جـمـرات نـارهـم

الـبـارت الـسـابـع عـشـر

مساء الخير بنات ليش هيج تفاعلكم فد مرة كلش مقصرين بالتصويت هسه لا تعلقون بس ليش هيج ما تصوتون يعني هي النجمة ضغطو عليها شنو الصعب بالموضوع اني ساعات اضل اكتب وانتم تقراءون وتروحون حتى تصويت ماكو بنات حتى اذا من غير برنامج قريتي القصة روحو للواتباد صوتو للبارتات وعلقو التفاعل كلش قليل ليش هيج تروحون تعبي بالقصة

#جـمـرات_نـارهـم

#بــقــلــم_بـتـول_حـسـيـن

     للتواصل حساب الانستا 7bt_5y

        يوزر وحساب الواتباد Batol99Hussein

#الـبـارت_الـسـابـع_عـشـر

---------------------------------------------

لنا حق التمنِي ، و هِمة السّعي ، وَ حـُسن الظن..
وَ للّٰه سِر التوقِيت، وَ سر الإجابة، وَ سِر الدّٓهشَة 🩷.

--------------------------------------------

مـيـسـم ::- سحبت البنية من ايدها جانت بدون ملابس ما قبلت تطلع رجعت للبيت وجبتلها من ملابسي لبستهن واخذتها خليتها وياي بغرفتي وگعدت افكر وبعدها ادركت الشي السويتة غلط وبأي دقيقة وهم بدون ما يرف ألهم جفن الاعور وأيمن يأمرون بقتلنا اني وهاي البنية

ضليت افتر بالغرفة قلق وتوتر وخوف من الصار والراح يصير فزيت من رن جهازي تقربت اخذته وايدي ترجف باوعت للشاشة والاسم ومغصتني بطني وزادت رجفتي
گالت البنية

::- خليني اروح الله يوفقج هسه يجون الشرطة على صوت اطلاق النار

مـيـسـم ::- رغم جنت مرعوبة من ذكرت گدامي هذا الشي بس گتلها اششش ما اريد اسمع صوتج گعدي ماكو واحد يجي لأن المكان بعيد وحتى البيوت بعيدة

تقربت منها گعدت وگتلها ،،، اسمعيني زين وركزي حياتي وحياتج هسه بين ايدج انتي غصب عنج توافقين لازم باجر تسوين العملية اوعدج اكون وياج خطوة بخطوة اني خاطرت بحياتي بس حتى ما تتأذين

::- لا لا اكيد يموتوني بالعملية راح يموتوني

مـيـسـم ::- وجع حتى وجع ولج تسويها لو انطيج بيدهم اختاري ترا اني اتورطت بسببج انتي تعرفين كل هاي المخاطر واجيتي تبيعين عضو من اعضاء جسمج ومن البداية گلت ماكو تراجع وانطيتكم وقت تفكرون وكررت اكثر من مرة ماكو تراجع لأن اعرف الاشتغل وياهم ما راح يتركون اي شخص يتراجع

::- اسويها اسويها بس لا تخليهم ياخذوني

مـيـسـم ::- موبايلي ما بطل يرن اخذت نفس وزفرته اكثر من مرة وبعدها تذكرت كلام ام ساهر غمضت عيوني
ورددت اكثر من مرة

﴿ وَجَعَلۡنَا مِنۢ بَيۡنِ أَيۡدِيهِمۡ سَدّٗا وَمِنۡ خَلۡفِهِمۡ سَدّٗا فَأَغۡشَيۡنَٰهُمۡ فَهُمۡ لَا يُبۡصِرُونَ  ﴾

وبعدها رديت

أيـمـن ::- انتي بخير شنو صاير اتصلو الحرس،وگالو انتي مصوبتهم كلهم شنو صار

مـيـسـم ::- ضحكت بصوت عالي وگتله يعني من اشتكو مني ما گالو السبب شنو اي اني هيج سويت لأن ما نفذو كلامي اني مخليتهم على البيت الزغير حتى يحرسون البنية وما تشرد

رحت لهناك وشفتهم يريدون يغتصبون البنية أيمن اني اشتغل شغل نظيف ما اريد اي نقطة سودة تصير عليه لأن راح توصخني وهذا درس حتى غيرهم ما يستهزء بيه لأن بنية وبهذا العمر واشتغل وياكم ماكو احترام أليه ولا يخافون مني

أيـمـن ::- تمام تمام اهدي هذا حقج لازم يحترمون واذا ما احترمو نخليهم يحترموج بالخوف غصب عنهم عفيه عليج عجبتيني صايرة مفترسة ههههه يله حضري نفسج راح يجون ياخذوج وياخذون الجحوشة يعالجوهم

مـيـسـم ::- تمام بس منو راح يجي گال الشخص الاشتغل ويا راح يجي ياخذني لغير بيت وياخذون الحرس يعالجوهم فصلت المكالمة وحضرت نفسي والمسدس ما تركته ابد خفت يغدرون بيه

سمعت صوت برا بسرعة فتحت الشباك وباوعت ضليت اتسمع على كلامهم شفتهم شالوهم لسيارة وبعدها اتصل عليه جاوبت گال اطلعي أيمن گال نغير المكان بأسرع وقت

اخذت البنية وطلعت من البيت واخذوني لبيت ثاني وترك يمي ثنين حرس واتفقت العملية الصبح وبعدها ارجع لبغداد

بيومها ابد ما شفت النوم بسبب القلق والخوف من الغدر جنت اذكر نفسي كل شوية اي لحضة يغدروني ويقتلوني
ما صدگت صار الصبح واجو اخذوني للمستشفى اني والبنية

انقهرت عليها هواي بچت بس جانت خايفة تحچي اي شي اني ما تركتها من امنت عليها طلعت بخير من العملية ضليت للعصر بالمستشفى بعد ما راحت البنية اخذوني ثنين من حرس الشخص الاشتغل ويا رجعوني لبغداد

كل هاي الفترة ما گدرت افتح الموبايل الثاني واطمن نيار وساهر جنت اعرف نيار يسمع كل شي وهو قلق عليه طول الطريق اريد افتح الموبايل واتراجع

بعدها شلت الفكرة ونمت لأن الطريق طويل ضليت نايمة من وصلنا گعدوني اول شي سويته رحت لغرفة محمد اطمنت عليه وبعدها رحت لغرفتي اخذت المبايل ودخلت للحمام راسلتهم

هلو اني بخير لا تخافون

نـيـار ::- شلون هيج تتصرفين بكيفج لج گوة منعت نفسي حتى ما اجي اخذج خفت عليج كلش وگلت ما راح يتركوها

سـاهـر ::- ميسم لا تخافين ما راح نطول الشغلة ان شاء الله هذا الاسبوع نخلص كل شي  بس خلي نرتب خطة حتى نداهم بيوتهم

مـيـسـم ::- نيار انت شبيك لعد شتريد اتركهم يغتصبون البنية

نـيـار ::- جنتي تگدرين تبعديهم بدون ما تأذيهم

مـيـسـم ::- لو مو خوفي من الله جان فرغت المسدس براسهم حيوانات مو بشر لا حشى الحيوانات منهم

سـاهـر ::- نيار لا تضغط عليها حقها هيج تتصرف ويا هيج وحوش

نـيـار ::- هو شنو حقها انت صاحي لك راح تروح تحقيق واحتمال تنسجن شبيكم انتم اني مو عدوها اني خايف عليها

مـيـسـم ::- شنو ليش ما سويت شي غلط اني دافعت عن نفسي وعن البنية هم

سـاهـر ::- نيار مو وقت هذا الكلام ليش فتحت هيج موضوع اني مو گتلك لا تحچي ألها اي شي

نـيـار ::- واني اخذ الاوامر منك لو شنو لا اني اتعمدت اگول ألها حتى تعرف تتصرف بالمرة الثانية وما تتهور لأن هذا الشي راح يضرها وتنحبس

مـيـسـم ::- اتصلت بساهر واني ابچي الانسان الوحيد الاگدر ابين أله ضعفي ،،، ساهر راح يحبسوني ليش يعني شنو اني صرت مجرمة مثلهم والله اني دافعت عن البنية حميت البنية ونفسي هم وهذا واجبي ليش هيج غير اني اشتغل وياكم واساعدكم

سـاهـر ::- لج اهدي اهدي شبيج لا تبچين شو امسحي دموعج يله مسحيهن ،،، لا تخافين والله ما اخلي احد يحبسج اشش سكتي سكتي يله وسدي لهذا الموضوع

مـيـسـم ::- ساهر لا تخليهم يحبسوني ويا المجرمين حباب ساهر احچي ويا نيار حباب

سـاهـر ::- لج قوطية الببسي شبيج يمي تصيرين طفلة وتريديني احميج ليش هااا مو هسه انتي گاعدة بنص المجرمين هااا مو حميتي نفسج واخوج مو تتصرفين بذكاء وهدوء وثقة وقوة وين هاي قوتج ليش ضعيفة هيج يمي وتخليني اقلق عليج

مـيـسـم ::- بچيت وگتله ما اعرف ما اعرف انت الوحيد الاگدر اضعف گدامك انت الوحيد الاحب احچيلك كل شي واشاركك

سـاهـر ::- اااخ خيوط گلبي كافي تبچين مسحي دموعج وارتاحي وغلات عيونج عندي ما اخلي احد يأذيج ويحبسج لأن انتي ما غلطانة ومثل ما گلتي هذا واجبج انتي تشتغلين ويانا هسه خلال هاي الفترة راح تجبرين على هواي امور بس ارجاج فكري قبل لا تتصرفين

مـيـسـم ::- تمام وعد افكر قبل ما اتصرف بس انت احچي ويا نيار

سـاهـر ::- ادللي احچي ويا بس ترا هو هم يخاف عليج من يحچي هيج لمصلحتج

مـيـسـم ::- يله راح اروح لازم اسبح وارتاح حتى من يجي أيمن احچي ويا

سـاهـر ::- قوطية الببسي

مـيـسـم ::- ها

سـاهـر ::- أيمن هم حاول يتحرش بيج او

مـيـسـم ::- ما خليته يكمل ،،، لا لا ابد ما اتقرب مني وحتى كلامنا بس بالشغل وقليل كلش ومو دائماً ينام بالغرفة لأن شغلهم اكثر شي باليل وهسة اكو مصنع ماعرف شنو اي يمكن مصنع ورى البيت بمسافة قليله

قديم ومهجور من زمان اكو هواي عمال يشتغلون بي حالياً أيمن مشغول بي لأن على ما اعتقد راح يتحول شغلهم كله هنا

يله باي رايحة لأن كلش تعبانة ،،، فصلت المكالمة وسبحت وطلعت مسحت كل شي بالموبايل وضميته ونمت ماعرف شگد نمت بسبب التعب والخوف العشته والسهر

بس گعدت واني شبعانة نوم فتحت عيوني وبعدها تعدلت وگعدت بفراشي باوعت للجرباية وفزيت من شفت أيمن متمدد على الجرباية وصافن عليه

أيـمـن ::- الحمد لله على السلامة كل هذا نوم

مـيـسـم ::- الله يسلمك ،،، جنت كلش تعبانة من الصار ومن الطريق تكسرت تعرف الطريق شگد طويل رغم نمت بالسيارة بس تكسرت اكثر

أيـمـن ::- تتعشين ؟

مـيـسـم ::- باوعت للساعة بالوحدة باليل واني رجعت الصبح يمكن بـ 11 ،،، هزيت راسي موافقة وگتله بس اسبح وابدل واجي اذا متصير زحمة گول للبنات يحضرون الاكل ابتسم وگام من الجرباية وطلع برا الغرفة

واني طلعت ملابس أليه فستان كلوش بس قصير دخلت سبحت وبدلت شسورت شعري و عجبني اخلي مكياج ماعرف ليش اني ما اعرف كلش بالمكياج يعني شي بسيط رسمت عيوني ومسكارة وحمرة لون احمر

رحت للمطبخ اول مگعدت صفن أيمن عليه وابتسم

أيـمـن ::- نطلع

مـيـسـم ::- عگدت حواجبي واني اسئلة شنو

أيـمـن ::- انتي مجهزة نفسج مو مال گعدة بالمطبخ نطلع نتعشة افضل

مـيـسـم ::- بكيفك

أيـمـن ::- راح اتصل اوصيهم يجهزون العشة لأن انتي مبينه جوعانة خلصتي اليوم بس نايمة هههههه

مـيـسـم ::- ههههه اي كلش جوعانة ،،،، طلعنا من البيت بس طولنا يله وصلنا لمطعم كلش حلو دخلنا المطعم بي بس ثنين شبه فارغ مشى أيمن لنهاية المطعم مكان مخصص ألنا وگعدنا هناك

وبسرعة اتقدم الاكل وتعشينا بهدوء بس ما دام هذا الهدوء هواي بعدنا ناكل وألتفتت و اشوف ساهر ونيار گاعدين بداية المطعم نيار صاير وجها عليه وصار يخزر بيه

صرت گوة ابلع الاكل اكيد سمعو الكلام وراقبونا خفت كلش لأن هم من قبل باحثين عن معلومات تخص ساهر بسبب حادثة اغتصاب فرح من اخذها للمستشفى

صرت ادعي ما يشوفه أيمن لأن يمكن يعرف بالصار او يعرف ساهر واني صافنة وافكر فززني صوت أيمن

أيـمـن ::- خلصتي شو صافنة

مـيـسـم ::- ها اي الحمدلله

أيـمـن ::- راح اطلب شي بارد لأن الجو حار كلش هاي الايام شنو تريدين

مـيـسـم ::- بكيفك على ذوقك

أيـمـن ::- لا العشه اني طلبت هسه دورج انتي

مـيـسـم ::- هههه تمام ،،، اخذت الدفتر الموجود على الميز يسمو مينيو وما عرفت معناها غير من ساهر هههه هذا الميدرس يضل ما فاهم شي

ضليت اتصفن لأن اسمائهن كلش صعبه اخير شي شفت عصير نعناع وليمون وتذكرت ساهر ونيار واخر لمه ألنا جنه بيومها كلش فرحانين

أيمن شنو رئيك بهذا

أيـمـن ::- اي والله منعش بهيج جو

مـيـسـم ::- و بعدة نطلب نوع من انواع الموطة هاي

أيـمـن ::- هههههه ايسكريم تمام

مـيـسـم ::- هي نفس المعنى ههههههه ،،،، طلبنا وضلينا ننتظر

أيـمـن ::- جنت بعمرج تقريباً اشتغلت فترة ويا عصابة ما جنت اعرف شنو همه يعني عبالي شي عادي جنه نخطط ونسرق يعني نشوف بيوت من مناطق راقية ونختار بيت وبعدها نخطط ونفذ ونسرقهم 

وبيوم منهن قررت ابطل واشتغل ويا غيرهم لأن جانو ياخذون كل شي وما ينطوني غير قليل ردت اشغل ويا الاكبر منهم وهو الاعور

وما قبلو بهذا الشي وصار وياي مثلج اخذوني خطفوني ضلو يعذبون بيه بمكان مهجور اكثر مكان اتأذيت بي واتقصدو يسون هيج بيه ويعدمون رجولتي صار اكثر الضرب بالمنطقة الحساسة

انكتبلي عمر جديد وصار حادث بنفس المكان و گدرت اخلص ورحت للاعور جنت مراقبة لفترة وگدرت اعرف شي و نفس وگفتج گدامي ههههه هيج وگفت و گدرت احصل مكان بينهم و وصلت لهذا المكان والقوة الگدامج حالياً

لهذا اني انطيتج فرصة ذكرتيني بنفسي وبضعفي من جنت بنفس وضعج

مـيـسـم ::- ابتسمت وگتله ورايدة اصير حتى اقوة منك هههههه

أيـمـن ::- صايرة ينخاف منج شنو يعني احسبلج حساب خاف يجي يوم وتغدريني

مـيـسـم ::- لا بالشغل ما اغدر اني اطمن ،،، وصل الطلب ونيار كل شوية اباوع أله لو بأيدة يذبحني بس يخزر بيه
طنشت وشربنا العصير وبعدها طلبنا ايسكريم

اخذناهن ويانا بالسيارة اكلناهن والحمدلله ما انتبه لوجود ساهر من رجعنا گعدنا بالصالة وبعدها راد يطلع للمكان الجديد اليشتغلون بي

أيـمـن ::- اخذي راحتج اني رايح اشوف الشغل الجديد لأن العمال شفتين باليل وبالنهار حتى يخلصون بسرعة

مـيـسـم ::- ممكن اروح وياك اشوف المكان ،، تردد بالبداية بس بعدها گال تمام تعالي ،،، رحنا للمكان كلش،جبير اتعجبت بالتغيير الصاير جان مهجور وتعبان بس خوش مرتبينا حالياً

أيمن شنو راح تشتغلون هنا يعني المكان كلش جبير بيمن يفيدكم

أيـمـن ::- راح نشتغل بالسلاح هم

مـيـسـم ::- شنو يعني

أيـمـن ::- تعالي وياي

مـيـسـم ::- اخذني ودخلنا للمكان رغم وجود العمال بس ابتعدنا عنهم للنهاية هناك المكان جاهز وكامل ومسوي مثل غرف المستشفى اربع غرف

أيـمـن ::- هنا راح تصير العمليات الخاصة بالاعضاء يعني اكو اشخاص من يضلون تحت التعذيب او اليخطفوهم ليش ينقتلون ويموتون بسرعة ههههه عاد خلي نستفاد منهم ناخذ اعضائهم ما جان عدنا مكان لهذا راح من عدنا هواي فلوس ههههههههه

مـيـسـم ::- حسيت نار بگلبي من كلامة بس مجبورة ابتسم گدامة ،،،، ههههه ما تضيع فرصة اي هيج افضل واني راح استغل الفرصة واخذ الطابق الثالث هههههه

أيـمـن ::- شنو تسوين بي

مـيـسـم ::- أليه ولأخوية افضل ألنا اريد مكان خاص بيه ارتاح وطبعاً ما راح يعرفون انت بغرفة واني بغرفة شيل الكاميرات كلهن وامنع اي شخص يدخل للطابق الثالث

أيـمـن ::- تمام مثل متريدين هيج افضل لأن اعرف متضايقة من وجودنا بنفس الغرفة من حقج تاخذين راحتج

مـيـسـم ::- شكراً ،،،، هسه ما فهمت شنو تشتغل بالسلاح حتى اذا الشغلة عجبتني اتوسط عندك تشغلني وياك هههه

أيـمـن ::- ههههههه لا لا هاي كلش خطرة ما تفيدج ،،، خلي افهمج يعني نبيع ونشتري اسلحة هيج شي واغلب اليشترون كميات كلش جبيرة وعصابات يعني صعب التعامل وياهم

مـيـسـم ::- ديرو بالكم لعد

أيـمـن ::- لا احنا نعرف الشغل لا تخافين

مـيـسـم ::- رجعنا للبيت بعدها وفرحت كلش بالصار راح اخذ الطابق الثالث واخذ راحتي وهم حتى اگدر اصورهم من السطح واراقب شنو يسون

ما طولنا ثاني يوم رتبولي الطابق الثالث و الثاني هم رتبو وشالو الكاميرات لأن اخذة أيمن حسيت تقصد هيج يسوي وزعل لأن حجيت ويا بصراحة

صار ينام بالمكتب سواه هو غرفة وهو مكتب حتى البنات الموجودات الينظفن ويطبخن ما يشكن هو بغرفة واني بغرفة

كل شي كمل بشغلهم وبدو يشتغلو بالسلاح جنت اصورهم من السطح واراقبهم بس صارو هواي حرس وينتبهون والمكان ظلمة هناك

دزيت الصور الگدرت اخذهن لساهر ونيار جنت دائماً انزل واروح ويا أيمن هو يراقب الشغل واني اضل اسولف ويا واسحب معلومات اكثر

وهنا بديت شوية شوية اخذ منه جگاير وادخن نصحني اكثر من مرة مو زين عليه بس مو دائماً اشربها وهنا جهاز التنصت وياي وين ما اروح

ترزلت هواي من نيار وساهر وصرت اخمط دائماً من الحرس وادخن بدون ميدري اي شخص بسبب القلق صرت ادخل لأن كلش اقترب موعد تنفيذ الخطة وحايرة شلون راح اجمع الاعور وأيمن بنفس يوم المداهمة حتى يقبضون عليهم

وكل هذا واني بعدني ما عرفت منو الشخص اليشتغل بالدولة ويدعمهم

الى أن بيوم اتفق وياي نيار يجي للبيت وهو يراقب ويصور يريد يعرف اليجون وياخذون سلاح منو خفت كلش وصرت اراقب

ماعرف شلون گدرت يتسلل ويوصل للبيت جان اكو درج حديد ويا الحايط ورى البيت بس يصعد لتانكيات البيت جانو كل فترة يصعدون عمال ينضفوهن ويرجعون يترسوهن

ولأن جان شغلهم بداخل البيت ما يقبلون شخص غريب يدخل مسوين الدرج خارجي

خفت كلش يوگع نيار او يشوفة واحد من الحراس منا لمن صعد گلبي راد يوگف بسبب الخوف هو ما صعد لنهاية الدرج شمر روحة على السطح

ها اتأذيت اكو واحد هيج يطفر

نـيـار ::- لا ما بيه شي نصي صوتج روحي نزلي بسرعة وضلي راقبي كل شي يصير خاف واحد شافني ويصعد عاد ما تتورطين

مـيـسـم ::- تمام نزلت وقفلت الباب و بسرعة ضميت الموبايل و گعدت بالصالة فتحت الشاشة وضليت اتابع مسلسل بس گلبي ينبض بقوة وخايفة

كل بألي وگلبي ويا نيار خاف يشوفو بس الحمدلله گدر يعرف اكثر من شخص ويصورهم وگدر يرجع لبيته سالم
اتكرر هذا الشي اكثر من مرة وكل مرة احس روحي تنسحب مني بسبب الخوف ومرة منهن

گاعدة اراقبهم من فوگ السطح  بس ما اسمع شنو يحچون لأن بعيدين عني ويحچون بصوت ناصي اكيد واحد يحذر الثاني حتى ياخذون حذرهم ويكملون شغلهم

مديت ايدي لجيب بنطروني وطلعت جگارة اترددت اشعلها خاف ينتبهون نصيت راسي و ورثتها اخذت نفس منها ورجعت رفعت بس راسي وكل شوية اخذ نفس واخليها بين ايدي حتى لا انكشف من جمرة الجگارة

ما احس غير ايدي نقفلت على الجگارة بقوة وقبل ما يطلع صوتي من الوجع نسد حلگي كل ضني انكشفت وگلت انتهيت
بس من سمعت صوته ودارني أله صرنا وجه بوجه باوعت بعيونه احسهن يريدن يطلعن من العصبيه

نـيـار ::- باوعيلي لج وحفظي كلامي زين هاي المرة طفيتها بأيدج مرة ثانية بالسانج موديج تسختين وتصيرين مثلهم لو لشغله مهمه

مـيـسـم ::- گوه سيطرت على دموعي ايدي صارت تحرگني كلش خزرته ودفعته بقوة ،،، وانت شعليك بيه اني حره شنو اريد اسوي لا تتحكم بتصرفاتي ،،،، صرت انفخ على مكان الحرك حتى يبرد شوية

نـيـار ::- صوتج راح تخربين كل شي هسسس بعدين حسابج

مـيـسـم ::- حچيت بنبرة استهزاء لا واصل الحساب ما يحتاج تدفع

نـيـار ::- سهله صبريلي سهله انتي وهذا طايح الحظ العلمج على سوالفة التافها

مـيـسـم ::- وبعدين انت شنو جابك هنا ما تخاف يومية تجي

نـيـار ::- لا ما اخاف هذا واجبي ولازم اخلص بسرعة هم خايف عليج وهم تعبنا كلش والشغلة طولت صار هواي نحاول نلزم شي عليهم وهسه كل شي بين ايدنا بس ضل نعرف منو جبيرهم غير الاعور متأكد اكو واحد بالحكومة وساندهم

مـيـسـم ::- والله اني هواي حاولت ولحد الان احاول دائماً اگعد ويا أيمن بس حتى احچي ويا واسحب معلومات اكثر ،،، واني احچي ويا نيار سمعت صوت أيمن يصيح بأسمي وصوته كلش قريب •••••••••••••••

#يـتـبـع

توقعاتكم ميسم راح تنكشف لو راح تگدر تخلص نفسها

لا تنسون التصوووووويت ⭐⭐ والتعليق

اشوفكم بخير