الحلقة التاسعة عشر

6.3K 158 6

الحلقة التاسعة عشر

جزء من حلقة سابقة :
أشرف : ربنا خدلك حقك يا يارا اللى حصلى محدش يتصوره
يارا بقلق : حصل ايه يا بابا
(. أشرف قعد على كرسى فى اوضة يارا والانهيار التام باين عليه .)
أشرف : ....................
*_____________________________________________**___________________________*
أشرف : رباب خدت اخواتك وهربت هاجرت ومش عارف هاجرت فين
يارا : هربت ؟
أشرف : احنا كان بقالنا فترة بتخانق على موضوع الهجرة ده وانا كنت رافض تماماً ، وانا الاسبوع اللى فات كان عندى شغل وغبت اسبوع رجعت ملقتش حد ولقيتها سابتلى ورقة بتعرفنى فيها انها هاجرت هى واخواتك ومحاولش ادور عليهم لانى مش هعرف اوصلهم
يارا : يعنى ايه الكلام ده يا بابا يعنى يحيى ويامن اختفوا مش هنشوفهم تانى
أشرف : للاسف دى كمان خدت نصيبها هى والولاد من الفلوس
يارا : يعنى كمان سرقتك
أشرف : لا هى ورثتنى بالحيا
يارا : متزعلش يا بابا حصل خير والولاد كنت تقدر ترجعهم بانك تبلغ انها خطفاهم
أشرف : مش عايز فضايح ومش عايز اخواتك يشوفوا امهم محبوسة
يارا : مش عارفة اقولك ايه يا بابا اللى حصل حصل وانا معاك اهو
أشرف : ربنا يخليكي ليا يا بنتى انا خلاص مبقاش ليا غيرك
بــعــد كـــام ســاعـــة ........
أشرف : يارا
يارا : ايوة يا بابا
أشرف : ما تكلمى عمرو وعرفيه انى هنا وخليه يجى اقابله هو الاول وحوار اهله ده انا هحله بعدين
يارا : خلاص يا بابا مبقاش ينفع
أشرف : ليه يا يارا انتوا سبتوا بعض
يارا سرحت والدموع اتحبست فى عينها
أشرف : مالك يا بنتى طمنينى عليكي
يارا : انا اتجوزت عمرو يا بابا وحصل بينا مشاكل وعايزة اطلق
أشرف : انتِ بتقولى ايه
يارا ساكتة وموطية دماغها
أشرف : اتجوزتيه وكمان عايزة تطلقى ليه متجوزاه من امتى
يارا : خمس شهور
أشرف : بتتجوزى فى السر عايزة تفضحينى على اخر الزمن (وضربها قلم)
يارا بدموع : يا بابا ماهو ..........
أشرف يقاطعها : ماهو ايه يا قليلة الادب ياللى مش متربية بترخصى نفسك وترخصينا معاكى بقى انا اثق فيكى وتروحى تتجوزى فى السر كأنك مالكيش اهل كأنك واحدة من الشارع
(. أشرف جاب يارا من شعرها ونزل فيها ضرب مُبرح وشتيمة ، أشرف كأنه كان بيطلع طاقته وخنقته من يارا ومن رباب بضرب يارا بوحشية كده ، يارا متكلمتش ومقالتش كفايه او سبنى بالعكس استحملت وخلت ابوها يطلع كل طاقته ويدوب كانت بتتألم ، سكوت يارا لفت انتباه أشرف وخلاه يتوقف عن الضرب بعد ما يارا اتخرشمت .)
يارا بتحاول تتكلم ودموعها سبقاها : خلصت ضرب ؟ طلعت كل طاقة غضبك فيا ؟ انا سيبتك تضربنى وتطلع زعلك كله فيا بس لو فى حد يستحق الضرب والاهانة يبقى انت مش انا ، انت جاى تحاسبنى على رد الفعل لكن نسيت تحاسب نفسك على الفعل نفسه عملت بالظبط زى اللى يروح يقطع الكورة عشان رماها فى الحيطة وردت فى وشه عورته ، انت السبب فى اللى انا عملته ده انت اللى وصلتنى لكده ، انا مرخصتش نفسى ولا رخصتك لانك انت اللى رخصتنى قدام عمرو واهله انا فعلاً اتجوزت كأنى واحدة ماليش اهل بس انا فعلاً ماليش اهل هما فين اهلى سايبنى لجدتى اللى عايزة حد يفكرها تاخد الدوا ولا لعمى اللى بيعامل ولاده على انهم مش ولاده رد عليا يا بابا سايبنى لمين رد وقولى مين اللى رخص مين ؟ انا يمكن حبيت عمرو بس اتجوزته بالعند فيك كان كل هدفى انتقم منك بسبب اهمالك ليا وعدم اهتمامك روحت ادور على الاهتمام والحنية والتقدير بره ولما لقيت ده مع عمرو وانت مش عايز تجى يومين حتى كان لازم اعمل انا كنت عايشة لوحدى فاهم يعنى ايه عايشة لوحدى يعنى محتاجة حد يهتم بيا يطمنى و يطبطب عليا انا يمكن اكون غلطت بس انت غلطت زيى واكتر منى انت السبب انى اغلط الغلط ده، انا عايزة افهم بتعاقبنى على ايه ، بتعاقبنى على ايه يا بابا
(. فى الجهة التانية كانت عائشة سمعت صوت أشرف ويارا وخناقهم سوا وقامت من سريرها بالعافية عشان تروح عند اشرف ويارا .)
أشرف : انتِ بتلومينى ، بتعاقبينى على غربيتى انا كنت متغرب عشان اعيشك العيشة اللى انتِ عيشاها دى
يارا بدموعها : هى الابوة انك تجيب فلوس وبس لو دى الابوة فى نظرك يبقى انت مالكش حق تحاسبنى دلوقتى
أشرف : اخرسى خالص متتكلميش ولا كلمة (وضربها قلم جامد من شدته يارا وقعت على الارض)
(. هنا دخلت عائشة .)
عائشة : يا حبيبتى يا بنتى بس يا اشرف متضربش البنت (ووطت على يارا تشوفها)
أشرف : فضحتنى وجابتلى العار سبينى اقتلها (وضرب يارا برجله)
عائشة : يالهوى بس يا اشرف البنت هتموت فى ايدك (وشدت أشرف وخرجوا بره اوضة يارا)
أشرف : ودينى لاربيها من اول وجديد مش هخليها تشوف الشارع (وقفل عليها الباب بالمفتاح)
_*_*_*_*_*_*_*_
(. قعد أشرف مع أمه .)
أشرف : كنتى فين يا امى وهى بتعمل العملة المهببة دى
عائشة : وانا يا ابنى هراقبها
أشرف : كنتى خدى بالك منها اكتر من كده
عائشة : انت عايز تغلط كل الناس اللى حواليك وانت متبقاش غلطان
أشرف : هو انا اللى الغلطان كمان
عائشة : ايوة انت اللى غلطان البنت محتاجه لحنية واهتمام وحب لقيتهم بره ولما قالتلك انزل يومين بس منزلتش سايب بنتك على راحتها من ناحية ومن الناحية التانية مبتحسبهاش وفوق ده كله حرمها من حبك وحنيتك واهتمامك كنت متوقع تعمل ايه يعنى
أشرف : يعنى انتِ عارفة انها متجوزة
عائشة : انا فهمت من كلامكم هات مفتاح الاوضة
أشرف : مش هتشوف الشارع ومش هفتحلها
عائشة : هات المفتاح يا أشرف خلينا نطمن على البنت
(. خدت عائشة المفتاح من أشرف وقالت لـ الشغالة تروح تطمن على يارا .)
الشغالة : يا ستى ستى الحقى الست الصغيرة
(. قامت عائشة وأشرف يجروا على يارا ودخلوا الاوضة لقيوا يارا مُغمى عليها وغرقانه فى دمها ، ابوها اتصل بالاسعاف اللى جت بسرعة البرق خدت يارا لـ المستشفى .)
*_____________________________________________**___________________________*
فـــى الــمستشــفــى .....
دكتور ١ : انا مضطر ابلغ
أشرف : تبلغ عن ايه بنتى مالها
دكتور ١ : ابلغ عن اللى ضربها بالوحشية والهمجية دى انت ابوها
أشرف : ايوة انا
دكتور ١ : انت اللى ضربتها
أشرف : يا دكتور دى ظروف عائلية وخرجت عن شعورى
دكتور ١ : اسمحلى اقول لحضرتك انك مُجرد من كل المشاعر ، بنتك عندها ارتجاج فى المخ من شدة الضرب ده غير انها اجهضت جنينها وحالتها خطيرة جداً ده غير طبعاً الكدمات اللى فى وشها وجسمها
أشرف : اجهاض وارتجاج فى المخ !!
دكتور ١ : انا مش هبلغ الا لما تفوق واشوفها عايزة تبلغ ولا لا بس انا لو مكانها اسجنك
أشرف : هى عامله ايه يا دكتور
دكتور ١ : نقلناها العناية المركزة وحالياً فاقدة الوعى ادعيلها تقوم بالسلامة عن اذنك
(. من شدة الصدمة أشرف مقدرش يقف وقعد على الارض فى طرقة المستشفى وافتكر اخر قلم ضربه لـ يارا اللى خلى دماغها تتخبط فى الحيطة وبعدين وقعت على الارض ودماغها اتخبطت فى الارض تانى وافتكر لما ضرب يارا برجله اكتر من مرة فى ضهرها وقال لنفسه ان اكيد الضربات دى هى اللى سببت الاجهاض والارتجاج .)
(. عائشة جاية من بعيد والشغالة مسنداها ولقيت اشرف قاعد على الارض بيبكى .)
عائشة بقلق : يارا حصل فيها يا اشرف
أشرف بدموع : يارا بتموت يا ماما
عائشة بدموع : موت بنتك يا اشرف موتها
أشرف : اسكتى انا مش مستحمل
عائشة : يارب قومها بالسلامة يارب
(. فضل أشرف وعائشة فى المستشفى جنب يارا .)
بعد كام ساعة .............
اشرف : خير يا دكتور بنتى عاملة ايه
دكتور ٢(دكتور تانى) : هى لسه مفقتش
أشرف : طب هى كويسة
دكتور ٢ : نوعاً ما كويسة احنا قدرنا نسيطر على الحالة الحمد لله لو فاقت هتقدروا تشوفوها
أشرف : هو الجنين كان كام شهر
دكتور ٢ : شهر وتلت اسابيع بس متقلقش الرحم كويس وتقدر تخلف تانى بس ممكن تتأخر عشان تحمل تانى
أشرف : الحمد لله على كل شئ
دكتور ٢ : ربنا يطمنك عليها عن اذنك
*_____________________________________________**___________________________*
بعد اسبوع .....
- يارا كانت فاقت واتنقلت من العناية
- أشرف مُقيم معاها فى المستشفى
- عائشة بتروح تشوفها كل يوم
*_____________________________________________**___________________________*
فى المستشفى ....
(. يارا اتنقلت من العناية على جناح خاص حجزه لها ابوها ، يارا معاها الممرضة وجدتها جوه وابوها واقف فى ريسبشن الجناح المُنفصل عن اوضتها ومُتردد يدخلها ولا ميدخلش .)
عائشة : حمد الله على سلامتك يا حبيبة قلب جدتك
يارا : الله يسلمك
عائشة : الحمد لله انك قومتى بالسلامه انا وابوكى كنا هنموت من القلق عليكي
يارا : هو انا ايه اللى حصلى
عائشة : مش مهم اللى حصلك المهم انك بخير
يارا : هو بابا لسه زعلان منى ؟
(. أشرف كان سامع كل كلامهم ، بس لما سألت عليه دموعه نزلت منه وقال لنفسه انها كانت هتموت بسببه ولما فاقت كانت مُهتمة تعرف ابوها زعلان منها ولا لا وقرر يدخل .)
يارا بفرحة الاطفال : بابا
عائشة : طب تعالى خليك معاها وانا هقعد شوية بره
(. وخدت عائشة الممرضة وخرجت .)
أشرف : سامحينى يا يارا على كل اللى حصل منى انا ظلمتك كتير وقصرت فى حقك بس انا مكنتش واعى للى بعمله السكينة كانت سرقانى مكنتش حاسس باللى كنتى فيه ، بعد ما كنتى هتروحى منى فوقت وفكرت وعرفت انى كنت ظالمك ، حتى لو انتِ غلطتى فانا برضه غلطت
يارا : بابا انا اتجوزت عمرو رسمى عند مأذون واشهارنا جوازنا انا معملتش حاجه حرام
أشرف : يعنى مكنتيش متجوزة عُرفى
يارا : لا والله يا بابا والقسيمة معايا فى البيت
أشرف : انا اسف يا يارا انى وصلتك انك تعملى كده
يارا : وانا اسفة انى عملت كده ، مهما كانت الظروف مكنش ينفع اعمل كده
أشرف : انتِ عايزة تطلقى ليه
(. يارا حكت لـ ابوها كل اللى حصل مع عمرو ، حاول يقنعها تسمعه بس هى رفضت واصرت تطلق وابوها وعدها انها لما تخرج من المستشفى هيقابل عمرو ويجبره على الطلاق .)
_*_*_*_*_*_*_*_*_*_
بعد حوالى ساعتين .....
(. يارا كانت لوحدها والدكتور الاولانى جه عشان يسألها يبلغ ولا لا .)
دكتور ١ : اخبارك ايه النهاردة
يارا : الحمد لله يا دكتور
دكتور ١ : انا عملت تقرير بحالتك عشان لو عايزة تبلغى
يارا (مش مركزة فى كلامه) : هو انا حصلى ايه يا دكتور
دكتور ١ : انتِ اجهضتى البيبي
يارا : هو انا كنت pregnant (حامل)
دكتور ١ : انتِ مكنتيش تعرفى
يارا : لا
دكتور ١ : ازاى انتِ كنتى حامل فى حوالى شهرين
يارا بدموع محبوسة : انا كان عندى مشاكل عائلية ومركزتش انى حامل
دكتور ١ : محصلكيش اى اعراض
يارا : اه حصل بس شكيت انها من التوتر والقلق اللى كنت فيه
دكتور ١ : ربنا يعوضك خير ان شاء الله
يارا : يارب
دكتور ١ : بصى يا بنتى انا ضميري المهنى والانسانى يُحتم عليا انى ابلغ بس عشان هو ابوكى لازم اسألك عايزة تبلغى ولا لا
يارا : انا مش فاهمه حاجه هو بابا عمل ايه
دكتور ١ : كل ده وتقولى عمل ايه
يارا : انا غلطت وهو عاقبنى بالضرب
دكتور ١: المشكلة مش فى الضرب المشكلة فى اللى حصلك من الضرب انتِ كان عندك ارتجاج فى المخ والاجهاض حصل بسبب الضرب اللى تعرضتيله انتِ كان ممكن تروحى فيها
(. يارا اتصدمت تماماً لان كل الحاجات دى كانت مجهوله وغير متوقعة بالنسبه لها وغصب عنها دموعها نزلت منها .)
يارا : لا يا دكتور انا مش هبلغ
دكتور ١ : اوكى زى ما تحبى
يارا : ممكن اطلب من حضرتك طلب
دكتور ١ : اتفضلى
يارا : ممكن بابا ميعرفش انى عرفت حاجه
دكتور ١ : اوكى حاضر عن اذن حضرتك (وخرج)
يارا لـ نفسها >>> يعنى انا ازعل على ابنى اللى مات بسبب ابويا ولا ازعل من اللى عمله فيا ابويا ولا ازعل من عمرو ومن اللى عمله فيا ، يارب انا تعبت ارحمنى يارب برحمتك
*_____________________________________________**___________________________*
فى بيت يارا .....
جرس الباب رن ...
عمرو : مساء الخير
الشغالة : مساء النور
عمرو : اقدر اقابل يارا
الشغالة : انت جوز يارا
عمرو : ايوة انا
الشغالة : يارا مش هنا
عمرو : سافرت
الشغالة : لا دى محجوزة فى المستشفى
عمرو : مستشفى !! ليه يارا مالها هى فى مستشفى ايه
الشغالة : انا هقولك على اسم المستشفى بس خد بالك عشان باباها معاها وممكن يتعصب عليك
عمرو : هو عرف
الشغالة : اه عرف وضربها لحد ما تعبت ودخلت المستشفى عموماً خد بالك
عمرو : اوكى
(. وقالتله على اسم المستشفى .)
*_____________________________________________**___________________________*
فى المستشفى ....
(. راح عمرو استقبال المستشفى وعرف الجناح اللى يارا فيه ، راح بعد كده سأل الدكتور على اللى حصل لـ يارا وعرف بموضوع الضرب والارتجاج والاجهاض ، استنى كتير لحد ما باباها خرج وسابها لوحدها وبعد كده دخلها ، عمرو خبط على الباب ودخل ، يارا كانت شبه نايمه ومسمعتوش ، عمرو دخل وقرب منها وملس على شعرها ، عمرو شاف الكدمات اللى فى وش يارا ، شاف شكلها اللى متغير تماماً افتكر كلام الدكتور عن اللى حصلها وبدأت دموعه تنزل منه على اللى سببهولها، بعد دقايق قليلة يارا صحيت واول ما فتحت لقيت عمرو .)
يارا : انت بتعمل ايه هنا
عمرو بارتباك : انا كنت جاى اطمن عليكي
يارا : مش من حقك تطمن عليا
عمرو : انتِ مراتى يا يارا
يارا : اخرج بره يا عمرو ومتخلنيش اشوفك تانى حرام عليك بقى مش مكفيك كل اللى حصلى بسببك
عمرو : انا اسف بس صدقينى ............
يارا تقاطعه : من غير ما تتكلم انا مش هصدقك متحاولش
(. هنا كان اشرف رجع .)
أشرف : انت مين
يارا : ده عمرو يا بابا
أشرف : انت بتعمل ايه هنا
عمرو : انا كنت جاى اطمن على يارا
أشرف : انت ليك عين تجى هنا بعد اللى عملته
عمرو : انا معملتش حاجه غلط انا متجوزها على سنة الله ورسوله
أشرف : واللى عملته معاها كان ايه
عمرو : فى ظروف اضطرتنى اعمل كده وهى مش عايزة تسمعنى
يارا بدموع لـ اشرف >> خرجه بره يا بابا مش عايزة اشوفه
(. خرج أشرف عمرو وعمرو طلب يتكلم معاه ، واشرف قاله انه هينزله فى كافتريا المستشفى كمان نص ساعة .)
*_____________________________________________**___________________________*
فـى كـافتريا المستشفى .....
عمرو : انا عارف انى غلطان وان مكنش يصح اتجوز يارا بالطريقة دى بس انا ويارا بنحب بعض ومستحملناش اننا نتظلم بسبب الكبار
أشرف : مكلمتنيش ليه
عمرو : يارا كانت كل يوم تأكد عليا انك مش عارف تنزل او مش عايز تنزل ولما قابلنا اخو حضرتك هزأنا واهنا وقال علينا كلام مينفعش يتقال وابويا عاند هو كمان وقال ان مهما حصل مش هيجوزنى يارا وانى لو اتجوزته هيعيش غضبان عليا
أشرف : بغض النظر عن كلامك ، وبغض النظر عن انتوا صح او غلط انت اتجوزتها ليه تتجوز عليها
عمرو : والله الظروف اضطرتنى لكده انا محبتش ولا اتمنيت الا يارا بس انا نفسى تسمعنى
أشرف : اى نعم الجواز بالاسلوب ده مش عاجبنى وحارق قلبى بس الطلاق اصعب ، صعب اوى الاب يشوف بنته مُطلقة
عمرو : حضرتك الحمد لله مُتفهم الامور وحياة يارا عندك خليها تسمعنى
اشرف : لما تخرج من المستشفى ان شاء الله هنشوف الموضوع ده
عمرو : انا متشكر جداً جداً جداً لحضرتك وبعتذر عن اللى حصل منى
اشرف : اللى حصل حصل ، بس خلينا متفقين ان لو يارا مش عايزة الا الطلاق يبقى هطلقها انا مش هغصب بنتى على حاجه ومش هعملها غير اللى هى عيزاه كفاية اوى كل اللى حصل منى
عمرو : بس متوافقش على الطلاق الا لما هى تسمعنى لازم تسمعنى
اشرف : ربنا يسهل
(. تبادلوا الارقام واشرف طلع لـ يارا وعمرو مشى .)
*_____________________________________________**___________________________*
تانى يـوم فى اسكندرية ....
كريمة : انت هترجع لميس يعنى هترجعها
عمرو : مش هرجعها يا ماما
كريمة : انت كده هتخسرنى اختى للابد
عمرو : مهما حصل هى فى النهاية اختك بس انا لو رجعت لميس هخسر يارا عمرى كله
كريمة : يعنى انت هتكمل مع يارا
عمرو : انا مش هسيب يارا حتى لو كان فيها موتى
كريمة : انت اتجننت ولا ايه هى اصلاً مش عيزاك هتسيب اللى عيزاك وبتموت فيك وتروح تجرى ورا واحدة مش طايقة تسمعك
عمرو : يارا مراتى وانا بحبها ومش هسيبها ومش هرجع لميس
كريمة : خليك فاكر كلامك ده وصدقنى انت الخسران ، فكر قبل ما تخسر كل حاجه يا عمرو
*_____________________________________________**___________________________*
بعد فترة خرجت يارا من المستشفى .....
فى بيت يارا ....
(. يارا نايمه فى اوضتها ، اشرف اتصل بـ عمرو عشان يجى يشوفوا هيعملوا ايه .)
بعد ما عمرو جه ...
عمرو : هى يارا فين
اشرف : يارا جوه فى اوضتها
عمرو : هى وافقت فعلاً انها تقعد معايا وتسمعنى
اشرف : انا فتحت معاها الحوار اكتر من مرة وهى رفضت بس اخر مرة قولتلها طيب هنطلقك بس تسمعيه قالت لما ارجع هفكر
عمرو : يعنى فى احتمال لو شافتنى دلوقتى متسمعنيش
اشرف : هنشوف انا هدخل اناديها
(. دخل اشرف وقال لـ يارا ان فى ضيوف جايين يشوفوها ، غيرت يارا هدومها وخرجت ، واول ما شافت عمرو معرفتش تاخد رد فعل ومعرفتش تقول حاجه فـ سكتت .)
أشرف : انا عارف ان اللى شوفتيه واللى حصل كفيل يوصلكوا لـ الطلاق بس عمرو عنده كلام لازم تسمعيه
يارا : انا مش عايزة اسمعه
أشرف : بصى يا حبيبتى اسمعيه ولو بعد ما سمعتيه فضلتى مُصرة على الطلاق هيطلقك
عمرو : انا بوعدك يا يارا
يارا : اوكى
(. خرج اشرف وساب يارا وعمرو لوحدهم .)
عمرو : انا اسف على كل اللى حصلك بسببى
يارا : قول اللى عندك يا عمرو بدون مقدمات
عمرو : انا عايز اعرفك الظروف اللى اتعرضت لها
يارا : اتكلم يا عمرو
عمرو : ....................

رجل ولكناقرأ هذه القصة مجاناً!