" ကိုယ့်ဘဝမှာ အမေပြီးရင် အချစ်ဆုံးအမျိုးသမီးက မင်းဖြစ်လာလောက်တယ် မွေ့စံ "
သူ့စကားက သိမ်မွေ့စံနွယ်၏နှလုံးသားကို နွေးခနဲဖြစ်သွားစေရုံမက သူမ၏ပါးဖောင်းဖောင်းလေးပေါ်တွင် အပြုံးချိုချိုလေးတစ်ခုပေါ်လာအောင်လည်း ဖန်တီးပေးခဲ့သည်။
" ဖြစ်လာအောင်လုပ်မယ် ... "
သိမ်မွေ့စံနွယ်မှာ နေဟန်မှိုင်းကို အပြုံးလေးနှင့်တစိမ့်စိမ့်ကြည့်နေရင်း သူ၏နဖူးထိပ်က ဆံပင်ကောက်ကောက်လေးများကို သူမလက်ကလေးများဖြင့် ကိုင်တွယ်နေပြီး ဆော့နေခဲ့သည်။
" ကိုကို့ဆံပင်က နဂိုကောက်လေးတွေလား "
" အွန်း နဂိုကောက် ... "
" ကောင်းလိုက်တာ ... မွေ့စံတို့မိန်းကလေးတွေလို ဆိုင်မှာသွားပြီး ဆံပင်ကောက်စရာမလိုဘူး "
" ဆံပင်မကောက်ပါနဲ့ ... ခုတောင် မွေ့စံဆံပင်လေးက ဆေးဆိုးထားလို့နေမယ်၊ ဆံပင်အဖျားတွေတော်တော်နာပြီး နှစ်ခွနေပြီ၊ ဆံပင်ကောက်လိုက်ရင် ဆံသားကောင်းတော့မှာ မဟုတ်ဘူး "
နေဟန်မှိုင်း၏လက်များကလည်း သူမလေး၏ရွှေအိုရောင်ဆံနွယ်လေးများကို တစ်မျှင်ချင်း ယုယစွာ ကြည့်ရှုစစ်ဆေးနေခဲ့သည်။ ထို့နောက် အိစက်နေသော သူ့မွေ့စံပါးပြင်လေးကို အနမ်းပေးခဲ့သည်။
" အိမ်ပြန်သင့်နေပြီ ... လူကြီးတွေစိတ်ပူနေမယ်၊ နှစ်ယောက်သား အဆင်ပြေတဲ့အချိန် ထပ်တွေ့ကြတာပေါ့ "
" အယ် ... ဒါနဲ့ ကိုကို့ဘက်က ကတိတည်ရမယ်နော်၊ ဒီနေ့က ရည်းစားစဖြစ်တဲ့နေ့ဆိုတော့ နောက်ပိုင်းကျရင် မွေ့စံတို့ရဲ့anniversary ဖြစ်လာမှာ ကိုကိုမမေ့ရဘူးနော် "
" အွန်း ... မမေ့ဘူး "
နေဟန်မှိုင်းလည်း အသာတကြည် ခေါင်းငြိမ့်လျက် ပါးချိုင့်အနည်းငယ်ပေါ်သည်အထိ ပြုံးခဲ့သည်။ ထို့နောက် သိမ်မွေ့စံနွယ်မှာ သူမ၏ညာဘက်လက်ကောက်ဝတ်တွင် ပတ်ထားသော ပန်းပွင့်ပုံလေးများပါဝင်သည့် နံ့သာရောင်ခေါင်းစည်ကြိုးလေးကို ဖြုတ်လိုက်ကာ နေဟန်မှိုင်း၏ဘယ်ဘက်လက်တွင် ဝတ်ဆင်ပေးခဲ့သည်။
" မွေ့စံကို အချိန်တ်ိုင်းသတိရနေအောင်လို့ ကိုကို့ကို လက်ဆောင်ပေးထားတာ ... ဒီလက်ပတ်ကို ကိုကိုစိတ်ခံစားချက်မကောင်းတဲ့အခါ၊ အထီးကျန်ဆန်နေတဲ့အချိန်တွေရယ် ပြီးတော့ ကံမကောင်းဘူးလို့ခံစားလာရရင် ဒီခေါင်းစည်းကြိုးလေးကို ကံကောင်းခြင်းလက်ပတ်လေးအနေနဲ့ ပတ်ထားပေးနော် "
နေဟန်မှိုင်းလည်း သူ့လက်က နံ့သာရောင်ခေါင်းစည်းကြိုးလေးကို ပီတိအပြုံးနှင့်ကြည့်နေခဲ့သည်။ သူ့ဘဝတွင် မိဘနှစ်ပါးဆုံးပြီးချိန်၌ မည်သူတစ်ဦးတစ်ယောက်ထံမှ လက်ဆောင်မရရှိခဲ့သည်မှာ နှစ်အတော်ကြာခဲ့လေပြီ။ ထို့ကြောင့် တန်ဖိုးမမြင့်သော ဤလက်ဆောင်ငယ်လေးအား အလွန်သဘောကျမိလျက်။
" အွန်း ... ကိုယ်သေချာသိမ်းထားပြီး လိုအပ်တဲ့အချိန် ထုတ်ဝတ်မယ် "
" ဟုတ်ပြီ၊ ကိုကိုကရော ဘာလက်ဆောင်ပေးမှာလဲ ... ခုပေးစရာမရှိလည်း နောက်ကျပေးရမယ်နော် "
သူမ၏စကားကြောင့် နေဟန်မှိုင်းခေါင်းထဲတွင် ပေါ်လာသည်မှာ သူ၏အမည်းရောင်လက်ကိုင်ပဝါပင်။
" လောလောဆယ် မွေ့စံလေးကိုပေးထားတဲ့လက်ကိုင်ပဝါရှိမယ် "
" အာ ... ဟုတ်သားပဲနော်၊ ကိုကို့လက်ကိုင်ပဝါရှိတာပဲ၊ မွေ့စံအပိုင်ယူသွားပြီ "
" ဒါနဲ့ ... "
နေဟန်မှိုင်းမှာ စကားကိုအဆုံးထိမပြောနိုင်ဘဲ အသက်တစ်ချက်ရှူရှိုက်လိုက်ပြီးနောက် ဖြည်းဖြည်းချင်း လေရှူထုတ်ခဲ့သည်။ ထို့နောက်တွင် သူ၏စကားကို ပြန်ဆက်ပြောဖို့ ပြင်လိုက်သည်။
" ကိုယ့်ကိုရွေးချယ်လိုက်လို့ နောင်တရမိတဲ့အချိန်တွေရှိလာခဲ့ရင် လမ်းခွဲချင်လည်းရတယ်နော် ... မွေ့စံလေးကို တစ်သက်လုံးပျော်အောင်ထားပါ့မယ်တို့၊ အမြဲတမ်းရှိနေပါ့မယ်တို့ ကိုယ်ကတိမပေးနိုင်တာ ခွင့်လွှတ်ပါ၊ ဒါကတော့ ကိုယ်က ဒုစရိုက်ကောင်ဖြစ်နေလို့လေ၊ ဒါပေမဲ့ ကိုယ့်ဘဝထဲကို မွေ့စံဝင်လာတာ နှစ်ကြာလာရင်တော့ ကိုယ်ဒီလောကကနေ ရအောင်ကို ထွက်မှာပါ၊ မွေ့စံအနေနဲ့ ကိုယ်လူကောင်းတစ်ယောက်ဖြစ်လာဖို့ အချိန်တွေတော့ အများကြီးစောင့်ရလိမ့်မယ် "
" အို စောင့်မှာပေါ့၊ ယောကျာ်းလေးတွေက သူတို့တကယ်ချစ်တဲ့မိန်းကလေးတွေအတွက်ဆို သူတို့ဘာသာ သူတို့အသိစိတ်နဲ့ပြောင်းလဲနိုင်ကြတယ် ... လူကောင်းတစ်ယောက်ဖြစ်ဖို့ကိုပေါ့၊ ကိုကိုကသာ အကောင်းဆုံးကြိုးစားမယ်ဆို မွေ့စံ စိတ်ရှည်ရှည်စောင့်ပေးနိုင်တာပေါ့၊ ကိုကို ဒီလိုလူ-တ်တာတွေ မလုပ်ချင်လည်း တခြားကောင်းတဲ့အလုပ်တွေအများကြီးလုပ်လို့ရတာပဲ၊ မွေ့စံလည်း ကူညီပေးနိုင်တယ် "
" အွန်း အွန်း ... လောလောဆယ် လက်ခံထားတဲ့အလုပ်တွေ ၁၀ ခုလောက်ရှိတယ်။ အခြေအနေပေါ်မူတည်ပြီး အချိန်က ၁နှစ်ကျော်လောက်ကြာလိမ့်မယ် "
ထို့နောက် မိနစ်အနည်းငယ်ကြာအောင် စကားအဆက်ပြတ်သွားကြပြီး တိတ်ဆိတ်သွားကြသည်။ နေဟန်မှိုင်းလည်း အချိန်မဆွဲနေတော့ဘဲ ကားနောက်ခန်းကနေ အရင်ထွက်လာကာ ကားတံခါးပိတ်လိုက်သည်။ သိမ်မွေ့စံနွယ် ထိုင်နေသည့်ဘေးဖက်က ကားတံခါးကို လာဖွင့်ပေးကာ သူမကို ကားအပြင်သို့ထွက်စေခဲ့ပြီးနောက် ရှေ့ခန်းမှာ ထိုင်ခိုင်းခဲ့သည်။ သိမ်မွေ့စံနွယ် ထိုင်ခုံမှာထိုင်ခဲ့ပြီးချိန်၌ သူမကို ထိုင်ခုံခါးပတ် ပတ်ပေးခဲ့သည်။ ထို့နောက် သူ၏ဒရိုင်ဘာထိုင်ခုံတွင် ဝင်ထိုင်လိုက်ပြီး ကားတံခါးပိတ်လိုက်သည်။ ကားစက်နိုးပြီးနောက် ...
" ကဲ ... မွေ့စံလေးနေတဲ့နေရာပြော "
သိမ်မွေ့စံနွယ်လည်း အပြုံးလေးနှင့် နေဟန်မှိုင်းကိုကြည့်ခဲ့ပြီးနောက် သူမ၏အိမ်လိပ်စာကိုပြောပြပေးခဲ့သည်။ ကားပေါ်တွင် သိမ်မွေ့စံနွယ်မှာ နေဟန်မှိုင်းကို တောင်းဆိုချင်သည့်ကိစ္စတစ်ခုရှိနေခဲ့ပြီး ပြောသင့်မပြောသင့် စဥ်းစားနေခဲ့ကာ နေဟန်မှိုင်းဘက်ကိုပဲ တစ်ချိန်လုံးကြည့်နေခဲ့သည်။ စိတ်ဖတ်တော်သော နေဟန်မှိုင်းလည်း သိမ်မွေ့စံနွယ်၏မျက်နှာဟန်ပန်အမူအရာကိုကြည့်ကာ ရိပ်မိခဲ့သည်။
" မွေ့စံလေး ... ကိုယ့်ကိုဘာပြောချင်လို့လဲ "
" ကိုကိုအဆင်ပြေမယ်ဆိုရင် မွေ့စံရဲ့အိမ်ကိုခဏလိုက်ခဲ့ပေးလို့ရမလားဟင်၊ မွေ့စံရဲ့ မိသားစုက ကိုကို့ကို ရုပ်မမြင်ဖူးဘဲနဲ့ကျေးဇူးတင်နေခဲ့ကြတာ ... ကိုကို အဆင်ပြေမပြေမသိလို့ "
နေဟန်မှိုင်းလည်း ကားမောင်းနေရင်း သိမ်မွေ့စံနွယ်၏စကားကို မိနစ်အနည်းငယ်ကြာအောင် စဥ်းစားနေခဲ့သည်။
" ခဏလောက်ဆို အဆင်ပြေတယ်မလား "
" အွန်း ပြေတယ်၊ ပြေတယ် "
ဤသို့ဖြင့် သူမနေထိုင်ရာ တိုက်ခန်းရှေ့သို့ မကြာခင်တွင် ရောက်ရှိလာခဲ့ပြီးနောက် သိမ်မွေ့စံနွယ်၏အိမ်သားများမှာ တိုက်ခန်းအောက်တွင် မတ်တပ်ရပ်စောင့်နေခဲ့ကြသည်ကို သူမနှင့်နေဟန်မှိုင်းက မြင်ခဲ့သည်။ သိမ်မွေ့စံနွယ်လည်း ကားတံခါးဖွင့်ကာ ချက်ချင်းဆင်းသွားခဲ့သည်။
" ဟယ် ... ငါ့သမီးရယ်၊ ငါတို့မှာ ညဥ်းကိုဖုန်းတွေတောက်လျှောက်ဆက်နေကြတာ ဆက်မရလို့ ရုံးကိုလိုက်လာကြဖို့ပြင်နေကြတာ "
ဒေါ်လေးဥမ္မာမှာ စိတ်ပူတကြီးပြောခဲ့ရင်း ကားပေါ်ကဆင်းလာသော နေဟန်မှိုင်းကိုမြင်လျှင် မျက်မှောင်ကြုတ်ကာ ကြည့်ခဲ့သည်။
" ဟဲ့ကောင်မလေး ... ညဥ်း ဖယ်ရီနဲ့မပြန်လာဘဲ ဘယ်သူ့ကားနဲ့ပြန်လာရတာတုန်း "
" အေး ... မွေ့စံ၊ ဟိုလူက ဘယ်သူတုန်းဟ "
ဒေါ်လေးဥမ္မာနှင့် ဦးလေးစံကျော်တို့ မောင်နှမနှစ်ယောက်က စပ်စုစွာ မေးခဲ့ကြချိန်၌ ဒေါ်မာမိန်ကလည်း ကြောင်တောင်တောင်ဖြင့် နေဟန်မှိုင်းကို ကြည့်နေခဲ့သည်။
" အယ် ... အဲဒါဦးနေဟန်မှိုင်းလေ၊ ပြောရအုံးမယ်၊ ဦးကသမီးရုံးကို ဆိုင်းမဆင့်ဗုံမဆင့်ရောက်ချလာပြီး သမီးကိုလာတွေ့တာ သိလား "
သိမ်မွေ့စံနွယ်၏ပီရိသောမုသားစကားကို သူတို့လည်း ယုံကြည်သွားကြကာ သုံးယောက်စလုံးလည်း မျက်နှာစပ်ဖြီးဖြီးနှင့် သူတို့လိုရာဆွဲတွေးခဲ့ကြသည်။ နေဟန်မှိုင်းမှာလည်း သူတို့နားကို လမ်းလျှောက်လာခဲ့ကာ ရပ်နေခဲ့သည်။
" ဟယ် ... ငါ့တူကြီးက အရပ်ကြီးရှည်ကြီးပဲကွ၊ ဂေါ်ဇီလာကြီးအတိုင်းပဲ၊ ယောကျာ်းချင်းတောင် ငါမော်ကြည့်နေရတယ်၊ တောင့်လို့ဖြောင့်လို့ပါလား တူကြီးရယ်၊ သိမ်မွေ့စံနွယ်ရဲ့အနာဂတ်ယောကျာ်းလောင်းဖြစ်လာရင် မိုက်တယ်ဟ "
ဒေါ်မာမိန်မှာ ဦးစံကျော်၏လက်ကို ဆတ်ခနဲ ပုတ်ခဲ့သည်။
" ယောကျာ်းရယ် ... ကလေးတွေ မျက်နှာပူအောင်လို့ ပေါက်ကရတွေ မပြောစမ်းနဲ့ "
" ဘာပေါက်ကရလဲနော်၊ အစ်မ မာမိန်ကလည်း ... ကြည့်ပါလား ရုပ်လေးတွေကအစ ဆင်တူလေးတွေလိုလို၊ နေနဲ့လ ရွှေနဲ့မြလို ပနံသင့်ကြတာ၊ ကျွန်မ အစ်ကိုစံကျော်ပြောတာ မမှားဘူး ဟီးဟီးဟီး "
ဒေါ်လေး ဥမ္မာမှာလည်း နေဟန်မှိုင်းကို မော့ကြည့်ခဲ့ပြီး သူ၏လက်မောင်းနှစ်ဖက်ကို ကိုင်တွယ်ကာ ပြုံးပြုံးကြီးကြည့်ခဲ့သည်။
" မင်း ယောကျာ်းစစ်တယ်မလား၊ ယောကျာ်းစစ်ရင် ငါ့တူမလေးကို သဘောကျပြီး စိတ်ဝင်စားမှာပဲ၊ မဟုတ်ရင် မင်းက အထီးအထီးချင်း ကြိုက်နေလို့ပဲ "
ဒေါ်လေးဥမ္မာ၏စကားကြောင့် နေဟန်မှိုင်းမှာ မျက်ခုံးပင့်တက်သွားသလို သိမ်မွေ့စံနွယ်မှာ တခစ်ခစ်ရယ်နေခဲ့သည်။ ဦးလေးစံကျော်မှာလည်း နေဟန်မှိုင်းကို ဖက်ကာ ကျောပြင်ကို ပွတ်သပ်နေခဲ့သည်။ ဒေါ်မာမိန်မှာမူ သူမ၏ယောကျာ်းနှင့်ယောင်းမဖြစ်သူကို ကြည့်ကာ အနည်းငယ်စိတ်ကုန်နေမ်ိသည်။
" အေး ... အဲ့နေဟန်မှိုင်းနဲ့ သိမ်မွေ့စံနွယ်မဖြစ်ဘဲ ... နင်တို့တွေနဲ့ဖြစ်နေဦးမယ်၊ တကယ်ပါပဲ "
စကားကို နေရာမရှောင် ဒဲ့တိုးပြောတတ်သော ဒေါ်မာမိန်၏စကားကြောင့် ဦးစံကျော်နှင့်ဒေါ်ဥမ္မာလည်း ဒေါ်မာမိန်ဆီ အကြည့်များရောက်သွားကြသည်။
" မာမိန်ကလည်း ငါတို့တူသားသမက်လောင်းလေးမဖြစ်လာလည်း သူကငါတို့မွေ့စံလေးရဲ့ကျေးဇူးရှင်ပဲကို ... "
ဒေါ်လေးဥမ္မာက ဒေါ်မာမိန်ကို ပြန်ပြောခဲ့ပြီးနောက် နေဟန်မှိုင်းဘက်ကို ပြန်ကြည့်ခဲ့သည်။
နေရခက်နေသော နေဟန်မှိုင်းကို သိမ်မွေ့စံနွယ်လည်း သနားလာပြီး စကားဖြတ်ပြောဖို့ ပြင်ခဲ့သည်။
" ကဲ ကဲ ... ဒေါ်လေးတို့ အစ်ကိုနေဟန်မှိုင်းလည်း အိမ်ပြန်ရအုံးမယ်လေ၊ မိုးချုပ်နေပြီ "
" ဪ ... အေးပါ၊ အေးပါ၊ နောက်လာလည်နော် သားလေး၊ အိမ်ကိုတစ်ရက်လောက် ထမင်းစားဖိတ်ပါတယ်တော် "
" လာရမယ်နော် ... ငါ့တူကြီး အဟဲ"
ဒေါ်ဥမ္မာနှင့်ဦးစံကျော်တို့ကြောင့် နေဟန်မှိုင်းလည်း ရှက်ရှက်နှင့် မျက်နှာပူနေခဲ့သော်လည်း ကြိုးစားပြီးပြုံးနေခဲ့သည်။
" ဟုတ်ကဲ့ပါ ... ခုတော့ ကျွန်တော့်ကို ခွင့်ပြုပါဦးခင်ဗျာ "
နေဟန်မှ်ိုင်းလည်း ယဥ်ယဥ်ကျေးကျေးခွင့်တောင်းခဲ့ပြီးနောက် သိမ်မွေ့စံနွယ်ဘက်ကိုလှည့်ခဲ့သည်။
" သွားတော့မယ်နော် "
" အွန်း ... တာ့တာနော်၊ ကားကို ဂရုစိုက်မောင်းနော် "
ဤသို့ဖြင့် နေဟန်မှိုင်း၏ကားလည်း တိုက်ခန်းရှေ့မှ ထွက်သွားခဲ့သည်။ ကျန်ရစ်နေသော သိမ်မွေ့စံနွယ်ကို ထိုမိသားစုသုံးယောက်မှ သူတို့၏မျက်လုံးများက ပီတိများဖြင့် ကြည့်နေခဲ့ပြီး သူမအား ' ကောင်မလေး ... သူ့ဦးနဲ့အဆင်ပြေလို့ ပျော်ရွှင်ကျေနပ်နေပြီမလား ' ဟူသော အမူအရာများဖြင့် စကားပြောနေခဲ့ကြသည်။
ထို့နောက် ၄ ယောက်စလုံး တိုက်ခန်းထဲသို့ ပြန်ခဲ့ကြသည်။
ညဘက်အိပ်ခံနီးအချိန်၌ သိမ်မွေ့စံနွယ်မှာ နေဟန်မှိုင်းကို sms ပို့ခဲ့သည်။
" Good Night နော် ကိုကို၊ နောက်ဆိုရင် Viber တို့ ဘာတို့ကနေ စကားပြောကြမယ်နော်၊ ဒီည ပျော်လွန်းလို့ အိပ်ရမှာမဟုတ်ဘူး ... >///< ❤️"
နေဟန်မှိုင်းလည်း ထို sms ကို အပြုံးတစ်ခုနှင့်ဖတ်ခဲ့ပြီးနောက် ....
" ဘာပဲဖြစ်ဖြစ် စောစောအိပ်ပါ၊ အိပ်ရေးပျက်ရင် ပန်ဒါမလေးဖြစ်နေမယ်၊ Good Night, My Girl 🤍 "
• ────── ✾ ────── •