بارت _6
الكاتبة:- ميم آل حمدان.
#العنود.
ــــــــــــــــــــــــــــــــــــــــــــــــــــــــــــــــــــــ
شمالك تحرك بروحي..... وتكول شعليه
ومن أكلك أحبك...... تكول شعليه
خايب ماتحس ولو شويه بيه.
.......................................
تخبلت واني اشوف اشخاص موجهين الاسلحه علينه كال أشهم،
_شاهين أبقى هنا لاتنزل اشوف شنو الموضوع.
شاهين:- دير بالك.
هز راسه ونزل واشوفه يحجي وياهم شفت نزلوا الاسلحه وكاموا يضحكون نزل شاهين هم من شاف ماكو خطر، ابتعدت من رهف واني ارجف كتلها،
_رهف انه راح اشرد.
رهف:- ووين واني شسوي؟
_شوفي هما مشكلتهم وياي لان سمعت بسالفه الاسلحه راح اشرد واخبر الشرطه لاتخافين.
_لا فدوه والله اخااف لاتعوفيني وحدي.
شفتها كامت تبجي واني اباوع اخاف يراجعون حضنت وجهه بيدي وكتلها،
عنود:- و الله مااعوفج وارجعلج بس لان انتِ متكدرين تركضين بسرعه ابقي وخليهم يلتهون شويه وانه ارجعلج.
_تشهك وتحجي، تمام لاتعوفيني فدوه.
هزيتلها راسي وفتحت الباب بهدوء وهما كدام السيارة بس مايسمعون لان اصواتهم عاليه نزلت وسديت الباب على كيف وركضت ورا السيارة كمت اركض واندار اشوف اذا انتبهو او لا، انداريت شفت شاهين أشر على أشهم وهذاك ركض ورايه بس شفته عدلت وكفتي وركضت اسرع وهو يصيح ورايه،
أشهم:- لج لاتعبيني نهايتج بيدي.
ركضت حيل والدنيا ليل ماكو احد بالطريق تعبت وخففت سرعه شويه وانداريت شفته يركض ورايه بس عبالك يضحك عليه مو ركض عبالك يسوي رياضه كال،
_وتالي وين تريدين توصلين مو اذا الزمج ماتصير خير اوكفي عاد.
شفت ماتفيد هيج وكفت وهو هم وكف مسافه شويه بعيده مني، وكتله،
عنود:- تمام تمام تعبت مااركض بعد.
أشهم:- كتلج من البدايه بس تعبين روحج وتعبيني وياج.
_اي هسه اجي مو تسويلي شي.
_لاا مااسويلج تعااي.
_لكك منو هاي الوراك رهف وشاهين.
هو اندار واني ركضت بين البيوت بسرعه وضيعته طلعت للشارع العام ماكو احد عبالك مهجورة عبرت الطرف الثاني وطبيت فرع وبقيت اركض اريد اشوف شخص جلب اي شي ويساعدني مااكو شفت بيت قديم وبابه مفتوح دخلت وكعدت ورا الباب ارتاح، وحجيت ،
_ ربي ماتأخذ روحي وتخلصني تعبت.
كعدت فترة وسمعت صوتهم فزيت وكلت،
_شوون عرفوا انه هنااا فدوه ربي سااعدني..
اسمع أشهم يكول لـ شاهين ،
_ كتلك لاتعوفهن وحدهن الا تنزل ماتكرص الدودة شويه.
شاهين:- خويه شذنبي اذا البنيه مو راحه نچرة تبين.
_لا نچرة ولابطيخ كول انه الاثول.
_ لااا مامقبوله منك ابو متيم واذا ما نچرة جان لزمتها انت.
_ دنجب امشي دور.
اسمعهم واني واكفه ورا الباب بتوتر اختفى صوتهم فتحت الباب وطلعت راسي ماكو احد طلعت ركض للشارع بلكت اشوف سيطرة صخام شي امشي بسرعه فجأة جمدت بمكاني من سمعت،
_هاا يحلوو ضاايع.
انداريت ارجف شفته واكف كبالي مبتسم ردت اركض لزمني بسرعه وكال،
أشهم:-تؤ مو كل يوم عيد يحلو امشي.
عنود:- عوفني عوفني.
_ ماينطيني كلبي اعوفج.
_اشوف كلبك وكت الي راح اخليك بالسجن.
_ههههه تهددين؟
_ انه مااهدد عووفني حيوان.
_بويه ليش ماتكضين لسانج وتخليني امرغلج هنا بالكاع.
لازمني من زنودي وهو وراي ويمشيني غصب وكلما اثكل روحي يشيلني لـ فوك ويرجع ينزلني عبالك لعبه بيده،
عنود:- بس هدني اعلمك شون تمد ايدك عليه.
أشهم:-باستهزاء، اويلي الله شون خفت بربج مو كلبي راح يوكف.
وكفت سيارته كبالنه وصعدني وصعد ومشت السيارة كال شاهين،
_ شنو استفاديتي بله شو تاليتج رجعتي هنا.
مارديت حجه أشهم،
_شاهين ارجع بسرعه لازم نأخذ الغراض من بيت ام عامر قبل الصبح.
_تمام.
رجع لنفس ذاك المنطقه التلعب النفس ووكف السيارة ونزلوا اني بقيت مانزلت اجه أشهم فتح الباب وكال،
_الا عزيمه ست ماتنزلين.
_وين جبتني ورهف وين؟
_دنزلي رهف هينا يلاا.
_شنو الدليل؟
كال بعصبيه وعاقد حواجبو
_ لج انزلي ما عندي وكت لسوالفج.
مارديت ، هو مد ايده وسحبني نزلني ودفعني كدامه شاهين كدامي فتح الباب وفات فتت وراه بيت قديم اجه يفتح الباب الثاني انداريت شفته واكف وراي كال
أشهم:- لاتفكرين بيها مو حلتلج السالفه كلساع شاردة وندور عليج قسم بالله مرة ثانيه طلقه براسج واخلص.
عنود:- ديلا خلي نجرب بلكت انه هم اخلص.
_استغفرالله بلوه انتي.
دفعني للبيت واخذني لغرفه فتح الباب ودخلني شفت رهف كاعده تبجي وهو سد الباب وقفله وراح ، كلت
_عفيه عيون ماتعبتي من البجي انتي.
بس حجيت هيج شو هاي رفعت راسها تبجي وتضحك انصدمت عبالي تخبلت، كالت
_شنو رجعتي.
_باستهزاء، مكدرت اعوفج، شبيج غير لزموني.
_ههههههه.
_تخبلتي انتي.
_لا بس ذكرت من أشهم رزل شاهين المفحم من وراج.
_ههههه المفحم شنوو.
_غير هو جنه فحم.
_هههههه والله عليج سوالف.
............
شاهين.
من شفت المسلحين كبالنه عبالي جماعه السيد بس نزل أشهم وحجه وياهم اشوف كاموا يضحكون عرفت هذوله مو منهم نزلت، كلت
شاهين:- ها شباب شكو.
أشهم:- ماكو شي ليش عفتهم ونزلت.
_يمعود ترى ورانه هما.
بقينه نسولف انداريت شفت البنيه الي اسمها عنود تركض، كلت
_أشهم البنيه شردت.
_ خر***** مو كتلك لاتنززل.
ركض وراها واني صعدت السيارة شفت هاي الفاهيه بعدها تبجي كلت
_ليش مارحتي وياها انتِ.
_مادري مادري.
_شنو ماتدرين عافتج وراحت.
_لا لا ماتعوفني راح تجيب الشرطه عليكم.
بس كالت هيج كبل اخذتها للبيت نزلتها وهي تصرخ فتت للبيت قفلت عليها الباب طلعت، خابرت أشهم كتله
_لكيتها؟
_لا ضيعتها.
_ أشهم ترى البنت تريد تروح للمركز.
_لا بشرفك عود معلومه خطيرة كلت عبالي تروح للصالون، انت غبي طبعا تروح للمركز.
_وينك انت راح اجي.
_تعال لمنطقه •••••••.
_تمام اجيت.
سديت الخط وصعدت السيارة رحت هناك شفت أشهم نزلت كتله
_ ما لكيتها.
_لا من دنعل ابوها شنو من بنيه هااي.
_امشي ندور ماابتعدت اكيد.
_ كتلك لاتعوفهن وحدهن الا تنزل ماتكرص الدودة شويه.
شاهين:- خويه شذنبي اذا البنيه مو راحه نچرة تبين.
_لا نچرة ولابطيخ كول انه الاثول.
_ لااا مامقبوله منك ابو متيم واذا م نچرة جان لزمتها انت.
_ دنجب امشي دور.
راح هو بطرف واني بطرف، اجاني اتصال شفته أشهم رديت بسرعه،
_هااا لكيتها.
_اي جيب السيارة للشارع لاتتاخر.
_تمام ثواني واني يمك.
سديت منه رحت ركض للسياره اخذتها طلعت للشارع اشوف أشهم شويه يمشيها وهي تنزل روحها يرجع يشيلها لفوك ضحكت على شكلهم وكفت صعدها وصعد رجعنه للبيت، كال أشهم
_اقفل الباب عدل وامشي بسرعه لانتاخر.
_اي يلا.
..........
عنود.
طلعوا من البيت واحنا بقينه كاعدين نصفن، صارت الصبح وهما ماكو اباوع للشباج مكدر اطلع منها بيها حمايه بقيت كاعده، سمعت صوتهم يعني اجوو انفتح الباب رفعت راسي شاهين،
شاهين:- هاا يابه شلونكم مرتاحين.
عنود:- جنه مرتاحين بس هسه لاا.
شاهين:- ماجيت علمود نتجادل الحمام هذاك هو اذا تريدون تروحون.
عاف الباب مفتوح وراح باوعت لـ رهف لامه رجليها لصدرها وحاطه راسه عليه رحت يمه دغيتها بيدي اشوف هاي كمزت وكفت كالت
_ها ها شصاار.
_اسم الله شبيج ماصار شي.
_ هااا.
_وغماا شبيج تريدين تروحين للحمام هذاك هو.
_اي اي، ايمته اجوا.
_هسه قبل شويه.
طلعنا من الغرفه رهف راحت للحمام واني اباوع للبيت بيها غرفتين وصاله ومطبخ صغير وهما ماكو مدري وينهم طلعت رهف طبيت غسلت احس عيوني يحركون وصايرات حمر دم طلعت سئلت رهف
_وينهم ماكو احد.
_ماادري يجوز بذاك الغرفه.
_ليش مرتاحين هيج مايخافون نشرد.
_شعرفني.
بعدنه نسولف طلع أشهم من الغرفه باوعلنه وراح للمطبخ بدون مايحجي احنه رجعنا للغرفه، شويه وفات بيده صينيه حطها كدامنه بيها أكل ودار حتى يطلع كلت
عنود:- شنو هذاا!
اندار وسند نفسه للباب كال
أشهم:- أكل شنو ماتشوفين.
عنود:- بلى اشوف، شنو حاط بيها.
أشهم:- سم حطيت بيها.
_ اتوقعها منك.
_دكلي بويه ماحاط شي بيها من البارحه ماماكلين شي.
كلت باستهزاء،
_اوووي دمعت عيوني من الحنيه.
_ام الاويي عوفي عيونج أكلي.
هزيت ايدي وهو عافنه وطلع، اشوف رهف كبل جيتت للاكل كامت تأكل بس اني متقربت، كالت
رهف:- ليش ماتأكلين؟
عنود:- مااشتهي.
_تريدين تموتين من البارحه ماماكلين ترى.
_اي اريد اموت عوفيني أكلي انتي.
عافتني رجعت تكمل أكل، صفنت فكره تجيبني وفكرة توديني شنو تاليتي هنا وأهلي شيسوين هسه هو حتى استحي اكول أهلي، تعبت احس حياتي كلها غلط، اباوع لـ رهف تلبس بحجابها وتعدله اندك الباب دخل شاهين باوع للصينيه رجع باوعلنه شالها وطلع، ورهف مادري شبيها من تشوفهم ترجف، كتلها
_تخافين منهم؟
_اخاف يأذوني.
_انتي اذا طلعتي وين تروحين؟
اشوفها دمعت ودنكت كالت بغصه،
_مااعرف.
اشوفها انقهر صح اني اهلي ميحبوني بس الاقل عندي أهل ارجعلهم هي لا، بقينه ساعات وهما ماكو ولاصوت ضجت كمت طلعت رحت للباب الخارجي مقفول رجعت للمطبخ اخذت سجين حاولت افتحها ماكو رجعت كعدت بالصاله واني معصبه مليت ورهف كبالي، طلع أشهم من الغرفه يبين جان نايم العيون مورمه والشعر كفشه راح غسل واجه سحب كرسي كعد كبالي ورث جكارة وباوع لـ رهف وكال
أشهم:- بويه تعرفين تسوين جاي؟
رهف باوعتلي ورجعت كالت بتوتر
رهف:- اي.
أشهم:- بلا زحمه عليج سويلي والغراض كلها بالمطبخ كدامج تلكيهم.
_اي تمام.
راحت رهف وهو يأخذ نفس من الجكارة وصافن بوجهي حجيت باأنزعاج،
_مضيع شي بوجهي!
مارد بقى صافن رفعت ايدي كدام وجه وأاشرله وكلت،
_هيوو شكوو.
هم مارد عفته وكمت اريد افوت للغرفه استوقفني كلامه
أشهم:- الطير ميكدر يطير من القفص إلا اذا اصحابه فتحوا باب القفص.
وكفت بصدمه شون عرف ردت اطلع معقوله حاط كامرات بالبيت، انداريت عليه وحجيت باأستغباء،
_اي شنو يعني شنو مناسبه هلكلام مافتهمت.
_عنودي لاتحاولين اكول.
_ماافتهم شنو تكول شنو مااحاول!
_تعرفين متكدرين تطلعين منه فلا تحاولين.
_مو انت التحكم اكدر لو لا.
_وين ترحين لو تروحين أخر الدنيا الكاج واجيبج.
تقربت يمه ودنكت صرت بمستواه واني اباوع بعيونه كلت بهمس
عنود:- لاتخاف مااروح لأخر الدنيا حتى مااتعبك.
شفت ملامحه تغيرت ابتعدت عنه، حجه بثكل
أشهم:- شنو قصدج؟
_رفعت كتفي وايدي لفوك بمعنى مااعرف، عفته وطبيت للغرفه كلت شكد غبيه ليش سويت هيج، بس غمضت عيني اتذكر عيونه غريبه جانت حلوة كلش اول مرة اركز بيها لونهم عسلي فاتح كلش وبيها رصاصي من الاطراف وملامحه حاده وطبرة حاجبه، طردت الافكار من راسي من فاتت رهف كالت،
_عنود شبيهن عيونج حمر؟
_مابيهن شي لان مانايمه.
سكتت وراحت كعدت صارت الدنيا ليل والجو صاير بارد، فات شاهين حط الاكل وطلع تقدمت رهف وكالت
_تعاي أكلي.
_مااريد ماجوعانه أكلي انتي.
_شنو ماجوعانه الصبح هم ماأكلتي شي.
_مالي خلك والله عوفيني.
_مايصير لازم تضلين قويه شسوي اني وحدي اخااف اذا ماأكلتي شون نطلع منه شنو استسلمتي.
_لا بس تعبت احس ماضل عندي طاقه أكلي انتي من اجوع أكل انه لاتخافين.
_تمام براحتج.
تمددت وغفيت بسرعه محسيت إلا رهف تكعدني كمت كتلها
_هاا شكوو؟!
_أشهم يريد يحجي وياج.
_ليش بخصوص شنو.
_مااعرف بس سئلني أكلت كتله لا وكال اصيحج.
_كوليله نايمه.
_كلت كال كعديها.
_اووف ربي.
كمت عدلت شعري طلعت شفته كاعد وحاط رجل على رجل والجكارة بيده ومنزل راسه علموبايل رفع راسه شافني عدل كعدته، وكال
_كعدي.
_شتريد؟
_شبيج ماتأكلين صارلج يومين.
_معليك انت.
_أحجي عدل وياي مااريدج تموتين وابتلي بيج.
_عوفني اروح لعد حتى لاتبتلي بيه.
_انسي هذا الموضوع ماكو طلعه منه.
حجيت بعصبيه،
_شترريد مني شتررريد والله مااحجي لاحد شي بس عوفني.
وكف وتقرب كال
_صوووتج.
_انت ماتفتهم ماعندك عقل عوفني.
_عنووود طلعه منه ماكو انسيهاا وهسه روحي أكلي.
_معليك بيه أكل لا.
_بعدين يصيرلج شي واحنا نبتلي.
_عسى مااموت واخلص منكم حيوانات.
حجيت هيج فر وجهي براجدي مااجت بخدي لا بنص وجهي وكعت بالكاع لان معندي طاقه وخشمي طك دم مسحتها بكف ايدي ونزلت دمعتي، دنك لزمني من حنجي ورفع راسي وكال
_لساانج كلت لاتخليني اكفرر بيج.
وجهي كله دم امسحها ترجع مرة ثانيه باوعتله ومسحت خشمي وضحكت اريد استفزه باوعلي بصدمه عبالك مثل شخص حس على نفسه وابتعد وكام على حيله، كال
_كوومي غلسي وجهج.
_شكو بس لا تندمت.
_استغفرالله شبيج بويه عاقله انتِ.
حاولت اكوم بس احس كل حيل مابيه سندت نفسي وكمت راد يحجي بس سبقته وكلت،
_لاتتندم على شي سويته لان مايفيد الندم بعدها.
شفت رهف واكفه بالباب تبجي وتباوع بخوف
عفتهم ورحت للحمام قفلت الباب اباوع بالمرايه وجهي كله دم وأثار اصابعه بوجهي بجيت غسلت وجهي واني اتذكر من جان بابا يضربني ويضل الاثر بوجهي مايروح جنت اخلي مكياج حتى مايبين بس هسه شسوي، كعدت بالكاع ابجي واكول
_يمه اخذيني يمج والله تعبت، تعبت من كلشي من اليوم الي رحتي بيها لهذا اليوم انه اتعذب واموت باليوم ألف مرة تعبت اتصنع القوة.
سكتت من رهف كالت
_ عنود فدوه اطلعي لاتخوفيني.
مسحت دمعتي وكلت
_مابيه شي لاتخافين.
_ افتحي الباب.
كمت فتحت الباب كبل حضنتني وتبجي حضنتها وكلت
_هشش شبيج رهف.
_والله خفت يسويلج شي فدوه لاتعاندي عوفيهم.
_ميكدر يسووي شي لاتخافين.
رجعت للغرفه تمددت احس معدتي تتقطع ميته جوع بس مااشتهي أكل غمضت عيني وبقيت هيج نص ساعه تقريبا، اندك الباب خفيف وحسيت شخص فات بس مافتحت عيني ولااتحركت بس اسمع،
شاهين:- نايمه هاي لو شنو؟
رهف:- ماادري بس يمكن.
شاهين:-كعديها خلي تآكل واذا ماأكلت اجبريها لاتموت.
رهف:- اي اي هسه.
شاهين:- لاتضلين فاهيه اذا ماأكلت تموت مو تعوفيها براحتها.
رهف:- اي والله مااعوفها إلا تآكل.
انطبك الباب معناها طلع اجت رهف كعدتني كالت
_تعاي أكلي.
_تمام.
كمت ماردت اعاند لان ميته جوع أكلت.
.........................
شاهين
كملنا شغل للصبح يلا رجعنه فتحت الباب طبيت ردت افتح باب الغرفه حجه أشهم
_وين يمعود البنات هناك.
_اووو نسيت والله.
_ روح جيبلهم أكل شنو تريد تكتلهم من الجوع.
_ مابيه أروح منه لهناك تعبان.
_دفتح الباب اذا يريدون يرحون للحمام انه اجيب أكل.
_اي خوش.
راح أشهم يجيب أكل واني رحت غسلت طلعت شفت أشهم كاعد بالصاله باوعلي بطرف عينه وفات للغرفه، فتحت الباب وكلت
_هاا يابه شلونكم مرتاحين.
عنود:- جنه مرتاحين بس هسه لاا.
شاهين:- ماجيت علمود نتجادل الحمام هذاك هو اذا تريدون تروحون.
بقيت الباب مفتوح رحت للغرفه واني ادردم، شنو من بنيه مو لسان رشاش تكول.
أشهم:- شبيك؟
شاهين:- ماكو شي اريد انام.
_روح انطيهم الاكل بعدين نام.
_كوم انت والله مااكوم بعد لو يجي الحمزة.
_ دنام نامت عليك طابوكه.
عافني وطلع حطيت راسي ونمت من التعب ماحسيت إلا أشهم يكعدني،
أشهم:- كووم أكل لاتضل هيج.
شاهين:- بربك تكعدني علمود أكل دعوفني تعبان.
أشهم:- ول أثول من البارحه ماأكلت شي كووم.
كمت عدلت كعدتي باوعتله شكد عصبي وشكد يرزل بس كلش حنين، أكلت ورحت أخذت صينيه البنات تالي وكت اني اغسل مواعين وهما يكعدن هو حظي اني هم كملتهن ورجعت للغرفه شفت أشهم نايم طفيت الضوه وكعدت اكلب بالموبايل مر هواي وكت سمعت طقطقه بره عرفت البنات ماردت اطلع كلت اعوفهن براحتهن، بس كمت اريد اروح للباب حتى اسمع شيكولن دست رجل أشهم كعد بسرعه باوعلي عاقد حواجبه وكال
أشهم:- شبيك ماتشوف.
شاهين:- أسف يابه ماانتبهت.
أشهم:-شنو هلصوت؟
شاهين:- البنات.
شفته بسرعه كام وكف على حيله لبس الفانيله وطلع اني مااهتميت رجعت لمكاني اسمعهم يحجون غفيت كعدت على صوت أشهم محضر الاكل، كال
أشهم:- كوم اخذها للبنات وتعال أكل.
كمت اخذتها فتحت الباب عيوني صارن على رهف شكد هادئه ومااسمع صوتها ملامحها طفوليه كلش، عكس عنود شخصيتها اقوى وترادد ماتخاف وملامحها حادة شويه بس تحس بيها برائه، ماحجيت شي وطلعت رجعت اكل سئلت أشهم
شاهين:- أكلك أبو متيم.
أشهم:- هاا.
_شراح نسوي بهذن البنات خومه راح يبقن هنا.
_وين نأخذهن لعد.
_لشوكت راح تحبسهن هنا عوفهن.
_ ترى انه هم اريد اعوفهن بس تدري اذا راحوا للمركز وخبروا علينه شيصير.
_مااعتقد مايسووها عوفهم.
_ انه اتوقع كلش من هاي أُم الحارث لان مو راحه ابدا.
_ههههههه ام الحارث صارت.
_ تكدر تنكر انها قويه.
_لااا بس هم احجي وياها.
_عود نشوف هسه خلي نأكل.
كملنا أكل شلت الصينيه رحت دكيت الباب طبيت شفت عنود نايمه ورهف صافنه اخذت الصينيه مامأكلت هواي غسلتهم ورجعت نمت ماحسيت غير على صوت أشهم يصيح عرفته ويه عنود ماطلعت
شويه اختفى صوتهم فات أشهم للغرفه نار يروح ويجي متوتر، كمت كعدت سئلته
_شبيك شصاار.
_تريد تخبلني هلبنت.
_ليش شكالت.
_لاتأكل ولاتسمع كلام بالاخير تموت واحنا نبتلي ناقصني انه.
_اهدى شبيك مايحتاج تتعصب.
_لك خلتني امد ايدي عليهاا اكره شي عندي تعرف مااحب اضرب النسوان بس هي صلفه.
_من كل عقلك تحجي ليش ضربتها.
_ماتحترم تجفص بالبطن.
اشوفه يحجي بحركه ومتندم اعرف من يسوي شي ويتندم يضل يأكل بروحه وهو اكره شي عنده يمد ايده على بنيه ، كعد وهو مدنك كال
_ خشمها طك دم ووجها كله صار احمر وأثار اصابيعي بوجهها.
_هسه اروح اشوفها انه بس اهدى انت.
عفته وطلعت شفت رهف تبجي وواكفه بالباب بس شافتني كامت ترجف، كتلها
شاهين:- وينها عنود؟
رهف:- بالحمام.
شاهين:- رحمه لاهلج كاافي فهاوه روحي شوفيها خلي تطلع لايصير بيها شي.
رهف:- اي.
عفتها وطلعت اخذت أكل سفري ورجعت حطيتهم بصحون اجه أشهم كال
_شتسوي؟!
_جبت أكل من بره مابيه حيل اطبخ.
_الها؟
_اي.
_ بس كون تأكل.
_معليك يمي.
اخذتها دكيت الباب وطبيت شفت عنود نايمه ورهف صافنه بوجهها كتلها،
شاهين:- نايمه هاي لو شنو؟
رهف:- ماادري بس يمكن.
شاهين:-كعديها خلي تآكل واذا ماأكلت اجبريها لاتموت.
رهف:- اي اي هسه.
شاهين:- لاتضلين فاهيه اذا ماأكلت تموت مو تعوفيها براحتها.
رهف:- اي والله مااعوفها إلا تآكل.
طلعت تلكاني أشهم كال
_السيد يريدنه يمه
_خير اكو شي!
_مادري بس اكيد مو خير.
_نروح ونشوف.
قفلنا الباب وطلعنا.
.................................
عنود
صافنه بالحايط مااحس إلا الباب يندك قوي وكفت بسرعه صار يندك اقوى طلعت باوعت ماكو لا أشهم ولاشاهين، طلعت رهف كالت
_وينهم؟
_مادري ماكو أحد.
_يجوز هما الي يدكون الباب.
_لج شبيج انتِ هما يقفلوها ويطلعون يعني المفتاح عدهم.
_منوو هذوله لعد.
_ماادري.
الخوف سيطر علينا والباب يندك بقوة احس راح يتكسر بالاخير صاح واحد،
_افتحووو الباب واطلعوا بسرعه.
اشوف رهف شهكت وكامت تبجي، سئلتها
عنود:- شبيج رهف؟
رهف:- هذاا هذاا..........
ـــــــــــــــــــــــــــــــــــــــــــــــــــــــــــــــــــــــــــ
نهاية البارت
انتظروا البارت الجديد.
الكاتبة:- ميم آل حمدان.