Phur lo takin school kal turin ka insiam a, Jungkook nena kan inkar hlat tak telh telh dan ka ngaihtuah pah a, room kawngkhar chu eomma in a rawn hawng a.
"Bawiha ilo tho tawh maw? Breakfast ka peih tawh nia aw, i hman veleh i lo chhuk dawn nia". A sawizo chu a kalsawn leh nghal a.
Zawi tak chuan inhnuaiah ka chhukthla a, eomma leh appa te chu an lo thu reng tawh. Ka thu ve nghal a.
"Good morning eomma appa".
"Good morning bawiha".
Ril tam lem lo tak chuan ka hmaa inchhawp chu ka ei a, appa chu a rawn tawngchhuak a,
"Bawiha, dance class lam te i tluang em? I kalna hi thlak i duh em?". Tuna ka kalna hi kan veng piah a awm ani a, a tha in a lar bawk a, tam pawh kan tam hle ani.
"Tluang ani mai e appa, thlak duh hran lo e, tuna mi te nen hian kan innel ve tawh hlawm a".
"Awle, ka'n zawt mai mai che nia, ka thianpa hian dance studio a hawng thar a, i kalna ai sawn a hnai a, chuvang chu mawle", tiin a plate a inchhawp chu a ei a.
Ka eikham veleh ka chhuak nghal a, Jungkook pawh call tum tawh lo in motor ka la chhuak a, school lampanin ka inkhalh chhuak nghal a.
Karloah school chu ka thleng a.
Gate ka lut chiah chu ka hmalam hla vak lo ah chuan Jungkook kal chu ka hmu a.
"Jungkookahhh.... Jungkookahhh?".
Ka tlanphei a, ka ko pah bawk a, mahse alo hawi duh miah lo nia! A bul ka thlenphei chuan amah su dawt pahin a darah ka kuah a,
"Jungkook-ah, ngatinge ilo hawi duh miah loh a? I beng a ngawng thut ami?", ka'n ti kher a. Luhlul takin a ngawi ngul a.
"Enge i hriat a Kook? I tho fuhlo deuh zawk ami?".
Hmalam chu a en char char a, a nakah na zetin ka kheuh a, "a rawn thlah lo che mi?", a tehngawt chuan!
"Tuin maw?", ka ti deuh hu.
"I bialpa tharin!".
"Engtin a??!!", tiin ding meuhin Jungkook chu ka en a, a thusawi hi a awmang lo takzet. Za tak chuan ka nuichhuak a. "Jungkook, i thusawi hi i hrechiang meuh em?".
Jungkook erawh min chhang lo in a kal tlang daih a, hepa hian Suga hi a lo thik takzet anih dawn hi, tikhawp hian a thikthu a chhia ani tih pawh ka lo hre ngai hleinem.
Class ah pawh ngawi rengin a thu a, nidanga midang tibuai char char thin kha vawiin chu amah ang lo takin fel ber ni awm hrimin a thu ngawi kar a, mak ti takin ka en leh vung vung zel ringawt.
Break a nih veleh a chhuak a, hallway ah chuan mi pawh ngaihsak lo leh ngaichang lo in a kal vei nalh a, a hnungah chuan ka zui ve vat.
"Jungkook-ah? Min lo nghak ve la", ka thusawi chu hre lo ang hmakin a kal zel a.
Step ah chuan a chhukthla a, a kalna tur ka hre mai. Ka zui zel a, kawngkhar lo awm hmasa ber chu a hawng deuh sawk. A lut a, ka lutzui ve nghal.
Jungkook nen hian kan phur chang changin school Karaoke hi kan pan thin a, tunah pawh kan awm mek ani.
Jungkook chu min ngaihsak lek lo in a zai a, keiin a awmdan leh a chezia chu ngawi rengin ka lo en thung.
"Kook.. Ka awm ve reng hi, tlem talin min ngaihsak ve deuh la". Min rawn en zeuh a, hmalam a en leh nghal daih. Hmundang melhin ka thaw hak a.
Jungkook chungah hian ka thinrim hauh lo, kan pahnih chauhin kan inkawm a, buaina kan neih pawn midang kan inkawmsan ngai lo, hetianga a awm pawh hi ka dem lo a, ka hrethiam em em zawk ani.
Break a zawh chuan ngawi reng bawkin kan inzui chhuak leh a, hallway kan panlai chuan student pakhat hian Jungkook chu a rawn su chawrh mai a, ani mood fuh zan lo chu a thin a rim kher mai.
"I kawng en ta che!", tiin a au nghal tuar a. Chupa chu a rawn hawichhuak a, kan school a mihausa fapa malneihchhun, zaidam bik vak lo kha alo ni reng mai.
"Engemaw i sawi a? Ka kalna a min rawn nek tu zawk i nih kha! Khati tea min tih zawk chule!", tiin Jungkook hmaah chuan a ding ta ran a.
"Kook, kal ang, buaina neih a tha lo", a beng bulah chuan ka hrilhru zauh a. Min ngaithla lo nasa..
"I ngam chuan min han khawih la, ka hlau bik lo nasa che", te chu ala ti deuh deuh a.
"Aaa.. Jungkook-ah, kalsan teh ang, mi'n min en thup tawh ania", tiin a banah chuan ka pawt a, ani pawh alo tang lem lo.
"Hre rawh! Kan inhmuh leh hun hunah i hre viau ang", chupa chuan Jungkook chu a kawk sak sak a.
"A khanglang chuan!", tihleh Jungkook chu kal leh a tum a, a kawngah chuan kuahin ka lo dang vat a. Chupa pawh chu student dang ho chuan an lo dang laih laih a.
Jungkook chuan ka kut chu phihsawn dawrhin amah chuan a kal a, ka zui ve nghal. Keimah vanga a mood fuh lo tawh sa nen, tiang kha a thlengzui leh bawk si nen ka rilru chu a nuam lo angreng hle. A mood fuh nise Jungkook kha khapa lakah khan tiang khan a awm hauh lo ang.
"Kook, keimah vangin i lung a awi lo ani tiraw? Min ngaidam rawh aw?".
"Ngaihdam i duh chuan khapa kha hmu tawh suh!".
"M-maw? M-mahse ngatinge? K-ka sawi awmzia chu i ngaih ang kha a nilo Jungkook".
"Khatiang khan i sawi ziah a, mahse ka rinloh lam daih in lo kal tawh anih hi Jimin-ssi".
"Kook, ani nen engkawngmah kan la zawhdun lo", thudik ka sawi ani. Suga hi ka ngaihzawng angin ka en lo a, ani pawn chutiang zawngin min en bik hek lo. Mahse Jungkook hian a hrethiam thei tlat lo ani. "Kook i inti hreawm mai mai, thian pangngai ang takin en la, i tan pawh a awlsam zawk ngei ang. Ka ngaihzawng anga i ngai a, i enhran tlat chuan i tan pawh thil a harsa mai mai".
Ngawi rengin hmalam chu a en ngar a, min chhan a tum hmel loh. Teacher alo lut zui bawk nen, kan sawi chhunzawm ta lo a.
Ban alo hun chuan ngawi rengin a Bag la in a chhuak nghal a, vawiin zet zawng min be peih hlawl lo anih dawn hi. A hnungah chuan ka zui a.
Gate kan chhuah chuan kaltlang zel a tum chu a banah vuanin ka pawtding a.
"Tinge i ngawih reng a Kook? Tirawh motor ka keng, kal ang", kalpui ka tum chuan a ding tlat. "Lo kal rawh".
"Nangmahin lo va kal mai rawh".
"Mahniin ka chuang peih lo, kan chuandun khat tawh em hi", tiin naupangchhia tak chuan ka ti a.
"Min ngaihsak tawh lo em alawm".
Huiham! Chuthu bawk chu.
"Jungkook, ka ngaihsak ber che, eomma leh appa tihloh nang aia hlu ka tan an awm chuang lo".
"Suga kha..?".
"Ani chu ka thian pangngai ve mai lawm, tiang zawng khan ngai tawh lo hram rawh Kook".
"A tha lawm". Mi pawh ngaichang tawh lem lo chuan a kal zui nalh a.
Motor chu keiman ka khalh a, ka biak loh chuan Jungkook chu a ngawi reng a, boruak rih lutuk loh nan ka zai ta vel mai mai a.
In kan thleng a, motor ka tihdin rual chuan ka phone a rawn ri ve chiah. Suga hyung maw...
Jungkook chu ka va en zeuh a, min lo enkur. Chhang lo in phone chu ka ak daih a.
Jungkook aiin kan in hi school atanga a hnaih zawk avangin Jungkook hi a rawn pengkawi deuh ngei ngei thin. A chang leh a riak tlang a, tiang reng reng chuan hun kan hmang thin. Mahse Suga nen kan inhmelhriat atang chiah hian a inlahrang deuh a, thian dang kan kawm lo dun bawk nen, a tan chuan Suga chunga a lungawilo pawh hi a awm em em ani.
Inthlak felin la hma hle mah se dinner tur ka buaipui nghal mawlh mawlh a, Jungkook chuan T.V a en bawk.
Dinner tur ka siam zawh hnu chuan ala hma bawk a, Jungkook bulah chuan ka thuphei a.
"Tunge lo phone che kha?", a ti nghal a.
"Suga hyung ania", tlang tak chuan ka sawi a. Zawhna min zawtzui lo in a ngawi daih a.
Darkar chanve dawn inbe loa T.V kan endun hnu chuan doorbell a rawn ri ral ral a, hawng turin ka tho nghal vat. Ka va hawng chu Suga alo ding reng mai. Ka ngawi det a.
"Jimin-ah, hei ka boss in roast chicken leh beer a show a, a chuang a tam avangin ka rawn ken che a", tiin a thil ken chu a khai kang va va a.
"O.. Oh.. Aw, lo kal rawh, lo lut rawh", tiin kawng chu ka kian thuai a. Ani pawh a rawn lutzui vat.
Kawng chu khar leh nghalin Suga lam chu ka hawi a, Suga chu ding meuhin Jungkook nen an inen (inmelh) lai chu ka hmu a. Keipawh ka ding dat.