قصة النقيب ابو درع والقاصر
للكاتب علي الفتلاوي
،،،،،،،،،،،،،،،،،،،،،،،،،،،،،،،
السلام عليكم
تدرون بيه ماينطيني گلبي اتركم بدون بارت
كتبت الاحداث بسرعه انتو تدرون اطلع من الصبح ارجع المغرب وابدي اكتبلكم بارت وربي حتئ بعدني بدون عشه
اذا اكو سحگ غلسو المهم الزبدة 😁
لجين،،جنت فرحانه واني اشوف امي وابوي گاعدين يم راسي ماامصدگه واخيرا شفتهم
باوعت علئ رجليه شفت كرار ورهوفه گاعدين
حطيت راسي بحضن امي هذا المكان الوحيد المحتاجته بالكون كله
صرت ابجي بحرگه واعاتبهم ليش رحتو ومااخذتوني وياكم صرت كل شويه احضن واحد منهم واشمه بقهر
باوعت الكرار اتعجبت بشكله گتله كروري صاير اتخبل من شفتك بالسجن جنت تعبان وضعفان هسه وجهك حلو
ماحچئ وياي ابد كلهم ساكتين رجعت ل امي اسالها يوم ليش مايحجون اخذوني وياكم لاتعوفوني بعد
لمتني الحضنها حيل صرت اشم ريحت صدرها
واحس بحنيتها
گالت بنيتي احنه ماعايفيج دووم وياج
انفتح الباب وطلع ابوي وكرار ورهف وامي گامت تريد تلحگهم واني مكمشه بيدها صرت ابجي بس احس روحي مشلوله مااگدر اگوم اركض وراهم
صرت اسمع صوت. يصيح بأسمي وضوئ قوي بعيوني
بديت افتح عيوني بتعب اباوع امي بعدها گاعدة يم راسي تمسح بگصتي
دقيقه هاي مو امي صرت شويه شويه تتضح الرؤيا عندي هاي نسرين الگاعدة يم راسي
فزيت اريد انهض جسمي كله ثگلان
احس بس عيوني يتحركن وريگي يابس من العطش
گوة طلعت مني كلمة وين امي??
نسرين تبجي يم راسي وخالي باسني بگصتي
اسمع صوت ام حسين وحسين وعلي كلهم يمي
هواي اصوات بس شكلهم ماواضح
شويه وهاج عندي ألم موطبيعي اذكر جنت اصيح يممه الحگيني
سمعت صوت نسرين تطلب من علي يگلهم ينطوني ابرة مسكن الم
احاجيها اگلها باجي رااح امووت
رجع خالي جاوبها مايصير ينطونها بعد مسكن لازم تصحئ وبعدين الابر
الالم صار ماينطاق وحدة من اديه احس بيها ميته
والثانيه رفعتها گطعت شعر راسي من الوجع
بديت اشوفهم كلهم ملتمين علئ راسي
لزمت ايد علي بيدي الثانيه وگتله دخيلك اني شببيه ??
الوجع زاد گمت اصيح علللي رااح اموت
علي،،الحمدالله علئ سلامتج يروح علي بنيتي احنه نريدج تصحين اتحملي شويه
الدكتور،،بابا لجين باوعيلي هنا ذني شگد ??
لجين،،رفع ايدة واشرلي بااصابعه وسالني شگد
جاوبته والشوغه بروحي گتله ااااثنين
الدكتور،،عفيه بنيتي الحمدالله علئ سلامتج
الله كتبلج عمر جديد لان الطلقه بمتنج الايسر قريبه ع القلب
