نجمة والخلخال
.......
رنه الهلهولة طشت بكل الحوش..
وصدها جان بكل حايط..
اجاااك ولد..
كلمة..
غيرت ملامح ابويه كلها..
جنت واكفه مقابيله واباوع ع ملامحة..
هاي الفرحه مشايفتها بعيونه ولا راح اشوفها
كال الحمدلله والشكر ومشى بالحوش اكثر من مرة رايح وجاي..
ورجع سجد بلباب وسمعت صوته يبجي
ويردد الحمدلله والشكر الك ربي
رددها اكثر من مرة..
خلت دموعي تنزل لا اراديا..
وتبريكات عمتي اله.. ووكفه القابله..
خلت حاجز بينا اوصله بي..
ماظنيت هذا الحاجز الصغير..
راح يكبر يوم بعد يوم..
اجوي خواتي... وجانو يصفكون وفرحانين..
فرحه بكل البيت..
حاولت التقرب ع ابويه..
بس جان ملتهي وابتعد عني وطب لامي..
وسدو الباب..
ومخلوني اطب..
ابويه مو بس اب الي.. يمكن هو روحي
لا مو يمكن اقرب من هاي الروح الي
احسة الهوى الي اتنفسه
رغم قسوة امي.. لكن شوفه والدي تغير كل شي بيه
فرحت ع فرحته..
بس بهذا كبر عمري حسيت بغيرة..
من اخويه الي ما اعرف اسمة لحد هسة..
....
بعد ساعات من وطلعت الولادة واجوي مرت خالها لامي سندس واجوي عماتي كلهم ماعدا عمتي
الهام.. ما اجتي علاقتها مو قويه ويا امي..
لان عمتي الهام ازوجت واحد يشتغل بصحة
فعلاقتها مو قويه ويا امي..
وامي متحب اخوات ابويه كلهم
حتى من جانو عايشين بيبي وجدو هم دوم مشاكل وياهم..
وتحاسب ابويه
وعيت واسمع اهلك اخواتك
أكثر كلام وحوار اسمعه بينهم..
وماعرف شنو السبب..
يمكن لان ابويه فقير
او السبب فلوس امي..
زواج امي وابويه مجان هيج عن حب ازوجو
وجدي جان يحب ابويه هوايه وامنه ع فلوسه
وجان عامل يشتغل يمهم
حسب كلام ابويه
جدي كله ازوجك بنتي..
لان مراد ياخذها الكرايب ويستغل فلوسها..
وحسب كلام امي ابويه حفة علما اخذها
وعود جان يحبها ويلحكها من درب لدرب..
بعد ماعرف الصدك وين..
بين الهوسه..
والعالم..
رحت كعدت ع الدرج..
واسمع ويا كل هلا هلهوله وكانما اجانه الملك..
متخيلت هيح راح يصير
كل شويه امد راسي واشوفها هوسه وارجع
خواتي فرحن ع المه الجهال.. ويلعبن
بس اني كلام شيماء دخل براسي
كبرانه.. خلتني اتلمس جسمي واشوف صدك
اني هم كبرت..
لعد اني هم اريدازوج..
مثل الافلام والمسلسلات..
هن الزم ايدة ونطلع ع الكورنيش نتمشى..
لو نروح بساحه الجبيرة ونفتر ويشتريلي..
جبس وحب ونسولف..
الله شكد حلو..
هنيالها الشيماء شبعانه.. هالسوالف ياحظي..
