"ဒါဆို ကျွန်တော် ပြန်တော့မယ် ။ ယံယံ ပြန်ရောက်လာခဲ့ရင် ကျွန်တော့်ကို ဖုန်းဆက်အသိပေးဖို့ မမေ့ပါနဲ့ "
ရှိုင်းက အဂ္ဂမင်း နှင့် ဝေယံ့ကို စိုက်ကြည့်၍ ပြောသည် ။
"စိတ်ချပါ ။ ကျွန်တော် ဆက်သွယ်လိုက်ပါ့မယ် "
အဂ္ဂမင်း၏ အဖြေကြားမှ ရှိုင်းက ခေါင်းညိတ်၍ ထွက်သွားတော့သည် ။
***************
မနက်စောစောစီးစီး အိမ်သို့ ဧည့်သည် ရောက်နေသည် ။ မဒီ့၏ အစ်ကိုဝမ်းကွဲဖြစ်သူ ကိုလင်း ဖြစ်သည် ။ ဒေါ်ခတ္တာ မနက်စာဖြင့် ဧည့်ခံပြီး စကားပြောနေတုန်း မဒီက အပေါ်ထပ်မှ ဆင်းလာသည် ။
"သမီး ဘယ်သွားမလို့လဲ "
ဒေါ်ခတ္တာက မနက်စောစော၌ အလှပြင်ဆင်ပြီး တက်ကြွနေသော မဒီ့ကို မေးသည် ။ မဒီက ယနေ့မှာတော့ ပျော်ရွှင်မြူးထူးနေပုံရသည် ။
"ကိုလင်းနဲ့ သွားစရာရှိလို့ "
မဒီက အပြုံးချိုချိုဖြင့် ဖြေသည် ။
"ဒီနေ့ ပျော်စရာကိစ္စများရှိလို့လား သမီး "
ဒေါ်ခတ္တာက မေးတော့ မဒီက ကျေနပ်စွာ ရယ်လေသည် ။
"ဟုတ်တယ် မေမေရဲ့ ။ ဒီနေ့ ပျော်စရာကစားပွဲလေးတစ်ခု စတော့မှာ အဟွန့် "
မဒီက ပြောပြီး ကျေနပ်စွာ ရယ်ပြန်သည် ။ မဒီ့ကို ကြည့်ရင်း ဒေါ်ခတ္တာသည် စိတ်ထဲ တစ်မျိုးတမည် ခံစားလိုက်ရသည် ။
"ဘာကိစ္စများလဲ မဒီ "
ဒေါ်ခတ္တာက မေးတော့ မဒီ့ မျက်နှာတည်သွားသည် ။
"မေမေ သိဖို့မလိုပါဘူး ။ မဒီတို့ သွားတော့မယ် "
မဒီက နှုတ်ဆက်ပြီး သွက်လက်သော ခြေလှမ်းများနှင့် အိမ်ထဲမှ ထွက်သွားတော့သည် ။ ထို့နောက် သူ့အဖေ၏ ကားတစ်စီးကို ကိုလင်းကို ယူမောင်းစေသည် ။ ကိုလင်း၏ ကားက ဇေယျ ယူမောင်းသွားသောကြောင့် ဖြစ်သည် ။
ဒေါ်ခတ္တာသည် သူတို့ကို မျက်မှောင်ကြုတ်၍ ကြည့်နေမိလေသည် ။
*****************
မှော်ဘီဘက်ရှိ ခြံကြီးဆီသို့ မဒီသည် ကိုလင်းနှင့်အတူ ထွက်လာခဲ့သည် ။ တိတ်ဆိတ်၍ သစ်ပင်ခြုံနွယ်တွေနှင့် ပြည့်နေသော ခြံကြီးထဲသို့ ကားမောင်းဝင်လာခဲ့သည် ။ ခြံဝန်းထဲတွင် ကိုလင်း၏ ကားအနက်တစ်စီးက ရပ်ထားသည် ။
YOU ARE READING
ချစ်မိသူ အရှုံး ( Completed)
浪漫📣( Season 1 + 2 ) Completed. Boy's Love Story . Own Creation . Thin Zar Moe Oo.
part-25
Start from the beginning