#مريم
الحلقه 28
#مريم
قعدت منهاره .. مخنوقه .. نفسيتي صفر ..كمية الحزن الي في داخلي بحجم وطن ..
جهزت نفسي للسفر .. و في اليوم الي بنسافر فيه جتني ام حسام و ميسون و اختي مرام .. و قعدوا كلهم يقولولي في نفس الكلام و كأنهم متفقين عليا .. ارجعي لي راجلك و ربي صغارك .. و انسي الي فات و كل الرجاله يغلطوا و و ........
حسيت بقرف من كلامهم .. لمجرد ان اغلاط الرجل ديما تتبخر .. تختفي .. ساهل تبريرها ..
قتلهم نحب نفكركم ان هو الي ضربني و طردني من حوشي و قالي يا وسخه اطلعي و ورقتك تو توصلك ..
فجأه كلهم سكتوا 😔😔
أهااااا يعني الي يكسر حاجة و يرميها معاش يرجع يدور عليها بكل .. انا مسافره على خاطر بنتي .. الله غالب حكم ربي ..
و انا يعلم الله بنفسيتي لهذا رجاءً ما تزيدونيش على ما بيا ..
جى حسام .. و طلعت شناطي و طلعت ركبت معاه .. خدا مني مهاب قعد شاده و يسوق بيه .. و انا طول الطريق نبكي ..
مسحلي دموعي ع خدي و شد أيدي و قالي بأذن الله ما تخافي من شي ..
نحيتله ايده .. و قعدت نبوس في مريومه .. وصلنا للمطار و جى ولد ميسون بياخد السياره .. جى موعد رحلتنا و ركبنا توكلنا على الله .. و في الطيارة مريومه تبكي تبي ترضع .. حسام يقولي خيرها ؟ نقوله تبي ترضع .. يقولي به رضعيها .. نقوله نتحشم هنا ..
خدا غطاني بجاكيته و قعدت نرضع فيها ..
و بعد ترانزيت و ركبنا رحلتنا تاني وصلنا و انا متعبه جداً ..
خشينا .. غيرت للصغار و درتلهم حليب .. مريومه رقدت و مهاب خداه مني حسام قعد يعطي فيه حليبه ..
خشيت دوشت .. خف التعب شويه .. طلعت لقيت مهاب راقد ع صدر حسام ..
منضر خلاني نتأثر و نحس بالحضن هذا اكثر من مهاب ممكن ..
قعمزت جنبه ع السرير .. قتله انا ما نبيش نقعد معاك في نفس الغرفه ..
نظرة عيونه وقتها حسستني و كأنه يقولي ااااااااااااااه و خلاص ..
سكت لحضات و بعدها قالي حاضر ..
نزل مهاب من حضنه .. حطه ع الفراش .. و طلع من الغرفه ..
تألمت ع خاطره 💔😔 و حسيت ان مش وقته الكلام هذا ..
اتكيت ع الفراش .. شعري مبلول و لابسه قفطان نوم خفيف .. و قعدت شاده رجل مريومه و نبوس فيها ..
نبوس و نقوللها محلاها بكلاوتي .. رجلها مريومه زي البكلاوة 😘 لا لا رجلها مريومه زي المقروضه 🤭 ....
بروحي نتكلم و مريومه راقده ..
خش حسام .. التعب وااااااااضح عليه هلبا .. قالي انا في الغرفه الي جنبك .. تبي حاجة كلميني .. بكره الصبح نطلع ناخدلك شفره ..
قتله تمام به ..
خدا شنطته .. و قرب من مهاب قعد يبوس فيه و يمسح على شعره .. و لف من جهة السرير و جى لي مريومه .. قعد يشم فيها و قاللها حبيبتي .. و قعد يبوس فيها ..
نزلوا دموعي و قعدت نبكي و ما بيتش نوضحله ..
وجعني هلبا و ندمت اني قتله ما نبيشي في الغرفه معاي ..
ناض بيطلع و لما خطم من جنبي حط ايده ع شعري و مشى طلع .. سكرت الباب وراه و قعدت نبكي ..
يعني لما كان حبيبي نهرب له للدار و توا لما راجلي نطرد فيه !!!!!!!
اااااااه يا عليك ظروف تجبرنا نتصرفوا وفق كرامتنا و مشاعرنا ..
رقدت من كثر التعب .. نسمع في الباب .. ففت .. شكون هذا !!!!
قالي انا حسام .. فتحتله .. قالي جابولك عشاء توا و انتي ما فتحتيش .. قتله رقدت ..
قالي خلاص تو نبعته تاني .. قتله لا ما خاطريش نبي نرقد ..
قالي تعشي شويه و بعدها ارقدي .. قتله تمام .. قالي البسي حاجة ما تطلعيش هكي ..
و لا نقولك خشي داخل تو نقعد واقف هنا لين يجيبوه و بعدين نمشي ..
خشيت و اتكيت ع الفراش .. بعدها خش حسام و قالي العشى برا و انا بنطلع .. قتله به تمام ..
رقدت خداني النوم .. نضت الصبح على صوت مهاب يلعب بروحه ..
غيرت للصغار و لبست انا جهزت نفسي .. نستنى في حسام يجي نمشوا للدكتور ..
جى حسام و طلعنا .. قالي نفطروا قبل ؟ قتله لا نبي نمشي للدكتور ..
مشينا للدكتور .. خشينا و شاف تقرير متع ليبيا و قال انه ح يعاود كل شي .. كان معانا مترجم .. و خدوا مني مريومه .. مكان مريح نوعاً ما .. تحسي ان في طب بجد .. دارولها صوره ملونه .. و طلع التقرير بعد ربع ساعه ممكن .. مريومه قاعده داخل ياخدوا منها في تحاليل .. خشينا للدكتور و معانا المترجم .. الدكتور قال ان عندها ( عيب خلقي في الكبد سبب إنسداد في قنوات المراريه أدى الي تلف كامل للكبد )
قلت : بنتي عمرها 10 شهور .. امته صار هذا كله !!!!! 😦😦
إحساسي كان أحساس كل أم مصابها كان في طفلها .. قلبي بيوقف من الي سمعته ..
كمل الدكتور يشرح في الحاله و العمليه كيف بتكون ..
بديت ندوخ .. قلبي يسل فيا سلاَّن .. شديت في أيد حسام .. ما نبيش ندوخ لا .. نبي نفيق ..
معاش سمعت شي من الي يقولوا فيه .. صوت طنين .. طووووووووووووووووووووووووووط
ضغطت ع ايد حسام .. و كأني نقوله أنا نبي من قوتك شويه .. أنا نبي من عزمك .. أنا نبي من صلابتك ..
رخيت أيدي من أيده و استسلمت لي ضعف نفسي .. و طحت مغمى عليا ..
فقت و التغديه في إيدي .. جهاز القلب ع صدري .. اكسجين في فمي .. حسام جنبي .. عيونه حمر من الدموع .. فتحت عيوني .. نزلت دمعتي .. نحاول نتكلم .. نحالي الاكسجين .. قتله نبي مريومه .. مر ..... يو ...يو ....... و انهمرت بالبكاء ..
حضني حسام و من أثر المهدئات خدتني نومه .. فقت متأخر .. لقيت حسام راقد جنبي ع الكرسي .. و في حضنه مهاب .. راقدين زي الملائكة ..
نضت قعمزت .. الغرفه ضلام فيها ضوء ابيض خفيف .. لقيت روحي مش لابسه شي .. بس بالطو المستشفيات .. كالعاده صدري معبي حليب .. كلي ملبزه .. نبي انوض .. لقيتهم مركبين كيس البول ... اوووووو هذا شنو اللطف ... حس بيا حسام ناض .. حط مهاب ع الصالون و غطاه .. جاني شد أيدي .. سألني شن تحسي توا ؟
قتله وين مريومه ؟ قالي تعالي نوضي .. و قتله و هادي 👈🏻 و شاورت ع كيس البول .. قالي عادي شديه .. نضنا و وقفت ع روشن و فتحلي الستار و لقينا مريومه مننيه .. بيني و بين غرفة مريومه الروشن هذا ..
قتله حسام .. و عيوني ما بطلوش دموع ..
قالي نعم ..
قتله نبي نرقد و نفيق و نحس ان هذا كله حلم .. خداني في حضنه .. كنت محتاجتله هلبا ...
هـــــــلــــــــــــــــبـــــــــــــــا
😢😢💔💔😢😢💔💔😢😢💔💔😢😢
جتني الممرضه نحتلي كيس البول .. قلت لي حسام نبي نغير كلي حليب .. اعطيني مهاب نرضعه .. قالي راقد .. قتله عادي حتى و هو راقد يرضع ...
جابهولي و قالي انتي واخده مسكنات بالك مش كويس يرضع ..
قتله صدري حسام خلاص .. شدني من ايدي و دخلني الحمام .. فتح الميه السخونه .. طلبت منه يطلع .. دوشت و لبست ملابسي .. و ارتحت شويه .. طلعت من الحمام رقدت ع السرير .. جت الممرضه دارتلي تغديه .. قالي حسام لازم تاكلي .. غصبي على روحك ..
بعدين بياخدوا مهاب يديروله تحاليل ..
قتله ليش ! 😳😳
قالي من المفترض يتبرع لي اخته .. قتله لا طفلي صغير مش ح نوافق يخش عمليات بكل ..
جى جنبي قالي المتبرع ما فيش عليه خوف بكل .. الموضوع بسيط و ما تخافيش .. على خاطر مريومه ..
خدوا مني مهاب و داروله تحاليل و صورة و كل شي .. و كنت كل شويه نخش لي مريومه نرضعها و نغيرلها ..
قلت لي حسام نبي نروح نغير ملابسي و نجيب ملابس و غيارات للصغار ..
قالي ما نقدرش نخليك تروحي بروحك .. قتله الصغار هنا من بيقعد معاهم !!
جى الدكتور و قال تقدروا تروحوا ما فيش داعي تقعدوا هنا .. قاله حسام ليش ؟
قاله لان خوها مش متطابق معاها للاسف ..
الصدمه كانت ليا و لي حسام مع بعض 😧💔
No name ♥️🌺
