#أبي_لم_يكن_إنساناً
مستقبل الرواية الجزء الأول..
للكاتبة لبنى الموسوي
نتخبط في هذه الحياة كما الماء في قاعه...
تارةً نتقدم
وتارةً نعود الى الخلف بـ قوة
لـ نرى الماضي الذي تلونت جدرانه بـ بشاعة الذكريات
ذاك الأب العقيم الذي انجبنا من اجنحة الملائكة
الحفي الذي ما صار ولا ارتفع إلا بمشيئة الله وقدرته
الجاحد لـ فضل ربه
البخيل بـ عطاء الإنسانية لـ لحمهِ ودمه
ذاك الذي رغم رحيله لازالت افعاله مُخلده تأبى الرحيل معه
ثم نعود الى الحاضر مرة أخرى...
ماذا بهِ ؟!!
هل السعادة فقط تنتظرنا لتمحي ألام الماضي
أم أن للأقدار المتجسدة بالبشر المحيطين بنا رأي أخر
طيبة.. اليوم أول يوم بـ شهري وباچر أول امتحان من الأمتحانات النهائية
هاي أخر سنة
خلصت وراح ينزاح وياها الهَم من على صدري واخيراً
گاعدة ومگابلة الملازم دگ جهازي رسائل
فتحتها البنات بالمجموعة يحچن
داسوي كتم دزت زينة تعالي وين رايحة مشتاقين ولچ
سويت رد على رسالتها زينة عندي إمتحان
زينة.. اييع لتذكريني
صفاء.. اي والله واخيراً تخرجنا الله ليرجع ذنيچ الأيام
بتول.. اني عكسكم لو تدرون شگد داشتاق للدراسة
طيبة.. بنات لازم اروح
احچن براحتچن بعدين عود نتواصل يلا باي من يمي
داطلع شفت رحمة دخلت للمجموعة
رحت على محادثتها دزيت روحي ادرسي يولي هسة مو وكت اللغاوي
💌 هلو طيبة شلونچ
💌 بخير حبيبتي شو گالبة المود خير صاير شي وياچ
💌 لا بس مالي واهس اراجع المادة وضايجة
💌 رحمة صدگ تحچين باچر امتحانچ اخلقي للواهس
💌 شلون حاچيني
تدرين اليوم عمتچ سناء اجت مضروبة وزعلانة بعدها محطت رجلها بالبيت گبت العيطة والمشاكل هنا
💌 يبوووو هاي شزعلها هسة
زين ويامن دتتعارك خو مو وياچ احچي حتى اتصرف
💌 لا ويا ماما وبيبي وعمة خديجة
💌 اهووو شلون سالفة تعبانة لعد صالح وين عنها ها
💌 شيسويلها تظل عمته
لا عبالچ تتعارك گدامهم انتظرت عمي وصالح يطلعون وبدت تغرد تگول كلچن **** ادري تدعن علية حتى اتطلگ من هيچ مدارتاح بـ حياتي ابد
💌 ههههههههه
لا وهي الصادقة من سمها ومشاكلها مترتاح احنة شكو
💌 اجة صالح
خليني اروح ليشوفني لازمة الموبايل ويسويلي سالفة
💌 سلمي علي وعليهم هواي
💌 يوصل وانتِ هم سلمي على بيبي وهمام وبوسيلي نسور
بعدني مطالعة من البرنامج دخل همام
- هاااا شنو هاي
- شبيك والله توني لزمته چنت ادرس بس حچيت ويا رحمة لأن ضايجة خطية مدتگدر تدرس
- خو ما بيها شي
- لا بس عمتي سناء زعلانة يمهم وتدري بعد بـ مشاكلها فـ خطية ضايجة على ضوجة عماتي
- الله يهديهم
ديلا عوفي كل شي وكملي امتحانچ لتخلينا نخرب...
- شنو متريد عشى
- اكلت ويا جماعتي ما اريد غير بس تنزلين عينچ على الملزمة ومترفعيها إلا وانتِ خاتمة المادة
- ان شاء الله حبيبي
بس حچيتها بدل ملابسه ونزل يم الحجية ونسرين
عدت الأمتحانات بـ خوف فضيع
يوميا اگول اليوم اجيب وتروح علية باقي الأمتحانات بس الحمد لله بالنهاية يعدي على خير وسلامة
رحمة مو كلش چانت تجاوب
وجودها بنص المشاكل أثر عليها بشكل سلبي
حاولت اقنع صالح يجيبها يمي لكن بكل مرة اطلب منه يقابل طلبي برفض قاطع أخر شي تركته براحته
الي اسبوع مخلصة الأمتحانات وماكو ريحة طلوگة
بعد يومين ويخلص شهري
للظهر اجة همام مستلملي النتيجة عادي چنت متوقعة اطلع من الاوائل لأن هواي تعبت لذلك مفرحت بالي كله يم ولادتي وبس
اليوم بعد الغدة اخذت نسرين الغرفتها
معلمتها تنام الظهر
بس نومتها صعدت چان همام متمدد يباوع أخبار اهو ما مليت شو كلها نفس الضيم شيعجبك بهالسوالف
- تعالي شووو... واشرلي على صدره
رحت بس خليت راسي بـ حضنه ما ادري دموعي منين صارت تنزل
تبللت فانيلته حس علية
رفع راسي مستغرب شبيچ حبيبي منو الزعل هالعيون الحلوة
- خايفة
- ما عاش الخوف اذا مسچ بس من شنو بالضبط ؟!!
- بعد يومين ويخلص شهري
خاف لا اجيب عملية ما اريد والله اخاف من العمليات شسوي حاچيني
- تردين اخذچ للدكتورة العصر
- مو رحتلها يوم 15 بـ شهري مگالت بعد راجعي يعني اكيد لو اروح الها هسة تحولني ع العمليات گبل
- هاي عود انتِ الدكتورة
شنو تحولچ گبل قابل الشغلة لعبة اكيد اكو حلول قبل العملية لأن هيَّ الحل الأخير بس گولي يا الله
- واذا عملية
- عملية ولا يصير بالطفل شي ليش خايفة هالگد عادي حالها حال الولادة الطبيعية كله وجع واحد
- خوش تشجيع عاشت إيدك
- ههههههه عمري انتِ تصير سوالف ظلي سباعية شنو العملية وتخوفچ
صفنت بـ وجهه وسرحت بـ خيالي لأيام الطفولة...
عود شلون چنت اتحمل كل ذاك التعذيب ؟!!
شو رزاق ما خلة شي مسوا بية لو هسة اختلف الوضع بعد ملگيت الأمان بـ همام فـ صرت اخاف من ابسط الأشياء
- وين صافنة طيبة
- يعني انتَ دتشوفني سباعية ؟؟
- اي طبعاً
- شلون وضح
- متخافين من شي ورغم كل الظروف صرتي ووصلتي شلون تصير السباعية بعد لو مو هيچ
- لأن تحملت تعذيب أبوية قصدك
- استغفر الله رب العالمين واتوب اليه منو جاب سيرته هسة
- بس هوَ هذا قصدك ليش دتنكر
- ما ناكر وأي هذا قصدي بس مو معناها تذكرين رزاق
- ليش اني اگدر انسى حتى اتذكره !!!
هوَ هنا همام ودگيت على راسي حيل سحب إيدي باس باطنها وابتسم
- خوف الولادة ضرب على عقلچ عادي حبيبي معذورة
- شتگول همام هسة شصاير بي
- منو
- أبوية منو يعني
- طيبة هاي شبيچ ليش تشترين المغثة النفسچ شراية
- انتَ جاوبني
ليش افكر بي رغم ما شفت منه إلا الأذية
ليش اخاف علي ليتعذب
وارجع اتذكر عمي وجدي وأمي ورحيم واتمنى لو اگدر اوصل اله واعذبه بـ نفسي هذا مرض لو شنو ؟!!
- لا هاي فطرة بالإنسان
يعني مهما صار يظل أبوچ للأسف والدم اله حوبه حتى لو چان نگس ويلا سدي سيرته كافي ترى تعبت
حچاها وگام قفل الباب التفت علية بـ ابتسامة
باوعتلة بطرف عيني
يربي اني وين وهذا وين والله فايخ ردت أكوم سحب إيدي رجعني للچرباية همام عفية تعبانه
- نسيتي بـ ولادتچ ذيچ شلون قدمتلچ المساعدة
- ههههههههه
- ها شو تضحكين لو ناوية تنكرين فضلي
- مشكور عيني ما قصرت
- شعبالچ لعد كريم اني
ومن كرمي راح اعيد عليچ عرض المساعدة مرة ثانية حتى لتگولين بس اني اتعب بـ اطفالي
- وهاي الشغلة هم تتعب !!!
- وداعتچ تتعب
من تزوجنا لسه ظهري ما احس بي كله من وراچ يولي
- هههههههه اني شكو انتَ متگعد راحة لا تكل ولا تمل
- راح تظلين تلغين !!!
حچاها وسحبني
لليل بعد ما الكل ناموا لملمت المطبخ وصعدت
توني متمددة أخذ راسي الصدره ها بشري ماكو اوجاع
- لا
- هاي شنو خاف ما اشتغلنا عدل
- همام ترى هالسوالف تساعد ع الولادة واني ما عندي ولادة اصلاً فـ لتتأمل
- تعالي نجرب بعد شـ خسرانين قابل
- شو انتَ اخذك الواهس
- علمودچ شبيچ
- اااااااخ صدگ لو گالوا مصائب قومٍ عند قومٍ فوائدُ
- والفائدة اذا ضفتيها ع الفائدة يصير الربح ضعف مو حبيبي.. وغمزلي
- همام لتحاول تعبانة حتى ما بية اسبح
- اني اسبحچ
- متمل
- منچ اكيد لا مخبل وأمل
- همام گتلك لااا يعني لاااا شو دوخر خلي انام تعبتني
عود گلت لا
تالي غصباً علية گمت للحمام اسبح
وين اگدر علي الـ براسه يسوي غصباً على راسي وراس رزاق بـ گبره
لليل نايمة حسيت بـ وجع فرحت ولا عبالك ولادة
ثواني واختفى
رجعت نمت للصبح گعدت ماكو أي شي شنو السالفة مو ببنتي ذيچ للصبح جبت وين راح الوجع لعد
للعصر حتى حركة الطفل اختفت
حچيت ويا همام اخذني للدكتورة گالت اكو عندچ ولادة بس تتأخرين شوية
انطتني تحاميل اخذتها ورى ساعة بدت عندي الألام
الليل كله اطلگ
اخذوني للمستشفى نفس الكلام بعد هواي
لثاني يوم الظهر طلعت روحي يلا اجة ابني للدنيا ألف الحمد لله جبت طبيعي بس ولادتي چانت صعبة
ظليت اسبوع يم بيت جدي
وراها اجه همام اخذني حتى ما خلاني اكمل للعاشر
ولأن ما عندي دوام گدرت اسيطر ع الوضع نوعاً ما ع الأقل گاعدة بالبيت مو سهر ودوام بـ وقت واحد
بعد أربع اشهر تأزمت اوضاع البلد وبدت المظاهرات
بـ هالأثناء عمتي سناء انفصلت عن زوجها
وتأزم وضع بيت جدي ويا وضع العراق بـ انفصالها هذا
بديت احضر للماستر
هو اني گلت بسم الله واشتغلت رحمة الله
اجانة فايروس كورونا ما اعرف منين وگعدنا بالبيت ما لحگت اتهنى لا بـ تخرجي ولا بـ ولادتي
اليوم گاعدة ويا الحجية بالصالة وابني بـ حضنها
منتظرة الشوربة تبرد حتى اوكله
اجت نسرين ماما رسميلي الوجه والله ما اعرف ارسمه يطلع اعوج عبالك راس بتيتة حتى شوفي
- وكت رسم هسة اني مو گتلچ ادرسي
- درست والله تردين تشوفين
- لا روحي الغرفتچ راجعي الدرس بين ما يطلع بابا من الحمام وهو يرسملچ
- ليش مو انتِ
- اريد اوكل اخوچ ما فارغة هسة
الحجية.. جيبي اكله يمة وروحي الـ بنيتچ
حرام لتكسرين خاطرها طلبتچ لتردينها گومي بنيتي
رحت جبت الشوربة للحجية وطبيت بـ غرفة نسرين
ظليت ارسم وياها
دقايق وسمعت حامد صرخ طفرت من مكاني وتخبلت من شفته واگع يم رجل الحجية وهي تدگ وتلطم
- شلته ابوس بي اسم الله ماما اسم الله
- والله يمة ما سيطرت علي داوكله وفلت من إيدي ما اعرف شلون عمت عيني كون
- اهدي بيبي مبي شي هاي سكت لتلومين روحچ شي وراد يصير
- كله من وراية طفل ما بية خير اداري المن عايشة لعد
- بس حچتها رحت ع السريع بستها من راسها انتِ كل الخير بيبي اترجاچ لتحچين هيچ وتزعليني منچ
نزل همام يركض على صوتنا صاح شبي حامد
اشرتله بـ عيني اسكت
التفتت على الحجية شافها تبچي والأكل بـ إيدها افتهم السالفة
اخذه مني شاورته وگع من حضنها وهيَّ تطعمه
تقرب منها
باسها ورجع حامد الـ حضنها يلا يمة وكلي خطية لسه جوعان ما لحگ يشبع
- خلي طيبة توكله لا يرجع يوگع ما اگدر علي اني
- لا انتِ توكلي واني الزمه الچ يلا يمة شوفي يباوعلچ
مسحت دموعها ورجعت توكله
اندگ الجرس
راد همام يگوم گتله خليك يمهم اني رايحة اشوف منو من ورى الباب يجوز جيرانة رجعت الخلاط
سحبت حجابي وطلعت صحت منو اجاني صوت مخلد
فتحتها بسرعة دخلت بتول كالبة الوجه
انطاني يزن وذب الجنطة دار وجهه ديروح گتله تفضل رد لا خليها على غير مرة تعبان كلش
- سديت الباب والتفتت عليها شصاير ولچ
- تعاركنا
- اهوووو شكو بعد شلون بـ مشاكلكم متخلص يعني !!
- اني شعلية هيَّ أمه شادة وياية قابل غريبة السالفة
- ردت احچي طلع همام
- شصاير
- هيچ حبيبي بـس بتـول خطية ضايجة وجابها مخلد بلكي تغير جو يمنا
- لا مو ضايجة تعاركت وياهم واجيت زعلانة
حچتها وفاتت من يم همام طبت جوة حتى أبنها عافته
- سحبته من إيده وابتسمت تعال نطب نلعب بالقطار
دخلت للصالة بتول گاعدة تشكيهم للحجية وتبچي
اخذت أبنها يم نسرين ورجعت
چان همام ديرزل بيها گعدت بصفه وضغطت على إيده حيل
- طيبة وخري لتسكتيني
- هسة اني شگلت قابل بس مهما كانت المشكلة ملازم نحلها بالصياح هدي نفسك شوية وخل نفتهم شصاير
همام.. احچي يلا نسمع
بس على الله يطلع الموضوع يسوة زعلتچ بتول خانم
بتول.. عمو تعبت والله تعبت
اسمي عازلة بس بالحقيقة همَ گاعدين بنص بيتي طول النهار
نامي بفلان ساعة اگعدي بفلتان ساعة
اذا طلع رجلچ للدوام مو ترجعين للنوم لااا ظلي گاعدة كملي شغلچ للظهر يلا تنامين
اليوم الغدة هيچ..
هذا اي هذا لا لأن مخلد ميرغب بي
التمن لتطبگي مخلد يحب الحباية تكون واگفة
أبنچ لا يلعب بالألعاب دماغة يتعب خل يستثمر طاقته بالدراسة
لتسبحين الصبح تستبردين
لتسبحين الغروب مو زين يتلبسچ جني
لتسبحين العصر وتعوفين أبنچ وحده قدرات الدنيا ما تنحزر
لترحين البيت أهلچ بيوم عطلة رجلچ
لا كل شوية تگولين مخلد طلعني مخلد ضايجة الرجال ميحب المرة النقناقية
بعد عمو تريد اعددلك لو هالشي كافي
وكله كوم
ويوميا تريدني انزل اشتغل شغل بيتها يلا ابدي ببيتي كوم ثاني ما ادري منو گلها اني رجل آلي !!!
همام.. بس عمي هالسوالف تافهة متسوة المشاكل
بتول.. شنو متسوووة شنو
والله تعبت بناتها كل يومين والثاني جايات
وتعالي يا بتول شوفيهن شنو مشتهيات حتى تسويلهن
اني معايشة وياهم
اني من اخذت مخلد اخذته على اساس بيت وحدي
همام.. لتصيرين أنانية
تقبلين طيبة تتعاجز من بيبيتچ وتتعامل وياها بتعالي
بتول.. شجاب هذا على ذاك
ليش بيبيتي مثل أم مخلد بعدين اني ممقصرة والله يا عمو ممقصرة واخدمها بـ عيني بس الأستغلال محلو
بعدين اني اريد خصوصية
هسة ما اگدر احچيلك بس والله العظيم كل خصوصية ويا رجلي ما عندي تتدخل حتى بـ نومتنا
لا وفوگاها من ينزل يشوفهم تلفق عليه كلام مصاير
عاد الحمد لله يعرفني
بالأول چان يسأل انـتِ حاچية هيچ انـتِ مسوية هيچ تالي ظل يسكت لأن عرفها تدور مشاكل وياية
همام.. بعد شكو
اذا رجلچ وياچ شلچ بـ المشاكل يا عيني دگولي يا الله
بتول.. عمو تعبتتتتتتت
ليش مدتفهمني اني بتول المدللة يمكم هيچ يصير بية
والله لو خدامة بنگالية هم چان صاحت ارحموني
بـ عز شبابي وعظامي كلها توجعني
خو اذا تمرضت گبل تصعدلي هاچ ابلعي حباية وگومي اشتغلي النوم يزيد المرض اني هيچ چنت ويا عيالي
أخر شي اليوم تعاركت وياها
قبل ليجي مخلد چنت امسح بالصالة ما احس إلا الباب انفتح وطبت كالعادة بدون لا احم ولا دستور
هاي شنو توچ دتنظفين
گلتلها اي شسوي الصبح چنت اشتغل جوة للظهر تعبت ظهري وبطني وجعني وما گدرت حتى اسوي الغدة
هي سمعت ممسوية أكل لو تخبلت علية
شنو يعني أبني ما تغدة
بقيتي الرجال جوعان واكيد من أنانيتچ مخليتي ينزل ياكل يم أمه مو اعرف بسوالف الچناين
واني والله عمو گتله انزل أكل يم أهلك ما قبل
گال شلون اعوفچ تعبانة واروح
تالي گام سوة مخلمة اكلنا ونام ساعتين بعدين اتصلت بي انتَ وطلع
- وتالي شصار
- ماكو اني مريضة وروحي بخشمي صيحت عليها بلا قصد گلتلها كافي مشاكل شنو متتعبين
شو مشفتني مني إلا كل خير شجاچ علية اللي يسمعچ يگول ماكو هيچ راعية مصايب وياكم من تزوجت لليوم
كلمة منها كلمة مني كبرت المشكلة
طب مخلد سمعنا نتعارك
هيَّ ظلت تبچي وتصيح هاي تاليتي أنهان بـنص بيتك وانتَ تسمع قبل ليحچي گتله وديني البيت جدي
هوَ هم ما قصر گبل گال جهزي نفسچ
والله ما ارجع بعد
لو يعزلي بعيد عنهم لو كلمن يروح بـ طريقه شكو تزوج اذا أمه هيچ أحد گله بنات الناس خدامات الهم
الحجية.. بيبي حرام عليچ
انتِ يجوز تتحسسين زايد لأن اني گاعدة ويا المرة
شحلاتها وعين الله عليها بس اللسان ينگط عسل وروح جدچ الغالي
- هاي يم الناس بيبي
بس من توصل يم بتول تنگلب السلطانة الأم وحضرتي الجارية هيام لازم ما اگول غير سمعاً وطاعة
طيبة.. شبيها هيام مو تالي صبرها صارت سلطانة الكل
بتول.. تسكتين لا اطلع ضيمي بيچ والنبي محمدددددد
طيبة.. هههههههه لا يلا سكتت
بس اذا هيَّ حبابة ويا الكل شجاها وياچ هيچ غير اكو سبب
بتول.. تحب مخلد وتغار علي
طيبة.. شنووو
بتول.. والله تحبه وتغار علي بحيث هوَ يعرفها من ننزل يمهم حتى كلمة ميحچي وياية لأن عينها علينا
طيبة.. شنو هاي دخيلك ربي خاف متوهمة ولچ
بتول.. لا حبيبتي ممتوهمة
اصلاً هيَّ فد مرة بنفسها اعترفت الية
گالت عود من يكبر أبنچ وتجي وحدة تاخذة منچ على الحاضر ساعتها تحسين شديصير بية بسببچ
طيبة.. يا عيني هاي حالتها كلش
بتول.. شفتوا حتى تعذروني بس الله ينطي جوز للما عنده سنون مثل هاي تلوگ الها چنة مثل الاء
بس حچتها حديت نظرتي عليها
باوعت على همام وابتسمت بس شوفها عمو حتى من سيرتها تغار اويلي
طيبة.. بلا سخافة بتووول
بتول.. يلا يابة سكتنا بـس شنو مسوين عشى جوعانة
طيبة.. مسويت اليوم مريضة
بتول.. انتِ غير متستحين
شنو عايفة عمي وبيبيتي بلا عشى وشي اكيد منعتيهم يطلبون من برة سوالف الچنانين اعرفهن
طيبة.. هههههههه
استلم راح تطبق دروس عمتها بـ راسي
يلا عيني بلا مطرود جنطتچ بـ إيدچ وفوتي بسرعة منا تكسي 5 الأف البيتچ عمچ مخلص بانزينات والله
- ضحكت وتمددت ع التخم
الملعب ملعبنا بس طوبتكم الكم اخذوها وبلا مطرود
- حچتها وأشرت على همام
سحب المخدة ضربها على راسها حيل هاي علية ولچ
عفتهم يتشاقون ورحت سويتلهم العشى
بيومها نمت يمها جوة
ظلت الليل كله تسولفلي على عمتها صدگ ضجت عليها بتول بس لسان لأن گلبها بلون البلور متستاهل كل هالمشاكل
ثاني يوم الصبح گعدت كالعادة جهزت ملابس همام
گعدته يسبح ونزلت اسوي الريوگ
داجهز بالصينية اندگ الجرس طلعت مـن بعيد صحت منو اجاني صوت عمو محمود ركضت فتحت الباب
باوعت الـ خديجة تبچي والجنطة بـ إيدها لا هاي هيَّ
رفع إيده سلم وراح
ما حچت شي اخذت جهالها ودخلت صار همام گدامنا توة دينزل من الدرج باوع عليها مستغرب
- ها شكو !!!
- خوية اني بعد ما اتحمل
- استغفر الله رب العالمين واتوب اليه انتن شصايرلچن
- منو احنه شتقصد ؟!!
- طبي عيني بت أخوچ عود تسولفلچ حتى من طريقچ تواسيها وهيَّ هم بلكي تواسيچ اني تأخرت
حچاها وراح للمطبخ
طبت خديجة الغرفة الحجية رحت ورى
ياكل والوجه مگلوب تقربت گعدت يمه شنو هاي همام والله عيب لو شافتك هسه عمة شتگول مستثقلني
- مو مسألة مستثقل بس المشاكل تافهة
اگص إيدي اذا ما چانت عمتچ ورى زعلتها الرجال شنو ذنبه
- ترى هيَّ هم حقها
عمتي واعرفها متنجرع والله حتى الزلم مديتحملوها
- وشلون يعني اجبر مخلد يعوف أمه
لو مثلاً اخلي عمچ يطرد أخته من البيت لأن متتعاشر
- اكيد لا
بس ادري بيك گدها وراح تحل الموضوع بدون مشاكل
- يلا تأخرت رايدة شي
- اي
- شنو گولي
- اريد تجيبلي اللابتوب الوعدتني بي لا والله ازعل يم أهلي مو عبالك ما اسويها ظلت علية قابل
- هههههههه
لا يابة كل شي ولا زعلچ شعندي غيرچ
حچاها وباس خدي تتدللين بنهاية هالشهر ان شاء الله يصير يمچ بعد تأمرين بشي
- هههههه لا يعمري سلامتك
- احبچ
- اموت عليك يلا روح لتتأخر وحاول تحچي ويا مخلد
هز راسه وطلع...
للظهر اجة مخلد ويا تغدوا وگعدوا يسولفون
گدر همام يقنع بتول ترجع بس ما اتصور هذا حل اكيد شهر شهرين وترجع بيناتهم المشاكل من جديد
ظلت خديجة يمنا أكثر من اسبوع
اليوم گعدت ناوية اروح البيت جدي بس ضروري العب عليها لأن خطية عمي تعب وهوَ يتوسلها ترجع
لملمت البيت ودخلت اسبح...
من طلعت اتصلت بـ سمير حتى يجي علينا
باوعت الخديجة گاعدة يم الحجية تسألها شـ مشتهية حتى اسويلچ
- ضحكت وتقربت منها وين عيني يا مشتهى هذا
- ها شبيچ
- اطبخي الـ جهالچ لأن بيبي راح تجي وياية اليوم وها أخوچ هم لتحسبين حسابه يتغدة يم بيت جدي
- ليش شكو هالمرة
- بيبي مشتاقتلهم وبت أختها جاية اليوم من الموصل حتى يتعرفون عليها وتتعرف عليهم
- ومنو هاي بت أختها أول مرة اسمع بـ سيرتها
- بت خالة رجلچ معقولة متعرفيها !!
- لا والله ما اعرفها
- هااااا يجوز علمود ذاك الموضوع محد حچالچ عليها
- يا موضوع
- لا هيچ مو يمچ سالفة قديمة
- طيبةةة
- شبيچ والله سالفة قديمة يجوز عمو ميقبل احچيلچ
باوعت عليها صفنت بـ وجهي
گوة لزمت نفسي ما اريد اضحك واخرب كل شي
ما احس إلا گمزت سحبتني من إيدي للغرفة ها شبيچ
- منو هاي وليش عمچ ميقبل تحچيلي عنها ؟!!
- ها مو شسمة
- شسمة طيبة شسمةةةة
- مو هاي چانت يعني تحبه لا اقصد هو يحبها مو هيَّ
- محمود يحبها !!!
- اووووو يموت عليها اصلاً بس للأسف هيَّ ولا حبته
- اي وشنو بعد
- حب طفولته يعني ومگدر يحصل عليها لأن تزوجت
- يعني متزوجة
- لا استشهد رجلها بعد سنتين من زواجهم وهمْ رجع خطبها عمي بس مقبلت والله ما اريد اظلمك وياية
عود لأن تزوج وراها مباشرتاً مرادت تخرب حياته
بس والله السالفة هسة خطرة
انتِ متريدي ومُصرة تعوفي وهيَّ حب طفولته واليوم يرجع يشوفها بعد كل هالسنين فكري عمة فكري
- شنو بعده يحبها صخام بـ وجهي
- اكيد ليش حب الطفولة شـ يمحي اصلاً على گد حبه الها سمى بنته على أسمها
- شنو اسمها زينة !!!
- هزيت راسي أي عمة أسمها زينة
- بسيطة محمود بسيطة اني الكككك اليوووم
- ها هااا خير ترى هالشي قبل ميعرفچ ليش دتحاسبي
- لا حبيبتي لا قبل ولا بعد بس فهميني شوكت قررت تجي البغداد
- قبل يومين
- ها اها بينت الشغلة والأفندي اله يومين غاط ما كلف نفسه يرفع التلفون علية ويگول شـ محتاجين
- عززززة معقولة لأن عرف راح تجي نساكم
- اي اكيد خلاله الجو غير
- وشناوية
- اني اعلمه عود عباله خديجة غبية مثل قبل وتسكت اذا انخانت ولا والله اليوم احرگ البيت علي
حچتها وراحت تلم ملابسها بـ عصبية
صعدت الـ غرفتي اركض اتصلت بـ عمي شوية ورد ها وينك
- انتِ وينچ شدتسوين متگوليلي
- اسمع عمة راح تجي وياية اريدك من ترجع من الدوام تجي كاشخ على أخر حبة ما اوصيك بعد فدوة
- ولچ يا كشخة هاي واني بالدوام
- اشتري ميرادلها سؤال ولتخرب علية الشغل
- شلون قنعتيها
- سالفة طويلة بعدين احچيلك المهم اكشخ واتعطر ما اريدك تطب للبيت إلا وانتَ عريس خوش عمو
- مشايل فلوس ولچ
- تداين استلف اتصرف شنو السالفة قابل اعلمك
- هاي تاليتك محمود شورك بـ إيد الزعاطيط
- گتلي زعاطيط !!!
خوش لعد روح خل الكبار يحلولك سالفتك الزعطوطة متفيد
- لا يعمي اتشاقى وياچ شبيچ متتحملين
- ماكو قفلت
- بعد عمچ والله تبهذلت لتذليني عاد فوگ ذلة خديجة
- كسرت گلبي لذلك راح اعديها بس هالمرة هااا
سمعت خديجة صاحتني رجعت وصيته ونزلت اركض
وصلنا البيت جدي فرحت بيبي من شافت الحجية
التهيت ويا البنات للظهر
قريب الصلاة اشرتلي خديجة عرفت راح تسألني عليها وفعلاً سألت وينها شو لسة ما اجت
- الطريق طويل عمة هسة متشوفيها إلا وصلت
- هااا
- يلا دگومي للصلاة قبل ليجون الولد حتى نصب الغدة
بس حچيتها گامت
صلينا وبدن البنات يجهزن للغدة
خديجة خطية من القهر ما تحركت مـن مكانها اليگول صدگ خطار وعيونها ع الباب مدري المن تنتظر..
قريب الثنتين طب عمو محمود للبيت
باوعت علي مبتسمة
كاشخ كشخة ما كشخها حتى بعرسه التفتت وراية يبو خديجة عيونها نطت ليبرة حسيتها راح تنفجر
تقرب سلم على الحجية وباوع عليها مبتسم
گلها شلونچ
ردت بنترة من الله بخير ودارت وجها ع الحايط خطية انصدم ظل صافن بوجهي يسأل بعيونه شبيها
اشرتله ماكو شي وگعدت بصفها
التهى يلعب ويا فرح
تقربت منها بـ همس شوفي الله عليچ كاشخ ومتعطر لا وعود راجع من الدوام ليش برأيچ هوَ دوم هيچ
- لا اصلاً ميهتم للملابس
- يعني أول مرة يرجع من الدوام بهذا المنظر
- اي واكيد علمودها غير راح يقابل حبيبة الگلب عباله خديجة ثولة وراح تظل نايمة على أذنها
- شراح تسوين بس لا تظلين ساكته
- اكيد لاااا هسة راح اتغدة بي قبل ليتعشى بية خو ما انتظرها تجي ويظلون يتبادلون النظرات گدامي
حچتها وگامت سحبته من يم بنته للدرج
گمت سريع صرت وراها
سمعتها صاحت بي على شنو كل هالتعديلات والترتيب بس لا علمود قدوم حبيبة الگلب البيتك
- شبيچ خديجة !!!
- جاوب محمود ليش لابس ومعدل نفسك
- حلوة هاي والله شتريدين اتصلخ وامشي حتى العالم تگول أبو سعد تخبل على أخر عمره
- لا حبيبي گول داستعد علمود جية زينة
- زينة شيجيبها اليوم
- محمود لتغشم نفسك ترى عرفت كل شي متفيد بعد هالسوالف
- صحت من بعيد
اسفة عمو اني حچيت الها عن زينة بت خالتك
شسوي هيَّ لحت إلا تعرف قصتكم واضطريت اسولف
اثناء الكلام چانت عيونها علية
ابتسم بـ استغراب
بس دارت وجها علي غمزتله هز راسه وحك لحيته حيل
- يلا منتظرة جوابك شو ساكت
- شتريديني اگول
- معناها صح انتَ كاشخ ومعدل نفسك لأن هيَّ دتجي
- انتِ مو قبل يومين گلتي مالي رجعة على هذا البيت
- اي گلت
- واني ما اگدر اطلع واعوف المسؤولية على صالح
- يعني ؟!!!
- ما ادري انتِ شتگولين شنو اليعني بنظرچ
- يعني تريدنا ننفصل مووووو
أي ليش لا
حتى يخلالك الجو ويا حبيبة طفولتك زلم مالكم أمان احلف عليكم واحدكم عينه ميمليها غير التراب
- لا مو اني الرايد الأنفصال انتِ التردي لتلوفيها علية
- ليش گتلك طلگني وما ادري
- مو إلا تگولين تصرفاتچ واضحة انتِ طلعتي منا محد طردچ واجيت توسلتچ ترجعين ما قبلتي صح لو لا
- أختك متتعاشر تعرف شنو يعني متتعاشر
- ليش انتِ متزوجتني لو متزوجة أختي
- والله ما ادري گول النفسك هالحچي هوَ اني اشوفها ما اشوفك
- استلم بلا اشتغلت رحمة الله
- محمود
- عيوني أمري
- بعدك تحبها احچي الصراحة ترى تصرفاتك فاضحتك
- منو
- زينة
- غير اموت عليها شنو هالسؤال فتحت عينها بحضني
- شنو شنوووو
- يلا رايح فشلة العالم وحدهم
- راد يتحرك ضربته على كتفه حيل تعال لا والله ابتلي بيك هسة تفسرلي شنو هالكلام السمعته منك
- يا كلام
- شنو اموت عليها شنو فتحت عينها بـ حضني
- اي غير بنتي شلون ما احبها
- يبوووووو راح تجلطني لتلعب بـ أعصابي حرام عليك
- قبل كل شي عندي سؤال اذا جاوبتي علي بـ صراحة ساعتها شتردين تعرفين اني حاضر
- گول
- اذا گتلچ احبها راح تعوفيني
- اي اكيد شنو قابل شايفني بلا كرامة حتى اظل وياك وانتَ تحب غيري بس مو عبالك انسحب بهدوء
- لعد شتسوين
- احرگك واحرگها هنا بـ مكانكم قبل لا اروح
وعود اجتمعوا بـ جهنم ان شاء الله ناركم تاكل حطبكم
- هههههههههههههههه
- لتضحك واحچي مو سمعت الجواب ترى گلبي خلص
- مو بعد ما كملت سؤالي ليش مستعجلة
- شكو بعد
- واذا گتلچ ما احب غيرچ
ولا اريد غيرچ
ولا اكو مرة تحلى بـ عيني غير خديجة
بعد كل هالكلام همْ ينطيچ گلبچ تعوفيني وترحين !!
- نزلت راسها وابتسامتها وصلتلي بدون ما اشوفها
- لا
- شنو لا
- ما اعوفك ولا اگدر اعوفك بـس چنت احاول اضغط عليك لأن وجود أختك تعبني كلش
- تحمليها الخاطري والخاطر أمي
- ان شاء الله
- يلا جوعان ما صار الغدة
- اي صار بـس ماكو گعدة ويانة تاخذ صينيتك وتروح للغرفة
- ليش يابة ؟!!
- لا والله تريد تگابلها وتگعد گدامي اذبحكم غيرررر
- صايرة مجرمة حبيبتي ساعة تحرگين ساعة تذبحين
- اي مجرمة
رجلي ومن حقي اسوي أي شي علمود احافظ علي
- ههههههههه شبيچ انتِ صدگتي
لا عندي بت خالة ولا اكو خطار اليوم غير بيت أهلچ
- شلون يعني ؟!!!
- معلية لتباوعيلي هيچ هاي سوالف بت رزاق ذيچ وراچ وروحي حاسبيها منچ عرفت السالفة مو منها
طيبة.. هيَّ هاي جزاتي لأن ساعدتك تبيعني تالي خلف الله عليك عمو
خديجة.. ولچ طيبةةةةة
طيبة.. عمل خير عمة لتضوجين
ليش اكو شي اثوب من جمع صماخين بالحلال اكيد لا
بس حچيتها اجت تركض
گرصتني بـ إيدي گرصة اسبوع ظل أثرها موجود
تقبلتها هيَّ والرزايل بـ كل روح رياضية وسكتت المهم گدرت ارجعها البيتها والرجلها حتى لو بالحيلة...
شوية واجوي همام وصالح
واگفة بالمطبخ اصب الغدة ويا البنات طبت أم المشاكل
سناء.. فضوها العالم صارلها ساعة منتظرة الأكل
نهاية.. غير منتظريهم يتجمعون
سناء.. منتظريهم شنو ترى عيب المفروض من يجوكم خطار تفرشون السفرة من الـ 11
نهاية.. لا من السبعة احسن
سناء.. شنو بت هيفاء اشوف لسانچ طولان ويحتاجله ضب
رحمة.. باوعي عيني
لو تچفينا شرچ وترحين للصالة
لو تشوفين مني شي ميعجبچ كل شي ولا أمي مفهوم
سناء.. هه أمي عشتووووو
ومنين اجت أمچ لعد ذيچ النايمة بالگبور مـن عشريـن سنة منو أمي مثلاً
رحمة.. أمي ونص غصباً على راسچ وراس أكبر واحد
نهاية.. يمة رحمة عوفيها وكملي شغلچ الحچي ميفيد
ظلت تدردم والكل لابسها
شوية وتعبت صاحت حسبي الله ونعم الوكيل وطلعت من المطبخ درت وجهي وراها مصدومة
طيبة.. هاي شبيها احلف عليها مو صاحية
صفاء.. وشنو الجديد
طيبة.. لا هسة صايرة كلش يمكن مشاكلها ضربت على عقلها اللهم عافنا مما ابتليتهم فيه !!!
صاحت عمة نهاية اشتغلن وعوفنا من سيرتها
خلصنا الغدة واجتمعوا بالصالة گاعدين يشربون الچاي ويسولفون رن جهاز همام
سحبه من جيبه بس شاف الأسم انخطف لونه
باوع علينا وگام للممر يجاوب
اني هنا گلبي لعب
اكيد اكو شي ورى هالأتصال وإلا ليش تغيرت احواله...
يتبع