الرقطاء وكراتها الثلاث 🐍
اللـدغة الثلاثين 🐍
بقلم كهرمانه
__________
هَربتُ فارًا هاربًا مِنْ أحضـٰـنهُم إليكِ،
لـِ تَريني جحيمكِ،
وقساوة قلبكِ،
وضعفكِ النفسي،
فَــ عُدت من أين ما خَطت قَدمِ..🐍
_بقلم أُميم الجنابي
______________
مسك:-عابد وكنان واحد ميطيق الثاني ولا يسكت عن أصغر زله بحيث يوميه هُـمَ الهم هوسه وصياح
وتوصل بيهم واحد يضرب الثاني ، معاذ مرات أحسه يحبني ومرات العكس بَــس بأخر فتره حسيت أني شگد چنت ضالمته
لأن دائمًا يسوي الأريده وهدير وصلت لشهر الخامس وماحسوا بيها الا بالمستشفى وامها تخابر
وتگول بـِـنتي اجهضت رغم حسيت سالفة الحمل چذب لأن الحجيه تكول شكلها مو مال وحده جاهضه تمشي طبيعي ووجها حــِلوو مو أصفر
ومن سألت أم هدير ع سبب الاسقاط كالتلها زلگت ووكعت وسئلت هدير وحدهن كالتلها كاعده وماحس الا اجاني وجع
بقت هـيَ ببيتها واني يم اهله ببيت الحجيه گدرت أوثق بمعاذ لأن ماشفت من عنده شـيي اذاني حتى من اكتشف
إنُ أنـي مأخوذه عذريتي ماسوه شـيي ولا راح شهر بيه كل الأذيه اجت من عندي أنـي بعدته عن الأنسانه اللي يحبها
بمكري ودهائي أذيته هْوايَــه لمعاذ بَــس في سبيل أوصل للي أني وصلتله چان مستهدف من قبل الرقطاوات
گدرت أزعزع الوضع ببيتهم خلقت العداوات بين الأخوه فرقت كنان عن زوجته وخليته بعيد عن اخوانه ومشاكلهم متخلص
فرقت بين عابد وسلمى لأن سلمى متستاهل واحد مثل عابد يظلمها وياه ويخونها بـَحـر ومروان أبن عابد صارت بينهم مشاحنات والسبب هرم
گعدت بالمطبخ والعامله سوتلي گهوه أخذت الفنجان منها وگعدت عالكرسي أشرب الگهوه مالتي إجت مكالمه
من أختي ديالا فتحتها واجاني صوتها تحچي مفزوعه واسمع صرخات وجد يمها
-مسك تعااالي لبيت وجد بسرررعه يمكن عدها ولاده أشو ديوگع منها مايات والعامله تكول ولاده هــاي
مسك:-حضريييها راح اجي واتصل على معاذ وكنان يلحگونا بَــس هـيَ الها كم يوم بالثامن
ديالا:-دخلت بالتاسع البارحه تعالي بسرعه مو مال أسئله مسك اشو وجهها انگلب أزرگ
مسك:-جايه گلت للحجيه اللي صــار وهيَ متگدر تجي وياي هسه چانت هستوها طالعه من الحمام ومرام تمشطلها عاوجه حلگها طلعت من البيت بعد ما أخذت مفاتيح السيارة
شغلت السيارة وطلعت من البيت فتحت تليفوني اتصلت بمعاذ وكلتله يجينا وانطيته أسم المستشفى ووصيته ينطي خبر لأبوه
حتى يجي للمستشفى وصلت للباب مال البيت نزلت وفتحت الباب لگيتهن منتضراتني وجد وجهها أزرگ مدري أصفر وتتصبب عرگ وتصرخ
شلناها أنـي وديالا وصعدناها بالسياره وانطلقنا للمستشفى طول الطريق هيَ تصرخ ماسكتت وتگول الطفل جاي يطلعع ولازمته بأيدي
وصلنا للمستشفى بعد معاناة دخلناها صالة ولاده حتى بدون لانسوي أجراءات مستشفى بقينا منتضرين شويه وأجه معاذ ووراه أبوه
كنان:-وينهااا شصاررر
مسك:-ولادة
كنان:-بَــس هـيَ بعدها
مسك:-اي لان توأم گالوا ولادتهم تصير نهاية الثامن بداية التاسع
كنان:-الله يستر ويلطف بحالها ماتتحمل وجع
ديالا:-عمو ينراد منك تسويلها اجراءات المستشفى
كنان:-اي يـله معاذ ابقى يمهم خاف يحتاجون شـيي واني رايح احجي ويه الإدارة
مسك:-بقيت منتظرة أحد يطلع ويطمننا عنها كل ماتطلع ممرضة اسألها تگول بعدها أعصابي تلفت گعدت عالكرسي ومعاذ واگف يمي يهدي بيه أجت الحجيه هـيَ ورانيا أخت معاذ گعدت يمنا وضلت تدعيلها وتقرأ قرآن تسهيل أمر
وكنان مثل الطير المذبوح يلوب بعدله شويه ويبچي مفرفح عليها خمس ساعات إنتظار وطلعت الممرضة وگالتلنا
ولدت بالسلامه ولد ثنين وصحتهم تَـمام بَــس يحتاجلهم يبقون تحت المراقبة والفحص ٤ ساعات طلبت من عندي أجي وياها واخذ جنطة الأطفال باوعت لديالا بتردد انطتني الجنطه وگالتلي روحي
دخلت لصالة الولادة أسمع بصريخ النسوان أحسه صوت تعذيب وطلعان روح دخلت للغرفه اللي بيها أختي شفتها مغمضه عينها تآن بوجع
انطيت الجنطه للممرضات واني تجاهلت الأطفال ورحت لأختي لزمت أيدها أطمنها ابتسمت وگالتلي
-شلونهم الأطفال
مسك:-زينين الحمدلله
وجد:-ماتعبانين ؟
مسك:-لاا مابيهم شـيي الحمدلله بَــس يحتاجلهم فحص لتأكيد سلامتهم
وجد:-حلوين ؟
مسك:-ماشفتهم مو بحالهم أنـي أهم شـيي عندي إنتِ ،غمضت عيونها بسبب الألم اللي تحس بيه وگالت
وجد:-كولي مامتقبلتهم لأن أبوهم كنان
مسك:-لاا شعليه بأبوهم أنـي أهم شـيي ذوله أطفالچ قطعه من روحچ بَــس أنتِ اهم من كلشي بهاي الدنيا منو معاشره أكثر وجد لو أطفالها اللي انولدوا قبل كم دقيقه
وجد:-طبعًا أني
مسك:-لعد هاهيه لاتعتبين يـله وهسه بعد ماتطمنت عليچ أروحح اشوف البيبي
وجد:-اووف مسك كُـلش صغار شفتهم ناعمين
مسك:-لاا واحد مدنفش ماخذ عافية أخو
وجد:-ديري بالج عليهم حموينچ
مسك:-ههههه صارت عندي لحضة إدراك ذوله اخوان زوجــي
وجد:-أشو حسيت بغرابة
مسك:-دنيا كلشي تشوفين بيها يـله اخذ راحتچ راح اخذ الاطفال يشوفونهم بعدها ننقلهم للحضانه التفتت للممرضه شفتها تلبس بيهم اول واحد كمل شلته وأني أرجف خوف أول مره أشيل طفل بحضني شعور غريب عليه
الممرضه شالت الثاني وأمرت الممرضه الثانيه تسبح وجد وتنقلها للغرفه التگعد بيها
طلعنا الهم ، كنان والحجية أجو ناحيتنا بسرعه اخذوا الاطفال من عدنا الحجيه ضلت تصلي على النبي وكنان نزلوا دموعه وهو يشوفهم مامصدك
معاذ اجه والأبتسامه مرسومه على ملامحه أخذ اللي چان عند أبوه خلاه بحضنه وأبو اخذ الثاني اللي عند الحجيه
معاذ:-أجوا اللي ياخذون مكاني
كنان:-لو عشرة مياخذون مكانك.
معاذ:-نعيش ونشوف التفرقه ههههه شو ذوله حتى احلى من عندي
كنان:-بدت الغيره
ديالا:-شو انطوني مجال خليني أشوف أحباب خالتهم
مسك:-بعد ماشافوهم وكنان أذن بأذنهم وطلب إنُ يسميهم وگلتله وجد تريـد تسميهم ياسين ويونس على أسم خوالي الله يرحمهم
بلع ريگة بصعوبه وملامح الصدمة بانت على وجهه سماهم وسلم واحد للمرضة والثاني ألي اخذناهم للحضانه
طلعت لرقم الغرفة اللي گالولي تبقى بيها وجد دخلت لگيت وجد مطلعينها من صالة الولاده وكلهم يمها
بقيت يمها وكلناها واحنا هَـم تغدينا وبعدها معاذ أخذ الحجيه ورانيا ورجعوا وره كم ساعة جابولنا الأطفال وسمحوا إلنا بالخروج من المستشفى
طلعنا كلنا ديالا شايله ياسين وكنان شايل يونس واني لازمه وجد وأمشيها بالكرسي المتحرك لأن عدها صعوبه بالمشي
طلعنا من المستشفى صعدناها بالسياره وديالا صعدت وياها والأطفال وياهن وكنان أخذهم وياه
واني صعدت بالسيارة مالتي ومشيت وراهم الحجيه گالت لكنان جيبها يمنا بالبيت ومرام راحت لأهلها من سمعت بأختي راح تجي يمهم
وصلوا قبلي للبيت ورى دقايق وصلت لگيت معاذ منتضرني بالباب ، كل ما أطلع وهو موجود بالبيت وارجع الكاه منتضرني وكل شويه يتصل ومارد عليه
نزلت ابتسمت اله وهو ردلي الابتسامة مد أيده إلي لزمت أيده ودخلنا للبيت شفتهم كلهم مخبوصين بوجد والحجيه مگعدتها بغرفتها
وكنان لبيته هــوَ ورانيا جابوا ملابس ومهد الأطفال وشغلات وجد محتاجتهن ومحضرتهن
بيبي مرمر من عرفت أجت هـيَ ورفيف وأم موسى يتطمنون عليها وعلى أطفالها ، أما أني مشاعري بارده جدًا ناحية الاطفال
بَــس شعور براحه من إنُ أختي جابت وخلصت لأن چنت خايفه عليها من الولادة وهيَ أكثر وحده بينا ضعيفه ومناعتها قليله الفرحة ناقصها بَــس هرم تتواجد بيناتنا
گعدت على صفحة مهمومه شيصير لو مره فرحتنا تكتمل بدون هَـم هْوايَــه صارلها مختفيه
حتى لو عايشه چان وصل النا خبر منها چان تواصلت ويانه احنا خواتها ماتگدر تفرط بينا
ولو عد بـَحـر تگدر تغافله وتشرد من عنده هرم مايصعب عليها شـيي التخليه براسها تسوي تگدر بهاي الفتره تحفر الحايط شويه شويه وتطلع منه
أشك بيها عند أمـي لأن تحلمت بيها وأكو مثل الوسواس براسي بأسم أمـي ربطت بينها وبين هرم معقوله راجعه للعراق لازم اتأكد منها
.
.
هرم:-طول الأشهر الباقيه بـَحـر يختفي يومين ويجي اسبوع يبقى مرات أقل ويرجع يختفي
مالي علاقه بيه أكل واشمر وهو ينضف وراه أبد مانضفت لو شلت شـيي من الكاع أطبخ لنفسي أشمر المواعين الطبخت بيهن بالسنگ
أخر شـيي مل من الوضع مال المواعين جاب بلاستك استعمال مره واحده مواعين وملاعق وشوكات گلاصات چاي ومي حتى الأكله اذبه بالزباله بَــس أنـي اكمل اكل اعوفه بمكانه
اختفى هالمرة مدة اسبوعين وبدأ الاسبوع الثالث وهو ماكـو أعترف كل الأستفزاز الأستفزيته طول الأشهر الفاتت
وهو بَــس يتحلطم ويغلط ماتجرأ ومد ايده عليه يوميه أنـي أفتر بالبيت عسى ولعل أكدر اطلع من البيت واشرد دورت على منشار للحديد مالگيت گلت أكسر الشباك بالطاوه يتفلش والمنشار اسويلي مجال واطلع
فتحت الثلاجه شفت المسواك مخلص من غير المعفن واني ميته جوع وحتى المي اللي بالبراد راح يخلص اليوم اذا ما أجه يمكن أموت من الجوع
طلعت من المطبخ مشيت من يم المغسله شفت شعري شـلون مكفش اخر مره سبحت قبل ١٠ ايام وصارلي موقف كرهت الحمام
دخلت أسبح بالليل وانطفت الكهرباء والماطور گام ميسحب مي بسبب انقطاع الكهرباء وبس مي حار صــار بالحمام والبخار خنگني
رِدت أطلع من الحمام ماشوف ولا أندل الباب ضليت اصرخ وأبچي وحدي لحد ما اجت الكهرباء وطلعت من الحمام
بلا ما أسد المي عفته يخلص وحده بدلت وگعدت أرجف من الخوف وأكل بأضافري گمت من مكاني شفت البخار اختفى والمي صاير بارد سديته وعفت الحمام
صحيت من تفكيري فتحت مي المغسلة أخذت مي بأيدي ونگعت شعري وغسلت وجهي
مشطت شعري وعفته مفتوح وبدلت ملابسي ماوصلت النضافة المطلوبة بَــس شسوي ماگدر اسبح
تمددت على التخم مال الصاله واحس مالي خلگ اتحرك بسبب الجوع بقيت على هالحالة لليل اشرب مي وارجع اتمدد لعبت نفسي من المي
سمعت صوت الباب تنفتح گمت من مكاني وطلعت من الصاله شفته يدخل للبيت وساد خشمه
-ايييييع هرممم شِــنو هــاي الخيسسسه بيت مو مگلاب الزبل
هرم:-وين مختفي صارلك اسبوعين ماتگول اكو حيوانه محبوسه بالبيت
بـَحـر:-مسواك وجايب بعد شــكوو
هرم:-وهذا المسواك شِــنو شادله ضمان لو اشتراك شهري يـله يخرب ترى لاا الطماطه ولا البتيته تتكاثر ومخلص الاكل وحتى المي خلص راح أطگ واموت من الجوع
بـَحـر:-أنـي اجيبلج اكل وانتِ نضفي البيت
هرم:-والله هــاي العايزه انضف بيتك يالحرامي
بـَحـر:-أنـي حرامي؟
هرم:-لاا بَــس خاطفلك وحده صارلك أشهر وناسيها ، عافني وراح جاب مكناسه وماسحه وچيس مال زباله جمع الگزاز والچباس والكواغد كلهن
لبس كفوف وضل يلم بالگاع وهو وجهه معقوچ جاب سطل خلا بالحمام ملاه مي وخله بيه ديتول وذبه بالبيت صــار كله مي وسحبه بالماسحه وشغل بنكات وعوادين مال بخور وفتح التلفزيون على قرآن
-الله شكد حِـلوه النضافة
بـَحـر:-تردينا نبقى على وصاختچ يالوصخه
هرم:-منو گلك تتزوج وحده وصخه وفوضويه
بـَحـر:-ايع شايفه روحچ شايفه ريحة البيت شِــنو چانت
هرم:-لاا ماشايفه ريحة البيت لأن متشبعه بيها وماحس
بـَحـر:-ومفتخره اخخخخ لو ما اللي ببالي
هرم:-رجعني لاهلي
بـَحـر:-اششش سدي الموضوع هرم
هرم:-اكيد هسه مشتاقيلي صدگ يحبوني
بـَحـر:-ولچ يثرمونچ ثرم ثقي بالله مايخلونچ عايشه ابقي هنا انتِ ماترتاحين الا يموتونچ
هرم:-شبيكككك شبييييك عوفنييي اروحححح شتريد من عندييي اشو الناس حجوا بيه وطعنوا وانجابت سيرة خواتي بالمو زين بعد شــكوو حتى نسوا الموضوع ليششش متريدنيييي ارجعععع ،جرني وشمرني عالقنفه مال التخم دفر الطبلة الگزاز وانشمرت بالگاع ونكسرت فزيت من صوت التكسير حچه بأعصاب
بـَحـر:- ثقي بالله مايخلونچ عايشه ابقي هنا انتِ ماترتاحين الا يموتونچ ثوووله أنتِ ثوووله تردين تموتين شنوو الفااايده اذا ترحينن ابقي هوا معززه مكرمه
هرم:-معززه مكرمه مهانه ، باوعت عليه شـلون ضايج صرخت بوجهه
-شنووو الفاااايده من بقائي هناااا شووف اذا مارجعتني لأهلي انتحررررر وروحي تضل ذمتها برگبتك
بـَحـر:-انتِ غبييييه والله غبيييه جاي اكلچ ميخلونچ عايشه يموتونچ
هرم:-وانتَ هذااا الرااايده خليني أروحح ويقتلوني علمود ترتاح من عندي اذا صدگ هيچ تخاااف عليه ليششش جبتني ها لحدد هاللحضة ما أعرف لــيش أني هنااا شِــنو نبع هــاي التصرفات ، لزم وجهي وشدد على قبضته حسيت وجهي راح يطگ، حچه بصياح وضل لازم وجهي
بـَحـر:-أولًا أني زوجچ وبكيفي وين ما أريد اخليچ ثانيًا أنـي اللي ببالي أسويه مالچ شغل بيه ثالثًا والأهم نبع هااااي التصرررفاااات هــوَ إنتقااااام أرجع شكووو كلمه انحچت على ابوي ترجع تنحچي على أبوووووچ
هرم:-شلت أيده ودفعتها من وجهي باوعتله ملامحه تتفسر عبارةً عن كتلة غضب
-حتندم بـَحـر والله أندمك لاتظن أفوتها الك هــاي حبستي لمده أشهر ، لو مفهمني شِــنو إنتقامك چان شاركتك بيه
وساعدتك بَــس مو ضدي أني وخواتي تگدر تنتقم من عمامي إذا أبويه مأذيك لــيش ما اختاريت وحده من عماتي تنفذ بيها هذا الشي وتخلي الناس تحچي عليهن
لــيش مارحت عاقبت اخوانه اذا الهم ايد بالموضوع أنـي وخواتي مالنا ذنب اصلًا مانتذكر ابوي ولا هــوَ شايفنا
بعد الناس بشنو تذكره نذير ماربانه مااشايفنا مايدري بأمي چانت حامل بينا أصلًا إذا چانت عندك عداوه ويه رياض
أگول حقه هذا الرجال لأن رياض ربانه وعلمنا كلشي بَــس بـَحـر انتَ غلطان وقرار أنتقامك غبي جدًا مهما كان اللي سواه أبويه مو دليل على انتقامك منه ببناته ماراح يأثر عليه شـيي
بـَحـر:-خلصتي ؟
هرم:-أندار وراد يطلع باوعت شفت أكو مزهرية ديكور عالميز مال تلفزيون شلتها وشمرتها عليه
ضربته بضهره ووكعت بالگاع انكسرت ماهتم ولا عبرني أصلًا طلع ورگع الباب وراه
رجع ورى ساعة جايب مسواك وأكل وياه خله المسواك بالمطبخ واني بقيت گاعده بالصالة جابله طبله خشب
خلاها گدامي وصينيه بيها بيتزا ومشويات وبطل ببسي ومقبلات جر قنفه من التخم وگعد گبالي راد يمد ايده
يفتح الببسي أخذته من عنده وفتحته شربت من عنده وتفلت عالببسي وخليته گدامي هــوَ يباوع ومتقزز مني
بدينا ناكل وكل مايريد يمد ايده على شـيي اخذه من عنده ياكل ونفسه لعبانه من عندي اخر شـيي گام غسل ورجع
سحب القنفه وجعها لمكانها وجاب مكناسه كنس الگاع والگزاز اللي صــار بسبب الطبله الچبيره اللي كسرها
كملت أكل ورجعت ضهري فحطانه من گد ما اكلت مسحت ايدي بالتخم وهو عاط بيه
-صخيييييمه الوصخه گوووومي غسلييي ايدچ
هرم:-ما اغسل
بـَحـر:-يطبچ مررض
هرم:-عافني وصعد للغرفة مالته أنـي مهوستها وملابسه بكل مكان بالغرفة سمعته يصيح ويدردم
-هاااي شمسوووويه بالغرررفة
هرم:-لاتصيح ماريـد يسمعون صوتك الرقيق
بـَحـر:-تعاي نضفيييي ترى تعببتتت طاح حضي
هرم:-محد جبرك تتزوجني معاجبك طلگني يـله
بـَحـر:-أي خوش لازمه لزمه عليه
هرم:-نضف غرفته ونام والصبح طلع ضل يوميه يطلع الصبح يجي بالليل ماله شغله بيه متجنبني كُـلش أحسه كاره روحه بسببي ، دخل للبيت مبين عليه تعبان شاف المطبخ بيه مواعين وطاوات والبيت وصخ لزم راسه وصاح
-دخييلك يابوو فاااااظل تعبتتتتت
هرم:-هزيت ايدي وهو دخل گعد عالتخم مال الصالة شفته بيده تليفون گلتله
-أريد تليفون ضايجه ،باوعلي بشك وگال
بـَحـر:-شتسوين بيه
هرم:-شسوي بيه يَـعنـي لاتخليني أحچي حچي مو من ثوبي
بـَحـر:-لاا احچيها انتِ مخليه احترام لثوبچ شو المستحه عندچ مصطلح غريب شِــنو هذا ينوكل ينشرب
هرم:-هــا اغلط اغلطط ؟
بـَحـر:-هههههه أموت بلسانچ الساقط
هرم:-صفنت عليه ورفعت حاجبي بغرور
-ديله انطيني تليفون
بـَحـر:-لتحاولين ماكـو فائده
هرم:-عافني وراح ينضف بالبيت ويغسل مواعين خلص تنضيف وراح سبح ونام واني شفت الوضع هدوء دخلت للغرفة الثانية تمددت ونمت
گعدت ثاني يوم گمت من مكاني وغسلت وجهي ومسحت وجهي بملابسي رجعت للغرفة الم بشعري القصير ، جذب إنتباهي التليفون مالتي موجود عالميز اخذته وفتحته مليان شحن
بَــس مفرمت من كلشي كأنو جديد مامستخدم طلعت من الغرفة والتليفون بأيدي دخلت للمطبخ شفته گاعد مسوي ريوگ لنفسه وياكل گعدت بصفه وباوعلي بطرف عينه حچيت بإستغراب
-أگووول شِــنو هــاي رفعتله التليفون وهو باوع عليه
بـَحـر:-تليفونچ
هرم:-بَــس لــيش مفرمته
بـَحـر:-لــيش يَـعنـي غير علمود متتواصلين ويه أحد
هرم:-هــا وبيه نت
بـَحـر:-لاا
هرم:-لعد شسوي بيه
بـَحـر:-بيه العاب لهي روحچ بيهن
هرم:-العاب شِــنو طفله
بـَحـر:-لاا مو بَــس للأطفال العاب الجهاز
هرم:-ديله احسن من ماكـو
بـَحـر:-حوريه والله
هرم:-هــا ؟
بـَحـر:- چنت بَــس اسمع بيهن حور العين وهسه شفت وحده منهن گدامي
هرم:-وينها بله بالتليفون
بـَحـر:-شگد غبيه أقصد عليچ
هرم:-هااا أنـي كلشي مختلف بيه حتى زوجــي
بـَحـر:-صدگ ؟
هرم:-اي أقصد اذا انتَ تشوفني حوريه أني ماشوفك أصلًا لأن متهمني واذا اريد اشوفك فـ مجرد شخص عادي أذاني وشهر بعرضي ومر مرور الناس المو كرام بحياتي وهيه مليانه ناس هيلگ
بـَحـر:-هــاي عليمن هيلگ
هرم:-عليك ،أنداريت وردت اطلع من المطبخ أستوقفني صوته
بـَحـر:-أمچ اتصلت عليه
هرم 'بلهفة':-أميي؟؟
بـَحـر:-اي أمچ
هرم:-شِــنو خايفه عليه ؟
بـَحـر:-تريـد تتواصل وياچ مدتگدر توصل ألچ ههههه عبالها أني غبي وما أفهم بهاي الحركات كل ضنها أتعاطف وياها وأدليها مكانچ وين
هرم:-حچيت واني ماريـد أبينله مشاعري
-يَـعنـي هـيَ تريدني قصدك
بـَحـر:-أي
هرم:-باوعلي بـ شك يريد يعرف ردة فعلي
-شنوو أي احچييي ، شال الصينيه وگام من الكرسي خله المواعين عالسنگ وبدأ يغسل بيهن ويحچي وياي
بـَحـر:-تگول ميته عليها وندمانه كُـلش أحسها قطعة من روحي ضايعه لاا ليلي ليل ولانهاري نهار وبچت وگالت عَـفيه إذا تلگاها جيبها ألي لاتوديها لأمي تذبحها بَــس تشوفها
هرم:-گعدت عالكرسي واني أسمع كلامه گلبي رف لأمي بَــس مابينت ضل الموضوع ببالي، طلع هوَ واني سويت لنفسي ريوگ وأكلت وبقيت گاعده العب بألعاب التليفون، وطول النهار بقه بالي يم أمـي
قررت بَــس يجي بـَحـر اجرب بالرمز مال تليفونه اعرف رمزه بَــس كون باقي نفسه القديم وأگدر الزم التليفون مايضمه مني
بقيت منتضرته لحد ماسمعت صوت الباب ينفتح ركضت للغرفه مالتي تمددت وتغطيت سويت روحي نايمه مثل ماتوقعت أول ما أجه للغرفه مالتي فتح الباب والگلوب شافني نايمه طلع وسدهن وراه
ضليت مركزه والبيت هدوء شويه وسمعت صوت الدوش بالحمام لزمت التليفون مالتي وطلعت بهدووء وتسللت بالغرفه اللي ينام بيها لگيت تليفونه عالچربايه مشمور
كتبت الرمز القديم انفتح التليفون دخلت عالمكالمات دورت شفت رقم امي من ضمن المكالمات الوارده مسجله زوجة نذير2 اخذت للرقم صوره ورجعت التليفون لمكانه وطلعت ركض من الغرفه دخلت لغرفتي تمددت عالچربايه ضميت تليفوني جوه رأسي وغمضت عيوني غرگانه بتفكيري
صراع بداخلي مره أكول هــاي امي وگلب الأم لازم يحن على ضناه ومره أكول لاا هــاي مثل الهالات السوداء يمكن ترجعني ويرجع طبعها الخبيث وياي ع الأقل بـَحـر ما عذبني ولا سوه السوته أمـي بَــس خفاني عن اهلي اضرار جسديه وتعذيب ماكـو
غفيت وأني أفكر ماعرف وين وصلت بالتفكير ماحسيت على نفسي إلا دنيا صبح
گعدت باوعت للساعه بالعشرة الصبح گمت من فراشي بكسل طلعت من الغرفه وغسلت وجهي وأحس هذا أخر نهار ألي بهذا البيت اللي صارلي مثل الزنزانه بقيت افتر وكأنُ داودع المكان راح اشتاق للمشاكل ويه بـَحـر إحسااس قوي بالمغادرة دورتلي على علاگه متوسطه لگيتلي وحده خليت بيها ملابس وتليفون وشاحنه وسناكات ومي خاف اجوع لو أعطش وضميتهن بالكنتور اللي بالغرفة
رجع بالليل نفس ترتيب البارحه سويت روحي نايمه بقيت أتگلب بالفراش لحد الساعه الثالثة فجرًا طلعت من الغرفة بهدوء تسللت لغرفته شفته نايم على وجهُه دورت عالمفاتيح بدون لاا أطلع صوت بقه بَــس جوه المخده مديت أيدي الناعمه جوه المخده لزمت المفاتيح خوش مكان ضامهن مايضيع
طلعت من الغرفة النايم بيها بهدووووء أنـي والماكو سوه دخلت للغرفه أخذت العلاگه المحضرتها والتليفون وطلعت من الغرفه مشيت بأتجاه باب البيت فتحته وطلعت والمفاتيح بأيدي سديت الباب وقفلته عليه وهو جوه وطلعت من الباب الچبير هَـم قفلته عليه خليه محبوس مثل ماحبسني طلعت اتمشى نص الليل والشوارع فارغة تخوف
ماعرف وين أروحح أمشي بعشوائيه ويامكان ياشارع يجي كدامي أفوتله ساعات ماعرف وين أروحح بدأ الجو يكشف وريحة البيض طرت خشمي دليل على أنُ الفلاحين گعدوا من النوم
المنطقه زراعيه وبيها زرع وأصحاب الزرع صاروا يطلعون يرشون الزرع مالتهم والعدهم حلال يطلعون يوكلونه تقدمت وأني متردده لرجال كبير بالعمر شافني عقچ حواجبه بإستغراب
-السلام عليكم
-وعليكم السلام
هرم:-عمو فدوه عندك تليفون اريد استخدمه ضروري أني مضيعه أهلي واريد اخابر على أمـي
-أي تفضلي تفضلي هسه أجيب تليفوني وأجي
هرم:-تنفست بأرتياح معقوله بهالسهوله أگدر أخابر امي وتجيني اجه الرجال بيده تليفون قدمه ألي وأيده ترجف بسبب تقدمه بالعمر أخذت التليفون من عنده وطلعت تليفوني فتحت الأستوديو وطلعت رقم أمـي سجلته بالتليفون مال الرجال واتصلت ماردت رجعت اتصلت من جديد يـله رَدت وأجاني صوتها النعسان
-هــا ماما أني هرم وچنت عند بـَحـر ضامني يمه فدوه تعالولي بسرعه
خيزران:-يمه بنيييتييييي ولچ وينچ انتِ يامكان هسسه أجيج سووده عليه انطيني العنوان أدزلچ زوجــي هــوَ هَـم مثل أبوچ
هرم:-ماعرف يامكان بَــس أنـي يم رجال هسه اخلي يوصفلكم
خيزران:-وينه انطيه التليفون
هرم:-هاك عمو بلا زحمه عادي تنطي أسم المنطقه لماما
الرجال:-اي عمي جيبي التليفون
هرم:-أنطيته التليفون وضل يحچي ويه أمـي وامي توصيه عليه يضمني يمه واذا اجه شخص سأل عليه مايگله أني يمهم وگالتله زوجــي مسافة الطريق يجيك ، سد التليفون من عندي وگلي أروح يم زوجته أگعد وهو يتواصل ويه امي لحد مايجي زوجها
مشيت كلي أمل وفرحانه رحت يم الحجيه گعدت وهيه مخليه حليب عالنار صبتلي گلاص مال حليب وخبزه اطتني اكلت الخبزه وشربت الحليب وضليت گاعده ساعات أنتضر لحد ما أجه الرجال وگال أجوا أهلچ روحيلهم
گمت من مكاني جسمي كله يرجف بَــس لاا يطلع بـَحـر مو زوج امي شفت سيارة ناصيه عالطريق خارج الزرع طابگه تطمنت هــاي مو سيارة بـَحـر فتحت باب السيارة وباوعت للشخص اللي گاعد بيها ...
.
.
يتبع
البارت ٣١٤٤ كلمه