H Y U N G

Part 43

"၈နာရီခွဲနေပြီလေ hyung ထတော့.."

baekhyun ထပ်မံဂျင်းထည့်ခံရမည်စိုးကာ နာရီကိုဆွဲယူကြည့်လိုက်သည်။ တကယ်ကို ၈နာရီခွဲပြီး၍ ၉နာရီပင်ထိုးတော့မည်ဖြစ်သည်။ အိပ်လိုက်ရသည့်အချိန်က ခဏလေးလိုပင်။ အပျင်းကြောဆန့်ကာ chanyeol ဘက်ကျောပေးရင်း မျက်လုံးများ ခဏမှိတ်ထားလိုက်သည်။ သို့သော်ငြား ချက်ချင်းပင် ပုခုံးမှဆွဲလှည့်ခံလိုက်ရပြီး အသံဩရှရှကို မနက်ခင်းစောစော ကြည်လင်စွာ နားထဲကြားရပြန်သည်။

"ကျွန်တော် မနက်စာပြင်ပေးထားတယ် hyung.. ထတော့နော်.."

ဆွဲသာလှည့်ခံလိုက်ရသော်ငြား baekhyun မျက်လုံးမပွင့်။ နဖူးပေါ်မှ ဆံပင်တစ်ချို့ဆို့ကို ခပ်ဖွဖွသပ်တင်ပေးနေသည်ကို ခံစားရသည်။

"ကျွန်တော် နမ်းမှာနော် hyung.."

baekhyun မျက်လုံးပက်ကနဲပွင့်လာ၏။ ရုတ်တရက်အပြုအမူကြောင့် chanyeol ရယ်၏။ မနက်ခင်းကြားနေကျ ငှက်တစ်ချို့ တကျီကျီအော်သံထက် ဤရယ်သံလွင်လွင်က ပိုနားထောင်လို့ကောင်းသည်။ အိပ်ချင်မူးတူးဖြစ်နေလို့ဘဲလားမသိ။ baekhyun ၏ ရှုပ်ပွနေသော ဆံပင်တို့အား တစ်ချက်နှစ်ချက် သပ်တင်ပေးကာ ဆို၏။

"မျက်နှာသစ်လိုက်ဦး hyung.."

ရင်ဘတ်ထဲနွေးနေ၏။ Baekhyun ခေါင်းငြိမ့်ပြကာ ထလာလိုက်သည်။ စောင်ထုပ်ကြီးနှင့် လုံးထွေးနေသောကြောင့် ခပ်မြန်မြန်အကုန်ပစ်ချကာ ရေချိုးခန်းထဲဝင်လာလိုက်သော်ငြား အထဲရောက်သည်အထိ baekhyun အိပ်ချင်မပြေသေး။ မှန်ထဲကိုတစ်ချက်ကြည့်ကာ chanyeol လက်ဖြင့်သပ်တင်ပေးသွားသော ဆံပင်တို့ကို ထိကိုင်ကြည့်မိသည်။ ထို့နောက် ခေါင်းငုံ့ကာ အရူးလိုပြုံးမိပြီး အသိစိတ်ဝင်စေရန် ကိုယ့်ပါးကိုယ်ပြန်ရိုက်မိသည်။ အတွေးတို့ဖြတ်ချရန် ခေါင်းခပ်မြန်မြန်ခါထုတ်ကာ နောက်ဆုံးရေအေးဖြင့် မျက်နှာသစ်ချပြီး လန်းဆန်းစေလိုက်တော့သည်။

ရေချိုးခန်းထဲက ထွက်လာသည့်အချိန်တွင် chanyeol မရှိတော့။ အောက်ဆင်းသွားပုံရသည်။ သို့သော်ငြား အိပ်ရာခင်းနှင့်စောင်ကတော့ အလွန်တရာမှ သေသပ်နေသော အနေအထားတွင်ရှိနေပြီး တစ်စုံတစ်ယောက်မှ စနစ်တကျ ခေါက်ထားပေးသွားမှန်းသိသာသည်။ baekhyun ထိုပုံစံအတိုင်းသာ အောက်ဆင်းခဲ့လိုက်ပြီး လှေကားအဆင်းနားရောက်သည်နှင့်ပင် အနံ့တို့မွှေးကြိုင်လာ၏။ မားသည်မီးဖိုချောင်ထဲတွင် ချက်ပြုတ်နေပုံရပြီး chanyeol သည် စားပွဲပေါ်တစ်ခုပြီးတစ်ခု ချနေ၏။ အသံကြားသည့်အခါ မားကအရင်လှည့်ကြည့်ပြီး ဦးစွာဆို၏။