احترمي نفسج

905 49 6
                                    


احترمي نفسج دايماً نسمعها ونقولها ك مسبة او خلال عراك، بس خل نبسط الموضوع ونفككه من خلال كم احترام اريدج تسويه..

- احترمي مشاعرج:

ترى والله احنا مو خارقين وانتي مو سوبر وومن، احنا بشر نتعب ونحس ونضعف ونمر بهواي مشاعر، لما تحسين بأي إحساس تجاه أي شي لتفهين من احساسج وتسخفين منه، ولا تقتليه، اياً كان الإحساس الي قاعدة تحسيه، فهو شعور انساني طبيعي جداً، سواء حب كره غيرة اياً كان ومهما كانت هالمشاعر تجاه منو..
اني مداحجي على شي صح وخطأ مو مشكلتي هسة، مشكلتي وياج انج تفهمين مشاعرج، تحترميها، تعرفين ان والله اني احب هالشخص او اكرهه، او اضوج من فلانة، اياً كان اعترفي بالشعور هذا بينج وبين نفسج..
من حتستوعبين مشاعرج وطبعاً خلال جلسة تفكير بينج وبين نفسج وتستوعبين التغيرات الي قاعدة تمرين بيها، بسلبياتها وايجابيتها، وراها نبدي مرحلة التمييز، نشوف بلة ليش اني داحس بيهج؟ زين يمكن مثلا اعجاب، او يمكن اني تعصبت من فلانة لان جنت ضايجة، يمكن اني محتاجة احس احد بحياتي فمن دخل فلان شخص حياتي تعلقت بيه يجوز! وغيره وغيره، حتطلعين الأسباب يمكن تطلع نصها سببها انتي فبالتالي حتفكرين بحل لنفسج، وان كان سببها غيرج او شي خارج عن ارادتج عود ادرسي الموضوع وقرري شنو تسوين الي حالياً مو قضيتي، ولكن قضيتي هي انج احترمتي مشاعرج، اطيتي كل شعور انساني مريتي بيه حقه.
ارجوج احترمي مشاعرج.



- احترمي هرموناتج:

كل انثى تمر بمرحلة تغييرات معينة بالشهر، هالتغييرات مو سهلة وانصحج فعلياً تقرين عنها وشون هي عبارة عن معجزة ومتعبة ومركبة بوقت واحد، علمود هيج من تمرين بفترة انج عصبية هواي او تبجين هواي واحنا نعرف كلش زين ان كل شهر نتعرض لهيج شي حتى لو من كلمة تافهة نبجي من وراها فاحترمي الي قاعدة تمرين بيه، احترمي انج بوقت حساس وكلشي بداخلج ديخضع لتغيرات جبارة فلتجين فوق كل شي وتلومين روحج!
والله اني كلش كئيبة، والله فلان قالي انتي بس تبجين ومزعجة الخ.. اني ك شخصية مابيج شي من الهبل هذا، بس نفسيتج تتأثر بالهرمونات، ونقطة ضرورية ركزي عليها، لتخلين احد يقلل او يحاول يستخف دمه من خلال هالموضوع، لتسمحين بهالشي، انتي مميزة وقوية لدرجة ان كل هالاشياء العظيمة دتصير بجسمج وانتي دتمارسين يومج بشكل طبيعي! تطلعين تطبين تطبخين، تدرسين تشتغلين الخ..
متخيلة!!
احترمي طبيعة جسمج وهرموناتج.

- احترمي افكارج:

كل شخص بينا يكبر ببيئة معينة هالبيئة والناس تأثر بشكل جبير على افكارنا، مو كلنا تربينا بنفس البيت او اخذنا القدر الكافي من التعليم، مو كلنا صادفنا وجان عدنا الشجاعة نتقدم، لذلك افكارنا مختلفة وارائنا، مهما كانت فكرتج مختلفة مع أي حد فهذا مايشكل عيب بيج، هاي نظرتج لأي موضوع نظرج تخصج، وان كانت صح او خطأ.
كلنا دنتعلم، وكلنا دنخوض تجارب ومن خلالها نشوف احنا ماشين وين، مو مشكلة تكتشفين انج غلطانة بأي شي، وعلمود هيج لتسمحين احد يخليج تستصغرين افكارج، لأنج صغيرة، او ماعندج خبرة او اياً كان..
احترمي افكارج الخاصة ولتخلين احد يطبع أفكاره عليج، حتمشي ورا الشي الشايفته صح مو لأن قالولج ان هذا صحيح، الحرية الفكرية اهم من كل شي، احترمي افكارج ولتسخفين من أي فكرة يمكن فكرة صغيرة بنظر هواي ناس تافهة تخلق منج شخصية مبدعة مستقبلاً منو يدري؟


- احترمي نفسج:
احترمي كل شي يخصج، من مشاعر وهرمونات وأفكار، انتي كيان مستقل احترميه، وافرضي احترامج على الجميع، لا تستصغرين من نفسج، اعرفي قدرج زين، احترمي البنية الي تعبوا أهلها عليها، والي تعبت هي هواي على نفسها من تعليم وحياة صعبة، وهي وقفت وواصلت.
احترمي كل موقف محرج علمج واطاج درس
احترمي كل غلطة سويتيها وندمتي عليها
احترمي كل فكرة جتي على بالج ويا نفذتيها وصارت ابداع يا تعوذتي من الشيطان منها وكملتي
احترمي كل ظرف صعب مريتي بيه
كل دمعة بجيتيها على ناس ماتستحق وعرفتج ان دموعج غالية
احترمي ذاتج الي مرح تتكرر

تعهد

اتعهد انا .............. بأن احترم ذاتي، مشاعري، تغيراتي الجسدية، مزاجيتي، كياني.
وان لا اقلل من كل صغيرة وكبيرة .. وان لا استصغر من نفسي وان احترمها وافرض هذا الاحترام على الجميع ..

اني قويةحيث تعيش القصص. إكتشف الآن