♛ ♛ ♛ ♛ ♛ ♛ ♛ ♛ ♛ ♛
"شفاه مخملية"
بقلم: زهراء السلامي.
#مو دوم السهر وي طيحة الشمس يصير
ومو شرط التحبه دوم وافيلك
انه مساهر لجلهم صبح موش ب ليل
وشفت نجمة ظهر تتغزل بطولك
اتانيهم ع نياتي واگولن باچر يمرون
اثاري انه الفقير الدومه داعيلك
شعاتب بيك ياكسره شمس بالليل
هو انتَ الچنت تندهني ابعد حيلك
بقلم ithuda
♛ ♛ ♛ ♛ ♛ ♛ ♛ ♛ ♛ ♛
"هجران"
طلعت من غرفتهه وتوجهت للمطبخ اشرب مي دا امووت من العطش هناا ماعرف شنو سالفتي اشرب بالمي وما ارتوي، ردت افتح الباب وسمعت صوت مميز گعد يحچي ويه احد وواضح امه، استحيت ادخل فَـہ عدت ادراجي وگلت ارجع لغرفتي بَـس وگفتني حچايته وانزرع الفضول بگلبي من گال بصوت مهزوز
-يووم بعلي يعذبني الهوا التتنفسه ريتي تعبت من التمثيل والچذب شون اللزم رويحتي وما اسولف وياهه وحگ الرضا انتهيت شوون امثل انه ما عاشگهه وهايم بيهه شووون؟!!!!
-انتصار: يبعد امك اصبر يا يمه جگد گتلك خليني اخطبهه ليك بَـس تعاند لك يووم البت....
قطعت كلامهه من سمعوا صوت انرگاعي بالباب ثووول هجرااان ثوووول وكتچ يوگع عليچ الغباء والفهاوة هسة، استحيت اظل واگفه بالباب فَـہ عاد استسلمت وفتحتهه، من شافوني مثل عبالك الي انصدموا وعميد رأساً انخطف لونه وظل يباوعلي، بادلته النظره اريد افسر نظراته شنو، قاطع صفنتي صوت خاله انتصار من گالت
-انتصار: هااا هجرانه محتاجة شي بنيتي؟
-هجران: اي خاله اريد مي
-انتصار: يي يبعد امچ انطيچ ماي عيوني تعاي هاچ هذا ماي
ابتسمت واخذت الگلاص منهه انتبهت لعميد غمزلهه وطلع بره يدخن، بَـس شكل خاله انتصار مو طبيعي وشلون البايگة هوا، وتأكدت اكو سالفه من سألتني بتردد
-انتصار: هجرانه خاله انتي هستوچ جيتي؟؟
-اي خاله
-هااا يعني رأستاً فتحتي الباب ودشيتي المطبخ موش صح؟
-اي، ليش خالة اكو شي؟
-لا لا يوم شني قابل شكو بَـس سمعت صوت وعبالي واحد جاي يحوم بباب المطبخ يجوز بسه (بزونه) غزل چانت
-ايي يجوز يله خاله من رخصتچ
-مرخوصه يوم
رجعت لغرفتي واني افكر بأسلوب خاله انتصار الغريب، وعميد الدين شبي؟ ليش هيچ مبين عليه متوتر بَـس لا يجوز ضايج من رهف ومبين ؏ ملامحه
گعدت ؏ السرير وبكر گاعد ؏ الشازلون يطگطگ بموبايله لو بَـس افتهم منو يحاچي اربعه وعشرين ساعه ارتاح!!
-هجران: بكر يله شوكت نطلع؟
-مادري انتظر مكالمه من مرتضى
-شمعنه مرتضى؟
-هو راح يجيب السايگ ويجينه
-هااا، بكر اگدر اسألك سؤال؟
-سألي
-عميد الدين يحب؟
رفع عيونه يباوعلي بأستغراب، صدُك اني شبيه امدايه شعليه اسأل عن الرجال، جاوبني بتشكك
-لا مايحب ليش تسألين؟
-لا هيچ انسى
عدل گعدته وظل يباوعلي بنظرات مليانه شك وحيرة، اردف
-بكر: ليش سألتي هجران؟؟
-خلص حبيبي ولاشي مجرد فضول والله
-متأكدة؟؟؟
-اي والله شبيك، يعني اسأل ليش لسه ماتزوج وهوه بعده شاب وشيخ شعجب لسه عزابي؟
-عميد ما يسمو عزوبي يگولون عنه ارمل، وهو مايريد يحب مريته وماجاي يگدر ينساهه
-هااا الله يرحمهه شلون وفاء
-اي
-زين انته ماحچيت وياه وقنعته، يعني معقوله يفني حياته علمود مرة وماتت صارلهه ثمان سنين!
-حاچيناه هواي وحتى اخوي عثمان حچة وياه لان هو اگرب واحد عليه بَـس معاند ومايقبل
-توقعت انته اقرب واحد اله
-عميد اگرب واحد ليه انه بَـس عثمان اگربله اله
-دخت ههههههه
-ههههه عثمان وعميد خوان مو بَـس ولد عم ودومه يروحله ويتعناله للانبار حتى يتشاوفون وعثمان يجي مخصوص حتى يشوفه ولا تگولين انه اخو ولزم يشوفني ويشتاگلي لااا العار ضاربني عرض الحايط
-ههههههه عادي يجوز عميد يفهمه اكثر واحتمال علاقتهم صداقه قبل لا يكونون ولد عم، تدري غريبه اني شايفه تقريباً كل اهلك اله اخوك عثمان وحتى بعرسنه ما اجه ليش؟
-چان بي ابو صفار وماگدر يجي
-هاااا زين تشابهون بالشكل؟
-اي الكل يگول هيچ، بَـس عثمان يگلون احلى وعار وملعب
-هههههه عززاا صدُك تحچي؟!
ضحك قوي وهز راسه بـ "اي" استغربت شلون يحچي ؏ اخو بهالطريقه بَـس واضح علاقتهم مو كُلش قويه، وحسييييت يغار منه شويه، لزمت موبايلي وگعدت اگلب بالفيس شويه وبكر گال راح نطلع
طلعنه جوگة من البيت وبيبي عطيه گوة تمشي وتصيح رجيلاتي يونن عليه، گعدنه بسيارة ستاركس چبيره، عميد ومرتضى گعدو ليگدام وعمو خليل وعمه سلمى بالكرسيين الوراهم ورهف وغزل بصف بعض وعمه دلال بصفهه زيد وجوري وفيصل اكيد ويه بعض واني وبكر وبيبي عطيه وخاله انتصار كلنه گعدنه ليوره، بيبي عطيه شگد تدردم بَـس تمووت من الضحك وكلمه "سلبوحات" متوگع من لسانهه
-حجية عطيه: اييي يالسلبوووحات ولچن رهيفه غزيله اندارن عليّ لا اهفچن بهاذ (شالت عوچيتهه)
-غزل(انداريت عليهه): هاا حبوبه؟؟
-حجية عطيه: هاا شني ولچ گد فروخچ انه
-غزل: اسفه حبوبه قصدي نعم
-حجية عطيه: اييي هم عبالي، تعالن شني گاعدات ليجدام وحنه شامرينه بخانه الشواذي هيييچ يبعد امك يخليييل تخلي اميمتك ليوره ااخخخ لو چان عباس عدل بعلي اله جدام يرزني ويجعدني
اندار عمو خليل گالب وجهه
-خليل: يووم اندارلچ فدوه گتلچ گعدي بمچاني بَـس انتي ما رضيتي
-حجية عطيه: چا شنهي غير مريتك السحلية گلبت الخلقة تگول راح اجعد ؏ افادهه
-سلمى: لا عمه تعاي نتبادل يلااا
-حجية عطيه: وجععه من الله عساچ بوجع ما تصحين منه يالغمه (غمتهم قوي) صجيجة كون جدر ادهده ولگه غطا
گوة كاتمه ضحكتي بَـس رهف وغزل ماتحملن انفجرن بالضحك ومرتضى اندار يباوع لغزل لان صوتهه عالي وخزرهه خزررره يباااو اني انشليت
مشينه تقريباً ساعتين ونص واحس روحي كُلش تعبت، حاوطت زند بكر بأيدي وسندت راسي عليه، وبيبي عطيه استلمتني
-حجية عطيه: ولللچ هجرااان مو وكتهه تسوين رومانسيات جدامنه وخري عن الزلمه ولچ
صرت حممرة ابتعدت بسرعه ورفعت راسي واذا اشوف العيون كلهه مفتوحة عليه اله عميد الدين ما دار وجهها وباوع، نزلت راسي واني غايصه بالخجل واحس راسي انفخ من الطريق، همست لـ بكر
-بكر اني كُلش تعبانه
-بكر: شني شمالچ؟
-مادري نفسي تلعب واحس حَ تقيأ
-شجاچ ماتگوليلي
صاح لعمه سلمى حتى تنطيني حبايه مال لعبان نفس، بلعتهه وشربت مي انوب احس حالتي زادت، اخيراً عميد دار وجهه يباوعلنه بعدما غزل گالتله تعبت
-عميد: بويه ننزل شوي ترتاحين علويه؟؟
-هجران: لا سيد تسلم بَـس اريد انام شويه
-بكر: ما تنامين ياهو كاظچ؟
-گلت بصوت ناصي: مو بيبي متقبل انام ؏ چتفك
عميد ابتسم وهز بأيده، غمز لبكر واشرله براسه مافهمت حركته، بَـس بكر جرني عليه ونيمني ؏ صدره استغربت من حركته وردت اتحرك لان خجلت واني اشوف رهف وغزل يباوعنلنه ويضحكن ابتعدت ورجع جرني وهمس بنتر
-بكر: نااامي لا تلوبين
سويت مثل ميريد وفعلاً جريتهه نومه وماحسيت اله بيهم يگعدوني يگولون وصلنه للمطار، مطيت جسمي واحس راسي حَ ينفجر من الوجع بَـس اهم شي نفسي بعد متلعب
نزلنه من السيارة والزلم راحو يشيلون الجنط بَـس بكر ما شال شي لان چتفه يوجعه، لزمت جوري من زندهه وسندت راسي ؏ چتفهه وبقيت ؏ وگفتي
-جوري: هجران شبيچ؟؟
-ولچ تعباانه كُلش
-جوري: ليش ماصرتي احسن من نمتي؟
-ايي بَـس راسي حَ يطگ
صاح عميد حتى ندخل للمطار، طبيت واني الحماس ماخذني رغم وجع راسي بَـس نسيت كلشي من الفرحة، وگفنه بسره حتى يفتشونه وجنطنه حطيناهن بجهاز مثل السونار، سألوني اذا چنت لابسه ذهب لو دنابيس وگالو لازم انزع، نزعت گلادتي وسوارات لابسه ومحبسي وحلقتي ودنابيس الشال
كملنه كل الاجرائات وختمنه الجوازات وگالو لازم نگعد ننتظر طيارتنه، مشينه ودخلنه مثل القاعه الچبيرة شفت كراسي هواي والناس متطشره گاعدين عليهن واني هم گعدت بصف بكر ؏ وحده من الكراسي ومن صفحتي الثانيه گعدت غزل وبصفهه امهه وابوهه، انتبهت ؏ بكر يتلفت هواي عبالك منتظر احد وصدُك طلع منتظر احد، شفتهن من بعيد يجن بأتجاهنه، صفنت ؏ جمالهن وع لبسهن والشعر جوة الخصر مفتوح والمكياج والعطر يصفنن
تقدم علينه حجي اسماعيل وسلم ؏ عميد وبقوا يحچون هواي وهمه لازمين ايدين بعض جاي يتصافحون، اما جواهر وشهد اجن يركضن علينه، حظنتني جواهر وسلمت عليه بحراره مال وحده مشتاقه وشهد نفس الشي
گعدت جواهر بصفي واجت رهف تركض عليهه حظنتهه وگعدتهه بصفهه، باوعتلهه شنو من جمااال اعجز واگول هالبنيه جمييييله ومرتبه حيل، چانت فاتحة شعرهه الاشقر الغجري الطويل ومسويه مثل النافوره طالعه عبالك جاهله بَـس تخبل
ولابسه بنطرون حينز اسود وقميص مقفل احمر واسود وجارة ايلاينر والمسكارة كالعاده دبل ڤاليوم والحُمرة حمرة، اني بنيه وگصيتهه گص من فوگ ليجوة شلون لو الزلم الله يساعدهم، سحبتني عليهه وگالت بغمزه
-جواهر: شلونهه العروسه
-ابتسمت: زينه
-جواهر: شبيچ وجهچ اصفر؟؟
-تعبانه كُلش الطريق طويل ودخت
-اووف الله يساعدچ ايي الطريق كُلش متعب
-هجران: ايي، هسة عوفچ مني شو جايين؟!! مو عساس متجين وزعلانه (ودفعتهه بعكسي وضحكت)
-جواهر: وداعتچ ولا ردت اجي بَـس امي اكلت راسي ولحت عليه، وهم افتهمت فتوح العگربه مراح تجي عاد گلت يله اغير جو واتونس شويه
-اييي زين تسوين مشتاقتلچ هوااي
-جواهر: اني هم ونبي
سولفنه هوااي بَـس عيونهه كل شويه تطير تباوع لـ عميد وحلاوة وبكر واگفين بصف بعض يسولفون، سمعنه صوت من السماعه يحذرون ان لازم نركب الطيارة، گمنه من مقاعدنه واني وجواهر نمشي سوه لان بكر عافني وظل يمشي ويه محمد (حلاوة) ورهف لازمه ايدين جواهر وتمشي وياهه واضح شگد تحبهه
ركبنه بسيارة چبيرة ونقلونه للطائرة، خفت واني اصعد بالمدرج گلبي گام يدگ قوي بَـس جواهر شجعتني وگالت اتخيلي حاله حال درج عادي
استقبلنه مضّيّف بالباب واخذ مني التكت وشگهه، گال رقم المقعد مالتي 89 B مافهمت شنو قصده بَـس شفت بكر اجه عليه، سلم ؏ جواهر وشهد بأبتسامه واسعه برزت سنونه وهنه بادلنه بأبتسامه بسيطه وردن السلام، عافننه وراحن يدورن مقاعدهن واني وبكر گعدنه بَـس عيونه تدوور مادري وين، والكرسي الثالث گعدت بي بيبي عطيه يبوووو يعني وين ماروح ورايه
صدفت جواهر وشهد وحلاوة كراسيهم گدامنه، شهد مدت راسهه من بين الكراسي وگالت بغمزه
-شهد: هااا يا حلوييين ترا احنه گدامكم فَـہ احم يعني ؏ كيفكم
-هجران: ههههه يااء شكو شنو حَ نسوي مثلاً؟
-شهد بهمس: الي بالي بالچ
ضحكت ؏ سوالفهه بَـس بكر ماهتم لان ماسمعهه من گالت، رهف وعميد من جهتنه الثانيه وشفتهم يضحكون ويسولفون ذوله مو تعاركو قبل لا نجي لو اني غلطانه؟!
رهف گالت بصوت مسموع
-رهف: بابااا اريد اگعد بصف جوااهر
-عميد: اششش انثبري (اگعدي) بمچانچ بويه
-رهف: مااا ماااا اريدن جواااهر
-عميد: ولچ رهفف شلووون وماكو كرسي فارغ!!
اندارت جواهر عليهم لان گاعده بآخر كرسي ؏ جهتهم
-جواهر: تعالي حبيبي گعدي بصفي وحلاوة يگعد بصف ابوچ
ظل عميد ساكت بَـس خزر رهف واشرلهه براسه تگعد بمكانهه، وهيه اكيد عنوديه ماقبلت وحتى الدموع گامت تلمع بعيونهه، اجتي المضيفه وسألت اذا اكو مشكله بَـس ويييع ولا حبيتهه تباوع للزلم ومبوسمه وضربت صفنه بوجه عميد عبالك گاعده تتفرج فلم سينمائي
-عميد: لا عاشت ايدچ ماكو شي، رهف بنيتي گعدي بحداي شماالچ
ظلت گاعده بمكانهه بَـس عيونهه تصب دموع، يا الله شگد انقهرت عليهه وعرفت عميد مراح يبقيهه بنفسهه لان گال وهوه يگرص خدهه
-عميد: بسچ يبعد حيي روحي گعدي حدهه يله
گامت رهف بحماس تگمز واجه حلاوة گعد بصفه، واني رجعت سندت راسي ؏ چتف بكر بلكي اصير احسن
**
"جواهر"
اجت رهف تگعد بصفي والابتسامة من الاذن للاذن، بادلتهه ابتسامتهه التجنن الوارثتهه من ابوهه، اوووف يا ابوهه شنو احچي لو شنو اگول مليت من كلشي وكارهه روحي، صارلي اكثر من شهر ممحاچيته مثل الاوادم بَـس مرة حاچاني بيوم مرضته وبعد ماكو ماجمعنه حديث لان رجعت لبغداد بسبب فتوح وبتهه حسبي الله عليهن
مشتاقتله موت وكل شويه عيني لا ارادي تروح عليه، وهوه شلون طالع اليوم لابس بنطرون اسود كتان وتيشرت اسود وترانشوز ابيض فدووه شگد يلوگله اللبس السبورت، او لا هوه شنو ميلوگله سواء لبس عربي او افندي (بنطرون وقميص او قاط)
متت قهر من حتى ما كلف ؏ نفسه وسلم عليه وصارت عيني بعينه، دار وجهه عبالك تگولون عدوته، بلعت عبرتي ورحت اسولف ويه هجران اريد انسى نظراته البارده
باوعت لـ رهف شگد تشبه لأبوهه يگولون المرة شگد ما تحب زوجهه يطلع الطفل يشبهله والعكس صحيح، ادري هاي كلاوات بَـس لو چانت حقيقه ما اتردد دقيقه وحده ؏ تصديقهه، لان شيلاء الله يرحمهه چانت تعشق عميد الدين بخبال اتذكر ملتقيه بيهه كم مرة وشلون تحچي چنت اتمنى اللتقي بي اريد اشوف هوه صدُك نفس ميگولون عنه لو يبالغون؟ وطلع بعد احسن من كلامهه وانعجبت بي وحبيته، ماگدرت انكر مشاعري واني يوم بعد يوم اتمنى اكثر واكثر، حتى رهف امووت عليهه لانهه من ريحته
درت بَـس عيوني اللگف نظرات منه اروي اشتياقي، چانت بيده سبحته الزمردية تطگطگ وصافن بالفضاء، بساعتهه تمنيت اخترق دماغه واعرف بشنو ديفكر او بيمن؟!
تنهدت بعمق ورجعت اباوع لأضافري واحس بعيون رهف تتباعني
-رهف: جواهر شمالچ زعلانه؟
-لا عمري مزعلانه، تعااي يمي مسولفت وياچ ولچ ابو بريص شگد مشتاقتلچ
-رهف: ههههه انه هم وعلي
سحبتهه لحظني واستنشقت عطرهه المختلط بعطره اثر حظنته الهه، غمضت عيوني وركزت بالعطر، عطره المميز الجذاب الاعشقه، رجعت لوعيي من شهد ضربت ايدي بخفه
-شهد: جواهر شبيچ خانگه البنيه
ضحكت وهديت رهف وهيه هم تضحك تگول واضح الشوق عليچ، گعدت اسولف وياهه واشوف عيونهه ؏ ايدي، ضحكت وسألتهه
-شبيييچ تباوعين لأيدي؟
-رهف: هاااا هههه لا ولاشي بَـس عجبني صبغ اظافرچ
-ميخالف من نوصل اصبغلچ
-رهف بحماس: صگد؟؟
-اي حياتي اكيييد ليش لا
-اي بَـس ماريدنه اسود مثل مالتچ اريده احمر
-بعينيي تدللين
-جواهر؟؟
-ها عمري
-ليش لابسه هالگد محابس؟ مو هواي؟ وشوفي هذني صغار عليچ واصلات لنص الاصبع
-جواهر: هههههه اويلي منچ رهف، حبي هذا موديل جاي المحابس الهواي ولازم يكونن هيچ صغار
نزعت واحد من محابسي وانطيته الهه، فد فرحتت فدووه شگد احب هالبنيه شنو انطيهه تفرح وتكيف، نعست كُلش وكالت تريد تنام ؏ فخذي، بسرعه غفت وحتى من جابو الاكل مقبلت تاكل ولا اني اكلت وشهد هم مأكلت لان معجبنه الاكل
صاح بالسماعة ان وصلنه لمشهد وراح نهبط فَـہ لازم نربط الاحزمة، گعدت رهوفه بَـس متقبل حاولت وياهه هواي بَـس اگعدهه ؏ كيف حتى متخترع، أيست منهه ودرت وجهي ؏ ابوهه چان يباوعلنه مبين افتهم نظراتي لان رأساً اجه علينه
دنگ علينه ولان رهف گاعده بنصي اني وشهد فَـہ كُلش قريب عليه صار، توترت من قربنه وهوه هم مبين عليه ممرتاح خصوصاً رهف نايمه بحظني، بده يحرك رهف اقوى حتى تگعد بسرعه
اخيراً گعدت وخطيه تفرك بعيونهه، لبسنه الاحزمه وهبطنه بسلام وبدت الهوسة مال الجنط والجوازات، تذكرت اني وشهد ملابسات حجاب بسرعه طلعت شال اسود من جنطتي اليدويه جايبته ويايه لان أدري بأيران ممنوع بنيه تفتر سفور
رحت ويه البنات للحمامات حتى نرتب رواحنه واللبس الشال، رفعت شعري وسويته كبه وطلعت خصله مثل الگذله وذبيت الشال ؏ راسي بعشوائيه صرت اشبه العجميات شلون يلبسنه، رشيت عطر وعدلت كحلتي، درت وجهي اباوع لـ هجران واگفه وصافنه عليه هالبنيه من شفتهه وشافتني وضيفتهه تصفن عليه، گلت بضحك
-وجهي بي شي؟؟؟
ضحكت وغطت وجهها مال خجل، ظلت ساكته وجوري اللتهت تعدل بمكياجهه وشهد وبقيه البنات ما اجن بقن بره وياهم، طلعنه من الحمامات وشفنه البقيه واگفين ياخذون الجنط بَـس بكر واگف ؏ جهه
وصل الدور لجنطتي رحت اخذهه بَـس يبووو ثگيله هاي شهد جايبه الدنيا كلهه ومن اجينه حلاوة ساعدني بَـس هسة بيده جنطتين وهاي اختي العوبه متقبل تشيلهه تگول تعبانه
رحت عليهه اخذهه وصار بصفي عميد الدين جرهه عليه وراد يسحبهه، گلت بصوت ناصي
-هاي جنطتي
دار وجهه يباوعلي وظل صافن، شكوو وجهي بي شي؟ شبيهه العالم كلهه تباوعلي، حركت راسي بمعنى "اكو شي" وهوه رجع دار وجهه ليگدام واخذ الجنطه
-ياااا عميد هاي جنطتي!!
-عميد: اييي ما راح اكلهه
-لا بَـس اني اسحبهه
رجع دار وجهه عليه، رفع تك حاجب وگال بأستهزاء
-عميد: انتي شفتي شثگلهه؟؟ شني جايبه الدنيا كلهه وياچ
-اي
فر بيده واخذ الجنطه، بعد ملحيت وياه يله احسن خلي هوه يشيلهه، طلعنه بره وكفخنة الهوا البارد مال مشهد هسة احنه بشهر الثاني والساعه بـ 12:30 بالليل، والتكسيات تورشعونه كلمن يصيح صعدوا ويايه بَـس عميد ماقبل يصعد ويه اي واحد لان گال ولد خالته هنا وراح يجونه
وگفنه ننتظرهم شويه علمى يجون وباوعت بالوجوه، كلهه ذبلانه وتعبانه خو هجران وجهها اصفررر وواضح عليهه التعب وخطيه بكر مو بحالهه واگف يسولف ويه حلاوة، رحت اشوف شبيهه لان انقهرت عليهه واني اشوف حالتهه
-جواهر: هجرانه شبيچ؟
ابتسمت واشرت براسهه ولاشي، اردفت
-شنو حبي انتي مريضه؟
-هجران: لا مابيه شي
-لعد ليش مبين ؏ وجهچ مريضه؟
-هجران: لا هاي من التعب، اگولچ جواهر احنه وين نروح هسة؟
-جواهر: والله علمي علمچ حتى سألت امي متعرف وابويه هم يگولون عميد الدين الظاهر حاجزلنه فندق او شي
-هاا زين، بَـس اني ماريد اروح للفندق هسة اريد ازور
-يااا هجران مو وكت زيارة شوفي ساعه بيش وشوفي حالتچ، عوفيهه للصبح نروح
-لا مو امي تگول الي يجي للرضا (سلام الله عليه) ويتعناله وبوجهه اول ميدخل مشهد وقبل لا يرتاح يروحله يطلب حاجته منه تكون مگظيه ؏ الاكيد ان شالله
-هااا صدووك والله؟؟؟ ولا ادري هاي اول مرة اسمعهه
-اي اني هم بَـس ماما تكول طلبت حيدر اخويه منه ونصحوهه بهالشي وتگول سبحان الله وره شهرين وحبلت بي
-هااا يعني بَـس للذريه هاي؟
-لا لا لكلشي شنو عندچ حاجك تنقضي ان شالله
-حلووو لعد يله نگوللهم نروح نزور
حاچيت امي وگالت هيه كُلش تعبانه وبابا تخربط من الطريق وميقبلون يردون يرحون للفندق يرتاحون اول ميوصل ابن خالة عميد، واني دگيت رجل اله اروح ازور اريد اطلب حاجة، عاد حچيت ويه خاله سلمى وگالت الشباب راح يرحون بوجههم وياخذون هجران وجوري وغزل ورهف فَـہ اذا احب اروح وياهم، وصدُك رحت وياهم واحنه البنات ذبينه جنطنه اليدويه ؏ امي حتى نصير خفاف وميعيقنه شي
اجوي اربع شباب وتسالمو ويه عميد والولد وگالو توزعوا بالسيارات، ماكفت السيارات فَـہ صرنه ناس فوگ ناس، اني گعدت بسيارة ويه هجران وجوري وبكر وفيصل لان بوجههنا رح نطلع للامام، ورهف وغزاله ومرتضى وعميد وشهد ركبو ويه بعض
اما الباقين كلهم رجعو للفندق او اني عبالي راحو فندق طلع ولد خاله عميد مقبلو نروح اله نبات ببيتهم، شگد حاولو عميد وبكر وگال بكر وفيصل جايين شهر عسل ولازم وحدهم بَـس همه معاندين ومقبلو
وصلنه للامام ونزلونه بعيد عنه لان گالو ميصير تدخل السيارة اكثر، نزلت من السيارة وشفت القبه الذهبية والمنارات واگفات بكل شموخ، المنظر يأسر العين ويغذي البصر تجمعت الدموع بعيوني وسلمت ؏ الامام من بعيد
سحبت نفس عميييق وذبيته ااااه شگد راحة اكو هنا ما غلطو من سموا الامام الرضا شمس الشموس وانيس النفوس، المكان عبارة عن طاقه ايجابيه
وگفنه ؏ حهه ننتظر الباقين يجون ووگفت ويه هجران بَـس هيه ساكته، شويه واجو عميد ومرتضى واتفقنه ؏ الساعه بـ 2:45 الكل يتجمع بصحن طوسي هاي مو اول مرة اسمع بي بَـس ماندله بالضبط وين، فَـہ مرتضى دلانه وعلمنه وگال لحد تتحرك من مكانهه لحدما نرجع
دخلنه للتفتيش وگالو لازم اللبس عبايه اما البنات من المطار طلعن عبيهن لبسنهن، المفتشه انطتني وانطت شهد چادر وگالت ميصير ننزعه ولازم نرجعه الهم، طبعاً فهمت كلامهه من الاشارات
دخلت للامام واويلي شنو من ريحة كفخت بخشمي، ريحة مسك او عنبر ماعرف شنو بالضبط، رحت للضريح وحاولت اوصله بَـس صايره لحم ومستحيييل اگدر اللوح الشباك، فَـہ وگفت بُعد مسافه وسلمت، رحت اريد اصلي واجتني هجران
-جواهر اگلچ انتي متوضايه؟
-اي حب توضيت بالمطار
-هجران: شلون؟
-شنو شلون؟
-هجران: وصبغ اظافرچ؟ شنو وخرتي ورجعتي حطيتي؟
-لا طبعاً بَـس هذا شله علاقه؟
-لا حبي ميصير هذا يمنع وصول الماء الى الاظفر
وشرحتلي شلون وميصير اصبغ اظافري ومن هالحچي بَـس شسوي خوما اوخرهن هسة فَـہ گلت الاعمال بالنيات وبديت اصلي
طلبت حاجتي ودموعي تنزل، دعيت ربي يلين گلب عميد عليه ويگوم يحبني ويبادلني نفس شعوري ودعيت الله يحفضلي امي وابويه واخواني واكيد يحفظ عميد گلبي ورهوفته
كملنه كلشي وصارت الساعه بـ 2:30 فَـہ تجمعنه احنه البنات ورهف وغزل امنونهن عدنه وميصير نهد ايدهن، فَـہ وگفنه بالصحن ننتظرهم
مشه الوقت وهمه ماكو بَـس كل هذا وماخليت وحده تتحرك حسيت بالمسؤليه خصوصاً من عميد حذرنه ندير بالنه ؏ بعض وحسيت كلامه موجه اليه لان اني اكبرهن، صارت الساعه بـ 3:15 وهمه مختفين فَـہ شهد گالت
-شهد: اگولچن بناات هاي الظاهر مو بهذا الصحن متفقين احنه؟
-هجران: همه مو گالو اسمه طوسي مدري شنو؟
-غزل: لا انه سمعت مرتضى گال اسمه صحن غديري
-جواهر: لا مو غيّر عميد وگال هنا
-شهد: لا لا جواهر ماتوقع امشو نروح للصحن الثاني
-جواهر: يااا شهد وين نرووح خاف نتيه ومنندل
-شهد: ولچن شيرادلهه اني اندل امشن امشن اكيد دينتظرونه هسة ويگلبون الدنيا
سمعنه كلامهه ورحنه وراهه بَـس طلعتنه لغير مكان وشفنه شلون السوگ ومثل المول الچبير، وگفنه تايهات ورزلت شهد لان تيهتنه فَـہ گلتلهن احسن شي نرجع منين ما اجينه
وانوب رهف انحصرت حمام وتوازينه فَـہ گلنه نروح للحمامات وسألنه ؏ الـ WC ودلونه، بسرعه بسرعه طرنه طيير وكملنه وطلعنه مرة ثانيه بَـس شو عبالك غير مكان صار واول مرة اشوفه
-هجران: بناات هاي احنه وييين؟؟ شو ماتذكر اجينه مناا!!!
-جوري: اي والله ماجينه منا
-جواهر: بنات لحظه انتظرو خليني اسأل هاي المرة بلكي تعرف
رحت اسألهه بَـس كلشي مافهم شتگول انوب رحت ؏ غيرهه وغيرهه وهم مافهم وولا واحد يحچي عربي والحظ الاغبر ولا وحده منه شايله موبايل وحتى ارقام محافظات، أيست وگلتلهن اروح اسأل هذاك المنتسب ابو الريشه
سألته عن الحرم بَـس هم يحچي عجمي وگووة بالاشارات فهمت شيگول، اخذت البنات ورهف لازمتهه بيدي اخاف تضيع حتى يگص راسي عميد اذا صارلهه شي
افترينه هواي ورهف تدردم وتنگ لان تعبت ورجليهه گامت توجعهه، اجتني هجران لونهه مخطوف
-هجران: جوااهر احنه وييين؟؟؟ شنو هااي اني ماتذكر هذا طريقنه!!!
-جواهر: ايي ادري مو طريقنه بَـس لتخافين هسة اسأل هذا الرجال
-هجران: ماشي (ماتطمنت من جواهر گالت تسأل هذاك الرجال وخفت كُلش لان حسيت روحي غريبه، درت وجهي اباوع لجوري بلكي شويه احس بالأمان انوب خوفتني اكثر لازمه العبايه وتطگطگ من البرد وجواهر وشهد يفترن ودايخات ميعرفن شي ورهف وغزل تعبن فَـہ اللتمت كلهه علينه
جواهر سألت رجال واشرلنه لازم نطلع بعد ليگدام، رحنه وراهه واحنه نمشي وماملحگات واحس بطني انزرفت شگد ما جعت لان ما اكلت بالطيارة چانت تلعب نفسي
وصلنه مثل شلون الشارع وسيارات تروح وترد بَـس قليلات، رجعت سألت جواهر وگالت هم تسأل رجال ودلانه ؏ شارع گال تطبون بي وتلگون الصحن بوجهكم، سمعنه كلامه وياريتنه ماسمعنا، دخلنه بشارع ضيق يشبه الدرابين مال الولاية بكربلا وماكو صوت بي سنننطة، گمت ارجف من البرد ومن الخوف
رهف گامت تلوب تگول بردانه وجوعانه فَـہ جواهر نزعت الچادر الچانت لابسته ولفلتهه بي وبقت ببنطرونهه وقميصهه المقفل الاحمر، شفنه شباب ثنين گدامنه وگلبي رجف منهم حسيتهم مو طبيعيين، جواهر سألتني بهمس
-اگولچ هجران اسأل ذوله؟
-هجران: لا يمعوده شوفيهم شو يخوفون
-جواهر: ولچ لعد شنسوي نظل نفتر!! شوفي الساعه عبرت الـ 4 الفجر خاف يصيرلنه شي واحنه وحدنه وهسة الزلم اكيد گلبهم نار علينه
-ماشي بكيفچ لعد
راحت سألتهم وحچت وياهم بالانگليزي بلكي يفتهمون ويبووو هيه تدلع وتتنعوص بالحچي انوب گامت تحچي انگليزي صفنتنه عليهه وع اسلوبهه
من سألتهم ظلو ذوله صافنين عليهه وگامو يتبسبسون وحدهم بالعجمي، وردووا كلمة "بيا" اكثر من مرة ويأشرون بيدهم افتهمتهه معناهه تعالن ويانه
بَـس شو خفت وتنحرت بمكاني وماقبلت اتحرك وجواهر هم حسيتهه باگت هوا واشرتلنه حتى نرجع للشارع العام، مشينه سريع ودرت وجهي واذا اشوفلكم ذوله الشباب يمشون ورانه وعبالك گوة يمشون چانو يتطوطحون
جواهر گمزت من شافت اكو بطل زجاجي فارغ بالگاع، وهمستلي
-جواهر: هجراان هذا بطل بيره امشن بسرررعه
مشينه او نگدر نگول هرولنه وأحس انفاسي بدت تنگطع وتطلع غير منتظمه، اني ترأستهن بالمشي وكل شويه ادير وجهي اباوعلهن، لهناك وسمعت صرخة رهف وشهگه جواهر
فتحت عيوني وتيبست رجلي من شفت الحقير لازم جواهر ويريد ياخذهه ويمشي بيهه سريع وهيه تحاول تتملص من ايده وتعيط عليه، چانت ثواني بَـس حسيتهه ساعات، نشف الدم بجسمي واطرافي ثلجت وغزل ورهف گامن يبچن وشهد تعيط وتبچي ؏ اختهه وجوري مبحلقة عيونهه وعبالك انبلع لسانهه من الخوف
سمعت صوت طگطگة ورايه ودرت وجهي، شهگت من شفت زلم ثنين واگفين بباب بيت واشرولي حتى اروحلهم، قوتي بادت واحس عيوني راح يطلعن من هول الموقف واني اشوف زلم محاوطينه من كل جانب والله اعلم شنو حيصير بينه بهالبلد الغريب الي منعرف لغتهم ولا نعرف مكانهم!!!
يتبع☘️...
♛ ♛ ♛ ♛ ♛ ♛ ♛ ♛ ♛ ♛
اسفه ؏ التأخير حبايبي بَـس انشغلت وردت انزل البارت باچر بَـس لان وعدت البنات اليوم ينزل فَـہ ضغطت ؏ روحي وكتبتلكم بارت طويل🕊 واريد اگللكم رح يتأخر النشر مناا لثلاث ايام علمود وفاه امير المؤمنين (عليه السلام) ورجاءاً لنتناقش بخصوص هالموضوع بَـس هاي عادتي حبايب قلبي مانشر شي بهيچ وفاة مهمة ♥️ وعظم الله اجورنا واجوركم واحسن لكم المصاب بهذهِ الايام الأليمة ؏ قلوب محبين الامام علي (عليه السلام)♥️.