خذ بيدي

12

حسن كان متهستر لأن المرة اشگد ضربها على وجهة بخفة ما تصحى ضرباته تحولت الى هز ..يهز بيها .. ماكوو حط راسه على صدرها ورفعة صاح
- جيبوا ماي وعطر قوي ...
ركضن البنيات ...
چان لونها ازرك مثل  المختنگه ... وشفايفها زرگ ..  جستها اريد اشوفها مثل امي من ماتت صارت بارده ... لا چانت بعدها دافية ..
غسل وجها بماي وحط بيده عطر ويشمم بيها ..
عطست واتحركت ... بس اتريد تفتح اعيونها ماتگدر ... گومها حسن للسيارة وبناتها حطن بس عبايه عليها وعافنه و راح .. ضليت اسكت ببناتها  ....بعدها گلت الهن خل نتوضة كلنا ونقرة الفاتحة لأم البنين ام محمد گالت الي مجربة لقضاء  الحوائج ...گعدنا ندعي ترجع ما بيها .......شي ........ صار نص الليل والبناات نامن كلهن بغرفتي اسطرن كانت الدنيا بارده گعدت اغطي بيهن وانه حسبة اتجيبني وحسبة اتوديني ...سمعت صوت شهگات .. رحت الها چانت عذراء  بفراش انه فرشته الهن نايمه ابصف اختها زهراء . وتبچي .
همست وانه امسد عليها
- لا تبچين انشالله ترجع سالمه
- ما رجعوا .... امي ماتت ...بعد ما اشوف  امي
اريد امي ...
كلماتها حجار ورجموا عليه .... الله لا يجعل دمعاتها دمعات يتم لأن ماكو اتعس منها ...
انطرحت ابصفها
- لا تفاولين لو ميتة چان جابها لهنا والگرايب كلها اجت علينا ...اسم الله عليها بس هي تلگاها متخربطه وحتى اتصير زينة يباتون اهناك ...
اندارت علية وظلت تبچي على صدري ..

صبح الصبح وانه اندعي ترجع لبيتها سالمة .
هم ما اجانه خبر عنهم ....لحد الضهر  ..انه محتاسه البنات ما قبلن يروحن لمدارسهن .. طبخت الهم ...
سمعت باب البيت ينفتح ....  وچان نركض كلنا للباب ..  دخل حسن وبيده ساند تهاني ..   بالگوة تمشي .. لازمه عبايتها من فوق لان ما لابسة حجاب ... 
التمن بناتها عليها يبوسن وهي ما تحجي بس بعيونها اطمنهن
حسن 
- خلنها تدخل
نيموها بغرفتها .. جان بيدها  كانونة.
حسن
- هدى سوي شوربه الها .
رحت انه طايرة سويت ..وهو شفته دخل للحمام والبنات يم امهن من خلصت صبيتها ودخلت بيها عليهم ... شفت حسن شعرة مبلل وگاعد  يم مرته حاطها على صدرة مثل ما يحطني ... ضلت ايدي ترجف حطيتها على الميز . وطلعت وانه كلبي محروك ...البنات بغرفتهن ابوهن طالب منهن ما يزعجن امهن ... ماكدرت اتحرك من مكاني وانه شفته بعيني مقربها عليه وماخذه  مكاني !
حطيت راسي على الباب .
اسمع بصوت خاشوگه  كانها تاكل ... احتاسيت ..ماصبرت فتحتها على كيف وشفته بعيني منطيني ضهرة ومغطي تهاني الي وجها على الباب وهو يوكل بيها  ..
رديت الباب وانه اتحسر ..
- م ما ريد حسن ...
-شكلتي انتي ...
-تعبانة ا اريد ارتاح
چانت تحچي بصوت گوة اسمعه لو ما نايمه على الباب انيوم مچان  سمعته ...
- جيبلي رق رقية
- اجيبها ام شروق واشبعين منها ... بس بالاول ارتاحي 
سمعت صوت طقطقه كأنه خله الصينية ..
صار سكوت مدري يسولفون بصوت ناصي اشو ما اسمعهم ...شفت فطومه دخلت للهول .. هرولت للمطبخ .....
ورة اشوية رجعت شفت محد ماكو رجعت وگفت اسنط ..
- عذبتچ بشكي ... وضغطت عليچ حتى بس تعترفين بشي انتي ما الچ ذنب بي الله يخليج
لا تاخذين بخاطرچ مني ....  والله لعوضچ بس ارجعي النا سالمة ...
اهتز كياني وانه اسمعه يطلب رضاها ....وهي ساكته مدري تحجي بصوتها چان ضعيف ..لانها بعدها تعبانه .........
واخيرا اجاني صوتها .
- لا لا ت تبچي حسن والله انه مساحمتك ...
شنو ما صدگت ردت افتح الباب واشوف بعيني .. لكن تماسكت ما سويتها وكذبت اذني حسن الرجل القوي سندي و معلمي يبچي يم مرة ومنو تهاني الي دوم مشاحنات بينهم !!!!

سمعت صوته متجحرش و بالقوة ينسمع
- من شفتچ نايمة على الجهاز   التنفس والله اختنگت هوى ماگدرت اشتمه ...خفت لا حياتي تصفى بدونچ  ...
صرت اسمع صوت همسات بس ما مفهومه ياربي شنو الي يصير ..  .حسن يحب تهاني طلع .
عفتهم ورحت لغرفتي ابچي بعد ما چنت ادعي الله يردها سالمة لبناتها ....شعور الغيرة موتني

العصر طلع ....حسن من غرفته وانه كنت اراقبه
ساند تهاني ...وداها للحمام وسده .... ضليت الوب اريد اموت  ... طلعت ورة ربع ساعه وشعرها ملفوف بخاولي ..  وهو هم ساندها ..
- اي ريحة المستشفى عالگه بيه اشگد  اكرها
انه چنت گاعده على الدرج ...باوعتلي تهاني مستنكرة گعدتي ودخلها حسن ولا انتبه الي ..كان حاير بيها وكأنها احد بناته دخل سبحها الباب ما انسد عدل ضلت بيه فتحه
بحجه أسألها اذا محتاجه شي مديت راسي واجيت اموت من المنظر
گاعده على ميز الاستراحة ..  وهو خلفها واگف شال الخاولي وباسها من راسها .. واخذ المشط يمشط ....شفت نظرة بعيون تهاني من شافتني واگفة ....واباوع ما عرفت شنو معناها ..
حسن
- ها هدى  غير ادگين الباب
انه بس صافنه على تهاني ما حچيت شي ...من غيرتي طبگت الباب حيل ورحت ....
،

انه الي لازم اسوي العشة ...وگفت حارنه .. فوگ عذاب غيرتي شغل اهواي انه بغسل مواعين الغده هلكت ..  طلعت مخضر وحايرة شنو اسوي ...... گلت اسوي مقالي ...افضل ..
اقشر بحرقة حسيت احد گعد خلفي وحظني من ضهري .. عرفته من ريحته حسن
التفتت عليه

- ها حسن ؟

- ما اشتاقيتي لحسن

كيفت بعده يفكر بيه ...باسني من خدي
- لا اسوين شي هدواي اتعبين ...راح اجيب جاهز .
كيفت اكثر رجعت المسواگ ورحت .. صاحتني عذراء  ...
گالت امي اصيحچ 
دخلت عليها لگيتها مطروحه على فراشهاورقية نايمه يمها ....
- هدى رقية مسخنه ... سويلها كمادات ذني شلعن گلبي جابن ماي بارد حيل  واجن ..

كلشي ولا رقية .. شلتها من يمها ورحت لغرفتي گعدت اسويلها كمادات ...دزيت على ابن جيرانه الي يشتغل عند حسن يجيب الها دوة حسب ما گالت تهاني ....
بالليل حاطه رقية بحظني وانتظر حسن ..رجع محمل اتگلنه بناته صبن اكل وگعدنا ناكل بس هو گال امكم ما تحب الكباب طلع جايب الها دجاج . هو الي سكبة وراح الها بغرفتها ...
گمت اكل ابسرعه من حرگة گلبي .....
ثاني يوم اجت ام محمد اشوف اختها ..
چانت رقية بعدها مو شي صحتها ... چنت اوكل بيها يم تهاني ماتقبل اتعوف امها وام محمد گعدت يمنا ...
چانت تهاني تحچي الها شصار بالمستشفى شنو گالو الها ... ضغطها كلش مرتفع وضاربتها بداية جلطة ....
انه اوكل برقية واتلمس بيها لا حرارته صعدت
ام محمد ضحكت وگالت - اي بس ابو شروق چنها علاقتچ تحسنت بيه
تنهدت تهاني وگالت
- اي بعد ما شيب گلبي الا وگعت گدامه الا صدگ بيه
مالي ايد بوفاتها  ..  عباله ضامه عليه شي

-الحمدلله من طلعتي بالسلامة والماي رجعت لمجاريها  انت هم دربالچ عليه بعد
- اني حاطته بعيوني من يومي .. وهمزين اجت على هاي عاد اني زوجته الها بيدي بلكت اجيب اله الولد اليريده وتفرحه
گالتها بحسرة وانه طلعت روحي من عرفت رجعوا سوة

مرت ايام وانه عايشه بعذاب الليل بالقوة يعدي عليه حسن ماكو يم مرته حتى گعدته يمها ...وحالها من حالي ما يخليها اتجيس شي يگول الها اخذي فترة نقاهة ضاله انه محتاسه بالبنات .. 

چنت انضف بحرگة اكنس وادفع بالاثاث روحي خلصانه ... الصبح مالحگت انضف ..شو الشغل ما يخلص اسوي شي يطلع شي ثاني الي ...
چان حسن بغرفة مرته عيني اجه من الشغل تعبان راح نام يمها .  بس گلي الله يساعدچ وباسني من خدي وراح ... وانه حيل مشتاقه اله
دمعتي نزلت ...كل هذا مو من حقي احچي المرة مريضه ...
- شجاي اسوين
چنت مدنگه اكنس بالزوالي ..
اخذ مني المكناسة
وصاح لبته عذراء .. اجت كملت هي تنظيف ..

- اليوم انروح نزور اني وام الجهال دربالج على البيت والبنات
گرصني من خدي وگال
- انتي ام بيتي الثانية  باسني وراح
اشوية ورجع الي
جرني من ايدي
ضحكلي
- تعاي ما مشتاقه الي انتي شو مكيفة
جرني ورحنا لغرفتنه
..............
چان يلبس وانه عود مسوية نفسي ما مهتمه وهو يباوع الي من المراية ...
ويبتسم ... اوف يعرف شنو بداخلي ..شكلي دوم مفضوح
- وردايتنا مبوزه
حقچ علينا هليام ما نجي لهنا .. بس والله مشتاق الچ حيل ... بس تعدي هاي الايام والله كريم بعد نشوف يوم يمچ ويوم يمها ...

....
راحوا للزيارة وانه يم الجهال وحدي . گعدت اباوع تلفزيون عسى ولعل انسى غيرتي الشابه ..

رجعوا عيني وبوجهم لغرفتهم .....
ما متعوده عليهم من مصافين . واشلون حاط ايده على متنها هو حسن اعرفه مو قصده شي ومن يتقرب من مره يحويها يحسسها هي ولا غيره وتعني اله الدنيا كلها واكيد تهاني عايشة بهذا الاحساس هسة .. 
وعدت ايام  و اجونه ناس اهواي لتهاني ورجعت بعد فترة ام شروق لبيتها بس اتعيب على شغلي ... بس گالت انه بعد مو مثل قبل الشغل بالنص ... انه شگول اگول اي هي شخصيتها قوية گدامها اضعف ....  انطتني شغل ما اتحرك بيه مثل غسل الصحون اكرهه و العشة ...والباقي عليها .ماتقبل اطبخ اگول طبخچ مو طيب !، 
حسن لحد الان كله يمهما من شافها رجعت للشغل عرفها رجعت طبيعية ...

بالليل  من خلص تدريس بته اتوجه لغرفتي انه جنت بيها ما انتظرة اتعودت يمها ينام ..  لابسة ثوب قديفه وحجاب اقرأ قرأن يهديني منا من انام ..حتى اشغل نفسي عن الوساوس الي تيجيني وتهدأ اعصابي من غير ما احتاج علاج . ما انكر ذيچ المرحلة چانت صعبة عليه حيل چنت بتحدي ويه نفسي اما احافظ على طفلي او افرط بيه بضعفي ... فسمعت نصيحة حسن وگعدت اقرا منا من انعس   . .. من دخل چنه هلال العيد وهل عليه اليوم ....
گعد يمي وحط ايده على متني ينتظرني اخلص ..

اني ما توقفت عبالي هم مثل كل يوم ياخذ بخاطري ويسأل عني ويروح .. كنت مندمجه ..
كنت أقرأ بسورة الضحى ....
وصلت للأية الكريمة..  لَمْ يَجِدْكَ يَتِيمًا فَآوَى
دمعت عيني ...كأنها تقصدني خاصه حسن گاعد يمي باوعت اله كان صافن مدري وين باله  ورجعت لقرأني  ....
( وَجَدَكَ ضَالًّا فَهَدَى

وَوَجَدَكَ عَائِلا فَأَغْنَى )

صفنت عليها حيل اهواي وعدت بهاي الآيات  واني اباوع وين كنت و وين صرت الحمدلله 
انهيت القرأن وحبيت انام على وضوئي
سحبت ايد حسن ..انتبه الي ..
- حسن انه جنت ضايعه بدونه ....
- هو منو .
- الله ....
اني احبه حيل .... اتمنى يساحمني على كل شي
ابتسم حسن وگال
- مسامحچ هو
- انت
- اني شنو
- راح اسامحني ... 
- ههه على شنو اسامحچ
توترت حيل
-انه تعمدت ذاك اليوم كثرت الملح بالاكل
-اهاا
- من غيرتي .. بس وعد مراح اعيدها ...  بس اغار منها ...انت تحبها اكثر مني ...و
- منو يحب منو اكثر من منو
- شنهاي حسن دخت
- شوفي يا هدى راح اكلچ شي اصدگين ما اصدگين بكيفچ .. الرجال من يزوج وحده مريحته من كل النواحي . تدخل گلبة ماتطلع . يعني انت وتهاني داخلات وخالص الموضوع ...اثنينكم مالي غنى عنكم  ..
فهمتي وردتي ...فهمت ..اندگ الباب ..
-منو
-بابا ماما متخربطه
طفر حسن ..ابسرعه راح لغرفتها ...
وهسة يجي وهسة يجي ماكو حسن ...
سمعت صوت غرفتهم بابه ينفتح ...طلعت شفتها رايحه للحمام وچانت لابسة روب فوگ ملابسها ....بس اليوم يومي ...صارله شهر بس يمها وهم دزت عليه .. سديت الباب بزعل ونمت ضايجه

الصبح چانت اتسوي ريوك ... گعدت اني اريد اكل
تهاني-گومي ساعديني
ابسرعه گمت  اقلي بيض وياها وحسن يباوع الي يدري بيه ضايجه بس ما احجي ولا اعارض .
نفسي لعبت وعفتها وطلعت للحديقة اتقيئ ... اجه حسن خلفي ... واساني على تعبي ....
بيومها هم اجه يمي ...وقفل الغرفة ... وثاني يوم يمها وهكذا اتحاول تهاني تاخذه كل ليلة لكنه يغلس عليها انه بديت اعاني من سوالفها
تطلع اتعوف البنات عليه ...لو تشغلني اكثر من شغلي ...چنت اسوي وانه ساكته المهم حسن راضي عني
هو دوم بالنهار بالشغل وبالليل يستقبل ناس الي عدهم معاملات محتاجه ختمه ....ب 11 الا يتفرغ النا تفرغ تام ...
ضعفت حيل لأن ما اكل وهم الخوف هلكني ودمرني .. اكو شي بده يوسوس الي انو ابني حيموت ...لو من اغسل احس نفسي ما مغسلة عدل واعيد وازيد   بالصلاة اعيد الاية الف مرة ..ظميت على حسن هاي الحالة وكنت احاول ابين طبيعية  اخاف عباله بعدني مريضه ويميل لتهاني اكثر ...
ازدادت حالتي سوء كل ما اتقدم بالاشهر .....
ام شروق الا تاخذني نسوي سونار سوينه ...
رجعت للبيت .. جان حسن توه راجع من الشغل يريد يعرف المولود شنو ...
اتلگته  تهاني والضحكة مالية وجهة
- هههههه ابو شروووق الله يتممها على خير راح تجيك التاسعة .
اني واگفة خلفها كأني السبب حسيت نفسي غلطانه و مسوية ذنب لمجرد طلع بيه ابنية
انه شفت الضوجة بعيونه ...  مع هذا ابتسم
وگال
- على الخير هدواي
راح عرفته يريد يطلع ضوجته بعيد عني
مو بيدي يا حسن اسفة  .....
دخلت للغرفة ميتة اريد علاجي شصير خل يصير المهم اخذ علاج 
هبدت واخيرا لگيت الوصفه قررت اشتريها من غير علم حسن لان بعد ما اتحمل الي بيه