[ စာသင်ကြားခြင်း ]
လျုံဝေ့၏ ကိုယ်ဖော့ပညာက ဝမ်လျန်နီးနီး
အဆင့်မြင့်၏။ထိုသူခိုးအား မိနစ်ပိုင်းအတွင်းမှာပင် မိလိုက်ပြီး မထနိုင်လောက်အောင် ပညာပေးကာ ရဲမက်လက်ထဲသို့ အပ်လိုက်သည်။ လှပစွာ ရက်လုပ်ထားသည့် ငွေအိတ်အား ပိုင်ရှင်မိန်းကလေးကိုရှာပြီး ပြန်အပ်လိုက်၏။
" ကျေးဇူးတင်ပါတယ် အစ်ကိုကြီး ဒီအိတ်ထဲ
ကျွန်မရဲ့ အဖိုးတန်ပစ္စည်း တချို့ပါလို့ပါ "
ထိုမိန်းကလေးငယ်ကား အိမ်တော်တစ်ခုခုမှ
သခင်မလေး ဖြစ်ဟန်တူသည်။ လှပကျော့ရှင်းစွာ ဝတ်ဆင်ထားပြီး ရုပ်ရည်ကလည်း စွဲမက်ဖွယ်ရာပင်ဖြစ်၏။ မိန်းမလှ တစ်ဦးနှင့် စကားပြောရလျှင် ရင်မခုန်ဘူးဆိုပါက အလိမ်အညာ စကားပင်။ လျုံဝေ့သည်လည်း ယောက်ျားတစ်ယောက်ပင်မို့
နားရွက်ဖျားများပင် နီရဲလာပေသည်။
" ရပါတယ် လမ်းကြုံကူညီပေးတာပဲ ကျေးဇူးတင်စရာ မလိုပါဘူး မိန်းကလေး "
" နေ့လည်စာတစ်နပ်လောက်တော့ ဝယ်ကျွေးပါစေ
ကျေးဇူးကြွေးမတင်ချင်လို့ပါ ကျွန်မတို့ အချင်းချင်း မိတ်ဆွေ ဖြစ်သွားကြရင် မိတ်ဆွေကောင်းတစ်ယောက် တိုးလာတာပေါ့ မဟုတ်ဘူးလား "
မိန်းကလေးက အတင်းဖိတ်ခေါ်နေရလျှင် သူမ၏
သိက္ခာအတွက် မကောင်းပေ။ ထို့ကြောင့် လျုံဝေ့လည်း မငြင်းဆန်တော့ပဲ သူမနှင့်အတူ ဆိုင်ကောင်းတစ်ခုသို့ လိုက်သွားလိုက်သည်။ စကားစမြည်ပြောဆိုကြရင်း သိရသည်က သူမသည် ရန်အိမ်တော်မှ သခင်မလေးဖြစ်၏။သူမနာမည်က
ရန်လင်မိန့် ဟု ခေါ်သည်။ မြို့တော်ထဲ
ခဏ အလည်အပတ်ထွက်လာရင်း.. သူမအဖော်ဖြစ်သည့် အစေခံကောင်မလေးနှင့် လမ်းကွဲသွားကာ
ငွေအိတ် အလုခံလိုက်ရခြင်းပင်။
သူမခေါ်သွားသည့်ဆိုင်က အထက်တန်းဆင့် စားသောက်ဆိုင် တစ်ခုဖြစ်သည်။ လျုံဝေ့က ချမ်းသာသော်လည်း အဝတ်အစားနှင့် ပတ်သက်၍ သိပ်ပြီးအရေးမထားသည်မို့ ရန်လင်မိန့်နှင့် သူမှာ သခင်မလေးနှင့် သက်တော်စောင့်သဖွယ် ထင်နေရတော့သည်။ ထို အခြင်းအရာကို လျုံဝေ့ကသတိထားမိသော်လည်း သူမကတော့ သတိမထားမိချေ။ လျုံဝေ့ကိုသာ ကောင်းကောင်း မွန်မွန် ဧည့်ဝတ်ကျေရန် တွေးတောနေ၏။
YOU ARE READING
Criminals Of The King
Historical Fictionနတ်ဆိုးဧကရာဇ်ကြီးသည် လေလံပွဲမှ ကျားဖြူပေါက်လေး တစ်ကောင်အား ဝယ်ယူမွေးစားခဲ့သည်။ ထိုကောင်လေးသည် သူ့ဘဝ၏ ကံကြမ္မာနှင့် ဆက်နွယ် လာလိမ့်မည်ဟု သူထင်မှတ်မထားခဲ့။ Own creation. Start Date_ April 27 , 2020 End Date _
