مجنون حب فرعون

الفصل التاني

(مجنون حب فرعون)

كتير كنا بنسمع عن الحزن ،الكسرة ،والالم بس ف اليوم ده ..شوفتها قدام عنيا ف خيال ميت..ف روح بهتانه من كتر الدموع..سراب عجوز وانطفي نوره .. ف الاؤل كان عندي فضول اعرف ايه سبب الحاله اللي هو فيها ؟بس للاسف م لحقتش.. و لما شووفت عنوان الأجندة (مجنون حب فرعون) زاد فضولي ..بس ف نفس الوقت كان لازم احترم خصوصيته وده اللي منعني اني افتحها واعرف ايه اللي فيها ..شووية وخدت الأجندة ورحت عشان اسلمها ف الامانات لأنه اكيد هيرجع عشان يدور عليها ،بس للاسف لاقيت قدامها طابور طويل ..مكنش قدامي حل تاني الا اني اقف واستني.. شوية ولاقيت جيهان جايه ناحيتي وملامح الخوف والقلق باينه ع وشها ..ياتري ايه السبب؟!
جيهان: انت كنتي فين كل ده ؟!ماما اتصلت بيا بتقولي أن بابا تعب مرة واحدة ونقلوه ع المستشفي ..
*وبسرعة ومن غير م افكر خرجت انا وجيهان وروحنا ع المستشفي .. قعدنا حوالي ساعة ونص مستنين الدكتور يخرج يطمنا عليه بس للاسف محدش خرج وده اللي خوفنا اكتر أن قدر الله يكون عنده حاجه كبيرة .. بس لما الدكتور قالنا ان تعبه ده بسبب انه نسي ياخد حقنه الانسولين طمنا شويه .. كنا عايزينه يروح معانا بس الدكتور قال انه لازم يبات الليله دي ف المستشفي عشان يبقي تحت الملاحظة ..ساعتها قررت والدتي انها تبات معاه عشان تخلي بالها منه و طلبت من جيهان  تاخدني وتروح ..وفعلا شوية ومشينا م اخدتش بالي ان كل ده والاجندة كانت ف ايدي!! ف اللحظة دي ابتدي مشهد الشاب إياه يتعاد تاني قدامي.. منظر فضل شاغلني طول الليل ولغز فضل محيرني..ايه اللي وصله للحاله دي ؟!! الفضول كان مموتني اني افتح الاجندة واعرف ايه اللي فيها بس كان في حاجه مانعاني ..حاجه بتقولي ان لازم محدش يقراها الا هو وفعلا كانت اؤل حاجه عملتها تاني يوم بعد م بابا رجع م المستشفي اني روحت المكتبه عشان اسلم الاجنده بس للاسف لاقيتها مقفولة ولما سالت الحارس عن السبب؟؟.. قالي ان المكتبه بتتجدد وهتقعد حوالي شهرين مقفولة!! ساعتها مكنش قدامي حل غير اني افتح الاجندة واعرف ايه اللي فيها وياتري كان يقصد ايه لما كتب العنوان ده (مجنون حب فرعون) ع الاجندة ..وفعلا فتحتها وابتديت اقرا فيها
(من عيله كلها دكاترة وظباط ..كنت الفرع المخالف اللي فيهم ..اللحن الشاذ اللي بيبوظ المقطوعه كلها ..صحيح طول عمري متفوق وبزاكر ..بس تفوقي ده م شفعليش اني ادخل الكليه اللي كنت عايزها(الفنون الجميله) ،صدق اللي قال ان الثانوية العامه دي عامله زي لعبه القمار ياتطلعك سايع سما .ياتنزلك سابع ارض ..وده اللي حصل معايا انا اياد النجار ابن واحد من اكبر الجراحين ف مصر ،ناس كتير كانو بيقولولي ان فيا شبه منه ،بس ف الحقيقه انا مكنتش شبه والدي ف اي حاجه خالص ،بالعكس انا ساعات كنت بحس ان عمي اللواء مراد هي اللي ابويا ،وزاد ارتباطي بيه لما والدتي توفيت وتقاعد من الخدمة ،كان عارف عني كل حاجه بحب ايه؟بكره ايه؟ومن نظرة واحدة كان بيعرف اذا كنت متضايق ولالا ،عمره م حسسني انه عمي ،دايما كان بيعمل كل حاجه عشان يعوضني عن سفر والدي الدايم ،وحنان والدتي اللي كسرتني بفراقها ليا ،ولما دخلت كليه الاثار جامعه القاهرة ،كان اكتر واحد مضايق عشاني ،مش هبالغ لو قولت انه كان مضايق اكتر مني،وبالرغم من اننا ميسورين الحال الا انه كان دايما بيخليني اعتمد علي نفسي وساعتها قدر يقنعني اني ادخل كلية الاثار ، واللي كان شايف اني هقدر ابدع فيها اكتر من الفنون الجميله وياريتني م سمعت كلامه ، ياريتني طلعت زي والدي ،يمكن مكنتش هحس الاحساس اللي حاسه دلوقتي ،ياريتني م كنت شوفتها ولا عيني لمحتها