الحلقة الثالثة والعشرين

11.5K 350 58

الحلقة الثالثة والعشرين (الاخيرة)

جزء من حلقة سابقة :
أشرف : خير يا دكتور قلقتنا
دكتور : انا جاى اقولكم حاجة مهمة
كلهم : خير !!
دكتور : .......................
*_____________________________________________**___________________________*
دكتور : بحكم الصداقة اللى بقت بينا وضميرى المهنى والانسانى لازم اقولكم الحقيقة
(. الكل بيبص للدكتور فى ترقب ، الكل مرعوب ومستنى المصيبة .)
جلال : حقيقة ايه
دكتور : حقيقة ان حالة عمرو منتهية ووجوده على الاجهزة ماهى الا تكاليف على الفاضى الحالة ميأوس منها تماماً
جلال : يعنى ايه مفيش امل
دكتور : للاسف مفيش اى تطور فى الحالة
أشرف : طيب مش يمكن وجوده على الاجهزة يخليه يفوق
دكتور : بقول لحضرتك استحالة يعيش تقولى يفوق المصاريف هنا غالية وكتير ودى تكاليف على الفاضى مش هتقدم ولا هتأخر
(. كريمة مقدرتش تستوعب كلام الدكتور وفقدت الوعى والسكر على عليها ، اتحجزت فى المستشفى ويارا كانت معاها .)
___**___**___**___
أشرف : هتعمل ايه
جلال : مش عارف بس مش قادر اتخيل انى هقتل ابنى بايدى
أشرف : بس على حسب كلام الدكتور ان الحالة منتهية يعنى انت مالكش دخل
جلال : جايز كلام الدكتور صح وهو ادرى منى فى مجاله بس ثقتى بالله اكبر من كده
أشرف : بس دى فعلاً تكاليف كتيرة
جلال : المشكله انى خايف اسيبه على الاجهزة ابقى بعذبه اكتر
أشرف : بتعذبه ازاى
جلال : على كلام الدكتور ان عمرو شبه ميت ومن ناحيه تانيه عندى امل فى الله ، انا بين نارين نار ان اكرام الميت دفنه ونار انه ممكن يعيش
أشرف : الموقف صعب جداً ربنا معاك
جلال : يارب
__*__**__**__**__
عند كريمة ........
كريمة بدموع : يا حبيبي يا ابنى
يارا : اهدى يا طنط ان شاء الله هيكون كويس
كريمة : هيكون كويس ازاى وهو حالته منتهية
يارا : يا طنط طالما القلب شغال يبقى فى امل وحتى لو منتهية فالامل فى ربنا اكبر
كريمة : ونعم بالله
(. بعد شوية دخلت منة .)
منة : هاى
يارا بقرف : هاى
منة : اخبارك ايه يا طنط
كريمة : الحمد لله
منة : هو صحيح الكلام اللى الدكتور قاله ده
كريمة بكت بحرقة ..
يارا : حرام عليكي احنا مصدقنا انها هديت
منة : فى ايه انتِ بتتعصبى عليا كده ليه
يارا : انا متعصبتش بس .....
كريمة تقاطعها : خلاص يا بنات حصل خير واللى ربنا عايزه هيكون
منة : انا جيت اطمن على حضرتك وعلى عمرو because he is my best friend وزى ما بتقولوا فى مصر جيت اعمل الواجب
كريمة : متشكرين يا بنتى مالوش لازمة التعب ده
منة : متقوليش كده يا طنط انتِ متعرفيش انا بحب عمرو قد ايه
كريمة : يارا ممكن يا حبيبتى تناديلى عمك جلال
يارا : حاضر يا طنط
بعد ما جلال جه .......
جلال : انتِ كويسة يا كريمة
كريمة : الحمد لله بس كنت عيزاك فى كلمتين
جلال : خير
يارا : طب يالا احنا يا منة نخرج بره
بعد ما خرجوا ........
كريمة : انت هتعمل ايه
جلال : مش عارف
كريمة : هنموت ابننا بنفسنا يا جلال
جلال : بس الدكاترة بيقولوا .........
كريمة تقاطعه : الدكاترة يقولوا اللى هما عايزينه انا مش هموت ابنى بنفسى
جلال : يعنى نسيبه
كريمة : انا عندى حل كويس
جلال : حل ايه
كريمة : احنا ننقل عمرو اسكندرية لو مكتوبله انه يعيش يبقى التكاليف اقل من هنا بكتير ولو ربنا كتب له حاجه تانية يبقى يموت وهو فى بلده وسط اهله وناسه ويندفن جنب اخوه
جلال : انتِ عيزانا ننقله اسكندرية ؟
كريمة : امال انا بقول ايه
جلال : بس دى هتكلفنا برضه
كريمة : نبيع كل اللى حيلتنا يا جلال انا عايزة عمرو سواء عاش او مات يبقى معانا وفى وسطينا
جلال : طيب انا هسأل على التكاليف و هرجع مصر هروح ابيع اللى يكفى تكاليف نقله اسكندرية
كريمة : ربنا يخليك لينا وان شاء الله ان شاء الله عمرو هيعيش
جلال : ان شاء الله
__**__**__**__**__
فى استراحة المستشفى ......
منة : انتِ مقولتليش تقربى ايه لـ عمرو
يارا : طلقيته
منة : نعم !! هو عمرو متجوز
يارا : بقولك طلقيته يبقى كـــان
منة : بس انتِ شكلك صغيرة اوى على انك تتجوزى وتطلقى
يارا : لا مش صغيرة ولا حاجه وبعدين احنا اتجوزنا خمس شهور بس
منة : عن حب
يارا : sure
منة : امال سيبتوا بعض ليه
يارا : زى ما بيقولوا النصيب وقف لحد كده
منة : ممكن اسألك سؤال وتجاوبينى بصراحة
يارا : اوكى
منة : المفروض ان انتوا اتطلقتوا وبرغم كده انا كل ما اجى اشوفك لسه بتحبيه ؟
يارا : by the way احنا متطلقين من اكتر من سنة ، بس بما انى كنت هنا فى England وهو حصله الظروف دى يبقى واجب عليا اقف جنبه هو واهله مش عشان لسه بحبه or not بس انا بعمل كده عشان المفروض اعمل كده without reasons
منة : يعنى انتِ مبقتيش بتحبيه
يارا : yeah
منة : وهو لسه بيحبك
يارا : i don't know , you can ask him
منة : انا حاسة انى ضايقتك
يارا : لا ابداً ، وعلى فكرة لو انتوا وعمرو in a relationship انا مش هزعل بالعكس هفرحله لانه بالنسبة ليا just best friend
منة : really
يارا : sure ، عن اذنك هروح الـ toilet
منة : اوكى
منة لنفسها >> مجنونة اللى تسيب واحد زى عمرو يارب يقوم بالسلامة وانا مش هسيبه
(. دخلت يارا حمام وقفلت على نفسها وانهارت من كتر العياط ، شوية تعيط من زعلها على عمرو واللى هو فيه وقلقها انه ممكن يموت ، وشوية تعيط على ان مشاعرها ناحية عمرو صحيت تانى وعرفت انها لسه بتحبه بسبب غيرتها من منة .)
*_____________________________________________**___________________________*
فى خلال ثــلاث ايــام .....
- جلال كان عرف تكاليف نقل عمرو لـ مصر وحجز ونزل مصر
- منة بتقرب من اهل عمرو يوم بـ يوم
- يارا بتحاول تتجنب منة عشان متحسش بحبها لـ عمرو
*_____________________________________________**___________________________*
فى اسكندرية ....
(. جلال قاعد فى الشقة لوحده ، بيلف فى كل ركن شوية بيفتكر ذكريات ولاده التلاته فى كل مكان فيهم ، دخل اوضة كل واحد فيهم ، فتح دولاب كل واحد وشم ريحته فى هدومه ، افتكر قعداتهم سوا كلامهم وتهريجهم خناقهم وزعلهم ، جلال بدأ يسأل نفسه ليه كده يارب ؟ وفجأة بدأ ياخد باله ان الشيطان بيحاول يتمكن منه اونه هيبدأ يقول كلام يغضب ربنا ، فقام توضأ وصلى ركعتين لله ، وقعد يقرأ قرآن وفجأة الجرس رن .)
جلال : لميس !!
لميس : اذيك يا عمو
جلال : الحمد لله
لميس : انا جيت اطمن على عمرو وخالتى
جلال : انا بس اللى جيت ، عمرو وخالتك لسه هناك
لميس : خير هو عمرو مبقاش كويس
جلال : تعالى ادخلى يا بنتى
بعد ما دخلت ......
لميس : خير يا عمى عمرو كويس
جلال : الحمد لله
لميس : امال مجوش معاك ليه
جلال ساكت
لميس : مالك يا عمو عمرو حصله ايه
(. حكى جلال لـ لميس كل حاجة وغصب عنها عيطت .)
لميس : لا لا اكيد هيقوم ان شاء الله هيقوم
جلال : والله يا بنتى انا معنديش امل منظر عمرو وكلام كل الدكاترة بتقول ان عمرو مش هيقوم ، لاما هيعيش عمره كله فى عيبوبة لاما الاجل هينتهى قريب
لميس : ابوس ايدك يا عمو متقولش كده
جلال : الحمد لله على كل شئ
لميس : حضرتك هتسافر امتى
جلال : لا انا مش هسافر انا هحول لهم الفلوس وهما بقى يجيبوه ويجى
لميس : ان شاء الله يجوا بالسلامة
جلال : يارب
لميس : طب انا هقوم اروح وهعدى عليك كل يوم اطمن على حضرتك ولو احتجت اى حاجه كلمنى على طول
جلال : ربنا يكرمك يا بنتى (ومشيت)
*_____________________________________________**___________________________*
فى بيت لميس ......
تهانى : عملتى اللى فى دماغك برضه
لميس : فى ايه يا ماما مهما حصل عمرو هيفضل ابن خالتى وخالتى هتفضل اختك
تهانى : بعد كل اللى عمله فيكي مانتِ اللى رخصتى نفسك ليه
لميس : مالوش لزوم الكلام ده يا ماما انا روحت اشوفهم من باب الواجب
تهانى : يا سلام !! وهما قابلوكى ازاى بقى عادى طبعاً ولا كأن حصل حاجه منهم
لميس : محدش قابلنى الا عمو جلال
تهانى : تستاهلى ، رخصى نفسك كمان وكمان يا ست لميس
لميس : يووووه بقى
(. ودخلت لميس اوضتها وبعد شوية دخلت عليها تهانى لقيتها بتعيط .)
تهانى : يا بت متقطعيش قلبى ومتتعبنيش معاكى
لميس : انتِ مصممة تجرحينى
تهانى : يا بت انا بفوقك
لميس : يا ماما انا تعبانه ومش ناقصة
تهانى : ولما انتِ تعبانه ومش ناقصة روحتى ليه عندهم ، اهم مقبلوكيش
لميس : مقبلونيش لان عمرو مجاش ، عمرو ميت اكلنيكياً يا ماما
تهانى : يالهوى !! مات
لميس : مش بالظبط هو عايش بس على الاجهزة ولو الاجهزة اتشالت يبقى مات
تهانى : وجلال جاى لوحده ليه
لميس : جاى يببيع حاجات من املاكهم عشان يجيب عمرو هنا
تهانى : يعمل ايه هنا
لميس : عشان سواء مات او عاش يبقى وسط اهله
تهانى : يا حبيبي يا ابنى ، يا ترى كريمة يا اختى عامله ايه دلوقتى ، متعيطيش يا لميس
لميس : مش قادرة يا ماما ، زعلانه على عمرو ابن خالتى وعلى عمرو حبيب عمرى وعلى عمرو جوزى
تهانى : انتِ لسه بتحبيه
لميس : وعمرى ما هنساه يا ماما
تهانى : يا وجع قلب امك عليكي (وحضنتها)
*_____________________________________________**___________________________*
بعد اسبوع فى انجلترا ....
فى بيت يارا ...
أشرف : فضلتى اربع ايام متروحيش المستشفى وتقولى تعبانه وعديتها لكن متروحيش تودعيهم قبل ما ينزلوا مصر
يارا : كده احسن
أشرف : ليه بقى
يارا : مش عايزة احس ان دى ........... (وسكتت)
أشرف : ان دى ايه كملى
يارا : ان دى اخر مرة هشوف فيها عمرو
أشرف : لسه بتحبيه
يارا : حتى لو فاللى فات مات خالص مينفعش نحفر عليه عشان ترابه ميخنوقناش
أشرف : بس على فكرة عمرو ده كبر فى نظرى جداً
يارا : وايه اللى كبره بقى
أشرف : اولاً لانه قد كلمته وعدك انك لو سمعتيه وفضلتى عايزة الطلاق هيطلقك وبالفعل طلقك ، ثانياً لما حس انه مضايقك وفى نفس الوقت مش قادر يمنع نفسه انه يشوفك او يكلمك سابلك البلد كلها ومشى ، ثالثاً وده المهم انه لما شاف يامن كلمنى ووصلنى باخواتك اللى كنا هنتحرم منهم العمر كله ، مقالش انا مالى او ماليش دعوة او ميخصنيش وده معناه انه رجل بجد
يارا : رجل ولكن
أشرف : يعنى ايه بقى رجل ولكن دى
يارا : يعنى عمرو رجل جداً وجدع جداً ومواقفه كلها رجولة بس ممكن يعمل موقف يضيع كل ده
أشرف : دى وجهات نظر بس فى رأيى عمرو جدع جداً
يارا لنفسها >> يارب تقوم بالسلامة يا عمرو ، يارب اشوفك تانى
*_____________________________________________**___________________________*
فـى اسكندرية .....
فى المستشفى .....
لميس : ممكن يا خالتو ادخل اشوف عمرو
كريمة : اتفضلى يا بنتى
(. دخلت لميس لـ عمرو ، عمرو كان كله اجهزة لميس عيطت وقعدت قريبة منه وقدرت توصل لايده وتلمسها .)
لميس بدموع >> قوم يا عمرو متستسلمش للموت يا عمرو ، قوم عشان تتجوز انت ويارا وتفرح وتعيش حياتك وتخلف ، قوم عشان خاطر مامتك وباباك ، عارف انا مش زعلانه منك وعمرى ما دعيت عليك ، هدعى عليك ازاى انت ابن خالتى يالا يعنى سندى وضهرى وامانى ، اوعى لما تخلف بنت متسمهاش لميس ، لا لا سمى انت ويارا اللى انتوا عاوزينه ، يالا بقى يا عمرو كفاية نوم مزهقتش من السرير ده ، مزهقتش من الاجهزة دى كلها رد عليا يا عمرو وحشنى صوتك وحشنى كل حاجه فيك ربنا يقومك بالسلامه
*_____________________________________________**___________________________*
بعد كان يوم فى انجلترا ....
منة اتصلت بـ يارا ...
منة : هاى يارا whats up
يارا : i'm fine and you
منة : fine . كنت عايزة اطلب منك طلب
يارا : اوكى
منة : عايزة عنوان عمرو فى مصر
يارا : هتزوريه
منة : حاجة زى كده
يارا : بس انا معرفوش
منة : ازاى يا بنتى مش كان جوزك
يارا : انا وعمرو اتجوزنا فى القاهرة وهو حالياً فى الاسكندرية مش فى القاهرة
منة : بس sure تقدرى تعرفيه
يارا : هحاول اجبهولك
منة : ياريت يا يارا ضرورى بليز
يارا : اوكى (وقفلوا المكالمه)
يارا لنفسها >> انتِ غيرانه على عمرو من منة ؟ ليه مبتعترفيش لنفسك يا ياراا انك هتموتى من غيرتك على عمرو ؟ ليه مبتعترفيش لنفسك انك مروحتيش المستشفى ولا ودعتى عمرو لانك مش قادرة تستحملى الموقف لان عقلك مش مستوعب فكرة اختفاء عمرو نهائى ؟ لسه بتحبيه ، صح يا يارا بتحبيه ، متكابريش اكتر من كده متدوسيش على قلبك اكتر من كده ، يارب قومه بالسلامه
__*__*__*__*__

رجل ولكناقرأ هذه القصة مجاناً!