .. تدري هادي اليوم الصار بيك
خلاني اعرف بمعزتك بكلبي. اثاري انت شكد عزيز
احس بكلبي اتشعوط وصار حاله مثل حال طرف كذلتي
رفع علاكة الادوية وحطها بينا وكال
.. هاك الزم اخذ حط المرهم واذا تحتاج اي مساعدة
ترة انا موجود برسم الخدمة
يالله انا طالع واحتمال اتأخر عندي شغل
دار وجهه اجة يطلع من الغرفة
صحت وراه
.. لحظة قاسم باجر اختي مغوة (مروة) عازمتني على الغدة
اني واخواتي عفية خليني اغوح
باوع علية وابتسم
.. هدى ميحتاج تتوسلين حتى اسمحلج تشوفين اخواتج
هذا حقج علية
لاتتوقعين مني امنعج بفد يوم عن اخواتج
بس كل ما في الموضوع انا ما اريدج تطلعين بدون علمي وموافقتي لاي مكان مو بس لخواتج
هسة افتهمتي لو اعيد
هزيت بموافقة .. امممم
.. خلاص لعد باجر من الصبح من اطلع عندي شغلة عالساعة تسعة
اوصلج بطريقي لبيت اختج
ابتسمت .. تسلملي الله يخليك الي وما يحغمني (يحرمني ) من حنانك علية
اباوع عليه بقة واكف يباوع علية
وفاتح حلكه يريد يحجي ويرجع يسده
عزة اني يمكن خبصت
.. احم قاسم انت مو كلت غاح (راح) اطلع
لو غيغت غأيك غاح تبقى (لوغيرت رايك راح تبقى )
هز راسه مثل الي انتبه لنفسه ووكفته
دار وجهه واتوجه للباب وهو يحجي
.. لااا اصلا اني طالع يله باي
..........
هدى .. لج مغوة (مروة) ليش مشمش مموجدة بالبيت
اني مو كلت حضغيها (حضريها) الي من اجي علمود اكلها
مروة ببتسامة .. يعني حضرتج جاية علمود مشمش مو علمود اختج
شيماء.. تردين الصدك مشمش هي شمعة البيت
يعني مسويتلها جو خاص بيها
ضحى تحط الزلاطة على ميز الطعام وتحجي
.. يعني هو ملكاها النا وفرحتها بينا كلش كافية
مروة .. اكول شكلي كمت اغار من مشمش
هدى.. هسة مكلتي شوكت تغجع من الغوضة (ترجع من الروضة)
مروة.. هسة هي على وصول ابوها راح يجيبها متشوفين صبيت الغدة
لان الست اول متدخل للبيت تريد اكل
ضحى.. اي صدك مروة اتذكرت جبيت اوراق السونار والتحاليل حتى تشوفيهم
باوعت لضحى وسألتها
.. اي صدك شنو شبيج
ضحى.. مو ذاك اليوم شرحت حالتي لمروة علمود
سالفة الحمل داراجع عند دكتورة خالة ام سيف دائماً تراجع عندها
كلتلي عندج ضعف بالميايض وميصير عندج حمل
ومن عندها سيف وعيالي ناشبين وياي
وكل يوم والثاني يعيروني
ويكولون راح نزوج سيف
يعني اني من غير كلشي ماكلة تبن بحياتي ونوب تصير عندي ضرة غير اموت
مروة .. شنو معقولة كمتي تحبين سيف
.. لا مو قصة احبه اولا بس يبقى محسوب علية رجال
يعني اي مرة تنكسر من يتزوج عليها رجلها
دك الجرس واجتي مشمش وابوها
دخل رافد
سلم علينا كلنا
والتفت على مروة
وكال مستعجل
.. مروة اني لازم اطلع امي اتصلت علية وكالت
زوج اختي متعارك وية اختي اريد اروح افتهم شنو السالفة
مروة.. اوك بس جنت اتمنى تبقى تتغدة
اني اليوم طابخة الغدة بيدي
رافد لزم خدها وابتسم .. غير مرة حبيبي
طلع من البيت
مريم حجت بأهتمام
.. شنو مروة اتصالحتي انتي ورافد ؟؟؟
مروة.. اي هو اجة وصالحني
ترة اني سالفة اهله متعودة عليها يعني اني مو علمودكم اتعاركت كل مرة احنا هيج
اتغدينا وخلصنا
وكعدنا نشرب جاي
ومروة طلبت من ضحى تجيب اوراقها حتى تشوفهم
وضحى طلعت من جنتطها ظرف بي هواي اوراق
اخذته منها وحطت كوب الجاي عالطبلة
ولبست نظارة القراءة
وبدت تفتح بالاوراق وتقرة بالتحاليل والسونارات
دقايق وجان اشوف مروة تعقد حواجبها
وتسأل ضحى .. اكول ضحى انتي عند منو دتسوين هاي التحاليل والسونارات
ضحى.. عند دكتور.......... ليش
مروة .. ضحى انتي متأكدة الدكتورة كلتلج
انتي عندج ضعف بالمبايض
ضحى.. اي حتى ام سيف وياي وهي الشاهدة
مروة.. حبيبتي ضحى التحاليل والسونارات الي كدامي كلها تكول رحمج نظيف والمبايض سليمة ونسبة
البيضة عندة بالتاريخ الي انتي مسوية بي السونار
نسبتها 20
يعني انتي ماعندج اي شي يمنعج عن الحمل بصورة طبيعية
كل شي سليم
يتبع
احبكم هواي احبكم كومة
اختكم نهى