قصـة : فحيـح الافعى
بقلمي : نـون النعيمي ✨
لتنسون التصويت والتعليق بين الفقرات حبايبي ❤️!
.......................................
ريتال : الخاطري لتسوي شي !
ضل يباوعلي شويه شويه قبضته بدت ترخه
بدون ما يشيل عيونه من عيوني چانت حاجبه شويه شويه ترخه ..
أشهب : اكو احد كايلج قبل انو عيونج شكد حلوة ؟
ضليت صافنه بوجهه بدون ما احچي
ابتسمت وحچيت
ريتال : اي انتَ توك كتلي ...
ضل يباوعلي بستغراب اعجز افهم نظراته بكل مره احاول افهمه ماعرف شنو الشي اللي يخليني ما افهمه شكد احاول منلتقي لو ماشوفه بس مدصير
شكد احاول ابتعد بس دائماً الكاه كبالي
القدر ماعرف شنو اللي ديخطط النه احس القدر عنده لعبه بس اتمنى افهمه قبل ميفوت الاوان
عفت أيده
ورحت ع عباس اللي بكل مره هوه الضحيه بدون ميسوي شي
ريتال : ليش دائماً تنمطل بالكاع انتَ ؟
عباس : مشفتي شلون دفعني دباعي عبالك بغل
ريتال : دسكت لسوينه مشكله لخ هل مره مراح يدفعك لا هل مره حيشمرك جوه السيارات
عباس : هوه اني شمسويله هوه حاقد
ريتال : عوفه هوه هيج
كومت عباس من الكاع تحت انضار هذا المتوحش
فعلاً متوحش تصرفاته ما الهن مبرر
ريتال : اني اعتذر مره ثانيه نيابه عنه
عباس : انتِ شعليج قابل لديرين بال
ابتسمتلي ودرت وجهي ع أشهب
عيونـه صايرات جمر حمره نار
ابتسمت وحچيت
ريتال : من رخصتك
درت ظهري واشرت العباس يمشي
بعدنه مماشين خطوتين شفت أشهب صار كدامي
اتنهدت ورفعت عيوني بحركه تبين انو ضجت ووصلت اخرته عندي
ريتال : خير ؟
أشهب : اني اوصلج
ريتال : منو انتَ حته هيج تلزكلي ؟
أشهب : لتحچين حچي بعدين تتندمين عليـة
ضحكت وأشرتله ع نفسي
ريتال : اني اتندم ههه صبري بده ينفذ
أشهب : واني صبري طويل
ريتال : ليش متحترم نفسك وتوخر من كدامي مو احسلك لان صدك وصلت اخرته عندي
أشهب : تدللين ست ريتال صار
ريتال : ياريت والله
هزلي براسه وفات من يمي بدون ميجاوبني
اني هم مشيت ليكدام ولحكني عباس
وصلت للمحل واني ع هل هدوء
حته مابيه حيل احچي ويه عباس ولو هيه كله من وره عباس لان كلما يلتقون هوه وأشهب هيج اتصير
دخلت للمحل
اخذت نوعين موطه واخذت نساتل وحليب الايهم ونمنميات
ودفعت وطعلت
عباس : هاي المن هلكد
ريتال : البت اختي
عباس : عمي والله هنياله ع هيج خاله
ريتال : هيه تحبني لان اشتريله نمنميات
عباس : لا ما اتوقع
ريتال : هههه
عباس : اوصلج للبيت ؟
ريتال : لا اني اخذ تكسي منا واروح
عباس : متأكدة ؟
ريتال : اي
عباس : ماشي ع راحتج بس من توصلين رمشيلي حته اطمئن
سويت نفسي مسمعت طلعت ع الشارع وكفت تكسي
وهوه چان بعده واكف مبتسملي
صعدت وهزيتله بأيدي رجع هزلي بكل نشاط عبالك مادري شنو اللي يشوفه هيج متحمس يفكر غير تفكير
الطريق كله فكري مشتت
ماعرف بشنو بالضبط
ذبني السايق اباب البيت بالضبط
اتشكرت من عنده ودخلت للبيت لان عندي مفاتيح
حته خرب واهسي ماريد اروح للدلال
بس لازم اروح لان هوه يكعد الهيج وقت عادي
مروه : زنوبب اجت خالتجج
ثواني وزينب صارت كبالي
زينب : جبتيلي موطه خالتييي
ريتال : جبتلج كومه اشياء مو بس موطه
زينب : احبجج والله
ريتال : بالعافيه بس اشاركي بيه ويه امج وخالتج شيماء
عقدت حواجبه وحجت بعصبيه :
زينب : مانطيي الخاااله شيماء
ريتال : ليش ولج
زينب : تخوفني ماحبه
ريتال : انجبي عيب مثل ما تحبيني تحبيه
زينب : تمام
ريتال : دخلي جوه اني حطلع شويه واجي
زينب : تمام ريتال
دخلت زينب ركض جوه جيت اطلع داسد الباب
چان توقفني مروه
مروه : وين رايحه
ريتال : هسـه اجي
مروه : اي غير اعرف وين
ريتال : هل مره ميحتاج تعرفين هسـه ربع ساعه واجي
طلعت ع السريع قبل ما اسمع رده
دائماً تجي بالاوقات الحرجه واني منا مكايلتله بعدني ع المزرعه يعني اذا عرفت راح اتسويلي مصيبه
فـ اتجنب السالفه هسـه الحد ما استلم كلشي بأيدي عود وراه اكله
رحت مشي مالي نفس اركب تكسي
لان هوه اصلاً قريب
عشر دقائق ووصلت للمكتب
فتحت الباب ودخلت .. چان ديريد يكوم يعزل بس اول مشافني رجع المكانه
:- اسفه تأخرت شويه عليك
:- لا عادي ماكو اشكال
:- قبل شويه جيت من الشغل وهاي طبتي عليك
:- الله يساعدج
:- ويساعدك
:- مكتلي شنو سالفة المزرعه والفلوس ترا صارت عندي خربطه
:- باعي قبل ميموت ابوج او اتوقع قبل ميصير مريض حسب ما اذكر من حچي عمج چان عنده مزرعه وكل فلوسه بيه يعني تعبان عليـه فـ عمج چان يشتغل وياه مو شريك بس ابوج چان مشغله
فـ من مات ابوج عمج بقه بالمزرعه بقه يشتغل بيه وكام ياخذ ارباحه اله يعني طمع بيه بدون ما يجي يكللكم اياه فـ من عرفتي انتِ دزلج ارباح هاي الفترة ورجعلج المزرعه لان انتِ الوريثه الشريعه .. او اختج الكبيرة
:- يعني ملك اختي الكبيرة !
:- دسمعي ..ابوج الله يرحمه كاتب وصيه قبل ميموت بيه هواي كلام وحچي شخصي يخصكم بس المزرعه سجله بأسمج بدون ما يبقي شي الخواتج والامج
:- يعني بأسمي ؟
:- اي لان هوه بالوصيه هيج كاتب ومسجله بأسمج اكو سندات وملفات تثبت
:- اتوقع لهذا السبب عمي ما حچه بالمزرعه طول هاي السنين وطمع بيه
:- عفيه لان ماله حق بيه استحيف يخليج تاخذيه وتستفادين من عده وبهل حاله انتِ محاميه يعني انتِ شغلتج هاي تكدرين حته تسجني لان ماكل حق يتامى وبالاخص انو انتِ الج حق بيه لان مالتج
:- عدمن الوصيه هسـه ؟
كام من الميز فتح مجر مال كومدي
طلع من عده فايل وجابه خلاه كدامي ورجعه المكانه
باوعت عليـه وحچيت
:- شنو هذن ؟
:- هذا الملف بي الوصيه وبي صور ومستندات تثبت انو انتِ الج الحق الوحيد بيهن واكو صور شخصيه ورساله وخليتلج الفلوس وياهن
:- ماشي
:- كتبتلج عنوان المزرعه بورقه وخليته بيهن
شوكت مترحين روحي .. لان اليوم دك عليـه عمج مبطل العمال البيه واجاني الظهر لهنا سلمني مفتاح مال بيت صغير بالمزرعه هم مال ابوج
:- صدك تحچي لو تشاقه ويايه انتَ ؟
:- اعرف الشغله ثكيله عليـج ومتكدرين تستوعبين بس هاي الحقيقه ابوج ناطيج كلشي حته البيت خليتلج المفتاح ويه السندات
ضليت صافنه ماعرف شحچي الاول مره احس الكلام خلص عندي الاول مره ماعرف افكر
مزرعه وفلوس وبيت كلهن بأسمي
زين شحكول الخواتي شلون راح يصدكن اذا اني هسـه ممصدكه الوضع
:- اعرف الشغله صعبه عليـج بخصوص شلون راح تقنعين اهلج وخواتج بس ابوج مفكر وناطي اهميه لهذا الموضوع اقري الوصيه وراح تفهمين
حسيته قره افكاري من حچه هيج لان فعلاً اني هيج دافكر
:- تمام .. بس عدمن چانت هاي الوصيه ؟
:- اكو غير عمج
:- تمام .. انتَ قريته ؟
:- قريت بس الوصيه مقريت شي ثاني لان اذا مقاريه مجنت راح اتأكد اذا كلشي بأسمج
:- تمام
:- روحي ارتاحي ولتفكرين هواي
:- انشاء الله
طلعت من عنده واني خاله الملف ع كلبي
ماريد اضيعه مو ع مود الفلوس لا .. بس بي ريحة ابويه
كلشي مهامني ولا قاهرني بكد حنية ابويه
رغم مسجل كلشي بأسمي ومناطي شي الخواتي
بس الاول مره بحياتي احس احد حنين عليـة ويحبني
ماعرف وين اروح احس نفسي تايهه بالشوارع
ماريد ارجع للبيت لان ما مستعده حته اقره الوصيه
اريد اسولف الاحد اريد احچيله
بس ماعندي احد اروحله .. ثواني واجه بالي شيخ ضاري
احس هوه الوحيد اللي راح يفهمني
طلعت ركض ع الشارع
باوعت الساعـه بـ ١٠ مهتميت ركبت التكسي دليته البيت
لان اندليت من وصلني أشهب
اكثر مره احس بنفسي ضايعه
ابويه من مات ضعت وراه وهسـه رجع ضيعني
باوعت ع الفايل بحضني كلش متردده افتحه
بس أيدي راحت عليـه وفتحته ويارت لو كاطمه أيدي
اول ما فتحته صارت صورت ابويـه كبالي
بدون حس وسابق انذار نزلت دموعي ع الصوره
ضحكته شكد حلوه
نفس ضحكتي اني هيج اضحك
اخ بويـه لو تعرف شصار بحالي بعدك والله ماتعوفني وحدي بهل دنيا الاخذت كل حيلي وراك
شلت الصوره بثنين أيديه وكمت احچي وياه
بدون ما اهتم للسايق حته
_ لو تدري شكد مشتاقتلك ونفسي اشوفك
لو تجي تاخذني وياك والله راح ارتاح يا بويـه راح ارتاح من هل ضيم اللي اني بي ع الاقل يمك اني انهدم حيلي بروحتك بابا
خليت الصوره ع صدري وكمت ابچي واشهك حيل
اني ونيني ما يخلص ولا عزاي خلص من راح الحد هسـه اني كل يوم عندي عزا ما نهيت فاتحته
سكتت بس اشهك وعيوني ع الطريق
رجعت الصورة بالملف بدون ما اكلب بالبقيه
وكف التكسي انطيته الفلوس وجيت انزل واني امسح بعيوني بس استوقفني من كال
:- الله يرحمه ويجعل مثواه الجنه صيري قويه لان راح يفرح من يشوف بنته بهاي القوة وراه
ابتسمتله وسديت الباب وتمشيت البيت الشيخ
دقايق وكفت بالباب
دكيت الباب مره ومرتين وضليت ادك بس ماكو
كعدت بالباب اتانيه لان اكثر شي بالجامع هوه
جيت اغفه لان هواي بچيت بس سمعت صوته
وفزيت
ضاري : شعندج اهناا بنتي ريتال
رفعت راسي اله چان واضح علامات القلق ع وجه
كلش واضحات
ماحسيت ع نفسي غير واني ابچي
بس سمعت صوت ثاني وجهت نظري المصدر الصوت
أشهب : احچي منووو وياجج ليش تبچين
بس شفت أشهب رجعت ابچي بس اقوى
ماعرف شبيه بس كلش محتاجه ابچي
دنك الشيخ يمي وطبطب ع ظهري
وحچه بكل حنيه
ضاري : كومي للبيت ارتاحي وبعدين احچيلي شبيج بنتي
باوعت عليـه وكمت وياه فتح الباب
ودخل ضليت واكفه بمكاني الحد ما صاحني
دخلت جوه كعدت ع القنفه ثواني واجه أشهب بيده كلاص مي خلاه كدامي اخذته بدون ما اباع عليـه اتجنب اخلي عيوني بعيونه
شربت كلاص المي كله لان ريكي يابس
وعدلت كعدتي
ثواني واجه الشيخ كعد كبالي .. وجهه كلش بشوش ودائماً مبتسم راح أشهب كعد بصفه
اباوع ع أشهب عبالك رجل عصابات ماعرف شلونه
والشيخ امبين انسان كلش مسالم .. يعني ماعرف شلون متوالمين سوه
ضاري : شبيج ريتال بنتي
ريتال : مابيه شي
ضاري : شنو مابيج شي احچيلي اني مثل ابوج
باوعت عليـه ورجعت نزلت دموعي
دنكت راسي وحچيت
ريتال : ماعندي ابويه ميت
ضاري : الله يرحمه اعتبريني ابوج
أشهب : احچي عاد شبيج اكو احد معترضلج اخاف هذاا الكواد عباس سوالج شي
ضاري : انتَ بس اسكت خل تحچي
لثواني جيت اضحك بس لزمت روحي بالكوه
وماضحكت
ضاري : يلا احچي مو فتيتي گلبي
ريتال : ماريد احچي وهذا كاعد اهنا
أشهب : شنو بعبع كدامج ! صدك متستحين
ريتال : ماحب احچي اشياء شخصيه كدام احد غريب
أشهب : عساس الشيخ مو غريب بعدين هوه اني غير اعرف اسرار بيتكم كله
ريتال : انتَ اجابك اهنا مدكلي
أشهب : حظي الجايف جابني يم شكولج وين ماروح لاحكتني
ريتال : اني اللي لاحكتك لو انتَ عبالك ذيلي وين ماروح اشوفك
أشهب : مراح ارد عليج لان عيب الشيخ كاعد بس والله مافوتلج اياه بسيطه
ضاري : شنو انتو جهال مو عيب
أشهب : دشوفه شلون صلفه والسانه السان الدلالات
ضاري : أشهببب !
أشهب : اي سكتت
ضاري : احچي عاد بنتي !
اتنهدت وحچيت
ريتال : طلع عندي ورث من ابويه
ضاري : وهذا الشي اللي انتِ حزينه عليـه ! مو زين العالم تفرح انتِ تحزنين
أشهب : هيه عكس العالم
خزره الشيخ ورجع نظره اللي
ريتال : بس ابويه مسجل كلشي بأسمي وما ناطي شي الخواتي
ضاري : وانتِ شنو اللي بيدج !
ريتال : شلون راح يصدكون هل شي شلون راح افهمهم اني صح عندي الوصيه والمستمسكات بس ماعرف شسوي كلش ضايعه
ضاري : بسم الله الرحمن الرحيم ﴿ إِنَّ اللَّهَ يَرْزُقُ مَن يَشَاءُ بِغَيْرِ حِسَابٍ ﴾ صدق الله العظيم .. هذا رزقج ما تكدرين تغيري رب العالمين كاتبه الج
ريتال : خايفه لا يكرهوني وما يثقون بيه وعبالهم اكلت حقهم
ضاري : خل يكرهوج ماطول انتِ ما ماكله حقهم وما مسويه شي يغضب رب العالمين لتهتمين
ريتال : ماعرف شسوي حته مالي نفس اروح للبيت وماعندي احد احچي وياه
ضاري : كتلج اعتبريني مثل ابوج .. اني ابوج
ريتال : اعرف لهذا السبب جيتك
ضاري : بيتي مفتوحلج شوكت متردين البيت بيتج
ريتال : شكراً كلش هواي
ضاري : مثل بنتي انتِ اذا تردين نامي الليله اهنا ارتاحي والصبح روحي ع كيفج
ريتال : ماريد ازاحمك
ضاري : يعني ليش تخليني اعيد نفس الحچي ترا رجال كبير اني مابيه حيل
ضحكت ودنكت راسي .. كام هوه وأشهب
عافوني كاعده وحدي
أشهب :: شفت دمارات أيده مو ؟
ضاري : اي انتبهت
أشهب : شنو هذن
ضاري : هاي علامات السحر كلش قوي بحيث راح يترك اثار اقوه من عنده بجسمه
أشهب : شلون لعد
ضاري : خل تتحسن شويه واحچي وياها بخصوص هل موضوع .. امشي وديله افراش انتَ ودليه ع الحمام واسئله اخاف جوعانه
أشهب : ليش ما اسويله مميه هم ؟
ضاري : عيب من شوكت نعامل ضيوفنه هيج
أشهب : اي شعليه اني هيه ضيفه عندك قابل عندي
ضاري : لعد روح البيتك يلا ما تبات اليوم اهنا
أشهب : الفراش فوك الكنتور مو
باوعلي بطرف عيونه .. رحت ع السريع للغرفـه نزلت افراش
ورحت للصاله خليتهن ع القنفه
أشهب : هاي افراش فرشي ونامي
ريتال : شكراً
رجعت للغرفـه مال شيخ چان امدد وخال أيده ع عيونه
وبيده السبحه ديسبح
أشهب : وديتله افراش
ضاري : سألته اذا جوعانه او لا
أشهب : اي كالت شبعانه
ضاري : لچذب كوم وديله اكل وروح الغرفتك حته تاخذ راحته البنيه
أشهب : صار شيخنه
ضاري : من تطلع طفي الضوه وسد الباب وراك
و على كيفك وياه ترا خطيه
أشهب : اني كلشي ممسويله هيه ادبسز ومتعرف تحچي
ضاري : ميخالف
كمت طفيت الضوه وطلعت وسديت الباب ورايه
وكفت اباب الصاله ماريد ادخل بس خطيه الشيخ لح عليـه
دخلت للصاله شفته كاعده تفرش بالفراش بالكاع
اول مشافتني عافتهن وكفت كبالي بس بنفس مكانه
أشهب : جوعانه ؟
ريتال : لا
أشهب : متأكدة ؟
ريتال : لا
أشهب : يعني جوعانه لو شنو
ريتال : اشويـه
أشهب : اي تعاي ساعديني قابل اشتغل يمج اني
كلبت عيونهـا وباوعتلي برود
ريتال : اي قابل كايله لا اني
عفته ومشيت بس سمعت خطواته ورايه
ماعرف ليش ابتسمت بداخلي
دخلت للمطبخ شغلت الضوه
ثواني ودخلت ورايه .. كعدت ع الكرسي
فتحت الثلاجه بس ماعرف شسوي
انداريت عليـة وحچيت
أشهب : تاكلين بيض عيون ؟
كامت تضحك وهزتلي براسه بمعنى اي
طلعت طاوه خليت بيه زيت وخليته ع النار
طلعت بيضتين طكيتهن بين ما حمه الزيت وذبيتهن
بالطاوه
ثواني واستوت طلعته واخذت خبز من الجدر
وخليتهن كدامه
ريتال : شكراً
أشهب : بالعافيه
يمكن هاي اول مره ما نتعارك ونحچي بهدوء
بس هيه اجفص هواي .. اني ماعندي شي وياها
وكفت يم الكاونتر سويت نفسي دالعب بالتليفون
لان ماريد تعرف داباع عليـة اخاف متاكل تستحي
الكم اللي تاكلهن العصفور ياكل اكثر من عده
بس چان واضح انو عجبه البيض
عيونهـا مورمات مال بچي
ودمارات أيده كلش واضحه
راحت عيوني ع كتفه
وسألته قبل ما افكر بسؤالي
أشهب : چتفچ اشلون صار ؟
جاوبتني بدون مشيل عيونهـا
ريتال : زين مابي شي
ابتسمت لان ماتوقع تدري اني اللي شلت الخيط
ماتوقع احد منتبه حته اخته
دقايق وكامت اخذت الماعون وفاتت من يمي
خسلته ورجعت فاتت من يمي
وصلت الباب المطبخ وكفت اندارت عليـه ابتسمت
ريتال : عاشت أيدك طيبه
ورجعت للصاله طفيت الضوايات ورحت الغرفتي
ريتال :: فرشت بالكاع كملت
خليت الفايل يم راسي ومددت .. لزمت بطني لان شبعت
والبيضه ماعرف ليش طيبه رغم هيه كلش عاديه
اخذت تليفوني من جوه راسي شفت المكالمات بالتسعه من مروه
دكيت عليـة بأول مره چان اشيله بعدني محاچيه چان ادكوم تعيط
:- انتِ وينجججج كلتيي ربع ساعه مدريي شكد وترجعينن
:- رحت البيت صديقتي مريضه
:- يااا صديقـة ليش اچذبينن امنيلج صديقات انتِ
:- اكو احد كلج منبوذه اني ؟
:- مادري مسامعتج قبل دكولين صديقـة لو شي
:- المهم هسـه سمعتي ضليت يمه لان خطيه مريضه
وهيه منا حامل ورجله طالع بالواجب
:- اهاا وشوكت ترجعين ؟
:- باجر
:- خوش لعد
:- اكلت زينب موطه ؟
:- اي اكلت وخلت نستله جوه راسه بنت القندره عبالك مماكله قبل
:- اي عوفيه شتريدين من عده
:- هوه محد طلع عينه غيرج حته كامت متخاف مني
:- اهوو هسـه بله محاضره .. أيهم نام لو بعده
:- اي سبحته وذب روحه
:- خوش لعد .. اي شي دكي عليـة لو رمشيلي
:- ان شاء الله
سديته من عده واني اضحك ع الچذب اللي چذبته
فوكاه هيه الفطيره تصدك بسرعه
اتمنى اتصدك بيه مثل ما اتصدك بچذبي
ماريد اخسره ع مود افلوس
شمرت التليفون ع القنفه وغمضت عيوني
هستوني جيت اغفه چان تطفه الكهرباء
جريت رجلي الحضني ع السريع
وغمضت عيوني
جريت اللحاف حيل الصدري
نفسي كلش ضاق .. اجت هواي افكار براسي
واجت اللمسات ع بالي اللي چانت اتصيرلي
حاولت ما افكر واهدي روحي بس ما اكدر
صوت انفاسي كلش عله بشكل مو طبيعي
حسيت كلبي راح يوكف .. كلشي يصيرلي عادي اله الظلمه اتخبل من عده
جيت اريد ارفع أيدي للقنفه اجيب تليفوني
بس أيدي متتحرك
سمعت صوت خطوات صارت بالصاله
بس مو خطوات خفيفه هل مره ثكيله
عصرت عيوني بشده ماريد افتحه
داحس ع جسمي كاعد يرجف وكلبي ديضرب بصدري بقوة
الخطوات وكفت بصفي
حسيت عليـة كلش قريبه من عندي
ثواني وصارت انفاس حاره تضرب بشعري وقريبه من وجهي واضح هل شي
عصرت اللحاف بأيدي بعد شويه يغمى عليـة
بس سمعت صوته
:- لتخافين اني يمج
صوت أشهب
لزم أيدي اللي لازمه اللحاف كل هاي واني عيوني مغمضه هم ماريد افتحه
شويـه شويـه بده نفسي يهدء
هوه وكلبي
درت راسي ع صوت الانفاس
وفتحت عيوني چان اكو ضوه كلش خافت
اول ما فتحت عيوني لاحضت وجهي شكد قريب ع وجهه
بحيث انفاسه بدت تضرب بوجهي
صعدت عيوني العيونه
چان كاعد يباوعلي ومبتسم
اول مره اتقرب ع شخص بهل قرب
ماحسيت غير مخلي أيده ع القنفه وأديه الثانيه ع الجه الخ
يعني ثبتني بنص أيديناته تقريباً رجعت نفسي ليوره بس هم چان قريب عليـة
حچه بهمس
أشهب : تخافين من الظلمه مو
هزيتله براسي بمعنى اي
أشهب : متحچين قبل نص ساعه چان السانج بطول النعال
ريتال : لتغلط احسلك
أشهب : عليمن كلتي عبالك ذيلي مساع ؟
ريتال : مو عليك
أشهب : لعد عليمنن
ريتال : هااا
ماحسيت غير مقرب وجهه بحيث حسيت خشمه طخ بخشمي من القرب غمضت عيوني وحچيت بهمس
ريتال : عليك الله وخر
أشهب : ما وخر شحسوين قابل تعيطين عيطي عادي
ريتال : والله بعد ما اغلط شبيك
أشهب : بس ما اصدك بيج اني
ريتال : والله صدك بس هاي المره
أشهب : اذا اصدك معناه راح اوخر واني عاجبني الوضع ماريد اوخر
ريتال : شبيك أشهب !
مجاوبني ضليت مغمضه عيوني .. لاحضت انفاسه كامت تضرب ع جانب وجهي يم أذاني
جنت اسمع صوت انفاسه وكل نفس ياخذه يذب وراه حسره تهدم بيوت
أشهب : ريحة شعرج طيبه
حسيت ع جسمي كام يرجف ودموعي كامت تنزل بس بدون صوت احس كلبي بده يسرع كلش ويدك
اصبعه انحط ع خدي ومسح الدموع
أشهب : هذا تحذير حته مره ثانيه ما تغلطين وتطولين السانج الزڤر هذا
هزيتله براسي .. ثواني وكام من عندي بعد ما حسيت الكهرباء اجتي
فتحت عيوني واتنفست مثل البشر
مسحت الدموع وباوعتله چان واكف قريب من عندي
واكف بكل برود وخال أيده بجيبه ويباوعلي ولا عبالك مسوي شي
ريتال : شكد اكرهككك
خليت اللحاف ع وجهي وانطيته ظهري
ومددت
حسيت صوت خطواته طلعت من الغرفـة
دقايق ووخرت اللحاف ونمت ع ظهري
لزمت كلبي وكمت ادك عليـه
ماعرف شبي اكو شعور كلش غريب بداخلي كلبي مديريد يوكف بعده متخطه الموقف
غمضت عيوني اريد انام لان كلش منعسه
بس ماكدر من وره كلبي ماعرف شصارله مديقبل يهدء
أشهب :: طفيت الضوه ومددت ع الچربايه
جيت انام بس ماكدرت ضليت ادكلب بمكاني
عطرهـا مديروح من خشمي رغم مخاله عطر هيه
بس اكو ريحه مميزه بيه
رجفته جوه أيدي والتوتر والخوف اللي بصوته
مديروحن من بالي
اخذت تليفوني حاولت الهي روحي بي مرت ساعه واني بعدني منايم
كمت من الفراش ومشيت ع كيفي للصاله
اتقربت من عده وكعدت يم راسه
خليت أيدي جوه حنچي وضليت اباوع عليـة
ماعرف شنو هذا الاحساس الغريب العندي
اول مره كلبي وعقلي يثبتون ع شي ويتوالمون
بحيث اثنينهم يردون يضلون يباعون عليـة منا الحد ما يملون
ملامحه كلش حاده بس طفوليه بنفس الوقت
ماعرف شلون جمعت هذا المزيج سوه
نمشه كلش حلو عليـة
احس عده تفاصيل مميزه
وجهه وخشمه حمر معناه بچت قبل ما تنام
ما تخيلت فد يوم عقلي يصير بهل خفيه ويطاوعني ع هل السوالف
ماحسيت ع نفسي غير واني لازم خدوده ومتحسسهن
اكو شعور بكلبي يريد يسوي اكثر يريد يصير دنيئ كلش
كمت من عده ع السريع ورجعت الغرفتي
لزمت المخده وغطيت راسي وغمضت عيوني اريد انام
رغم كل التفكير وهاي بس اريد انام
احسه خربطت دكات كلبي
ماريد اسوي شي غلط واكسر الحواجز اللي بحياتي
ماريد ادخل بهل مجال
....
فزيت من النوم ع صوت الباب كمت ع السريع
ع الاكثر هاي ريتال اخذت حجابي وطلعت
جريت حجابي وركضت للباب فتحته وصار حسن كبالي
متچي ع الباب
حسن : صباح الخير
مروه : صباح النور
حسن : هستوج كاعده ؟
مروه : اي
حسن : لعد دخلي غسلي وجهج صحصحي وتعاي
مروه : لا مصحصه عادي
حسن : متأكدة
مروه : اي احچي ترا قلقتني
حسن : تجين ويايه اريد اشتري غرفـة بس ماعرف هسـه الموديلات شنو
مروه : كاعد تضحك عليـة لو تضحك ع نفسك
حسن : لا والله بس صدك ما اعرف
مروه : روح حسن يعني من الصبح تريد تغث
حسن : طلعي بس هاي المره ويايه واذا ما عجبتج شتريدين اتسوين سوي
مروه : يعني سالفـة الغرفـة كذب مو ؟
حسن : طبعاً
مروه : حته الكذبه سخيفه
حسن : اعرف بس انطيني فرصـه بس هاي المره
مروه : حتلو اذا اريد انطيك مراح يغير شي ترا
حسن : حتلو اني عاجبني نطلع
مروه : وين نطلع
حسن : ماعرف بكيفج
مروه : الجهال بالبيت ماكدر اعوفهم وحدهم
حسن : حتلو جيبيهم ويانه
مروه : ماشي بس اطلع وياك بشرط
حسن : اشرطي
مروه : بعد ما اشوفني وجهك
حسن : صار
مروه : شوكت نطلع ؟
حسن : العصر اجي عليج
مروه : خوش
حسن : رجعي كملي نومتج قلبي
ابتسمتلي وسديت الباب ورجعت لفراشي
شفت الساعـة بـ ١٠ ونص
رغم اني ماريد اطلع بس متحمسه ماعرف ليش
بس ماعندي فلوس واخاف الجهال يعجبهم شي فـ ياريت لو ريتال تجي من وقت حته اخذ فلوس من عده
هستوني داغفـه چان تندك الباب
كمت ع السريع فتحته طلعت ريتال
سلمت عليـة ودخلت الغرفتـة ع السريع
عبالك مستعجله
رحت الغرفتـة دكيت الباب ودخلت
چانت ناطيتني ظهره ونازعه تشيرته كاعد تبدله
لاحضت اكو شخوط وندوب بظهره ودمارات بارزه
اتقربت من عده وخليت أيدي ع دمار
مروه : يوجعج ؟
ريتال : لا
بدلت تشيرته وكعدت ع الچربايه
چانت كاعده تلبس جواريب تريد تطلع كلش واضح
مروه : حطلعين
ريتال : اي
مروه : وين
ريتال : راح اروح المحمد ع مود قضيـه
مروه : يعني حتلزمين قضيـه لو شنو
ريتال : اي
مروه : يا الله ان شاء الله يفتحه بجهج من كل الجوانب
ابتسمتلي وكامت طلعت من الغرفـة
وكفت تلبس حذائه باوعتلي وحچت
ريتال : تردين فلوس ؟
مروه : اي
مدت أيده بجيبه طلعت فلوس وجرت أيدي خلتهن بيه
باوعت ع الفلوس ورجعت باوعت عليـة بستغراب
مروه : ميتين هاي !
ريتال : اي وين المشكله !
مروه : امنيلج ؟
ريتال : من الشغل يعني امنين .. استمتعي ويه حسن
مروه : شلون عرفتييي
ريتال : لتخلين شي بنفس زينب و ترا حسن خوش ولد
عافتني وطلعت وبقتني بصدمتي
ماعرف شلون عرفت مستحيل اكو شي ينضم عليـة
بس ياريت لو ادكلي ع سالفـة المزرعه لان بديت امل
اريد اعرف ليش ضامته عليـة
ركضت خليت الفلوس بجنطتي
ورجعت ع الفراشي
....
كذبه ثانيه من الكذب اللي صدكته مروه
توجهت للمزرعـه اريد اشوفه قبل ما يخلص اليوم واكضي بالشغل
ضل يمشي التكسي وازدحامات كلش هواي
والدنيا حاره ماعرف شوكت حيكسر الجو
عرفت الطريق طويل لان ابو التكسي راد ١٥ الف
ومن عاملته كال الطريق طويل
سمعت صوت تليفوني يرن فتحت خط لان طلع محمد
:- شلونج ضلعه
:- هلا محمد .. زينه انتَ شلونك ؟
:- والله بخير مادامج بخير
:- اخبارك
:- والله عندي خبر الج
:- كول
:- اكيد تذكرين علوان
:- اي
:- انقتل بالسجن ومحد يعرف منو القاتل والتحقيق اتوقف
:- صدك تحچي ؟
:- اي والله
:- منو وقفه للتحقيق
:- مدير السجن متكتمين ع السالفـة
:- ليش ؟
:- يكولون القاتل ضابط من اهل السجن فـ لهذا السبب وقفو التحقيق وكالو انتحار
:- منو يريد يقتله قابل
:- اخو البنيـة اللي لزمتيلهم القضيـه نسيت اسمه
:- أشهب ؟
:- اي
:- شلون عرفت
:- سمعت انو هذا انتقام الاخته
:- ماعرف محمد شغلـه تعجب ماكو دليل قوي
:- اي دليل ماكو فـ لهذا كالو انتحار
:- حلو
:- عوفج من هل موضوع اكو قضيـة اريدج تلزميه
:- مو كتلك مالزم
:- شغلتج هاي شنو متلزمين والعالم جاين عليج خصيصاً شلون متلزمين بعد
:- شنو القضيـة ؟
:- تعاي للمكتب ونحچي بيه وعود احچي ويه ابو القضيـة
:- خوش
:- تكدرين اتمرين اليوم ؟
:- اشوف اذا اكدر اجي من عيوني
:- ماشي .. بس بخصوص امج ما رحتي شفتيه
:- اي رحت ع مود شغله
:- خوش يلا اخذي راحتج
سديته من عنده ورجعت التليفون الجنطتي
فتحت شعري ورجعت لميته لان انفتح
شفت السايق يباوع عليـة بالمرايه بس مبين عليـة التوتر يمكن سمع المكالمه ويه محمد
چان رجال كبير بالعمر
ماحب اصعد ويه شباب كلش نادراً
ابتسمت وحچيت حته اطمنه
:- اني محاميه فـ لتهتم
كام يضحك وجاوبني
:- واني عبالي قاتله
:- لا يابه شيجيبنه ع هل سالفـة محاميه بالدوله
:- عفيـة بنتي
ختمت حديثنه بأبتسامه
مرت ساعـه هيج يلا وصلت دفعت الكروه ونزلت
ضلين اتمشه لان تقريباً مثل الريف
كله زرع واخضر
وصلت للمكان اللي وصفلي اياه الدلال بالضبط
چانت مزرعه وبنصه بيت لون بيجي
نزلت اتمشيت بين الزرع
الجو كلش طيب ولطيف
والمزرعه مابيه شي غير بس كم فاكه مزروعه
لهذا السبب الدلال كلي عمج مبطل العمال وهاي الارباح مبيين حاصد
كلش كبيره وتفتح النفس الهوى لاهف بيـه
هواي عجبتني لان جنت دائماً اتمنى اعيش بهيج مكان وحدي
وصلت للبيت فتحته بالمفتاح
ودخلت جوه
چان امأثث بس ممبين متروك واضح العمال چانو يكعدون بي يستراحون لو يشربون چاي
مثل الكوخ تقريباً بس حلو مرتب
بي غرفه وصاله ومطبخ وحمام مال نفر عبالك
جيت ادخل للغرفـة بس مقفوله
حاولت افتحه بس متنفتح
:- مدكدرين تفتحيه لان المفتاح يمي
انداريت بسرعـه ع مصدر الصوت واتعجبت
ريتال !!!! مرت ابويـه ...
.
.
يتبـع ...
حبايبي لتنسون اتصوتون اذا عجبكم البارت 🤍!