قيود عشك الشيخ

قيد السادس

تقرب مني بخطوات وكعد يمي سحب ايدي وحجة::- زهرة

::- امممم

::- شنو هل تركيبة العجيبة بيج حسيت روحي ناقص واجيتي تكمليني

::- شنو ما فهمت شيخ??!!

ابتسم::-ماكو شي نامي نامي وانا الي الله

ابتسمت وهزيت راسي ونمت ما كعدت الا ثاني يوم الصبح وكلعادة ع صوت تجويدة وقرائتة للقران

باوعلي وانا ابتسمت::- صباح الخير شيخ

هز راسة وصدق والتفتلي::- صباح النور بوية
كومي صحصحي وتريكي جبت الج كيمر عرب اعرفج تحبي وصمون حار روحي كولي ل جميلة تصبلج علمود تساعديها وحيدها

ابتسمت::- صار يا احلى شيخ

ضحك وهز راسة كمت لميت شعري هو عينة علية وين ما اروح ومراقب كل تحركاتي ما ستغربت هو طبعا هيج وانا تعودت

حجيت::- جا فتون وينها

تنهد::- بغرفتها زعلانة

رفعتلي حاجب::- عشتو ضربني وبكى سبقني واشتكى عليمن زعلانة المدام

باوعلي ما قابل ع كلامي جر حسرة وحجة::- بوية بعدي عنهن وجفي شرهن ولله ما عايزين

عقدت حواجبي::- شيخ امس هي دفعتني وانا حتى ما حجيت وياها ولا كلت تعاركت هي وجميلة

عقد حواجبة::- اي صدك تعاي كليلي شنهي السالفة اجاني ساجد وعاتبي وكتلة بيك خير وادلل

تخصرت::- عليمن يعاتبك شبي هذا اخوك كلما صارت شغلة بين النسوان واجاك عاتبك شعلي هو ترة عركة نسوان هي ليش يدخل

غمض عيونة وعصرهن::- زهرة بوية عيب هل حجي تحجي وبعدين هذا الي تكولين عنة شعلي يصير اخوي وانا ما اريدن بعد هل عمر يكولون الشيخ اخو مرتة عيب بحقي بوية وبعدين غير هي مريتة واليمسها تمسة

سكتت بس ضجت حيل ردت اروح سحبني من ايدي وكعدني::- بوية كيد النسوان عظيم والله يكول مو انا الاكول

وانا اخافن عليج عبنج مو كدهن يا بوية انا اعرفن ناسي وهل اكلج جفي شرهن

ابتسمت::- صار شيخ ما علية بيهن بعد

ابتسم وجر راسي باسة وطول بالبوسة حجيت::- شيخ نمت اجيبلك مخدة وخليها ع كصتي ونام

ضحك ضربني ع راسي بخفة::- انتي مو مال واحد يلاطفج انتي مال تكعدين يم فتون وتدمغ بيج نهارها وليلها

::- ليش بوية عايزين شر احنا ولله اطيح حظها ختولي الخايسة

::- ها زهرة شحجينا

::- ما اكدر يا شيخ دم المحقق كونان يمشي بشرياني

ضحك بصوت واخذني لحضنة يبوس براسي ويحجي::- وين اضمج وين اخاف اضمج بروحي ويشوفوج بوية وياذوني بيج

عقدت حواجبي::- خيولون ما يسولي شي

تنهد يباوعلي وكال::- يلا بوية كومي وراج تعب اتريكي وايدج بايد جميلة

هزيت راسي وكمت فعلا فرشت اسناني ونزلت لجوة صبحت ع حجية وع جميلة وتجاهلتن كلهن الكاعدات جانت اكو بنية تطلع اكبر مني بكم سنة كاعدة وي جميلة وتشتغل بهدوء

جميلة بس شافتني ابتسمتلي::- صباح الخير جمولة الورد

ضحكت::- يبعد روحي اروح فدوة لهل حلك الينكط ورد

ضحكت اجيت لازمة خدودها منا ومنا::- يمة يمة باعي الخدود بيهن طشت لحم هسة الشيخ المن متعب روحة وجايب طليان لو ذابح من خدودج

دفعتني::- لا بارك الله بيج

رمشت بعيوني::- مو جاي اتغزل بيج

::- دوخري وخري من عابت جهرتج روحي حررتلج الجاي كعدي تريكي

ضحكت::- يلا ماشي

انتبهت ع البنية الي كاعدة مبتسمة الي رجعتلها الابتسامة انتبهت النا جميلة وكالت::- اعرفج عليها هاي سهى بت عمي ابو اسلام

ابتسمت ووكفت مقابيلها::- اهلا وسهلا انا زهرة

ضحكتلي وهزت راسها::- اي اعرفج

حجت جميلة::- ليش ما تتريكن سوة سهاوي هم ما متريكة

حجت باحراج::- ها لا لا ما اشتهي

حجيت انا::- لا ولله حتى لو ما تشتهين تاكلين وياي كلمرة اخلي جميلة تتريك وياي رغم هي تريكت من صبح ما تشوفيها سمنانة كلة بخيري

جميلة::- بخيرها هي ام الوصخ

ضحكنا كلنا والحجية عاطت بينا تمامة::- بدال هل تكهكه تريكن يلا هم يلا نلحك

ولله يا الله مسوية روحها نضيفة عود وانا من اشتغلت بالبيت لكيت كومة وصخ انسة منشن

صبيت كوب جاي لسهى وياي وكعدنا سوة ناكل هي تاكل بهدوء وكلساع ترفع عينها وتنزلها

حمحمت الها باوعتلي وضحكت حجيت::- لا تستحين اكلي

هزت راسها مبتسمة حجت::- انتي بالمدرسة

انعصر كلبي بسرعة من تذكرت هل موضوع لو انا هسة بالمدرسة جان صرت ثاني متوسط حمحمت::- احم لا مو بالمدرسة و انتي

::- اي بالمدرسة صف رابع عدادي

::- ياا انتي مخلصة متوسطة وداخلة بالعدادية

ابتسمت::- اي

::- وشناوية ترحين علمي لو ادبي روحي ادبي احسلج

ضحكت::- لا ناوية اروح علمي واصير دكتورة طب نفسي

عقدت حواجبي بقرف::- ليش طب نفسي شمعنى ما تتعينين

سرحت بخيالها وبريق عيونها دمعن?!! شنو هاي شبيها!!!

حجت::- يعجبني هل قسم واحبة

هزيت راسي مبتسمة::- ان شاء الله ترحين وعود اذا تخبلت انتي عالجيني خوش??

ضحكت واحنا كاعدين طلعت فتون نافشة ريشاتها والمكياج واصلة للضالين عيونها شي اخظر شي اسوي والحمرة بنفسي وخالة مورد موصلتة لاذانها

::- استغفر الله عبالك ذولة المهرجين الي يطلعون بالافلام

فزيت ع صوت سهى ميتة ضحك التفتت الها وابتسمت::- ضحكة دايمة

هزت راسها تضحك اجت جميلة باوعتلنا وابتسمت::- ها ولجن خلصتن يلا هم يلا راح يجي

عقدت حواجبي::- منو الراح يجي

ردت سهى::- غير هي العزيمة علمود سرمد خلص عسكرية وصار ضابط بالجيش العراقي

اصفر وجهي من بعد سنة راح يرجع النا سرمد!!! الله يستر من هل جية!!??

طبعا ما ستغربت ولا سالت عليمن هل عزيمة لان الشيخ كل فترة يسويها ويعزم اهلة

فماستغربت عبالي حالها حال العزايم البقية بس تفاجئت بهل خبر كلش ما حبة رجعتة شعور قوي يحسسني هل انسان مو نظيف وراه شي!!

سهى وكفت تعدل حجابها وانا تعكر مزاجي فجائة حتى بالشغل صرت ثكيلة كوة اكوم اسويلي شغلة واذا سويتها اذا صافنة

اختنكت فجائة وكلبي كارصني من هل جية ليش هيج احس ما اعرف?!!

لاحظت سهى ابد ابد ما تتودد للحجية تمامة ولا لفتون وهلشي استغربتة??!!

دخلت مرة جبيرة بالعمر تشبه الحجية هيلة شبه مو فضيع اجت يمنا سلمت ع الحجية هيلة وتحاظنن وكامن يبجن!!

وين جانت هاي ليش كل هل فترة ما شايفتها تقربت من جميلة الي تمسح دمعها بشيلتها::- منو هاي?!

::- خالتي ام اصيل

فتحت عيوني::- يممة هاي خالتج ومرت عمج ابو سلام يعني تصير ام سلام وسهى

هزت راسها::- وين جانت ليش طول هل فترة ما جايتنا

حجت بدون انتباه وهي تباوعلها::-جنا ما نحاجيها

::- ليش

التفتلي ومثل الي انتبهت هزت راسها ودفعتني::- زعل حبايب كومي كومي خل اسلم عليها

خلتني بداومة تفكير وراحت تسلم وهم حظنتها وتبجي?!!

باوعتلي الحجية هيلة واشرتلي اتقرب تقربت منهن وابتسمت بتوتر حجيت الحجية هيلة::- هاي مريت ثقيف

بهت وجه المرة وحجت بغصة وهي تباوعلي::- حليوة الباري يحفظها

ابتسمت وسلمت عليها وسهى تكللها ::- يمة صغيرونة وحبابة

ابتسمت بوجهي ودارت وجها عني انا كمت وي جميلة اشتغل دخل سلام هو وايسر للمطبخ

باوعلنا وكال::- ادري ولله اجيت اركض نسوان انتن جعيرجن واصل ليغاد عبالك مولدة عطلانة صدك جذب

ضحكنا وجميلة حجت::-اي عيني انت بكل شي ما قابل بس ع روحك

عدل ياختة بغرور::- شحلوتني اخبل تلكين مثلي بالله انتي الزركة

ضحكت جميلة شمرت علية الخاشوكة::- صدك ما تستحي عود اكبر منك انا

::- دولي خايبة اكبر مني جا ما تزوجين وتخلصينا ملينا منج كاعدة ع افادنا

::- يا يا شوف السرسري شلون

::- ولله لكيتلج واحد يطك بالكاع بس ينزع بنطرونة يفطس

ركضت وراه جميلة هو شرد ميت ضحك وايسر واكف بس مبتسم رغم كل احنا ضحكنا!!

يربي ولله يشبه الشيخ حتى كلما يكبر ينطي شبه فضيع عكدة الحاجب ابتسامة ثكيلة بحة الصوت خشونة المضهر

ماعرف مرات اصفن بي احسة كلش حلو حلو اكثر من اي شخص شفتة بحياتي حنيتة اخذت كلبي

وانا صافنة بايسر اجتني جميلة::- ها ولج مالج صافنة بالوليد

باوعتلها وضحكت::- عجيب الشبه بينة وبين الشيخ يربي احسهم اب وابنة

باوعتلة ودنكت بقهر::- يهد حيلي هل وليد لا ام ولا اب عمت عيني عليك خوية متت ورحت جوة التراب وعفت ابنيك

دمعن عيوني باوعتلي وضحكت وضربتني::- انتي مجهزة دموعج لكدام

ضحكنا طبعا سهى ايدها بيدنا وتشتغل ويانا صاحت الحجية هيلة علينا علمود اجيب ماي باوعتلهن كلهن ملتهيات رحت اخذت ماي الهن

باوعتلتي المرة الي تصير اخت الحجية وابتسمت بتوتر ما اعرف ليش انا احسها عدها شي وجبير هم مو زعل حبايب مثل ما تكول جميلة بس شنو هو؟!!

انطيتها المي وردت اروح لزمت ايدي اشرتلي بعيونها وهي تشرب اكعد

ابتسمت الها وكعدت يمها حجت::- شنو اسمج يحلوة

ابتسمت::- اسمي زهرة

دمعن عيونها وباوعت للحجية هيلة والحجية هزت راسها باسف ودارت عيونها لبعيد تمسحهن بشيلتها شنو ديصير؟!!

دخل الشيخ واول ما شافتة فتحت اديها تبجي بفجع اجاها ملهوف حظنها وهي تبجي فرفحت روحها بحظنة::- يمة عمت عيني من ريحة الغالية يمة اشمن بيك ريحتها

شدد ع حظنها وباس راسها اباوعلة عيونة مليانة دموع!!!

بعدت عنة وهو دنك باس اديها::- شلونج رويحتي

طبطبت ع ادية وابتسمت وهي تمسح دموعها::- زينة يمة عايشة على الله

هز راسة::- ونعم بالله يلا اترخص يمة بس ابدل

هزن راسها هو صعد فوك باوعتلي الحجية هيلة وكالتلي::- كومي يمة لرجلج حظري هديماتة شوفي شمحتاج

هزيت راسي وصعدت لفوك لكيتة كاعد ع جرباية ويعصر بعيونة ابتسمت::- ها شيخ الله يساعدك

باوعلي وابتسم::- ويساعدج بوية

رحت للكنتورة وكل عادة طلعتلة ع ذوقي دشداشة نيلي وجراوية نيلية وبيها بالاطراف خيط احمر ورحت للميز طلعتلة محبس اسود

جان يباوعلي وين ما اروح ومركز بية حجيت::- شيخ هذا هو محتاج شي

ابتسم ووتقدم باتجاهي::- حجاياتج ترد الروح زهرة

ابتسمت ع كلامة وطار كلبي من الفرح ما اعرف منين اجتني الجرائة رفعت نفسي ع اطراف اصابيعي وبستة بخدة

اباوعلة بهت وتجمد بمكانة ابتسمت::- شكرا شيخ

عفتة وطلعت من الغرفة حتى يبدل لان ما يقبل يبدل اذا احد موجود اعرف لان جسمة متشوه انا ابد ما حسستة فد يوم جسمة مو حلو

بالعكس هو طويل وعندة عظلات وحلو كلش حلو

شبيج زهرة كلساع وكلتي حلو جا مو عيب تباوعين للرجال

يلا جا واذا باوعتلة جبير ابو لو الامير الي يطلع بالقصص

الله ويصير شعرة اصفر وعيونة ملونة واحبة وتخرط حذائي

احبة شنو؟؟!! شنو هل حجي مو عيب زهرة اشو كمتي تمسلتين

نزل هو بكامل كشختة اخت الحجية كامت تصلي ع محمد والحجية عيونها مليانة اعجاب بابنها

جان يمشي بثكل ورزانة وصل يمنا للمطبخ باوعلي وابتسم درت وجهي منا خجلانة

تقرب مني وواكف مقابيلي::- زهورة استكان جاي رحمة لهلج

ابتسمت ورحت ركض اسويلة جاي وجميلة تحجي وياه اجتني سهى::- تردين اساعدج

ابتسمت الها::- لا حبي مشكورة

باوعلها الشيخ وحجة::- سهاوي يا صف وصلتي

::- وصلت للرابع اعدادي

ابتسم::- عفية بالسباعية شترحين ادبي لو علمي

::- ان شاء الله علمي

من شفت حبة ولهفتة ع الدراسة صارت بكلبي غصة حتى هو انتبه من انطيتة الجاي عقد حواجبة وحجة::- شبيج بوية

هزيت راسي وانا مدنكة وما حجيت لان بس احجي صوتي يفضحني كام يشرب بالجاي وعينة علية ما رفعها

دنكت راسي وظليت ع هل حال من لمن اجاه ايسر ويكول::- بوية ابو احمد الناصرية اتصل بيك

هز راسة وكام للموبايل الارضي وحجة::- ها ابو احمد السلام عليكم

::- شلونك عمي اخبارك ان شاء الله تكون بخير

::- ان شاء الله ان شاء الله

::- ها يعني طلع من يمك هو هسة

::- يلا يلا في امان الله

سد الاتصال وحجة::- الجن ساعة ونص اريد كلشي جاهز سرمد قبل ربع ساعة طلع من الناصرية

اباوع لسهى تبتسم بفرح استغربت حالتها كلش 

جميلة انخبص وخبصتنا وياها وسهى كلساع تعدل نفسها ومرتبكة اكثر من عدنا كلنا

وفعلا ساعة وسمعنا صوت الرمي وتمامة طلعت تركض وتهلهل

اسمع صوت الكفلات والدبج هز الكاع هز والرمي اخذنا

دخل الشيخ وهو حاظن سرمد وفرحة بعيونة

فرحان بي ويضحك يمكن اول مرة بحياتي اشوفة هل كد فرحان

وسرمد رغم بشاعة شكلة لكن مضهرة هيبة هو لابس الزي الزيتوني الجيشي ونجمة ع اكتافة

حظنتة تمامة تضحك وتبجي هو نزل ع رجلها وباسها وايدها وكلساع ماخذها لحظنة

دخل للمطبخ وسلام وايسر والشيخ وابو سلام دخلو وياه

كلهن سلمن وتحمدن باوعلي الشيخ وامرني اطلع

ضجت ليش خلاني اطلع شنو يستعار مني مو هاي كلهن سلمن انا ليش ما خلاني?!!

رغم هلشي ما حجيت امتثلت لاوامرة وطلعت فعلا من المطبخ

علما فضت الوهسة بي ردت ادخل صار بوجهي سرمد ارتبكت حيل ما اعرف ليش هل انسان يثير الخوف بكلبي

ابتسمت بتوتر::- مبروك ولحمدلله ع السلامة

ابتسم وعوج حلكة باوعلي من فوك لجوة وما جاوب?!!

تصرفة بهل شكل اكدلي بانو انا مشكلة مشكلة علية والا ليش ما رد السلام!!??

دخلت للمطبخ مشتت بالي رحت لجميلة وبدينا نحظر الها اشياء بسيطة وهي عليها كلشي خطية تعبت

اجة الشيخ وسلام  دخل وراحتلة سهاوي هو خذاها جو ايدة وانا اباوعلهم وعيوني تلمع

تذكرت اخوي حسن وين صار بي الوكت ليش ما سال ليش ما كال اختي وين راحت مرتاحة لا

عيوني انملن دموع وانا اباوعلهم وكف يم الشيخ وتحمحم فزيت من صفنتي وهو يباوعلي ويتنهد

رغم صغير بس اعرف درت وجهي ما اريد اثير عاطفتة علية نزلو دموعي ع خدي

ولشوكت ابقى هيج لا اهل يسالون عني ولا اخو يفكدني ولا ابو وكسر عينهم وكال عدها اهل?!!

كلهم هنا مستحقريني لان ما عندي الي يوكف بوجهم من ياذوني وابسط شي فتون

كلما نتعارك وكالت "دولي لو بيج هيج ما عافوج اهلج" رغم كلمرة تكولها الي والمفروض هسة انا اتعود ع كلامها

بس كلما تكول احس جزء مني يتكسر الى اشلاء لدرجة من تكولها احس كلبي يطلع من بين ضلوعي

الوحيدة الي حبيتها فاطمة اختي وحسن وثنينهم نسوني ورغم انا بعز الضيم والمفروص التهي بروحي وانساهم بس ما نسيتهم هم النسوني

رغم كلشي اشتاقلهم اشتاق لحنانهم رغم ما شفت حنان منهم اشتاق لكلمة البوية رغم ما كايلتها ابد الة!!

اشتاق من اوكع واكول يا خوية تعال الي والكاه واكفلي ويدك صدرة

جا وينهم ليش عافوني مثل الزايدة عليهم ليش ما سالو ولا كالو يجوز يضربوها يجوز تتاذة يجوز ما مرتاحة وياهم خل ارفع السماعة واحجي وياها

فززني من افكاري صوت الشيخ هو يكول::- بوية مو احجي وياج

التفت الة ودموعي بعيني بس ارمش يوكعن باوعلي وصفن حمحم

::- اذا تعبتي صعدي فوك البنات هنا يكملن عنج

::- اي حبيبتي صعدي فوك هسة انا وسهاوي نكمل كلشي انتي كاعدة من الصبح ويانا روحي ارتاحي

هزيت راسي وفعلا جنت محتاجة ابقى وحدي وارتاح جنت رايدة انام بس علمود ما ابقة افكر وينعصر كلبي

صعدت لفوك وكوة اسحل بروحي سحل لاكاني ايسر ابتسم بوجهي وحجة::- خوية بس جراوية الحمرة مالتي ما هي

ابتسمت ودخلت لغرفتة هو ظل واكف بالصالة جنت غاسلتها ومعطرتها ومصفتها بالكنتور بس هم بعد شباب يدورون بخبصة

اخذها وابتسم بامتنان وخجل::- ولله جاي نتعبج ويانا

ضحكت بتعب::- شنو السالفة ايسر قابل غريبة انا وتعبوني غير تكول اختي

ضحك::- ديلا جيبيلنا بنية علمود اخذها واخلصج مني

ابتسمت بتعب وهزيت راسي::- ان شاء الله

باوعلي ورجع دنك::- شبيج بيج شي اصيح لابوي الشيخ خاف محتاجتة

ابتسمت ع حرصة واهتمامة عبالك جاي احجي وي الشيخ نسخة مصغرة عنة::- لا ما بية شي بس تعبت ورايحة ارتاح

::- روحي عذريني عطلتج

ابتسمت::- لا ولو

راح هو وانا دخلت للغرفة مهدود حيلي واخيرا اطلقت العنان لدموعي ليش الغريب احن علية من اهلي ليش اسمع كلمة البوية منهم والمفروض اسمعها من ابوية

امي شحالها هسة شنو اخبارهم خواتي كلهم شلونهم امي من تخلي راسها ع مخدة تنام بسرعة لو هم مثلي تفكر وتبجي لحد ما تنام

ما يأنبها ضميرها وتكول وين بنتي وين عفتها وما سالت عنها ليش هل كد انا نكرة بالنسبة الها

بعدني بداوامة تفكيري ودخل الشيخ خايف مسحت دموعي وكفت كبالة::- ها شيخ محتاج شي

تقرب وكف مقابيلي::- لا زهرة ما محتاج تعاي كعدي هين عندي جم حجاية وياج

تقربت كعدت يمة::- ها شيخ

باوعلي لوجهي وتحديدا عيوني جر حسرة وحجة::- شبيج زهرة

عقدت حواجبي::- شبية??

::- انا جاي اسئلج شبيج

نزلت دمعة من عيوني::- يعني لو اكلك شبية راح تصغي الي لو اكلك مشتاقة لهلي راح توديني الهم

جر حسرة ساكت يباوع لملامح وجهي درت وجهي عنة ضايجة ومخنوكة نزلو دموعي رفع ايدة راد يمسحهن

وكفت وبتعدت عنة تنهد::- اعرف مشتاقة الهم واعرف متلهفة حتى تسمعين صوتهم بس انطيني مجال الله يشهد علية جاي احاول اوصلج الهم وترحين صاغ سليم الهم بعد

التفت ناحيتة مستغربة::- يعني ناوي ترجعني الهم

هز راسة ساكت يباوع لتعابير وجهي::- وبعد ما اجي لهنا واشوفكم

بهت وجها وبلع وهز راسة ساكت::- شوكت توديني

::- انطيني صبر

::- لشوكت هاي مو صارلي سنة تكدر تتحمل تبتعد عن اهلك سنة كاملة

بلع وهز راسة ب لا بجيت بقهر::- جا انا وحد انا هم اريد اهلي حسو بية مشتاقتلهم لو انطيتوني الدنيا كلها ما راح تعوضون نقطة من حنان اهلي ادري انا نكرة بحياتهم وادري نسوني ويجوز خواتي تزوجن وعاشن حياتهم ويجوز امي بعد ما تذكرني

بس انا اريدهم انا مشتاقتلهم انا محتاجتلهم ما مجبورة اتحمل تقاليد واعراف انا ما الي ذنب بيها انا هسة لازم كل فكري شلون الزم الكتاب شلون انجح

شفت شلون من سئلت بت عمك وفتخرت بيها انا هم اريد اهلي يفتخرون بية انا شناقصني حتى اعيش محبوسة ومحد يسال عني ولا واحد من اهلي يجيني

مو ذنبي انا تحملت غلط مو غلطتي ورحت لمكان مو مكاني وعشت وي ناس مو ناسي شنو ذنبي ها??!! ليش ساكت شيخ مو انت تعرف بالدين وتعرف شنو معنى الزواج بالاكراه??!! تعرف نتائجة تعرف هذا الشي حرام

طفلة انا وانضربت وانهانيت وكل يوم اتعير باهلي كل يوم انطعن وانا اسمع لو بيج خير ما عافوج اهلج ليش شنو السبب

تريد تعرف شنو السبب انتم السبب اي لا تباوعلي هيج اي انتم بسبب تقاليد رجعية انا هسة هنا بدال ما اكون عد امي وبحظنها

انت رجال وجبير ولساتك من تدخل عيونك ادور ع امك وتنام بحظنها ومن اسئلك تكلي ما شبعت منها

لعد وانا انا هم ما شبعت من امي صغير وخذتوني انا البعمري تشب وتكبر بحظن اهلها

طول كلامي احجي وابجي واحس وجهي مطعون طعن ويطلع من حرارة

جان يباوعلي وعيونة تلمع كعدت بالكاع وبجيت راد يتقرب ناحيتي رفعت ايدي ومنعتة يوصل يمي رغم شفت منة حنانة اكثر من حنان اهلي بس تعبت رايدة ارجع وطلعت تعبي وصبري وتحملي كلة بي

انطاني ضهرة حجيت بصوت مكسور ودموعي ع خدي::- تقاليدكم والعكل اخذو جم حلم مني?!!

اخذو طفولتي برائتي احلامي حتى شخصيتي رجعني لهلي بعد ما اكدر اعيش وياكم لحظة وحدة

ما جاوبني بسرعة طلع وصفك الباب وراه ظليت ع هل حال ونمت بالكاع بشكل الجنين

ودموعي تصب وانا اناجي رب العالمين يخلصني حابة ارجع ضيم اهلي ولا قهرهم

ظليت ع هل حال ساعات وانا احجي وي ربي عسى ولعلى دعوة صادقة توصل للسما وتحقق

باوعت من الشباك الدنيا ليل حسيت بلعومي جف وحابة اشرب مي

رحت للحمام غسلت وجهي ونزلد لجوة باوعت الصالة فارغة رحت بوجهي للمطبخ هم فارغ ونظيف اخذت ماي

ورجعت ردت ارجع وسمعت صوت واحد يبجي ستغربت الصوت كل فكري جميلة لو الحجية

لان بكل اعتقادي كلهم راحو ومحد هنا وخاصة الصوت البجي جان صوت مرة مو رجال

تقربت لصوت وكلما اتقرب يعلى اكثر عرفت الصوت صادر المن هرولت اريد اوصل الها ونصدمت من سمعت تكول::- انا احبك........يتبع

الـنـهـايـة 🌚❤️

الكاتبة شوك 🧚‍♂️❤️

الفاتحة ع روح المرحوم عبد ابن هدية يرحمكم الله💔💔

اقرو الفاتحة واهدوها لروحة واكون ممنونة منجن 💔

قراءة ممتعة

دمتن في حفظ الله احبجن ❤️