زينـب الـ عادل
________________
كاعد من الصبح سبحت جاي ابدل عندي شغل بالمركز نزلت جوه صبحت ع امي وتريكت وطلعت وكالعاده الاطفال اللي تبيع بالشارع اللي تكسر الكلب هواي بالشارع اللي يعيدون ذكرياتي المؤلمه وصلت للمركز
همام: ها ضلعي شلونك
رومان: زين زين حضرو نفسكم شويه ونطلع..... عدنه مداهمه لبيوت مال دعاره
همام:اي ماعدنه شي
رومان:خوش من انطيكم الامر نتحرك....انطيت الامر وتحركنه اقتحمنا المكان وصار صوت الطلق كلش عالي كدرنه نلزم هوايه بالبيت بس وره شويه حسيت حراره اخترقت بطني وحيل تأذيت بس مابينت حتى همام كا يعوف الشغل ويركز عليه كملت واني متأذي من الرصاصه لحد ما وصلت يم السياره ماكدرت الزم نفسي وكعت بصفها ومادري شصار بعد همام موديني للمستشفى
همام: من وكع ركضتله وديته للمستشفى اخذو طلعو الرصاصه منه وكالو لازم عنايه مركزه للان صاير عنده ضرر ببطنه قوي وره ما صحه... طبيت
همام: اههوو مامتت عبالي تموتت واخذ فلوسك
رومان: ياجلب ادري بيك ملطلط
همام:تقربت يمه بسته... الحمدلله عالسلامه ضلعي ادري بيك عار متموت شفتلك يوم عار مات؟ لا
رومان: الله يسلمك روح جيبلي مي متت عطش.... جابلي المي شربت اكلك كلت لامي!
همام: للا يمعود هسه تجي والله اذا اكللها
رومان: اي لتكول خليها من ارجع للبيت اكللها.... رجعني همام للبيت امي بس شافتني شهكت... ع كيفج حبيبتي مابيه شي جرح بسيط
ام رومان: يمه وين مابيك شي مو هاي كدامي مكسر
رومان: يومم ويني مكسر مو هاي كدامج امشي مابيه شي..... ولزمتني ودتني لغرفتها تكول حته اداريك عبالك طفل يمها كعدتني بالغرفه طب همام للبيت يجوعر
همام: هها يمه شلونج جوعان بروح العزاز سويلي شي اكله
رومان: تسويلك سم احسن مو تشوفها كاعده
همام: عاديي غير ابنها التحبه وتحترمه وو.... بعده مامكمل شالت الشحاطه وشمرتها علي
ام رومان: ولك فتيت كلبي هذيج الثلاجه وروح اكل مابيه حيل اني صرت جبيره عدكم ادين وسوو واكلو
همام: يمه اكلتيني وشربتيني شردت منج هوَ ماعون مفلطح مال فواتح وهاهيه
رومان: ناكل بفاتحتك هيج
همام: اي تدري شتسوي لا تبجي ابد روح اضرب واشبع واكل واخذ تليفوني ولف راسك ونام
ام رومان: ولكم وكت هايه السوالف يلا ولك همام روح اكل واني راح اروح انام وخلي رومان يرتاح
رومان: اي والله خلصينه من هذا والله موتني
همام: ها ولكم كرهتوني جا وفلوس المستشفى قبل شويه منو دفع؟ ومنو شالك من وكعت هذا كله اني لاتنسه ولك تره هنا احطك وادوس ببطنك واخذ فلوسي وامشي
رومان: شكد لغيت متكلي انتَ مو جوعان ما تولي تاكل؟...... راح واخيرا وامي طلعت واني تعبان وراسي يوجعني بس خليت راسي ع المخده نمت ماكعدت للمغرب من كالت امي اجو خطار عليك كمت لكيت همام بالصاله كبل طفرلي كال
همام: باوع ضلعي هذا واحد ثكيل سوي نفسك متكسر حته ينطونك فلوس عود واجب ماوصيك..... ضربته ع راسه
رومان: امشي امشي يفكر بالفلوس الوصخ...... طبينه للاستقبال ولكيته صديق بالمركز بس مو كلش يعني اني اكثر واحد احبه همام واحسه اخ مو صديق وحته مأمن بي ويفوت للبيت شوكت ميريد معتبره من اهل البيت
رومان: سلام عليكم
رافد: وعليكم السلام ههلا وليدي شلونك صحتك شلونها شلون صرت ان شاء الله زين
رومان: هلا بيك والله الحمدلله مابيه شي خفيفه
رافد: ادري بيك سبع وتطلع منها والله عندي شغل لازم اروح بس اني كلت لازم امرلك
رومان: وين متروح الا تتعشه
رافد: والله ماكدر عندي شغل
رومان: براحتك حبيبي..... راح الزلمه
همام: ولك هذا شكد جلف وفكر بالجذب ما انطانه فلوس
رومان: وانتَ هيج فكر تدور من العالم فلوس
همام: يابه شنيه شيخسر لو انطانه
رومان: اريد اروح للشط تجي وياي؟
همام: يلا امشي...... رحنه وصلنا كعدنه ع حافه ونباوع للشط بس صافنين هنا نجي كل ما تضيق بينه الدنيا ونحس مخنوكين نجي نكعد هنا
همام: اكلك اني احس اريد شي بس ما ادري شنو
رومان: واني شمدريني شتريد لعد
همام: مادري والله
رومان: هاك هاي الفلوس روح جيبلنه عصير
همام: هو هذا الاريده وين جنت لعد
رومان: دمشي ولي ابو بطن بسرعه جيب وتعال..... جاب واجه
همام: ولكك شلون شفت صاكه الا تموت
رومان: انت ماتبطل من النسوان؟
همام: مو بيدي والله هنَ حلوات ويجبرن الواحد يباوعلهن المهم لابسه ضيك يعني جسمها مبين ولك وتمشي وتتمايل باوعتلي جان تغمز وانت تدري بيه اني شكد ولد حباب وماهتميتلها كملت طريقي واني مدنك راسي
رومان: ادري بيك هسه يطلع ماخذ رقمها وجايني..... كعدنه نتشاقه ونسولف ونحجي بالشغل كتله يلا امشي نرجع... رجعني للبيت وراح لبيتهم اني لكيت امي فارشتلي بصفها بستها وتمددت اني هالفكره جاي افكر ارجع لبغداد لان ثار ابويه لازم يرجع بس افكر بهمام للان اني متعلق بي واحسه مثل اخوي شلون افاركه وشلون افتح الموضوع ويا بس قررت اكله بالموضوع....
في الصباح..
همام: ههلا بالغالي شلونك
رومان: بخير دامك بخير.... بقينه نسولف بأمور تخص الشغل.... اكلك همام عندي موضوع وياك
همام: اي گول
رومان: اني راح انتقل لبغداد
همام: اي ضلعي عادي
رومان: وانتَ؟
همام: الم غريضاتي واركض وراك
رومان: شلون واهلك يجوز مايقبلون
همام: ماعليك مايحجون
رومان: براحتك فتره نكمل امورنه ونرجع لبغداد انت تتكفل بموضوع شغلنا واني اتكفل بالبيت وغراضنه.... اتفقنه ومشت الامور بس اهلي مايدرون اني مفكر وماكايل بس اكيد مايحجون شي.....
__________________
زيـنب الـ عادل
_____________