جبروت الشيخ هذال

الحلقة، 25

#جبروت_الشيخ_هذال_ج٢

علي الفتلاوي

#بارت٢٥

ﺍﺫﺍ ﻣﺎﺗﻨﺬﻛﺮ ﺑﺎﻟﺨﻴﺮ
ﺷﻨﻬﻲ ﺍﻟﻔﺎﻳﺪﻩ ﺑﺼﻴﺘﻚ
،،،،،،،،،،،،،،،،،،
ﺟﺒﺮﻭﺕ ﺍﻟﺸﻴﺦ ﻫﺬﺍﻝ
ﻟﻠﻜﺎﺗﺐ ﻋﻠﻲ ﺍﻟﻔﺘﻼﻭﻱ
،،،،،،،،،،،،،،،،،،،،
ﻫﻨﺪ،،ﺍﺻﻮﺍﺕ ﺍﻟﺼﺮﻳﺦ ﺍﺗﻌﺎﻟﺖ ﻭﻛﻠﻬﺎ ﺗﺮﻛﺾ ﻭﺭﻩ ﻛﺘﻠﻪ ﺍﻟﻨﺎﺭ ﻳﺮﺩﻭﻥ ﻳﻄﻔﻮﻫﺎ ﻭﻟﺤﺪ ﺍﻻﻥ ﻣﺎﺍﻋﺮﻑ ﺷﻨﻮ ﺍﻟﺠﺎﻱ ﻳﺼﻴﺮ ﺭﺟﻠﻴﻪ ﺛﮕﺎﻝ ﻣﺎﻳﺘﺤﺮﻛﻦ ﻭﻋﻴﻮﻧﻲ ﺟﺎﺣﻀﺎﺕ ﻋﻠﻴﻬﻢ
ﺍﺧﺮ ﺷﻲ ﺷﻔﺘﻪ ﺣﻴﺪﺭ ﺟﺎﺏ ﺑﻄﺎﻧﻴﻪ ﻭﺍﺣﺘﻀﻦ ﺍﻟﻜﺘﻠﻪ ﻃﻔﺎﻫﺎ ﺑﻌﺪﻫﺎ ﻣﺎﺍﺫﻛﺮ ﺷﻨﻮ ﺻﺎﺭ ﻻﻥ ﻭﮔﻌﺖ ﺍﻏﻤﺊ ﻋﻠﻴﻪ
ﻓﺘﺤﺖ ﻋﻴﻮﻧﻲ ﺍﻧﻪ ﺑﺤﺠﺮﺓ ﺍﻣﻲ ﻭﻫﺪﻳﻞ ﻭﻫﺎﻟﻪ ﻳﻤﻲ ﻳﺘﺒﺎﺟﻦ
ﺍﺭﻳﺪ ﺍﻓﻬﻢ ﺷﻨﻮ ﺍﻟﺼﺎﺭ ﻣﺎﮔﺪﺭ ﺍﺣﺠﻲ
ﺩﻣﻮﻋﻲ ﻧﺰﻟﻦ ﻣﻦ ﺫﻛﺮﺕ ﺍﻟﻤﻮﻗﻒ ﺍﻋﺮﻑ ﺍﻛﻮ ﺷﺨﺺ ﺣﺮﮒ ﻧﻔﺴﻪ ﻣﻦ ﺑﻴﺖ ﻋﻤﻲ ﺑﺲ ﻣﺎﺍﻋﺮﻑ ﻣﻨﻮ ﻫﻮ
ﮔﻮﺓ ﻃﻠﻌﺖ ﻣﻨﻲ ﺍﻟﻜﻠﻤﻪ ﻭﺳﺎﻟﺖ ﻫﺪﻳﻞ ﻣﻨﻮ ﺍﻻﺣﺘﺮﮒ ?
ﻫﺪﻳﻞ،،ﻣﺮﻭﺓ ﺣﺮﮔﺖ ﺭﻭﺣﻬﺎ
ﻫﻨﺪ،،ﻏﻤﻀﺖ ﻋﻴﻮﻧﻲ ﺣﻴﻞ ﻣﺎﻣﺼﺪﮔﻪ ﺍﻟﺨﺒﺮ ﺑﻘﻴﺖ ﻣﻐﻤﻀﻪ ﻭﺍﺩﻋﻴﻠﻬﺎ ﻛﻮﻥ ﺣﺮﻭﻕ ﺑﺴﻴﻄﻪ ﻭﺗﺼﺤﻪ ﻭﺗﺮﺟﻊ ﻣﺜﻞ ﻣﺎﺟﺎﻧﺖ ﺑﺲ ﺷﺘﺮﺟﻊ ﻭﻫﻲ ﺗﻘﺮﻳﺒﺎ ﺍﻛﺜﺮ ﻣﻦ ﺧﻤﺲ ﺩﻗﺎﻳﻖ ﺗﺮﻛﺾ ﻭﻫﻲ ﻣﺸﺘﻌﻠﻪ
ﮔﻠﺒﻲ ﺍﻧﻘﺒﺾ ﺭﺍﺣﺖ ﻫﺪﻳﻞ ﺟﺎﺑﺖ ﻣﻮﺑﺎﻳﻞ ﺍﻣﻲ
ﻻﻥ ﺍﻫﻠﻲ ﻭﻋﻤﺎﻣﻲ ﻛﻠﻬﻢ ﺑﺎﻟﻤﺴﺘﺸﻔﺊ ﺑﻘﻴﻨﻪ ﺑﺲ ﺍﻧﻪ ﻭﺍﺧﻮﺍﺗﻲ
ﻫﺪﻳﻞ ﺍﺗﺼﻠﺖ ﺟﺎﻭﺏ ﺍﺑﻮﻱ ﻭﻫﻮ ﻭﺻﻮﺗﻪ ﻣﺒﻴﻦ ﻣﺨﻨﻮﮒ
ﮔﺎﻝ ﺑﻮﻳﻪ ﺍﻧﺪﻋﻮ ﻟﺒﻨﻴﺔ ﻋﻤﻜﻢ
ﺭﺟﻌﻨﻪ ﻧﺘﺒﺎﺟﻪ ﻋﻠﻴﻬﺎ ﻭﻧﺪﻋﻴﻠﻬﺎ ﺗﻄﻠﻊ ﻃﻴﺒﻪ
ﺭﻏﻢ ﻣﺎﻋﺪﻧﻪ ﻋﻼﻗﻪ ﻭﻳﺎﻫﺎ ﻭﻃﺒﻌﻬﺎ ﻣﺜﻞ ﻃﺒﻊ ﺍﻣﻬﺎ ﺗﺒﺎﻭﻉ ﻟﻠﻨﺎﺱ ﺑﺘﻌﺎﻟﻲ ﻭﻣﻦ ﻭﺭﺓ ﺧﺸﻤﻬﺎ ﺑﺲ ﻣﺎﺗﻤﻨﻴﻨﻪ ﻳﺼﻴﺮ ﺑﻴﻬﺎ ﻫﻴﺞ ﺿﻠﻴﻨﻪ ﻧﺒﺠﻲ ﻭﻧﻨﺪﻋﻲ
ﻟﻠﺴﺎﻋﻪ 12 ﺑﻠﻴﻞ ﺳﻤﻌﺖ ﺻﺮﺧﺔ ﺍﺑﻴﺘﻨﻪ ﻃﻔﺮﺕ ﺍﺭﻛﺾ ﻟﮕﻴﺖ ﻫﺎﻟﻪ ﮔﺎﻋﺪﺓ ﮔﻌﻮﺩ ﺍﺩﮒ ﻋﻠﺊ ﻭﺟﻬﺎ ﻭﺗﺼﻴﺢ
ﻣﺎﺗﺖ ﻣﺎﺗﺖ ﻣﺎﺗﺘﺘﺖ
ﻛﺰﺑﺮ ﺟﻠﺪﻱ ﻭﮔﻌﺪﺕ ﻳﻤﻬﺎ ﺍﺗﻜﺎﺑﻠﻨﻪ ﻧﺘﺼﺎﺭﺥ ﻭﻧﻠﻄﻢ ﻋﻠﺊ ﺑﻨﻴﺔ ﻋﻤﻨﻪ ﻭﻋﻠﺊ ﺷﺒﺎﺑﻬﺎ ﻭﺭﻭﻳﺤﺘﻬﺎ ﺍﻟﺨﺴﺮﺗﻬﺎ
ﺭﻛﻀﻨﻪ ﺍﻟﺒﻴﺖ ﻋﻤﻲ ﻣﺮﺓ ﺣﻴﺪﺭ ﻭﺳﻬﺊ ﮔﺎﻟﺒﺎﺕ ﺍﻟﻤﻨﻄﻘﻪ ﺑﺎﻟﺼﺎﻳﺢ ﺍﻟﻌﺎﻟﻢ ﻛﻠﻬﺎ ﻣﻠﺘﻤﻪ ﺑﺎﻟﺒﻴﺖ
ﺍﻧﻲ ﻭﺍﺧﻮﺍﺗﻲ ﻫﻢ ﮔﻌﺪﻧﻪ ﻭﻳﺎﻫﻦ ﻭﺍﻟﻨﺴﻮﺍﻥ ﺗﺘﺼﺎﺭﺥ
ﺏ ﺍﻟﺜﻨﺘﺒﻦ ﺭﺟﻌﻮ ﺍﻫﻠﻲ ﻭﺟﺎﺑﻮ ﻣﺮﺓ ﻋﻤﻲ ﻭﻳﺎﻫﻢ
ﺍﻭﻝ ﻣﺮﺓ ﺍﺷﻮﻓﻬﺎ ﺑﻬﻴﺞ ﻣﻨﻀﺮ ﻭﻫﻴﺞ ﻣﻮﻗﻒ ﺍﻟﻌﺪﻭﻱ ﻣﺎﺗﻤﻨﻴﺘﻪ
ﺟﺎﻧﺖ ﺷﺎﮔﻪ ﺍﻟﺜﻮﺏ ﻣﻦ ﺍﻟﻄﻮﻝ ﻟﻠﻄﻮﻝ ﻭﺍﻟﻮﺟﻪ ﻣﺨﺮﻣﺶ ﻭﺍﻟﺸﻌﺮ ﻣﻨﻔﻮﺵ ﮔﻮﺓ ﺣﺎﻃﻪ ﺍﻣﻲ ﻋﺒﺎﻳﺘﻬﺎ ﻋﻠﺊ ﻣﺘﻮﻧﻬﺎ ﺍﻭﻝ ﻣﺎﮔﻌﺪﻧﻬﺎ ﺑﺎﻟﮕﺎﻉ ﺩﻓﻌﺘﻬﻦ
ﻭﻣﺪﺕ ﺍﺩﻳﻬﺎ ﺍﻟﺮﺍﺳﻬﺎ ﺷﻠﻌﺖ ﺷﻌﺮﻫﺎ ﻭﻛﻮﻣﺘﻪ ﺑﺎﻟﮕﺎﻉ
ﺍﻣﻲ ﻭﺍﺧﺘﻬﺎ ﻭﺍﻧﻲ ﮔﻌﺪﻧﻪ ﻳﻤﻬﺎ ﺍﻧﺮﻳﺪ ﻧﺰﻟﻤﻬﺎ ﻣﺎﻧﮕﺪﺭ ﻣﻠﺨﺖ ﺭﻭﺣﻬﺎ ﻭﺍﺩﮒ ﻭﺗﻠﻄﻢ
ﻟﻠﺴﺎﻋﻪ ﺧﻤﺴﻪ ﺍﻟﻔﺠﺮ ﻳﺎﻟﻠﻪ ﺟﺎﺑﻮ ﺍﻟﺠﻨﺎﺯﺓ ﺍﻭﻭﻭﻑ ﻳﺎﻣﺮﻭﺓ ﻭﺍﻟﻠﻪ ﺻﻌﺒﻪ ﺍﮔﻮﻝ ﻋﻨﺞ ﺍﺟﻨﺎﺯﺓ
ﺟﺎﺑﻮﻫﺎ ﻭﺷﻤﺮﻧﻪ ﺍﺭﻭﺍﺣﻨﻪ ﻉ ﺍﻟﺘﺎﺑﻮﺕ ﻭﻋﻤﺎﻣﻲ ﺑﻠﻐﻮ ﺍﻟﻌﺎﻟﻢ ﺍﻟﺘﺸﻴﻊ ﺏ ﺛﻤﺎﻧﻴﻪ ﺍﻟﺼﺒﺢ ﺍﻟﺠﻮ ﺣﺎﺭ ﻣﺎﺗﺘﺤﻤﻞ ﺗﺒﻘﺊ ﻟﻠﻀﻬﺮ ﻭﻓﻮﮒ ﻛﻠﺸﻲ ﺣﺮﮒ
ﺑﺎﻟﺒﺪﺍﻳﻪ ﻣﺎﻗﺒﻠﻮ ﻳﻨﻄﻮﻥ ﺍﻟﺠﺜﻪ ﺭﺍﺩﻭ ﻳﺸﺮﺣﻮﻥ ﺑﺲ ﺍﺑﻮﻱ ﻳﻌﺮﻑ ﻗﺎﺿﻲ ﻣﻦ ﺟﻤﺎﻋﺘﻪ ﺧﻠﺼﻬﺎ ﺍﻟﻬﻢ ﮔﺎﻟﻬﻢ ﻫﻲ ﻣﺘﻌﺬﺑﻪ ﺍﻧﻮﺏ ﺍﺗﺸﺮﺣﻮﻫﺎ
ﻭﺍﺑﻮﻱ ﻫﻢ ﺍﻧﻄﻪ ﺍﻻﺳﺒﺎﺏ ﻟﻠﻘﺎﺿﻲ ﻭﮔﺎﻟﻪ ﺑﺴﺒﺐ ﺯﻭﺟﻬﺎ
ﻭﺳﺪﻭ ﺍﻟﺴﺎﻟﻔﻪ ﻣﻦ ﺟﻬﺔ ﺍﻟﺪﻭﻟﻪ ﺑﺲ ﻣﻦ ﺟﻬﺔ ﺍﻟﻌﺸﺎﻳﺮ ﺑﻌﺪﻫﻢ ﻣﻨﺘﻀﺮﻳﻦ ﺗﻨﺘﻬﻲ ﺍﻟﻔﺎﺗﺤﻪ ﻭﻳﮕﻌﺪﻭﻥ ﺍﻟﻌﺸﻴﺮﺗﻴﻦ
ﻋﻴﺎﻟﻲ ﺍﺟﻮ ﻛﻠﻬﻢ ﻭﺣﺘﺊ ﻫﺬﺍﻝ ﻣﻦ ﺭﺍﺩ ﻳﺤﺠﻲ ﻭﻳﺎﻱ ﺧﺎﺑﺮﻧﻲ ﮔﺎﻝ ﻻﺍﻃﻠﻌﻴﻦ ﺍﻫﻮﺍﻱ ﻭﺍﺩﻡ ﺑﻤﻀﻴﻔﻜﻢ ﻳﻌﺰﻭﻥ ﺍﻧﻲ ﻣﻦ ﺗﻨﺘﻬﻲ ﺍﻟﻔﺎﺗﺤﻪ ﺍﺟﻲ ﺍﺧﺬﺝ
ﻭﺻﺎﻧﻲ ﺍﺧﺬ ﻋﻼﺟﻲ ﻭﺍﺩﺑﺮ ﺑﺎﻟﻲ ﻋﻠﺊ ﺭﻭﺣﻲ
ﺑﻌﺪﻫﺎ ﺭﺍﺣﻮ ﻭﺍﻧﻲ ﻭﺍﺧﻮﺍﺗﻲ ﺍﻓﺘﺮﻳﻨﻪ ﻣﻦ ﻭﺭﺓ ﺍﻟﺒﻴﺖ ﺭﺣﻨﻪ ﺍﻟﺒﻴﺖ ﻋﻤﻲ ﻣﺤﺰﻣﻴﻦ ﺑﻌﺒﻴﻨﻪ
ﺍﻧﻪ ﻭﻫﺪﻳﻞ ﻭﮔﻔﻨﻪ ﻉ ﺍﻟﭽﺎﻱ ﻭﻫﺎﻟﻪ ﺗﻮﺯﻉ ﻣﺎﻱ
ﺍﻟﻨﺴﻮﺍﻥ ﺭﺍﻳﺤﻪ ﺭﺍﺩﺓ ﻭﻣﺮﺓ ﻋﻤﻲ ﻣﺎﻻﺑﺴﻪ ﺍﻫﺪﻭﻡ ﺍﻱ ﺛﻮﺏ ﻧﻠﺒﺴﻪ ﺍﻟﻬﺎ ﺗﺸﮕﻪ ﻋﻠﻴﻬﺎ
ﺑﺪﺍﺧﻠﻲ ﺍﻧﺪﻋﻴﻠﻬﺎ ﺍﻟﻠﻪ ﻳﺼﺒﺮﻫﺎ ﺻﻌﺐ ﺍﺗﺸﻮﻑ ﺍﻧﺴﺎﻥ ﻣﺘﻜﺒﺮ ﻭﻗﻮﻱ ﻳﻨﻜﺴﺮ ﻫﻠﻜﺴﺮﻩ ﻫﺎﻱ
ﺍﺑﺎﻭﻉ ﺟﺴﻤﻬﺎ ﻣﺎﻛﻮ ﻟﻮﻥ ﺑﺸﺮﻩ ﻃﺒﻴﻌﻲ ﺟﺴﻤﻬﺎ ﻛﻠﻪ ﻋﺒﺎﺭﺓ ﻋﻦ ﻃﮕﻊ ﺍﺯﺭﮒ ﻣﻦ ﺍﻟﻠﻄﻢ
ﻟﻠﻴﻞ ﺍﺣﻨﻪ ﻭﺍﮔﻔﻴﻦ ﻭﮔﻮﻑ ﺑﺎﻟﻤﻄﺒﺦ ﻻﻥ ﻋﺎﻟﻢ ﺍﻫﻮﺍﻱ ﻭﻏﻴﺮ ﺍﻟﻌﺸﻪ ﺍﻛﻮ ﺍﻗﺎﺭﺏ ﻣﺤﺎﻓﻀﺎﺕ ﺍﺿﻄﺮﻭ ﻳﺒﻘﻮﻥ
ﮔﻤﻨﻪ ﺣﻀﺮﻧﻪ ﺍﻟﻌﺸﻪ ﺍﻟﻬﻢ ﻭﺍﻣﻲ ﻭﻳﺎﻧﻪ ﻣﺤﺰﻣﻪ ﺍﺣﺰﺍﻡ
ﺑﺲ ﺣﺒﻮﺑﺘﻲ ﺧﻄﻴﻪ ﻭﺿﻌﻬﺎ ﺣﻴﻞ ﺍﺩﻫﻮﺭ ﻛﻞ ﺷﻮﻳﻪ ﺗﺎﺧﺬ ﺣﺒﺎﻳﻪ ﺷﻜﻞ ﺍﻟﻀﻐﻂ ﻭﺍﻟﺴﻜﺮ ﺻﺎﻋﺪﺍﺕ ﻋﺪﻫﺎ
ﻭﻫﻲ ﻣﺮﺓ ﺟﺒﻴﺮﺓ ﺻﺤﺘﻬﺎ ﻋﻠﺊ ﮔﺪﺍﻫﺎ ﺑﻴﺒﻴﺘﻲ ﺑﻴﻬﺎ ﻃﺒﻊ ﻣﺎﺗﺒﺠﻲ ﺑﺲ ﺍﺗﻀﻞ ﺍﺩﮒ ﻋﻠﺊ ﺻﺪﺭﻫﺎ
ﺍﺗﻀﻢ ﺍﻟﺤﺮﮔﻪ ﺑﮕﻠﺒﻬﺎ ﻭﻫﻠﺸﻲ ﻣﺎﻳﺼﻴﺮ ﻻﻥ ﻳﻤﺮﺽ
ﺻﺎﺭﺕ ﺍﻟﺴﺎﻋﻪ ﺏ 10 ﺑﻠﻴﻞ ﺭﺟﻌﻨﻪ ﻟﻠﺒﻴﺖ ﺫﺑﻴﺖ ﺭﻭﺣﻲ ﻧﻌﺴﺎﻧﻪ
ﮔﻌﺪﺕ ﺍﻟﺼﺒﺢ ﻫﺪﻳﻞ ﮔﺎﻟﺖ ﺯﻟﻤﺘﺞ ﺍﺗﺼﻞ ﻭﻣﻦ ﮔﻠﻨﺎﻟﻪ ﻧﺎﻳﻤﻪ ﮔﺎﻝ ﻋﻮﻓﻮﻫﺎ ﻟﺘﮕﻌﺪﻭﻫﺎ
ﺑﻌﺪﻫﺎ ﺳﺒﺤﺖ ﻭﻟﺒﺴﺖ ﺛﻮﺏ ﺍﺳﻮﺩ ﻃﺒﻌﺎ ﻋﻨﺪﻱ ﻣﻼﺑﺲ ﺳﻮﺩ ﺗﺮﻛﺘﻬﻢ ﻳﻢ ﺍﻫﻠﻲ ﻣﻦ ﺍﺗﺰﻭﺟﺖ ﺍﻣﻲ ﻣﺎﻗﺒﻠﺖ ﺍﺧﺬﻫﻦ ﻭﻳﺎﻱ ﮔﺎﻟﺖ ﻋﺮﻭﺱ ﺷﻌﻨﺪﺝ ﻣﺎﺧﺬﺓ ﺍﻻﺳﻮﺩ ﻭﻳﺎﺝ ﻓﺎﻝ ﺷﺌﻢ ﻭﻓﻌﻼ ﺗﺮﻛﺘﻬﻦ ﻳﻢ ﺍﻫﻠﻲ
ﻛﻤﻠﺖ ﻭﻃﻠﻌﺖ ﻣﺸﻄﺖ ﻭﻟﻔﻴﺖ ﺷﻌﺮﻱ ﻟﺒﺴﺖ ﺣﺠﺎﺑﻲ ﻭﻟﻔﻴﺖ ﺍﺣﺰﺍﻣﻲ ﻟﮕﻴﺖ ﺍﺧﻮﺍﺗﻲ ﻣﺎﺷﻴﺎﺕ ﺟﺪﺍﻣﻲ
ﻃﻠﻌﺖ ﻭﻗﻔﻠﺖ ﺍﻟﺒﻴﺒﺎﻥ ﻣﺎﻝ ﺍﻫﻠﻲ ﻣﺸﻴﺖ ﻭﺭﻩ ﺍﻟﺒﻴﺖ ﻭﺟﺎﻥ ﺍﺷﻮﻑ ﺍﻟﺴﺎﺣﻪ ﻣﻠﻴﺎﻧﻪ ﺳﻴﺎﺭﺍﺕ ﻭﺯﻟﻢ ﻭﺍﮔﻔﻪ ﻭﻣﻌﮕﻠﻪ
ﻓﺘﺤﺖ ﻋﺒﺎﺗﻲ ﻭﻟﺒﺴﺘﻬﺎ ﻋﺪﻝ ﻭﺧﻠﻴﺘﻬﺎ ﻣﻦ ﺟﻬﺘﻢ ﻏﻄﻴﺖ ﻭﺟﻬﻲ ﺣﺘﺊ ﻣﺤﺪ ﻳﺸﻮﻓﻨﻲ
ﻭﺻﻠﺖ ﺍﻟﺒﻴﺖ ﻋﻤﻲ ﺍﺗﻠﮕﺎﻧﻲ ﺣﻴﺪﺭ ﺑﺲ ﺣﻴﻴﻞ ﺗﻌﺒﺎﻥ ﻳﻤﻜﻦ ﺍﺧﺮ ﻣﺮﺓ ﺷﻔﺘﻪ ﻣﻦ ﺍﺧﺬﻧﻪ ﻟﻠﺼﺎﻟﻮﻥ ﺑﺲ ﻫﻢ ﺟﺎﻧﺖ ﺣﺎﻟﺘﻪ ﺍﺣﺴﻦ ﻣﻦ ﻫﺴﻪ
ﺣﺎﻟﻴﺎ ﻋﺒﺎﺭﺓ ﻋﻦ ﺟﻠﺪ ﻭﻋﻀﻢ ﻭﻟﺤﻴﺘﻪ ﻋﺎﻟﻴﻪ
ﺭﻓﻊ ﺭﺍﺳﻪ ﺑﺎﻭﻋﻠﻲ ﺑﺘﻌﺐ ﻭﺩﻧﮓ ﻟﻤﺤﺖ ﺑﻌﻴﻮﻧﻪ ﺩﻣﻌﻪ ﺑﺲ ﺑﺴﺮﻋﻪ ﺩﺍﺭ ﻭﺟﻬﺎ ﺭﺩﺕ ﺍﮔﻠﻪ ﺍﻟﺒﻘﻴﻪ ﺑﺤﻴﺎﺗﻚ ﺑﺲ ﺑﺴﺮﻋﻪ ﻃﻠﻊ ﻣﻦ ﺍﻟﺒﻴﺖ
ﺩﺧﻠﺖ ﺟﺎﻧﻮ ﻧﺎﺻﺒﻴﻦ ﭼﺎﺩﺭ ﺑﺎﻟﺤﺪﻳﻘﻪ ﻟﻠﻨﺴﻮﺍﻥ ﻻﻥ ﺍﻟﺒﻴﺖ ﻣﺎﻳﺎﺧﺬﻫﻦ
ﺍﻟﻴﻮﻡ ﻧﺴﻮﺍﻥ ﺍﻛﺜﺮ ﻣﻦ ﺍﻣﺲ ﻭﺍﻟﻜﻞ ﺗﺘﺼﺎﺭﺥ
ﻭﻫﻢ ﻭﮔﻔﻨﻪ ﻉ ﺍﻟﭽﺎﻱ ﻭﺍﻟﻤﺎﻱ ﻭﺍﻟﻄﺒﺦ ﻟﻠﻴﻞ ﺍﺣﺲ ﺣﻴﻠﻲ ﺍﻧﻬﺪ
ﺭﺟﻌﺖ ﺑﻠﻴﻞ ﻟﻬﻠﻲ ﺍﻧﻲ ﻭﺍﺧﻮﺍﺗﻲ ﺗﻮﻧﻲ ﺭﺩﺕ ﺍﻧﺎﻡ ﺍﺗﺼﻞ ﻫﺬﺍﻝ
ﺟﺎﻭﺑﺘﻪ ﻭﻣﺒﻴﻦ ﺑﺼﻮﺗﻲ ﺍﻟﺘﻌﺐ
ﻫﺬﺍﻝ،،ﺍﺷﻠﻮﻧﻬﺎ ﺍﻡ ﺍﻻﻛﺒﺮ ?
ﻫﻨﺪ،،ﺍﺷﻠﻮﻧﻲ ﻣﺎﻟﻲ ﻟﻮﻥ
ﻫﺬﺍﻝ،،ﻟﻴﺶ ﺑﻮﻳﻪ ?
ﻫﻨﺪ،،ﺍﺧﺘﻨﮕﺖ ﺑﻌﺒﺮﺗﻲ ﺍﺫﻛﺮ ﻣﺪﺍﻫﺮﻧﻪ ﺍﻧﻪ ﻭﻣﺮﻭﺓ ﻟﺤﺪ ﺍﻻﻥ ﻣﺎﻣﺼﺪﮔﻪ ﻣﺎﺗﺖ
ﻫﺬﺍﻝ،،ﮔﻮﻟﻲ ﻳﺎﺍﻟﻠﻪ ﺑﻮﻳﻪ ﻫﺬﺍ ﺣﺪ ﻳﻮﻣﻬﺎ
ﺗﻌﺪﺩﺕ ﺍﻻﺳﺒﺎﺏ ﻭﺍﻟﻤﻮﺕ ﻭﺍﺣﺪ
ﺑﺪﻝ ﻣﺎﺗﺒﺠﻴﻦ ﺍﻗﺮﻳﻠﻬﺎ ﺍﻟﻔﺎﺗﺤﻪ ﻭﺍﻗﺮﻳﻠﻬﺎ ﻗﺮﺍﻥ
ﻫﻨﺪ،،ﺑﺲ ﺍﻧﻪ ﻣﻮﻛﻠﺶ ﺍﻋﺮﻑ ﺍﻏﺮﻩ ﻏﺮﺍﻥ
ﻫﺬﺍﻝ،،ﻳﻜﻔﻲ ﺗﺬﻛﺮﻳﻬﺎ ﺑﺴﻮﺭﺓ ﺍﻟﻔﺎﺗﺤﻪ
ﻣﺎﻛﺘﻴﻠﻲ ﺍﺷﻠﻮﻧﺞ ﺍﺑﻮﺝ ﺍﺷﻠﻮﻧﻪ ?
ﺍﻟﻴﻮﻡ ﻣﺎﮔﺪﺭﺕ ﺍﺟﻲ ﻟﻠﻔﺎﺗﺤﻪ ﺍﻧﺸﺎﺀﺍﻟﻠﻪ ﺑﺎﺟﺮ ﺍﺟﻲ
ﻫﻨﺪ،،ﻧﻬﻴﻨﻪ ﺍﻟﻤﻜﺎﻟﻤﻪ ﻣﻦ ﺷﺎﻓﻨﻲ ﻧﻌﺴﺎﻧﻪ
ﺫﺑﻴﺖ ﺭﻭﺣﻲ ﺑﺴﺮﻋﻪ ﻏﻔﻴﺖ
ﻓﺘﺤﺖ ﻋﻴﻮﻧﻲ ﺟﺎﻥ ﺍﺷﻮﻑ ﻣﺮﻭﺓ ﻧﺎﻳﻤﻪ ﻳﻤﻨﻪ ﺑﺎﻟﻐﺮﻓﻪ ﻭﻣﺎﻋﻠﻴﻬﺎ ﻏﻴﺮ ﭼﻔﻨﻬﺎ ﻣﻐﻄﺎﻳﻪ ﺑﻲ ﻣﺜﻞ ﺍﻟﺠﺮﺟﻒ
ﺷﻮﻳﻪ ﺷﻮﻳﻪ ﻧﺰﻝ ﺍﻟﺠﺮﺟﻒ ﻋﻦ ﻭﺟﻬﺎ ﻭﺟﺴﻤﻬﺎ ﻭﺑﻴﻨﺖ ﻭﺷﻔﺘﻬﺎ ﺍﺷﻠﻮﻥ ﻣﺤﺮﻭﮔﻪ
ﻳﺒﺴﺖ ﺑﺪﻣﻲ ﻣﻦ ﺍﻟﺨﻮﻑ ﻭﺍﺗﻘﺮﺑﺖ ﻳﻤﻬﺎ ﺍﺭﻳﺪ ﺍﺷﻮﻓﻬﺎ ﺟﺎﻥ ﻓﺠﺄﻩ ﻓﺘﺤﺖ ﻋﻴﻮﻧﻬﺎ ﺍﻧﻲ ﻣﻦ ﺧﻮﻓﻲ ﻃﻔﺮﺕ ﻟﻠﺒﺎﺏ ﻭﻫﻲ ﺗﺮﻳﺪ ﺗﻠﺰﻣﻨﻲ
ﺍﻓﺘﺢ ﺑﺎﻟﺒﺎﺏ ﻣﺎﻳﻨﻔﺘﺢ ﻭﺍﺻﻴﺢ ﺑﻌﻠﻮ ﺻﻮﺗﻲ ﺗﺎﻟﻲ ﺻﺤﻴﺖ ﻋﻠﺊ ﺭﺷﻪ ﻣﺎﻱ ﻗﻮﻳﻪ ﻋﻠﺊ ﻭﺟﻬﻲ ﺭﻓﻌﺖ ﺭﺍﺳﻲ ﺍﻣﻲ ﻭﺍﺑﻮﻱ ﻭﺍﺧﻮﺍﺗﻲ ﺩﺍﻳﺮ ﻣﺪﺍﻳﺮﻱ
ﺍﻣﻲ ﻣﺨﻠﻴﻪ ﺭﺍﺳﻲ ﺑﺤﻀﻨﻬﺎ ﻭﺗﻐﺮﻩ ﻏﺮﺁﻥ
ﻭﺍﻧﻪ ﻣﺎﻣﺼﺪﮔﻪ ﻫﺬﺍ ﺣﻠﻢ ﻋﺒﺎﻟﻚ ﺣﻐﻴﻐﻪ ﺿﻠﻴﺖ ﺍﺑﺎﻭﻉ ﺑﻤﻜﺎﻥ ﻣﺮﻭﺓ ﺍﺣﺴﻬﺎ ﺑﻌﺪﻫﺎ ﻣﻮﺟﻮﺩﺓ
ﻫﺪﻳﻞ ﺟﺎﺑﺘﻠﻲ ﻣﺎﻱ ﻭﺍﻣﻲ ﺗﻔﺮﻙ ﺑﺼﺪﺭﻱ ﻭﺗﻐﺮﺓ ﺍﻳﺎﺕ ﻭﺗﻨﻔﺦ ﺑﻮﺟﻬﻲ ﻭﺍﻧﻪ ﺍﺭﺟﻒ ﺣﺘﺊ ﻣﺎﺍﮔﺪﺭ ﺍﺣﺠﻲ ﻭﺍﺣﺲ ﻧﻔﺴﻲ ﺛﮕﻴﻞ ﻭﺍﻃﺮﺍﻓﻲ ﻣﻴﺘﻪ
ﺑﻌﺪ ﺭﺑﻊ ﺳﺎﻋﻪ ﺍﺳﺘﻘﺮﺕ ﺣﺎﻟﺘﻲ ﻭﺣﺠﻴﺖ ﻝ ﺍﻣﻲ ﺍﻟﺤﻠﻢ
ﺍﻡ ﻫﻨﺪ،،ﺳﻮﺩﺓ ﺑﻮﺟﻬﻲ ﻳﻴﻤﻪ ﺑﺲ ﻻﺻﺎﺭﺕ ﻋﻨﺪﺝ ﺩﻭﺳﻪ ﻻﻥ ﺍﻟﺴﺎﻟﻔﻪ ﺻﺎﺭﺕ ﻭﻳﻪ ﺍﻟﻐﺮﻭﺏ
ﻫﻨﺪ،،ﺑﻌﺪﻫﺎ ﻫﺪﻳﻞ ﺟﺎﺑﺖ ﻛﺘﺎﺏ ﺍﻟﻠﻪ ﺧﻠﺘﻪ ﺟﻮﻩ ﺭﺍﺳﻲ ﻭﻧﻤﺖ ﺑﺲ ﻓﺰﻳﺖ ﺏ ﺍﻟﺴﺘﻪ ﺍﻟﺼﺒﺢ
ﮔﻌﺪﺕ ﻏﺴﻠﺖ ﻟﻔﻴﺖ ﺣﺠﺎﺑﻲ ﺻﻠﻴﺖ ﻭﺍﺗﺤﺰﻣﺖ ﺷﺮﺑﺖ ﺍﺳﺘﻜﺎﻥ ﺟﺎﻱ ﻭﺍﻧﻲ ﻭﺍﮔﻔﻪ ﺑﺲ ﺣﻠﻢ ﺍﻣﺲ ﻣﺎﺭﺍﺡ ﻣﻦ ﺑﺎﻟﻲ
ﻃﻠﻌﺖ ﺍﺭﻳﺪ ﺍﺭﻭﺡ ﺍﻟﺒﻴﺖ ﻋﻤﻲ ﻭﺟﺎﻥ ﺍﺷﻮﻑ ﺍﻟﺴﺎﺣﻪ ﻣﻠﻴﺎﻧﻪ ﻛﺎﺳﺎﺕ ﻣﺎﻱ ﻓﺎﺭﻏﻪ ﻭﺑﻴﻬﺎ ﻭﺻﺦ ﻻﺯﻡ ﻳﻨﻜﻨﺲ ﺍﻟﻴﻮﻡ ﺍﻟﺜﺎﻟﺚ ﻣﺎﻝ ﻣﺮﻭﺓ ﻭﺍﻟﻌﺎﻟﻢ ﻧﻔﺮﺷﻠﻬﻢ ﺑﺎﻟﺴﺎﺣﻪ ﻳﺘﻌﺸﻮﻥ
ﺑﻴﺖ ﺍﻫﻠﻲ ﻭﺑﻴﺖ ﻋﻤﻲ ﺑﻴﻨﻬﻢ ﺳﺎﺣﻪ ﻛﻢ ﻣﺘﺮ ﻋﺮﺿﻬﺎ ﺑﺲ ﻃﻮﻟﻬﺎ ﻃﻮﻳﻠﻪ ﻋﻠﺊ ﻃﻮﻝ ﺍﻟﺒﻴﺘﻴﻦ ﻣﺨﻠﻴﻬﺎ ﻟﻠﻌﺰﺍﻳﻢ ﻧﻔﺮﺵ ﺑﻴﻬﺎ ﻟﻠﺨﻄﺎﺭ ﮔﻌﺪﺓ ﻋﺮﺏ ﺯﻭﺍﻟﻲ
ﻣﺨﻠﻴﻦ ﺍﻧﺎﺭﺓ ﺑﺲ ﺟﺪﺍﻡ ﺍﻟﺒﻴﺘﻴﻦ ﺑﺲ ﻣﻦ ﻭﺭﻩ ﺿﻠﻤﻪ ﻣﺎﻣﺨﻠﻴﻦ ﺿﻮﻩ
ﺍﺧﺬﺕ ﻣﺸﻮﺍﻑ ﻣﺎﻝ ﻧﺨﻞ ﻳﻌﻨﻲ ﻋﺜﮓ ﻳﺎﺑﺲ ﻣﺎﻝ ﺗﻤﺮ ﻛﻨﺴﺖ ﺑﻲ ﺍﻟﺴﺎﺣﻪ ﻟﻤﻴﺖ ﺍﻟﺰﺑﺎﻟﻪ ﺣﺸﻪ ﺍﻟﺴﺎﻣﻊ ﺳﻤﻌﺖ ﺣﻴﺪﺭ ﺻﺎﺡ ﺑﻴﻪ ﻻﻥ ﺩﻧﮕﺖ ﺍﻟﻢ ﺍﻟﺰﺑﺎﻟﻪ
ﺣﻴﺪﺭ،،ﻫﻨﺪﺩﺩ ﺍﺗﺮﻛﻲ ﺍﻟﺒﻴﺪﺝ ﻭﻓﻮﺗﻲ ﻟﻠﺒﻴﺖ ﻫﺴﻪ ﺍﻧﻮﺭ ﻭﻋﺒﺪﺍﻟﻠﻪ ﻳﻠﻤﻮﻥ ﺍﻟﻮﺻﺦ ﻋﻮﻓﻲ ﺑﻤﻜﺎﻧﻪ ﺭﺍﺡ ﺗﺠﻲ ﺍﻟﻮﺍﺩﻡ
ﻫﻨﺪ،،ﺍﻧﻪ ﻫﻢ ﻣﺎﺟﺬﺑﺖ ﺍﻟﺨﺒﺮ ﻭﺫﺑﻴﺖ ﺍﻟﻤﺸﻮﺍﻑ ﻻﻥ ﺍﻧﻜﺴﺮ ﺿﻬﺮﻱ ﻣﻦ ﺍﻟﻜﻨﺲ ﺍﻟﺴﺎﺣﻪ ﻏﺪﺓ ﺗﻠﻬﺚ ﻣﻦ ﺍﻟﻨﻀﺎﻓﻪ
ﻣﺎﮔﺪﺭﺕ ﺍﺭﻭﺡ ﺍﻟﻌﻤﺎﻣﻲ ﺛﻮﺑﻲ ﺻﺎﺭ ﻛﻠﻪ ﺍﺗﺮﺍﺏ ﻣﻦ ﺍﻟﻜﻨﺲ ﺭﺟﻌﺖ ﻟﻬﻠﻲ ﺍﺧﺬﺕ ﺛﻮﺏ ﺛﺎﻧﻲ ﻭﺣﺠﺎﺏ ﻭﺩﺧﻠﺖ ﺳﺒﺤﺖ ﺑﺲ ﺟﺴﻤﻲ ﻭﻃﻠﻌﺖ
ﻫﺪﻳﻞ،،ﺍﻧﺘﻲ ﺍﻫﻨﺎ ﺑﻌﺪﺝ ?
ﻳﺎﻟﻠﻪ ﻳﻤﻌﻮﺩﺓ ﺍﻟﻴﻮﻡ ﺍﻟﺜﺎﻟﺚ ﻭﻋﻤﻲ ﺟﺎﺏ ﻏﺮﺍﺽ ﺍﻟﺼﻴﻨﻴﻪ ﻭﻋﺼﻴﺮ ﻭﻛﻴﻚ ﮔﺎﻝ ﺧﻠﻮﻫﻦ ﺑﭽﻴﺎﺱ ﺍﻭﺯﻋﻮﻫﻦ ﺑﺜﻮﺍﺑﻬﺎ ﻳﺎﻟﻠﻪ ﻣﺎﻧﻠﺤﮓ ﺣﺘﺊ ﻧﺠﻬﺰﻫﻦ ﻻﻥ ﺍﻟﻴﻮﻡ ﺍﻟﻤﻠﻪ ﺗﺨﺘﻢ
ﻫﻨﺪ،،ﺩﻗﻴﻘﻪ ﺑﺲ ﺍﻟﻒ ﺣﺰﺍﻣﻲ ﻓﺪﻭﺓ ﺟﻴﺒﻴﻠﻲ ﻋﺒﺎﻳﻪ ﻣﻦ ﻋﻨﺪﺝ ﻋﺒﺎﺗﻲ ﺍﻧﺘﺮﺳﺖ ﺍﺗﺮﺍﺏ ﻭﺫﺑﻴﺘﻬﺎ ﺑﺎﻟﻐﺴﺎﻟﻪ
ﻫﺎﻟﻪ، ،ﺍﻓﺘﺤﻲ ﻛﻨﺘﻮﺭﻱ ﺍﺧﺬﻳﻠﺞ ﻭﺣﺪﺓ ﺍﻧﻪ ﺍﻧﺘﻀﺮﺝ ﺍﻧﺮﻭﺡ ﺳﻮﺓ
ﻫﻨﺪ،،ﺑﺴﺮﻋﻪ ﻟﻔﻴﺖ ﺍﻟﻌﺒﺎﻳﻪ ﻋﻠﺊ ﺧﺼﺮﻱ ﻭﻋﺪﻟﺖ ﺣﺠﺎﺑﻲ ﻭﻃﻠﻌﺖ ﻭﻳﻪ ﻫﺎﻟﻪ ﺭﺣﻨﻪ ﺍﻟﻌﻤﺎﻣﻲ
ﻟﮕﻴﺖ ﺍﻟﺤﻮﺵ ﻣﺎﻛﻮ ﻣﺠﺎﻝ ﺍﻓﻮﺕ ﻣﻦ ﺍﻟﻨﺴﻮﺍﻥ
ﺑﺎﻟﮕﻮﺓ ﺳﻮﻟﻨﻪ ﺩﺭﺏ ﺩﺧﻠﻨﻪ ﻟﻠﻤﻄﺒﺦ ﺑﺪﻳﻨﻪ ﻧﺠﻴﺲ ﺑﺎﻟﻐﺮﺍﺽ ﻭﺣﻀﺮﻧﻪ ﺻﻴﻨﻴﻪ ﺍﻟﺨﺘﻤﻪ
ﻭﻟﮕﻄﻨﻪ ﺍﻟﺨﻀﺮﺓ ﻭﺣﻀﺮﻧﻪ ﺍﻟﺨﻴﺎﺭ ﻭﺍﻟﻔﻮﺍﻛﻪ
ﻭﺍﻟﺰﻟﻢ ﻋﻠﻴﻬﻢ ﺍﻟﻄﺒﺦ ﻋﻤﻲ ﺟﺎﺏ ﻃﺒﺎﺥ
ﻟﻠﻌﺼﺮ ﺍﻧﺘﻬﺊ ﻟﻄﻢ ﺍﻟﻨﺴﻮﺍﻥ ﻭﺭﺍﺣﻦ ﻭﺑﺪﻳﻨﻪ ﻧﺠﻬﺰ ﺍﻟﻌﺸﻪ
ﻟﻠﻤﻐﺮﺏ ﺍﺗﻌﺸﺖ ﺍﻟﻮﺍﺩﻡ ﻭﺭﺍﺣﻮ
ﻭﺍﻧﻪ ﻭﺍﺧﻮﺍﺗﻲ ﺑﻘﻴﻨﻪ ﻧﻌﺰﻝ ﻭﻳﻪ ﺳﻬﺊ ﻭﻣﺮﺓ ﺣﻴﺪﺭ ﺑﺲ ﻣﺮﺓ ﺣﻴﺪﺭ ﺑﺲ ﺭﺍﻓﻌﻪ ﺣﺎﺟﺒﻬﺎ ﻭﺗﻨﺘﺮ ﻧﺘﺮ ﺑﺎﻟﺸﻐﻞ ﻛﻞ ﺷﻮﻳﻪ ﺍﺣﺴﻬﺎ ﺗﺮﻳﺪ ﺗﺘﻌﺎﺭﻙ ﻭﻣﻦ ﺍﻃﻠﺐ ﻣﻨﻬﺎ ﺗﻨﻄﻴﻨﻲ ﺷﻐﻠﻪ ﻣﺜﻼ ﻟﻮ ﻣﺎﻋﻮﻥ ﻟﻮ ﺷﻲ ﺑﺼﻔﻬﺎ ﺗﺸﻤﺮﺓ ﺷﻤﺮ
ﻋﺮﻓﺘﻬﺎ ﻣﺎﺗﺤﺒﻨﻲ ﻭﺳﻬﺊ ﮔﺎﻟﺖ ﺍﺗﺮﻳﻜﻬﺎ ﻫﺬﺍ ﻃﺒﻌﻬﺎ ﻣﻦ ﺍﺗﺰﻭﺟﺖ ﺑﻴﻨﺖ ﻋﻠﺊ ﺣﻘﻴﻘﺘﻬﺎ
ﺍﻧﻪ ﻫﻢ ﻋﻔﺘﻬﺎ ﺑﻌﺪ ﻣﺎﺗﮕﺮﺑﺖ ﻣﻨﻬﺎ ﻛﻤﻠﻨﻪ ﻛﻠﺸﻲ ﻭﺭﺟﻌﻨﻪ ﻟﻠﺒﻴﺖ ﻛﻠﻨﻪ
ﺍﺗﺬﻛﺮﺕ ﺍﺧﺬﺕ ﻣﻦ ﺍﻟﺼﻴﻨﻴﻪ . ﻣﺎﻝ ﺧﺘﻤﺔ ﺍﻟﻘﺮﺍﻥ ﺷﻤﻌﻪ ﻭﺳﺒﻊ ﺣﺎﺟﺎﺕ ﺍﻳﮕﻮﻟﻮﻥ ﻟﻠﺘﺮﻳﺪ ﺗﺤﺒﻞ ﺍﺧﺬﺗﻬﻦ ﻭﺿﻤﻴﺘﻬﻦ ﻓﻮﮒ ﺛﻼﺟﺔ ﺑﻴﺖ ﻋﻤﻲ
ﻃﻠﺒﺖ ﻣﻦ ﻫﺪﻳﻞ ﺗﻮﺻﻠﻨﻲ ﻻﻥ ﺍﺧﺎﻑ ﺍﻃﻠﻊ ﻭﺣﺪﻱ ﻭﺿﻠﻤﻪ ﻭﺻﺪﮒ ﻭﺻﻠﺘﻨﻲ ﻣﻦ ﺍﻟﺒﺎﺏ ﻭﺭﺟﻌﺖ ﻣﺎﮔﺪﺭﺕ ﺍﺭﻭﺡ ﻣﻦ ﺍﻟﺒﺎﺏ ﺍﻟﺮﺋﻴﺴﻲ ﻻﻥ ﺍﻛﻮ ﺯﻟﻢ ﺑﻤﻀﻴﻒ ﻋﻤﻲ
ﺻﺮﺕ ﺏ ﺍﻟﺒﺎﺏ ﺭﺩﺕ ﺍﺩﺧﻞ ﺳﻤﻌﺖ ﺍﻟﻬﻮﺳﻪ ﺍﺳﺘﻮﻗﻔﻨﻲ ﺻﻮﺕ ﺣﻴﺪﺭ ﻳﺤﺠﻲ ﺑﺤﺮﮔﺔ ﮔﻠﺐ
ﺣﻴﺪﺭ،،ﺍﻧﺸﺎﻟﻠﻠﻪ ﺍﺭﺗﺎﺣﻴﺘﺘﻲ ﻳﻤﻤﻪ ﺍﻧﺸﺎﺀﺍﻟﻠﻪ ﺍﺭﺗﺎﺍﺡ ﮔﻠﺒﺞ ?
ﻃﺸﺮﺗﻴﻨﻪ ﻛﻞ ﺍﺣﻨﻪ ﻃﺸﺮﺗﻲ ﺍﻭﻻﺩﺝ ﺳﺒﺐ ﺩﻣﺎﺭﻧﻪ ﻛﻠﻪ ﺍﻧﺘﻲ
ﺩﻭﻭﻡ ﺍﺗﺒﺎﻭﻋﻴﻦ ﻟﻠﻨﺎﺱ ﻣﻦ ﻃﺮﻑ ﻋﻴﻨﺞ ﻫﺬﺍ ﻣﺎﻳﻌﺠﺒﺞ ﻭﺫﺍﻙ ﻣﺎﻳﻌﺠﺒﺞ
ﺧﺮﺑﺘﻴﻨﻲ ﻭﻳﻪ ﻋﻤﺎﻣﻲ ﻭﺍﻟﻤﺼﻴﺒﻪ ﺍﺍﺍﻧﻪ ﺍﻟﻐﺒﻴﻴﻲ ﺳﻤﻌﺖ ﻛﻼﻣﺞ ﻋﻔﺖ ﮔﻠﺒﻲ ﻭﺳﻤﻌﺖ ﻛﻼﻣﺞ ﻭﻗﻨﻌﺖ ﺭﻭﺣﻲ ﺑﺴﻮﺍﻟﻔﺞ ﻭﺍﻧﻪ ﻫﺎﻭﻱ ﺑﻨﺖ ﻋﻤﻲ ﻭﺍﺭﻳﺪﻫﺎ
ﻭﻻﻥ ﺍﻧﻪ ﺗﺮﺑﺎﺗﺞ ﻭﻣﻮ ﺯﻟﻤﻤﻤﻪ ﻛﺴﺮﺗﻬﺎ ﮔﺪﺍﻡ ﺍﻟﻜﻞ ﺑﻌﺪ ﻣﺎﺟﺎﻧﺖ ﺍﻟﻮﺍﺩﻡ ﺗﺪﺭﻱ ﻫﻲ ﺍﻟﻲ ﺟﻨﺘﻲ ﺩﻭﻡ ﺗﺴﺘﻌﺮﻳﻦ ﻣﻨﻬﺎ ﻋﻠﺊ ﺍﺑﻮ ﻣﻌﻴﺪﻳﻪ ﻭﻫﻤﺠﻴﻪ ﻭﻣﻮ ﻣﻦ ﻣﺴﺘﻮﺍﻙ ﻭﻣﻦ ﺗﺎﺧﺬﻫﺎ ﺭﺍﺡ ﺗﻔﺸﻠﻚ ﺟﺪﺍﻡ ﺍﻟﻜﻞ ﺑﺘﺼﺮﻓﺎﺗﻬﺎ
ﻋﻔﺘﻬﺎ ﻭﺍﺧﺬﺕ ﺑﻨﺖ ﺍﺧﻮﺝ ﺍﻟﻮﺍﻋﻴﻪ ﺍﻟﻤﺜﻘﻔﻪ
ﺍﺭﻳﺪ ﻳﻮﻡ ﺍﺭﺩ ﻟﻠﺒﻴﺖ ﻭﺗﺘﻠﮕﺎﻧﻲ ﺑﻜﻠﻤﻪ ﻫﻼ ﻣﺎﻛﻮ
ﺍﺭﻳﺪ ﻳﻮﻡ ﺍﺗﮕﻠﻲ ﺍﻟﻠﻪ ﻳﺠﻮﻳﻚ ﻣﻦ ﺍﺭﺩ ﻣﺎﻛﻮ
ﻭﻏﻴﺮ ﻛﻠﺸﻲ . ﻛﻞ ﺳﺎﻉ ﺟﻴﻴﻴﺐ ﺟﻴﻴﺐ ﺟﻴﻴﺐ ﻣﺎﻛﻮﻭ ﻓﺪ ﻳﻮﻡ ﮔﺎﻟﺖ ﻫﺎﻙ
ﻫﺎﻱ ﺍﻧﻲ ﺍﻭﻝ ﻭﺍﺣﺪ ﺍﺑﺰﺭﺗﺞ ﺩﻣﺮﺗﻴﻨﻲ ﻭﺍﻟﺜﺎﻧﻲ ﺍﻧﻮﺭ ﺍﻟﻲ ﺧﺮﺑﺘﻲ ﺑﺪﻻﻟﺞ ﻭﺗﺴﺘﻴﺮﺝ
ﻛﻞ ﻏﻠﻄﻪ ﻳﻐﻠﻄﻬﺎ ﺍﺗﻀﻤﻴﻬﺎ ﻋﻦ ﺍﺑﻮﻱ ﻻﻥ ﺗﺨﺎﻓﻴﻦ ﻳﻀﺮﺑﻪ ﺍﻟﺊ ﺍﻥ ﺍﺳﺘﻘﻮﺉ ﻭﺻﺎﺭ ﻣﺎﻳﺨﺎﻑ ﻭﺿﻴﻊ ﻧﻔﺴﻪ ﺑﺎﻟﺴﻜﺮ ﻭﺍﻟﻌﺮﺑﺪﺓ ﻭﻫﻮ ﺑﻌﺪﺓ ﻃﻔﻞ
ﻭﺍﻟﺜﺎﻟﺜﻪ ﻣﺮﻭﺓ ﺍﻟﻲ ﺍﻧﻄﻴﺘﻴﻬﺎ ﺍﻟﻮﺍﺣﺪ ﺧﻄﺒﻬﺎ ﻋﻦ ﻃﺮﻳﻖ ﺍﺧﺘﺞ ﺍﺑﻮﻱ ﻣﺎﻗﺒﻞ ﺑﺲ ﺍﺷﻠﻮﻥ ﻣﺎﻳﻘﺒﻞ ﻭﺍﻧﺘﻲ ﺍﺗﻨﺠﻴﻦ ﺑﺮﺍﺳﻪ ﻟﻴﻠﻞ ﻧﻬﺎﺭ ﻟﻤﻦ ﺧﻠﻴﺘﻲ ﻗﺒﻞ ﻭﺍﻧﻄﻴﺘﻴﻬﺎ ﺍﻟﻮﺍﺣﺪ ﺯﺍﻳﻌﺘﻪ ﺍﻟﮕﺎﻉ ﻃﻠﻌﺘﻲ ﺍﻧﺘﻲ ﻭﺍﺧﺘﺞ ﻧﺒﺒﻲ ﺗﺎﻟﻲ ﻃﻠﻊ ﻭﺍﺣﺪ ﺳﮕﻂ ﺷﻮﻓﻲ ﺗﺎﻟﻲ ﺍﻋﻤﺎﻟﺞ ﻭﺳﻮﺍﻟﻔﺞ ﺍﺷﻠﻮﻥ ﺿﻴﻌﺘﻨﻪ ﻭﺩﻣﺮﺗﻨﻪ
ﻫﻨﺪ،ﺟﻨﺖ ﺍﺳﻤﻊ ﻭﺩﻣﻮﻋﻲ ﺗﺠﺮﻱ ﻭﺣﻴﺪﺭ ﻳﺤﺠﻲ ﻭﺧﺎﻧﮕﺘﻪ ﺍﻟﻌﺒﺮﺓ ﻳﺤﺠﻲ ﻭﻳﺒﺠﻲ
ﻛﻞ ﺍﻟﺼﺪﻣﻨﻲ ﺍﻧﻮ ﻫﻮ ﺟﺎﻥ ﺭﺍﻳﺪﻧﻲ ﺑﺲ ﺍﻣﻪ ﻣﺎﻗﺎﺑﻠﻪ ﻭﻫﻮ ﺟﺎﻥ ﻳﺴﻤﻊ ﻛﻼﻣﻬﺎ ﻭﺍﻟﻌﺠﻴﺐ ﻭﻟﺪﻫﺎ ﻛﻠﻬﻢ ﻳﺴﻤﻌﻮﻥ ﻛﻼﻣﻬﺎ ﻭﻳﻨﻔﺬﻭﻥ ﺑﺪﻭﻥ ﻧﻘﺎﺵ
ﺍﻣﺮﺍﻩ ﻋﺠﻴﺒﻪ ﺩﻣﺮﺕ ﻋﺎﺋﻠﺘﻬﺎ ﺑﺴﺒﺐ ﺗﺒﺎﻫﻴﻬﺎ ﻭﻋﺠﺮﻓﺘﻬﺎ
ﺍﻟﺘﻔﺘﺖ ﺍﺭﻳﺪ ﺍﺭﺟﻊ ﺍﻭ ﺑﺎﻻﺻﺢ ﺍﻧﻬﺰﻡ ﻗﺒﻞ ﻣﺎﻭﺍﺣﺪ ﻳﺸﻮﻓﻨﻲ ﻻﻛﻦ ﻓﺠﺎﺓ ﻃﻠﻊ ﺣﻴﺪﺭ ﻭﺷﺎﻓﻨﻲ ﺍﺗﻔﺎﺟﺊ ﻣﻦ ﻟﮕﺎﻧﻲ ﻭﺍﮔﻔﻪ ﻭﺩﻣﻮﻋﻲ ﺑﺨﺪﻱ ﺍﺩﻝ ﺍﻧﻮ ﺳﻤﻌﺖ ﻛﻞ ﻛﻼﻣﻪ
ﻋﻔﺘﻪ ﻭﻃﻠﻌﺖ ﺍﺭﻛﺾ ﻭﻫﻮ ﻭﺭﺍﻱ ﻳﺼﻴﺤﻠﻲ ﻭﺻﻠﺖ ﻟﻠﺒﺎﺏ ﺷﻜﻞ ﻃﺮﻑ ﺣﺠﺎﺑﻲ ﺑﺎﻟﺘﻴﻨﻪ ﺍﻟﻤﻮﺟﻮﺩﺓ ﺧﺎﺭﺝ ﺑﻴﺘﻬﻢ ﺍﺣﺲ ﺍﺧﺘﻨﮕﺖ
ﻣﺪﻳﺖ ﺍﻳﺪﻱ ﻭﻧﺰﻋﺖ ﺍﻟﺤﺠﺎﺏ ﻛﻠﻪ ﻭﺟﺮﻳﺘﻪ ﻟﻤﻦ ﺍﻧﻤﺰﮒ
ﻛﻤﻠﺖ ﻃﺮﻳﻘﻲ ﻭﺍﻧﻪ ﮔﻮﺓ ﺍﺷﻮﻑ ﻻﻥ ﺿﻠﻤﻪ ﻭﺻﻠﺖ ﻟﻠﺴﺎﺣﻪ ﻣﺎﻝ ﺑﻴﺘﻨﻪ ﻭﺑﻴﺖ ﻋﻤﻲ ﻣﺎﺣﺴﻴﺖ ﻏﻴﺮ ﺣﻴﺪﺭ ﺳﺤﺒﻨﻲ ﻣﻦ ﺍﻳﺪﻱ ﺣﻴﻞ ﻟﻤﻦ ﺍﻧﻄﻠﺸﺖ ﺑﺼﺪﺭﺓ
ﻓﺠﺎﺓ ﺻﺎﺭ ﻻﻳﺖ ﻣﺎﻝ ﺳﻴﺎﺭﺓ ﺑﺎﺍﺗﺠﺎﻫﻨﺎ ﺍﻧﻲ ﺑﺲ ﺍﺭﻳﺪ ﺍﺣﻂ ﺣﺠﺎﺑﻲ ﻋﻠﺊ ﺭﺍﺳﻲ ﻻﻥ ﻋﺮﻓﺖ ﺍﻛﻮ ﺳﻴﺎﺭﺓ ﺍﺟﺖ
ﺣﻴﺪﺭ ﻳﻨﺎﺷﻎ ﻣﺜﻞ ﺍﻟﻄﻔﻞ ﻭﻻﺯﻣﻨﻲ ﻣﻦ ﺯﻧﺪﻱ ﺍﺣﺲ ﺍﺻﺎﺑﻴﻌﻪ ﻧﺎﻳﻤﻪ ﺑﻠﺤﻤﻲ
ﻫﻮ ﺷﺒﻪ ﻓﺎﻗﺪ ﺣﺘﺊ ﻣﺎﺣﺲ ﺑﻮﺟﻮﺩ ﺍﻟﻀﻮﺓ ﻣﺘﺴﻠﻂ ﻋﻠﻴﻨﻪ ﻭﻻﺣﺲ ﺍﻛﻮ ﺳﻴﺎﺭﺓ ﺍﺻﻼ
ﻓﺠﺎﺓ ﻣﺎﺣﺴﻴﻨﻪ ﺍﺛﻨﻴﻨﻪ ﻏﻴﺮ ﻫﺬﺍﻝ ﻧﺰﻝ ﻣﺜﻞ ﺍﻻﻋﺼﺎﺭ ﻭﺍﺟﻪ ﺏ ﺍﺗﺠﺎﻫﻨﻪ ﺑﺎﻟﺒﺪﺍﻳﻪ ﻣﺎﺷﻔﺘﻪ ﺑﺲ ﻟﻤﻦ ﻭﺻﻞ ﻳﻤﻨﻪ ﻭﺻﺎﺭ ﻗﺮﻳﺐ ﻛﻠﺶ ﻳﺎﻟﻠﻪ ﻋﺮﻓﺘﻪ
ﻭﻗﺒﻞ ﻣﺎﺍﺣﺠﻲ ﺍﺗﻘﺮﺏ ﻣﻦ ﺣﻴﺪﺭ ﺟﺮﻩ ﻣﻦ ﺭﺍﺳﻪ ﻭﺿﺮﺑﻪ ﻛﻠﻪ
ﻋﻠﺊ ﺍﺛﺮﻫﺎ ﺣﻴﺪﺭ ﻭﮔﻊ ﺑﺎﻟﮕﺎﻉ ﻭﻫﺬﺍﻝ ﻧﺎﻡ ﻓﻮﮔﻪ
ﺟﻤﺪﺕ ﺑﻤﻜﺎﻧﻲ ﻭﺍﻧﻲ ﺍﺷﻮﻓﻪ ﺍﺷﻠﻮﻥ ﻧﺎﻳﻢ ﻋﻠﺊ ﮔﻠﺐ ﺣﻴﺪﺭ ﻭﻳﻀﺮﺏ ﺑﻲ ﺑﻜﻞ ﻗﻮﺗﻪ
ﻳﺘﺘﺘﺘﺘﺘﺒﻊ

#ملحوظه

ﻳﺴﻌﺪ ﻣﺴﺎﻛﻢ ﻳﺎﺑﻌﺪ ﮔﻠﺒﻲ ﻭﺩﺭﺍﺑﻴﻨﻪ 😍

ﺍﺍﻋﺬﺭﻭﻧﻲ ﺑﺲ ﻭﺭﺓ ﺍﻟﻌﻴﺪ ﺍﻧﺸﺮ ﺍﺧﺮ ﺑﺎﺭﺗﻴﻦ