المقدمة
مسيت العافية اعليكم يهلنه
وياكم انه جدتكم هدية ، اي والله ييمه .. صرنا جدات و كبرنا وكضى عمرنا بساع بساع، من تنشدوني اعلى عمري ما ادري شكثر، يگول ابوي اتضكر صرتي بالسنة النجتل بيها الزعيم عبد الكريم قاسم الله يرحمه ، جاي غاد ما ادري والله ييمه ، هو انه صرت بذيج اليام.
وين انا هسه جويعدة و بيا مجان مالكم غرض
خلوني اسولفلكم سالفة من سويليفات اهلنه
بس لزوم نبدي سويلفتنه بذكر الصلاة اعلى محمد و ال محمد ، من كون الله من يسمع واحد يضكر حبيبه يبارك بيه وبسولفته.
اي ...كان ياما كان في قديم الزمان
جانت اكو عشيرة اعلى كاع السماوة، عايشين بأمان الله، ناس تحب ناس ، و ناس تفزع الناس ، و الگلوب طيبة و متصافية.
بس اخخخخ من ابليس لو فات بين الناس
يهدهم و يخلي طشارهم عكابهم
... المهم
شيخ هاي العشيرة اسمه (چلوب)
لو نشدوتني .. ليش اسمه جلوب ؟
انا اگلكم
جانو اهل كبل ، اهلنا .. بكلشي يصكدون
مت عيني عليكم يهلنه .. ما يمر اعليهم طارش و يكللهم اعلى شي الا ويصكدونه ، فجان الشيخ مزهر الله يرحمه كلما جاله ولد انسدح الولد و مات
و هو يحب شيخته ، من كون مريته وما يرضى يكسر خاطرها و يتزوج اعليها ، لهناك اجاهم طارش كاللهم ( سمو الولد بسم حيوان و هو يعيش )
اهلنه مت عيني عليهم ما كصرو، ويا ما اجا الولد طكوه بسم (چلوب )، و لنه صكد و عاش، صكد لو كالو على نياتكم ترزقون، الحمدلله و الشكر.
كبر چلوب و صار شيخ و الوادم تحبه و تريد خاطره ، و جلمته بالسلف ما تنثني، الشيخ چلوب بعد
زلمة بخيت و الوادم تحلف براسه
ما يطب مضيف و بيه عكدة الا ويحلها، و الكل تاخذ الجلمة من حلكة و ما تردها عبن يحترمونه.
المهم ....
الشيخ جلوب الله يرحمه، جان عده ثنين نسوان
الجبيرة الشيخة محاسن
و الزغيرة بدرية
خلف منهن ٣ وليدات
الجبير ( دوّاي ) " الشدة على الواو"
الوسطاني (ثجيل) بلهجة الحضر "ثكيل" بمعنى فصيح "ثقيل"
ولاخر (ضاحي )
دواي و ضاحي من الشيخة محاسن
اما ثجيل فهو من بدرية
و ٤ بنيات .. ٣ من الشيخة محاسن (نضيمة و هضيمة وحسنه )، ومن بدرية بس (رجوة )
بس قصتنا و سالوفتنا تبدي من ولد الشيخ جلوب ( دواي و ثجيل و ضاحي )
من مات الشيخ جلوب الله يرحمه ، خلفه بالسلف و المضيف ابنه الجبير دواي .. صار هو المحفوظ
بس السالفة ما وكفت هنا ييمة
الشيخ دواي جان ما يخلف ( عقيم) تزوج ٢ نسوان و ما خلف منهن ، من عرف بنفسه ما يخلف و ماله وريث يخلف بعده و يصير الشيخ .. عمد المشيخة و امارة العشيرة لاخوه من امه (ضاحي) من بعده
بس ثجيل جان اكبر من ضاحي و المفروض بعد دواي الحك لثجيل، بس الشيطان و لعب النسوان دار العكول، و الشيخة محاسن ..وصت ابنها يخلي امارة العشيرة من بعده الإبنها الثاني ( ضاحي) ...وقرروا ياكلون حك ثجيل.
... خايبين جا غير لهناك وطگ و موت يدواي
هسه مات موت الله، احد جتله ماحد يعرف السالفة يهالعالم مصيبة ،عافو الزلمة ممطول و تمالخو من الروس، كلمن يصيح "انا الشيخ"
ثجيل يكول ؛انا الاخو الجبير و انا المحفوظ
و ضاحي ؛ يكول انا الشيخ و ابن الشيخ جلوب و الشيخة محاسن و اخوي الشيخ دواي وصاها ليه.
ثجيل ابن الشيخ جلوب و زلمة جبير و محترم و السلف كله يوده و يحترمة، لجن الشيخة و الناس كلها صفت ويا ضاحي.
هنا انگسمت العشيرة صوبين
الشيخ ضاحي هو الأخذ مجان اخوه و صار المحفوظ بالعشيرة
اما ثجيل فراح و ذب جرش و يا اخواله ونصب روحه شيخ وشايل اسم ابوه الشيخ جلوب.
ثجيل جان اسمه ضعيف و جثير ناس ما تعتبره هو الشيخ ، فراد يثبت اسمه و عشيرة بأسمه
جانن عده ٢ نسوان، اتزوج عليهن اثنين .. و حكم على ولده كل واحد يصير عمره ١٥ يتزوج .. و على كل ولد من ولده يتزوج ٤ نسوان و يخلفون ..
وصدك هو اتزوج ٤ و الخير يزيد عليه وولده خير من الله، كام بكل فصل و بكل جعدة سلف يطوه هدية مره ، اله
يكولون صار عده ٢٠ مره خلف منهن ٦٢ ولد و ٢٠ بنية
.. سگم النسوان الما تحبل على الاربعين يردها لاهلها
وحكم بالعشيرة كل فرد من اولاده و احفاده لزوم يتزوج ٤ و الما يتزوج يعيرونه و يطردونا حتى من المضيف و يعتبرونه موش ازلمه.
عده بستان و هوايش و طليان و حواوين جثيرة يستفاد منها، وولد و بنات خير من الله،كل همه يرفع اسمه اعلى اسم ضاحي و يصير الشيخ جلوب ينضكر بولده مو بولد الشيخ ضاحي.
... اما الشيخ ضاحي حاط كوره ويا كور ثجيل .. دم سنونه ثجيل .. معاديه معادة، و ثجيل مثله .. و نزاع بين ال ضاحي و ال ثجيل ما فض.
يوم من الأيام .. ماتت هايشة بگاع آل ضاحي
خايبين يهالوادم ماتت لو ابتلت اعلى عمرها ..
يكلولون لادغتها حية .. بس واصل خبر للشيخ كايليله :- شفنا واحد من ال ثجيل بكاعنا، من كون هو حط الحية و دربها اعلى هايشتنا.
تكاوموا و شالو اسلاحهم و هدو على ال ثجيل بالتفگ، ثجيل و ضاحي ازغر منه و يهد اعليه ، يا يابه يابويه
لم ولدك و حط التفگ اعلى اظهورهم و هد على ال ضاحي ، و معارك من الجيهتين
لا ال ضاحي يهيدون
ولا ال ثجيل يردون
واحد من اولاد ثجيل طاك زلمة من ازلام ال ضاحي، و لايحه بچيلة .. انهد السلف بوكتها يكولون.
ادخلت العشاير بيناتهم و طبو طباب خير ، ثجيل انرد عنهم لجل عيون العشاير الدخلت، بس ضاحي احزام و الف سيف ما ينرد
و شرط يا يرد ثجيل تحت شور ضاحي و تحت طوعه بالسلف ، يا ياخذ منه فصلية ..
هو اخوه و الاخوة ما بيناتهم فصلية ولا فصول ، شلون يطي مره فصلية و يبرد الدم ؟
ضاحي لاف العشاير على ثجيل و حطه بين هالخيارين ، يا يرد تحت شوره، يا يطي وحدة من بناته فصلية.
كوم ثجيل و اطي بت ابنك (ردحه) عمرها ١٢ سنة .. فصلية لبيت الشيخ ضاحي، فصلية لأبنه مطر.
جانت بعدها البت ما لاحكة (لم تحيض بعد) وما يجوز اعلى الزلمة يكرب بنية احديثة ما لاحكة، بنولها صريفة ورا البيت بالبستان وكعدت بيه.
المسكينة عانت و شافت الضيم مت عيني عليها، عاشت غريبة ووحيدة و الكل ما متغبلها، عبنها بت من ال ثجيل.
مطر متزوج كبل فرحة لجن ما عنده منها ولد، بس ما گرب ردحة حتى من بعد ما لحكت، جان بوده يردها لهلها بس جانت الجلمة لبوه الشيخ ضاحي وسكت عنها.
راحت اسنين و اجت اسنين ومات الشيخ ضاحي، و ابنه مطر صار الشيخ
ومرته الاوله ماتت وبكت عنده بس ردحة، بس هو جان حاط عوينته اعلى بت رجال معروف من ذاك الصوب ورايدها، تكدملها و طلبها امن ابوها وابوها وافغ، بس جان شرط بته، يطلك الفصلية من عبن اهي ما ترضى تجي شريجة لفصلية و اهي بت اصل وفصل.
السالفة جانت جايدة لين الشيخ ما كارب الفصلية و السالفة مرت اعليها سنين، و عيب اعلى الزلمة اليرد حرمة وما ماخذها، فتكرب لردحة وعرس عليها وردها، و تزوج ملوك.
بعد شهرين تبين ردحة حامل ..
منين ؟ .. من الشيخ مطر
الشيخة ملوك مرت الشيخ، وعرفت بردحة حبلت من الشيخ گبلها، جيبيها و عزليها وما خلت احد يدري ولا جابت سيرتها على السان.
جان الشيخ يحب شيخته من عبن جانو مترايدين، و اهي استغلت حب الشيخ الها وخلت اخوها سركال عد الشيخ مطر.
مامش احد درة بردحة جابت يو لا ، شنهي اخبارها ؟
من عبن الشيخة ملوك حامل و ما تريد الناس تعرف ردحة جابت كبلها لو لا خوف لا يطلع البطنها ولد ويخلف ابوه ويصير ابن ردحة الشيخ.
فهي ضمت ردحة وما خلت احد يدري عنها و لو سأل الشيخ عن ردحة تكله ( بحجرتها مرتاحة من كون حامل و ما نريد انتورط ويا ال ثجيل، تخلف ونردها لهلها)
الى ان اجا اليوم الولدت بيه ردحة، صكد و تجيب ولد
و الشيخ مطر ما عنده غير ٤ بنات من مرته الاوله الله يرحمها، ويصير ابن ردحة اول ولد للشيخ مطر.
يا يابه يابوية من درت ملوك بردحة جابت ولد، حجت ويا شيخ و كالتله :- ردحة جابت، اجا الوكت التنفذ وعدك ليه و ترد ردحة لهلها، و انا اتكفل الفرخ و اعتبره مثل ولدي.
وردت ردحة لال ثجيل، وضل ابنها ابيت ال ضاحي.
الشيخ سماه (سرحان)
و الشيخة سمته (غريب)
بس المشكلة وين ؟ بعدت غريب من البيت بحجة مرضعة ترضعة ويضل عدها.
وصفت بالغصر لوحيدها اهي الامر الناهي.
ومن هنا يبعد اهلي تبدي قصتنا ويا ابطالنا
غريب من ال ضاحي
وحاكم من ال ثجيل
منهو حاكم ؟
تعرفون غصته ان شاءالله من نبديها
وانا هنا واروحن لهلي ، و اخلي زينب بت ماجد تكمللكم غصتنا و غصة اهلنا، اودعناكم.
(قريباً )
