خطايا وغفران || باللهجة العراقية

"بذرة أمل..لم تفنى أو تكتمل" Chpt 43

#خطايا_وغفران
#للكاتبة_زهراء_شلتاغة

ملاحظة غير مهمة ؛
هاي لازم تكون تكملة ذاك الفصل لهالسبب الرقم نفسه ماغيرت بس العنوان🌚

صاحت نور وإيدها ملطخة بالدم ؛

_يمة إبني راح مني راح إبني ! .

الدم يفيض من أسفل نور ولطمت على خدها بيدها ، توسخ خدها بالدم ، لطمت نادية هيَ الثانية من شافتها وراحت گعدت يمها وصاحت ؛

_ولج لاصيحين على كيفچ إن شاء الله مابي شي بس لاتنهبطين لايصير بي شي .

نصدم خالد من منظر الدم اليفيض من نور ووعى على نفسة شوي .. رجع كم خطوة للوراء .

لزمت نور نادية من كتفها وسندت راسها عليها ، لزمت بطنها من جوة وتلطخت إيدها بالدم ..باوعتلها بعيون دامعة متوسلة وبنبرة راجية كالت ؛

_عمة الله يخليچ إبني راح يموت شوفيلي چارة الله يخليچ ماريدة يموت ماريد .

دخلت سميرة على صوت الصياح وشافت الدم ينزل من نور ، لطمت على راسها وصاحت ، إنتبهت عليها نادية صاحت إلها ؛

_يا أم باسم لحگيني شوفي القابلة أم محمد هنا لو لا لحگيلي ختشوفلنة چارة .

بدة خالد يحس بتأنيب الضمير من شاف منظر نور وهيَ تلوب بروحها والدموع تفيض من عيونها ضعف مايفيض الدم ، منظرها وهيَ على وشك فراق جزء من روحها بسببه خلاه يوعى شوي على روحة وشعر بالألم .

طلع من الغرفة وگعد بالكليدور وحط إيديه على گصته ودنگ راسة .. بدأ يحاول يستجمع شتات نفسه ويندم عالي سواه ، ماتوقع نور ترباية إيده يجي يوم يسوي بيها هيج ، شي بداخلة يبريها من إلي صار ويخلي يحس بالندم والقهر عالي سواه .

دخلت القابلة أم محمد للغرفة وراحت للغرفة وسدت الباب .. دقايق مرت وماعاد يسمع غير صياح نور ونحيبها وهيَ تصيح وتتوسل مينزلون الولد ، بدأ گلبه يعتصر من الألم .

بهالأثناء شاف هناء دخلت للبيت .. چانت دتركض على صوت صياح نور وتريد تدخل للغرفة بس إستوقفها صوت خالد وهو يصيح ؛

_وين مولية تعالي هنا لاترحين .

وگفت هناء وإلتفتت لخالد ، كام من مكانه وراح يمها وگف گدامها .. رفع أيده وأشر بيها عالباب ، باوع إلها بنظرة حادة يتراشق منها شرار الغضب وبنبرة حادة گاللها ؛

_خمس دقايق تلمين چوالاتج وچوالات أهلچ وماتبقون دقيقة بهالبيت إنتِ وأهلچ .

بقت هناء صافنة تباوع لخالد ومامصدگة الكلام ، ردت عليه بذهول ؛

_بس خ...

قاطعها بصياح وعصبية ؛

_ماكو بس دقيقة زايدة متبقون بهالبيت بعد وتعالي گلي لأخوچ حتى لو بلعته الگاع وأخذته أشگ الگاع وأطلعه منه وموته تصير على إيدي فاهمة ¿ ، يلا روحي لمي الغراض وذلفوا من گدامي يلا .