الرقطاء وكراتها الثلاث 🐍
اللـدغة الرابعة والأربعين
بقلم كهرمانة
____________
هرم:-دارت وجهها وراحت ركضت وراها ولزمت ايدها وحضنتها
-مسك لترحين ميخلونچ عايشه انتِ مو تحبينا مو دتسوين كل هذا علمودنا شـلون تعوفينا هنا لچ ماجاي اندل رأسي من رجليه ماعرف شسوي ماعندي أحد يوجهني غيرچ ماعرف اتصرف بدون توجيه من عندچ
مسك:-اعتمدي على روحچ هرم أنتِ وديالا من تسون أتحاد سويه تصيرن مسك عابد أريد نهايته على ايدچن هو السبب بموت خوالي واني راح أروحح حتى مجيد العار مايفضحچن كدام آل صحار ولاينطي سر علاقة هرم ومروان لبحر بَــس خلي اخلص من اللي يريده مجيد أحرگ ورقته مثل ماحرگت زيدون مجيد هــوَ السبب بوفاة بابا لازم يتعاقب مخلينه يسرح ويمرح عباله أعوفه الغبي جدو رياض فكر بَــس بثار ولده ومافكر بثار بابا ، لأن بابا أولى بأخذ الثار مو خوالي
ديالا:-تاخذين ثار بابا هَـم؟
مسك:-اي خوالي رجعت حقهم الضاع وعابد ان شاء الله نهايته قربت اذا مامتت ومجيد ما أموت اذا ما اشوفه يموت گدامي بــاي بــَنات
ديالا:-راحت مسك تمنيت لو تگول لمعاذ على مجيد من توصل ومعاذ يحميها ويتصرف ويه مجيد الخيخه گعدت يائسه هرم تفتر يمي بعشوائية
هرم:-اخخخ مادمرنا غير جدو رياض سمم أفكارنا وعلقنا بشخصيتين ميته ماعلقنا بشخصية أبونا ماگال ابوچن مات غدر والغادره مجيد
ديالا:-هــوَ گال ذني بــَنات نذير امهن ماتحبهن وابوهن ميت ومحد يريدهن على گولتهم طين زايد خل استخدمهن مثل الأدوات للأنتقام خاف على ولده محمد وفارس ورفيف ونقاء واتبرع بينا
هرم:-بَــس همه هَـم مالهم ذنب خوالي ولاتنسين كلشي صــار النا
ديالا:-اي كلشي صــار النا وأرواحنا
هرم:-الله كريم
رفيف:-ديالا هذا ياسين جوعان سويله حليب خطـيـه
ديالا:-اي دقيقه
هرم:-حسيت بمغص كُـلش قوي تجاهلته بقينا وحده تباوع للثانيه لليل واحنا على هالحال زاد المغص وحسيت حراره تنزل من عندي طلعت من الغرفة الكاعدات بيها ورحت للحمام المهدوم نزلت بجامتي وشفن ملابسي موجود عليهن قطرات دم رجف جسمي واني اشوف الدم شِــنو معناها كلشي ما اعرف طلعت سألتني رفيف
-هرم شبيچ لــيش وجهج أصفر
هرم:-هــا لاا ماكـو شـيي بَــس بطني توجعني
ديالا:-تعاي تمددي أرتاحي
هرم:-صارت الدنيا ليل بالي يم مسك
ديالا:-أنـي هَـم شوفي اطرافي شـلون مثلجه
رفيف:-جاي ترتكبن خطأ فادح بحق أنفسچن
هرم:-رفيف اسكتي أنتِ ومصطلحاتچ الغريبة
.
.
مسك
طلعت من البيت واني بيدي سچينه وجنطتي لابسها واخذت شال من أمنية لفيت بيه رأسي رحت للمكان المتفقين عليه أنـي وعمي الخنيث شفت سيارته موجوده فتحت الباب وصعدت نفسي لعبانه من عنده حچه بصوته المقرف ويه أنفاسه الموجوده بالسيارة حسيت روحي راح استفرغ نزلت الجام مال السيارة واني استمع لكلامه
مجيد:-هسه راح ننطلق البغداد كُلشي جاهز واللي تردينه يصير تأمين اخواتج وما يحسون بيهن وين موجودات وهم تنتقمين الخوالچ
مسك:-بَــس خوالي مو معاذ اللي قاتلهم خوالي قاتلهم عابد وغسان
مجيد:-عندچ دليل
مسك:-اي اكتشفت إنُ كنان وابنه مالهم علاقه هُم بَــس ذنبهم اتستروا عالجريمه وعن طريقهم دخلنا للعائله
محيد:-والله كبرانه وصايره تخططين
مسك:-يـله امشي نخلص الشغله الجايين علمودها ما أگدر اطيقك اكثر
مجيد "بمكر":-يـله امشي
مسك:-شغل السيارة ومشى متجهين للكراده الطريق كله صافنه والأفكار متشابكه بعقلي ، وصلنا ركن السيارة ونزل دخل لمبنى طلع هــوَ ووياه واحد معضل باوعتله وهزيتله ايدي فتح باب السياره وصعد هــوَ والوياه
-هذا منين الجايبه حاف يطلع بَــس نفخ
مجيد:-هسه راح اتصل على معاذ وتحاچينه تگوليله خطفوني وگوليله عالمكان الموجوده بيه حتى يجي ومن يجي تقتلينه وبعدها هذا يستلم الجريمه بمكانچ
مسك:-واني وين أروحح
مجيد:-وين مترحين روحي بعد ماعندي شـيي وياچ ارجعي لخواتچ
مسك:-بهالسهوله ، إبتسم أبتسامته الخبيثة وگال
مجيد:-اي اي بهالسهوله لــيش ممصدگه
مسك:-يـله اتصل نشوف وين توصل وياك
-أتصل بمعاذ وانطاني التليفون ردّ أول ما رن التليفون سكتت ورفعت رأسي تنهدت بتعب وسمعت صوته
معاذ:-مسك هــاي انتِ لچ وينچ والله راح اموت عليچ لگيت نفسي أدورعليچ بدون وعي أختصري العذاب وارجعي وترى أبوي حس على غياب ياسين وصحته أبد مو تَـمام يلوب يريد ياسين يمه أبوي موات مسك كافي أنـي بعد ما عندي طاقه كل هذا الحمل عليه يكفي خسرتچ وخسرت أمـي
مسك:-ندسني مجيد وصرخت
-معااذ الحگلي أني مخطوفه بالكراده يم **** فدوه الحگ ، سد الأتصال وباوعلي وهو يبتسم ويباوع للخنيث الثاني أبو عضلات
-شبييك بعدني ممكمله كلام
مجيد:-صايره ممثلة ماهرة
مسك:-امشينا للمكان المطلوب ، معاذ أتصل أكثر من مرة جاوبه الولد الصعد بالسيارة
-خلال ساعتين اذا ما اجيت اقتلها
مسك:-سمعت عياط معاذ وهذا سدّه بوجهه گلت بگلبي اكلوها من معاذ ، نزلنا من السيارة هُـمَ يمشون واني تمشي وراهم درابين كُـلش صغيرة وبيها ناس متشبهين بالنساء وبنات مبين من شكلهن مو راحة وريحة الشرب ماليه المكان دخلنا بدربونه بيها بيوت صغيرة وگفنا گدام بيت دگ الباب عمي طلعتله بنيه انطاها ورقه ماعرف شِــنو مكتوب بيها والبنيه دخلت للبيت
-تعرف كُـلش زين معاذ عنده معارف بالدولة وبكل مكان مستحيل تعبر عليه هيچ شغلة
مجيد:-انتِ نقطة ضعفه يسوي كلشي علمودچ ما أگدر أحصل معاذ إذا مو انتِ موجوده
مسك:-اششش اسكت عاد فضحتنا ، باوعتله بقرف بعديـن رفعت رأسي أخذت جوله بنظري عالمكان لعبت نفسي يوم عن يوم كرهي للدُنيا يزيد كل ما أتقدم خطوه بحياتي أكتشف الأيام الجايه مالها داعي أعيشها الدُنيا مليانه وصاخه بسبب البشر اللي يعيشها يحمل ذنوب أكثر من الحسنات ذاك من ذاك اللي ماتغره أمور الدنيا ويطلع منها بوجه أبيض وقلب صافي مليان أيمان وعدم معصية لرب العالمين كرهت نفسي كرهت الوسط العايشه بيه الضروف الجرتني وراها ولهتني عن ذكر الله
مجيد:-مسك بالوقت اللي راح نهجم على معاذ انتِ تختلين يم هــاي البنيه من يفرغ المكان اطلعي انتِ وياها وابتعدي شويه من هذا الشارع وابقي وحدچ وخليها ترجع متفقين
مسك:-اي متفقين ، ضلينا واگفين بحدود الساعة منتظرين معاذ سمعت مجيد يگول لسامر الولد اللي جابه ويانه
-دير بالك تخلي يحس أحنا نقتله وناخذه نذبه بالزبل لو بالشط أي أثر ما اريد اله اهمشي محد يشوفك دير بالك سامر
سامر:-لتخاف سهلة اخذه واروح اقتله بمكان فارغ مابيه بشر هيمه
مسك:-لهالدرجة واثق مجيد أني لو منك أضل ارجف من الخوف لو أضم روحي شـلون أمنت بيه
مجيد:-لأن اعرف شگد انتِ تحبين رياض ومستعده تضحكين علمود خوالچ الجاي تطالبين بثارهم لو أختچ وابنها الأنقتلت بسبب أمه لمعاذ
مسك:-يحچي ويباوع بتليفونه حسيته جاي يرسل شغلات او يحچي ويه واحد مراسلة ماهتميت ورجعت باوعت للبيت لــيش البنيه مارجعت طلعت معقوله صارلها شـيي ؟
.
.
مروان:-خالي شوف تليفونك تَـره خبصنا خبص
بـَحـر:-مو وقته
كميل:-بشنو تفكر ياخال والله تعبنا
بـَحـر:-مو أگوم اخنگك هسه كميل أكرمنا بسكوتك
مروان:-شــكوو جايبنا هنا وگاعد كل شويه جايك اتصال وملتهي بيه وعايفها ترى عدنا التزامات
بـَحـر:-اريد اطلع وياكم بمكان بَــس اسكتوا شويه هذا مدري شعنده سطرني عنده خلل بالبضاعة مالته وانتوا تشوشون عليه اكمل مراسلة وياه ونروح
كميل:-يـله احنا ننتظر قابل عندي مراجعين ماخذين موعد
مروان:-خالي مجيد شعنده وياك يراسلك
بـَحـر:-فارغ عوفه ماعنده سالفة
كميل:-وهيچ دائمًا يراسل؟
بـَحـر:-اي يشكي من معاذ ماخذه مطبطبه وغاسل صبغه
مروان:-حيل
كميل:-ضلينا أحنا منتضرين خالي يكمل شغل اجته اتصالات من نفس الرجال الماخذ من عنده بضاعة ذهب وبيها خلل ، مروا ساعات گاعدين يمه أخر شـيي حل الموضوع وفتح تليفونه يشوف رسائل مجيد انگلب وجهه يقرا بالرسائل ويباوع لمروان بحذر كور قبضة أيده ويضرب بيها على رجله
اخر شـيي گام من مكانه ومشى لمروان لزمه من رگبته وضغط عليها طفرت وصرت بيناتهم وخالي من قوة الصياح كلامه مامفهوم مروان انگلب لونه وجهه صــار أحمر ويحاول يلتقط أنفاسه
أستجمعت قوتي ودفعت خالي من أخوي حسيته راح يموت بأيده سجبت مروان وگعدته عالتخم أخذت گلاص مي فتحته وغسلت وجهه واني أحچي ويه خالي بـَحـر فاقد أعصابه ويفتر بالصالة وهو يتوعدلنا ويغلط ويسب بينا وبأبونا
-فهمني شــكوو شمسوي مروان تَـره مافهمت شـيي من صياحك
بـَحـر:-مروان عنده علاقة حب ويه هرم لك لــيش لييييش ماگلتلي لتتزوجها أنـي رايدها واحبها ليييش شلوون هيچ تسوي من ورى ضهري واني ما أدري چنت افسر نضراتك ألها اعجاب واتحسست من عندك أنبنى حاجز بيناتنا بسببها يامروان أنتَ مو بَــس طحت من عيني لاا أنتَ طيحت عيني وياك العين الضمتك بروح صاحبها
مروان:-كميل فهمه گله موضوع قديم بلكي يفهم منك
بـَحـر:-اسكت ولا حرف ماريـد اسمعلك كلمة وحده
كميل:-هـيَ مليوصه مليوصه خالو ترى مروان ندمان وبيوم لگيته مقرر يجي يعترفلك ولزمته بالشارع حچالي كلشي رفضت يجي يمك ويگلك لاا وحاچيلها أسرار عن العائلة گايللها أبويه قاتل واحد أسمه ياسين گبال معن ومعن صايره بيه حالة نفسيه ومسولفلها من طالع بالشارع وأبوي ضربه طلقه وصار معاق على أثرها
بـَحـر:- يابويه لك مروان اشرب من دمك هسسه گلي شسوي بيك قليله بحقك لــيش ما أجيت وحاچيتني ليشش ، وعرفت نفسه خالها ؟
مروان:-لاا ماهتمت وگلبت على غير موضوع مادققت
بـَحـر:-مواااضيع حلوووو موااضيع چنتوا تسولفون بَــس العتب مو عليك على مرتي الخاينه اللي بدعت بأذيتها الي بسيطه ياهرم
كميل:-شتسوي مثلًا
بـَحـر:-اسكت مني لو بيدي أسوي لحمها ثريد هسه
كميل:-مبين جوعان
بـَحـر:-گوم شوف النازوكي شبيه مغمض عيونه خاف فطس
مروان:-مابيه شـيي وأصلًا خلصت من تأنيب الضمير
كميل:-مجيد شِــنو كاتب الك ؟
بـَحـر:-فاضحلي كلشي الخسيس ومكانهن هَـم
-فز مروان من مكانه هــوَ وكميل وحچوا بأستفسار
كميل:-هسه هسه ؟
مروان:-وليش مغلس ماگلتلنا نروح
بـَحـر:-هنه موجودات باليوسفيه بردت گلبي بمروان وين رايحات قابل
مروان:-خالو أني أسف
بـَحـر:-أبن المطي هسه جاي تگلي أسف
كميل:-كوم بوس خالك
بـَحـر:-بَــس تجي يمي اخنگك
كميل:-كوم مروان كوم شحده يخنگك واخوك موجود
بـَحـر:-تهددني ؟
كميل:-لاا تعبير مجازي شبيك ، گام مروان وراح لخالي باس راسه واعتذر من عنده
مروان:-بروح اهلك انسى الماضي غلطت واعترف بغلطي وماعرفت شـلون اواجهك ومن اجيت اعترف كميل ماخلاني
بـَحـر:-كافي لاتضل تتأسف
مروان:-مو خالوا انتَ عزيز عليه يشهد الله احبك اكثر من ابوي وماريد اخسرك
بـَحـر:-هاهيه انسى ، ويله امشوا ورايه نروح لليوسفيه
مروان:-ناخذ ابو سعيد ويانه ومعاذ؟
بـَحـر:-اي خابرهم
مروان:-فتحت تليفون واتصلت بأبو سعيد
-الو هــا مروان
مروان:-أبو سعيد وين انتَ تگدر تجي لبيت خالي بسيارتك انتَ ومعاذ
أبو سعيد:-معاذ عنده شغله كُـلش مهمة ماقبل يگول شِــنو ماعتقد يگدر يجي
مروان:-لعد تعال بَــس انتَ
بـَحـر:-هــا شيگول
مروان:-معاذ ميگدر يجي بَــس ابو سعيد
بـَحـر"ببرود":-احسن خلي معاذ من يشوف مرته يتخبل ماناسيها اله من خلاهن يشردن هــوَ وكميل
كميل:-معليه شعليه أنـي
بـَحـر:-امشوا
كميل:-طلعنا من البيت وصعدنا بالسيارة شويه واجه أبو سعيد يمنه بسيارته
ابو سعيد:-وين نروح ؟
بـَحـر:-لليوسفية بيت أم ياسين القديم تندله
أبو سعيد:-اي أعرف مكانه
بـَحـر:-امشي ويانه لعد
أبو سعيد:-بالخدمه بَــس انطي لأستاذ عابد خبر
بـَحـر:-عوف استاذ نعال هسه
كميل:-مروان هذا جاي يغلط على أبونا
مروان:-أنـي هسه متبري من ابوي اسكت
.
.
رفيف:-أنـي تعبــت بــَنات
هرم:-لتخافين ميصيرلچ شـيي
رفيف:-والله لعبتن روحي تجيبن مشاكل لنفسچن
ديالا:-ههه طين زايد احنا نختلف عنچ حبي
هرم:-رفيف كافي
رفيف:-لــيش ميعجبچن كلامي ؟
هرم:-أي ميعجبنا تدرين لــيش لأن احنا وأنتِ چنّا عايشين بنفس البيت بَــس ماشفتي العذاب اللي چنّا نتعذبه ماتگعدين من الصبح حتى تتدربين بالضرب وبتمارين بنية جسمچ ماتتحملها ماچنتي تنجبرين تاكلين ماعون كامل حتى لو ماجوعانه تاكلين ماعون كامل ماچنتي تلوبين من وجه بطنچ بسبب الأكل الزايد ماچنتي تشوفين خيزران شـلون تضرب وتحرگ وتغرگ وتنخنگ بينا ماعشتي لاخوف ولارعب أحنا چنّا يوميه نسمع جملة (أنتن طين زايد)
رفيف:-ماعجبني كلامها عفتهن وگعدت قريبه يم الشباك شفت سيارات طبگن يم البيت صحت لهرم
-هرم تعاي شوفي
هرم:-شــكوو ، رحت يمها باوعت من الشباك شفت سيارات ثنين واگفات ونزلوا منها بـَحـر ومروان مانتبهت للبقيه شلت الجنطه مال غراض ياسين وصحت لديالا تشيل ياسين وتركض
-ديالا گومي گومي آل صحار اجو بسرعه راح يدخلون للبيت شاكين بوجودنا هنااا
-جريت شال من شالات أمنيه الجابتهن الما نطلع بيهن ولفيت بيه راسي والبنات اخذن من عالباب كل وحده واحد مالحگت البس حذائي بقيت حافيه ، رفيف طلعت گدامي وديالا سحبتها ياسين عدها وطلعنا من ورى البيت لأن مفلش ويطل على بستان وهمَ ورانا نسمع أصواتهم تتقرب من عدنا يأمرونا نتوقف
-ديالا روحي من هذا الاتجاه واني راح اطلع منا يـله بسرعه خلي يضيعونا
ديالا:-تَـمام رفيف خليچ ويه هرم
هرم:-ركضنا مسافه مو بعيده توقفت والتفتت لرفيف شمرت عليها جنطة ياسين وگلتلها
-رفيف روحي ورى ديالا بسرعة قبل لاتختفي اخاف متگدر وحدها لياسين اهم شـيي الأمانه رفيف استعجلي
هرم:-راحت ورى ديالا واني كملت الطريق وحدي ختلت ورى شجره واسمع صوت أقدام تتقرب باوعت لرجلي الدم ينزل بكثرة ويه وجع بطني جهزت نفسي وأخذت نفسي عميق وركضت بكل سرعتي حسيته انتبه عليه سمعت صوت صراخه وسط الظلام الدامس فقط صوته مسموع يأمرني بالتوقف وأنفاسه المتسارعة
-أوووگفييييييي گلتلچ أوگفييييي مكاانچ لاتتحركيييييييننن لتجبريني أسوي شـيي يندمچ ويندمني بعدييييييين هررم
هرم:-تجاهلت صوته المرعب وصراخه واستمريت بالركض بطني مغصتني وحسيت الدم يتزايد ماينقطع
بـَحـر:-لچ اليوم محد يخلصچ من عندي ياهرم أني هيچ تسوين بيييه
هرم:-غمضت عيوني الألم معتصرني دموعي ينزلن بلا ما أتحكم بيهن أحس هــاي نهايتي خلص كلشي خلص لزمت بطني وصوت يتردد بأذني
-أنتن طين زايد طين زااايد عشتن علمود الثاررررر
-قاطع تفكيري صوته وهو يگول
-ألله يـعـظـم أجـرك يــاا گــلـبــي
-سمعت صوت أطـلاق النار وأقل من الثانيه
حسيت بحرارة تخترق جلدي
أستمريت بالركض معانده الموت ومعانده الوجع أنشلت حركتي الركض تحول لمشي متعرج ، الشارع صــار قريب عليه والسيارات تمشي سريع
حسيت عليه وهو يسحبني انضربت بصدره ، ماگدرت ارفع راسي مغص بطني زاد والوجع أحتلني من كل ناحية الرؤيا غوشت عندي
حسيت روحي نعسانه غمضت عيوني مستسلمة وأني أتشاهد
بـَحـر:-لاا لاا هرم مابيچ شـيي لتغمضين هرررم لك مروااان تعااال بسررعه مرواااان الزمااال بسررررعه انعل يومكم كلكم
مروان "نفس مقطوع":-هــا خالي شسويت شبيهااا هرررم
بـَحـر:-جيبلي السياره لهنا عالشارع يـله لتموت رجليها مجرحه ودتنزف ماعرف شبيها من غير الطلقه المستقره بكتفها جيب السياره قبل لااتدخل غيبوبه جاي تفقد هْوايَــه دم
مروان:-دقايق ويمك
بـَحـر:-سحبت الشال الموجود على راسها وشديت بيه كتفها بقوه شفت مروان يدگ هورن شلتها وصعدتها بالسيارة وانطلقنا لأقرب مستشفى جسمها بلش يبرد وصار لونه شاحب
-مروااااان راح تمووووت بسررررعه
مروان:-متشوفني حاي امشي اسرع شـيي شسووي إطيرر
بـَحـر:-جسمها بارد صــار ثلج
مروان:-يـله يـله وصلنا
.
.
رفيف:-ركضت بأتجاه ديالا اللي كل شويه تروح بجهه واني وراها حچيت واني اتنفس بصعوبه
-لچ اوگفي ضيعناهم محد ورانه ديالا بَــس لحضة أجر نفس
ديالا:-اهم شـيي عندي الأمانه رفيف ووو وين هرم
رفيف:-انطتني الجنطة مال ياسين وگالتلي روحي ورى ديالا متگدر وحدها ، ضربت راسها وحچت بعصبية
ديالا:-ولچ شـلون تعوفينها متگدر تتحرك بسرعة وحامل شلووون تعوفينها وتجين ورايه أني شگلت
رفيف:-هسه شِــنو نروح وراها
ديالا:-ماعرف وين الگاها ياربي هسه أكيد بـَحـر متابعها لان ماتركض بسرعة وحافيه مالحگت تلبس حذائها ضلت تضم غراض ياسين بالجنطه
رفيف:-نجيب هرم ونروح لنقاء نبقى يمها وكافي ننهي هــاي المهزلة الجاي تصير ، ديالا رادت تروح لهرم سمعنا صوت طلق ثنيناتنا انشلت حركتنا وصرخت ديالا وياسين من الخوف بچه
-يمممه رفيييف اختييييي موتهااا قتلهاااا
رفيف:-اهدي بَــس گولي يــاا الله ميقتلها حامل بأبنه شـلون يقتلهااا اكيد بالجو ضرب حتى تتوقف ، فقدت ضلت تضرب بوجهها وتبچي وياسين يبچي وياها خايف ومستغرب من الصوت والظلام سحبتها ومشينا حالتنا حالة اللي يشوفنا يگول متشردات
طلعنا عالشارع وناس قليلة موجوده والكل انتبه النا
ديالا انطتني ياسين وجهها أحمر من اللطم حچت بتعب ونبرة مهدوده
-ابقي هنا خلي ياسين يمچ راح اجيبله مي من الفلاحين اللي هنا واسويله حليب واضح عليه جوعان
-راحت ديالا عبرت الشارع واني حضنت ياسين اشم بيه تذكرت وجد ونزلوا دموعي ريحتها بيه حسيت سيارة وگفت گدامي وخرت من ياسين وتمسكت بيه شفت أبو سعيد وياه كميل ينزلون من السياره تقدموا ناحيتي أبو سعيد اخذ ياسين من عندي وسحبني صعدني للسيارة
ديالا من عبرت الشارع التفتت الي شافتهم موجودين اتصنمت مكانها وراح كميل يركض شالها وجابها للسيارة وهيَ تضرب وتسب بيه شبعته كفخات ضربته بوكس على وجهه وخشمه حتى دم نزل من عنده
-الله ياخذكم وخرر كميل لاتلزمني مجرمين قُتله مسك وهرم ووجد ماتن بسببكم خواتي ماااتن
-دفعها بالسيارة بغضب وسد الباب تألمت من الضربة الصارت بجسمها دفرت باب السيارة وضربت بالجامه
-افتحوووا البااب ييله خلوا ياسين بحضني جيييبوا يمي داگول
رفيف:-ضلت تبچي وتصرخ وتضرب بروحها انهارت كل شويه تبچي على وحده من خواتها مسحت دموعها وباوعت لكميل بنظرات مخيفه تقربت يمه ولزمت شعره وضلت تجرجر بيه من راسه دفع ايدها والتفت علينا طلع مسدس من خصره ووجهه لديالا
-تسكتين لاا هسه أخرطچ السويتنه مو شويه انتِ وخواتچ كافي عاد هْوايَــه تحملتچ ودافعتلچ وساعدتچ هــيچ تجازيني يامصلحچيه
رفيف:-گلبي أجه يتوقف من اللي شفته خفت لاا يقتل ديالا گدامي لزمت گلبي وعيني عليهم ديالا مامهتزه منها شعره وتباوعله بتحدي وهو يخزر بيها وموجه السلاح عليها
ديالا:-ماتهمني وماتخوف چلبي شِــنو اللي سويناه أحنه مايجي نقطة ببحر من السويتوا يـله نزل سلاحك كلب
رفيف:-بقيت فاتحه حلگي من الگالته ديالا أبو سعيد صافن عليهم گعدت بصفي ودارت وجهها وكميل بعده يباوع عليها وأحسه راح ينفجر علينا من العصبية رجعت باوعتله وصاحت بيه
-شكووو تباوع دير وجهك يـله
رفيف:-أندار وعدل گعدته مسح وجهه وهو يستغفر واني ابتسمت على وكاحة بنت اختي
ديالا:-مشت السيارة واني بالي يم مسك مدري يم هرم أحس روحي حايره ضربت على رجلي قوي واني گاعده وحچيت
-وين ماخذنا هااا وين أحچوا وين ليش مو ويانـه ها كميل ليييششش هرم ماكوو وين اخذها بـَحـر قتلها مووو والله اليوم متنامون اله اشهركم واخزيكم
-حاولت افتح باب السيارة مقفول نزلت الجامه وصيحت بعالي صوتي
-ياااناااس هذول خاطفيينيي ساعدوووني
كميل:-اللهم طولچ يا روح تسكتين لو لا لأن راح افقد واتخبل علييچ كافي مسلته هواي تجاوزتي وراح أگوم اوكلج سنونج
ديالا:-لاااا والله تايهتلك
-أشرررر لأبو سعيد يطبگ السيارة وأبو سعيد ميگول لاا خله بحضنه ياسين ونزل وفتح الصندوگ ما اعرف شِــنو أخذ ورجع فتح الباب الگاعده يمه واني دفرته وردت أنزل دفعني ولزم فكي وفتح تيب خلاني ما اتنفس وهوَ ضاغط بعكسه على حنچي فتح التيب وسد بيه حلگي عدل شعري واني رفسته ببطنه لزم بطنه بألم وابو سعيد يضحك بصوت عالي
كميل:-أشوف شلون بعد تحچين ثبرتينا
ديالا:-الطريق كله ساكته وافكر لحد ماطبگنه يم بيت الصحار فتح الحارس الباب باوعت على البيت وهزيت رأسي واني أتواعدلهم نزل كميل شال التيب من حلگي ومسح دموعي بأيده وحچه بعدم إهتمام واني وخرت وجهي من ايده
كميل:-يـله امشي نصفي حساباتنا ست رماد
ديالا:-مراح تگدر تسويلي شي
-باوعلي ورفع حاجبه وجرني كل قوته ونزلني سحل من السيارة وگعت على ركبي بالگاع وسحبني رجليه تزلغن عطت من الألم ركبي نزفت وحچيت بتذمر
-الله ياخذك يا نگس ،سحبت روحي من عنده ودفعته كل قوتي هوَ چتفني وسحلني سحول لداخل البيت
صارت بوجهي الحجيه ولازمه العوچيه ضربتني بكل قوتها على ضهري بالعوچيه وهوَ خزرها
كميل:-حجيه موووو هيچ
ديالا:-الله ياخذكم كلكم ، خله ايده على حلگي مانعني من الكلام وكلهم موجودين بالبيت يحجون عليه وعلى خواتي لو كميل عايفني بأيدهم لاا چان موتوني
سلمى:-كميل يمه خليها بغرفتك واقفل عليها الباب وعوفها وحدها على مايرجع معاذ وخالك والبقيه نشوف شيتصرفون
كميل:-اي بَــس اضمد رجلها واجي
ديالا:-لزمني من كتفي وصعدني للغرفة مالته سد الباب وخر أيده من كتفي حچه بحذر وهو يرفع اصبعه بوجهي
-ديري بالچ تطلعين من الغرفة أنهيچ ومحمد
-راح جاب شاش ومعقم وبلاستر وگفت گدامي واني ساكته بس صوت شهگاتي مسموع رغم ماجاي ابچي صــار قويب من عندي لدرجة انطخيت بصدره ضربته براسي على وجهه لزم خشمه بألم ودنگ راسه حسيته راح يضربني بَــس بقه لازم خشمه ويحاول يكتم غضبه ويهدئ بنفسه گعد عالچربايه وأشرلي اگعد
-جيبه أنـي اداوي جروحي ماحتاج منك مساعدة الله ليعوزني الك
كميل:-مو وقت هذا الكلام اكعدي خل اضمدها الچ رجلچ جاي تذب دم
ديالا:-رحت گعدت وهو رفع البجامه لركبتي وعقمها الي ولفها
كميل:-توقعت راح تبچين !
ديالا:-لاا ما ابچي متعوده ع الجروح ، ياسين وين وديته ممتعود على احد هنا ، ماجاوبني لم الغراض اخذهن وطلع وقفل الباب .
.
.
مسك :-اجه معاذ للمكان المطلوب نزل من سيارته يباوع للمنطقة بقرف مجيد اختفى راح صعد بالسيارة مالته وعافني ويه سامر هــوَ يكمل المهمة مكانه واني الأنفذ الجريمة
سامر اتصل بمعاذ ووصفله البيت ولون الباب ومعاذ دفر الباب ودخل بيت متهالك وقديييم مشيت وراه أنـي وسامر مخلي سلاحه ببطني مشينه وراه هــوَ فات لداخل البيت واحنا بقينه بره نسمعله
معاذ:-ويييينكم منووو هناااا
ضاحي:-انه هنا
معاذ:-أنتَ ؟؟؟؟؟؟
مسك:-شفت جدي انصدمت مو على اساس مات لو واصل النا خبر غلطط شـلون
ضاحي:-والله وكت ابن البارحه يتحداني
-معاذ طكطك رگبته غمض عيونه ورجع باوعله بحقد
معاذ:-أبن البارحه يگدر يمحيك من الكرة الأرضية أنتَ وولدك الحُثالة وحق داحي الباب أثرم لحمك ثرم وانطي للسمچ يتسمم بيه
ضاحي مرررتي اريدها ياااضاحي حفييدتك وييين ، تردون تقتلوني هــاي أنـي گدامكم يـله سوي اللي تريده مايهمني بَــس مسك اذا أذيتوا منها شعره أگلب حياتكم گلاب وانتَ تعرف كُـلش زين منو أنـي وشنو الأگدر اسويه
ضاحي:-مالي شغل بهالسوالف أنـي اللي أريده تبتعد عن مجيد وماتتقربله ولاتأذي وانطيك مريتك بدون دم وبدون أنتقام وهيچ نتصافى
معاذ:-حجي ضحكتني ترى أني معاذ ماجايك من الشارع ماتمشي عليه سوالفك الكلاوات تفكر تضحك عليه وتتغافلني أفرك فر وأطمك بسابع گاع
مسك:-حسيت السلاح انغرس بخاصرتي التفتت شفته مجيد يضحك بخبث ويأمرني أنقدم
مجيد:-اششششش ولانفس ديري بالچ تطلعين حرف واحد
مسك:-رجع حط السلاح براسي واني واگفه وقربه مني يقززني مشاني وصلني يمهم أباوع على جدي مصدوم يباوعلي اول مره يشوفني واني بهالحجم رفسته برجله وهوَ وگع ، معاذ طفر على السلاح مالته وسحبه طلع تليفونه واتصل اتصال سريع ورجع سده وجه سلاحه على مجيد وجدي ويأمرهم بعدم الحركة ...
.
.
يتبع